حـكـايـتي مـع سـوّاق الحـافـلة الـكـوسـتـر...!

Quote: أها يسكت ويكون سايق في أمان الله، فجاة تسمع: قرصة يا أبن العم. أبن العم يجازف الحافلة ينزلها وبمجرّد ما الكشكشة تحصل يروح فاتح فيني. عمو: والله قال فضيّة قال! الله يقطع اليوم اللمانا فيك زاتو. طالعين نشوف رزقنا يتعارض لنا عارض نفر ده!. ده يوم نحس اللمانا فيك يا شوووووم. الجماعة في الحافلة طبعاً لقولهن موضوع، وتعال شوف الضحك والقرقراب. جنبنا في إتنين كده عملوها مسخرة، اوآت ما يكون في زول نازل يقولوا: اوووووب هسسسع عمّك يفتح. وهو ما قصّر تب، أوّل ما يسمع كشششششاش يقوم: قال فضية قال! الفضية التتكسر لك فوق راسك ده صحن صحن، وكُباية كُباية يا نحس. أنا طبعاً من هو فتح خشمو قفلت خشمي. بعدين في جماعة كده الواحد لمان يجي نازل يقولوا: يا عمو خلاس عليك الله أنسى الموضوع. وهو يهيج: لكن عليك الله دي طريقة دي! أنا واللهِ أكان عارف بيلاقيني الفقُر ده، من بيتي ما كان مرقته.

Quote: يا ود المدير يا اخي إنت زول فقر ومسنوح وسحار كمان.. والله العظيم لما قريت فقرتك دي ضحكت لما بكيت.. يا اخي إنت زول حكاي لدرجة مبالغة.. وعشان كدي لما أشوف اسم معاوية المدير بجي تووف طاير.. قال فضية قال.. متابعنك تواصل يا اخ.. الله يقطع اليوم اللمانا فيك ذاتو..

Quote: يا اخي إنت زول حكاي لدرجة مبالغة..

Quote: coaster it means: الوقّاية

Quote: تحركت الحافلة، وعلى ما أعتقد كانت متوجهة إلى أبو حليمة كنقطة نهائية وهي تحمل في جوفها ناس شمبات ظلط، وشمبات الحِلة، والحلفاية، والدروشاب،

Quote: تحركت الحافلة، وعلى ما أعتقد كانت متوجهة إلى أبو حليمة كنقطة نهائية وهي تحمل في جوفها ناس شمبات ظلط، وشمبات الحِلة، والحلفاية، والدروشاب، وإنت ماشي. المهم، من بداية الصافية كده بقينا نسمع ليك الجماعة: قرصة قبلك، يا أبن العم. ومرات تسمع طرقعة الأصابع، طق، طق، طق،: قبلك يا زول. عمنا كل مرّة يجازف ليك الحافلة ينزلها من الظلط. الظلط سنين وعالي، والحافلة هكرة شديد، قزار الشبابيك يرقص ويلعب سااااكت، وعمنا كلما ينزلها تسمع، كششششش، كشششاش من الناحية اليمين، ولمان يطلعها تسمع كشششش من الناحية الشمال وهكذا. رغم إنو عمنا كان حريص جداً ينزلها على مهل وتؤودة كأنما هي فلذة كبده. وعمنا النوع الجادي المابيتكلم داك، مركّز في الشارع للطيش، وشآدي ضهرو مع الكُرسي تحلف تقول بالع سيخة. أها واحد من الرُكاب كورك: قبلك يا أبن العم، قرصة. عمنا طوالي راح مسايس ليك الحافلة نزلها. أوّل ما نزلت من الظلط نسمع ليك، كششششا كششش. أنا طوالي لى شقاوتي، قلت ليهو: ده أشنو يآ عمنا! إنت سايق حافلة، والا سايق فضيّة؟؟؟ أريتني ما قلت الكلمة دي، وعمنا فتح فيني. عمو: الله يقطعك، ويقطع يومك. داير توقفها! الله يوقف حالك، دي نحن بنعول منها أُسر، في ستين خشُم راجياتنها خشمك بالتكسرو ليك. طبعاً أنا قنصت قنصة شديدة جداً والكرسي عامل لى ساتر من عمنا ما قادر يشوف حتى طرف قميصي

Quote: كم أحن إلى ربوع بحري.. الأملاك.. المزاد.. الديوم.. حلة حمد.. حلة خوجلي.. الدناقلة.. الشعبية.. شمبات بمختلف أحيائها.. الصافية.. الدروشاب.. الحلفايا وبقية ربوع بحري الجميلة ذات الطبيعة الخلابة والناس الكمّل الأخلاق.. لك التحية يا اخي والتحية لسكان وعشاق بحري..

(عدل بواسطة معاوية المدير on 10-31-2009, 10:58 AM)

Quote: معاوية المدير / كيف حالك حكي جميل ورايق وعاد بى الى ذكريات الطفولةوالصبا في الديوم الشرقية وشيئا ما من امتداد الصحافة حكايتك تشبه حكايات أخرى عشنا مثلها في زمن ما واصل

Quote: معاوية المدير حكاية حكاية الذكريات الجميلة دي مفترط تكون حلم السينما السودانية او المسرح السودان لان مثل هذه الذكريات لازم تتدون فى المسرح ولكن ذكرتني نهاية عام 1993م وانا في طريقى من بحري الي حلفاية الملوك فى زمن يجقلب فيها الدفار والبصات زمن زحمة فيها رحمة ولكن لا نريد ان نحكي خارج الاطار فيكفي شرحك لقصتك الطريفة لك التحية متابعين...

Quote: الاخ معاوية المدير جمعة مباركة أسعدنى الحكى جدا ما شاء الله عليك ، روح فكهة وسرد جاذب وخفيف ما أستخلصه من القصة روح الوفاء التى تتلبسك لبحرى وناسهاوهى فعلا تستحق ذلك لى تجربة السكن فى شمبات الاراضى لمدة عام ونصف لا زلت اتزكرها بالخير سقى الله تلك الايام النضرة. دمت بعافية .

Quote: علماً بأنَّ العربات في وطننا الحبيب تتخطى عمرها الإفتراضي بقرون من الزمان حتى يعلقوا في مقدمتها قرون التيوس والعِتان لكف العين!. وعندما تنقرض إسبيراتها من السوق تعال شوف فقه (التوليفة) شي يلتقوها بحبل، وشي بكوز صلصة، ومرات كيزان من نوع تاني، دِرِبات، جِلب؛ خراطيش، وهلُمَّ جرا، آي جاجة تخطر على بالك ممكن تمشي الحال.

Quote: شفته كيف .. لا مستحيل تحت الشمس ..ديل اهلنا البصنعوا من الفسيخ شربات .. معاوية النبي فيك واصل بي واحده تانية

Quote: إنت سايق حافلة، والا سايق فضيّة؟؟؟

Quote: روعه, كانني كنت في الحافله دي

Quote: يا جنا عندك جنس قلل والعين الحارة بس كويس عمنا كهمك فضية ولا أحفظ مالك ... خافها تحرن... دي كان عاينت تلقاه مربطها بحبال...

Quote: معاوية الله يجازي محنك 20 سنة ما ضحكت زي ده . تقبل السلام والتحية .