|
|
 المفـراك هذا القاتل الصامت( السامط)
|
بإختصار شديد يا جماعة وزي ما بيقولوا أخوانا المصرين( قولي على بلاطه) يعني جيبوا من الآخر... بإختصار شديد المفراك بتاعنا السوداني داك البيعملوا بيهو اللقمة والعصيدة ويفركوا بيهو ملاح النعيمية وملاح السلج وملاح الويكة.. هذا المفراك قاتل بطئ ومساعد على أمراض عديدة قابلة للنمو منها السرطان وأمراض أخرى في المعدة وفي النظر وفي الكلى...وسرطان المرئ
نجي للحكاية بقا..
المفراك في السودان سيد الموقف في عمل العصيدة، وفي ملاح السلج وملاح الويكة... رغم ظهور كثرة الخلاطات والسحانات وأنواعها المتفرعة...
ليه؟
إذا سألت ربة بيت مقتدرة وأخصائية في ملاح السلج تقول لك أنا سلجي سلج مفراك وليس خلاطة يابوي؟
ليه متعصبة كدة للمفرا ك مع إنك ليس من جيل المفراك، حيث كان المفراك يعمل كل شئ.. وهو سيد الموقف؟
قالت: يا سيدي ملاح السلج الجيد نلايـقو بالبامية الخضراء وليس الويكة الناشفة، ممكن نلايقو بالويكة الناشفة، لكن الويكة الناشفة تغبش لونو كدة.. هو يطلع ملاح ملاح وليس ملاح ملاح..
والحديث لها
قالت ملاح السلج ألذ حاجة فيهو حبوب البامية يظهر منها جزء في شكلو.. تديهو منظر.. وهذا لايقدر عليه غير المفرا ك..
أما ملاح السلج المخلوط بالخلاطة فالخلاطة تكتل عيون وحبوب البامية فيهو وتخليهو ممتول كدة..و( ممزرق)...
قلت لها بحس الصحفي وليس حس المهندس..
طيب ما ممكن في السودان نستغنى عن المفرا ك هذا القاتل الصامت في عمل العصيدة؟ قالت يصعب على كل بيت، ولكن يمكن المهندسين تفكروا لنا في بديل يقى الناس شرور السرطان وتوابعه.
.......................
نخش في الموضوع
قبل شهرين قابلت في الإمارات بالصدفة رئيسى المباشر زمان في هلتون الخرطوم قسم الهندسة. وقد كان وقتها كبير المهندسين في عام1984 وهو بريطاني الجنسية يدعى ( باتريك ويير) وقد وجدته فعل الدهر فيه فعلته ولكنه كقوة خلاقة ومقدرة وعزيمة و( همة وفنجرية) وجدته كما هو بل زاد على ذلك.. كان حاد الذكاء شديد الفراسة قوى العزيمة... يا للهول.. الذكاء والزكاء يجعله دائماً ملولا. وجدته قد حول من الهندسة الى الطب، وجدته في مؤتمر.. على هامش المؤتمر ناديته.. قال لى هو لايزال يحب السودان لأنه عاش فيه 10 سنوات.. في هلتون الخرطوم لمان كان هلتون هلتون.. وقال لى شال معاهو مفاريك للندن.. وعمل هذا البحث قبل سنتين من مفاريك جديدة...
كان يحترمني في السودان غاية الإحترام بالرغم من أنه رئيسي، ولا يملى على أمراً في العمل إلا بعد أن يستأذنني.
....
وبمناسبة مستر ( باتريك ويير) نقول النكتة دي..
وقتها أوقف النميري شراب الخمر.. وأراقها في النيل، إغرورقت في مياه المقرن ومنعها عن الأجانب. واباحها للبلطي والقراقير في قاع الأبيض والأسود. والإنجليز معظمهم لايعيشون غيرها قاتلها الله.. ولكن شربها عندهم ليس كعندنا نحن المبتلين بها من السودانيين. حيث كل شئ عندنا مدلوق ومبهول. شبع.. لا.. فنجان صغير مع الغداء مع العشاء قزقزة كدة...
المهم زوجة باتريك كانت تشرب.. كاد عقلها يذهب بدون خمر...وكانت تسكن مع زوجها في جناح دائم في الهلتون..
جنيهات معدودة والملاعين منا جابوها ليها من أحراش الفتيحاب.. ( عرقي سوداني خالص.. بكر)
واحد زميل عمل من الإسلاميين المتشددين، كان عندو نظرية، قدر ما ناقشناه فيها موش راضي يتزحزح عنها... وهي( أي واحد في الدنيا.. أبوه ما عقد على أمو بالطريقة الإسلامية، يعتبر ود حرام؟)
فقلت ليهو هسه يا حسن حسب نظريتك دي. رئيسنا باترييك ويير ده أبوه ما عقد على أمو بالطريقة الإسلامية.. العقد المعروف الشاهدين وخلو المحل والمهر والولي ... هل يعتبر ود حرام؟
فقال لى سليمان... ها ها ها.. ده أكثر واحد ود حرام.. ده ود حرام ونص وخمسة... بالله عليك الله يا منصوري لو هو ما ود حرام يخلي ناس ( اب هجمة) يجيبوا ليهو العرقي لى مرتو من الفتيحاب وهو قاعد يتفرج؟ هسه دي موش عمايل ود حرام؟
والله أنا ود الحرام من كراعو أعرفو؟.. يعرفو من كراعو كيف ما عارف؟
المفرا ك هذا القاتل الصامت :-
مستر وير كما ذكرت مولع في البحث، فالتحق بمؤسسة تعمل في الجينات والتحاليل والأورام في لندن، وقد ذكر لى هذا الخطر الداهم من المفراك وذكر لى هذه الأسباب:-
1 المفراك له عصاية يمسك منها ورأس يشبه رأس السهم هذا الرأس مثبت بمسما ر نقالة صغير أسود من الحديد الطرئ جداً من أسوأ أنواع الحديد سريع الأكسدة، هذا المسمار هو رأس البلاء.. والسرطان قد يبدأ بشئ بسيط ، ولكن يزيد، وكذلك هذه الأكسدة تسبب عسر الهضم مع عوامل أخرى مساعدة طبعاً.. السرعة والغش في التجارة هو الذي جعل الصناعية يعملون هذا المسمار المسم الضار المؤذي.. زمان المفكراك كان يخرموا راسو بالنار ويدخلوا شريحة من الخشب نفسه كخابور يربط العصاية مع رأس المفراك... هسه كل المفاريك تقريباً فيها هذا المسمار المؤذي..
ونحن السودانين ناكل ساكت
والتاني يقول ليك.. ( يازول هيي مافي شئ بيغلب النار)
والثالث يقول ليك( قول ياشافي ياكافي وأكل)
والرابع يقول ليك( بلاش سفسطة وفلسفة، في ناس عصيدة ذاتو ما لاقنها، كان راس المفراك فيهو مسمار والله مافيهو؟
................
وهل واحد زائر يقدر يسال ناس البيت المعزوم فيهو ويقول ليهم: يا جماعة مفراككم الفركتوا بيهو هذه العصيدة شكلو كيف؟
والله يقدر يسألهم العصير العملتوهو لينا مويتو من مياه سوبا؟ والله موية ماسورة ساكت؟
النقطة الهندسية الأخرى التي ذكرها مستر ويير وهي نقطة هامة وقاتلة، وهذه تسبب التسسم والإسهال والنزلات المعوية وهي
الحفرة التي ينزل فيها راس المفراك مع العصايا غالباً تكون عشوائية وهنالك فجوة وخلوص ونهايتها في راس المفراك مقفولة تصلح حفرة ومستنقع صغير لتجميع الفضلات لاتصل اليها يد الغاسلة وقتما تغسل المفرا كن مما يجعلها بؤرة صالحة لتنامي الفطريات وجرثومة السلامونيا.. خاصة إذا ملاح الويكة المفروك بالمفراك فيهو لحمة مفرومة نامة؟
هذه الأشياء ساقها لى مستر باتريك.. وهو مهموم بيها شديد لشيوع استعمال المفراك عند قطاع واسع من السودانيين...
أنا قلت ليهو يامستر ويير بالله عليك الله هو المفراك براهو البيقتل الناس؟
المفراك القاتل الصامت: يقتل في صمت
وقلنا القاتل ( السامط) من سمط يسمط سامط.. يقول ليك( والله أسمطك كف أوريك النجوم) وكم حادثة وحدة سودانية سمططت زوجها بالمفراك فأردته قتيلاً.. خاصة إذا ناوشها جنب حلة الملاح؟ ماعارف السودانيين كلمة سمط دي جايبنها من وين لكن برضو كلمة دثمة، ما افتكر أي لغة أخرى تديك معنى طاعم زيها ومعبر واللغة وليدة الواقع زي ما بيقولوا ناس الآداب...
نسأل الله السلامة للجميع في هذه السنة الجديدة نسأل الله لهم السلامة من ( القاتل الصامت والقاتل السامط)
هذا ما أراده مستر ويير أن أبلغه لأهله السودانيين..
|
|
 
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
يا إما الناس تتوقف عن استعمال المفراك... أو تشترى مفراك مافيهو المسمار المؤذي القلناهو
وتشتري مفراك يسهل نظافته...
بالمناسبة هو آله صغيره ولكن ضرره كبير للغاية... عشان كدة دائماً ندق على الحتة البي تقدم معلومة للناس تفيدهم وتبعدهم عن شبح المرض.. مساهمة من أجل رفع الحياة العامة..
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: Ameer Elfatih)
|
تسلم يا أمير وشكراً على الصورة المعبرة عن الموضوع
وصورة المسمار اللعين فيها ظااااااهر للعيان
...............
لكن يا أمير معقول هو فيهو إنتايه( مفراكة) وضكرها كنش...
طيب ليه ما يكون الضكر مفراك والإنتاية مفراكة
أنا شايف ناس برضو مرات مرات للمفراك يقولوا كنش يعني نفس الشئ لافي ضكر ولافي انتاية
نحن غايتو في الشمالية نقول مفراك... ممكن برضو مفراكة
شايف فى الصورة مفروزة كومين للبيع
واحدات غلاد يمكن ديل الكنش. وواحدات رقاق يمكن ديل المفراكة... لكن أنا أظن حسب زوقك مافي ضكر ولافي انتاية حسب زوقك تشتري..
يمكن العصيدة تحتاج لمفراك عصايتو غليدة شوية عشان بيكردوها....كرد
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: هاجر التهامي ياسين)
|
منصور والله كلامك ده قوى جداَ ،، والله يديك الف عافية ،،
ويما أن المفاريك بصفة إجمالية تشكل حوالى 80% من أكلنا فى الشمالية ( كلها بدون العصيدة ) ،، وكذلك بما أن معظم قرانا فى بلدنا هنالك فى أقصى الشمال يغسلون عدة المطبخ بما فيها المفراكة بموية جردل وليس بموية حنفية ،، فإنه يمكننا إعتبار أن المفراكة تساهم بصورة أو بأخرى فى إنتشار السرطان فى بلادنا هنالك .
تحية خالصة لك ولضيوفك ،،
ماهر
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: Mahir Mohammed Salih)
|
ماهر تسلم اللي أنك هبشت لب الموضوع
.........
إنت عارف يا ماهر موية الجردل دي فيها جنس مشاكل.. بواقي أكل.. باقي صحن السلطة لما يغسلوهو. ورقات جرجير طايرة بي فوق باقي عصيدة حايمة في موية جردل موية الغسيل.. وكدة؟
لو موية ماسورة بي يكون قوة اندفاع المياه يجرف الأوساخ عن المفراك. لكن الغسيل البطئ من جردل يزيد الطين بله
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
منصورى موقد نار
تحياتى وين ليك مدة
والله موضوعك شيق وطوالى مشيت على المطبخ علشان اشوف مسيمير السناحى دا ..وانا طوالى استخدم الكنش ابو راسين دا فى فرك العدس والملاح ..انازلى صورته هنا دا ..لكنى وجدت مفراكتى او الكنش مكان المسمار مغطى بقطعة خشبية وحمدت الله وقلبى رقد ..
لكن بالله يا منصورى شوف اهتمام الخواجة دا وقوة ملاحظته انحنا نفرك ساكت وهو يتابع فى ادق التفاصيل ..
علشان كدى هم متقدمين ونحن متاخرين ومرضانيين وتجد الجماعة اياهم يشتمونهم فى المساجد اللهم دمرهم اللهم اللهم .. وهم الواحد فيهم تلقاه ماسك مكرفون الخواجة ولابس ساعتهم والكهرباء والمروحة فوق راسه تسوى فرفر تقول عملها ابوه ..
اشكرك وطولنا من كلام البلد نلاقيك كيف وبتين ..
| |
|
|
|
|
|
|
|
 Re: المفـراك هذا القاتل الصامت( السامط) (Re: الكيك)
|
سلامات يا قريبي صديق المنصوري، ومشتاقين وليك وحشة، وكل سنة إنت وأسرتك الكريمة بألف خير
أشكرك على المعلومات الصحية عن مساويء المفراكة، وبوستك دمو خفيف، وأيضاً أشكر المتداخلين على المعلومات الاضافية
عن لغتنا العامية لبعض أسماء المفراكة، وأيضاً اشكر ضيفتك الحنكوشة هاجر التهامي عن معلومة المفراكة الكهربائية، وقطع الشك
صناعة صينية والله الصينيين ديل حريفين جداً، ويا ريت يا هاجر تنزلينا صور للمفراكة الكهربائية بتاعتكم
ضحكني كلام صاحبك يا منصوري اللي قال:"من كرعينو أعرفو ليك" 
وأيضاً مداخلة الكيك اللذيذة:
| Quote: ساعتهم والكهرباء والمروحة فوق راسه تسوى فرفر تقول عملها ابوه .. |
سأعود إن شاء الله لهذا البوست، وعندي قصة طريفة سأحكيها لكم عن بعض أسماء معدات المطبخ بعاميتنا السودانية
وتحياتي لك ولصاحبك الخواجة ولضيوف بوستك الكرام
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: النذير حجازي)
|
والله يا خوى النذير محمد حجازي وقريبنا
هاجر التهامي دي
دخلت البوست بتاعي توووش وسلمت على أمير وقالت هاتوا لى مفراكة وأنا ماجابت خبري.. ولكن برضو خير وكت دخلت برضو خير..الحوش كبير
والله يا النذير مشتاقين شديد كيف حالك مع الغربة وكيف حال الأهل في السودان وكيف حال الموقع العملتو للمناصير..
.............
الزعيم الكيك.. مشتاقين يا رجل وشكرا على اثراء البوست بالملاحظات الزكية.. وأنا كما تعلم الموضوع عن الكنش والمفراك والمفراكة ولكنه هبش حاجات كثيرة في نواحي مهمة يلاحظها القارئ المتمعن ويشم رائحتها الصحفي زيك.. ويذوق مدها قلم كقلمكم..
والحمدلله إنو مفراككم طلع مافيهو هذا المسمار اللعين.. يبدو أنكم ما بتشتروا مفاريك من سيوبر ماركت بلد الخيرات.. لأنو مفاريكو كلها فيها مسمار والولد الهندي هاشم الماسك الدكان ماجايب خبر للموضوع
..........
قلت ليك والله لازلت أتذكر إنطباعك عن الأستاذة حرمكم عن البوست الذي أنزلته أنا زمان عن ( المعلم أيام زمان) وأنها تضحك لامن تموت...ولقد ذكرت لى أنت ذلك وقتما تقابلنا في السفارة. وتقابلنا في مخبز الشعلة الذهبية...
قلت ليك بخصوص الكتابة والله ياخى مشغولية العمل الشديدة خالص غايتو ربنا يهون.. شكرا ليك مرة تانية على إثراء البوست.. تسلم
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
بعدين يا النذير حجازي قريبي.. البت دي ما أظن حنكوشة.. الحنكوش ده هو الما عارف أي حاجة في أي حاجة.. لكن يبدو إنك تقصد عشان صغيرة السن.. هي صغيرة السن لكن يبدو أن عقلها كبير وفكرها وشجاعتها بين السطور التي تكتبها في بوستات أخري.. صحيح نحن من أعضاء سودانيز القدماء ومرات نغيب شوية لكن خلال هذه الغيبة نلاحظ ونقرأ من بعيد لى بعيد ولانكتب... الكاتب مرات يحتاج يكون مستمع ومرات يحتاج يكون متلقي ومستمع ومنصت. برضو الإستماع للآخرين والإنصات برضو يعتبر كتابة صامتة محتشدة متمدده عبر فيافي أخرى واعدةتنبلج في مساحات أخرى
الشئ اللمستو في هاجر تهامي يا النذير أنها سوف يكون لها شأن معرفي كبير إن شاء الله لأنها تهبش مواضيع يخاف منها الناس.. والكاتب الجيد والمبدع لايحب أن تهبشه قيود، فيتمدد قلمه بلا وجل ولاتردد من هنا تنبع قيمة الحرية في الكتابة والتعبير والحرية مطلب شعوب اليوم وحق الحياة قد تخطته الشعوب الآن..فصارت الشعوب تهيم بحق الحرية والتعبير وهي تلج حق الحرية بجداره... فهاجر يا النذير أخذت حريتها في يدها وصارت تكتب نسأل الله أن يحفظها
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
| Quote: وأيضاً اشكر ضيفتك الحنكوشة هاجر التهامي عن معلومة المفراكة الكهربائية، |
الاخ النذير حليل زمن الحنكشة, والله من ادينا ضهرنا لبلدنا تاني ابد ماشفنا راحة,
اي انا قريت في جامعة الحناكيش, وكنت حنكوشة للاخر ومدلعة ومرطبة, بس من وصلت
السعودية دي لقيت ليك جنس عذاب, ابتدا من المطبخ ومرورا بنظافة البيت وغسيل
الملابس يعني حاجة تخلي الواحدة اخشن من البنا البناول الطوب.
والله لاوراك رمضان وعذاب الوقفة في المطبخ.
مع تحياتي لك اخي النذير
هاجر
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
منصوري لك العتبى حتى ترضى, ليس تجاهل حقت مصطفى محمود.
ولكن قلت المسك هو الاطيب لكي اختاره في اخر المداخلات
| Quote: الحنكوش ده هو الما عارف أي حاجة في أي حاجة |
منو القال الكلام دا دي حكاية ما حقيقة.
| Quote: هي صغيرة السن لكن يبدو أن عقلها كبير وفكرها وشجاعتها بين السطور التي تكتبها في بوستات أخري |
حكاية صغيرة سن دي ما اظنها ولكن اشكرك على هذا الاطراء الجميل وياريت اكون قدر الكلام دا
ودي مسئولية لازم اتحملها طالما دخلت هذا المجال.
شكرا اخي المنصوري
ولك مودتي
هاجر
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: هاجر التهامي ياسين)
|
شكرا هاجر على المرور بي جاي مرة تانية
.................
أها يا شباب عايزين بقا نتكلم عن المفراك السامط البيسمطوا بيهو
..........
عايزين نتكلم عن المفراك كقناعات سودانية ما عايزين يتزحزحوا عنها حتى ولو غلط موش المفراك.. الثوابت المتغيرة والثوابت الغير متغيرة واشياء من التراث واشياء من حصيلة التطور
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
Quote: الاخ النذير حليل زمن الحنكشة, والله من ادينا ضهرنا لبلدنا تاني ابد ماشفنا راحة,
اي انا قريت في جامعة الحناكيش, وكنت حنكوشة للاخر ومدلعة ومرطبة, بس من وصلت
السعودية دي لقيت ليك جنس عذاب, ابتدا من المطبخ ومرورا بنظافة البيت وغسيل
الملابس يعني حاجة تخلي الواحدة اخشن من البنا البناول الطوب.
والله لاوراك رمضان وعذاب الوقفة في المطبخ.
مع تحياتي لك اخي النذير
هاجر |
عزيزتنا هاجر والله الجاتك فى حنكشتك سامحتك 
بس يا هاجر شايفك طنشتي موضوع صورة مفراكتكم الكهربائية، وما عارفك بتهظري وللا موضوع المفراكة الكهربائية دي جد
لأني أنا ما مواكب، وفى نفس الوقت فضولي جدددددددددددا
تحياتي لك
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
لمفراك السياسي.. هو الشخص الذي يفرك التانيين ليسود هو
والمفراك الإجتماعي هو الذي يسعى في الفتنة بين الجيران والناس
ومفراك البيزنس هو الشركة أو الشخص اللي يفرك عصارات جهد الضعفاء
والمفراك الصحفي هو الشخص اللي يكتب ويصطاد في الموية العكرة وهنالك مفاريك اخرى كلها لانحتاج لها.. إذا كان الرجل سمحاً سهلاً
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: منصوري)
|
الاستاذ المنصورى
لك التحية
ماشاء الله عليك أنت زول حكاى جدا جدا
لى كم يوم ازازى من بوست يمين و شمال
و لكن قلت اليوم اشوف حكاية السمط دى تطلع شنو ... !!!
و توكلت و دخلت الى بوستك و لقيتك خطير جدا ما شاء الله
تعرف يا أستاذى الفاضل بعض الناس تقول "شاى ساموطى" اذا كان شاى مدنكل
او مزبوط ...
لك الشكر
الطيب رحمه
| |
|
|
|
|
|
|
|
|
|
Re: المفـراك هذا القاتل الصامت( السامط) (Re: الطيب رحمه قريمان)
|
الطيب شكرا على هذه الكلمات الطيبات
..............................
نجي لمسالة تانية في حكاية المفراك
.............
المفراك..
وحكاية عربيتها وتعريبها وإعرابها
المفراك كلمة عربية فصحي
من فرك يفرك فركاً.. فهو مفروك.. ومفراك.. زي معصار..مهداج...مسبار..
ولذلك رفضنا كلمة مفراكة لأنه لاتأنيث له إلا مجازاً
...................
نجي لى خلاصة الموضوع
وهو تجريد المعاني من المباني
( ولطف الأواني في الحقيقة تابع للطف المعاني والأواني( المعاني) بها تسمو)
فما هي إذن القيمة الحقيقة من أداء المفراك
هي
( السواطة)
فمهمة المفراك هي السواطة التي صمد بإزائها قروناً عدة، وارتفق به أهلنا السودانيين دهراً دهيراً..ولا نحب ولانريد ولانبغي له أن يتزحزح أمام عاديات الأيام من المخترعات الحديثة التي تجيد ( السواطة)
فالسواطة عند المفراك محببة ولكنها كتجريد معاني منه عند الخلق مكروهة ومنبوذه ومحاسب عليها الإنسان..( الفتنة نائمة لعن الله موقظها)( هماز مشاء بنميم)( الفتنة أشد من القتل)( ليس المؤمن بطعان ولالعان ولافاحش ولابذئ)( ليس ما يدخل الفم ينجس الإنسان ولكن مايخرج من الفم ينجس الإنسان)
ولذلك ( السواطة محببة لدي المفراك محاسب عليها عند البشر
هذا ما جردناه من خصائص المباني هدية سائغة مستساغة ومستصاغة..
| |
|
|
|
|
|
|
| |
منصوري
عبدالرحيم أبراهيم العبيد
النذير حجازي
الطيب رحمه قريمان
فيس بوك
تويتر
انستقرام
يوتيوب
بنتيريست