كتب الكاتب الفاتح جبرا المتوفرة بمعرض الدوحة
|
|
 هل التؤام بيتقلبوا كدايس ؟
|
في جلسة اسرية مع ام التومات وابن اخيها وخلال الدردشة ذكر ابن اخ ام التومات انهم عند زيارتهم للشمالية في اجازة من الاجازات السنوية سمعوا صراخ التومات وعند الذهاب اليم تبين وجود حروق في اسفل قدميهم وذكر الذاكر بتاييد من والد التومات ان الحروق صحيحة وعند سؤال التومات ذكرن بان فلانة قامت باحراقنهم بي كمشة اثناء تحميرها للسمك لوجبة العشاء .
ذكرت ام التومات ان السيدة التي قامت باحراق بناتها اكدت ذلك بانه خلال تحميرها للسمك اتت قطتان وظلت القطتين تتحاومان حول السمك مما اثار غضب صاحبة المنزول ومسكت الكمشة وقامت بتش الكديستين
كنت خلال الجلسة اضحك بشدة وكلما كثرت من الضحك اتوني بامثال كثيرة عن تومات او تيمان انقلبوا الى كدايس ، مما ادى في النهاية الى انني مفتري ومابصدق كلامهم .
اها نسال السؤال ده للناس المثقفاتية والعندهم تيمان
في توم في البورد ده انقلب كديس قبل كده
تحياتي
زاتوووو
|
|
 
|
|
|
|
|
|
|
 Re: هل التؤام بيتقلبوا كدايس ؟ (Re: ALZOLZATOO)
|
| Quote: في توم في البورد ده انقلب كديس قبل كده |
..
أيوة أنا القدامك دا ..
قبل اسبوعين كدا .. ما بتذكر القلبه كانت في شكل شنو..
لكن
بتذكر اني اتقلبته نص ساعة كدا وتاني رجعت زيكم واحد كدا ..
عندي فكرة الاسبوع الجاي يا معلم امشي الأمارات في شكل كديسة سياحي .. عندي مشوار مهم جدا بيحتاج مهارات كديسية..
بالمناسبة أعمل حسابك يا دكتور .. الليلة الساعة اطناشر كان جاك كديس شايل ليهو علم ازرق بي ابيض .. هذا هو شخصي الضعيف .. اتعامل معانا بي حنية ما تكب فينا زيت يا موية نار ..
نااااو 
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: عبدالكريم الامين احمد)
|
حبيبنا كيكي
ياخي الناس ديل جادين والله يحلفوا بي الله انو بناتها اتقلبوا كدايس بالليل ومشوا اتحاوموا حولاين السمك واخدو ليهم تشه والحروق ظاهرة عيانا بيانا .
طبعا اخوك الشغلانة دي ماراكبه ليهو في راسو لكن حكو لي اكتر من عشرة حالات كديسية لمن قربت اصدق
بالنسبة لي صاحبك الكديس تامبا ده ربنا اليوم ح يفضحوا زي مابيفضح الكدايس بالليل كااااااااااك
تحياتي
زاتوووو
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: العوض المسلمي)
|
حبيبنا العوض
السؤال مرفوع للاخوة البعاعيت
لكن من وجهة نظري انا لا اعتقد انو زول ردموهو وكتمو نفسوا بالتراب والحجار يقوم تاني لو فيهو باقي روح ح تطلع من السخانة كاااااااااك ياخي نحن قاعدين في الهواء الطلق ومسخنين تقول لي بعاتي
لكن تمبس اليوم ح يقوم سداري ( يقوم سداري هو سواقة العجلة واقفة لزيادة سرعة الجري )
تحياتي العميقة وشكرا على هدية الجمعة
زاتووووو
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: tmbis)
|
ياتامبا
زمان كان عندنا في الحلة واحد اسمو التوم كديس لكن ماعارف سر الاسم شنو
اما بخصوص الليلة يامعلم ما ح نديكم فرصة تتقلبوا كدايس ح نرشكم والشمس فوووق قبل ما تضلم
والليلة ليلة الشياطين الحمر انت بس قولوا بسم الله وبلوا راسكم
اما بخصوص مشوارك بتاع الامارات امشيهو حركة في شكل وردة ولو مصر تتقلب كديس اتقلب بعد الساعة 12 مساء وامشي ديسكو سايكلون ويورك والقراش زاتوووو الحركات الكديسية بتنفع في الحتات دي وعيونك بتكون خضر بتلائم مع الكدايس الروسية كااااااااااااااااك
تحياتي
زاتوووو
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: وجن)
|
العزيزة وجن
كدايس السعودية ما رطبين لكن
الكديسة من اقرب برميل زبالة بتلاقي ليها خمسة سته دجاجات
لكن عندنا في جماعة اخر مرة شافوا الجداد في كتاب المطالعة بتاع سنة رابعة ابتدائي
اها زي ده لو ربنا يوم اكرموا بي جداد تتخيلي منظرو مع الكديس يكون شنو كاااااااك
تحياتي
زاتوووو
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: tmbis)
|
تحياتى
هناك شبه إجماع عند كثير من الشعوب بأن التوائم يتقاسمون الآلام والأحاسيس كما أنهم يتفاهمون بطرق غير معلومة.
وفي السودان هناك بعض المعتقدات الخاصة بالتوأم والتي تحولت فيما بعد إلى عادة اجتماعية فالنوير يعتقدون أن التوأم ما هو إلا طائر ولأن الطيور نفسها مقدسة لديهم وهي ذات أجنحة تطير بالقرب من الإله “كوث نهال” لذلك فإنهم يلقون بالتوأم المتوفى على الشجرة خاصة أن الشجر مسكن الطيور، كما يعتقد البعض أن التوائم يتحولون إلى قطط ليلا.
في التراث النوبي في شمال السودان يتميز التوأم بوضع خاص وتسعى الأسرة النوبية للمحافظة عليه بشدة ويعتقدون أن الموت يهدد التوأم دائما ويقولون إن التوأم نصف روح ولذلك فإنهم لا يندهشون عند موت أحدهم ويخافون على مصير الذكر أكثر من الأنثى لاعتقادهم أن الذكر مهدد دائما بالموت حتى وإن كانت الأنثى أضعف منه جسمانيا.
ويعتقد النوبيون أن التوائم يتحولون إلى قطط في الليل يتجولون ثم يعودون في الصباح الباكر إلى منازلهم حيث تعود إلى صورة أطفال ويؤكدون أن ذلك يتم أثناء الليل فقط، ولا يقتصر التحول عند النوبيين على القطط بل يعتقدون أن التوائم يتحولون إلى ذباب، وهنالك حكايات عدة عن أسر لم يستيقظ ولدها التوأم من النوم لعدة أيام فتضطر الأسرة لإبلاغ أهل القرية بضرورة فتح الأبواب والمنازل والمخازن وكذلك فتح علب العسل، وتقول الحكايات إن أحد التجار كان قد أقفل علبة العسل على ذبابة وعندما فتحها وطارت الذبابة استيقظ الولد النائم وقد يموت التوأم في أحداث في هذا القبيل.
وتحرص المرأة النوبية عند طبخها لحما أو سمكا أن تعطي منها للتوأم، ومن الطريف أن بعض الأسر قد تذهب لتشكي التوأم لدى أهله زاعمين أنه قد أتى في الليل كقط وأكل اللحم أو أراق الزيت وقد تحدث مشاجرات بين الأسرتين، ولكن أسرة التوأم غالبا ما تدافع عن ولدها وتتهم الأسرة الأخرى بأنها قصرت في إعطاء التوأم بعض الطعام عند رؤيته.
ولهذا نلاحظ حتى عند غير النوبيين الاهتمام بأن يأكل التوأم قبل الأطفال الآخرين ويحذر الناس من حرمان التوأم من السمك المحمر أو اللحم.
وقد يحدث شجار بين الأسر بسبب التوأم خاصة عندما يدعي التوأم أنه قد أصيب في الليل بضربة من فلان أو أن فلانة قد أحرقته بالزيت الحار عندما اقترب منها وهي تطبخ لحما أو سمكا، لذلك فإن أي جرح أو حرق لا يعرف سببه عند التوأم قد ينسب إلى مثل هذه الأفعال ولهذا يحذر النوبيون من ضرب القطط في الليل. ويقول النوبيون إن التوائم ينامون مدة طويلة وإنهم يحرصون على ألا يتم إيقاظهم اعتقادا في أن أرواحهم لا تزال خارج الأبدان في رحلة بعيدة ويخافون من أن يضاروا، ويتردد النوبيون في دفن التوأم الميت حيث يعتقد أنه لا يزال حيا وأن روحه مسافرة، ويعتقد النوبيون أيضا أن التوأم يمكن أن يتحول إلى حجر لحماية نفسه.
أما قبائل الجعليين والصليحاب والحوازمة والبديرية فإنهم يتفقون على أن التوائم يتحولون إلى قطط أو ثعابين أو كما يقول الحوازمة والبديرية فإن التوائم تتحول إلى عقارب ولكنهم يتفقون مع النوبيين في ضعف بنية التوائم إلى جانب الاتفاق حول أن التحول قد يحدث جسدا وروحا أو روحا فقط كما يتفقون على أنه من غير المستحب إيقاظ التوأم النائم بعنف.
أما قبيلة البويا في جنوب السودان بالقرب من جبال النوبة غرب محافظة كبويتا، فإنهم يتشاءمون من صحبة والد التوأم ورجال البويا لا يسمحون لوالد التوأم بمغادرة المنزل إلا بعد مضي حوالي شهر ويعتقدون أن مصاحبته تجلب لهم الكارثة أو قد يصاب هو نفسه بمكروه أو قد يموت لذلك يقاومون محاولته للخروج معهم إلى الصيد ويرون أنه يجب على والد التوأم أن يبقى مع زوجته.
ولقبيلة الدينكا أكبر القبائل في جنوب السودان- اعتقاد حول مولد التوأم إذ على والد التوأم أن يذبح عجلا وإلا سيفقد التوأمين وإن لم يكن قادرا فإنه يلبس سوارا على معصمه الأيسر وإذا مضت سبعة أيام ولم يستطع ذبح العجل لضيق ذات اليد عليه أن يحول السوار إلى اليد اليمنى بدلا من اليسرى وهكذا وبعد مضي سبعة أيام يحول السوار إلى الرقبة ثم إلى الأرجل ولن يفارقه السوار إلا إذا ذبح الفداء، والدينكا تقول إن التوأم هو في الحقيقة طائر ولا يتحدثون عن التوائم بوصفهم بشرا بل طيورا لذلك نجدهم يجعلونه على الشجرة إذا مات تماما كالنوير الذين يرون أن التوائم يولدون منذ الأزل سواء لدى الإنسان أو الحيوان.
ويعمد النوبيون إلى وضع الدوكة “صاج لعواسة الكسرة” على ظهور التوائم وهم نيام خوفا من أن يتحولوا إلى قطط كما يزعمون. أما في حالة وفاة أحد التوأمين فتربط للحي منهم شعرة من ذيل الحصان على رجله اعتقادا في أن ذلك يقيه من أن يجره أخوه، أي يأتي فيأخذه إلى الموت.
“الخليج” حملت تلك الرؤى وجلست إلى استشاري العقم والإخصاب الخارجي بمركز الخرطوم للخصوبة الدكتور يعقوب محمد عبد الماجد، الذي أوضح أولا أن الإحصائيات الطبية الدولية تشير إلى أن نسبة ولادة التوائم من الحمل الطبيعي هي “1” في كل “80” ولادة والحمل الثلاثي “1” في كل “6400” ولادة وأن أعلى نسبة ولادة للتوائم في نيجيريا إذ تبلغ 45 في كل ألف ولادة وهي أعلى نسبة في العالم، حيث إن نسبة التوائم عند قبيلة اليوربا في غرب نيجيريا تصل إلى 3% من مجموعة مواليد القبيلة، ويرجع البعض ذلك إلى أكلهم “اليام” ويرجح أن تناول “اليام” بكميات كبيرة يؤدي إلى زيادة الهرمون الذي يساعد في أن المرأة تطلق أكثر من بويضة واحدة.
أما في الشرق الأقصى فيراوح معدل التوائم بين 2و3 في كل ألف ولادة، وفي أوروبا 12 في كل ألف ولادة، وهذا لا يعني أن المجتمعات الأفريقية أكثر خصوبة وإنما يعود الأمر لأسباب وراثية أو بيئية أو نتيجة انقسامات بيولوجية تحكم انقسام البويضة الملقحة في مراحلها الأولى، ومعروف أن التوائم المتشابهة هي الأكثر شيوعا في العالم وقد تصل نسبتهم إلى 90% من عدد التوائم وقد يكونان ذكرا وأنثى أو ذكرين أو انثيين وهما نتاج بويضة واحدة انقسمت في مراحلها الأولى إلى نصفين متساويين ومتشابهين في كل الخصائص. وفي العادة يتم نضوج بويضتين ويتم تخصيبهما بحيوانين منويين فينتج عنهما توأمين غير متشابهين.
وحول أبرز مشاكل حمل التوأم أو الثلاثي، يضيف عبد الماجد إن أبرز تلك المشاكل هي حدوث الولادة المبكرة قبل أن يكتمل نمو الجنين في رحم الأم تماما فيعاني المولود صعوبة في التنفس بسبب عدم اكتمال نمو الرئتين وفي هذه الحالة يحتاجون إلى رعاية خاصة في وحدة العناية الطبية الفائقة للأطفال حديثي الولادة. وأن نسبة حدوث الولادة المبكرة في الحمل الطبيعي تصل إلى 40% في حالة التوأم وترتفع إلى 70% في حالة الحمل
(...) بتعنى عدم معرفه بالكاتب
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: وليد الطيب قسم السيد)
|
ايوا جيتني براك في تخصصي يا الزول زاتو بس الليله يحلك الحل بله.... انت عارف انا ابوي توم ...مره الحاج حتوهو مع الحاجة قرض بس بعدما ما نومنا نشوف ليك كديس اسود و عندو شنبات بيض .... المهم الكديس دا ازعجني شديد يعني جاب كثافتي .... بس لقيت ليك اقرب حجر و ناولتهو ليك و كان في العين .... بكره الصباح لقيت ليك اابوي عينه اليمين بتسيل موية يا الهي انا قلعت عين ابوي .... المهم وديناهو الحكيم و عملوا ليهو عملية موية بيضا و الحكماء بيقولو ليها الجلاكومة ....و من يومها داك انا بقيت ما بضرب اي كديس مهما فعل....
يلا انا بجيك بعد شوية لقصة القلب دي
فتك بعافية
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: الزنجي)
|
حبيبنا الزنجي
ياخ في ناس من وراء الخرافات دي عايشين في امن وامان .
اكيد حبوبتك الله يرحمها حية او ميته عندها راي في الشغلانة دي بعدين ممكن الحب يكون لله في لله كده في ناس بتقدر التيمان من اجل التيمان ويسمونهم حسن وحسين تيمنا بابناء على بن ابي طالب
كان تسالوها من سبب التهميش للفرد كااااااااااااك
تحياتي
زاتوووو
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: حافظ حسن ابراهيم)
|
العزيز حافظ التوم
الرجل الذي قلع عين اباه من حجار صديقة
لكن بيني وبينك كده انت ماكنت عارفو هههههههههههه
طيب ما وراكم السبب بتاع الموية دي شنو ؟
بعدين الحاجة شعورها شنو لمن عرفت الحاج اتقلب كديس وجاي ليها كفلس دومستك ( ده طبعا الاسم العلمي لي فصائل القطط )
كده والله شوقتنا نسمع منك باقي القصة
تحياتي ليك والوالدين
زاتوووو
| |
|
|
|
|
|
|
|
|
|
Re: هل التؤام بيتقلبوا كدايس ؟ (Re: ALZOLZATOO)
|
الزول زاتو
Quote: العزيز حافظ التوم
الرجل الذي قلع عين اباه من حجار صديقة
لكن بيني وبينك كده انت ماكنت عارفو هههههههههههه
طيب ما وراكم السبب بتاع الموية دي شنو ؟
بعدين الحاجة شعورها شنو لمن عرفت الحاج اتقلب كديس وجاي ليها كفلس دومستك ( ده طبعا الاسم العلمي لي فصائل القطط )
كده والله شوقتنا نسمع منك باقي القصة
تحياتي ليك والوالدين
زاتوووو |
حافظ التوم ....يا سلام والله حافظ التوم دا اسم جميل ...الواحد يفكر فيهو بشكل جادي و يغير الاوراق الثبوتية كلها
طبعاً يا الزول ما قال السبب الحقيقي بس قال (طلعت عشان اصلي الصبح بس القناية ضربتني في عيني)
قناية حي انا ما قلتو نوبة ...التعليق دا في سري طبعاً....لكن من يوم القناية التوم دا بقي يشوفني عشرة عشرة .... بس لو قال اي حاجة الموضوع بتفتا
ايوا اوريك شعور الحاجة .... مره بتناقشوا و ما ختو الكورة وطا ...التوم قام اصدر صوت ما بشبه اي صوت بشري لكن يعني قريب لصوت الفهد ...و تحت تحت كدا صوت كديس ربيان ....الحاجة قامت قالت ليهو خلاص داير تتقلب؟
بعدين الحاجة وقت تكون الامور بينها و التوم سمن علي عسل تقول لينا: هوي يا اولاد ما تزعلوا ابوكم دا ...ابوكم دا توم...
توم و لا كد.... ما تجي من الاخر يا حاجة
انت عارف يا الزول من دربي دا حاضرب لابوي و اقولها
الوو معاي التوم؟
والله يا الزول التوم دا لو عرف الكلام دا... والله بكره بكري يعمل ليكم البورد دا اسود و يكتب بوست كبير (سودانيز اون لاين تنعي حافظ التوم, قصدي حافظ حسن)
بجيك راجع لموضوع القلبة
| |
|
|
|
|
|
|
| |
ALZOLZATOO
tmbis
عبدالكريم الامين احمد
العوض المسلمي
وجن
وليد الطيب قسم السيد
حافظ حسن ابراهيم
إبراهيم عبد الحليم
الزنجي
فيس بوك
تويتر
انستقرام
يوتيوب
بنتيريست