|
|
 كأس محمول بالتاكسي جواً
|
كأس محمول بالتاكسي جواً...!
الاسبوع الفات أسبوع حلو ..وجميل ... سخانة الجو كانت عالية..
جعلت الدجاج يضع البيض مسلوقاً.....ومؤشر الثيرموميتر
السياسي يرتفع الي أقصي درجه حرارية هنا في القاهرة....
فرغم وجود الفرن الحراي....كان تدفق الجماهير نحو تمارين
الهلال بموفنبيك... متواصل...لم ينقطع لحظة...لا في الصباح....
لا في المساء....فحلاوة الاسبوع لم تصنعها تمارين الهلال وحدها...
...لانها لم تمتلك كل الادوات...دقيق- سكر- زيت- لبن- مواد حافظة
وغيرها...ولا المباريات الودية...ولا طلعات امبيلي و ترقيصات كاريكا..ولا
راسيات دامبا...وقزائف مهند..وتمريرات البرينس...ولكن حلاوة الاسبوع
صنعت بواسطة الجميع....الحضور الجماهيري الراقي...الرشاقة ..الخفه..اللعب
في مساحات الابره.العزيمة.الاصرار.الطموح.والخبرة التدريبية وفي وسط هذه الزحمة
التقينا...باخوه اعزاء...أ/هاشم الترمزي ؛ أ/ كمال اَفرو؛ أ/ تاج السر حسين
ياسر الحاج ؛ كابتن أحمد عبدالله واَخرين...تكلمنا عن الاعداد...تكلمنا عن
التدريب...تكلمنا عن الجدد...تكلمنا عن كل حاجة....بنظريات مختلفة...
وبمقاسات محددة...ثم تكلمنا عن التكميلية...مع مراعات كل الاحتمالات...
وصول الكروت ..تطويع القانون....الكباري العمانية...
ولكن بينما كان الجميع في هذا الجو...الهلالي...تمحرك...وتحرك
أحد الحضور...حاول يتكلم ولكنه سكت..توقعت أن لديه خبر مهم..
أظنه تلقي مكالمة هاتفيه... تاكد وصول كرت سادومبا.. لا
يمكن كبري الجماعة هزم القانون.. لا يمكن اللجنة وافقت
علي شطب زرياب...والله راسي اتلخبط...وود الناس لبد
بالخبر..حاولت اتعامل معاه بلطف.. ناولتو قارورة مويه
قلت يفك عطشتو...عشان يتكلم..ويورينا الخبر..صحبك قطع
القاروره..وقعد يصرخ أمبيلي...أمبيلي...أتقول أمبيلي دا صحبو
من زمن المدرسة الابتدائية...جيت ليه قريب..حاولت اساله
لان الشمار كاتلني....لكن لقيتو مشغول بالتلفون
..قلت خلاص الخبر اِتأكد... وودالناس دا أول ما يخلص التلفون
حيتكلم بالخبر المهم..لكن الزول دا اول ما خلص التلفون قام جاري
علي النجيلة..يا ود الناس نحن خلاص دايرين نرجع...السواق زهج
صحبك قال لازم نصلي المغرب..وبعد داك نتوكل..بعد ما صلي
وركب العربية..قال والله بطولة الحمام ديل بشيلها يا مازمبي...يا المريخ
قلت ليه جبت الكلام دا من وين ؟ ..لاني كنت فاكر الخبر المهم
هو قرار من اللجنة المنظمة لسيكافا..لازم الكاس يدوه الي
احد الفريقين..لان اللجنة بتعدل لائحتها بين الشوطين...وطلما
المريخ ومازمبي يلعبان في دوري الابطال...وباس شرق
ووسط افريقيا ..تقرر منح كاس سيكافا لاحدهما..من اجل
الدعم المعنوي الذي يساعده في مواصلت المشوار الافريقي
خاصة ان اللجنة ما مضمونه ممكن ان تفكر هذا التفكير..
لكن صحبك اصر بان مازمبي والمريخ افضل فرق الدورة...
واتكلم كتير في الحته دي...لكن في جماعة قالوا ممكن البطولة
دي يشيلها فريق اخر...وهنا انقسم الناس لمجموعتين...واحدين
بقولوا المريخ...وواحدين بقولوا مازمبي...لكن انا كنت خارج
الاحتمالين...وكان في زول تاني عندو راي لكن ما قادر يعلنوا
قال الكاس دا ممكن يكون محمول جواً...لكن الراجل ما حدد يكون
محمول جواً بشنو ؟..بالتاكسي..بالكارو..بالموتر...بي شنو
وطلما الكاس دا حيكون محمول جوا...
اذاً الكاس دا ما من نصيب المريخ لانو حيكون محمول
جواً ... يعني شايلو فريق اخر..لكن صحبك
اقسم بان الكاس دا ما بطلع من السودان....يعني الكاس
دا مريخي عديل كدا...وهنا حاولت اقفز لتاج السر بسؤال
استكشافي عن اسماء الفرق من الصومال وجوبتي...و..و الخ
ذكر لي اسماء كتيرة...منها اسماء مركبة...ومنها اسماء
مبعثرة الحروف زي كلمة ام دورور كدا سبعة حروف كلها
خارج النص ...ذكر لي التاكس اتراكو....
قلت ليه تفتكر انو الفريق دا ممكن يعمل حاجة...
قال لي الجماعة ديل هزموه سته...لكن عندو جماعة كانو مع المنتخب
قلت ليه الفريق دا من دوري الترضية كان عامل زوبعه
واظنه تسبب في رحيل كروجر...لكن عندي راي في الفريق دا
..ومن اليوم داك خليت اتراكو...ومسكت في كلمة التاكسي دي
..لحدي ما المبارة خلصت ..اتصل علي تاج السر...
قبل ما اقول ليه اي حاجة.....
قال الكاس المحمول بالتاكسي جواً....لذلك
احتفظ له بحقه الادبي في عنوان هذا البوست...
|
|
 
|
|
|
|
|
|
|
|
Re: كأس محمول بالتاكسي جواً (Re: عبده حماد ابراهيم)
|
ازيك يا عبدالحماد.
دى اسمها جقجقت وجقجقت وبررررررر.
___________________________________--
والله انا كنت متمنى المريخ يشيل الكاس حتى نلتقيه
بنشوة الانتصار لكن تقول شنو.
عليك الله ياعبدو بكل صراحة انت شاهدت سادومبا رايك شنو؟
هل هو فعلا مطمن لان والله الرجفة حاصله.
مع مودتى
| |
|
|
|
|
|
|
|
|
|
Re: كأس محمول بالتاكسي جواً (Re: عبده حماد ابراهيم)
|
مسمار النص
لكل مجتمع عمل ثقافة محددة...ورؤوس مواضيع...
يبدأ ويختم بيها الدوام ..فالموظفين تلقاهم بيستهلكوا
الكلام حول المواصلات...المرتبات والعطل...يعني
دايرين يقبضوا ويركلسوا...امٌا الصحفين...خاصة البكونوا
ساكين ليهم خبر وما قادرين يلحقوه...تلقاهم بيتكلموا عن
اللقاءات..والمؤتمرات وقانون الصحافة..ولكن كل واحد
منهم ما بوري الاخرين وجهة الخبر الساكيه..لانو لو وراهم
حيسببوا ليه مضايقة...ويسكوا معاه الخبر...لحدي ما يقبضوه
زي قبضة الديك في المهرجانات الريفية...عشان كدا دائماً
تلقي الصحفي من الصباح سارح في الاتجاه المعاكس...اما
الممرضين والممرضات تلقاهم دائماً مكرهين ليك كلمة
وردية..وسهر...لو شفت للواحد ساكت بقول ليك انت سادي
وردية ...ولو مارديت عليو بقول ليك شكلك مساهر..
الممرض الدايرين يعينوه جديد قبل ما يوقع علي العقد
تلقاه بيتكلم براه عن الورديه ..والسهر...
يعني الكلمات دي لو حزفوها من القاموس
تلقي كل الممرضين قدموا استقالاتهم
احتجاجاً علي التعديل...وربما يتعرضوا لمحاكمات ومضايقات..
اما المزراعين والرعاه...تلقاهم مهتمكين بكلمات الطبيعة...
الخضار..الشواقير...المزن ...السحاب الارض ..الجروف..
عشان كدا تلقاهم بسموا اولادهم وحيواناتهم باسماء الطبيعة
مطر..ام بطيخ..شوقارة...مزنة..الخ
...وطلما لكل مجتمع رؤوس مواضع...ايضاً لكل مجتمع
مطابخ..او افران...او معامل خاصة بانتاج المصطلحات
المتداوله والمتعارف عليها محلياً..
فالبناين عندهم مصطلح كنيزر..طفشة..حاجة غير مفومه
تتداول بصورة كثيفة لدرجة انها صارت جزء من انجاز العمل
...اما ناس قاسم مهداوي...عشاق الجمال..دائماً بكتروا من كلمة
الجكس...والكمنجات في جلساتهم...تقول الكمنجات
السودانيه اصبحت مهدده بالانقراض..
اما تجار الخرد والمساعديه..ديل كتاب تاني..عندهم
مصطلحات بنتجوها من داخل المهنه...فعندما يكونوا
دايرين ياكلوا بقولوا نمشي ندق صندوق...ولو عاوزين
يغشوك في بيعة والمعلم مايعرفهم...بقول ليه اعمل ليه
وردة مسافه...ولو بقيت زول لايوق وما عاوز تمشي
لحدي ما المعلم يجي...تلقاهم بعاينوا ليك من بعيد
وبقطعوا سراً...عاينو واقف زي القاطع مسمار نص...
وانت لو اضانك بقت خفيفه وسمعت كلمة مسمار النص
تبدأ تفكر ..ياربي مسمار النص دا شنو...مسمار النص
دا زي الدقل الواقف في وسط الغابة...بجفل الحمار...وبرهب
الرعاويه...وبغش كلاب القنيص...وبساعد قصاصين الاثر
مسمار النص دا لو اصاب اي مؤسسة بخليها
مشلولة لمدة لا تقل عن ال45 يوماً...انتو ماشفتوا
العربية لما تكون قاطعة مسمار نص..؟ تلقاها
ماشه بالجنبه زي المشلول...وتلقي بتاع الحركة
بوقف ليها الطريق علي شان تعدي...بسلام
ما تداقش اخواتها...اما اللوري البكون قاطع
مسمار نص ...تلقهاه براه بتماحك علي الشجر
تلقي ركابوا منهم المفلوق..ومنهم العريان...ومنهم
الاعور...لانو اللوري بداقش في الشجر لحدي ما يصل
عشان كدا قالوا...مسمارالنص بشل الفريق والمدرب والادرة
والصحافة لمدة اقلاها 45 يوم...بشرط خلال هذه الفترة
تكون الادارة احضرت مدرب جديد...واستغنت عن بعض
اللاعبين خاصةً اصحاب الصفقات المهولة...التي
تكلم عنها أئمة المساجد...عشان كدا هدف اتراكوا...اقصد
هدف التاكسي الراوندي في المريخ...هو مسمار
النص زاتو...ما مختلف عنه باي حاجة..التاثيرتاثيره
والشلل شلله...والتعطيل تعطيله.
| |
|
|
|
|
|
|
| |
عبده حماد ابراهيم
ادم عيسى
فيس بوك
تويتر
انستقرام
يوتيوب
بنتيريست