|
|
|
 Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: Yasir Elsharif)
|
الصديق العزيز علي تروس
شكرا ً لتهانيك الليمونية.. والله الليموني البرتقان الناير
وآهو رجعنا إلي تراثنا في زمن الجنجويد الذين
عاثوا فسادا ً في قرانا
ومدائن اطفالنا..
أما الحيكومة شكيناها لي الله
السلام والتهاني ليك و للمدام
وللوالد والوالدة.
وبالمناسبة الاستاذ شمس الدين ضوالبيت يحلي ايامنا هذه الايام
وهو في واشنطون ويهنيك هو وزوجته ناهد محمد الحسن
بمناسبة الزواج كما يهني المدام وبيت ما وعيال
..وقال ليك لو عندك وصايا " خفيفة "
لناس السودان ..وسيغادر إلي نيويورك ومنها الي الخرطوم يوم 21 أغسطس
وتلفوني معك.
| |
 
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
الصديق العزيز
محمد عبدالله شريف
كنت امني النفس ان تكتمل زياراتكم لنا , والتعرف علي معروف سند من قرب ,
ولكن يبدو الزحمات وارفات في بلاد العم سام.
ويا محمد حأقوم بإنزال صورتنا مع الموسيقار حمزة علاء الدين
وطلعت جميلة مثل جمال ذلك اليوم الذي اطربنا بعوده وكذا وردي
ومازلت اتذكر ذاك اليوم.
يا محمد كيف ابراهيم سلوم
ونجوي خيري وأسعد كومي
وتحياتنا لأهل رشموند
وأسيل قالت ليك في المرة الجاية ما تنسونا.
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
الاستاذ صلاح شعيب
تحياتى الحارة
السودان يرحب باسيل واخواتها
جميل ان يعود الابناء لكن نحن كيف؟ واى سودان سنجد ان عدنا؟
الكلام دا ماعندة اى علاقة بالوضع السياسى اقصد على الصعيد الانسانى
الحلة الخالات العمات الاصدقاء ومن حل جديد
عدت فى عالم 94 كنتة محتاج لاعرف الناس بنفسى وفيهم من يقول ليك اهههههه انت اخو (فلان) وتبقى غريب بجد فكرة العودة ملحة لكن الخوف بلاحدود من غربة تانى وداخل الوطن (دعوة لطرح افكار حول الموضوع ) ولك الود
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: حسن النور محمد)
|
الاخ صلاح
كل التحايا لاسيل والاسره ,, والسفر للسودان سيكون نقطة تحول عميقه جدا في حياة اسيل واختها ,, وصدقني اسيل ما قبل الذهاب للسودان لاول مره واسيل ما بعد الذهاب للسودان حتكون انسان مختلف ,,, اتمنى انو اسيل تجني اكبر ثمار ممكنه من هذه الزياره ,,
تحياتي للاستاذ شمس الدين ,, وذي ما قال ليك محمد كنا خلال هذا الاسبوع في جوله طويله وكنا نمني النفس بلقيا ,, عموما نتمنى ان نلتقي قريبا ,, وبعدين انت شكلك ناسي , فقد التقينا من قبل اقل حاجه سته وعشرين مره بالقاهره وذي مرتين عابرتين بواشنطن ,,
نتمنى ليك رحله موفقه لافريقيا
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: هاشم نوريت)
|
العزيز صلاح شعيب
تحيات واشواق بطول مسافات البعد
سعيد انا بالطلة البهية للعسولة اسيل وهي تنير المنبر كله وتنير حياة والديها بهذا الوجه الملائكي
الجميل .... وهل تسربت السنوات من بين ايدينا بهذه السرعة ... فما زلت اذكر تفاصيل ذلك اليوم السعيد
عندما اجتمعنا نحن ومجموعة كبيرة من احبابك واصدقائك بالوسط الصحفي والفني بالحارة 13 بالثورة احتفالا
بقرانكم الميمون .... تحياتي للعزيزة نسرين وقبلاتي للحلوة اسيل وشقيقتها اسراء وربنا يحفظهم لكم ويسعدكم
بنجاحهم ... واجازة سعيدة وسط الاهل والاحباب
سؤال وامنية : يا صلاح انشاء الله تكون حتمر بالقاهرة وانتي ماشي السودان !؟
لو عندكم غشوة للقاهرة ضروري نلتقي .... وايميلي معاك
ولك حبي
جمال ادريس
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
مرحبا بأسيل في السودان في عهد بشائر السلام والذي نرجو
أن تكتمل حلقاته ويتعانق السلام مع ديموقراطية حقيقية...
فليكن ذلك هو العهد القادم لجيل أسيل القادم والذي من حقه علينا
أن ننشئه في وطن تحل فيه ا العصفورة محل الطلقة ونوافير المياه عوضا
حمامات الدم ورياض أطفال بدلا عن خيام الملاجئ وبؤس التشرد ومحل السجن
مستشفي ومكان المنفي كلية أو كما قال محجوب شريف..
مرحبا بأسيل وأقرانهافي أحضان دفءالعوائل وحنان الأهل وعفوية الاقران
من براعم السودان
كمال
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
سعادة الصديق نورالدين " منان "
هكذا انت منذ ان عرفتك
وبارك الله في استاذنا محمد المكي ابراهيم
الذي جمعنا لاول مرة في مكتبه بالسفارة القطرية بواشنطون
ومنذ ذلك اليوم عرفتك اخا ً اكبر نتعلم منه ملابسات حضارة كوش والسودانوية
والعولمة وتاريخ الدبلوماسية التي كنت احد عناصرها
حين كان منصور خالد يزينها بكاريزمته الخطيرة
وتقرأ لنا شعرك الجميل
ولا تبخل علينا وعلي السودانيين في واشنطون والميريلاند
وفرجينيا باستشاراتك التي مهدت لهم تسوية اوضاعهم
ود منان الله لا جاب يوم شكرك.
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
استاذنا ياسر الشريف
هكذا تفعل بنا الغربة فعلها
تزملنا علي حافة البعد عن الخالات والحبوبات
والاباء
والامهات
والجدود
ولكن الجميل هو ان نرتبط بالاهل ونربط ابناء بارض الجدود
ونريهم القطاطي
والدرادر البتتعمل بالتبتبي
وغرف الجالوص والرواكيب
والمشعليب
والدوكة
والصاج
والمحاية
وعليهم ان يشكلوا موقفهم من جملة هذا التراث بلا وصايا او زندية
علينا ان نعلمهم غايات الدين الصحيح ولا نسوقهم الي المقصلة كون انهم يمارسون
حرية التفكير بصفاء نية وروح بريئة خالصة
علينا ان نعلمهم كل شئ سوداني اصيل
وعلينا ان نغرسه فيهم
وعلينا ان نعرفهم خطر العنصرية الماحق
لك شكري وامتناني
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: مطر قادم)
|
أستاذنا يوسف الموصلي
لك ما تشاء
وانت لا يرد له طلب او رجاء
وحصل الشرف ولكن هذه الغرباوية عنيدة
واخاف ان تخنق ليكم ولدكم
وبالمناسبة هي تمارس جنجويدية عجيبة مع اختها إسراء
وتغير منها كلما امسكت بها..
بس الغريبة البعد "الجعلي" فيها جميل
لا تقضي يومها خنق .. ولكن هي أسيرة لايقاع السيرة
ربما ان جدها ود سعد اورثها جيناته الحماسية
وكما تعلم الجعليين اهل غناء وطرب
واغاني الحماسة عندهم بعض كثير من
رقة ومحنة ــ كما قال عبدالله الطيب
وتشرف ياموصلي
بس المهر كيف..ياريت لو بالدولار
لانو عندي فكرة مركز دراسات
بقسم للتوزيع الموسقي
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: عبدالماجد فرح يوسف)
|
kOKI
العزيز
ياخي كتر خيرك علي الزيارة
اسيل قالت لي ده شنو في اشارة للصورة المرفقة
في بوستكم
فقلت لها ده البعاتي
فضحكت وقالت لي البعاتي ده شنو
فسردت لها اشياء لاقرب المسافة
فعجزت وفي اقناعها وقلت لها لامن نمشي السودان حاشوفك ليهو
فقالت لي في الفاشر ولا الخرطوم
فقلت لها لا في واشنطون فلكزتني بيدها
فقالت لي : طيب قوم اراح واشنطون
وتفاديت الحاحهابتغيير وجهة الحوار
ياخي بناتنا ديل عايزين يسحلبو بينا بصورتك دي
واخيرا قالت لي قول ليه:
THANK YOU FOR ELBAATI
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
عزيزي الأستاذ صلاح،
تحياتي، واحترامي،
بنتك جميلة، ويبدو عليها الحضور التام، كما تبدو على وجهها نباهة مبكرة.
أرجو لها ولك ولزوجتك إقامة سعيدة في إجازتكم. كما أرجو أن تقرأ
لنا الواقع بعيون ناقدة هناك، وأن ترفدنا بما ترى أنه غائب عنا،
نحن الذين نعيش في الخارج.
زرت السودان في الصيف الماضي. ولكني أشعر بأن إيقاع التغيير هناك
يسير بمتوالية هندسية، كما يقولون. لهذا أشعر بأن غيابي عنه قد طال.
أي غياب عن السودان، مهما قصر، فهو طويل، خل عنك عام بأكمله.
نترقب عودتك بالسلامة إلى مقرك في أبوظبي، ونترقب تصويرك الكتابي لما
تراه، وأنت صاحب ملكة متميزة في الكتابة.
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
الصديق العزيز مطر قادم
ضحكت كثيرا ً لتعليقاتك التي اعادتني الي ابو زكريا
وصدقني انني خططت برنامجا لزيارة قصر السلطان
وبالمناسبة انا حفيد له فحبوبتي من احدي الميارم
وعملا بنصيحتك سنذهب مع اسيل وسأريها كل شي عن الفاشر
وسوف استطعمها ملاح الكول والمرس والانقارة ولعا الخيار
نسرين بتسلم عليك وبتسأل عن جودة وزوجته وانا كذلك
ربنا مررت بالقاهرة يا مطر ودي ربما قوود نيوز
مع تحياتي
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
العزيز صلاح شعيب
سلامات
ولاسيل كل الامنيات برحلة ممتعة لدارها
| Quote: فقلت لها ده البعاتي |
اعتزر لاسيل اولا لانى سببت لها بعضا من الازعاج
لكن دعنى اقول لك ان هذه الصورة ليسة للبعاتى
انها من المؤكد احد اهلنا .. رجل ؛ امرأة ؛ طفل او ربما طفلة
لماذا لم تحكى لها عما يحدث لاهلها من قتل وابادات
للاطفال عقول تميذ بشكل مدهش فلاتستقل بعقل اسيل فهى المستقبل
اجمل الامنيات
الريح كودى
* الحى ال 8
* مركز الثقافات
| |
|
|
|
|
|
|
|
|
 Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: koki)
|
الاخ صلاح شعيب
روح يازمان وتعال يازمان..
نظرت صورة اسيل وعدت الى الوراء كل سنوات عمرها الغض وبعضا من سنوات اعمارنا الماضية..عدت الى الوراء ووالدها يعود من صحيفة ظلال ونزور والدتها (ونطلب ايدها)فى خطوة مباغتة..
ياصلاح طبعا حكيت ليها قصة المشاوير الطويلة والدرب الوعر..الصحافة وصحيفة ظلال وعبد العزيز الهندى والزبير سعيد وفيصل الباقر ودكتور طلال ومصطفى سيداحمد والليالى العامرة بى زاد الشجون...
ياصلاح ياصديقى
مائة سنبلة لى اسيل وتحياتى لك والمدام والامورة الصغيرة..
مع مودنى وتقديرى
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
القريب العزيز محمدين اسحق
لقد قرأت افكاري حتي تفاجأ داخلي
فواحدة من طموحاتي ان اوثق للفاشر تاريخها
وذلك مشروع كبير ظللت اتمني التفرغ له
زمن ضمن اهتماماتي ان أصور في رحلتي القادمة محتويات قصر السلطان
لما فيه من أثريات مهمة
وبخلاف ذلك اتمني ان اقدم
إصدارات في المستقبل عن دارفور عموما ً
ولعل هذا بعض من وفاء علي أعناقنا
.. ولكن متي تعود السكينة الي دارفور المكلومة التي عصف بها الجنجويد
وأهملتها الحيكومة ام الارواح الشريرة
صدقني ان دارفور ستعود لسيرتها تلك
وتعانقنا بصدق اهلها
وجمال روحهم
وإبداعية تعاملهم مع الاخر
ولك مودتي
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
العزيز هاشم نورين
شكرا علي الدخول بالترحيب العميق بأسيل في مسعاها لزيارة وطنها الاصل
, ولعلك عبرت جميلا بوصلنا بفضاء الصورة
علينا ياهاشم ان نكثر من صدقنا حتي نمهد وطنا ً جميلا لاطفالنا
فيه يعترفون بالاخر ويحققون القسمة العادلة لمعطياته
وطن لا يذدري ناسه ويسومهم الشقاء والعذاب
ويعاملهم كأنهم غرباء في ملابسات السلطة
ولعلي بك تفعل الكثير لانجاز ذلك من خلال كتاباتك الدائمة والمهمومة
بأمر اهلنا في الغرب والشرق والشمال
والجنوب والوسط .
لتواصل في شجاعتك في الدفاع عن ماتعتقد فيه
ولتمش مرفوع الرأس ان لا أحد قادر
ان يبدل قناعتك بالقوة
ولك التحايا من الاسرة وتحياتي للاسرة الكريمة
| |
|
|
|
|
|
|
|
|
|
ما شاء الله وعيني باردة (Re: صلاح شعيب)
|
الغالي صلاح شعيب
سلام بحجم شوقك للسودان وللفاشر
ربنا يحفظ ليك أسرتك الصغيرة والكبيرة والتي تنوون زيارتها وربنا يرجعكم بالسلامة ... ودمتم سالمين
أما أسيل فتحياتي وأعجابي بها
(أسيل حسنك ياغالي) ههههههه
لكم حبي
| |
|
|
|
|
|
|
|
|
|
Re: ما شاء الله وعيني باردة (Re: بدرالدين شنا)
|
العزيز النبيل بدر الدين حلا
شوقنا بحر يازول والله مشتاق ليك كيف
وزي ما قال اهلنا زي شوق الحمامة لوليتا
او زي شوق الكديسة للبن
ودي اسراء يا بدر الدين
شقيقة اسيل الصغري وبتقول ليك
شكرا يا عمو بدرالين وان شاء الله نشوفك في برنامج جنة الاطفال
| |
|
|
|
|
|
|
|
|
|
Re: ما شاء الله وعيني باردة (Re: صلاح شعيب)
|
رهيف الشعر وحريفه عثمان بشري
كيف تبدو يارجل في ليالي القاهرة الجميلة تلك؟
قبل ان اصلكم هناك سأتصل بك في بحر اسبوع
ولعلك هناك تكون كما عرفتك نسيج وحدك وخصوص امانيك
المرهفة
تحيات من المدام
واسيل وإسراء
ومني ايضا
| |
|
|
|
|
|
|
|
|
|
Re: ما شاء الله وعيني باردة (Re: صلاح شعيب)
|
العزيز د.حيدر بدوي الصادق
شكرا لتشريفنا بوجودك المقدر ..عليه أحست أسيل
بثراء اهلها وجميل خصالهم.. علي ناحية فان اسيل واختاها
إسراء جزء من مكونات حواراتنا تلك حول المكون السوداني
فليكنا مثالا للتعايش بين روافد الرصيد القبائلي السوداني وردا اكيدا علي دعاة
هزيمة الوحدة السودانية..ثم اين الدكتور حمد ومازلت انتظر ردوده ونرجو الا يلف
النسيان حواراتنا الجميلة تلك
ولك الف سلام
| |
|
|
|
|
|
|
|
|
|
Re: أبنتي أسيل تغريكم السلام ..وتستعد للسفر للسودان لأول مرة " توجد صورة " (Re: صلاح شعيب)
|
العزيز صلاح
والاسرة الكريمة .. خاصة اسيل
لكم تحايا الورد
كنت يا اسيل عايز اقول ليك .. يا مسافر براك شاقي المفازة في ليل
لكن اكيد بقيتي زي اولادي وارف واياس بقوا يفهموا الغنا السوداني طشاش طشاش
وغناهم كلوا بقى بالانجليزي
شفت يا صلاح الغربة البطالة كيف
اتمنى لاسيل اقامة طويلة بالفاشر اكتر من الخرطوم!!
عشان تجي مالية ليك شنطته السمحة دي انقارا
لك مني كل الود
ونحن برضو دايرين السفر
لكن وين يا الحبيب ؟
| |
|
|
|
|
|
|
| |
صلاح شعيب
نصار
Siddig A. Omer
altahir_2
محمد عبدالرحمن
Kostawi
Mannan
luai
Elmosley
عمر ادريس محمد
saadeldin abdelrahman
jini
ناذر محمد الخليفة
على عمر على
HAMZA SULIMAN
Yasir Elsharif
حسن النور محمد
Marouf Sanad
محمد الامين محمد
عاطف عمر
Mohamed Adam
معتصم دفع الله
محمدين محمد اسحق
حمد فتح الرحمن
ودقاسم
ADIL FAIT
Nour Kamil
هاشم نوريت
جمال ادريس
قاسم المهداوى
kamalabas
إسماعيل وراق
مطر قادم
عبدالماجد فرح يوسف
حسام يوسف
Haydar Badawi Sadig
محمد عكاشة
خدر
waleedi399
عثمان البشرى
Biraima M Adam
بدرالدين شنا
خالد العبيد
فيس بوك
تويتر
انستقرام
يوتيوب
بنتيريست