- كدي قول بسم الله وروِّق المنقه شويه - يا خي تسمِّي في الفطيسه..كم شهر وإنت شابِكني أصبر أصبر؟ - أقولك حاجه ؟ - ياخي حاجه تحيجك..والله العظيم أنا فترت من حيلك وكلامك الما منو نتوج دا. - ليك علي آخر الشهر دا برجِعن ليك تب. - كم مره قلتها لي آخر الشهر دا ، آخر الشهر دا ..؟ - لا المره دي تب بديك ليهن قطع شك.
حوار لا ينقصه اليأس والتذمر من النور ود الشكيري ، فعبد الفضيل أشتهر بعدم رد الدين.
09-11-2009, 02:52 AM
فاروق أبوحوه فاروق أبوحوه
تاريخ التسجيل: 07-26-2008
مجموع المشاركات: 2242
يدلف النور إلي البيت ، تقابله عشمانه بت البريمكي في رحلتها من التُكُل إلي الراكوبة وهي تتأبط طبق الكِسره.
- خير آراجل ، مالك داخل وشيك زي التقول شايلك خبر؟ - محتار سااااكت. - في شنو؟ - في العالم دي ، الناس ديل مالن بقوا كلهم كضابين وبلاّعين ذِمم. - أوعي تقول لي قروشك العند فضيل؟ - ياهن زاتن ، والله الزويل أبرويساً زي البليبه دا كشف حالي وقدّ نعالي. - يا راجل أنساهن تب ، إنت دحين قريشاتك ديل ما ياهِن من عمنول؟ - آآي ، كدي خلينا منهن أسّع ، جيبي فطورك دا خلينا نشوف مشاغلنا.
09-11-2009, 02:59 AM
فاروق أبوحوه فاروق أبوحوه
تاريخ التسجيل: 07-26-2008
مجموع المشاركات: 2242
عثمان الضقيل إبنه صاحب العشر سنوات ، يعود من المدرسة ليتناول فطوره بالبيت. يواظب علي دخوله بفتحه لباب الحوش الخشبي هذا الذي ورثه النور من جده (الغواس) .. يدخل بطريقة الكاوبويات ، لم يحدث مره أن دخل بهدوء ، ولكنه يركل الباب (بالشلوت).
- يا جنا مية مره قلت لك السجم دا أفتحوا براحة. وبعدين هو متين قروكن ؟ أسع دي ما مرقت من هني. - الليلة أستاذ بشير(ود شِنين) غايب قالوا عندهن محكمة حقت طينُن الفي ام صوفه. - هي دي مدرسة شنو دي ؟ يعني كان غاب واحد تقفِّل.؟ - أحسن زاتو كان ناخدلنا جمّة من كل يوم حساب وجداول ضرب. - إضربك الضريب شقّاق العناقريب، بس فالِح لي في شِرّيك القمري والسمك ولعب الكوره. قوم جيب الطربيزه ديك ، واملا اللِبريق داك ، الشقي دا مالو كل ما اهبشو ألقاهُ فاضي ،إنتو قاعدين تغسلوبو شنو؟ كرشه؟
- يابا أستاذ عبد الله جون قالنا كان ما جِبتو قروش درس العصُر ما تجو؟ - هو بالصباح ما بقروكن ، درس العصُر زاتو لزومو شنو؟ أقولك حاجه والله كان خليته كُلُو كُلُو يكون أحسن ، علي اللقل تساعدني في السعية دي ، أنا فترت تب من المزازه الكل يوم معاهن دي.
09-11-2009, 03:07 AM
فاروق أبوحوه فاروق أبوحوه
تاريخ التسجيل: 07-26-2008
مجموع المشاركات: 2242
- سجم أمي كمان دايرو يخلي قرايتو ويباريلك غنيماتك وبقيراتك الجربانات ديل؟ - أهلنا قالوا الجنا خال، كدي شوفي خالو أحمد ود البريمكي نجاحو شنو ؟ باقيلك داير إجي أحسن منو؟ - هووي أحمد أخوي مالو؟ مو زول في شغلتو. - شٍن الشغله ؟ ياها جِليد العناقريب وطقطيق الطرابيز ؟ والله كان المدرسة دي قفّلت وديوان بوجان أبعناقريباً كتار داك قفلوه ، تاني كان يبيع الجداد ، كدي قولي لي بشتغِل شنو؟
- يابا بتديني ليهن ؟ - سمح أكل تاكل البردو يغلا ، المسنوح دا كان أداني قريشاتي ديل بديك الدايرو.. - متين؟ - قال آخر الشهر دا ..إن شاء الله يصدِق. - وووب علي يا بنات أمي ، دايرو يرجالك آخر الشهر الهل داكي الليله ؟ - أستاذ جون قالنا باكر آخر يوم ، والما بجيبن ما يجي. - من وين أجيبن ليك ؟ عِلا كان أسوق أمك دي أجلِبه في سوق جبرونه. - مالك بتبيعني في السوق آمسنوح الحال ؟ مالك قالولك حاكيت العز؟ - هي نان شن طعمك آآ مخشيم؟ شِن مسويالنا ؟ ياها كِسرتِك وملاحك الما بتغيريهن ديل؟ - ما ياهو الشي البتجيبو عاد. كل يوم داخل أباطك والنجِم.. - أنا زاتي شقي حال ، أسع كان عرست النخيل بت علي ما كان أخير لي؟ حرم بكلِم فوقي رحمه راجِلا قال لي أجيبلها رُبُع كيلو لحم تسوي منو تماينه مِلحات. - تمانية أفي .. هي بيته زي كُبك الجداد .. مبشتن ومرمد .. قال (تماينه) قال .. - خلينا من كلامك الما عندو راس ولا قعر دا ، أنا شايل الزراعه ، عندي برسيم داير اسقيه ، أسمعي الغدا سريع .. وما تنسي صبارة الشاي. - الجنا دا سويتلو شنو في القروش ؟ - كدي لا بعدين ربك بفرِجه. - كب يا ود حِسونه .. - هوي يالموهوم ، حُقتك دي نسيته. - حُقتي بس .. هو مو بركه الما نسيت رقبتي زاته.؟ تناقري كدي من شرقت إنتي وولدك أبتِنيح دا.
يتوكل علي الله ، وهاك يا لِكليك .. فحماره (نشو) أي سريع كما يتفاخر بذلك كلما قابل الدِليج ويعيره بحمارته الدانقيرثقيلة الخطوات.. يلقبها له (بالحرّانه) مكايدةً له.
09-11-2009, 03:19 AM
فاروق أبوحوه فاروق أبوحوه
تاريخ التسجيل: 07-26-2008
مجموع المشاركات: 2242
يغسل عبد الله جون يدية، ويمسح فمه وبطنه المتدلية كما (الجر) المنوشل كما يقول النور دائماً..
- الحمد لله ، اللهم أدِمها نعمه و أحفظها من الزوال . جون يتجشأ.. - يابا يابا نعمة خالتي؟ أسكت آجنا يخلخِل ضروسك ديل..خلني الننضُم مع اللُستاذ. - والله يا أستاذ الليله نورتنا تب ، والبيت بيتك في أي وقت حبابك.. - ما بتقصِّر والله يا أبو الضقيل. - بي مناسبة الضِقيل دي ، والله الجنا دا مجنني كل يوم قروش الدرس .. قروش الدرِس.. - لالا يا زول أنساك منهن. - كيف يعني ؟ - ما في زول بسألوا منهم ، خليه يجي طوالي.
النور ود الشكيري في سرو:
- والله يا فضيل إنت تاريك جن مصرّم !! وانا أقول فضيل دا عِندو سته شُفَع في المدرسه من وين بدفعلهن القروش !!! أمانه يا عشا اللبن ما بتنسي الزول سِيرة القروش.
- النور.. النور.. النور.. - أها يا أستاذ .. - وين سرحت ؟ ما يكون بتفكر تدبِّل فوق أم الضقيل؟ - لالا والله لا دبيل ولا حاجه.. لاكين تعال أتعشي معانا طوالي ياخ .. الدنيا دي أصلها رايحه ساكت. - خلاص مافي عوجه تب .. أنا أستودعكم الله ..إن شاء الله عامرين .. وزي ماقلت ليك .. ما في زول بسألو من القروش خليه يجي ساكت.. المدرسة مدرستكم ياخ. - ودعناك الله
وداعة الحي.
09-11-2009, 03:40 AM
فاروق أبوحوه فاروق أبوحوه
تاريخ التسجيل: 07-26-2008
مجموع المشاركات: 2242
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فاروق أبوحوه
وجن
حبيب نورة
فيس بوك
تويتر
انستقرام
يوتيوب
بنتيريست