|
|
 ليتني كنت حبيبة بوباي
|
في متابعة زهجانة لقناة سبيس تون، عدم موضوع ظاهر شديد، اكتشفت أن امرأة السيد بوباي امرأة ذكية محظوظة، سنين مضت وهي ما زالت تلك الشابة الصغيرة النحيفة الطويلة التي يتنافس عليها أثنان هما البطلان الوحيدان الموجودان في كل الحبكة الدرامية، بوباي، ومنافس بوباي، وحاولت أن اعرف ما هو اسم منافس بوباي، لم استطع
امرأة بوباي أمرأة ثقيلة الدم في نظري متغابية ومتشفعة (من عمل روحه شافع)
طووووويلة الساقين ممطوطة اليدين، دائرية وجه بأنف مميز في وسطه، شعرها سوداني كما يتراءي لي، ملامحها عموماً تعطيني انطباع انها افريقية رغم بياض بشرتها
لا اعرف ما هي مميزات امرأة بوباي التي تجعلها كل هذه السنين تتسامج وتتدلع دلع ما لايق عليها(دلع الفقارة البفقع المرراة) ، فتتممط وتتخفف صارخة بصوت رفيع حاد (بوووووباي أووووه بوووباي) ليكسر لها بوباي الدنيا، ينقذها بعد أن يأكل كيلو سبانخ لا طعم له ولا رائحة فقط لأجل خاطر عيون امرأة لا عيون لها فعلياً ، فلو دققتوا النظر لوجدتوا أن عيناها مجرد (شختتان)، لا معنى جمالي لهما يكفل لبوباي يوماً من الأيام أن يتغزل فيهما قائلاً (عويناتك ترع لولي وبحار ياقوت)
جعلتني عيون حبيبة بوباي ، والتي برضو لم أعرف اسمها رغم متابعتي لها قدر ليس بقليل من السنين، فسميتها من عندي (آسيا)، جعلتني عيون آسيا اتفكر في معنى الحب، وكيف أنه يجعل أحدهم يخوض المعارك الجسام معرضاً حياته لخطر محيق لاجل خاطر مجرد حبيبة قد تكون سمجة كإمرأة بوباي التي ترمي نفسها بنفسها في المخاطر ثم وللغرابة تكب الجرسة.
جعلتني الفكرة اتساءل، ما هو المقابل؟؟ ما السبب؟؟
عدة أسباب (منطقية) فكر فيها عقلي الما عندو موضوع في هذه اللحظة المتأخرة من الليل
أولاً: أنه لا بطلة أخرى في الصورة، لا امرأة أخرى في الصورة مما يزيد ثقة (آسيا) في نفسها فتتدلع وتتنخف (من خنف) منادية في الفارغة والمليانة بوباي، بعد أن توقع نفسها بغباء وعبط في مشاكل لا ذنب لبوباي فيها، فلو وجدت بطلة أخرى في الصورة، لكانت (اسيا) مشت على (عجين ما تلخبطوش) ، ولاكتشف بوباي أنه (شن غرده) في مشاكل الزولة الكلها كرعين دي.
لا بد أن شعورها أنها المرأة الوحيدة في الصورة جعلها مغرورة (شايفة حالها) فلمن غيرها سيكسر بوباي التلج؟؟!!
السبب الثاني، يشابه السبب الأول لكن من ناحية بوباي نفسه، فمن وجهة نظره، هي حبيبته التي فطر عليها، لا يرى غيرها ولا يفكر في سواها، فلو لم تكن هي كيف له أن يثبت بطولته ورجولته؟؟
(آٍسيا) سبب وجيه ليشعر بوباي برجولته، وهي ذكية تلعب على وتر حساس فتنفخه في الفاضية والمليانة (بوبوووباااااي النجدة،،، هللللللب بوووووببببببباي) فيفكر في نفسه أنه بات مان أو سوبر مان أو سبايدر مان أو أي مان كان، فتنتفخ أوداجه غروراً شاعراً بالفخر والانتصار لرجولته المزعومة.
والسبب الثالث، أنه متفق مع صديقه المنافس ليثبت بطولة أمام صديقته، يعني طابخنها سوا، لأني لا أظن أن (آسيا) تستاهل كل هذه الضجة بين بوباي ومنافسه الما عرفت ليه اسم ،،، هو شخص (مفتل) قوي الشكيمة والعزيمة، فللآن لم يمل، ولم يقتنع أن الزولة الشينة الممطوطة دي (آسيا) ما عايزاه ياخي، إنها متيمة ببوباي وكدوسه، إنها لا تنادي سوي بوباي، لماذا ما زال مصراً على حشر نفسه بين البصلة وقشرتها؟؟ إلا أن ...
يكون فعلا ًبحبها.. أو
بسبب أنها المرأة الوحيد المتوفرة حالياً .. أو
عنده صعوبات تعلم
الله ثم المؤلف أعلم
السبب الرابع، واضح أن مؤلف القصة والحبكة الدراميا كلها ، شخص منقرض، يفكر بعقلية بتاعت زماااان، عندما كانت تستنجد الحبيبة برجلها ، ( يا ابو مررررروووووة) فيرفع ابو مروة عراقيه في خشمه ويقلع براطيشه وبنجلغب،، في الموية ينقذ الحبيبة المزعومة، فتزغرد النساء (أيووووي يوووي يوووي) ويهلل الرجال (الله أكبر .. الله أكبر)، لن يجضمها أحدهم في ذاك الوقت مفروساً (أحييييي أنا الوداك تطمبجي في الموية شنو الساعة دي؟؟)
لو كان مؤلف الحبكة شخص بتاع الزمن ده، لاختلفت القصة بأن تجلس الحبيبة (مثلاً) في الماسنجر تتساءل (ما الشئ الغريب الذي يجعل الرجل بطل القصة يبحلق في الزفت ده أربعة وعشرين ساعة؟؟|) فتناديه (يا علي ،، أعني يا بوباي ،، يا بوباي) وسيكون صوتها غالباً قوياً راجل كده دون مياصة ( بوباي،، يا راجل ما تقوم تشغل لي الداهي ده؟؟) فيرد بوباي ( داهية تاخدك واليوم العرفتك فيه،، قومي سوي القراصة خلينا نتسمم نتعشى)
أو شئ من هذا القبيل
والسبب الخامس: من المرجح أن يكون بوباي عوير.
والسبب السادس: من المعقول أن آسيا ساوه ليهم عمل.
والسبب السابع، أن أكون فعلاً مهبوشة..
وإني بجد أتساءل يا جماعة، كثيراً ما تساءلت عن معنى الحب الحقيقي والتضحية، نكران الذات ورمي الروح في التهلكة لأجل خاطر روح أخرى والكلام الكباااار هذا
هل هذا الكلام موجود في أرض الواقع؟؟
اليس يحب الإنسان نفسه أكثر من أي نفس أخرى؟؟
أليس عندما يقول ( أموت أنا فداك) أليس في هذا أنانية وحب ذات وعدم رغبة في الشعور بألم الفراق؟؟
ألن (تدقسه) ثم تتزوج بغيره بعد سنة بالكتير وعندما تتذكره تتنهد بعمق (أمهههه،، الله يرحمه كان راجل طيب) ثم تضيف(النقوم نسوي العشا ابو محمد قرب يجي)؟؟
أو العكس صحيح
فيذكرها بالخير (أممممه،، الله يرحمها أصلها كانت زول آخرة، ثم ينشغل بصور المرشحات لمنصب الزوجة والزواج؟؟)
اليس الحب ده شي وهمي حتى في أفلام الكرتون؟؟
|
|
 
|
|
|
|
|
|
|
|
Re: ليتني كنت حبيبة بوباي (Re: بت قضيم)
|
تحياتى يا بت قضيم
ومعاها كل أغنيات شمس الصباح ده
حبيبة عمنا بوباى إسمها "اوليف" زيتونة يعنى
إسم الدلع من "اوليفيا" يمكن
بعدين الزول الشين المداقره فيها داك إسمه "بروتس"
بوباى ما خلا ليهو "سبانخ" حايمة ما اكلها فى درب اوليفيا
يعنى لو كل مره كان بديها "صفقة" واحدة بس من السبانخ دى
كانت لى هسه بقت قدر زكية ركريا بدل الكريعات الزى المقص ديل
أنا برضه والله قاعد يجينى إحساس بالتمنى طوالى إنى ليه ما اكون زى الكارتوون كاراكترز ديل
الزول لا يكبر ولا يشيب ولا يجيهو التهاب قولون عصبى ولا يقولو ليهو رسل المصاريف
صاحبى منهم "بقز بنى" الشقى أب دم خفيف
على الأقل بس الواحد ما يغير هدوموه، ياها لبسه واحدة والسلام
والسلام والتحية ليك تانى يا بت قضيم
| |
|
|
|
|
|
|
|
|
 Re: ليتني كنت حبيبة بوباي (Re: بت قضيم)
|
صباح الخير والحب والروعه يا بت قضيم
عدم موضوعك عينه طلع لينا الدرر
إتخيل لي إسمها زيتونه
غايتو نحن بنقول ليها كدهماعارفه دا إسمها ولا مخترعنو برانا
المهم
الحب يا غاليه من أسمى المشاعر الإنسانيه التي لا يختلف عليها إتنين
حتى ولو لم تتوج بالنهايات المميزه
وأنا يتخيل لى حتى لو راح أبو فلان لحالو أكيد أبو محمد بسد الفرقه ويستاهل هو أيضا أنو يتحبى
موضوعك مهضوم برجع ليك تاني أكيد
| |
|
|
|
|
|
|
|
|
|
Re: ليتني كنت حبيبة بوباي (Re: وجن)
|
بت قضيم
كيف اصبحتي ياختي
والله ناسك ديل كلهم انا ما شفتهم لكن قريت عدم موضوعك للاخر وعجبني
عن الحب ياغالية
هو من اجمل المشاعر اللي مفروض تكون بالانسان السليم والعاقل مش لعب يعني
صفة قلت في زمنا دا لكن هي موجودة لا محالة
لكن في بوباي دا
دا زول ما لاقي بديل
لكن لقوا بديل هو ومنافسو طوالي بمشوا عليهو وبالتالي يكونوا من سكان هذا الزمان
| |
|
|
|
|
|
|
|
|
|
Re: ليتني كنت حبيبة بوباي (Re: بت قضيم)
|
عاد يا ختي حسب عقلية زماااان..
النسوان ووكتين يزغردن ايووووووووووووي...ايوووووووووووي...يًبًبًيايييه(الاخيرة دي من عندي هُُوادة)
الرجال كانوا الوكت داك بجوا ناطين فوق الشوك ولا خايضين الطين عشان يطفرجوا بالابهام والاوسط
ان أبِشْرَن ابشرن..
لذا لزم التنويه ونرجو الالتزام بوحدة المكون الثقافي والزماني وان اختلف المكان..(دردقي وش ضاحك )------
الهترشة لكن ما عندك..
نقد رائع وقلم سنين الله (يحفظ التبلدي)
| |
|
|
|
|
|
|
|
|
|
Re: ليتني كنت حبيبة بوباي (Re: حليمة محمد عبد الرحمن)
|
بت قضيم بت أمي حبابك عشرة والشوق بحور
كيتاً في البطيخاب ح أكتب بالأزرق الجميل
بت قضيم دهشتي مش في (آسيا) مرة (باباي)!!!! الدهشة فيكي إنتي بعد السنوات الطويلة تغيبي وترجعي بت قضيم زاتها بنفس هترشتهاطابة سفنجاتها تحت أباطها ونفس الرجول المكتحةونفس حبات العرق فوق نخرتك تقولي راجعة من المزاد سوق الثلاثاء.
خالص الود
| |
|
|
|
|
|
|
|
|
|
Re: ليتني كنت حبيبة بوباي (Re: بت قضيم)
|
Quote: محمد صباح الخير
ما تزعل يا محمد، ده بس تشابه اسماء
وما تنسى كمان آسيا امرأة فرعون المرأة الفاضلة
وعموما ًيخلي ليك ست الكل ونحب على راسها وأساساً طلع اسمها زيتونة
تحياتي |
بت قضيم انت بزعلو منك ياخ
إنت أمنقة زول في المنبر ده ياخي
__________________________________________
الحنك ده مايغرك انا بقولو لي اي زول 
| |
|
|
|
|
|
|
|
|
|
Re: ليتني كنت حبيبة بوباي (Re: بت قضيم)
|
بت قضيم سلامات....
الغريبه انا يومداك قاعده اتفرج فى بوباي مع ولدى باستكانه شديده وبفكر فى أفكار
مشابهه واندهشت لمن شفت بوستيك ده.....
بس طبعا انا فكرت فى منحى آخر...انو والله قصة حب اوليف وبوباي دي فعلا قصة حب متقدمه لغت تماما الاعتماد على المظهر وعفت عن فيزياء الجسد وسمت الى حيث صعب الوصول فى هذا الزمن....
يعنى بوباي ده...لا قال والله كريعاتها القادين عربي ديل ما لازماتنى ...
لا قال لأ دى ما بتعرف تعمل نيو لوك...وما ارتبط فى ذهنو نهائي حبو ليها بشكلها المتهالك.....
وهى زاتها...لا قالت وشو معفص لا ستايلو بلدى.....بل رفضت بلوتس اللى هو فى الحقيقه أوجه من بوباي...وسمين ومضقلم وفضلت بطلها المغوار...لكن رغم فكرهم التقدمى ده ومناقضتهم
لزمن يقوم على ثقافة الجمال وعمليات التجميل....ومقاييس للجمال يضعها مجتمع ذكورى
بمفاهيم متخلفه عن المرأه...رغم كده...الا انهم حقيقه عندهم فكره غاظتنى شديد
وهى فكرة الراجل البقوم ويتدردق ويهب زى الصاروخ يدافع عن المره الكوركت يا ابو مروهههه.......يعنى الزمن ده البنيات بقن كاراتيه وتايكندو وأساليب الدفاع عن النفس
المتطوره وكده.....
وبماا نو قصتهم دى تحمل هذا التناقض اذا تفسيرك المنطقى انو بوباي بحب اوليف لأنها المره
الوحيده فى القصه بيصبح هو الغالب وليس لأنو بوباي واحد فكرو تقدمى!!!!!!
مما يرجعنا الى خانة ما قبل الصفر .......
...غايتو مما يثلج صدري أحيانا انو أكيد-- رغم الندره-- فى رجال بفكرو بطريقة بوباي فى
اختيارو لأوليف التى تفتقر لأبسط مقاييس الجمال حقت عالمنا ده...وإلا كان ناس نحنا ديل ضربتنا البوره!!!!!!...
بت قضيم...يا صديقتى....أكثر ما يعجبنى فى قلمك الساخر تحفيزو لتفكير وأفكار جاده بكل
بساطة.....
محبتى الأكيده...
| |
|
|
|
|
|
|
|
|
|
Re: ليتني كنت حبيبة بوباي (Re: بت قضيم)
|
| Quote: ولاكتشف بوباي أنه (شن غرده) في مشاكل الزولة الكلها كرعين دي. |
من كرعين زيتونة لي كرعين ندا القلعة .. يا قلب لا تحزن.
بت قضيم .. حكايتك مع الكرعين شنو؟
| |
|
|
|
|
|
|
|
|
|
Re: ليتني كنت حبيبة بوباي (Re: Hussein Mallasi)
|
اختنا بت قضيم
نديك اغنية المقدمة
باباي رجل البحار عاد بعد طول انتظار
عاد مع زيتونة وبلوتو المكار باباي رجل البحار
ترم ترم ترمتو كل الاولاد يحبوه
ترم ترم ترمتا طيب لا يؤذي احدا
باباي رجل البحار
باباي باباي
باباي
بابا ي
بابا ي
ياستنا ياختي النفس دي في ناس بيبذلوها رخيصة في سبيل الوطن الدين الاخت الام العمة الخالة الحبيبة
ان الله اشترى من المؤمنين انفسهم واموالهم بان لهم الجنة
بعدين حب النفس عندنا مزلة يقول ليك ده بيحب نفسو بس فهو غير مرغوب فيهو زي مابيقولوا ليك ده اخو اخوان والفي جيبو ماحقو خسوسا نحن السودانيون قلبنا حار ومابنرضى الحقاره وممكن عشان حاجة بسيطة نروح شمار في مرقة
ارقدي عافية
زاتوووو
| |
|
|
|
|
|
|
|
|
|
Re: ليتني كنت حبيبة بوباي (Re: ALZOLZATOO)
|
تعرفي يا شيراز
فكرة بوباي تحبط أفكار تسويق الجمال المنتشرة في العالم اليومين ديل
صديقاتي وقريباتي وجاراتي كل واحده فيهم نافخة جزء فيها
شفايف، وصدور، وقعور، ورجول، وهلم جرا
وتجي مرة بوباي بكل استفزاز تنفي فكرة المرأة الجميلة
بس بيني وبينك، وبجدية شوية، الرجل نعم تلفته المرأة الجميلة
يبحلق فيها في التلفزيون لممممما تجيه الموية البيضا، ثم يزهد
الرجل يحب المرأة المريحة، لو كانت المرأة مريحة فشينة كريهة سمينة معصعصة لا تهمه
ليست المشكلة نظرة الرجل للمرأة، بل نظرة المرآة لنفسها هي الإشكال
طبعاً أنا عيوني دخلت في بعض ونعسااااااااااانة وما عارفة كلامي ده راكب عدله والا زي كلام الطير في الباقير
سلمتي يا صديقة
يا مريحة
وتبري من الشناة إن شاء الله
| |
|
|
|
|
|
|
|
|
|
Re: ليتني كنت حبيبة بوباي (Re: بت قضيم)
|
يا أبو العزائم
يبدو جلياً أن المشكلة ما مني، من العلي
يا ثغيل
النبي كان ما علقت يا حسين
زاتو
حتى في الأدعية، يسبق الدعاء للنفس قبل الغير
كأن تقول (عافانا الله وشفاكم)
أو
الله يغنينا ويغنيكم
مسألة حب النفس والتي أصبحت مرتبطة بالانانية،فكرة مغلوطة
فالله يأمرنا بحب النفس، فعندما تحب نفسك تحب أن تحافظ عليها، وتحب أن تدخلها الجنة
يعني مثلاً ما تدخن سجاير، ولا تعصي الله خوفاً من نار جهنم
فكرة النار نفسها تسوق لفكرة حب النفس، أو خليني أقول، فكرة الألم تسوق لفكرة حب النفس، يعني صعب أن تتحمل الآلم ، والوجع مثلاً، ولو توجع غيرك قد تشعر معه بالألم لكن استحاله تحمل نفس شعوره، لذلك نفسك هي دائماً الأولى
والأولى
الأولى يعني رقم واحد والأولى يعني الأحق
علشان كده - ربما- الكلمة الفصل بيننا ومعصية الله هي التخويف من الألم
ويوم القيامة، يوم يفر المرء من أخيه، وأمه وأبيه وصاحبته وبنيه، لكل امرء منهم يومئذ شأن يغنيه
نفسك نفسك يعني
هذه الفكرة منفصلة تماماً عن فكرة الأنانية، أن تحب نفسك فقط، هي الأنانية، لكن حب نفسك أولاً هو الأصل ثم حب الدنيا وما فيها بعد ذلك،
والإيثار، والتضحية، يتطلب حب النفس أولاً، يعني تكون بتحب روحك شدييييييييييد، ومع ذلك تفضل الوطن عليها، أو الحبيبة أو غيره
لو أن حب الوطن طغى على حبك لنفسك يبقى وين التضحية؟؟؟
الأمومة وحدها (وهي ليست غريزة على فكرة كما يشاع) الأمومة وحدها هي التي حباها الله بمقدرة حب الطفل أو الأبن أكثر من حب النفس، ولوقت محدود، ثم يبدأ الوضع في العودة للصورة الطبيعية وهي حب النفس أولاً.
وصدقني يا زاتو
لما تحب نفسك حتحب الدنيا وتكره تعمل فيها شر
تخيل معظم الناس الشريرة تكره نفسها أولاً لذلك تعيث في الأرض فساداً
ومعظم النفوس الشريرة لو أحبت نفسها حتنقلب بقدرة قادر إلى نفوس مطيعة طيبة خيرة
وممكن جداً بكرة الصباح أجي الغي كوووووووول الكلام الطرشته هنا الآن لاني بجد مش مركزة
تخيل في بيتنا في فار؟؟!!
تخيل؟؟؟
سلامكم
| |
|
|
|
|
|
|
|
|
|
Re: ليتني كنت حبيبة بوباي (Re: بت قضيم)
|
Popeye & Olive
...
...
you know I hate Olive. What the heck does Popeye see in her? He's like the original badass and he is stuck with this whiny voiced scarecrow who is good for nothing but getting kidnapped. He breaks into the thieves lair and jumps on the leader's dining table and orders him to give back all the things he stole, and then beats the snot out of all forty thieves and keeps count of the ones he's defeated just to rescue some emaciated and unattractive circus freak;
ياخ ده بوست انتريستن جداً ،اول ماقريت البوست قت في سري ياريتني بوباي زاتو .
ياخ سبانخ وعضلات وطريقة كلام يونيك جداً وعضلات وتاتو وقصص مسلية وزيتونة كمان ، بعداك طوالي يا بت قضيم وماطالباني حليفة مشيت ليك يوتيوب شفت ليك اجمل الفايلات من البطل الخيالي الكوميدي الفظيع ده ، ياخ ده حاجة لذيذة خلاس ، كدي هاك شوفي الفايل ده ، بوباي وعلي بابا ، اي علي بابا الواحد ده بتاع الاربعين حرامي " في واحد صاحبنا مصر علي انو علي بابا بحاوي ، من قبائل البجة،فال عشان الخنجر والسديرية قال :) " ، لكن بالجد موش المخرجين والمؤلفين بتاعين الكرتون ديل ببالغوا ، جابو البحار من وين وين لي علي بابا عشان يعملو حلقة ، ابو الحسن ، ياخ ديل ناس بحترمو اطفالهم احترام شديد خلاص ، اها هاك الفايل ووريني الفيد باك :
http://http://www.youtube.com/watch?v=I6-v3Wj23Qc
ودخ كمان الويب صايد الرسمي فوق البيعة
www.popeye.com
زشكرا علي البوست اللطيف
| |
|
|
|
|
|
|
|
|
|
Re: ليتني كنت حبيبة بوباي (Re: محمد الامين احمد)
|
سلام ابراهيم
لولا اختلاف الأراء لبارت السلع
وعموماً أنا سعيدة أن لفتنا نظرك لهذا النوع من الحب المنقرض، حب بوباي لزيتونة
حاولت فتح الرابط وما اشتغل معاي
يبدو أن جهازي اسلاموي عندو رأي في اليوتيوب
والله أعلم
شكرًاً للمشاركة والتعقيب
شكراً خالص
كل الود
| |
|
|
|
|
|
|
| |
بت قضيم
أبوذر بابكر
وجن
SHIBKA
حليمة محمد عبد الرحمن
Habib_bldo
ALazhary2
Shiraz Abdelhai
محمد أبوالعزائم أبوالريش
Hussein Mallasi
ALZOLZATOO
Ibrahim Algrefwi
محمد الامين احمد
فيس بوك
تويتر
انستقرام
يوتيوب
بنتيريست