|
|
 عزيزي العمل العام
|
عزيزي العمل العام
تحية طيبة و بعد
لن تتناطح عنزتان في دروكم الفاعل في قيادة الشعوب حافراَ بحافر و سياسات الدولة في قطاع الثقافة و الفنون فموجهات الدولة مُمثلة في وزارة الثقافة او سياسات اجهزة الاعلام من تلفزة و إذاعات بصدد تنمية و تطوير الفنون لا تكفي وحدها للنهوض بفنون الشعب السوداني ولا تُساهم مُنفردة في عملية إشباع الوجدان السوداني. اني و بكامل قواي العقلية اقِر ان الحِقبة الحالية هي من اسوأ الحِقب التي مرت علي تاريخنا الغنائي السوداني ,و انا في ذلكـ لم آت بجديد, انا فقط ارفع اصبعي مع كثيرين يرون ما اري لكننا جميعا نتفق في التواطء بالصمت او الاحباط مما يحدث .
الاغنية السودانية التي مرت بإمتدادات طبيعية جداَ و تُبودلت فيها الادوار جيلا بعد جيل تمر بفترة حضانة للاسفاف منذ نهاية الالفية المنصرمة و لم تنجح حتي الان محاولات القِلة القلية من الحادبين علي إنتشالها من وهدتها حتي ساق الاحباط كثيرين الي إجترار عبقريات الماضي من حقيبة او مدرسة فنية اولي او مُحدثين و المُحدثين لا زالوا احياء يرزقون يتمددون علي اسرتهم مساءَ لتأتيهم النسائم بإغنياتهم بأصوات يُفع خفافاً عند الطمع ثِقالا عند الفزع لا يعنيهم من امر الاغنية السودانية إلا ما يملأ جيوبهم الفارغات بدنانير تقيم اصلاب اسرهم المكلومة بسبب سياسات المرأة المخزومية السارقة إلاقتصادية.
اناشدكـ عزيزي العمل العام للقيام بدوركـ الطبيعي (ليس التاريخي) في إستلام زمام المبادرة من جديد في الاهتمام بالفنون في كافة مناشطها (موسيقا - تشكيل - مسرح - فنون شعبية - دراما - الخ ) و اقترح ان تكون البداية بالموسيقي و الشعر لسهولة وصول الرسالة المُضمنة به و من ثم الانتقال الي اقسام الفنون الاخري فحكومة المؤتمر الوطني مشغولة بقضايا اكبر من هموم الثقافة و المُثقفين , و لا وقت لديها للتخطيط لنهضة ثقافية فاجندتها مُكتظة (اللهم لا حسد) بالانتخابات - تقسيم عائدات البترول - إزعاج الحركة الشعبية - مغازلة مجلس الامن - زواج المتعة معه الصين و اخيراَ و ليس آخراَ ضرب اوكار الطابور الثقافي الخامس.
** في بدء الأمر شعرت به في الصبح
في صبح الجمعة بالتحديد
ساعتها كنت بلا شغل وبغير رفيق
فشعرت به في القلب يدب
كنقاط الزير وفي بطء ينصب
يتدحرج أملس أملس فوق القلب
و يطير مساء الجمعة أبخرة لا لون لها
لا أعقلها إلا حين يعود الشيء يدب
فيما يخص الموسيقي و الغناء اطرح مبادرتي هنا علي صفحات سودانيزاولاين لصياغة اغنيات تساهم معكم في إستلهام التراث السوداني في إتجاة تحقيق نهضة في مجال العمل الثقافي عامة , الاغنية التي اتحدث عنها تحمل مضامين ساخرة - ناقدة لقضايا معاصرة (سياسية - إجتماعية - فنية - اقتصادية - .. الخ ) و تؤلف علي الحان سهلة و دون تعقيدات موسيقية.
*** تصحى المدينة
تقوم تستحم وتولع سيجارة
تدخن تسخن بشاى الصباح
وحق الملاح وسيد الجزارة
وتقعد تدندن تخيط زرارة
ترتق هدوما وتفتق هموما
وتسب الحكومة وتفن الريال
وتنفض سريعاً غبار النعال
وتنزل تواجه مشاكل عويصه
تشرّط قميصا وتدق العيال
الدعوة موجهة للشعراء و الموسيقيين للمساهمة علي صفحات سودانيزاولاين بتأليف قصائد بالعامية السودانية و تلحينها و من ثم نشرها علي صفحات الانترنت ولا عزاء لشركات الكاسيت و اجهزة الاعلام.
طارق ابوعبيدة
موسيقي - هولندا
____
** محمد المكي إبراهيم
*** محجوب شريف
|
|
 
|
|
|
|
|
|
|
|
Re: عزيزي العمل العام (Re: خدر)
|
خالص التحايا
العزيز
خدر
يا سيدي اخبارك وصحتك والوليدات...
ياخ اقول لك ختفتها من عقلي وقلمي الفكرة دي ، لكن كويس انو نزلتها الى ارض الواقع لانو انا قلمي بقى كسلان جداً...
قريب جداً من طرحك كنت ابحث في الفترة السابقة عن ماهية العمل العام ، ومصداقية الناس فيهو ، وما يمكن ان يقدمه ...
كذلك الجانب الاخر ، حين يؤثر العمل العام في الاقتطاع من طموحاتك الشخصية والحد منها ، وبالرغم من ذلك لانرى غضاضة ، لكن من الذي يقيم هذا وتلك..
رغم ذلك لايتم الاتعاظ من مما يجره علينا العمل العام وووكمية نقة..
ماكتبته بصورة شخصية يعبر عن الكثيرين ، ولا استطيع وصفه بتناول الجانب السيئ ، فانت نقحت في الطرف الاخر فقط السلبيات المصاحبة لو لم يتم اصحاحها لن نجني ثمرة العمل العام..
غايتو خدر اسعى ، نحن كده زي شاعر انو الواحد هرم وفتر حنينو الكان زمان
البوست ده عندي يمكن ان يكون مقارب لبوستك التفكير بصوت عالِ...
ساسعي ان اجيك ببصورة مرتبة اخرى عزيزي..
التحايا النواضر...
| |
|
|
|
|
|
|
|
|
|
Re: عزيزي العمل العام (Re: معتز تروتسكى)
|
شكرا يا معتز علي تكبد المشاق
فعلا الغرض من البوست هو التفاكر في مايمكن ان يُُقدم من خلال العام
برضو ميزات العام هي القدرة الجماعية في إجتراح المبادرات او
التفكير بشكل جماعي و صوت عال و من ثم التنفيذ
حضوركـ معهم يا معتز و انت من اكثر من يجيدون طرح الافكار
في إنتظاركـ يا صاحب
| |
|
|
|
|
|
|
|
|
|
Re: عزيزي العمل العام (Re: خدر)
|
لو أي زول أدى دوره باتقان السواق والطبيب والفنان من غير ما يلعن الحاصل ,كان من زمان الحال اتصلح..
لكم احنا أي زول فى مكانه أز منفاه ونلعن ونسب فى البلد وحالها وحال الناس المساكين القابضين على الجمر
___________
كل سنة وانت طيب
| |
|
|
|
|
|
|
|
|
|
Re: عزيزي العمل العام (Re: rosemen osman)
|
روزمين كل سنة وانت طيبة
لم افهم انت مع المبادرة ام لكـ تحفظات عليها !!
السادة القراء
مثال لفكرتي بصدد الاغنية التي اسعي خلفها
قضية الاستاذه لبني احمد حسين يمكن ان تكون نموذج جيد .. يتم تأليف (قصيدة - زجل - منلوج) فيما حدث وِفق
رأي الشاعر ضد او مع - بشكل ساخر او ناقد او مؤيد و من ثم تتلحن و تتغني ليرددها الناس .
عن نفسي اميل كثيرا لفكرة الاغاني الساخرة التي تناقش قضايا مثل قضية لبني.
اسمع منكم
| |
|
|
|
|
|
|
|
|
|
Re: عزيزي العمل العام (Re: rosemen osman)
|
Quote: لو أي زول أدى دوره باتقان السواق والطبيب والفنان من غير ما يلعن الحاصل ,كان من زمان الحال اتصلح..
لكم احنا أي زول فى مكانه أز منفاه ونلعن ونسب فى البلد وحالها وحال الناس المساكين القابضين على الجمر |
ياتو دور ؟ في ظل ياتو ظرف ؟
اللعن نوع من التمرد و التململ و الضيق بالحاصل .. خمارة الثورات هو التململ و اللعن . الثورات على كل قبح في أي شكلاً كان .
حال شنو البيتصلح و الساق مشكولة و اليد مغلولة ؟؟ ياتو حال البينصلح و همنا متفرق بين القبلي و الحزبي و زفت الطين ؟
ما يسب هو الحال المايل . أنا شخصيا أتنرفز و أسب و أشتم و ألعن أكتب و أرسم و أقول و أتكلم كلما طبظ عيني سؤ حال الناس ( القابضين على الجمر ) يا قول المثقفين .. و وقر في القلب بؤسهم الكبير .
دعوتك يا صاحب سمحة و وسيعة و عامرة بمداخل حوار اريتو يكون مفيد , لكنها مشروطة بتوفر معادل كامل النصاب على إرادة التغيير ..
يتضاير و يتلم و يركز في مقابل لجاجة الحال الصخري لأدوات الدولة و آلياتها البرضها ( قابضة ) على تلابيب الحال لهذه الامة ( قبِض جد جد ) .
عزيزك العمل العام محتاج صاخة تصحيهو من منامو الطويل .. يا صاحب ..
يا كده .. يا كمان تخسف بيهو الأرض و تجي مقلعة بعمل عام يشبه الهم العام ..
و الصاخة غير الرفض الجمعي المؤسس على عمل جماهيري و قاعدي و كبير .. ما شايف ليها فرقة إسم تاني .
| |
|
|
|
|
|
|
|
|
|
Re: عزيزي العمل العام (Re: Emad Abdulla)
|
Quote: روزمين كل سنة وانت طيبة
لم افهم انت مع المبادرة ام لكـ تحفظات عليها !! |
الله يا طارق!!
كيف أكون ضد بادرة زي دي؟؟
أنت زول فنان ودي خطوة جميلة فى مجالك
الفكرة أنو البلد محتاجة حركة كل الناس ويد واحدة ما بتصفق
أيوة هو كلام خيالي مني لكن علشان يحصل تغيير حقيقي لازم نحن نكون في قلب البلد يد واحدة وقلب واحد
زعلانة من نفسي ومن ناس كتار قاعدين وعايشين حياتهم وعاوزين البلد تتغير| Quote: أنا شخصيا أتنرفز و أسب و أشتم و ألعن أكتب و أرسم و أقول و أتكلم |
سلامات يا عماد
اكتب والعن
أرسم والعن
المهم أنك هناك ورسمك وكتابتك ممكن تعمل حاجة ممكن تفيد زول وتنوره , بتمارس عملك باتقان
من خلال تعاملك الراقي أو المحترم مثلا بتفرض قيمة جديدة فى وسطك , لو معاك 2و3و6و9 تأثيركم بكون أكبر وأكثر وقع
____________________
لا حولا ..زعلانين مني لا سمح الله
| |
|
|
|
|
|
|
|
|
|
Re: عزيزي العمل العام (Re: rosemen osman)
|
| Quote: الصاخة غير الرفض الجمعي المؤسس على عمل جماهيري و قاعدي و كبير .. ما شايف ليها فرقة إسم تاني |
عارف يا صاحب انا مؤمن جدا انو إنتظار الإجماع العام خير منه إنتظار جودو و اخوانو العولاق ديلك .. الخلوق دي ما بتتلم بي اخوي و اخوك و ده كان سبب اني عاوز ابدأ بالغنا . الغنا البحبوهو كل الناس لانو بحرك احاسيسهم ولانو ما بطالبهم بي ادوار تفتح ابواب (لو) و (لكن) تجيك الاغنية وانت راقد في سريرك او راكب شماعة في حافلة فتطرب او تضحك او تشتم و كلو مقبول الغنوة ذاتها يا عماد فكرتي انو يكون جواها كل الكلام البنقول فيهو ده , المرحلة دي عاوزة غنا مختلف غنا بتكلم عن كل المشاكل دي غنا ما فيهو حبيبتي و حبيبتك و إتنظار المستحيل غنا يخلي صاحبك بتاع الديم (اسمو عوض علي ما اذكر) يمرق لسانو للحداثة و القصيدة الحرة و شعر التفعيلة و يقول ليهو احيييي انا ده الغنا و الشماتة ما مطرية. لو اتونسنا في غنانا بي البحصل في حياتنا يا ود التوم يتخيل لي حا نقعد في مربع جديد علي الاقل بنقدر و نحن في قلبو انو نشوف نحن عاملين كيف و ده زاتو فن.
| |
|
|
|
|
|
|
|
|
|
Re: عزيزي العمل العام (Re: خدر)
|
| Quote: لكن علشان يحصل تغيير حقيقي لازم نحن نكون في قلب البلد يد واحدة وقلب واحد |
روزمين رغم انو نبرة اليأس في كلامكـ ما عاجباني لكن كل زول فينا حبل بالو بعرفو براهو و في كلا الاحوال ما بفوت شي لو ركبتي معاي اسه او لحقتينا بعد داك مكانك محفوظ و مافي زول بملاهو غيرك . شرط وجودنا في قلب البلد ده انا شايف انو ما شرط لازم لاحداث تغيير او حتي مجرد التأثير علي الحاصل .. ثورة التكنلوجيا دي ادت فرصة كبيرة جدا لانتشار افكار رغما عن انف الوسائط المتعارف عليها لجان نصوص - إذاعات و تلفزة - شركات إنتاج .. الخ و للاسف الإسفاف الحاصل اسه حدث بمساعدة كبيرة جدا من ثورة التكنلوجيا دي .. نحن في الخارج لو ما التكنلوجيا دي ما كنا عرفنا او سمعنا نجاة غرزة او حمادة بت .. طيب ليه ما نستخدم نفس الوسيلة المُدمرة دي بدلا عن إعلان اننا المجني عليهم و لا حول لنا ولا قوة ؟
الشق التاني في دعوتي متمثل في نوع المادة او الاغنية المُراد صنعها .. الاغنية السودانية الان و بالنظر الي ما اصابها من طعنات و ذخيرة حية اشرف لها ان تساهم بالشكل الطرحتو انا عاليه في حل قضايانا إسوة ببقية الوسائل المُتاحة.
و مافي زعل يا روزمين .. ختي الرحمن في قلبك بس واصلي الشعر و الكتابة داخل او خارج السودان
| |
|
|
|
|
|
|
|
|
|
Re: عزيزي العمل العام (Re: الرشيد ابراهيم احمد)
|
صاح ميه ميه ياخدر..
ودا دورنا ودوركم إنتو وعماد وعمر دفع الله والهيلاهوب وأي زول في يده قلم او ريشه او موهبه على ابتداع الطرفة او الكلمة الساخرة الناقدة البناءة..
آباؤنا حاربو (بلام المرأة) بضم الباء وتشديد اللام بأغنية..
والشلوخ بخدك السادة..
خروج المرأة للتعليم والعمل ومشاركة الرجل كان برضو بالغنا..
كانت للأغنية دور إجتماعي توعوي هام..
كلام عماد واقع معلوم ومشاهد ولكن ..
الأبواب البتمرقنا منو سريع للمواقف الإيجابية جنس العمل البشاور عليهو دا..
بس ..
يا مين بيسقيني بالمعلقة الصيني..
المعلقة إنكسرت يا مين بربيني..
| |
|
|
|
|
|
|
|
|
|
Re: عزيزي العمل العام (Re: الرشيد ابراهيم احمد)
|
شكرا كتير يا رشيد
و رمضانكـ كريم يا فنان
سأسوق نموذج قد يساعد في توضيح الفكرة يا روزمين .. الاغنية في تقديري تحمل مضامين عن نفسي لا اتفق معها رغما عن صناعتها في قالب خفيف و جميل
بخليك بدون ما تشعر تدندن لحنها ده إذا ما حبيتها و حفظتها عدييل . الكلام المهم انو الاغنية شِعرها بتكلم عن فكرةالشاعر (رؤيتو) للحاصل حولو
راحت عليك يا دنيا و راح زمن الشهادات
و بقيتي يا دنيا ماشة علي السأفة و ع الصاجات
اديها يا دنيا براحة براحة تفضلي علي طول مرتاحة
اديها بشوشيش بشويش خلي الشعب يعيش
خليك معاي علي الخط وريهم هز البطن
عاوزيم تلعبوا مساكة علي الرمل و جوة الشط
انا جايلي يا ناس احباط كده كده من تحت الباط
حرام عليك و كفاية عازين نقفشو دولارات
http://www.supload.com/listen?s=fpJ7ZW
اضغط علي اللنكـ للاستماع
الجميل في الاغنية في تقديري موش لحنها بس , لكن فكرة المعالجة نفسها مع ملاحظة انو الاغنية يمكن ان تُسمع خارج صياغ الفلم او الحبكة الدرامية بإعتبارها اغنية تحمل فكرة كاملة (شعر - لحن - آداء) و الاجمل انو في توزيعها تم إضافة شعر المتنبي فقط لتأكيد عبقرية الفكرة و توكيد سهولة الموائمة بين الاسفاف و شِعر ابو التفعيلة المتنبي و النتيجة ان الاغنية ناجحة بكل المقاييس و إن لم تُحمل مضامين مثل التي ادعو لها.
___
الاغنية من فلم صائع بحر للممثل المصري احمد حلمي .. غناء احمد حلمي و المطرب ريكو.
| |
|
|
|
|
|
|
|
|
|
Re: عزيزي العمل العام (Re: خدر)
|
يا فنان
البوست ده مدغلب،وكلام زول واجعه واقع عايز يغير فيه
بوست رقم تلاتة في رمضان يوقف الزول يقراه بفهم
ارجو من بكري تثبيت البوست
ابقي طيب
| |
|
|
|
|
|
|
|
|
|
Re: عزيزي العمل العام (Re: خدر)
|
عزيزي خدر ... الله يخضر ضراعك
لو كل الثورات اتبنت خط سلمي و نشرت
الفكرة بلغة جميلة متسقة مع الخير جوانا
سواء بأغنية ... بسلوك قويم، كانت كل
مشاكلنا اتحلت و اتقالدو الاضداد
في نهاية الغمة و قلوبهم متصافية ...
حزينة انا يا خدر ... بديت افقد الايمان في
قوة الخير، بقى قصير الحيلة؟
و (ساتين) ماسك قلوب البعض في قبضة
من حديد ...
| |
|
|
|
|
|
|
|
|
|
Re: عزيزي العمل العام (Re: عزاز شامي)
|
يا فنان...
اخبارك و كل سنة و انت طيب
وربنا يخلي ليك اولادك..وتسعد بيهم..
اها...يا سيدي
بوستك المجنون ده.. (المجنون) عندي يعني بوست فاهم و مليان و بلفة اهل الثقافة(دسم) و انا ما منهم!!
انا شايفو باتجاهين و البوست اعني..!!
خاص و عام.
الخاص..انك تلعن و تسب الدين و تلعن و تغني و ترسم و تكتب و تقول رايك و تثور...وفي النهاية
تلاقي احباط كبير من شوفتك للناس و الحاصل ليها, و البؤس و الايد و الموجوعة..
الجوع و الضهب و العوز و الضرب و الوجع الغول المكتف ايادي الناس
و الحارم شفعها من قراية أ ب ت ث
الواقد نيرانها في شباب ورنس ورنش ورنش و السليسيون في الخشيم و احر النهار النومة تحت كبري..
ولي باقي تصاوير الحياة اليومياتية!!
اها النظرة و الشوفة هنا من زاوية خاصة ...و يبقي سؤال لي روحك و نفسك..بتقدر تعمل شنو؟؟؟و العمل زاتو شنو؟؟و كيف؟؟و لي منو؟؟و لميتن؟ و؟ و؟؟؟؟؟؟
اها النظرة التانية
عـــــــــــــامة؟؟
تشوف بجيك شنو و بدخل ليك في بطن بيتك؟؟ و انت قاعد
بحصل ليك شنو و الحالة العامة للناس الغيرها شنو؟؟وهل غيرت فيك؟؟و لا في الناس الحواليك؟؟
هل الحاجات تاني بترجع زي ما كانت؟؟
وهل كانت هي صاح زمان؟؟
والعمـــــــــــــــــــــــــــــــــــــــل شنو؟؟
العمل العام ده بيقوده منو؟؟
و لي منو؟؟
طيب انا من الناس العادية المنتظرة (ناس) العمل العــــــــــــــام..
وبرضو بقول ليــــــــــــــك
غني عني ياخي..
شان غناك..نوع من عمل عام لي ناس بتحب تسمعه...
وتعيش معاه..
ربنا يوفقك في مشروعك العام...
معليش كان مرقنا بره الخط!
بس و الله
احوك من الناس العامة المنتظرة العمل العام..
| |
|
|
|
|
|
|
|
|
|
Re: عزيزي العمل العام (Re: خدر)
|
| |
|
|
|
|
|
|
|
|
|
Re: عزيزي العمل العام (Re: GamarBoBa)
|
| Quote: البوست ده فيه كميه من التفكير الخلاق،والكرييشن والمسئولية الجماعية |
وزى ماقال القمر بوبا نقول
وزى ما قلت إنت يا خدر | Quote: الدعوة موجهة للشعراء و الموسيقيين للمساهمة علي صفحات سودانيزاولاين بتأليف قصائد بالعامية السودانية و تلحينها و من ثم نشرها علي صفحات الانترنت ولا عزاء لشركات الكاسيت و اجهزة الاعلام. |
برضو نقول ونزيد: والإستفادة بقدر كبير مما هو متاح فى النت ولا عزاء أيضاً لهذه الشركات.
ودونك موقع كموقع يوتيوب والذى إتجه إليه الذين يواجهون نفس القضية فى الغرب.
من وقت طويل يا طارق وأنا أفكر فى ترجمة توجهيات يوتوب وتشجيع الناس
للتصريح، للغناء، للتمثيل، لطرح الأفكار دون رقيب أى كان حكومى أو راسمال خاص.
أى نعم معنيون بذلك الذين تتوفر لهم النت والأجهزة وليس أبداً ما نقصد ونهتم كالغبش والمقهورين.
ولكنها تعادل إن صدق حدسى (وهذه ليست علمية) بإستقصادنا فى السابق للطلاب وروابطهم فى توصيلنا للناس المحتاجة حقيقة للتغير.
الموقع المذكور كنموذج يا طارق كان له دور مؤثر جداً فى بعض الأحداث المهمة هنا فى الغرب كما تعلم.
وأعتقد أن سودانيز أونلاين بدأ يلعب دور مماثل فى السودان .. ولكن هل يعى سكان الخشبة السايبر هذا ؟
كدى بجيك راجع يا زول .. وياريت نقرا باقى الناس حول الموضوع.
| |
|
|
|
|
|
|
| |
خدر
معتز تروتسكى
rosemen osman
Emad Abdulla
الرشيد ابراهيم احمد
محمد على طه الملك
GamarBoBa
هواري نمر
منعمشوف
فيس بوك
تويتر
انستقرام
يوتيوب
بنتيريست