بعد تطابق رؤية الحزب الشيوعي مع المؤتمر الوطني حول حلايب ماهي اراء بقية الاحزاب؟

Quote: بيان من الحزب الشيوعي حول حلايب أن حلايب أرض سودانية ــ هذه حقيقة واضحة كإنسان الشرق ، وطيدة كجبال البحر الأحمر . أنها أرض سودانية سياسياً ، إذ نصت علي سودانيتها الاتفاقيات الدولية التي ابرمت منذ ما يقرب من القرن والتي استندت عليها الحكومات السودانية المتعاقبة منذ الاستقلال فبسطت سيادتها الوطنية كاملة علي مثلث حلايب ، وأكدتها االحكومات المصرية نفسها فأعترفت بهذا الأمر وتعاملت معه كحقيقة واقعة . وهي أرض سودانية تاريخياً ، اذ ارتبطت دوماً ، وعبر القرون والحقب بالسودان. وهي أرض سودانية إثنياً وديمغرافياً إذ يسكنها قوم غاصت جذورهم عميقاً في التربة السودانية وامتدت فروعهم الي كل اجزائها. ويعرف الناس ان نزاعاً خطراً قد نشب حول حلايب ، بين السودان ومصر ، عام 1958م. ويعرفون أيضاً أن حلايب في ذلك النزاع لم تكن لذاتها ، بل كانت وسيلة لجأت اليها مصر للدفاع عن مصالح أخري كانت تراها مشروعة . ويشهد علي هذه الحقيقة الحل الذي توصل اليه الطرفان وانتهي بانسحاب مصر . فقد انسحبت مصر ، ليس لانها عجزت عسكرياً عن استرداد أرض تمثل جزءاً من ترابها الوطني ،و لكن لأنها تأكدت أن مصالحها المشروعة يمكن ضمانها عن طريق آخر ، غير طريق الضغوط العسكرية ، وقتطاع الأرض السودانية. وهذا هو جوهر المسألة . فطوال السنوات الأربع الماضية ظلت مصر تشعر بأن خطراً داهماً يتهددها من الحكومة الأصولية الفاشية الحاكمة في السودان ، وهي تستند إلي اسباب قوية تبرر هذا الشعور , فالبرغم من أن الحكومة المصرية قد وقفت مع هذه السلطة في ايامها الأولي ، وأسبغت عليها دعماً سياسياً ودبلوماسياً كانت في امس الحاجة اليه ، إلا أنها عضت اليد التي امتدت اليها بالمعروف ، وبادرت مصر بالعداء ، طامعة في بناء الامبراطورية الترابية الجديدة . فأحتضنت كل عناصر الارهاب في مصر ، واستضافتهم قادة ومقاتلين ، وعقدت لهم مؤتمرات التوحيد ، وأقامت هم معسكرات التدريب ، وأمدتهم بالاسلحة الفتاكة من مدافع وقنابل يدوية وبنادق وذخائر ، وأغدقت عليهم من أموال الشعب السوداني الذي يتضور جوعاً ،ووفرت لهم وسائل االتسلل عبر الحدود ، بل ناقشت معهم الخطط التفصيلية لزعزعة أركان الدولة وترويع أمن المجتمع . وأشرف علي ذلك السيد حسن الترابي وقادة الجبهة الاسلامية الحاكمة ، فصاروا شركاء أساسيين في كل جريمة ارتكبت ضد الحكومة المصرية ، والمواطن المصري، والإقتصاد المصري . ومدوا اياديهم الي ايران للحصول علي مزيد من السلاح ومزيد من الأموال. وتطور الأمر الي مخطط ارهابي كبير ومكشوف ، فتقاطرت السفن الايرانية الي بورتسودان تحمل أدوات الموت والدمار ، بما فيها الاسلحة الجرثومية ، وتفرغ ما بجوفها بليل وتعيد الكرَّة من جديد . لقد لعب مثلث حلايب دوراً بارزاً في تهريب الاسلحة ، التي استولت السلطة المصرية علي بعضها ، وفي اقامة معسكرات التدريب ، في منطقة عروسة شمال بورتسودان ، وهي معسكرات مصورة ، وفي تأسيس شبكات الارتباط ووسائل الاتصال. ولم يكن في استطاعة مصر أن تسكت علي كل ذلك ، فقامت باحتلال مثلث حلايب السوداني ، رداً لعدوان وردعاً لمعتدين ، ووضعت الحكومة السودانية وجهاً لوجه أمام أفعالها وجرائمها . ومن حق الشعب السوداني أن يتوجه الي حكامه الصغار ، هواة اللعب بالنار ، وبناة الامبراطوريات بالاوهام والرمال ،ماذا انتم فاعلون في حلايب ؟ كيف تحررون ارضاً اقتطعتها من جسد الوطن سياساتكم الحمقاء ، ومؤامراتكم الخبيثة ، مخططاتكم البائرة ؟ هل ترجعونها عن طريق المفاوضات ؟ ولكن كيف تفاوضون نظاماً كافراً حكمتم عليه بالسقوط وعلي رئيسه ورموزه بالموت ؟ وماذا تقدمون له ؟ هل تضحون " بالثورة الاسلامية" وتقدمون مجاهديها خرافاً للذبح بعد أن منيتمونهم الأماني ؟ واين الغزو وتجهيز الغزاة ؟ وكيف تعيشون " سادةً أعزة " وأنوفكم في الرغام ؟ اسئلة يتحداكم الشعب أن تجيبوا عليها. إن سياساتكم ومواقفكم المعلنة ، وادعاءاتكم الاسلامية ، تلزمكم بموقف واحد : القتال ولا شئ غير القتال. فقاتلوا ايها الذين أخرجتم من دياركم ، وأهنتم ، وأستُصغِر شأنكم علي ملأ من الناس ، وعلي مرأي ومسمع من العالم اجمع. والقتال ليس عنتريات فارغة ، ولا مواكب صبيانية ، ولا غازات تنفثها الأفواه . القتال جيش وشلاح ، ودبابات وطائرات ، بل القتال ظفر وناب. فقاتلوا واستشهدوا ، والتزموا بشعاراتكم التي أصمّت آذان الشعب ، وإلاّ فاصمتوا وابتلعوا ألسنتكم الطوال الحداد ، وخبئوا وجوهكم في حمأٍ كثيف من الخزي والعار. أما جماهير الشعب السوداني ، وقوى المعارضة المتمثلة في التجمع الوطني الديمقراطي ، والتي لم تبادر مصر يوماً بالعداء ، ولم تتدخل في شئونها الداخلية ، والتي تعترف بمصالحها المشروعة في الماء والأرض، والتي تسعي لتعميق العلاقات بين الشعبين ، فأنها وحدها القادرة علي حل مشكلة حلايب ، عن طريق التفاوض ، وفي اطار من التفهم العميق للمصالح المشتركة بين الأشقاء. ان ارض حلايب يمكن ان تصبح مشروعاً رائداص للتكامل المصري السوداني ، وموقعاً متقدماً تنطلق منه فيالق المعارضة لتحرير السودان وشعبه من النظام الفاشي الذي يكتم أنفاسه ويزهق روحه ، ويمكن أن يكون يداً تمتد الي مصر بالثمار بدلاً عن القنابل . إننا ندعو التجمع الوطني الديمقراطي للدخول في مفاوضات مع الشقيقة مصر لتحقيق هذا التفاهم ، وانجاز هذا الهدف. الحزب الشيوعي السوداني يوليو - 1993م

Quote: وهذا الموقف يتطابق مع رؤية المؤتمر الوطني

Quote: ووين رؤية المؤتمر الوطني هنا ؟؟ انت ما جبت رؤية الشيوعي ما كان تجيب رؤية الوطني حتين بعد داك نتناقش

Quote: عمر صديق. بيان الحزب الشيوعي ده هسع علاقتوا شنوا بي تصريحات الطفل المعجزة عثمان مصطفى إسماعيل الاخيرة حول تحويل حلايب الى منطقة تكامل بين البلدين؟

Quote: نعم للتفاوض حول حلايب نعم للحلول السلمية للأمر بما يعمق ويؤطر للعلاقات بين الشعبين الشقيقين لا لأى إتجاه للتصعيد حول هذا الأمر

Quote: ،وتقوم الحكومة العويرة ليهم تخرب علاقتها مع المصريين

Quote: حوار مع الأستاذ محمد إبراهيم نقد الكاتب/ أجرى الحوار: رئيس التحرير- لمياء الجيلي- عادل حسون Sunday, 20 December 2009 السكرتير العام للحزب الشيوعي السوداني (2-2) أطراف عديدة أصبحت طرف في اللعبة السياسية! مافي مبرر حلايب تصبح عظمة نزاع، واقترح إدارة مشتركة بين مصر والسودان حسماً للنزاع.. نوستاليجا مصطلح يعنى الحنين إلى الماضي، أصل الكلمة يرجع إلى اللغة اليونانية، إذ تشير إلى الألم الذي يعانيه المريض إثر حنينه للعودة لبيته وخوفه من عدم تمكنه من ذلك للأبد. في محاولة منا لاسترجاع الماضي ومقارنته بالحاضر، في ظرف تعاني منه البلاد من كثير من الأمراض والأزمات، كان اختيارنا للحوار مع السكرتير العام للحزب الشيوعي السوداني، الأستاذ محمد إبراهيم نقد، حول السودان القديم، وأي الملامح والتجارب السياسية التي يمكن الإستفادة منها في معالجة حالة السودان الراهنة.. فكان الجزء الأول من الحوار يدور حول هذه الحالة، وعن أهم ملامح السودان الجديد لدى السكرتير العام للحزب الشيوعي. فدار الحديث في منزل الأستاذ نقد في جوٍ من المرح مشوب بكثير من الصراحة والشفافية حول القيم السودانية الحقيقية والعلاقات الاجتماعية الطيبة بين قادة الأحزاب السياسية على الرغم من اختلافاتهم السياسية والفكرية، فإلى الحلقة الثانية والأخيرة من مقابلة (الأخبار) مع السياسي والمواطن محمد إبراهيم نقد: ما هي العلاقة التي ربطت بين السياسة والثقافة قديماً؟. النهضة الوطنية، البلد كلها ناهضة لفوق بعد الحرب، لأن الحرب وعت كل شعوب العالم، لأنو المستعمرين، الانجليز والفرنسيين، وعدوا الشعوب بالاستقلال إذا وقفت معهم، وميثاق الأطلنطي، بين تشرشل وروسيا وَُقع في سفينة في وسط الأطلنطي، قالوا أنو الدول الديمقراطية ستمنح الشعوب التي تقف معها في الحرب، تمنح المستعمرات الحرية والاستقلال، بعدين دي حاجات كانت مؤثرة، السودان أيام الحرب ما كان جيعان، صحي في تموين وكدا، لكن البلد كانت مرتاحة جداً، لأنو بتجئ المؤن بتاعت الجيوش، وجيوش الإمبراطورية كلهم كانوا موجودين هنا، الهنود والآسيويين والإنجليز والأسرى الطليان كلهم كانوا موجودين هنا، وقوة دفاع السودان برضو.. كيف كان شكل المنابر السياسية؟ الآن، التلفزيون، الندوات، الصحف وغيرها؟. مؤتمر الخريجين كان في كل مدينة من مدن السودان، ودا كان المنبر الأساسي، مافي اتحاد طلبة وإلا كان في الإجازة يعمل مسرحية، والعائد بتاعها بيُدفع لمؤتمر الخريجين، دا دخل ما كان ساهل. هل من الممكن إجراء قراءة للواقع الحالي، تغيير اللُعبة السياسية، هناك أطراف مؤثرة جديدة ليس القادة السياسيين فقط؟. طبعاً هناك تغيير، وأطراف جديدة ظهرت، ما عادت القوى الطائفية براها، هناك تغييرين أساسيين، صحي الأطراف نفسها تغيرت، عندك الجنوب، مهم بالنسبة لكل الدول الغربية، وتحقق للجنوب ما لم يحدث لكل الأقليات الأخرى، مصر دورها ما عاد بنفس الزخم، لانشغالها بغزة وفلسطين وإسرائيل، دارفور أنا تابعت شغل منبر دارفور وطبيعة الأزمة لغاية أمس، يعني مناوي جاء وبقى طرف في العمل السياسي، لكن عبد الواحد وخليل، ما بتحس بأنهم هنا، عندهم ناس بالتأكيد يعني، ما صدفة أنو صوت بونا ملوال رجع تاني يرتفع، ويشكلوا قلق للحركة الشعبية، وهم ناس عندهم نفوذ قبلي، وسياسيين، وقاعدين في البلد وعندهم علاقاتهم الدولية، بكل الوزن بتاعها، أنا لاحظت أن القوى الغربية بتأخذ كلامهم بجدية أكثر من كلام الحركة، لأن الحركة في فترة كانت مع اليسار وإثيوبيا، يبقى أنت محتاج لصيغة تطرح القضايا بكثافتها موش في ورقة، دي لغاية دلوقت لم نصل لها، ويمكن الوصول إليها إذا كان الناس كشفت أوراقها، أفتكر أنو هسه مافي زول رابح، الحركة والمؤتمر الوطني هم الحاجات بتمشي لهم باعتبار أنهم الماسكين المفاتيح الأساسية في التحول الديمقراطي والاستفتاء، الدول العربية ما فيش دور واضح، غائبة بالعكس أفريقيا أنشط ، أمبيكي، وفي الجنوب أكثر، الشقيقة الكبرى زمان كانت بتنجد الناس، هسه شغالة بطرف أصابعها لا أكثر من كدا، في موضوع حلايب، زي مشاكل الورثة في الشمالية، كل يوم والتاني ماشين الدامر في قضايا، أذكر أنا وعز الدين علي عامر دعونا ناس حسني مبارك سنة 88م ومشينا ليهم ومقابلات كثيرة عملناها وبعدين مشينا وزارة الخارجية القسم الخاص بالسودان، وسألونا ماذا نريد، قلنا ليهم عايزين حاجة بسيطة جداً، لما عملتوا العبور في قناة السويس عايزين البنطونات الاستخدمتوها، فنحن في منطقة الشمالية كل يوم الناس غرقانة، عايزين نوديها ليهم، الراجل قالي طيب، عايزين تعبروا بيها من الشرق للغرب ولا من الغرب للشرق؟، قال لي: أصلو السودان دا خازوق، تجيهو من هنا خازوق ومن هنا خازوق، قال لي نحن ما عارفين نعمل شنو مع قرنق دا، جاء من وين وعايز إيه، إيه المانع أنو تكون في معارضة سودانية في مصر، إزاي هو يروح إثيوبيا؟، قلت ليهو إثيوبيا لأنو عندها حدود مع الجنوب الوصول ليها ساهل، هنا صحراء العتمور دي يقطعها كيف، قال لي، لا هو بس يقول، نحن حنعرف ندبرها. هذه واحدة من المشاكل البتشغل الزول، لأنو مرات بتلاحظ أن الحركة السياسية بتتحرك لمجرد الحركة، يعني مافي العائد الممكن يقولو عليه، حركة مؤتمر جوبا وموكب أول أمس هذا كله كويس. الموقف من قضية حلايب، ومسيرة أول أمس، لم نلمس تدخل، يعني هل يمكن القول إنو المؤتمر الوطني يتغاضى عن هذه القضية؟. -نحن لمن مشينا ليهم، طلعوا فايلات قديمة من أيام محمد علي باشا، طبعا بصبر ودم بارد، أخرجوا وثيقة، جواب مرسلاه الحكومة المصرية للحكومة السودانية بتاريخ معين، بتطلب من حكومة السودان أن تشرف على حلايب لأنها بعيدة من أقرب مركز مصري، وكلام عن أنو إنتو حبايبنا ومفيش حد حيعتدي عليكو، إذا كنتم عايزين القاهرة خدوها، ولكن حلايب نحن لن نفرط فيها، نحن رسلنا جواب يوم كذا عشان يشرفوا عليها لأنها بعيدة عن المركز، بس، دا كل الموضوع، السودان أحيانا بيدخل في معارك من غير (دوكيومنتس).. لا يعني أنت كلامك دا، إنو حلايب مصرية؟. حلايب بالوثيقة دي، وحكومة السودان عندها نسخة منها، هل الوثيقة دي تقيم حجة؟. هو بيتحجج بيها، وقال هم متأكدين أنو النسخة الأصلية عندهم، يعني حكومة السودان، أتذكر أبو سليم راجل دفعتنا وأصحاب، فقلت ليهو المصريين قالوا كذا كذا، فقال لي شوف يا شيوعي أوع تقول الكلام دا لأي زول، قلت ليهو يعني إنت عارف، قال لي أنا ما يهمنيش عارف ولا مش عارف، سيبنا من مصر دي بعيد، ياخي أنت راجل بتاع دار الوثائق، قال لي نحن ساعدنا المصريين لمن حصلت مشكلة بينهم والإسرائيليين حول طابا طلعنا ليهم الوثائق البتثبت حقهم، ما يحترموش العملية دي، إيه حلايب اللعايزين يعملوا منها قضية، الشاهد، هي طبعا حلايب داخل فيها أمن البحر الأحمر، اللأصبح عندو وضع استراتيجي كامل، وداخل فيها النزاع الحدودي بين مصر والسودان، السودان موقفه ضعيف، ولو من باب كمية السودانيين الموجودين في مصر، ودي ما عملية بسيطة، فاكر لما يتلموا السودانيين في ميدان عمر مكرم، المصريين قالوا نحن ما عندنا مشكلة، طبعا هم دولة من أقدم الدول في العالم. الآن بعض الأصوات ترتفع، سواء كان المعارضة أو بعض التيارات المتحالفة مع الحكومة، ترتفع مطالبة بإعادة استعادة حلايب؟. شنو الضاغط؟، تبقى زي حبن إنت عايز تزيلوا، أنا لا أفتكر أنو دي أسبقية، في شنو؟، دي أول انتخابات في ظل الإنقاذ، على أي حال ما لم تحل، في أكثر من حل، تكون منطقة إدارة مشتركة، منطقة حدود مشتركة، ممكن تكون منطقة تجارية مشتركة، أي شئ يؤدي إلى نزع فتيل الأزمة، لكن ستكون بإستمرار عظمة نزاع ولكن كيف تحل مافيش حد عارف. *لكن نقل عنكم أنكم أكدتم أن حلايب مصرية بالوثائق الموجودة في القاهرة والخرطوم، يعني ألا يخشى السكرتير العام للحزب الشيوعي، إتهام الشيوعيين بالعمالة في هذه القضية التي لديها جزء من الحساسية الوطنية، يعني عندما يقطع سكرتير عام الشيوعيين بأن حلايب مصرية ألا يخشى على موقف حزبه وصورته ورصيده وسط البيئة السودانية؟. -لا أنا وريتك جانب واحد من الصراع، قالوا إنو حلايب مصرية من واقع الوثيقة التي لديهم، الأنحن رسلناها للسودان لإدارة حلايب لأنها بعيدة من أقرب مركز مصري، حكومة السودان ردت شنو؟، ما عندنا وثائق، جائز تكون موجودة في الخارجية، أو في (الفورين أوفيس) في انجلترا، واضح ليك، في نزاع زي دا ما بتاخد رأي زول واحد، هل استلمت الحكومة الخطاب؟. *هناك تصريح سابق نسب إليكم عند لقاءكم بوفد من أبناء المنطقة أنك قلت لهم، عاملين مشكلة في شنو، حلايب دي مصرية، سألوك كيف مصرية، قلت ليهم من خلال الوثائق الموجودة في السودان ومصر، ولذلك أسال عن كيف ستكون صورة الحزب عند وجود رأي مثل هذا؟. -أنا قلت بناء على التوثيق الأنا شفته، عايزك تشرف لي على حلايب، معناها أنا صاحب الحق، هل حكومة السودان ردت؟، ما حد عارف، هل في وثائق عند حكومة السودان بالمعنى دا؟، ما فيش حد عارف، يعني هو عبد الله خليل أثار المسألة في زمن الصراع بين دعاة وحدة وادي النيل ودعاة استقلال السودان، (أنفورشنيتلي - لسؤ الحظ) هي الآن بتطرح في نفس السياق بالمناسبة، يعني في 57م أثاروها ناس حزب الأمة عشان يضغطوا على الاتحاديين، الآن أيضا كل ما تكون في جهة عايزة تزايد على المؤتمر الوطني، بتطرح موضوع حلايب؟. أنا كل البهمني أنو مافي مبرر حلايب تصبح عظمة نزاع، مرة تثيرها مصر ومرة يثيرها السودان، الأخطر من حلايب، تتعمل لجان مشتركة، رسمية يعني، تدرس، بعدين إنت عندك مشاكل كتيرة جداً، بعدين القذافي عندو مشاكل في الحدود الليبيبة المصرية والليبية السودانية، تشاد عندها مشكلة، أكوبو مع إثيوبيا والفشقة، فإذا هذه المشاكل ما وُضعت على مستوى الجامعة العربية ومنظمة الوحدة الأفريقية يكون في منهج، في لجنة ثابتة (ستاندنق كوميتي)، ماسكة المشاكل الحدودية دي، ممكن تولع أزمات حدودية كثيرة جداً جداً، من الناحية دي المصريين طلعوا وقالوا نحن رسلنا هذا الخطاب، طيب حكومة السودان ردت، حتى لمن حصلت أزمة عبد الله خليل هل حدث (اكسيجينج) للوثائق، (نوو بودي نووز)، بعدين خلينا حلايب بورانا ومشينا لقضايا تانية.. لكن يا أستاذ الموضوع دا ما تصاعد إلا في ظل الحكومة دي؟ رغم انو آخر انتخابات كانت في دائرة في حلايب وكان لديها ممثل في البرلمان؟. -لكن يا أستاذة، ما هي طالما بقت عظمة نزاع كل مرة والتانية حيجي واحد يثيرها، فنحن قلنا الموضوع دا يصلوا لنتيجة، خلاص هي حتة متنازع عليها بين مصر والسودان، معناها منطقة حدودية، كيف ننزع فتيل الانفجار دا، تتكون لجنة من حكومة السودان، ولجنة من مصر، يعني ما يقولوا لي نستفتي السكان، دا ما الموضوع، الموضوع كيف ننزع فتيل الأزمة، ودا ممكن. يمكن الوصول لحل إداري؟. -آيي، حل مشترك. المعارضة بعد سنوات طويلة لم تطور في آلياتها، يعني لسه المسيرة، المظاهرة، المذكرة، لم تبتكروا آليات جديدة؟. عايزين نعمل محطة تلفزيون، الكلام دا صاح ولا إشاعة؟. آيي صاح، نحن عايزين نعمل محطة حقتنا نحن.. *انتو الحزب الشيوعي؟. -آيي، عشان تقدموا فيهو شنو؟. غنا وإعلانات أمال عايزننا نجيب محمد لطيف يتكلم.. *لا حقيقة نحن محتاجين للتغيير والمعارضة.. يا بت الناس نحن ما قادرين نطلع صحف.. *أود سؤالك عن ما بدأ به الاتحاد النسائي في تذويب الفوارق الاجتماعية، ورفع هذا الشعار لماذا تراجعتم أنتم، هل تفتكر أنو المرأة تراجعت أم تطورت؟. الصراع الحزبي، ألقى بظلاله في حاجات كتيرة، الصراع السياسي لمن يبدأ بيكون بادي في اتجاه الفوارق الاجتماعية ودي واحدة من المشاكل، في حتت كتيرة جداً في كل التنظيمات في السودان، الأداء البرلماني لكل حزب من الأحزاب، لكن برضو الأنظمة العسكرية الثلاثة، العملت شكل من أشكال البرلمانات، عطلت التطور السياسي ووقعت في أخطاء سياسية كتيرة جداً، أنا أفتكر الشئ المغفل والمسكوت عنه، أنو لدينا حرب أهلية استمرت كذا وعشرين سنة، فمهما حاولت لن تغفل هذا، كل الأطراف متهمة، من الأنقسنا لدارفور للجنوب للشرق وللشمال، إنتي عارفة سكان أم بدة أكتر من سكان المديرية الشمالية، دا في كتاب الإحصاء بتاع الحكومة، طيب المديرية الشمالية كانت هي مركز الوعي والحضارة في السودان، أكتر مديرية متقدمة في التعليم في الإدارة في وسائل الإعاشة، حاجات كتيرة جداً، لكن النزوح من الريف إلى المدن هلك الريف وهلك المدن، لمن إدريس دبي زار السودان أيام نميري، دا ما إدريس دبي، حسين هبري.. حسين هبري، بعدين جابوا ليهم العربات دخلوها في المطار عشان توديهم بيوت الضيافة، بعدين في واحد (صول) مرافق للوفد، قالوا ليه تركب في العربية دي، قال ليهم لا أنا ماشي أم بدة أشوف أولادي وأجي، دا حقيقة بالمناسبة، فالتداخل اللحصل دا عمل فينا حاجة مش معقولة أبداً، يعني نحن لا نعرف ما تبقى من الإريتريين والإثيوبيين الدخلوا مناطق الشرق دي، بدخلوا ويمرقوا العمال الزراعيين، بيجو بالبيوت المتحركة دي، إسمها شني؟، *الكرفانات.. أيوا، يعني بلد مخترقة من كل جوانبها، بعدين عندهم قروش موش ساكت، البنوك بتاعت نيجيريا عندها مساهمين قاعدين هنا في السودان، ما مساهمين في البنوك السودانية مساهمين في نيجريا، وعندهم (سيي) في السياسة النيجيرية، وعندهم شبكات رابطاهم في نيجيريا، نحن العرب ونحن ونحن، وما فيش أي حاجة. كيف كان تأثير الشقيقة الكبرى؟. مؤكد غزت الاتجاه للإنقلاب، في أثناء الحديث عن وحدة وادي النيل، عبد الناصر كان في الحكم، وصلاح سالم كان وزيرهم هنا، واشتغلوا في الجيش، ساعدوا الضباط، غذوا فكرة الضباط الأحرار وسط الجيش، ومصر لهسه عندها نفوذ كبير لا يمكنك أن تتخطاه، هسه هم بقوا أكثر دبلوماسية عشان كدا أكتر فعالية، يعني هسه علاقتهم مع كل القوى السياسية سمن على عسل، الميرغني عندو بيت في القاهرة والصادق المهدي عندو بيت في القاهرة.. *انت ما عندك بيت في القاهرة؟. ما لقيت وقت، ما قعدت في مصر، كلها ماشي جاي، جاي ماشي، *دائماً يحمد ليك، إنك بلدي.. داير تجيب خبري يا محمد لطيف؟. لا، لكن السؤال ليه؟، ما انت واحد من النخبة المتعلمة المثقفة، دخلت في السياسة في وقت مبكر جداً.. نخبة بائسة جداً.. نخبة بائسة جداً، لذلك انت هربت منها؟. أنا ما هربت منها، أنا نخبة أهو لابس (قميص وبنطلون) وعندي لوحات معلقة في الحيط.. لكن برضو رأي الناس، إنو نقد دا زول ود بلد، وتلقائي جداً.. تعرف ليه؟ لأني ما بشارك أي زول، ما دخلت في شراكة مع أي زول، لأنو أي شراكة، في واحد أكل التاني، فلا أكلت زول ولا زول أكلني، حصل اشتغلت بيزنس؟. -ما لقيت فرصة، ما من اعتقال لإختفاء.. ممكن تكون مختفي وتدير بيزنس؟. ما لازم تأسس في الأول.. وما أسست؟. أأسس بوين، ياخي عليك الله خليني من البيزنس. إنت ما جاوبت على السؤال الأساسي، يعني السحنة السودانية دي جاتك من وين؟. ما أنا سوداني لكن، ما في سودانيين كتار لكن تشعر إنهم، مثلا ممكن ألاقي الشفيع خضر تشعر أنو مختلف، ودا ما رأي، أنا وإنما رأي ناس كتار إنو نقد ما بتشعر إنو في حاجز بينك وبينه؟. -تعرف ليه؟ لأني مفلس زيهم، لو عندي قروش كنت بسلم عليك ولا كنت قعدت القعدة دي، ما عارف إمكن هبة من رب العالمين.. يعني يا أستاذ كل الناس تخيلوا أن الشيوعيين السودانيين حيتخلوا عن هذا الإسم في مؤتمرهم الأخير؟. برضو كان حيقولوا ليك ديل الشيوعيين *لماذا لم تفكروا في مسمى الديمقراطي أو الاشتراكي؟. ما خلاص دا بقى اسمنا، وفي حاجات كتيرة جداً عملنا فيها تغييرات، لكن لما جينا للإسم، قلنا الحيحصل شنو؟، برضو حيقولوا ليك ديل الشيوعيين، الصادق المهدي عمل ما لا يعمل عشان يقول حزب الأمة الجديد، *كان في تيار قوي ضدك في المؤتمر؟. لا ما عندي فكرة. هي معلومة لدينا، وأنا كتبت رشحت نقد فضربوا لي ناس وشتموني دا الحرس القديم وكذا، يعني أصلوا ما في زول قال ليك ما تترشح وانت حرس قديم؟ أبداً وأنا لم أتدخل في الترشيح أصلاً، اللجنة العملت الترشيحات وشاورت الناس بالداخل والخارج أنا ما كنت فيها، الحاجة التانية أنا ما زعيم، أنا كادر حزبي. *كيف يعني؟. يعني بأدي مهامي في أي موقع حزبي، ما عندي مشكلة. إنت زعيم؟. أنا كان زعيم هسه انت بتجئ تشرب القهوة قدامي وتتبجح، لا جد ما كنت (انتر رستد) في الجانب دا، بعدين أنا حياتي كلها مختفي مع الشيوعيين، هذا غير صحيح، يعني عملية الانتخابات، اللجنة المركزية بتقدم الترشيحات وفي المؤتمر الترشيحات بتكون مفتوحة برضو، فترشحت كمية كبيرة من الناس، بعدين تم الاتفاق على عدد معين وجرى التصويت وجمعت الأصوات في لجنة فيها الزملاء القدامى والجدد بعدين جمعت الأصوات، وحزبنا دا ما كنيسة. بعد المؤتمر الخامس، فاروق أبو عيسى قال أنا ما عضو لجنة مركزية؟. طبعا هو كان سكرتير اتحاد المحامين العرب وبنديهو اعتبار يعني ولكن هسه هو رجع وقعد خلاص. *تاني منو رجع للمؤتمر العام؟. رجع محمد لطيف. لدي خالي وهو من رباني وهي مشكلتي طبعاً، كنا من أسرة فقيرة، وهو (كوز)، بتذكر وأنا صغير سنة68م قعدني جمب الرادي وماشي يصلي العصر وقال لي أول ما تسمع إسم أحمد سليمان قول لي، وسمعت الإسم، وبعد ما رجع من الصلاة قلت أقول ليهو أنو أحمد سليمان إسمو قالوه عشان يفرح وكدا، فقام ضربني، فترة طويلة ما كنت قادر أفهم الحاجة دي، الشاهد إنو سنة 88 أو 89م في البرلمان هو كان قاعد معاي في البيت عيان وموديهو الأردن يتعالج، وفي التلفزيون جايبين وقائع الجمعية التأسيسية وجابوا مرافعة حقتك انت عن الاقتصاد وكلام كتير، بعدين وهو راقد بيسمع ساي، وبعد ما انتهت قال لي الراجل دا تمام كلاموا تمام بس عيبوا انو شيوعي، قلت ليهو هو لو ما كان شيوعي ما كان قال الكلام دا.. -انت مالك، الراجل مشى خطوة نحونا تقوم تجروا بعيد؟، *الشاهد، أنو الخطاب بتاعك مقبول لكل الأطراف، هي ليست مسألة قبول حتى تقول إنها مسألة قبول من ربنا، انت لديك خطاب سياسي مقبول من كل الأطراف؟، بتوفيق من الله، كدي قول لي لا في الحتة دي؟. *الله غالب والله، *في مرة وبحضور كادر حزبى قال أحدهم انو شيخ نقد دا أنا بحبو والله، فقمنا قولنا ليهو لكن هو ما شيخ.. شايف يعني تجئ علينا البركة وأولاد الحرام يشيلوها مننا، إنتِ مالك، نعمة من ربنا، نحمد ربنا وش وضهر زي ما بقولوا المصريين. *طيب يا أستاذ بصفتكم التنظيمية والرسمية، في مجموعة بحثية اسمها مجموعة الأزمات الدولية ومقرها أميركا، تقترح أن يتم تأجيل الانتخابات إلى نوفمبر 2010م، فكيف يعلق الحزب الشيوعي السوداني على هذه الدعوة؟. في وجاهة في كلامهم، لأنهم مدركين أنو الاستعداد للانتخابات ما ماشي، والشريكين مشغولين باليومي، مشاكلهم اليومية ودا بيؤثر على إذا موش النتيجة النهائية، على الجو البتمضي فيهو الانتخابات، شفت أنا الخبر ولكن هل دا بيحل المشكلة إذا هم عندهم برنامج وخطة عمل لحل المشكلة ويكونوا قريبين من الطرفين ويحاولوا يقربوا بيناتهم، يختوهم في (تراك) يؤدي إلى انتخابات في جو (ريلا كس) دا ممكن يتم، لكن في الأنا شايفيوا الخلاف بين الشريكين ممكن يصل إلى حد أن يتضاربوا، لأنو في حاجات هي معقدة بحكم نيفاشا ذاتها كانت (كومبرومايزد) في أكتر من مكان، بعدين في علامات استفهام حول حاجات كتيرة جداً، رئاسة الجمهورية، البشير حيترشح، حيكون في مرشحين آخرين فرصهم قدر إيه؟، دي لغاية دلوقت ما واضحة، في فرصتين، فرصة أنو يفوز واحد من المعارضة، الفرصة التانية أنو يزاحموا واحد من المعارضة، يعني هو حيفوز فوز على (الحركرك)، دا حيترك أثره لقدام، طيب بما أنهم هم شريكين، الشئ الطبيعي أنو يدعم البشير ويدعم المؤتمر الوطني في الشمال، والمؤتمر الوطني يدعم الحركة في الجنوب ودا ما حاصل، يبقى الطريقة الاتعملت بيها نيفاشا بتفاؤل وباستعجال، وقفوا الحرب وأدوا الجنوب حقوقوا، لكن كل يوم بتجيك عيوب نيفاشا، وهي (تو ليت) لأنك لا تقدر أن تغير أي من نصوص نيفاشا، زمان نحن اقترحنا لجنة قومية مشتركة، فيها الحكومة والحركة وكل الأحزاب، عشان تتغلب على كل قصور نيفاشا، ما تغير أي بند من البنود لكن بند واحد نجيبوا نمرة خمستاشر والبند خمستاشر يمشي لنمرة واحد، مداخل يعني، لأنو السودان (مباصرة)، لا تقدر بطريقة (البلدوزر) تجيبوا يعني، سالفا كير دعانا في بيتو، والله بيت أنيق أناقة، يعني لو الله أداك فرصة لقدام اشتركت في حكومة أمشي البيت دا طوالي، بس أدوني بيت أسكن فيه، أشم الهبوب بس يعني، بيت أنيق أناقة ونضيف نضافة، في بيتو قاعد معانا بالكسكتة، والله السودان دا جننا ذاتو، الحركة هسه شوية بعد مؤتمر جوبا بالذات، وشافت الناس شاركوا معاها من موقع المسئولية موش الهجوم ولا من موقع التنازل، فحست أنو تقترب، يعني أمس ونحن قاعدين مع سيد الصادق جاء فاقان أموم .. وتحدثوا عن أنهم لسه محتاجين يتعاملوا مع الحركة السياسية، لكن أفتكر أنو المؤتمر هو المالي يدو تمام، وهم في حالة ضعف، ومن الجانب الآخر ما تستهون بدور ناس بونا ملوال، ديل سياسيين، اشتغلوا الجنوب دا مع نميري وضد نميري وعندهم وزن في قبائلهم . ولكن هل يقف الشيوعي مع انتخابات في أبريل أم نوفمبر 2010م؟. -هو شوف، ممكن تتم في أبريل وممكن تتم في نوفمبر، وهي ما اتقالت ساكت يعني، لأنو الأطراف الخارجية المرتبطة بنيفاشا دا تفكيرها. *ولكن يا أستاذ إذا تأجلت الانتخابات إلى نوفمبر سيتأجل الاستفتاء إلى عام آخر؟. شنو يعني؟، دي خطة خمسية حتفشل يعني؟، ما في مشكلة، مشاكل السودان انت بتحس بيها كل يوم، لكن داير ليك منبر أو (فوكس)، يجيبك يختك مع ناس آخرين عشان تطلع بحاجة، يعني لو كلامكم معاي دا عملتوه مع سياسيين آخرين حتطلعوا بحاجة كويسة جداً لقدام، وحتعملوا أرشيف ضخم ممكن يكون مادة ودا كلام من خشم كل زول وما يقدر ينكر، يعني تساعد في التحليل السياسي، بعدين شوف انت السياسة دي تدخلها من غير أي هواجس لا شيخ فلان ولا أستاذ فلان، شغل، اشتغل بوضوح، نحن شاكرين يا استاذ.. -على الأيمان أنا في القبر ما حيسألوني زي ما انتوا عملتوا، ياخي نحن من ما جينا داخلين انت البتسأل فينا.. أدوني يوم أنا أجيكم أسألكم في الجريدة.. *جداً ومرحب بيك في أي وقت.

Quote: انتنم اجبن من ان تتحدوا مصر

Quote: عمر إثارة موضوع حلايب من الجماعة ديل ، وفي الوقت ده هو كلمة حق أريد بها باطل فاكرين بي كلامهم ده ممكن يثيروا الشعب عشان يضغط على الحكومة ،وتقوم الحكومة العويرة ليهم تخرب علاقتها مع المصريين ، بعد رأوا الانفتاح الكبير للإنقاذ مع كل الجيران والعلاقات القوية مع كل الدول تحياتي

Quote: نعم للتفاوض حول حلايب نعم للحلول السلمية للأمر بما يعمق ويؤطر للعلاقات بين الشعبين الشقيقين لا لأى إتجاه للتصعيد حول هذا الأمر لا يجب أن تكون قضية حلايب أولوية فى الإستراتيجية السودانية،،،فالبلاد تمزقها الحروب الأهلية ويظللها الفقر والمرض والأوبئة،،وبعد كل هذا يأتى المترفون من الرافلين فى نعيم الإنسان الأبيض ليتحدثوا عن أولويات هى لا تخص المواطن المسحوق المغلوب على أمره هل إستطعنا الحفاظ على الجنوب حتى نتحدث عن حلايب؟ هل إستطعنا أن نقسم السلطة والثروة بعدل حتى نتحدث عن حلايب؟ هل فكرنا فى إستفتاء إنسان حلايب نفسه عن رأية أى البلدين يختار؟ على العموم الذى يريد إرجاع حلايب ويضعها على سلم اولوياته،،لا بأس، فليذهب ليحارب ويرجعها وكفاية عواء بالله عليكم

Quote: طيب إنتو يا الفتيان الهمام والفرسان الشجعان ما تمشوا تحرروها زي ما حررتو أراضي الشرق والغرب والجنوب و سميتوها "الأراضي المحررة" صدقني لو كان السودانيين على كلمة رجل واحد ما كان أولاد بمبة يقدروا يتجرأوا و يهوبوا ناحيتنا لكن خياسة المعارضة "وآسف للكلمة " هي الجابت لينا الهوا

Quote: الاخ عمر صديق سلام اين التطابق الم تلاحظ تاريخ البيان وتصريحات دكتور مصطفي عثمان الذى كان فى ذلك الوقت رئيس مجلس الصداقة الشعبية هل المؤتمر الوطني تبنى وجهة نظر الشيوعى فى حلايب

Quote: كان الاهازيج و الدلاليك تحفظ نظام متهالك من الانهيار لحفظت ما هو اخطر من الإنقاذ غني حتى إشعار آخر

Quote: يا مستر عمر صديق لو تسمح دقيقة قبل اٍتفاق موقف حزبكم المؤتمر الوطنى مع موقف الحزب الشيوعى خلينا نكلّم الناس و الاجيال اولا عن كيف تم اٍحتلال حلايب هذه من قبل المصريين. اذا كنت لا تعلم عزيزى القارئ فأريد ان اخبرك بأن حلايب هذه تم الاعتداء عليها و اٍحتلالها تماماً من قبل المصريين فى العام 1995 فى اعقاب المحاولة الفاشلة لاغتيال الرئيس المصرى حسن مبارك فى اديس ابابا

Quote: كن ما ممكن تعلق علي ذلك لانه يفضح كل مزايدات الشيوعيين حول حلايب !!!!!!!!!!!!!!!!!!!

(عدل بواسطة abubakr salih on 12-27-2009, 10:12 PM)

Quote: وهل توافق علي حلها بالتفاوض