|
|
 مشاهد من سرادق عزاء
|
الفاتحة الفاتحة
اللهم ارحمه وتقبله قبولا حسناً .. الدوام لله بارك الله فيكم
الفاتحة بصوت اعلى مع لفت لكل الناظرين الفاتحة الفاتحة
أحسن الله عزاءكم .. أتفضلوا اتفضلوا - ياولد جيب موية بى جاى ادى هناك .. بى جاى
الفاتحة الفاتحة ... الفاتحة شكر الله سعيكم استريحوا الفاتحة
وين اولاد المرحوم
والله ياخ فى مرتضى دا هسسه كان هنا لكن زى الطلع .. يا طارق مرتضى وين
مرتضى دا مشى بى غادى .. دا طارق ود عمنا ..اهلا يا ولدى البركة فىيكم .. بارك الله فيك يا حاج الفاتحة الفاتحة .. اللهم ارحمه واجعله من اصحاب اليمين .. اتفضلوا لى جوة .
جلوس : كيف الحال .. الحمدلله .. ربنا يرحمو .. الغريبة الاسبوع الفات جينا شفناهو ..كان كويس يعنى مافى تعب شديييد كدا يعنى ... اااى بس اليوم تمّ .. ماقالوا كان تمت المعدودة خلاص ... ايوة صحيح المرض ما بكتل ياولدى .. فعلا فعلا . كيف حالكم .
جانب آخر من الصيوان
حوار بين حسن برشوت وطارق سوسيو
وين يامان ليك كم يوم غاااااتس كدا مابتجى الشيشة ..
والله مركلس بس.. ياخ بعدين اليومين دى ما مسلّكة .. غايتو شهر تسعة دا خليهو ساااى عاضّى عضة
بعدين شنو قالوا لى طرشقتا الفلم داك
اااى موضوع ضارب سااااى ياخ انا بس فتحتا خشمى ساااى قالوا لى صيانة البيت وماعارف دايرين سراير .. ونغيّر النقاشة .. يا مان حسبتها كدا لقيت ليك الشغلة طويييلة .. والله البلد دى الا تلقى ليك فيها بير بترول عشان تغطى معاك . نشفانة ياااخ .
لكن انت ما تحسبا كدا .. انت اعمل بالمعقول .. يعنى اهلك ديل ما يعصروا عليك شدييد كدا ..
والله بس ربك يهون غايتو كدى نعدّى الشهور الفضلت دى امكن تظبط شوية .
انتقال الكاميرا لجلسة سباعية
تعال يا حسام .. عليك الله شيل الكبابى دى وديها هناك وجيب لى شاى وموية بااااردة قوّام ..
الشاى شالوا الترامس جوّة دا انتهى .. دقايق بس يجيبوهو ..
يلتفت الى المجموعة التى يجلس معها حيث خرجت عبارة من احد الجلوس استفزّت سمعه ودخول فى الحوار
ياااخ انتوا هسّة جبتوا ليكم محترفين وطيارات وسفر ومعسكرات وحوافز وبعد دا كلو ماقادرين تباصروا الممتاز ..
ممتاز قال كدى انت بى الطيارة دى جيب ليك كاس بالجو دا .. عندكم شنو غير دفن الضببة وشرا الحكّام
شرا حكّام علىّ الطلاق نحنا قمّة ومفخرة وأنت جوطة ومسخرة .. تعال ياعبد الباقى .. سامع الحمام المضبوح دا بقول فى شنو قال زعيم
عبد الباقى ينظر اليه ويرفع يده اليسرى مفتوحة ويده اليمنى وقد ظهر منها اصبعين .
وتنتقل الكاميرا الى أيهاب شمار وايمن
وحوار هامس وسخرية يتناول الغاشي والماشي
والله عمك دا خلااااص قررررّب هسة الجابو شنو .. غايتو كان قالوا ليك اتلحس بعد رجع من هنا صدّق
ياخ هو زاتو مشي ماقادر يمشي
بعدين دا تلقاهو معذّب ليك ناس البيت عذاب
ياخ انا جدّى جانا من البلد .. يومين التالت طوالى مشيت ناس خالى
الجلاكين ديل متعبين يااخ .
اسمع انت الخشت بى هناك دى مش مواهب .. ااى ياها زاتا .. من مشيتا ظاهرة
.. ومالا اتبشتنت كدا
يكون زولك دا سيّكا وللا شنو ..
ياخ هى زاتا قاعدة فى الواطا والله دى تبيعيو ليك فى ملف
هو زاتو غيّاظ وفاكّيها فى روحو .. وبعدين عامل فيها تفتيحة ومقطّعا
والله ياخ عالم عجيبة
هسة ناسك ديل كيف بعد الجلك دا شتت
مرتضي دا باقى ليك بقدر على البلاوى دى
والله الاّ يشد حيلو غايتو لكن بى مسكنتو دى حق الرغيف فى تلتلة
هو غايتو كاااتل ضلّو كدا لكن ما مسكين
غايتو لغاية ما يتخارج من ناس المدارس والجامعة بكون شيّب
اااى دى مليشيا ياخ .
حوار تلفونى
اللووو .. ااى انتوا وين
مامشينا نجيب التلج
تلج شنو يا محمود ياخ تلج ساعتين تلج
المشي لى الرغيف منو
مشينا انحنا لى التلج وبعدين قالوا نجيب رغيف
ياخ الفطور دا فى الصوانى والناس راجين ما ممكن تسكنوا فى السوق ياخ
اعمل ليك شنو طارق قال سعاد فى البيت وجاية ناخدا معانا لانوّ هو ما معاهو العربية
ياخ سعاد شنو ما تركب امجاد وللاّ مصيبة الناس دى راجين الفطور
اتحرك اتحرك وبعدين اسمع ... جيب معاك عجين .
أحد الاقارب وبرفقته ااخر وهم فى الطريق لى الصيوان
اسمعنى انا الناس ديل ما بدورم عليك الله نكشح فاتحة ونتخارج سريع
ياخ تدور شنو دا بكاء ياخ نحنا ماشين نخطب ليك منهم ؟ شنو ادورم وبتاع !
ياخ هسة يمسك فينا عمك دا ويفتح معاى مواضيع الشغل وما لقيت لى حاجة لى بتّى وجرجرة ياخ
بالله خمسة دقايق
خمسة دقايق اصلو دفنوا ميّت وللا كيبل سوداتل ياخ .. ما تبالغ ياخ
طوّل بالك بس
عدد من اصحاب الملافح والاحذية البيضاء وهم يتداولون الحديث عن الوضع السياسى الراهن وكان الحوار بين الدجل والجهل وبعض مقتطفات الحوار
والله هم الجماعة ديل لو فكروا صاح الانفصال ما من مصلحتم .. ياخ ديل هسة قبل ما ينفصلوا ميتين اكتر من ألف فى بحر الغزال .. بعدين ياخ قرارم زاتو ما معروف مع منو
ويضيف آخر
قالوا على عثمان مشي جوبا الليلة .. لكن ناسك ديل زاتم بتاعين لغوسة يعنى لادايرين يطبّقوا الاتفاق ولا دايرين يخلوهم يتفّكوا
والله اللقوهوا فى الاتفاق دا ما يلقوهوا فى اى اتفاق
طبعا طبعا اكيد
لكن هى القصة دى انتهت مع موتة قرنق زمااان
غايتو بلد ماشة فى وضع غاتم خلاس
بعدين السيد مشي ارتريا
والله السيد زاتو ماعارف يعمل شنو
قالوا ماشي يفتتح مساجد فى مصوع
يرد واحد ساخط
هو مساجدو الهنا دى عمل فيها شنو لمن يمشي مصوّع
هسة الامريكى دا غايتو شوية مرن معاهم
بعدين شوية كدا متفهم القصة
لكن الناس ديل تحت تحت كدا علاقتم مع امريكا كويسة
هسة الانتخابات دى كيف .. شايف فاتحين مراكز تسجيل وهيلمانة
انتخابات شنو .. دى انتخابات شكلية يعنى منو الداير يترشح ويفوز الا يجيبوا كيجاب ههههههه
غايتو الا يعملوا تمويه لى الناس بى احزاب الفكّة دى
لكن شايف الصادق المهدى قال مشاركين
ياخ الصادق زاتو ما مفهوم موقفو شنو
يقعد هنا يشاركم
يطلع برّة يناكفم
بعدين حزبو فقد كتييير
خاصة بى موضوع دارفور دا
هسة شايفو عامل مع خليل تفاهم
ربك كريم بس
أحد اصحاب الملافح فى استقبال مكالمة مهمة
الوووو
ياسعادتك كيف الحال اااى البيت جنب الكونتينر طوالى مرحب بيك الله يبارك فيك
دا المعتمد جااى يعزيكم
الفاتحة الفاتحة
اتفضل بى جاى سعادتك اتفضل
ايهاب شمار وأيمن وهم يشاهدون تبادل التحايا بين المعتمد الذى جاء مرتدياً جلباباً ابيض وملفحة بيضاء وجزمة بيضاء وتعليق من ايهاب
( أنت دا معتمد وللاّ ضكر حمام)
احد اللذين كانوا يتناولون الوضع السياسى
ياولد جيب الموية تعال بى هنا ادى هناك
الشاى ياولد
ياولد
الفطور
كيف حالك سعادتك
كيف مع التعب والشقاوة
نحمد الله ونكون من عباده الشاكرين
جبر الله كسركم
الله يخليك سعادتك
كيف مع الاستعدادات والفترة الجاية دى غلبة شديدة ههههههه
نعم اكيد الله المستعان
والله ياسعادتك البلد دايرة تكاتف شديد وصبر شديد بعدين فى مؤامرات كتيرة
طبعا مافى شك اصلو الشى لمن يقوّم اسنان بكون مستهدف
طبعا سعادتك طبعا
غايتو ربنا يهون ويوفق
الفاتحة
سعادتك الفطور جاهز
بارك الله فيك انا صايم
ربنا يجعلو صيام مقبول سعادتك
ململة فى داخل الصيوان .. الفطور اتأخر
ومشجعى الكورة يواصلون الحوار .. والفاتحة شغالة
والساخرين يواصلون تصوير المشهد
والمرحوم يرقد هناك فى سلام .. فقد كان بعيداً عن كل هذا
|
|
 
|
|
|
|
مزمل خيرى
فيس بوك
تويتر
انستقرام
يوتيوب
بنتيريست