|
|
|
 Re: هنا تنال شرف عضوية حزب البهجة السوداني الجديد"Sudanese Delight Party ..SDP" (Re: جلال جبريل)
|
نسبة ً لما يدور حاليا ً "ونسبة كبيرة جدا ً بالمناسبة" ، توجب علينا أن نجد مخرجا يأوينا من زحمة الإحزاب السياسية الراهنة التي تتعاقب وتتبادل كرسي الحكم "المختوت" على عاتق كتف هذا الشعب المسكين الذي لم يذق طعم للراحة منذ زمن بعيد اللهم إلا بقايا فتات تاتيه بين الفينة والأخرى من تحت أقدام الحكام بعد أن إستغنوا عنها رغم إرادته الشخصية وقوة إيمانه بالله عز وجل ، وبالرغم من أن الذين يتعاقبون على الكرسي الوسير منا وفينا لا نحس بهم "بتاتا ً" ..أمة بعيدة عنا شكلا ً ومضمونا ً لايشربون كما نشرب ولا يأكلون كما نأكل . كل هذا العناء والإحساس بالظلم يأتينا من هذه الطاقة ، الطاقة الجابت لينا ريح وسموم الصراع الكواية للوصول إلى رأس رمح الحكم ،ونحن نعاني مانعاني ، ونقف فراجة إلى هذا حاكمنا وذاك يستعد ليحكم من بعده . ولم نسأل نفسنا يوما ً.."لماذا لا نجلس على هذا الكرسي بأنفسنا" ونسرق وننهل من ذلك المنال عيانا ً بيانا ً حلالا ً بلالا ً علينا مش بدل نحنا "قاعدين نسف تراب أخير نسف قروش الشعب ونحنا الشعب" . وحراما على من هو خارج حزبنا ، الذي عقدنا العزم لنؤسسه منافسا ً غالبا ً لامحالة لا ندا ً لهم ففي الندية إحتمالات الفشل والهزيمة ، وهذه غير مقبولة لأن موقفنا يفوق بيت العنكبوت هشاشة فإن لم نفز فعلى لقمة العيش السلام ، بسوولينا دق الركبة ، ونحن ركبا ً تستحمل الدق ماعندنا .
إذا ً ماهو إسم الحزب
لاشك أن الحراك السياسي في السودان بكل تأريحه إستنفذ كل الحيل والأهداف الحزبية والفرمالات والنفافيج التي تؤدي إلى الفوز بالإنتخابات بعد التزوير طبعا ً ، ونحن لانستطيع أن نعمل عمل السياسة المعتاد وتزوير الإنتخابات ، إذ يعتمد تزويرها إعتمادا ً رئيسا ً على الثقل المالي والمادي للحزب ونحن لانملك سوي الضحكة الرنانة عند النوم وصابحني دايما ً صار وشيك عند ذكر مخلاية الملاح وقش الغنم صباحا ً، إلا أنها لم تمس ولو بشعرة كم هائل من الأهداف والمداخل التي تزج بالفكرة داخل دماغ أي سوداني عينو طالعة وماقادر يقول "البِغِمْ" .. ومن هنا نبع إسم الحزب و يبدو جليا ً هدفه من إسمه .....
حزب البهجة السوداني "SUDANESE DELIGHT PARTY" ، والمسمى إختصارا ً بـــ"SDP".
شروط العضوية:
1/ فإن كان العضو من زوي المال ، فلابد أن يكون من الذين مروت عليه سنين عجاف في فترة سابقة ونسمي هذه العجاف ببعض علامات الفقر التي لابد له أن يكون قد عايشها ومنها:
أ/ أن يكون قد نام نومة تقييلة نهارية في راكوبة ليها رقراق ، عنقريب كراب حبل مهتوق في النص والعتود "جنا الغنم" يدخل تحت العنقريب بي جاي ويمرق بي غادي وهكذا دواليك شان يحك ضهرو.
ب/ سكن أو دخل وخرج من باب زنكي عينة البتدفرو يمسك تحت إلا تطقو بي كراعك شان يفتح .
ج/ أن يكون قد نام في سرير ملايتو كاكي جيش خدراء.
د/ أن يكون قد تربى أو جاور بيتا ً فيه كبك جداد يأوي أكثر من 10 رأس أن صح التعبير "شان أنا ماعارف الدجاج بيقولوا للواحدة شنو إمكن "كراع"؟ المهم ولها حرية الحركة في البيت.
ج/ أن يكون مارس لعبة السيجة في الكبر ، وفي الصغر كان له حظ وافر في لعب قمر طلع، كوكرع، الدسوسية ، كمبلت، دليقون،أم حفيرة، الصج، كم في الخت الخ.....
د/ لابد له أن يتعرف على عدد وافر من مصطلحات الناس التعبانة دي مثل:
الكشمبير،المُخلاية ، الإسناج، الواسوق، السِعِن ، الغُباشة ، الكُشنة ، الخُرتاية ، الصُرار، الفازقية ، الدنبهوب .... الخ .وأنواع الملاح مثل السبروق ، الهبروق ، امبق بق ، الكداد ، أمحبيبة ، ام تكشو الخ.
ه/ أن يكون سباحا ً من الدرجة الأولى ، متعلما كيري وماخد ليهو كم جلد شان مايمشي البحر وكت الدميرة "الفيضان" براهو يغرق ويجي حانف وشيهو زي ماقال حاج فلان داك لي ولدو.
| |
 
|
|
|
|
|
|
|
|
Re: هنا تنال شرف عضوية حزب البهجة السوداني الجديد"Sudanese Delight Party ..SDP" (Re: جلال جبريل)
|
Quote: حزب البهجة السوداني "SUDANESE DELIGHT PARTY" ، والمسمى إختصارا ً بـــ"SDP".
|
جلال ... يسعد نهارك .... تقبل طلب عضويتى فى الحزب اللذيذ ده ومادام جيتك من بدرى كده ياريت تعتمدنى من القياديين يعنى لما اجى مارى بى جاى تانى يتكتب ( صرح السيد : خالد احمد ... القيادى بحزب ال SDP بان كذا وكذا وهلم جرا ... ) ....المهم .... اضف لينا فى اللوائح الداخلية انو حزب يهتم بالدرجة الاولى بمحاولة رفع الكابه والضغوط النفسية عن الشعب المسكين ده واضافة الكثير من المرح فى حياة الغبش ديل ..... وبمشى وبجيك صاد يامبتهج ...
| |
|
|
|
|
|
|
|
|
|
Re: هنا تنال شرف عضوية حزب البهجة السوداني الجديد"Sudanese Delight Party ..SDP" (Re: جلال جبريل)
|
الأهداف :
1/ يرتكز الهدف الرئيس للحزب على بث روح الدعابة والطرب والفرح والفرغة والمقدودة في في بال كل سوداني من أجل أن يتناسوا مآسيهم وهمومهم بالتذوير، وقد يقول البعض أن الهروب من المشكلة يزيدها إستفحالا ً... للحزب رأي واضح حول هذا الموضوع ، وهو أن أي مشكلة تستعصي عن الحل قابلها بالفرح والضحك بغض النظر عن أن مالجأت إليه من حلول سيأتيك بثمر ٍ أم لا ..أي كان كترت الهموم يا غن يا إرقد نوم.
2/ مساعدة كل الذين تملكهم اليأس أثناء مسيرتهم الحياتية لأي سبب كان ، المشوكش ، المفلس ، المتخرج ومالاقي شغل ، الخرمان ، الرايح منو راس الخيت ، الرايح ليهو الدرب في الموية بنوريهو ليهو برضو ، الداير سلفية من بنك في الخرتوم بنوريهو كيف يلف ويدور ويزور وسوف نمده بمجموعة أسماء قابلة للرشوة في رمشة عين.
3/ الخاتي ليهو واحدة سمحة وأهلا غنيانين في بالوا وخايف بنجهز ليهو حديدة كاربة يامان لزوم يركب لامن يتم مراضو وبعد داك اليشربو من البحر أهل البت .
نواصل
| |
|
|
|
|
|
|
|
|
|
Re: هنا تنال شرف عضوية حزب البهجة السوداني الجديد"Sudanese Delight Party ..SDP" (Re: جلال جبريل)
|
Quote: أول حاجة بركة الحزب دا الجاب ليهو "حريم"
ونحن بنكون لافين نكتل حفلات وربات بس
وأي زول داير ينظر في الدلاليك والهُبُّــكْ هُبُــكْ حبابو |
خلاص لما عددكم يكبر كلموني..
لأني عاوزه اعمل حفلة وعايزاكم تكونو موجودين فيها كلكم علشان الحفلة تحلو..
وبعدين اي زول يجي ينظر لي في حفلتي ويقول لي ليه انتي بتاعة حفلات ليه..لازم انت تعترضوا..
لأنه أكيد بيكون قاصدكم انتو كمان..
يازول "حريم" حريم..المهم الحفلة..
شكرا علي قبول العضوية..
بالمناسبة..
الهبك هبك ده صوت الايقاع؟؟
| |
|
|
|
|
|
|
| |
جلال جبريل
Hani Arabi Mohamed
عصام دهب
تبارك شيخ الدين جبريل
Mohamed Foto7li
Muna Khugali
معاوية المدير
فيس بوك
تويتر
انستقرام
يوتيوب
بنتيريست