|
|
 السنجك لا يأكل التمر!
|
خط الإستواء
عبد الله الشيخ
السنجك لا يأكل التمر!
لكن رياح الأيام لم تترك سيد أحمد الشايقي يهنأ في ليالي الحصاحيصا، بالرغم من أن (بت محبوبة) ست البيت كانت تحجز له الركن والبنبر وتقول بنبرة حاسمة للقادمين:-
"هوي، دا محل السنجك"!..
مع تمدد سلطان البنك الدولي وصندوق النقد الدولي في مؤسسات القطاع العام عرف سيد أحمد السنجك طعم الفلس؛ ووصلته رسالة شفاهية من أمه مع إحدى الشايقيات قالت فيها:- "الأصبع اليابس ما بيتلحس"!.. أهمل الرد على الرسالة وقد فهم مضمونها كاملاً وقال في نفسه:- زمن، والله زمن.. رعيناها زمن مخدري.. يا ربي أخير الواحد يرجع كريمي تاني؟. وما مرّ شهر حتى جاءت شايقية أخرى من طرف أمه، كانت شايقية قاهرة وصلته عند بيت بت محبوبة وقالت له قدام الرجال:- أُمك خجيجي بت السرف (قالتلك) إنت ماك عارف أمر الشاي صعيب؟ رد عليها:- قوليلا إنتي ماكي عارفي النميري سوا شنو؟... وأضاف:- قوليلا نان أنا أجيب من وين الحكاية جات زانقة من ورا.. وأضاف أيضاً:- قوليلاً كاتلي كاتلي بي شوية التمير لامن ربنا يفرجا..
وتدخلت بت محبوبة في الحوار:- السنجك يا مايل الرجال إنت عندك تمر في البلد ويوم من ذات الأيام ما ضوقتنا ولا حبة؟..
قال لها سيد أحمد الشايقي:- آ خرابه قولي بسم الله.. تمر شنو البياكلوهو؟ يا خرابة التمر بيشربوهو.. حرَّم أنا في كريمي عندي التقول مية تمره، يوم من ذات الأيام ما دخلت حباية منو في خشمي؟..
وضاقت الأحوال أكثر على مؤسسات القطاع العام وضاقت على سيد أحمد الشايقي الذي شوهد داخل بيت بت محبوبة كثير الشكوى، وكثير الطنطنة:- (ضيقوها علينا، تضيق عليهم الوسيعي)..
كان في ليالي كثيرة يأتي إلى بت محبوبة فارغ الجيوب ويقول لها:- آخرابة.. انا الليلي معِّلم الله.. أسكتي أكتبي في الحيطة لامن تجي الماهية.
وتشخبط بت محبوبة في الحيطة.. هي الأخرى بدأت تطنطن:- السنجك يا مايل الرجال.. الحيطة دي بتبقى راجلاً تليّسا؟.. فيرد عليها:- آخرابة انتي دايري تشطبي الدفتر؟..
في ليلة من الليالي جاءت بت محبوبة غاضبة و وقفت أمام سيد أحمد الشايقي وقالت:-
السنجك هوي.. أديني حق البقنية؟..
قال لها سيد أحمد الشايقي:- آخرابة قولي بسم الله.. خليني أنجم، قطعتي قلبي، الله يقطع نفسك.. ولكنه، لأول مرة لاحظ أن بت محبوبة كانت صارمة وأبعد ما تكون عن الهزار والانتظار..
يا سنجك هوي.. يا مايل الرجال.. أنا دايرة حقي الليلي؟.. الليلي؟..
نان يا خرابه اجيب ليكي من وين؟..
ما بعرفو.. أكان ما اديتني حقي بكورك وأفرَّج فيك ناس الكمبو..
- آخرابة، ناس الكمبو كلهم ما صرفوا...!
ومرقت بت محبوبة إلى الشارع وكشفت رأسها وبدأت تكورك، وسيد أحمد الشايقي يقول لها:- يا سناحي أدخلي، تدخل فيكي الما بتمرق تاني..
- لا ما بدخل.. شكيتك لي الله.. حق بقنيتي دا أشيلو منك يوم القيامة.. يوم الخلوق واقفين صفوف..
.. لم تفت عضد سيد أحمد الشايقي هذه العبارات "الدينية"، بل قال لبنت محبوبة:- آخرابة.. حرَّم تجيبي سيرة البقانة في طرف خشمك اليوم داك إلا يفرجوا فيكي الخلايق، إنس، وجِن!
|
|
 
|
|
|
|
عبد الله الشيخ
maman
فيس بوك
تويتر
انستقرام
يوتيوب
بنتيريست