|
|
 ميتافيـزكس الديــون .. (توجد زنقات)
|
أها قالك شنو؟
قالك إن بتصبر لامِن المحصول يمرق عديلةً لبنه يتشتت ،
وإن كمان لا ..يا خوي البحر قدامك جمجِروا جت ، بس أكان قلبك فيه رحمه .. خللك جقمتين للسمك يتمردغ فوقن!!
أها .. أها .. أها سُب علي وِشيك القبيح دا ، أكان رسلوك البحر تقول بقي سفايه ..أصلك كلاماً سمح ما بتجيبوا؟؟
يا راجل مالك بتداعي في الجنا من حمار الرحمن؟
علوية أنا دمي فاير وشواطين الدنيا جت مصنقرات فوق رويس نخرتي دي .. أقصري الكلام وجيبي شاهيك السُهاجه دا خلينا نتسممبوا..
تبلع علوية عبرته وتتوكل علي لدايات الشاي ،، تبدو ساكتة ! ولكن باقي تمتمه تلوكه بي (خشيمه المو خِشيم لبن دا) كما ينعتها زوجها حمد البدولي..
قُت لي قالك شنو آجنا ؟ اللِشرب البحر ؟! وت اللزينه يا لكباشي .. آآ مراح الحاجه ، أنا أبوك يا سمساعه تلعب بي القِرديه انت؟!
يابا سمساعه أنا واللا خالي ؟.. إنت وخالك اللِتنين مقطعين أربعات .. منزوعين بركة ،،
دا ولدك مخير فيه .. إن شاء الله تسويه شرموط وتعلقوا للكلاب ما في زولاً ساعلك .. لاكين سمساعه اخوي سوالك شنو آراجل..؟
يا مرا مية مره قُتلِك قِشران أخوك دا كل يوم داقلي الباب من صباح الرحمن .. حمد.. أها في شنو ؟ بتول ما تت !!
أخر الليل يدق الباب .. حمد قالولك الناس في الجبانه هناي داااك مات.. يافقر هناي منو أنضم إنضم طوبك .. الحكيم ود أم مريم..
أخوك قديديمو زي قديديمك دا .. أصلوا خبرا سمح ما بجيبوا .. بس فالحين في فلان مات فلانه ماتت ..هت يموت حيلكن..
شاهيك زي خلقتك دي تقول شاي زول ملدوغ !! تقيل وسكرو شويه ومويتو موية دميره مخموجه ماها منقّعه ..
يمسك بشعيرته التي إنحسر المد عنها.. يهزها ويجبِدَه عليه.. إنتي الرواق دا عات تاكلي تاكلي الحِمِت رِمِت ،،
داكي الليله ما ني جايب لي رتجة رواق من دكان ود الشوتلي؟
يا راجل قول بسم الله الرحمن الرحيم ،، يا جنا ابوك دا الليله مو نصيح.. الراجل من قام من النوم فدِك يا نبحه هوهوهو..
سمساعه هوي..أها يابا داير شنو ؟ إنت بتسعلني داير شنو آ جني ؟ تدوّر وتدُق الدلجه..
أسمعني سمح.. يمسكه من أضانه التي هي متل الحَرِف .. لامِن أكلمك نزل إيديك من راسك وعاين لي جاي واسمع حديسي دا زين..
أرجع للكباشي تاني ..وقولوا.. يابا الكباشي دا انا ما جيت منو هسع .. أسكت واسمع كلامي للآخر.. اها سكت ..
قولوا ابوي قالك لاقني علي الجروف النشوف حقارتك دي حدها وين؟ ولامن تجي راجع ، الحمار مربوط في شدرة ختم ..السرج جمبو شِدو وجيبو..
علويه تراقب الموقف ،، يا حمد إنت القروش ديل طايرات ، ما تسولنا مضاربه بي تحت كمان .. إنتو ما بتخجلوا كباار ومتجكرين فوق مِليلِينات..
كدي ناوليني الخيدرانه ديك من لا غادي .. وامسكي خشمك عليك ..دا كلام رجال البدخلك شنو ؟؟ حريم آخر زمن..
منو الفي الباب أدخل.. دا ولدك أبقِنيبير دا .. أها آجنا قالك شنو؟؟
ماقالي شي .. بس أداني ليهن..
أداك ليهن؟!!!..أنا بزاكِك فيه لي حول تعريفه ما مرقه منهن ..كيف أداك ليهن !! بالصِح آجنا ؟ آآآي والله أداني ليهن ..
كدي ورنِي ليهن كدي ..ديل مرقِن الجليل الرحيم .. تنُط علويه من تكلها المايل .. كُت داير تشيل وش القباحة مع الراجل ساكت..
لكن يا ابوي وانا شايل القروش وبِعِد فيهن قدام دكان العوض ود أم ملوه .. وقف فوقي قسم السيد ود البابو .. وسعلني ! القروش ديل جبتهن من وين ؟
أوعا يكون كلمتو يا مقطوع الطاري..؟ أها قتلو شنو؟ قتلو ديل قروش دين حقات أبوي كان فوق الكباشي والليله رجعن ..
شكيتك علي منو إنت ! أها أها أها سِب علي خليقتك الما بتشبه الشفع دي .. ود البابو دا يا أغم دايرلو مني قروش قدر ديل مرتين..
كو .. كو .. كو .. أهل البيت سلوووم ..سمساعه يمد صنيقيرو بالطاقه مستقصياً للضيف .. ولكن حمد البدولي عرفو من نقرتو للباب ،،
يابا دا ود البابو .. عرفتو يا شقي .. أنت جاري وين لا جوه علي التكل يابا ؟
أسمع أفتحلوا الباب وكان سعلك مني قولو أبوي تِحِت عندو برسيم بسقي فيهو. نان أنا قبيل ما قلتلو قاعد ؟ .. أمِش إقعُد بُرامك ويدُق عُضامك.
لم يجد حمد البدولي فجه يندس فيها غير التُكُل .. وحتي الذي لاذ به ليس به ما يستره ..
فكر بسرعه أو بالأحري لم يكن أمامه سوي حُفرة دخان علويه الخمله التي..
لا تجمع النطُع ولا الشمله عقب إحتراقها أسبوعياً..
وتكثِف علويه ذلك الأحتراق (الكبرته) ليصل مره كل يوم كلما (قلب هوا الخريف) حسب طلب حمد البدولي..
علويه تراقب الموقف من بعيد (وتقطع) في الضحك جواها..
بصوت مبحوح يكلمها حمد .. أسمعي .. قوليلو مافي مافي .. تِحِت قراعلو في بوقه برسيم .. ويتلفلف بالشمله الما خمج
بت اللمين سلام عليكم
مرحب حباب ود البابو..أبقي لا داخل .. لا لا ما ني داخل .. أبوكُن وين؟ ..أجابته بما أملاه عليها البدولي..
يا جنا إنت قبيل لامِن بِتعِد في القروش ما قلت ابوك قاعد..!!
الشك يجوط بقلبه .. ويتقدَّل مقترباً من التُكُل.. يقترب أكثر !! يري كُراع حمد بي مركوبه تتمدد خارجه من تحت مكان الحريق..
يقبِّل صاد بعد أن تأكد أن الإمام تحت الشمله ..
يا جنا مادام أبوك في الزراعه.. القروش وينه؟.. ياهدِي في عِبي..
خلاس جيبه جاي .. أبوك أنا داير منو قروش .. اتناولها ! ديل كمهِن آجنا؟... خمسطاشر جنيه.
زي ما قتلك أنا ابوك داير منو تلاتين جنيه .. ديل خمستاشر ويبقالي عليه خمسطاشر..
أها ودعتكن الله ..
بس ما تنسي لاِمن يجي كلموا قولو ود البابو شال نص قروشو وقالك:
(يرفع صوته أكثر)
- لامِن تتدلي الزراعه تاني خليك واعي ..
ما تمشي بي كراع واحده و تنسي التانيه في البيت..
- وبالمره كمان قولوا.. كان إنجبرت ونسيته ..أبقي املص المركوب منها ياااخي 
|
|
 
|
|
|
|
|
| |
فاروق أبوحوه
فيس بوك
تويتر
انستقرام
يوتيوب
بنتيريست