|
Re: صوره زوجتي المفقوده في الانترنيت و(الخروف الضاحك) (Re: محمد زكريا)
|
صديقي الزعيم كما يحلو له ان نسميه ينتظرني في منزله لكي احضره بسيارتي ونذهب الي مناسبه حفل في مدينه اخري تقع علي بعد مشوار قدره ساعتين من مدينتنا , وجزء من المشوار سيكون بالعباره البحريه حيث ان المدينه الاخري يفصلها عننا بحيره كالمحيط. عندما وصلت وجدته ينتظرني خارج المنزل مستعدا للسفر ويحمل حافظه صغيره للشاي وبعض السندوتشات وكان مشغولاً بوداع حبيبته التي كانت تطل عليه من اعلي شباك في الشقه التي تعلو حوالي طابقين , تحدثا معا وتبادلا بعض القبلات الهوائيه وهو يهم بالجلوس الي داخل السياره يودعها.... ..باي باي هوني يضع اعلي اطرف يديه علي شفتيه صانعاً شكل قبله ويقذف بها اليها قلت له.. - ياخ ما تقعد خلصنا...... شنو شغل الخواجات الما بخلص ده انت فاكر نفسك واحد منهم ولا.. قاطعني. - لا والله لكن طبعاً المدام حامل سته شهور وكده عشان كده الحنان واجب.. اعقبت مندهشاً.. - يازول من بتين ؟ والله لكن خطير..مبروك... يتربي في عزكم اها ولد ولا بت؟ اجابني -يازول اخوك ما فقري ... كده ونار بتمسك علي طول ولله انا زاتي اتفاجاءت لمن كلمتني لكن يازول قلت ما مشكله البجيبوا الله كلو كريم... لكن (مغتبطاً) يازول انحنا بنجيب اولاد وبس قلت له -والله ياخ ولد, بنت المهم تنجب ليك ذريه وخلف والعمر اهو ماشي احسن من بعدين نكبر ومافي لا جنا ولا غيره..لكن ياخ انا كنت فاكرك عاوز تعرس من السودان.. غيٌرت رايك ولا شنو؟ بعد ده مافي ليك اي طريقه و... قاطعني
| |
|
|
|
|
|
|
Re: صوره زوجتي المفقوده في الانترنيت و(الخروف الضاحك) (Re: محمد زكريا)
|
- يا صاحبي سودان بتاع الساعه كم تاني , بعدين بيني وبينك ياخ ده موضوع طويل جداً ما عندنا وقت ولا اخلاق ليهو, الزمن جاري يا صاحبي الحق نفسك, والله تقعد تقول اعرس سودانيه , اعرس سودانيه لحدي ما القطر يفوتك وبعدين لا تلم في سودانيه ولا فولانيه, ياخ انسي وعيش.. محتاراً رددت - لكن.. والله فعلاً حاجه تحيرك موضوع السودانيه ده فعلاً موضوع طويل .. والحل شنو يا صاحبي؟ لكن اقول ليك حاجه ,انحنا ديل ما اتورطنا زييك, الواحد لسه بيفكر انه يرجع السودان يفتش ليه عروس سودانيه وُلا يخلي اهلوا يختاروا ليه وينتهي من الموضوع ده, لكن انت بعد ده تمسك في خواجيتك دي وبس. ضحك باستنكار وسخريه و رد - ويييييييين ده؟ في السودان. . والله ده انت البتحلم وبس .... تشرب كبايه شاي -اااي عليك الله خلينا من موضوع العرس ده هسع تناولت كوب من الشاي وادرت السياره في اتجاه الشارع المؤدي الي طريق المرور السريع تاركين من خلفنا لوحه علي الطريق كتب عليها وداعا مدينه اوسلوا وبعدها اخري كتبت عليها مرحباً بكم مدينه في (شي) من علي جانبي الطريق تتراصص الاشجار الصنوبريه العاليه كاعمده الكهرباء عندنا وتتفاوت المناظر ما بين سهول وتلال علي طول الطريق الاوربي رقم سته, المياه في البحيرات المتناثره هنا وهناك تعكس شعاع شمس المغرب حيث يطول نهار الصيف فالساعه قد تجاوزت العاشره مساء ولكن الشمس ما زالت ساطعه كما ولو كان الوقت عصرا. بيني وصديقي ساد بعض الصمت ونحن نرتشف من كوب الشاي المعد خصيصاً للشرب اثناء القياده , ليس الصمت لاننا لم نأتي بموضوع لكي نتحدث او حتي نثرثر بدردشه وكلام محدد وانما لان المناظر من حولنا خلابه , لذا حاولنا فقط ان نستمتع بارتشاف الشاي واسترقاق النظر, لا ادري ماذا كان يدور بخلده ولكنني احسب انه يفكر بابوته القادمه او بصاحبته التي تحمل طفليهما, تلك المرآه ذات العشرون عاماً ونيف قد اتت الي هذه البلاد مثلنا غريبه ولكن الفرق انها اتت مع عائلتها ومن بلاد لا تقع مابين خطي الاستواء, انها ليست اسويه او من عمق غابات الامازون, انها مثل النساء من حولنا , انها امرآه اوربيه, انها تقدس حياتها مع الزعيم فهو رجل سوداني يحمل كل معاني الرجوله السودانيه, لقد تعارفا لفتره طويله تقارب الثلاثه اعوام, حتي الان ما زالت العلاقه باسرتها ايضاً قويه متماسكه وهكذا كان صديقي يسكن معهم كاحد افراد الاسره برغم انهما لم يكونا متزوجين وحدثني كثيراً عن حسن المعامله والاخلاق وحجم الاهتمام به المبالغ فيه , حين تسألت مستغرباً ايعقل ان تكون هذه من طبائع المرآه الاوربيه. فيجيبني يا صاحبي ( لا....... انها امرآه شرق اوربيه).
| |
|
|
|
|
|
|
Re: صوره زوجتي المفقوده في الانترنيت و(الخروف الضاحك) (Re: محمد زكريا)
|
تنهدت قليلا وتململت في مقعدي واسردت.. - يعني هسع خلاص هه؟ - شنو الخلاص ؟ انت لسه بتفكر في السودانيه وما ادراك.. يا عم جلٌي - ياخ لكن والله انا الشفتوا من النرويجيه بتاعتي الفاتت دي تاني توبه من الخواجات ديل - يا عم انت الجاب ليك سيره نرويجيه منو؟........ بقول ليك شرق اوربا فاهم يعني ايه شرق اوربا.. انت عارف ديل طبعهم زي طبايعنا واحسن مننا زاتوا, ياخ انا لمن ارجع من الشغل بلقي اي حاجه تمام التمام’ الاكل النضافه , ال.....ياخي دي الواحده من الصباح لحدي ما ترجع ما عندها هم غيرك بعدين الواحده تلقاها عندها شغلها ووظيفتها لكن البيت اصلوا ما بقصروا فيه ده غير الحنان واللطافه والتعامل الراقي والزوق والاحترام وعييييييييك بس خليها ساكت .. ياخ عليك الله انت اكتر من كده داير شنو تاني. - لكن زوله زي دي ما بتتلقي بسهوله بعدين الزواج قسمه ونصيب ياخ - قسمه ونصيب ده كان زمان دلوقت ابحث وبس - ما هو البحث ده زاتوا المشكله .. ده ما عندنا وقت ليه عشان كده الواحد احسن يخلي اهله يفتشوا ليهو والقسمه بتحكم - عشان بعدين لم تتطلقوا تقول انا ما اخترتها .مش كده ؟ يا معلم خليك واقعي , سفر رجعه تاني مافي, وبعدين زمنك ضيق ده لو.. لو سافرت, وقصه اهل دي يمين صدقني اهلك ما بكونوا دايرين منك غير الدولارات البترسلها ليهم ياخ شوف ليك شرق اوربيه و انسي - هسع الشرق اوربيه دي زاتها يلقوها وين عليك الله , انحنا زاتنا جينا لي بلد في اقصي الكره الارضيه ينعل ابو دي بلد ياخ..فقر - اقول ليك حاجه ابحث في الانترنيت بتلقي ليك واحده بس اتاكد من الصور ممكن تكون مسروقه ضحكنا من سخريتنا لوضعنا الذي يحسد عليه ولكننا نتذمرمنه بالرغم من ذلك, وتحدثنا عن الفرق بين النساء وكان هنالك وصف وتقييم واختلاف وجهات نظر, وضربنا الامثله وحكينا بعض قصص. تضايقت حين القيت نظره سريعه علي مرأة القياده ولمحت سياره تسير ليس علي بعد كبير من خلفنا وكانت قد ظلت علي هذا الحال لوهله فازداد قلقي, لربما سياره شرطه مدنيه... ظننت وصدق ظني, ولكن لماذا تتابعنا الشرطه ؟ هل خالفنا قانوناً للمرور او تجاوزنا الحد الاقصي للسرعه
ونتابع البحث
| |
|
|
|
|
|
|
Re: صوره زوجتي المفقوده في الانترنيت و(الخروف الضاحك) (Re: محمد زكريا)
|
Quote: الاخ محمد زكريا شكرا للموضوع الجميل والشيق جدا ونرجوا تكمل باقي القصة انا كتبت في هذة المنبر عن موضوع بطلب فول وعدس تعرس خواجية يمكن ان تطلع علية وانا في انتظار ردكم تحياتي لصديقك وربنا يسهل لزوجتة ويحلها بالسلامة |
مواضيعك كلها اتطلعنا عليها وكمان بتاع العرس الجماعي بس ماذكرت اوسلو مالك؟ دايرني اسمع كلام صديقي وامشي البوسنه والهرسك القصه واقعيه ومنتظرين الحلقه الجايه عارف البوليس طلع شنو؟؟؟؟؟؟؟؟؟
| |
|
|
|
|
|
|
|