سلفاكير: الوحدة بشكلها الحالي غير مرغوبٍ فيها

Quote: شيئ طبيعي أن يكون هذا رأيه ، لأنها الحقيقه . فما الذي يجعله يصوت للوحده وهو يرى ويسمع كل الذي يجري في السودان. أنا واحد من الناس مقتنع بأن الشمال ليس مؤهلا ولا مستعدا لدفع إستحقاقات الوحده الحقيقيه . ومقتنع بأن الجنوب سينفصل لا محاله بسبب ممارسات السياسيين الشماليين الإنتهازيه التي أشعلت الحرب منذ البدايه بذات الممارسات . و أراهم الأن بدل ترك الجنوبيين ليقرروا مصيرهم بسلام يلعبون بالنار ويحاولون جر الجنوب وأهله للحرب مره أخرى . ولكن عليهم أن يعلموا أن الحرب هذه المره لن تكون كسابقاتها ، فالكيان الشمالي حصل فيه من التآكل ما يجعله سيدفع ثمنا باهضا لو قدر للحرب أن تشتعل مره أخرى . كم أتمنى من الحكومه أن تعلن فشلها في الجنوب وتساعد حكومه الجنوب لبناء مؤسساتها لتنعم بجوار صحي . كم أتمنى من الحكومه أن تعمل بجد وصدق للحفاظ على ما سيتبقى من السودان . أما إذا ما إستمرت سياساتها الحاليه فقطعا سنرى الكثير من الخراب والدمار لن ينجو منه أحد. والله يكضب الشينه

Quote: ما دام المح فإن الامل لازال قائما في الوحدة

Quote: بالله يا العوض أذكر لينا تلاتة اربعة حاجات كدة الحكومة عاملاها لتشجيع الانفصال !!!.. ناس مدينهم حكم الجنوب حصريآ، ونصف حكم الشمال، ونصف ايراد البترول ـ يعني بعد ده مفروض يعملوا ليهم شنو؟.. أم أن كلامك ده من باب معارضة ساي لله ؟؟!!..

Quote: أخي العوض تحياتي .. الأنا شايفه إنو الظروف جاطت وتمخضت عن واقع جديد بعد إتفاق نيفاشا الذي يعتبر ميلآستونآ في مسيرة البلاد .. بخيرها بشرها ، المهم إنو هناك واقع جلب شئ من الاستقرار النسبي حقو نحن نحافظ عليه ـ لأنك تعلم بأن عالم السياسة في دولنا المهترئة هذه عالم هش وضعيف وقابل للإنزلاق في الفوضي بكل سهولة .. فما دام الله جاب لينا طرف خيط سلام مفروض نحافظ عليه وندعمه حتي يعبر لبر آمن بدلآ عن مثل تلك الدعاوي الفوضوية لدك كل شئ وهدم كل شئ لنبدأ من اللا شئ وبدون اساس ورؤية واضحة !!! .. الناس من البداية ارتضت اتفاقية السلام بكل استحقاقاتها التي جعلت المؤتمر الوطني والحركة الشعبية ينفردان بالسلطة مقابل سلام هش .. خلاص طالما السياسيين ارتضوا ذلك عليهم بتحمل تبعاته .. يعني اسه القعاد في كراسي الانتظار بقي حار؟؟ .. أسه شايف ليك مواطن عادي جايب خبر حكومة وكراسي حكومة ووزارة؟؟ .. الناس الغلبهم الصبر ودايرين يفرتقوها ويدكوها هم السياسيين الطامعين في الكراسي وغلبهم الصبر .. وديل مستعدين يخلوا البلد تجوط ويحرضوا الناس علي الفوضي عشان يجوا بكرة يبقوا وزراء من غير انتخاب .. يعني أنا مثلآ مافاهم زي علي محمود حسنين وفاروق ابوعيسي ديل فهمهم شنو؟؟ .. ناس ما عندهم أي وزن جماهيري عاوزين يحرضوا الجماهير للشغب عشان سيادتهم يجوا حكام واللا شنو يعني ؟ .. يعني هم منتظرين المؤتمر الوطني والحركة الشعبية يتنازلوا ليهم عن الحكم ويخلوا برامجمهم ويفكوا البلد عكس الهواء ويمشوا بيوتهم واللا كيف؟؟ .. خلي الحركة الشعبية تستقيل من الحكومة وتقول ما دايرة نيفاشا وخلاص الاتفاقية فرتقت وبعد داك خلينا نشوف الجماهير حتعمل شنو .. لكين يجوك نفرين تلاتة يقعدوا يحرضوا الناس لإسقاط الحكومة ولإبطال الاتفاقات وما يكون عندهم أي بديل منطقي يجي بإنتخاب مقنع سوي الشعارات المطاطة والهتافات الفضفاضة ، ده يكون لعب بمصائر الجماهير .. حكاية استعلاء الذكرتها تاني دي ، أنا عاوز أكرر تاني: إنو الاستعلاء أساسآ ورثة ابليسية ما عندهاعلاقة بسياسة وحكومة .. دي مشكلة اجتماعية بين الناس وموجودة بين الشمالي والشمالي وبين الجنوبي والجنوبي وبين الغرباوي والغرباوي والشرقاوي والشرقاوي ـ فلا يجب أن يوصف بها فئة دون أخري وما ممكن نقحمها في السياسة ونشيلها كقميص عثمان من أجل تحقيق اهداف سياسية ..