|
|
 [B]أولاد الخرطوم !!!!.[/B]
|
وهم فى الغالب (سبط المدينه) !!(المدينه)!!اساسها التلاقح المنطقى بين الحضارة والمدينه واستيعاب الواقع بكل زخمه على ارضيه بشريه مستعدة اصلا!!! وعليه انتاج حاله انسانية زاهية ومفعمة بالنضاره والنظافة والتنسيق !!!اذا كانت الخرطوم السودان فى حالته (متمدنا) فالسكن اليها يعنى تكلفة التخلى عن السلوكيات والمعايش (السبهلل)!!!
الخرطوم وبالطبع بعد وادى حلفا شهدت تخطيط الطرق والسكنى بواسطة الخرائط وعلم هندسة المدن والأعمار بواسطة (الآنشائيين) المستوردين من بلاد عرفت الشمس اولا!!
فسكنها (اناس) فى غاية ( القيافه) يعرفون اداب الطريق وقعدات النوادى وكذلك الجلوس فى ( لوبهات ) الفنادق وفنون الأكل وذوق (الأستطعام )وفن المتعه والأستمتاع بمنتجات الحضارة المعاصره ,,,فى الخرطوم وليس غيرها ظهرت الطبقة البرجوازيه والأخرى العامله فى شكلها المنظم والمنتظم حالة المدينة نفسها وفى الخرطوم كان الطرب و الغناء نفسه يمارس بشكل تانى !!!! والسينما ومراكز الجاليات الراقيه !!!وكذلك علائق البشر بعضه ببعض فالغالب (موظف) حكومى اوعامل مستنير !!!! او قطاع مصرفى او شركات خاصة ولكن بنكهة الخرطوم!!
!المدنية والتمدن فى من عرف الخرطوم اولا!! (لآزم عندوا شهادة ميلاد) وقد اخذ منها المستعمر واعطاها مباشرة او غير مباشرة (اورنيك) الألتحاق بركب الحضارة الأنسانية ,,والزم نفسه بمدارس الصفوة (للناس ) التمام !!والجامعة المناره وسط الناس (الأماره) والحدائق (الغلبى) للبشر القيافه والمستشفيات الملكيه ذات الزهور والوردى !! والمطار عشان تشوفونا!!!!!!
قلنا ان للخرطوم موقعا ساحرا لمن يشاهده من فوق هامة السحب لأنها راس المثلث ويحفها النيلين وتمد انفها الشامخ فى اتجاه الشمال (عدوا) نحو العالم الآخر الذى حط موقعه بالقصر الجمهورى قلب السياسة المتقلب ثم تمدد جنوبا على شكل انهار (اسفلنيه) تسمى شارع القصر وشارع الحرية (وتتمطى) هذه الشوارع وتتلوى بانتظام والى ان تاخذ طريقها الى (مدنى) ولكن الحياة كلها كانت بين جانبيها او مابينها حتى (تردها) شواطىء ( النيلين) ويالهم من بشر !!!!ويالها من احياء !!!ويالها من اسواق !!ويالها من نظام واتساق!!فاذا اخذتك الذكريات وانت (تتمشى) فى (شلسى) لندن او (سيسر)فرانكفورت او ( لأقار مدى ) بروكسل !! تذكرت حتى وللمحة شارع الجمهورية او البرلمان او بالتاكيد شارع النيل (العتيق)!!!واشجار الجميز هدية (حلفا) المدينة الأولى للمدينة الأتيه بقوة !!! صحيح ان شارع الجامعه بما تحمله من مضامين وايحاءات تظل للأجيال (عبره) لكنها ايضا فى المخيلة اشجار باسقة ومبانى انيقه وبالطبع الناس الفيها (غير)!!! برضو هم ابناء الخرطوم وان (تبدلوا)!!!فالخرطوم عموم والخرطوم شرق سياحة اهل المدن المجاوره!! تنتهى بك الى سنما ( البى ان)مجرد الحديث عن ريادتها تعنى انك قد (تلبست) بالمدينة الفاخره ,,,على تلك الأيام!!
ولسع نحن ما بدينا !!!
kofi
|
|
 
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
الخرطوم شرق ظليله فى الغالب وتجسو على الأزرق بارتياح وتشرئب بالبان والسيال وشبه الصفصاف والمتسلقات من النبات وتفتح صدرها لنادى الزوارق (مين زينا) والباخرة نوير والسباحة الأولى هدى حمدى تليها سهام سمير سعد على منصة ملكات الجمال والرياضه (لمان كان عندنا رياضه) ولايزال ايضا فى الذاكره بيرم العداء المائى الذى لم يتكرر ويتبعه( جارى) ممدوح مصطفى على التتالى,,,مابين الخرطوم شرق والخرطوم (1) معبر انيق وتوازن الطبيعة وجنوبا نحو الجنوب فالكساء (التمرابونى) لايزال عالقا فى الذاكره وفى الفم احمرا قانيا يبهدل(الجلباب) ويمنحنا الحبور وشغب الصبا!!وسباق الدراجات بين الأسماء الاليفه الأصدقاء (الرباعيين) اولاد حمو (وابو) والبروف النزير دفع الله والى مرابع اولاد القاش !!!كانت البيوت هنالك مجر د حدائق يسكنها الناس (القيافه) وجمعية الهلال الأحمر والمركز الثقافى السوفيتى وعلى جنب كده (المانيا الشرقية) وحتى بيت سفير (الغربية) وثلة من ذات العيون الخضراء والزرقاء والعسلية!!
والقصة لسع!!!
Kofi
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: عبدالله كع)
|
اخى عبدالله
شكرا للمتابعة ولو انك ذكرتنا بالعم (كع) صاحب اشهر احلى تسالى واسلوب بيع فى استاد الخرطوم (ايام عندنا) استاد وكوره!!كان العم (كع) يرمى ( تساليه ) وقفشاته على الملأ (الطيب) دون انتظار المقابل !!واذكر انه كان ( يرص)قراطيس التسالى باسلوب عجزت عنه (سوبرماركتات) الخرطوم على دى الأيام!!!له الرحمة حيا ومبتا!! تقبل منى الود الدافىء!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: محمد حيدر المشرف)
|
الي الخرطوم ... مدينة من حنان داكن
النيل بعض هباتك – سيدتى النيل بعض هباتك – سيدتى - بعض هداياك الانيقات .. فأى سخاء سخاؤك هذا المبذول على الدنيا , وأى عطاء فينا ترتكبين ؟.. منذوره انت للبهاء ..لاقداس الشموس الاستوائيه العظيمه .. لاعراس المياه السماويه الوعد .. لاحلام الصبايا السمراوات سمره وجهك الموسوم بالطيبه .. للاناشيد تحمل بشراك .. الله الله يا خلاسيه المكى ابراهيم
يا حانه مفروشه بالرمل ..
يا مكحوله العينين ..
يا مجدوله من شعر اغنيه ..
يا ورده باللون مسقيه ..
بعض الرحيق انا .. والبرتقاله انت
يا مملوؤة الساقين اطفالا خلاسيين
يا بعض زنجيه ..
وبعض عربيه ..
وبعض اقوالى امام الله ..
يأتى اليك العاشقون .. فى شارع النيل , تورد لون الصباح .. بصوت وردى ينطلق فى المذياع , نديا فى حافلات الركاب الذين انتظموا وجدا بالنشيد ..
بتطلعى انت من غابات ..
ومن وديان ..
ومني انا ..
ومن صحوة جروف النيل .. مع الموجه الصباحيه
بتطلعى انت .. من صوت طفله .. وسط الزحمه منسيه ..
يأتى اليك المرهفون .. منك , من عقاله ينفلت الشعر .. يرتكب جريمه التفرد عامدا .. اسمر لوحته نار المجاذيب .. تقيا عمدته خلاوى القرآن .. ساحر ينطلق من طفوله إفريقيه معربده .. حييا يتخفى تحت عمامه بيضاء .. هو موسم للهجره الى الشمال .. موسمين للعوده .. ومواسم اخرى تخص الالتقاء .. فعند هذا المقرن العظيم .. النيل ازرقٌ .. النيل ابيضٌ .. وفى ذات الهنا نيل ثالثُ هو بعض هباتك سيدتى .. بعض هداياك الانيقات .. فأرجع البصر هل ترى من فطور .. سبحانه
كانت لحظه اللقيا تجلجل فى فناء الروح ..
كان الحب يرقص عاريا .. متجاهلا كل الخرافة ,
والمعانى السافله ..
كالنيل حين يضج بالايقاع ينفذ وحدة ..
عبر الصحارى القاحله ..
طوبى ..
اذا احتملت شرايينى هدير القلب حين اراك ..
( اى مشارق تغازل فى شموسها الان ايها التاج .. السر .. جعفر .. الخليفه .. طه .. الريفى , يا لصوفيه هذا الاسم)
يأتى اليك المادحون .. الخرطوم تقيه المدائن .. عذراء فى الليل تصلى فى محراب الهجرة الاولى .. تمدح الرسول .. تهفو للمدينة والبقيع .. مشجونة بالفراق وهى تودع الحجيج ..
يا راحلين الى منى بغيابي ..
هيجتموا ..
يوم الرحيل فؤادى ..
طارات البرعى تدوى فى لياليك الطاهرات .. أولاد الماحى يترنحون وجدا وانجذابا .. والسمانى احمد عالم – فى القبه – يسامر الحلاج , ينشده .. وأبن عربى يستأذن فى الدخول على شيوخ العركيين .. أين محمود محمد طه ؟؟ .. مدد .. يا الله , مدد
يأتى اليك المتعبون .. للزقاقات الاليفه الغباش .. لغبار شوارعك الحميم .. لاشجار اللبخ تظلل عشاقك .. لمداخل الحزن الرحيم .. يا بوابات العشق والطين والسنط .. ويا شبابيك الحبيبه .. هدهدينى بأحاديث العميرى وعلى المك .. خبرينى عن امجاد بعانخى وحرفنه كمال عبد الوهاب ومشروع الجزيره وآبار البترول .. ثم
خبئينى بين جدران المسام ..
قبلينى ... مرة فى كل عام ..
فأنا .. اشتاق ان اولد فى عينيك طفلا من جديد ..
ارتدى اللون البنفسج .. اعتلى شكل الهويه ..
ضيعتنى مريم الاخرى سنينا .. فى انتظار المجدليه ..
اه لو تأتين .. آه
من عميق الموج .. من صلب المياه
كالرحيل ..
كالترقب .. وانتظار المستحيل
رحم الله مصطفى سيد أحمد .. أى غناء نازف كان يغنيه هذا الرجل الحليق الكف .. الداكن الحنان ؟؟ , وللحنان طعمك الداكن يا خرطوم .. وشكرا حزينا عاطف خيرى اذا انبهمت علينا مسالك الحنان
( محمد المشرف )
(عدل بواسطة محمد حيدر المشرف on 08-15-2009, 08:14 PM)
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: محمد حيدر المشرف)
|
يا سلام يا احمد
حليل الناس القيافة جالسه في الجي بي في شارع القصر.
والهجيج في GMHو ناس فلان قالوا لا نحن بنحب الليدو وبس
حليل قسمه وترباس ولمة الناس في حوش العمدة.
حليل الخرطوم بالليل بعد الساعة 12 تبدا الفنطازات في غسيل
الشوارع وسقاية الزهور . وفي بيوت بي غادي انطلق فيها البخور.
واصل يا خليل الخرطوم حلوه وجميلة واولاده اجمل وزي ما قال
عصام ود العمدة نحن قيافة وفايتين الناس مسافة,
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: omer osman)
|
ابو خليل ؟
انت قاصد الخرطوم عموم ؟ يعنى العاصمة المثلثة امدرمان الخرطوم بحرى ؟؟
ولا قاصد خرطومنا دا بعيدا عن الامدرمانيين ؟؟
ــــــــــــــــ
لكى نتعرف على كوعنا من بوعنا ذى ما قال محسن خالد !!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: دينا خالد)
|
يا دينا ,,, اصحي
الراجل بقول ليك البي ان و كلوزيزم ومكتبة اليهود
وفندق الشرق وعمي كع وشارع القصر وشارع النيل
ونادي الزوارق وتمرابوناوالمقرن والخرطوم غرب
الكلام ده يا دينا جواااااااا الخرطوم ما طلع الضواحي.
وحليل عمارة محمود وترب اليهود
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: محمد حيدر المشرف)
|
احساس جميل يا اخي حيدر المشرف
كنت استمتع دايما مناكفة الوالد ( خرطومي) والوالدة ( امدرمانية)
بالرغم من انهم ابناء عمومة لكن عندها تسمع احلي الكلام عن الخرطوم
وامدرمان, طبعا نخن بننحاز للخرطوم وخصوصا الخرطوم غرب لذيذة خلاص
تسلم يا دكتور
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: سيف الدولة كامل)
|
الاحبه بجيكم واحد واحد!!
__________________________
شارع القصر
يا احلى طريق
ياحقل النار
على هذا الشارع نثرت لحظات عمرى وسكبت كثير رحيق ايامى تارة اليها من شارع الأسبتالية والسكة حديد وتارة اخرى ازيد عليها من شارع الحرية والآخر الزاوى على عبداللطيف,,ومابين الحرية والمسلمية كتب احرار اكتوبر شدوهم الثورى والى ميدان الشهداء وباحة القصر الذى اشتراه الشعب بالدم والدموع!!
وما ملأء رئتاى من اريج قط سواء (البنبان) المعد للكلاب يرج الصفوف فتتقدم!!!وما ملأءت عيناى الصغيرتان قط سوى اولاد وبنات الخرطوم صفا واحد نحو القصر!!وما سمعت اذناى قط احلى من هدير ابناء الخرطوم( يسيلون) كالشلال من على ( فجاج) الخرطوم وهم يرعدون (الرصاص لن يثنينا)!!شاهدت الجثامين الطاهرة متراصة فى مستشفى الخرطوم وشاهدت ابناء الخرطوم يسحبون الجند الى (جخانين) المدينه ليتبددوا شذر مذر!!!وبقى الشارع (الأبى) مبكى لأمثالى زرعناه مشيا نستذكر دروسنا فى المركز الثقافى الأمريكى !!!نحضر الأفلام ونقرا (المجال) ونشاهد ى الأعمال ولوحة (مراعى شندى ) لأحمد عبدالعال نتعشى همبرجر (مبارك) المستطيل ونشرب شاى بالنعناع ونشاغب (مهدى) ثم تركض (للدون الهادى ) وعلى( ظهر البارجة بوتمكن) فى المركز الثقافى الروسى ونتعلم من ( شنان )ونبكر بحجز اماكننا فى الثقافى الفرنسى وعبدالله عباس وعامله ( عيسى)!! وحتى لا ننسى ( همت) بالمركز الألمانى الشرقى ولا معهد جوته (بالكونشرتات) والسيمافونيات بالزى الرسمى او القومى مدخلنا لثقافة الفن الراقى وتدريبنا الذى نفعنا فى بلاد الفرنجة التى لم تبهرنا قط !!!!
ولسع
kofi
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
.
أولاد الخرطوم .. يا لها من عبارة!
وياله من ختم بارز ..
ياويح .. عشقي، قلبي معلق في سماك،
خرطوميون نعم .. ومتحيزون!
وكنا نقول: لايدخل الخرطوم إلا من درس الأميرية
وأستطعم باسطةعلي السيد نجار الكوباني
وترعرع في سوح ميدان المولد وليق الخرطوم..
ذلك قبل أن يأتي التتار ..
حزينة في المساء .. ومقهورة في النهار
ولكنك تصمدين..
يا هبة الله في المدائن
ويارمز الجسارة.
سيف اليزل
.
| |
|
|
|
|
|
|
|
|
 Re: [B]أولاد الخرطوم !!!!.[/B] (Re: سيف اليزل الماحي)
|
سلامات يا خليل,,
كنت دائما ما أقول للأهل والأصدقاء الأمدمانيين والبحراويين بأن لا إنتقاص من حقوقكم ولكم أن تفخروا بأمدرمانكم وبحريكم ولكن
تظل الخرطوم مدينة ذات طعم غريب وخاص جدا جدا! !! خاصة الخرطوم القديمة والوسط بأحيائها من الخرطوم غرب والمقرن القديمة
وأطراف الخرطوم واحد وصولا لأواخر شارع البلدية وما حواها من أماكن وقصص وشخوص تاريخ وحاضر,,,
بوست شيق وسرد ممتع وكتابة جميلة ,,,,
أرجوك التركيز على حكاوى وقصص الخرطوم شرق فهى كانت دائما المنبع والمصدر با توافر لها من أسباب,,
مودتى
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: يوسف محمد يوسف)
|
احس بكم جميعا فى ( يتمنا ) وجمعكم ( يدفىء) خطرفاتى التى هى اقصر من قامة الخرطوم (بكتير)!!!
عمر عثمان ياصديقى
ياهو ذاتو العم الجميل كع ودايما كا بتخلص القفه ام دورين!!!
عزيزى ود المشرف :
نهر الأبداع الذى ينبع من داخلك ويفيض هنا يبهجنا تماما!!!!
حبيبنا سيف الدوله:
ياخى شكلك ذاتو خرطومى واطلعك من الف !!!!بجييكم فى الخرطوم غرب وفريق الدفاع !!وبيت العمده كرم الله والأخت الكريمه الباسقه سلوى العمده ,,واتذكر معك المرحوم عمر كباتا واسع الزبير ,,,الخوحتى نبيل الحلبى بتاع الكشافة البحرية!!!
خليك قريب!!!
الأخت دينا:
قاصد الخرطوم الغير (مثلثة) وابشتنها ليه !!!ما كفاية الهى فيه!!مساهمتك يعطى للبوست نضارة ,,(مرسى )
اكيد بجى لبقية الناس القيافة!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
يتحبوا,,,,يخشو للزول في قلبو,,,,,ويا جمال النيل والخرطوم بالليل,,,,,الخرطوم بس ,,,ولا اديس ولا القاهرة ولا نيروبي ولامكرونة
خرطومنا,,,,خرطوم الاميرية بنات والقديمة بنات,,,,وما ادراك ,,,,الدار السودانية للكتب الما منظور متيلا,,,حيث الثقافة سلوك ما
قروش والكلام للمنططين عيونهم (من اين اتي هولاء )
وبدون ترتيب من شدة الحنين,,,,,النادي الكاثوليكي,,,,مكتبة طوكيو,,,,بقالة الحاوى الكانت لنا بها ايام,,,يا ليتنا عدنا او عادت
الايام,,,الشخوص الما خمج,,,,ناس هويدا الشوش ومسلال بينا والبلابل وعثمان حسين والراقي حسن عطية,,,,البون مارشيه والبومباي بازار
سكر(سستر)سكول,,,,الولادة في الراهبات والقراية في فيلا قيلدا,,,
لو عايز تعرف ناس الخرطوم صح اتجول بعربيتك يوم الوقفة بعد المغرب وحتفهم يعني شنو ليل الوقفة في الخرطوم اى زول تلقاهو ماشي
بهدوء وبدون لهوجة علي المينا البري وما شابه,,,,دا ياهو ود الخرطوم
يسلم(تمك) يا ود خليل ,,,واصل وسنواصل
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: Solafa Alagib)
|
Quote: لو عايز تعرف ناس الخرطوم صح اتجول بعربيتك يوم الوقفة بعد المغرب وحتفهم يعني شنو ليل الوقفة في الخرطوم اى زول تلقاهو ماشي
بهدوء وبدون لهوجة علي المينا البري وما شابه,,,,دا ياهو ود الخرطوم |
العاصمة الجميلة النظيفة,, القصر الجامعة المقرن
القديمه ,, التجارة ,, البركس ,,
القشرات فى العصرية مابين العربى والجمهورية
المذاكرة فى الثقافى السوفيتى,,, والعودة اولاد وبنات فى امان
الدور التانى فى كلوزيوم والبى ان لا مواصلات ولا يحزنون
وين الخرطوم وين زمن الصبا,,,,
معقول تكون بقت حكى؟؟
(عدل بواسطة حيدر امين on 08-17-2009, 11:17 AM)
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: حيدر امين)
|
الحبيب \ احمد خليل ,,, تحاتي
والله انت زول قريييييب الكلام القلته ما بعرفه الا القليل
الله يرحم عمر كباكا,, ويبارك في ال العمدة,, وحليل فريق
الدفاع ,,, تسلم يا احمد خليل. واصل عشان نطلع المخزون
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: سيف الدولة كامل)
|
استراحة:
وقبل ان اودع شارع القصر الحزين من على رصيف (اليونتى) دقات القلب الأولى !!والى الخرطوم وسط وبيوت الصحة والاميرية والاهلية جنوبا شارع الأسبتالية وشمالا النيل الأزرق وغربا شارع الحرية ,,استريح قليلا حيث كانت افواجنا تهطل مساء الى ميدان المحطة الوسطى مقهى اللورد بايرون ومكتبة الملايين لليمون البارد والقهوة الفاخرة والجريدة المضيئة من على فوق البنك الأثيوبى وقتذاك!!!(لاقار مدى الخرطوم) بشر من كل صوب باناقتهم وحيوتهم واختلاف السنتهم (مواعيد يعنى مواعيد) يتسامرون فى شئون الدنيا ويتبادلون الود ويوزعونها بين (موائدها) النظيفة المنظمة مثل حلويات سعد وريا وكريكاب !!!هنا كان مطبخ ثورة اكتوبر العظيمه فالتهمها الغول وتجشاة بها السعلاة فيما بعد !!!!المحطة الوسطى دماغ الخرطوم (الشغال) بكل شىء ولكل شىء وامامك مطعم الجمهورية اللذيذ وخلفك عمك (ميرزا) المزهل فيما تحتاج من خردوات العالم الأول!!مجلات وصحف العالم طازجة يتم تداول مانشيتاتها قبل ان تجف احبارها ويتمعنون بين سطورها قبل ان يجف مدادها!!!ثم تبدأ احوال البلد تترى فى انسجام (فتحلل) !!!بشر يتبادلون التحايا والدعوات والأفكار والرؤى والميعاد!!!بعد الخامسة الخرطوم لديها موعد ميدان المحطة الوسطى!!!
اما العشاء الخفيف فالى (الاتنيه) او!!!!!!!!!الى حين!!!!!!!!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: omer osman)
|
احمد خليل بوستيك رائع ..
رمضان كريم .. يا وريف .
بخصوص (( كع )) .. طبعا الشغلة وصلتني بالوراثه .. وانشالله تستمر الي ما لا نهايه ......
(كع ) دي لقب الوالد . وبحكم انه يعمل في دلالة عربات .. واطلق عليهو هذا اللقب لانه سريع جدا في بيع
السيارات .. يعني ممكن يكون عندو عربيه اشتراها الصباح .. الظهر يكون باعه .. وانه يراي في المربح القليل بركه
فسار عليه اللقب ( عوض كع ) ... ثم انتقل للعبدلله (( عبدالله كع )) والي ابني انشالله ( مصعب كع ) ...
| Quote: بالعم (كع) صاحب اشهر احلى تسالى |
اما عمك ( كع ) بتاع التسالي الرهيب .. في ليق الخرطوم شاهدته هناك كثيرا .. وله مكانه كبيرة لرواد الليق ..
اظن انه توفي قبل فترة ... عموما الخرطوم زمان مدينه ولا في الاحلام ..
راجع
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
*** - ياحليل خرطوم الاربعينيات...
ياحليل ناس زمان...
وايام زمان...
واماكن زمان...
ولما كان عدد عربات التاكسي في الخرطوم كلها بس اتنيـن...،تاكسي ناس عمك ابراهيم سعيد، والتاني بتاع عمك شريف التهامي!... والحناطيـر كانت " ركشات " زمان ... والتـرام يلف بك دائري ويدخل بك امدرمان ماري بجـنينة الحيوانات وتدفع بس فريـنـي " قرشيـن "!!!،... حليل زمن قهوة الزئبق وتسمع هناك الاذاعة من راديو خشبـي بشتغل ببطارية العربات، وتشرب شاي بتلاتة انواع سادة او بلبن او بنعناع وتدفع 17 مليم مصري!!!!،... وتدخل سينما الوطنية غرب (شـعب) وتتفرج احـدث الافلام المصرية " ابيض واسود" وتشوف فريد شوقي (بطلنا المحبوب في ذلك الوقت) وعدوه اللدود المليجي وتستمتع بجمال سامية جمال وفاتن حمامة، وكان تمن التذكرة ومعاها كباية شاي او قزازة " كيتـي كولا " بس 3 قروش مصري!!!
*** - ياحليل زمن لما كنا بنوم بالليل بره قدام البيوت ونـخلي الحيشان للنسوان والاطفال!!!، ويمرعلينا بوليس السواري ويدينا السلام واحنا منـجـصيـن في عناقريبنا والهمبـريب ضارب ضرباتو!!!، وياسـلام وانت نائم مستلقي يـجـيك صوت الموسيقي الشاعري من "غردون مويزك هول" مختلط بصوت اذان الفجر..... تسمع اذان ديـنـي بصـوت جـميل مختلط بانغام الساكسفون والبنقز!!!
*** - ده كان خـرطـوم الاربعينيات وياليت ايام الشباب تعود يومـآ فاحـكي لـها مافعل الـمـشـيـ(ر)ب!!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: بكري الصايغ)
|
صديقى العتيق Ridhaa او رضا
يانى انا ياهو دىه!!!! ياراجل ياحليل ايام فلانه وعلان (مين علان ده)!!! لك يبقى الود القديم!!!
قريبى بكرى الصايغ: اكيد حاامر من عندكم ياناس الخرطوم عموم زمان اوى اوى!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: حسام هارون)
|
الشارع هناك يحلق بعيداً، لكنه لا يتلظى بنار الشمس، ويوغل عميقاً، لكنه لا يعير إنتباهاً لبرودة الأعماق.
أقدام الخلق أجنحة تلغى تماما لهف الخطوة لتتحول إلى مصارعة أسفلت الهواء الخطوات هناك لا تقنع بما ييسره التراب من موطئ حياة ميتة.
ما الذى يجرى هناك إذا؟ فى قلب التيه المسيطر وفى ما يسيل من فم الوقت من إزدحام يغمر الزمان ولا يروض المكان. علىّ أن أسأل إذا وهذه الدروب تفضى بك إلى قلب ال "يونيون جاك" وللعجب فإنها تقودك إلى قلبه، حيث يربض جسد "الجامع الكبير"، هكذا أرادها من لا تغيب شمس الكون عما ملكت يمين سطوتهم، أرادوها خريطة وربما لوحة تمجد تلك الحسناء التى لا تغيب شمس شبابها، ثم "تسودن" بطريقة غائرة المعنى، روح المكان وجسده. أربعة شوارع، كل واحد منها يبدأ من مفتتح الجهات الأربع، ليقود الى قلب المعنى
هكذا أرادوا وهكذا فعلوا.
شارع "فيكتوريا" يفتح فمه من أمام القصر، وهو فى المبتدأ قصر، لا يهم ساكنه، سواء كان غوردون أو هوراشيو هربرت كتشنر أو جعفر محمد النميرى، هو قصر، ثم تنتهى مسيرة "فكتوريا" عند نصب كان يشبه فى طعمه شكل علبة السردين وفى وسطه مسلة قصيرة المعنى، تمجد قتلى حروب التى غابت شمسها الآن، بما فيهم أولئك "المشلخين" أفقيا ورأسيا، ثم يقف بعدها سور السكة الحديد فى وجهك، وما عليك سوى أن تقفز من فوقه ليسرى جسدك، فى الجهات الأربع أيضا، هكذا أريد أيضا للمعنى أن يتجسد.
إذن تريدنى أن أصدق حديثك يا "معرى"، فليكن ذلك، وسأبدأ الآن فى تخفيف الوطء بذات الأقدام التى ما ملت التحليق، لكن المسافة الآن بين "أتينيه" و "الكلوزيوم" مثل المسافة بين أثينا وروما، والشقة بين "السانت جيمس" و "الرويال" تعادل ملايين السنوات الضوئية العجاف، فيا ايها المعرى، لا تحرجنى بتصديق كلامك، لا تحرجنى، فالخرطوم الآن قد إنتبذت أقصى ما فى المجرات الشائكة من أغوار، وبعد فم الرغبة عن كأس الأمل، المسافة الآن بين "خا" الخرطوم و"خا" الخضرة، تماما مثلها مثل تلك التى بين "جيم" الجنة و"جيم" الجحيم. ثم بمساء شتوى "لندنى" الملامح، يتلقفك شارع البرلمان، هو ايضا قصير النفس ولا تفتر الخطوات/الأجنحة من الغوص/التحليق فيه، هناك وأنت تيمم شطر الشرق منه، وفى وسط أخيلة النجيلة والنوافير الكسولة، بسطوا ساحة للشهداء، لم يخبرونا أى الشهداء هم، بل نصبوا فيها لإبنهم الغازى تمثالا ثم أزيل، وليتهم تركوه ليذكرنا بمعنى الإنتصار وطعم الهزيمة، لكى نتذكر دائما أن لا أحد يهزم أحدا، بل الناس هم الذين يهزمون أنفسَهم بأنفسِهم، فالهزيمة فعل داخلى بينما الإنتصار عمل خارجى. لو أردت أن تلون الغناء فى الخرطوم، فإنك فى حاجة الى كل الحدائق التى ترضى أن تهب ألوانها، فى حاجة الى كل الريح التى تنقل أنباء الأحزان وجميع الزغاريد التى تضمر الفرح لتنشره فوق أرض المساكين. لن ألوم الحبر حين يتوغل بعيدا فى دواة الدم، فأمام عتبات الإشتهاء تصلّى الشمس مواقيت الشروق، ولن أسير تحت سماء الواقع، فالخيال أرض تؤتى غرسها بشرا كانوا ومكانا يصارع تبريح التوهم ونوق الأخيلة. فالصورة أكبر من أن يحتويها إطار التراب الضوء فيها غامض وخجول، لكن رغما عنه وعنى، سوف أحمله تحت القلب من الخرطوم، إلى الخرطوم.
ما النهر سوى طائر مسافر إسمه الحنين والبيوت دموع تيبست وتجمعت حولها أفواج "اللبخ" مواسية،
المكان إكسير الحياة. ولكن ماذا تشبه هذه المدينة، هذه المدينة تحديداً، وبماذا يبشر القمر؟
وموعدنا خرطوم
تحياتى يا أحمد ليك وكل ناس الخرطوم
ويا حليل الخرطوم
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: أبوذر بابكر)
|
الجميل معتز جعفر
معانستذكر جمال الاماكن وننشط الذاكره برغم ضراوة التتار
سنتذكر شارع التيل والعروض العسكرية وحتى الاسواق الخيرية
الرائع سيف اليزل
دى عوالم وذكريات رطبه قلمك معنا يجمل البوست
حبيبنا ايمن الطيب
والذكريات صدى السنين الحاكى معا نحو ترطيب الذاكره
الكاتب النحرير يوسف محمد يوسف
يالقلمك العازف
الأخت سلافة بنت العجب
هكذا دائما بنات الخرطوم (زينه فوق زينه) واولاد الخرطوم يشمل بالطبع بنات الخرطوم ولكن مثل ما لهم
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
اخى حيدر:
الخرطوم تظلل كل مناسباتها بنكهتها الخاصة رمضان والأعياد ومظاهر طفولتها بين المخابز للكعك والبتفور الشهير وحتى الكريسماس وشم النسيم والمولد الشريف
نلتقى فى التفاصيل وهمتك معنا
قريبى حسام:
انا ممكن افصل كتير فى الكشافة البحرية فقد كنت من الرعيل الأول مع محجوب حسن ادم معلمنا فى كشافة الأميرية بالضبط كما كنت مع المرحوم فاروق سليمان اول مؤسس لأتحاد السباحة العام-المسافات الطويله_ بسكرتارية المرحوم اسماعيل دهب وعلى ظهر الباخرة نوير
ولا زلت اشتاق لدفعتى من الآشبال وقت ذاك (سامى) الصلحى وشقيقه عمر او عثمان وشقيقتهم زينب..دون التاسعة ونعبر (توتى) الخرطوم(تو وى) ون قو (كرول) ذى الحلاوة!!اما ممدوح مصطفى الخلوق وسهام(بطلة) كابرى نابلى والماننش فكانوا (يمشطون) المشوار الطولى بين ( الكبريين)برضو ذى الحلاوة ولكنى نسيت الباقين للأسف!!!والتمارين كانت تبدأ اشراق كل جمعة وكنا منبهرين بالجماهير الغفيرة على امتداد شارع النيل !!!لم نواصل نحن ولكن المسيرة مضت بالأخوين سليم سلمان وفضل سليمانوصالح الحارث ولم احضر كيجاب ولكنى استحضر المرحوم عادل حمامة !!الخرطوم كانت (زاخرة) وفاخره قبل التتار
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
ياا سلاااااااااااام ..
على الخرطوم و أماسى الخرطوم ..
و رائحة الورود و النجائل فى الأمسيات الحميمية ..
الأنوار التى تشق الهدوء و الأنظار التى يملؤها الترف و الأريحية
و هى تتجول مابين كوبرى الحرية و سوق نمرة 2
الحااتى و الحااوى مروراً بالأندية ذات اللمات الحوالم و الكراسى المخملية
يااااااا عشق الأماكن !!
و يا ملاامح الأزمان الشجية ..
و ياااااا مدد الكلاااااام
إحكى .. يا أحمد خليل
إحكى ..
و أشرح لمن فاته الدرس .. كيف أن الخرطوم كانت أصلاً بناسها و أساسها
بحاضرها و تراثها .. ياااااا عزها
و ما بين ظلاالك .. أفتش و أكوس
أفتش طفولتى و ملامح صباى
بناتك عيونن صفاهن سماى .. و هيبة رجالك بتسند قفاى
و صحى بتملأ عينى
و تشرف .. كلللللللل حياتى
و ياااااا مدد الكلاااااام ..
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: عصام عبد الحفيظ)
|
يااباذر
ياعازف الكلم المنمق المموسق لقد اخذتنا اخذ مقتدر انها (الخرطوم)وحى الهامى والهامك ,كل يستخدم ماملك اوتملك من ادوات الحس والجس منها واليها يتغازل الشعور ويتماهى فى اللاشعور الرمز والدلالات ويبقى الوجدان دائما هو الحكم!!هذه هى مدينتنا متخمة (بالحيل) ومن ( اى ) جئتها وجدت ماتتمنى !!!
نورتنا!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
هبت الخرطوم فى جنح الدجى!!!
- قبة معمل استاك- كلية الطب والصيدله
- شارع الحرية –داخلية حسيب بيوت الصحة
- ميدان الأمم المتحده
- ميدان ابوجنزير
بين هذه الاركان تقبع الخرطوم ( الأخرى)بيوتات عريقة ومبانى عتيقة واحداث صنعت تاريخ مدينتنا وبعضها السودان كله فتامل كيف تحول نادى الخريجين الى (بناء الجسم) وبناء العقل وظلت تنافس نديدتها من على بعد امتار( نادى النيل) ونسمع عن ميداليات كامسيرو كاساى وعبدالوهاب عبدالله وسعيد فى الملاكمه والرباعين العتاةالذين شاهناهم وسعينا لتقليدهم بلا جدوى !!!فكانت رياضة كمال الاجسام والملاكمة متنفسنا الجميل لبعض الزمن فعرفنا (النتر) والضغط ,,وفى الملاكمة عرفنا (الستريت) والأوفر و(الون تو) والهوك !! وعشقنا ايضا نادى العمال بندواته (والفول ) بالجرجير وبعض الوعى!!!هنا ايضا كان (الاحد) الدامى واشاعة مقتل السيد كلمنت امبورو!!!بيوتات وفابريقات على اتساق ونظام مدرسة الخرطوم الأهلية وعظيمها _حمزة) والخرطوم الأميرية بزيها القومى وناظرها الاستاذ( عطا المنان) باطلالتنا نرفع الأعلام على امتداد شارع القصر نحى الملكه اليزابيت (وبعضنا)شارك فى رمى الطاطم والبيض عليها!!والرئيس الروسى وملتون ابوتى وكل رؤساء العرب الذين جاءوا مهزومين الى ديارنا وتفاعلنا بطفولية ونحن نشاهد الملك حسين يقود طائرته!!
كلها والخرطوم تظلها اشجار وارفه تسقى بمواعيد وخضرة تهذب (بجنانية) وشوارع تغسل بكومر وتانكر صنع لها (ايادى مهرة) رشاشات بالامام وتصريف مياه على نسق مدن القرن العشرين!!!اولاد الخرطوم لهم ( قاموس) كثير الدفىء وكثير الود وان تلاشت مع غبار الزمن (الحمضى) وعنف التتار!!مجمع الأطباء الأول الدتور محى الدين مهدى وتادرس وينى والنحاس والرهبات ومخبز (سيحة) وعيشه الشمسى الذى لن يتكرر!!
على السيد المطعم الشهير بشواء (العتان) والكويانى بالباسطة المحشية بالكريمة والكاستر ومخبز الخرطوم الجديده والخبز الفرنسى الفاخر (بالقرش) ذاتو!!! هذا المربع احتوى
المعقل الكبير لعمال التراحيل وفنادق (التعبى) وبيوتات ( المزاج) والخروج عن كدح النهار بين شاحنات الغلال الى مسارات الليل و(البهجة) وفنادق الدرجة الرابعة وعناقريب الأيجار بالليلة !!تلك الأشياء (المخريشة) كانت اطراف مربعنا الذى (بنى) بعضه على مقابر ( حيرى) !!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
الاستاذه ليلى عزالدين
سجائب من المن والسلوى تغشى اماكننا النضيره ومراتع الصبا ومحلات الطعام !!!لقد كانت لنا مدينه وكانت بناسها الطيبين سوف اتى الى الخرطوم تلاته ونمرة اتنين برواقة واكيد مساهمتك تعطر البوست ولا اقوليك البورد كلو!!!تحياتى
عزيزى عصام عبدالحفيظ الراجل الفنان بلمساتك الجميله ستضيف ابعاد جمالية لهذا البوست (البيت بيتك ) وخد راحتك على الآخر انت ومن تتمنى!!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
مين وداك على سكة بيتنا
صفق الفل الضلل حيطنا
ولا صفير القمرى الحايم
بين النيم والشتل القايم
ولا الشارع كلو بنور
شجر البان بيطولو يدور!!!!
بين (الكبريين) الحرية والمسلمية كان هنالك شارع ظليل ومعطر بالفل والياسمين وحسن التوضيب تكاد تمشى عليه حافيا !!وعلى ضفتيىه منازل السكة حديد وحتى المحطة وعلى الجانب الاخر داخلية حسيب للطب والصيدلة على ناحية كبرى الحرية و(نافورتها) الجميلة التى كانت تقذف بالمياه علا و تشع بالوانها (قوس قزح) تلك الايام وعلى ناصيتها وقف طالب الطب فى اكتوبريعرض قميص الشهيد القرشى الملىء بالدم ويهتف (دماء القرشى !!! وهنا ايضا صنعنا لأول مرة قنابل الزجاج الحارق (رمل وحصى وبنزين) وقذفنا بها العربات العسكرية !!! !!!وانت من داخلية حسيب والى كبرى المسلمية يلفت نظرك مبانى كلية الصحة الأنيقة ومن ثم بيوتات بعض رجالات الخدمة المدنية ومربع يعلوه (الصليب) ذكرى تنظيم السلوكيات( الخاصة ) ثم المقابر القديمة والتى اصبحت مدرسة الآسنان وتابع لميانى الصيدلة والطب !!رحمة الله على المهندس محمود على ادريس مدير التنظيم والذى خطط ونفذ الكبريين يشوارعها وحتى جبل الآولياء!!!اما باقى بيوت السكة حديد (حلاوة العيد) واولادها الجلاوذة سناتى اليهم تباعا وفى طريقنا الى الخرطوم (جوة)!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
خريف الخرطوم(استراحة)
امطار تلك الايام كانت (تهل) على الخرطوم بالمواعيد و(الاوان)!!!تعصر السماء نفسها مدرارا فتجد الخرطوم بشعبها وشوارعها وحواريها قد استعدت (بتزبيل) بيوتها القاصية وتشذيب اشجارها واهازيج اطفالها:فى المدارس (هل الخريف هلا,,,!!!)وازقتهاوميادينها الفسيحة (يامطره صبى صبى,,,11)’’كنا نعرف (الخريف) عندما نرى ارتال العمال فى (مارس) وهى تحمل (القفاف) والطوارى (والكوريك) يحفرون المجارى ويهيئون الطرق والمسارات التى تعرفها (المياه) اما الشياي فتراهم على الأسقف يجددون اعمال السبلوقات !!انها موسم الجمع والنفير استعدادا لأنشودة المطر وايام البهجة!!!!
الخرطوم كانت (تشقها) عرضيا جداول ضخمة او (نهيرات) تشبه قنوات امستردام !!وخطتها ربط الأزرق بالابيض (فتخيلوا)!!!!
الاولى حسب ما اعتقد!!!!خور السكة حديد وكان مرصوفا ويمد الى بحر ابيض عبر (كوشة الجبل) والغابة وفى الخريف تجد (القرموط) سابحا والى الورش!!!والثانية : وهى الشهيرة يشارع الخور عبر ( الخرطوم ثلاثه )قلب الخرطوم النابض !!ولها بريق وذكريات وهى تعبر المنطقة الصناعية والى بحر ابيض !!!والثالثة : وهى الأعمق خلف امدادات وزارة الصحة وامام (التبنه) مركز بوليس السجانه وقد شاهدت صغيرا (رهاب رهاب)!!صيد تمساح تمادى فى غية وحاول المرور من امام (المركز) فوجد حتفه وعلق جثمانه فوق (المركز)
اما الرابعة؛فكان حذى الشارع الذى يمر من امام سوق العيش فى السجانه وكان نهرا جميلا مثل شوارع السجانة (الرملية) وناسها (التمام) والى تلال القوز والحلة الجديده الزاهية بالميادين الاليفه والناس (الجود) والحوارى الحية بالناس الطيبه!!!
والخامسة:هناك عند الحزام ,,والاشجار الظليلة وألأكام ومقصد (الويك اند) والخرطوم من ظهرها!!!
كلها صارت اثر بعد عين !!!تلاشت بذكرياتها الجميله وجلسات الكبارى فى العصارى!!!
خيرانعا الطولية والعرضية كانت تجمل الخرطوم بامطارها لتكون نعمة وليست نقمة عليها!!!
خريف الخرطوم كانت ملهمة للفنون والجمال !!!!غناها ابنها البار (اوراق الخريف) فابدع !!ولحن (لفراشاتها) فاسكر !!!
ولكن (التتار) داسوا على فراشاتها وزهرها فاليطاردوا الأن الحشرات والضفادع والقمامة !!!والغناء الردىء (بشبهكم)!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
| Quote: والثالثة : وهى الأعمق خلف امدادات وزارة الصحة وامام (التبنه) مركز بوليس السجانه |
الاخ احمد خليل
رمضان كريم
هذا الخور يبدأ من العمارات من امام كنيسة شارع واحد وينتهي في بحر ابيض الشارع الذي يمر فيه الخور اسمه شارع 71 وده اخر شارع
في نمرة 2 ومنه بتبدأ العمارات ويمر امام حديقة القرشي والقسم الاوسط الخرطوم (الجنوبي سابقاً) الخور عميق وعريض ومبني بصورة
ممتازة بالطوب الاسمنتي ومغطي في مسافات واسعة منه.
هذا الخور كان يشكل تحدياً صعباً بالنسبة لنا ونحن صغار فمن يتمكن من القفز فوقه فقد فاز فوزاً عظيماً وحق له ان يدق صدره ويقول
(أنا نطيت الخور) وينظر له الاخرين نظرة اعجاب. اما في ايام ما قبل الشريعة عااااااادي نصحي الصباح نلقي عربية دخلت سندوتش في هذا
الخور.
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: omer osman)
|
الخرطوم حبيبتى وظمأ فؤادى،تلك المدينة التى أحلم،بأن أنام فى احضان مشاعرها،حيث أرحل حينها بعيدآ،حيث أسمع نبضاتها،أستشعر أنفاسها،فأرحل بعيدآ معها،حيث السماء تطوقنا من كل صوب،وتسقيني اعزب التراتيل فى لياليها الجميلة،لقد كانت الخرطوم جميلة،تشابه النيل طولآ،ويمتد عنقهانهرآ لا ينضب،يروي عطش ونهم شوقى لها وانا فى هجير ونهارات الغربة،أرتمى بكل عنائى وهمي على صدرها،أستنشق شذا وعطر أنفاسها،كانت تمسح بالحب والحنان على رأسي،فأرى أفراحى شاخصة بين يديها،وكل البهجة عندما اعانق سنا ثقرها،فما اجمل الليل وأنا بين راحتيها،فينبعث الامل فى نفسى ليكون زادي لغدي،فكم رائعة انتى يا خرطوم،تزكرتك ونحن فى فتوة الصبأ والشباب،حيث كانت لياليكى الجميلة، كم ازكر نواديها، قبطى وكاثولوكى وعربي وافريقى ، سوري وارمنى، كم كنا نتسكع هنا وهناك فى ايام الخميس ومنها خلدت اعلام واصبحت اسماء فى حياتنا، كم تعشقنا الراحل المقيم احمد المصطفى وعثمان الشفيع وعثمان حسين وكل جيل العمالقة من المبدعين، كان اهل الخرطوم يعرفون بعضهم من خلال المدارس والاندية ودور الرياضة والحفلات حبيبتى الخرطوم تزكرتك،فى ليالي عمري الباردة وفى نهار شمسي المحرقة،تزكرتك مع نظراتى الحائرة ودموع قلبي الدافئة،مع همسات نبضى الحالمة،تزكرتك مع أصوات الموسيقى،وخطواتك الرشيقة ونظراتك الخاطفة،تزكرتك مع سكون جسدك،وعيونك مثل قباب الصالحين ، وحتمآ لنا عودة وليت الاستاذ سيف الكامل لو يتزكر لنا زقاق ابوصليب حيث مكان بنك فيصل الاسلامى الحالي،كانت الخرطوم وانت داخلها من الناحية الجنوبية منزل الشيخ مصطفى الامين وبستان 2 ومقابر الكمنولث وقضيب السكة حديد ومستشفى الشعب والخرطوم والسكة حديد وكبري الحرية وفى اللفة صينية الجندى المجهول وكلية الطب والصيدلة وعيادة دكتور عبدة دهب ومستشفى الاذن والحنجرة وعيادة دكتور احمد حسب الرسول ومعمل دكتور محمد الفاتح ومستوصف دار الشفاء بتاع دكتور عبدالحميد صالح وفندق ميريديان وبداخله ديسكو مشهور وانت ماشى المركز الثقافى الامريكى وكمبونى والسكرية وعيادة دكتور زاكي الدين ودكتور حسن سيد احمد ويمينك سنما كلزيوم وشمالك دكتور شمسالدين بتاع الاشعة وميدان ابوجنزير مقبرة الشيخ رابح ابوجنزير ويمينك نادى ناصر الثقافى وتقطع الاشارة البنك الصناعي ومقابر الاتراك المنكلي ومحمود ابودان وشمال مدرسة الخرطوم شرق وبداخله مبنى التأهيل التربوي ومن بعد فندق فكتوريا و وكالة فكتوريا للسفر والسياحة وتتخطى الشارع وكالة الخرطوم للسفر والسياحة والخطوط المصرية و وكالة السياحة السودانية التى كان يملكها اللوا مجزوب البحاري ثم الت ملكيتها للعم ابوالقاسم شطيطة وقصادها مطعم اتنى المشهور بعصير منقته الملظلظ وفى الساحة المقابلة له مجموعة من البارات ويوجد باركينغ للسيارا يسع 300 سيارةوبعداك مكاتب شركة شل وبالشمال سنجر ولحدى ما تصل وزارة الخارجية والحدائق على جانبي الطريق حيث الورود والنوافير الى ان تصل لمبنى وزارة المالية.
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: Saifeldin Gibreel)
|
حبيبنا عمر عثمان
اضافاتك دايما لها معنى وبريق واصل,,, اما في ايام ما قبل الشريعة عااااااادي نصحي الصباح نلقي عربية دخلت سندوتش في هذا
الخور. ياتو شريعة حقة نميرى ولا شرحه!!!
وحسع العربات بتخش !!!ولا ما لاقيه الخور ذاتو!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: سيف الدولة كامل)
|
ياسيف الدين يا ابن جبريل : كتبت فابدعت!!!
الخرطوم ( بالليل) كان موديل زى نسائى (مبهرج) مدينة( مكتملة) اعمال الليل والنهار !!فى سوق الشمس تباع(الكريمات) وكل مستلزمات (التانق) !!!
الخرطوم كانت شهيرة بمحلات (المكوجية) علامة مميزه فى كل حيى !!!(استرونق بيزنس) ناس الخرطوم كانت بتجب !!النظافة والوجاهة والاناقة!!!
رواد السينما من البسطاء على عجلات ( الرالى ) (وروبن هود)( وفلبس) وبعضها مغطى بالقماش والأنوار الزينه!!والى الفسحات!!!والسينمات!!!وشارع الجمهورية!!
من اين اتى التتار!!!
| |
|
|
|
|
|
|
|
|
|
Re: [B]أولاد الخرطوم !!!!.[/B] (Re: احمد خليل)
|
| Quote: عجلات ( الرالى ) (وروبن هود)( وفلبس) |
والمرحوم أبو علي العجلاتي - صاحب اشهر محل لصيانة العجلات جنب محطة الغالي في شارع الديم. تمشي تزبط العجلة عندو وتغسله
وتجي التمرين بتاع الكورة ترفع التكالة وتقفل العجلة بالقفل وتشيل المفتاح زي السايق ليك لكزس.
| |
|
|
|
|
|
|
| |
احمد خليل
عبدالله كع
omer osman
محمد حيدر المشرف
سيف الدولة كامل
دينا خالد
معتز جعفر الحسن
أيمن الطيب
يوسف محمد يوسف
حيدر امين
أبوذر بابكر
ليلى عز الدين
عصام عبد الحفيظ
Saifeldin Gibreel
قلقو
فيس بوك
تويتر
انستقرام
يوتيوب
بنتيريست