|
|
 أجمـــــــــل ما قرأت عن انتصار الهــلال .... الوصفاء يمتنعـــون
|
من كلمات الشاعر ازهرى محمد على
مسدار الهمباتة لسيد الحيشان التلاتة
اب احمد ولادك استوعبوه كلامك
متحرى الصدق مولاى يعلى مقامك
ابواب الكريم واسعة بتنفتح قدامك
خليه الحسود كان شكرك كان لامك
*************************
ابواب القيم نحن بنعلى مسيدا
بى كل احترام نخنار ادارة رشيدة
فى كل اتجاه نحن بنجيد تسديدا
وين بتقلبوا من سيدا سيد ابو سيدا
**************************
كم كانت دروس فى المقبرة اتخطاها
وكم خضعت رؤوس فى حضرتو وطاطاها
نيران المجوس اقدامو تتواطاها
والبدخل يكوس بنلحقوا امات طه
***************************
ويا اخوانا البلد بى سيد تحمدسيدا
حرسوها الرجال ديمبا وحمودة وديدا
فرسان النزال فى الحوبة اخوان سيدا
والبين الهلال والنجمة حاجة بعييييدة
**************************
مزقت الشباك تسلم خطاك يامعلم
وليك تعظيم سلام كل البلد بتسلم
انت سليل رجال من الكبار متعلم
العرضة انتشت لكن جنوبها مضلم
*************************
باريتو الظنون وهم الامانى الهشة
لا اتحقق حلم لامغس الهلال اتفش
الممطورة كيف تتبالا من الرشة
ما قصمت زمان ضهر البعير القشة
************************
تلعبوا فى عمود كبت الحقيقة وزورا
لملمتوا الشيوخ وعملتوا مجلس شورى
مسكين القعد فى ضلها المقصورة
كترتوا الغلاط ونسيتوا لعب الكورة
***************************
وما درنالك الكنبة وقعاد الشاشة
والكورة التطير منعول كمان ابو خاشة
ايفوسا الفجع الصفوة وهرد فشفاشا
قوم سخن عديل ادخل مكان الباشا
**************************
يا اخوانا الوصيف فضح البلد بى عكو
يدوه الورق لا بفتحو ولا يدكو
كأس افريقيا وين القلت قاطع شكو
شان طولة اللسان طبقنا حكم اب تكو
*************************
ما بتصل الشباك فى استادو كان بتا
والروح يوم تروح واجب سترة الجتة
جيب ورقك تعال نبدأ الحساب بالحتة
نفطر بالهلال والرؤية ستة فستة
*************************
بوظتوا النظام كسرتوا باب الشردة
وبطلتوا الكلام وحرتوا ديك يالحردة
ياخى حرام عليك ماكان بالمقاس ياوردة
دى الصفوة انزوت عملت شتات يا فردة
**************************
ادمنتوا الغلب لمن بقالكم طبعة
افريقيا وعرب واللبعة فوق لبعة
محمولات شنو بعد الغلب بى سبعة
والياكلو الاسد احسنلو من الضبعة
*************************
بارين الشكاوى اصبحتوا وزن الريشة
قايلين الهلال ونسة ومجالس وشيشة
زى سيرة الهلال بين الامم مافيشة
ما تقنع نقول منعول ابوها دى عيشة
**************************
كدى احسب معاى نص وارغو
ناقص ماذدا فى ابوجريشة
كم بتساوى فى حسبة حساب الكيشة
زي شكل الديوك فى الفارغة تنفش ريشة
ما عاشت بلد فى يوم تشجع طيشا
**************************
لو تصبح صفر نحن بنجيبك سالب
وما نصبت شباك تلقانا نحن الغالب
ارفع فى بناك تلقانا تحتو عقارب
ما نحن القدر والحصوة فوق الحالب
*************************
فرسان النزال دايما بسدوا الفرقة
فى صدر الهلال باقين حصانة ودرقة
يلعبوا بالخصوم لعب العصار بالورقة
واموال الوصيف راحت شمار فى مرقة
نقلا" عن صحيفة الهلال
|
|
 
|
|
|
|
الارقم عبدالله طلب
nadus2000
معتصم الطاهر
ALGARADABI
فيس بوك
تويتر
انستقرام
يوتيوب
بنتيريست