ليه بنهرب من مصيرنا نقضي أيامنا في عذاب؟ ليه تقول لي إنتهينا ونحن في عِزّ الشباب!!!
ألآ رحم الله الفنان العملاق أبراهيم عوض. المصير... هذه الأُغنية بكلماتها ولحنها وادءاها دون شك ترقى إلى مصاف العالمية... أما أُغنية (يا سلوى قلبي شن سوى) فهي مدار ونستنا اليوم. بالرجوع إلى سنين الثمانيات الجميلة، ومدينة بحري الحبيبة إلى نفسي. ملاذ أُمسياتي الجميلة، ومبعث مُعاناتي التي كنت أستمتع بها في موقف المواصلات بعد أن أكون قد قضيت وطري من بحري وقررت الرجوع إلى حلفاية الملوك...
01-01-2010, 01:40 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أذكر في الثمانيات ظهر شريط للفنان أبراهيم عوض مسجل من حفلة كان طالع في الكفر طلعة صح. يعني تجي فايت بجنب أيّ كُشك بتاع حاجة باردة تسمع الشريط شغال. سعد قشرة أكشاكو طول اليوم مدورة الشريط، وكذلك السوق العربي. المركبات العامة في الزمن داك ما كانت تخلو من الشريط، والجماعة العازفين لعبوا فيهو جيتارات لعب نضيف بتاع معلمين جد. في واحد في الشريط ما أذكر إذا كان أبراهيم عوض أو غيره كان يقول: ونشكر الإخوة الذين أتو إلينا من كوستي. بالله العظيم، كان ما تخت كراعك في عتبة الحافلة إلا تسمع: يا سلوى قلبي شن سوى، والجيتارات دي تدقلك جووووة قلبك. الشريط أكان شرط عديييل كده، والأيام كانت أيام حُبُكانات وعذاب...
01-01-2010, 01:43 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أذكر بعد أن قضيت أُمسية جميلة في بحري توجهت لموقف مواصلات الكدرو لأجد الموقف كالعادة قيامتو قايمة، وعجاجو رابط في السماء. وقفتَ وأسفي في عيوني ودرب الرجعة ما عرفتو. فجاة ظهرت حافلة نيسان (سفيليان). بمناسبة النيسان. النيسان طبعاً في السودان الزمن داك كان طالع في الكفر، وكانت الواري النيسان تعد وسيلة سفر بعد تعديلها لبصات سفرية. مرّة كنا مسافرين من اتبرا للخرتوم، فإذا بالنيسان يوحل في رمال صحراء العتمور. نزلنا سلكنا مكان اللساتك والمساعد رمى الصاجات والنيسان قال كدي دفر، وتسمع المكنة، مسويلها كوز حنين يبعث في النفس الشجى. فجاة النيسان نتر وطلع من الوحل وكشح الرمال وراهو خلاها عاكلة في السماء زي الدخان. معانا واحد أدروب قال: هييييع، ورفع عكازو في الهواء أخدلوا مقصين تمام التمام وقال: دا الهديد والا بلاش!!!. المقص نوع من العرضة بيعملها ملك الروك (الفيس) وملك البوب (مايكل جاكسون)، وأعتقد أخدوها مننا وأدخلوا عليها بعض التعديلات، فأصبحوا يفتحوا المقص للآخر بدل فتحة نص عندنا...
01-01-2010, 01:47 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
المهم... نرجع لحافلتنا النيسان. لكن عاد هي ما حافلة! وحاتكم كرت كرتونة جديدة لنج. لمان جات فايتة بجنبي لمان قلبي قال وححح، وإتمنيت آخد لي فيها سحبة. وقفت الحافلة وكميّة من الناس أُوووووور جو كابسنها وأنا في نصهم. الكمساري قال: بالرآحة يا جماعة، نحن ما شغالين. الناس شتتو من حوالينها والسواق دوّر. إتجه نحو المحطة الوسطى، وقف في المحطة الوسطى والناس برضو أُووووووور كبسوهو، راح عامل نفس الحركة. الكمساري برضو قال: بالرآحة ما قلنالكم ما شغالين!. تآني جو بجنب المجلس عملوا نفس الحركة، مشوا وصلوا ميدان عقرب، وجو بالجنبة التانية، وقفوا جنبي وأنا أصلي قنعت من خيراً فيهن والناس زاتُن المرة دى ما كبسوهن. أها وكت شعروا بالهدوء والإطمئنان، الكمساري فتح الباب وكورك: الكدرو النفر بخمسين، خمسين الكدرو، خمسين الكدرو... أنا كبست المقعد القدآم، وفنترب نطيت جوّة. إتحكرتَ في مقعد النص الصغير البين السواق والمقعد اليمين. الحافلة إتستفت تب ومافي زول مشمع كل زول في مقعد، والكندشة ضآربة، والشريط بتاع أبراهيم عوض القلتو ليكم شغااال تش، والحافلة سااااقطة وسمحة. والله في اللحظة ديك أنا كنتَ مستمتع جنس متعة! كأني ماشي هواي، وشعرت بنفسي إني أكتر زول محظوظ في الدنيا. تحركت الحافلة مع أنغام الجيتارات وصوت أبراهيم عوض المميز. بديت أحس بمتعة الرحلة وتمنيت الحافلة ما تقيف زاتو. إتوهطتَ في قعدتي بمزاج شديد جداً وإستعديت لأجمل مشوار في حياتي. قلت بيني وبين نفسي: الله يقطع الدفارات، والكُدُر، والملح ويقطع يومن. الليلة أنا حا أصل البيت مُنتشي عديل كده.
01-01-2010, 01:51 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أها أنا في عِزمتعتي، الكمساري ما شهدنا، وصلتنا ميدان عقرب قام: طق، طق، طق، يلا يا جماعة خلسونا. إستعدلت عشان أطلّع القروش من جيبي، أكان واحد مسلّط إبن لزينة وقف على حيلوا وقال: أسمعوا يا جماعة. ما في زول يدفع خمسين قرش، طرادة بس حق المشوار. نحن الخمسين كان بندفعها لكن عشان حركاتن البايخة العملوها دي ندفع حق المشوار بس 25 قرش النفر. في كم نفر كده قاموا عملوا شوشرة ووقفوا في صف الراجل، والحكاية جاطت. الكمساري: يا جماعة من الأوّل ما قلنالكم خمسين النفر!. الزول المسلّط: ما كان عندنا مشكلة لكن حركاتكم الإستفزازية العملتوها دي ما حركات ولاد ناس. وأحد تاني قام: يا جماعة الزول دا كلاموا صح. طرادة بس. طوالي السواق جنّب وقّف الحافلة، ووطى صوت المسجل بحيث إنو الصوت أصبح مُنخفض جداً. السواق: يا جماعة ما إتفقنا بخمسين؟!. نطّ واحد مسلط تاني: يا أبو الشباب سوق سواقتك، إنت بتحلم، خمسين شنو؟. وأحد مسلط تاني: يا زول طرادة بس، كان ما عاجبك كشك البوليس قدامنا في سعد قشرة.
01-01-2010, 01:56 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
المهم الحكاية جاطت والسواق أصبح مُرغم يمشي الكدرو بالطرادة. الراجل بالله العظيم مادي بوزو وداير ينفجر من الزعل، وكتم ما قادر يتكلم، قابض في الدركسون ومنفخ جضوموا وعيونوا متل الشرار، وأنا كل مرّة أديهو كحلة سريعة وأعمل فيها ما شايفو، ونفسي أمد إيدي على صوت المسجل. الناس في الحافلة أصبحوا في حالة صمت رهيب جداً، وصوت الشريط أصبح خافت تسمعوا جاي من بعييييد، وأنا نفسي يرفعوا صوت المسجل. الكمساري يخلص في القروش بلا نفس وكهربا تقيلة ضاربة في أجواء الحافلة. بعد مسااافة كدي جاني إحساس إنو السواق روّق شوية قمت طوالي وبصوت مهذب جداً فيهو مُراعاة شديدة لحالتو قلت ليهو: يا أبن العم لو سمحت، ممكن ترفع صوت المسجل شوية؟ بحلق فيني بغضب وعيونو زي الشرار وقال لي: آها... وطآخ راح قافل المسجل. كمان عندك نفس تسمع يا ثقيل؟!!! طوالي أنا رُحتَ مقطم ومسكتَ خشمي علي، ليعود الصمت ويسكن أرجاء الحافلة، وترتفع فولتات الكهرباء في الجو. بعد شوية واحد من الناس الوراء ظنيتو برضو داير يسمع الشريط، والا يغلغل السواق ما عارف؟ قال للسواق: يأبن العم، الزول الجنبك دا ما تشغلوا الشريط. السواق فتحلوا زي الترتيب، ما عشموا بنص كلمة. ليعود الجو ويزداد شحنات كهربائية. وأحد كورك بصوت مسموع، قصد يسمع السواق: يا جماعة الزول دا ما كتّر خيرو الخلالكم المكيف فاتح، دافعين طرادة وكمان تتشهو؟!. السواق طااااخ راح قافل المكيف. بعد شوية صاحبنا الإسبب في قفل المكيف كورك للكمساري: قرصة قبلك، يا أبن العم. عرفنا إنو ركّب فينا فلم بقفل المكيف بعد عرف نفسو نازل. فرتك خلانا في عِز الحر. واحد قال : بالله عليكم الله شوفوا الزول الثقيل البايخ دا؟. وعاد الصمت من جديد يعم المكان...
01-01-2010, 02:01 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
بيني وبين نفسي قلت: السواق دا الليلة أصلوا ما بخليهو. قمت قلت ليهو: ياعباس يا أخي إنت الليلة هايج كده مالك؟ ما تروق المنقة شوية. سكت، وبعد مساااافة قال لي: إنت ساكن وين في الكدرو؟. قلت ليهو: في طرف الكدرو. سكت، وأنا سكتَ. اها بديت أفكر أدخل ليهو من طريق آخر. بعد مساااافة براهو قال لي: إسمك منو يا إبن العم؟ قلت ليهو، والحديث كان داير بيني وبينو بصوت خافت وبمنتهى الجدية: معاوية المدير. قال لي: يعني إنت مُصِر تتساخف على والا شنو؟!. قلت ليهو: والله لاسخف، ولا حاجة بالجد إسمي معاوية المدير. قال لي: ما سمعت بالإسم ده قبل كدا في الكدرو؟!. قلت ليهو: بصراحة أنا ما من الكدرو، من الحلفايا. قال لي: طيّب، بتعرفني من وين؟ قلت ليهو: ما بعرفك. قال لي: طيّب، العرفك بإسمي شنو؟!. قلت ليهو: بصراحة، شكلك كده يا عباس يا عبد السلام. سكت مسااافة، وقال لي: والله لكن إنت زول شِديد خلاس، أنا إسمي عباس وجدي إسمو عبد السلام. بسرعة شديدة جداً، قلت ليهو: طيّب دوّر لي المسجل والمكيف عشان عباس وعبد السلام. سكت... وشعرت إنو زي الداير يضحك وكتم الضحكة. فجاة ضحك، وهزّ رأسو وقال لي: آها دورناهن ليك. قلت ليهو: كتّر خيرك يا عباس. قال لي: أسمع، خلي الهواء البارد ده يضربك، وأسمع المسجل وإنت ساكت ما تعمل لي شوشرة. بسرعة قلت ليهو: ليه إنت داير تزاكر، ما سايق حافلة؟. نظر لي شذراً، ومازالت أثار الضحكة بادية على مُحياه. قال لي: قلت لي ساكن وين؟ قلت ليهو: أنا بنزل كيلو 8 لكن ساكن جنب المدرسة. قال لي: وكت نجي قصاد بيتكم وريني.
أها... لمان جينا قصاد البيت، قلت ليهو: بس قبلك هنا يا عباس. ظيييييط، وقّف الحافلة... قال لي: لكن والله فشيت لي وجعتي. واحد من الركاب قال لي: كتّر خيرك كتير يا ظريف. قلت ليهو: بعد أنا وصلت أهلي... إن شاء الله عباس دا يوقفلكم المكنة زاتها. عباس إنفجر بالضحك... وأنا نازل سمعتو قال لي وهو ضاحك: يا زول إتخارج هي...
01-02-2010, 09:10 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
اقر في قصتك و اتذكر ذلك الزمن الجميل رغم معناته كل شئ جميل و الله حتي بناته سمحات و استاهلن اغنو فوقن ذلك الغني الجميل .
انا حصلت لي نفس قصتك لكن الاختلاف انو السواق فنه الشريط بي شباك الحافله .
يا زول اخوك جا راجع البيت العصير و قالو ليه السيره خلاص طلعت و مشت لي خشم القربه وكان مافي اي طريقه غير اركب الظلط ، ربك رب الخير تجي حافلة ماشه القضارف انا ما صدقت طوالي اطوهت في الكرسي الامامي اليمين و شريط كارب لي علي ابراهيم الاحو و الله العظيم جنس خيال و انا راكب و الله اتقول راكب البصهلن . المهم فتنا الخياري و أول محطه بعد الخياري جنب جبل حكايه ما تخلص ، نزلنا من الحافله ، اخوك سريع سريع شرب الشاي و رجع الحافله و قمت طبظت الشريط بغرض اكمال بهجة السفر و الشريط شغال و انا في احلام لا يعلم بيها الا الله ، قام السواق جي و ركب الحافله ، يا زول غفله الباب تدل علي ان حرب قادمه و ان فتره النقاهه بين الشركيين الفرح و البهجه الي انفصال ، اه يا زول و الله الزول من ما اتوهط في الكرسي سمح و لا بسم الله ما قالها و ده المزعلاني قام طوالي مسك ليك الشريط و خلاهو اتدقلش في حصحاص الخياري .
تخريمه : ما ظنك جربت ركوب التنده . يا حليل زمان اكان كل شئ فيه جميل حتي مدافرة البكاسي .
01-02-2010, 10:05 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: ي قام طوالي مسك ليك الشريط و خلاهو اتدقلش في حصحاص الخياري .
تخريمه : ما ظنك جربت ركوب التنده . يا حليل زمان اكان كل شئ فيه جميل حتي مدافرة البكاسي .
والله لكن ضحكتني يالزبير. قلت لي الزول فنن الشريط ؟ يا زول أمانا ما إتحكرنا فوق التندة وراس القطر. عارف بمناسبة مدافرة البكاسي دي. مرة في موقف شمبات، يازول جا بكسي، وأخوك قام طاير عليهو. مسكت الباب القدام، أكان القالك راجل كبير يدافر في مدافرة شديدة قبلت عليهو أكان القا ليك الفنان خضر بشير!! تخيل! اليوم المتفيننين المالين البد الما عندهم طعم ديل سايقين أفخم العربات!!!. نسأل الله له الرحمة والمغفرة...
01-02-2010, 10:26 PM
Moneim Malik Moneim Malik
تاريخ التسجيل: 12-12-2004
مجموع المشاركات: 454
سلامات يا المدير احوالك وكل عام وانت بخير لكن ماتقول لى سواق الحافلة دا ماشماك عديل وين ايامك فورت ماك ولا كالقري المهم نسمع منك عبدالمنعم فورت ماك سابقا ادمنتون ناو
01-02-2010, 10:40 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
Quote: سلامات يا المدير احوالك وكل عام وانت بخير لكن ماتقول لى سواق الحافلة دا ماشماك عديل وين ايامك فورت ماك ولا كالقري المهم نسمع منك عبدالمنعم فورت ماك سابقا ادمنتون ناو
سلام يا منعم، وينك يا زول؟ وإنت بخير والجميع طرفك. لكن عليك الله السواق دا ما أقنعتو ليك؟
والله أنا الآن في قراند براري، وإحتمال كبير أرجع فورت ماك. أصلو قالوا الشقي عمرو ما بيسعد. لو بقيت على فورت ماك طبعاً بمر عن طريق إدمنتون، خلينا نشوفك. التلفون في البروفايل...
بالمناسبة اول نشله لي كانت في موقف حله كوكو . بص قادم من الجريف شرق و انا طالع من السوق ، كحلت البص من بعيد و عملت مناوره ذي رونالدو و اتقضيت علي الباب الامامي بقوه ، كانت هنالك خطه محكمه من النشالين واحد قفل الباب بيده و الاخر يقوم بالواجب ، الغريبه في الامر انو يبدو انو النشله كانت سريعه لانو الزنقه فكت بسرعه ، اتوهطت في المقعد ، و جا الكمساري المو خمج اكشكش ، دخلت يدي في جيبي و كانت المفاجاه ، اعتزرت للكمساري ، بعدين شكلي اكان ما شكل زول نصاب ، قبل الاعتزار وكان زول طيب و الله من شدة طيبته قربت اقول ليه اديني حق الرجعه. بعد التخرج اشتغلت في المانيا - مدينه دزلدورف - و كنت بركب البصات و بيني و بينك يوم اتذكرت نشله حله كوكو و هذا الموقف و ذلك الموقف وبدية اغني الساعه تبدو جنبك اقصر من دقيقه و الدقيقه و انت مافي مره ما بنقدر نطيقه و ذي ما قال الاستاذ التيجاني سعيد الفرق بين نسبية انشتاين و فضل الله محمد شنو ده نسبه وده نسبه و برضو نحن بنقول في كوكو موقف و دزلدورف موقف .
تخريمه : لي مشايخ و احباب في حلفاية الملوك : - شيخ علي زين العابدين - شيخ السلطان عجيب - شيخ غبدالروؤف احمد موسي حران - اخونا و حبيبنا صلاح سامي
01-03-2010, 08:54 AM
الزبير بشير الزبير بشير
تاريخ التسجيل: 08-11-2009
مجموع المشاركات: 1770
الاخ معاويه المدير.... والله غايتو الله يديك العافيه .والله العظيم صحيت من النوم قافله معاي وزهجانه ولا شغل ولا مشغله ( مفنشني من الشغل سافرت وما رجعت في مواعيدي ولما جيت لقيتم مفنشني ) والله ضحكته لما دموعي جروا وضحكت اكتر في مداخله الزبير الفننو ليهوه الشريط , والموضوع من كتره ما عاجبني كل مره بقراه وبضحك . ولكم تحياتي واحتراماتي
01-03-2010, 06:43 PM
haroon diyab haroon diyab
تاريخ التسجيل: 06-20-2007
مجموع المشاركات: 23215
Quote: شقي الحال كيفنك والله اماني ما كانت سمحي مسجلات الحافلات دي والعجب لو شغل ليك ابو اللمين
انت يا مقطوع الطاري السر شنو في انه كل بتاعين العصير في السودان بيشغلوا ابو اللمين
بسط، والحمد لله يا ود جبرين. أريتك إنت طيّب؟...
عارف مرّة معاي صاحبي لقينا واحد بتاع ليمون في السوق الشعبي مدور ود الامين. صاحبي قال لي: تعال نشرب لنا ليمون، ونسمع لنا غنية غنيتين. يازول طلبنا إتنين ليمون وقعدنا نتجغم، ونسمع في ود الامين. والمكان جنب الكشك ممجوخ موية، وشكل الأرض أسود من باقي الليمون البيدفق مع السُكّر، وبعد ده نحن نشفط بمزاج، وتاريهو الراجل زهجان مننا. فجاءة بزهج قال لينا: يا شباب ما تشربو تتخارجو تخلونا نشوف غيركم! قلت لهو: بصراحة أديتني إحساس إننا قاعدين نشرب في ليمونك دا في الفندق الكبير. طوالي قال لصاحبي: سوق صاحبك البايخ ده وإتخارجو خلونا نشوف أرزاقنا.
الاخ معاويه تحياتي اجريت العملية لزوجتي بحمدالله و هي الان بخير .
حكاية الليمون . مره كنت عطشان عطش شديد و جيت مدور جنب نادي العمال و هنالك كشك ليمون رهيب و مكان الكشك نضيفه جدا . المهم عرجت علي بتاع الموارك و قبليها اديتها نظره علي الحلل لقيت ليمون ما خمج و شعير ارد الروح . اخدت 2 ماركه واحد ليمون وواحد شعير . طبعا الجوع كافر و العطش منافق . علي نفاق العطش توجهت علي الحلل . بسم الله يا اخونا بالله لوسمحت مويه بارده ساده وخت فيها تلج . الزول مشكور ناولني المويه بالتلج قمت كركعتها بسرعة 2700 ميغا بايت و علي طول سلمته ماركه و طلبت ليمون مع سكر و تلج زياده لو سمحت والرجل سلمني كبايه ليمون تلجها ينقط ، توجهت صوب شارع السيد عبدالرحمن وبديه الاستمخاخ ، خلصت ، سلمته الماركه التانيه وقلت ليه بالله شعير و ما تنسى تصوت الحله عشان اتقل و بالله اديه شويه تلج ، تسلمت الكبايه التانية و خلصت و الزول اعاين فيني . تعرف يا معاويه اثناء انا ما بشرب في الكابيه التانيه ، تجي مره ( امرأه ) كبيره تقول لي يا ولدي عليك الرسول عاوزه اشرب . يا زول بعد ما خلصت الشعير . قلت له لو سمحت ممكن تاني مويه ساده من الماسوره . الراجل لفه الكبايه و قال يا زول انت بعد ده اتوكل علي البحر اتي هنا ما بتروي .
اهداء للفنان خضر بشير
01-04-2010, 01:06 PM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
الاخ معاويه المدير.... والله غايتو الله يديك العافيه .والله العظيم صحيت من النوم قافله معاي وزهجانه ولا شغل ولا مشغله ( مفنشني من الشغل سافرت وما رجعت في مواعيدي ولما جيت لقيتم مفنشني ) والله ضحكته لما دموعي جروا وضحكت اكتر في مداخله الزبير الفننو ليهوه الشريط , والموضوع من كتره ما عاجبني كل مره بقراه وبضحك . ولكم تحياتي واحتراماتي
الأخت إحلام وهبي، خيرها في غيرها. لكن ناسكم ديل صعبين كده مالهم، يعني الزول ما يقعد مع أهلو والا شنو؟ تعرفي أنا كنت شغال في المخازن والمهمات، وسنتين ما كان أخدت إجازة قمت قريب العيد قدمت لإجازتي وكان عندنا نقص في الموظفين. طبعاً كنت متوقع رئيس القسم ما يصدق لي وكان وقتها حسن عبد الحفيظ الحكم الدولي الله يرحمو. اها الزول صدق لي لكن قال لي: لمان تجي راجع أنا بطيرك من القسم ده. يا زولة بعد جيت من الإجازة ثلاثة يوم بيجيني منو شغل وما بشتغلوا. قام ناداني وسألني الحاصل شنو؟. قلت ليهو: إنت ما قلت بتطيرني من القسم. حصلت مشادة بيني وبينو قام قال لي: يا زول لو ما عايز تشتغل أمشي بيتكم. اها أنا ما كضبت طوالي مشيت أهلي. تصدقي بعد 3 أيام نايبو جاني في البيت وأصرَ لازم أرجع. مشيت إعتذرت لحسن عبد الحفيظ ورجعت شغلي. شفت أهلنا ديل طيبين كيف؟. هسع الناس ديل عشان القعيدة الصغيرونة القعدتيها مع أهلك يفنشوك!!!
شكراً لك على المرور الجميل، وإن شاء الله ربنا يديك شغل أفضل من شغلك الفقدتيهو...
01-05-2010, 02:10 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
. يا زول بعد ما خلصت الشعير . قلت له لو سمحت ممكن تاني مويه ساده من الماسوره . الراجل لفه الكبايه و قال يا زول انت بعد ده اتوكل علي البحر اتي هنا ما بتروي .
01-07-2010, 11:38 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
عارف يا الزبير، مرّة كنت مع بعض الصحاب سايقين من محافظة أونتاريو لمحافظة البرتا مشوار بتاع تلاته يوم، وأنا عندي شريط بتاع خدر بشير. الجماعة يشيلوا ويشغلوا في الشرايط. قدر ما حنستهن عشان يشغلوا لي خدر بشير رفضوا. أها بعد كملوا شرايطن كلها أنا شغلت أبو خدرة. يا زول الساعة القال: زعموا أني أًحب هنداً وميى قد أتى الزاعمون شئً فريا ما لهند ولا لميا نصيب في فؤاد إمرئِ أحبّ النبيَ...
الجماعة أصبحوا كأنما على رؤسهم الطير... هذا الرجل مدرسة. نسأل الله له الرحمة والمغفرة...
01-07-2010, 01:47 PM
الزبير بشير الزبير بشير
تاريخ التسجيل: 08-11-2009
مجموع المشاركات: 1770
اخي معاويه ( طبعا اخوك الاكبر ) لاني طبعا ما داير ادخل في الاعمار لانهااولا بيد الله و ثانيا بت طرشق بعض المواضيع .
1- اتمني ان تكون اغنية خضر بشير ( الاوصفوك ) فتحت عند في الجهاز . 2- الايام ده اخوك مزنوق زنقه الكلب في الطاحونه و لو ما كده كنت عاوز احكي ليك قصه كباية الجوافه و هي بمناسبه عزومة الخطيبه و اخوك اكان عاطل لاشغل لا مشغله خريج جديد لنج و غامل ليه قصة حب ، في اثناء الخلطه الكداري الكيسه طلبت ان تشرب جوافه، اخوك اكان جيبه فاضي لكن قلبه مليان حب ، تصور نهاية القصه و انشاء الله حا احكيها بعد اقفال حسابات 2009 المالي .
3- بالمناسبه اعمل مدير مالي في السعودية و حاصل علي الزماله الامريكية CPA من كلفورنيا .
4- اهداء اغنية عاجباني شديد
01-08-2010, 04:19 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
الأخ معاوية لك التحية والأشواق وكتاباتك تهيج الذكريات والشجون وإن نسيت فلست أنى سفرية لمناطق إخواننا بالشريك بان فيضانات العطبراوي كما يسمونه أو الساسريب وفي رواية أخري باسلام وستيت. حينئذ تأثرت البلاد الطيبة من منطقة سيدون ومناطق الجزر فقد كانت من الرحلات التي لن أنساها وطيبة أهل المنطقة وتعطل إحدي سياراتنا بوادي في بين الشريك والعبيدية كما هاجت شجوني تذكراً لولايات كسلا والقضارف وكردفان الكبرى أم خيراً جوه وبرة ودافور زاد الشجون فلك مني فايق التقدير وبالمنسبة انت وين اختفيت وكيف الردفي قراند براري ولكن الظاهر بسخانة السودتن وحراة القلوب الجيت بيها من السودان داير تسخن البراري ياخي ما شفناك وانت تعبر بوابة عبد القيوم أقصد ادمونتون . بالله خلينا نشوفك لك التحايا الطيبة . معاذ حسين - ادمونتون
01-08-2010, 11:54 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
لك الشكر أخي معاوية ومعذرة للأخطاء الإملائية معافرة شديدة مع الكيبوردأوعد بالاجتهاد في المرات القادمة ومرحب بيك بادمونتون .......... تليفوني في البروفايل بالله اتذكرنا بمكالمة أو حتى مسكول. معاذ
01-13-2010, 11:04 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
الزبير بشير
Moneim Malik
طارق جبريل
ناذر محمد الخليفة
احلام وهبي
haroon diyab
ياسر بيناوي
محمد عبد الماجد الصايم
Ahmed Elsharif
عفاف الصادق بابكر
فيس بوك
تويتر
انستقرام
يوتيوب
بنتيريست