|
|
 نقة زرقاوة (هلالاب)
|
.
نقة زرقاوة (هلالاب)
تقديم: ( هذه المساجلات من محض الخيال ولا صلة لها بأية أحداث حقيقية. كما أن من غير المخطط له بالمرة أن يقوم هذا الرابط بما يقوم به "الصارقيل")
- قلت لي الود ده ما خطير؟
- شوف بصراحة كده الزول ده مصيبة. لكن نحن دايرين نبوظ اعصابو زيادة عشان ما يجيب قون ده لو جاب فينا قون جرايدنا دي إلا نقفلا. لينا سبعة تمانية شهور ناقين فيهو انو فالصو وانو وانو وانو. يقوم يجيب قوون؟
- اقول ليك حاجة إنا بصراحة ما خايف من قونو. أنا خايف يعمل ليهم بلنتي بلنتين. ياخ الزول ده يدقوا فيها زي الوتد وهو زي الماحاصلا ليهو حاجة.
- صحي والله. مصيبة.
- الله حلانا من العجب. ده ياخي جا راجع زي ود امبارح.
- النصيحة لي الله أنا بخاف من اثنين في المريخ العجب وعبد الحميد السعودي. ديل تحديداً قونم بخلع عديل كده. بجي فجأة كده.
- قلت لي صاحبك قصة العجب دي زعل مني زعل شديد خلاص. وشبكني ليك انت ما مسلم ياخي. المسلم ما بحب الشر لاخوه وشنو شنو كده ما عارف. قلت ليهو ياخي أقول ليك حاجة قدر اخف من قدر..... بعد غلبوا مازمبي قام عزمني سمك. قلت ليهو ما داير. قلت ليهو عشان غلبتوا تعزمني؟ كده زي بكون ما أهل به لغير الله. ضحك شديد وقال لي الله يسامحك ياخي طيب ارح ناكل فول.
- ضيعت السمك ساكت يا وهم.
- انت في السمك وله في سيكافا القلنا ضعيفة دي. ياخي كورة امبارح دي لا ضعيفة ولا شتين.
- زنقوهم ليك زنقة الكديس في الشوال.
- لكن الله ما أدانا الفي مرادنا.
- حيسع يقولوا الكاس الفلاني والكاس العلاني.
- أنا من يجيبوا سيرة الكاسات الخارجية دي دمي بفور.
- هي دي كاس خارجية لكن.
- ليه كمبالا دي في الكاملين؟
- ننادي ولدو هداك نسألو منو.
- يا ولد تعال تعال.
- إنت اسمك منو؟
- إبراهيم ... ابراهومة.
- حسبنا الله ونعم الوكيل. كان ناديت التاني حيقوليك اسمي دحدوح.
- انت بشجع منو ياولدي؟
- انا بشجع العجب.
- كويس هسه العجب ده كان في الهلال بتشجع الهلال.
- لالا .. لأ.
- ليه.
- عشان انا مريخابي.
- انت ياخ لكن هسع ما لابس بنطلون ازرق.
- يعني شنو؟
- أمشي أمشي نادي أبوك.
- طيب...
.....
- مسئول من الخير.. إنت الجونة دى كمان شنو؟
- أسألني دبل؟
- ده والله إلا تفتشوا في شرح الزوزني... هاها...
- دي كمان من نوادر صلاح إدريس الجديدة.
- صاحبك ده باعنا عديل كده.
- تعرف يكونوا قاعدين ليك كده هو والوالي ومعاهم الفرد بتيعنهم بيتعشوا يقول ليهو تديني كلتشي... يقول ليهو تديني ايداهور؟ يقول ليهو آيي... لكن هسع بديك ايفوسا وايداهور ده نخليهو لي قدام وكده. ورتشارد رتشارد كيف أنا العراقي بتاعي ده شكلوا اتعوق وكده. يقول ليهو انت في العراقي وله مرق الحيرنا ده مرة يلعب كويس يقوم فجأ كده يجلطة جلطة العدو.
- آي والله الناس ديل اتاريهم شغلم ده كلو كده وانحنا جايطين ساكت.
- أيوه أيوه... وشنو؟... ده يقول ليهو أُكل أكل يا فلان من الكبدة دي. وداك يقول ليهو والله أنا القاوت مكرهني العيشة.
- يا فردة إنت جعت وله شنو؟؟
.
|
|
 
|
|
|
|
|
|
|
|
Re: نقة زرقاوة (هلالاب) (Re: abdelwahab hijazi)
|
.
2)
- عاين عاين زولك هداك.
- وين يا فردة؟
- السلام عليكم ورحمة الله.
- وعليكم السلام ورحمة الله شنو أمبارح ما ظهرتا.
- ليه هو في حاجة؟
- هسع في زول قاليك في حاجة؟ آي في حاجة يعني ما عارف ما ركبوكم التاكسي.
- بالله كان في كورة وله شنو؟
- آي كان في كورة ورشوكم الضحى الأعلى.
- في سيكافا برضو؟
- عاين عاين ما قلت ليك حيعمل فيهو مجنون؟ آييييي في سيكافا.
- لكن أنحنا لما كنا لاعبين مع مازنمبي إنت مش عملت فيهو مجنون؟ وقلت بالله هو اليومين في كّور وكده.
- هاها ياخي انت دايما جادي كدة؟
- أقول ليك حاجة أنا شخصيا كده ما شفت لي كورة سمحة زي دي قريب. وناس المريخ خذلوني عديل كده. وكنت قايلم حيلعبوا كورة ميتة. لكن كورة امبارح دي لو قدموا نصها يوم السبت حنصيف بيكم في اصطيف قبل يومكم. واحتمال كبير تنسبحوا الكورة التانية.
- شوف زولك! ياخي خالد احمد المصطفي قال في النيل الازرق انو المريخ كان كعب.
- خالد يقول اليقولوا. ومزمل يقول اليقولوا. أنا قلت ليك نص الكورة الامبارح دي ترشك والشمش في السماء مع انو الكورة بعد المغرب! كدي خلينا في سيكافا الماقيافا دي. انت " تيبان الزراق" البتقرا فيهم كل يوم الصباح ديل مش قالوا بطولة فاشلة؟ هسع بان ليهم طعما. لا وشنو موبوتو لبس شعار المريخ وموبوتو اهدى الجمهور الميدالية. بطولة ضعيفة ساكين تفاصيلة الدقيقة في شنو؟
- صحي بالمناسبة الخواجيات العاملات شعار المريخ في وشهن ديل شنو؟ ديل يكونوا الجابوا ليكم الكج زاتو.
- ياخي ديل كرهونا الاذاعة الرياضية زاتو.
- كل يوم من الصباح سيكافا والمريخ والوالي وشنو شنو. الحمد لله الانتهت كان خير كان شر. تعرف كلما امشى لحواء أشرب شاي القاها ليك تسمع فيها. عاملة فيها تابيتا بطرس قال. قلت ليها سيكافا آخر سخافا. قالت لي " الجالوا" السمعناها فيها ساكت مكسب..
- هاها.
.
| |
|
|
|
|
|
|
|
|
|
Re: نقة زرقاوة (هلالاب) (Re: abdelwahab hijazi)
|
.
(3)
- سمعتو بي مِحن الرشيد بدوي عبيد؟
- شنو؟
- بذيع في كورة المقاولين والهلال قال " هذا اللقاء الدولي الهام". وقال إنو المباراة بتشبه المباريات النهائية. ضحكت لما وقعت.
- دولي شنو يا فردة. ديل كانوا قاعدين في بلدهم شهر. لو دايرين يعلبوا معاهم كل يوم كورة كان لعبوا معاهم تلاتين كورة.
قالوا ليهم لاكين أنحنا دايرين نغلبكم قدام جمهورنا.
قالوا وجب لحم اكتافنا من خيركم. تِدفعوا كام؟ .....
قالوا بندفع كده.
شيلك خُطك شيلك خُطك قالوا ليهم بالصلاتو على النبي.
قالوا ليهم نروح في طيارة واحدة ولا نوجوا وراكم؟
قالوا ليهم لأ توجو ورانا. عشان لو مشينا السودان في طيارة واحدة حتكون ظاهرة.
قاموا تاني قالوا ليهم بالصلاتو على النبي. قالوا ليهم انتو كده حتستفادوا إيه؟
قالوا ليهم عايزين نرفع معنويات اللاعبين عشان عندنا كورة يوم السبت واللاعبين مرعوبين شوية.
- وده من أيه لا مؤاخذة؟
- قالوا ساكت كده!
.
| |
|
|
|
|
|
|
|
|
|
Re: نقة زرقاوة (هلالاب) (Re: abdelwahab hijazi)
|
.
(3)
- السلام عليكم .. حواء كيفك؟
- جبنة ! عليكم السلام.
- ود الباريا الليلة ما ظهر.
- لا لا ما ظهر مما وقفت الجالوا بتاعة سيكافا تاني ما جاء بي جاي.
- كنت مغروووض فيهو شوية ... جهاز " الكلتش....
- بكلمو ليكا.
- تاكسييي.
- تااااااااااااااا ك سي.
- عليكم السلام .. انتو التاكسي ده قدر الحاشوه بتقدر تحوشوه.
- تجري جري الوحوش غير رزقك ما تحوش.
- ولا تكونو سجلتوا حارس المرمى بتاعم.
- لا سجلنا سادومبا ... المرعب.
- هي هي هي .. ضحكتني والله أتذكرت أيام سجلتوا " كوارثنا دي ما سورة " .. قاليك سي دي وسي إيف وسيدي وسيدك الله. ويضقل بالكورة ويتكلم في التلفون ويطلع في المدرجات في وقت واحد. قرد السيرك الروسي عديل كده! وآخرتا مشا بكارثة دولية على رأي الرشيد بدوي عبيد. قاليك نادي هواة نيجيري قال نهي بالكل نهي ما دايرو.
- ده نيجيري وله هندي؟
- كان ما سجلتوا حارس المرمى الرواندي قولوا " للمعز مبسوط مني" يجيب شوالو ويجي. وكمان شوفو ليهو كدارة ملساء عشان ما يتشبك تاني في الشبكة.
- شبكتو هينة أحسن من زولكم داك الكان بره الشبكة .. وقدر ما يشوتو فيهو شابكم ليك مكالمتك لا تتم بالطريقة التي اتبعتها.
- سمح ببين.
- ياحواء كتري ليهو الدواء. الزول ليهو يومين عندو صداع وكده.
- الصداع محمدكم انتو الجايين راجعين من مصر مستعينين بصديق زي ما بقول قرداحي. لأ وكمان أمبارح وريتو الجديد إنو الموضوع فيهو بلنتيات هدايا وكده.
- انحنا لعبنا بالصف التاني.
- بالله وسادومبا طوالي نزل الصف التاني ما بدري شوية؟
- بدري من عمرك.
- بعدين انتو مالكم ومال سيكافا. مزمل ما قصر معاكم قاليكم زي دعاية البوهية.
- تاااااااااااااكسيييييييييي.
- " بلاش يا خديجة تبصي عالجيران." دايماً قال تبص على الجيران ودايماً تقع.
- خلينا في سادومبا؟
- بكرة برضو تلقوهو بوهية وتضيفوا اتنين تانين. يبقى عندكم سادومبا وسادوماك وسادوماستك.
- فعلا بتاعين مغالق ومواسير.
- انحنا ؟ ... طيب كده كملوا اعارة القلفنايز بتاعكم الفاضحكم ده. انحنا كان بتاعين مغالق كنا بقينا خنادقة زيكم. سيكافا لا دي ما مضمونة! طيب ياخي أمشي العبوا مع الناس الجوكم ديل في بلدكم. لا انحنا منسحبين... عشان يدونا ستة صفر تاني.
- سيكافا البتصلحو فيها زي ما عايزين وفي النهاية يشيلو منكم الكاس؟
- صحلنا فيها شنو؟
- البلنتيات عملتوها زمن اضافي.
- ياخوي دي ليها ستة سنوات بتتلعب كده كل دور وليهو نظام.... لكن انتو شن عرفكم ... ياخي انتو ثقافتكم الرياضية بتجيبوها من " وصيف البلد" اللي يومي ويومك ده ما عارفه انتو ختوكم تاني المجموعة ليه!
- تاكسيي.
- واقول ليك حاجة السبت راكبين ركشة عديل كده .... حواء دبلي ليهو قبل ما يشوف دبل ايداهور الضبح التور....
-
.
| |
|
|
|
|
|
|
|
|
|
Re: نقة زرقاوة (هلالاب) (Re: abdelwahab hijazi)
|
.
(5)
- صابحني دايما مبتسم.
- سلامات.
- قاليك : " الهلال يرصد التحركات السرية حول حكام القمة ويحذر من التلاعب بالنار"
- بدينا الخرخرة من هسة؟ دي ياتا في تيبان الزراق؟
- زرقاء اليمامة.
- ده الكلام البجيب المشاكل زاتوا. المباراة دي العالم كلوا بشوف فيها. المفروض الناس يوشوفوا الكورة ويصفقوا للعبة الحلوة وللفائز. شفت الصفوة بعد كورة سيكافا عملوا شنوا؟ الميدان كلو صفق بعد الكورة.
- بالله ... ياخي ديل كانوا زي الصبت فيهم مطرة. وفلعوا رجل الخط لما كب الدم.
- عيب طبعاً ... ومافي زول عاقل بقول الكلام ده صاح. لو أنا كنت جنب الزول العمل كده كنت سلمتو البوليس بي يدي.
- هاي يكا.
- انتو طبعاً مامكن تصدقوا انو المريخ ممكن يغلب الهلال بدون حكم أو بدون تلاعب. لانو لو حصل ده بكون في خطأ في الكون وتعالى الله على ذلك علواً كبيرا... حسبنا الله ونعم الوكيل.
- مافي زول قال الكلام ده برضو. انت بتألف ساكت. الهلالاب أكتر ناس بيتقبلوا الهزيمة بروح رياضية.
- نشوف!
- ليه إنتو عاملين ضامننها ولا شنو؟
- قلت لي زرقاء اليمامة؟ والله رمضان ياكل حوض بصل كامل ما يبقى زرقاء اليمامة. بكرة حيكتبوا شنو ياربي؟ المرة الفاتت وصيف البلد كتبت " الليلة السيرة والعريس فييرا "! قعدوا لي يومي ويومك ده يفتشوا في الضريرة ما لقوها؟
- الليلة فييرا اجازة وجاييكم السم القدر عشاكم. الزول سجلوه في الاتحاد الإفريقي وأكرم إلا يشوف ليهو بلد تانية!
- تتبارك! ده ياتو في البوهيات؟
- ببين ليكم.
- غايتو الانا عارفو الحُجاج أول امبارح اتعشوا سوا وقالوا كو ما في ليكم طريقة كان جلت من الضباح تقع في البطاح وكان جلت من البطاح بجي قون " فالصووووو المعز مالصو" . أصلو هو اليومين دي قالوا في المعسكر شابكم ليك غنا أنا إفريقي أنا سوداني.
| |
|
|
|
|
|
|
|
|
|
Re: نقة زرقاوة (هلالاب) (Re: abdelwahab hijazi)
|
(6)
- عطبرة!
- ما لها كمان عطبرة؟
- ناس غالبين تلاتة صفر يسجلوا فيهم قونين؟
- عادي ما كورة قدم... المهم التلاتة نقاط ..
- ده كلو كوم ومسح شداد بي مزمل الواطة كوم.
- بالله مسح بيهو الواطة عديل كده؟ وده وين ده؟
- في برنامج الرياضة.
- إنت اتفرجتو في قناة تانية ولا شنو؟ الشوفتو أنا شداد قدر ما حاول يلتقها ما قدر.
- كمان دايرين تغالطوا في شداد انتو الزول ده مش كنتوا بدافعوا ليهو.
- انحنا بندافع عن الحق كان قالوا صلاح إدريس زاتو.
- الما عجبك في كلام شداد شنو؟
- سؤال زي " العجب" إنت زول محامي .. وعارف القانون .. زول اتحاد جنوب أفريقيا قاليهو الزول ده ما عندنا كرتو من 2006 يقوم يقول افتح تحقيق؟ ويخلي اللاعب يلعب.
- انت ياخ شداد ده ما شكرتوه لما قال بس. بعدين الزول ده زي ما كان بقول لي زولك داك عندو خمسة شهادات عليا واستاد الخرطوم حق اسرتم عديل كده.
- عديل كده؟ حلوة والله .... سميناها رضينا والاتو حقك كمان. طيب اتحاد بوليفيا قاليك اللاعب الفلاني ده جاء عندي رسل لي ورقو تقول ليهو ارسل ليك سطرين اقول ليك ورقو في نيجيريا؟ هو هسع انحنا سألنا شداد يقول لي بوليفيا شنو؟ يعني ولا فكر يفتكر إنو في تزوير في اعارته. ياخي فتح التحقيق في سادومبا ده رضينا بيهو هنا ده. مش كان ممكن يفتح تحقيق في الموضوع ده؟ بعدين شنو قصة بنقبل جوابات الايميل وما بنقبل البريد السريع دي؟ الاتحاد ده قبل ما يركبوا ليهو الانترنت ده كان بيستلم الرسائل كيف؟ بالحبر السري يا حسين؟ بعدين هسع هو زول ما عارف الرسالة الفي ايميل بتتمسح ولا ما بتتمسح يقوم يقول الايميل بنسلتموا وال......
- ياخ خلينا من النقة الفارقة دي ... حسع انتو دايرين شنو؟ دايرين الهلال يطير ويدخلوا معاكم النيجيريين يعني. تبقى ليكم لحسة كوع. بتكرهو الهلال وعرفناها وطنية ما عندكم.
- هسع الموضوع بقي وطنية؟ انت شداد ده زاتو مش الزول القال الهلال والمريخ ما بمثلوا السودان؟ والهواء التاني بتاعكم داك قال ما بيعزفوا ليهم السلام الجمهوري و .. و.. و.... هسع بقيتو ناس الوطنية؟ دي منافسة كرة قدم. وانحنا طرف فيها نشتكيكم للكاف وللفيفا زاتو. تلعبوا كورة العبوها بشرف ولا خلوها. التزوير لزوموا شنو؟ وبعدين كان في وطنية تمرمط بالبلد التراب وبعدين تجقلب تقول بطردونا وبسو لينا؟ أنحنا شداد بقدر علينا وبغطيها؟ أبقو رجال العبوا بيهم مع كانو بيلارز عشان يفضحوكم على رؤوس الأشهاد. ياخي هسع انت امانة في زمتك ما عارف كان فيها تزوير ولا ما فيها؟
- مافي .. مافي .. يازول انا بقول ليك الكلام الكنتو بتقولوهو زمان. شداد ده ما فيهو كلام. ومزمل زول هواء ساكت. وانتو خايفين من سادومبا وكابوندي وبس.
- هاها الله يديك العافية طول ما الدجاجة حافية زي ما بقولوا الشوام. سادومبا شنو يازول ديل الكوتش بتاعكم زاتوا قال ديل خارج حساباتي. بعدين زول ما عارف الفريق اللاعب فيهو والاتحاد المنتمي ليهو يخافوا منو في شنو؟ أقول ليك حاجة أنا حألف مسرحية عديل كده. أسميها إنهم يعشقون المواسير. قوم لف بلا كابوندي بلا كاب الجداد معاك.
- ياخوانا الزول ده شابكنا من قبيل الدجاجة وكاب الجداد جوعنا ساكت قومو شوفوا لينا الفتة.
- ياخوي خليني من الفتة قلت ليك انت زول محامي امرق لينا النصيحة: كلام شداد ده غتغتة ولا حق؟
- حق.
- حسبنا الله ونعم الوكيل.
| |
|
|
|
|
|
|
|
|
|
Re: نقة زرقاوة (هلالاب) (Re: abdelwahab hijazi)
|
(7)
- سلام عليكم .. ديل منم كمان تاني.
- هلال وناساروا...
- أمك... هم لسه قاعدين. انحنا قايلنهم جو مقطوعية زي ناس المقاولين؟ يرفعوا المعنويات. وياخدو الفيها النصيب. ويركبوا المصرية.
- لأ أحسن يركبو التونسية!
- هسع من قبيل كلما الكورة تجي لي سادومبا بتاعكم ده المذيع يقول عمل كبري .. عمل كبري .. إنتو زولكم ده صيني ولا شنو؟
- خلاص قمنا لعمايل مزمل دي. انتو بعد ادوكم التلاتة لسة بتتفاصحوا. انتو الزول الجبتوه بالمليارات عمل ليكم شنو.. كلما ما يجي جنب القون يشوتا في الاوت تقول رايحا ليهو نضارات.
- هو براهو شابكننا ولدنا ولدنا لما قطا مرة واحدة.
- ده ياتو كمان؟
- ده كلتشي الماضباح.
- ياخ اقول ليك حاجة انتو حقو تعملوا ليكم سيكافا تاني لانو دوري الأبطال ده انتو ما قدرو.
- عديل كده؟ هسع انت دوري الأبطال القدرو ده يا " أمة الأمجاد" دايرين تغلبوا بيهو بي منو؟ بالصدامين القدامي والوراني زي ما قال مزمل أبو الفاحم؟
- فاحم؟ أفحمنا في شنو؟ ده وهم ساكت خاميكم ومعيشكم في الوهم.
- بتعرفوه قدام. ياخ أنا امبارح بفتش للصدى في تلاتة مكتبات.
- تلاااااااااااتة عديل كده؟
- آي تلاتة انتو كان مشيتو لي وفاق اسطيف القفل ليكم المقبرة وخلاكم تغيروا الحمار المدفون كان ادوكم ليها ستة صفر زي كل مرة. بعدين ياخ مزمل ده انتو شغالين بيهو مالكم. ده زولنا وانحنا مريحنا عديييييييييييييييل كده. أنا راضي وهو راضي شن دخل القاضي. أقول ليك حاجة الزول ده انتو بتقرو ليهو اكتر من المريخاب زاتو. تفتح الانترنيت تلقاهم ليك ناقين مزمل مزمل مزمل تفتح تيبان الزراق التلاتة تلقاهم مزمل مزمل وبي اسم الدلع مزمز وقزقز وترمس. ياخي قومو لفوا. وألذ شي صفيق البلد الليلة ساوا المريخ ركشة. مبروك عليكم الامجاد البي صدامين.
- أسمعني بدل الجوطة الفارغة دي. أنحنا تيمنا كعب وعارفنو ولسة بنبني فيهو. لكن انتو الدافعين قروش بالطن في اللعيبة عملوا ليكم شنو؟ شابكننا المحمولة جواً والمحمولة شنو ما بعرف.. ده غير أولادنا.
- حلوة قصة أولادنا أولادنا القادننا بيها دي. هسع إنت المذيع ده من قبيل بقول ايفوسا ايفوسا لما خشموا انشرط كسبتوهو في كرتلة؟
- ما سجلناهو لسة. انت شايل مني كم؟
- دي الحالة ما سجلتوهو ولاعبين بيهو في مصر ومع نساروا. هسع انتو مع " ناس أروا " طعلتوا واحد صفر بي ايفوسا والجمهور ومساعدة صديق. مع " ناس أعطش" ديك تعملوا شنو؟ حقوا تعملوا حملة تسموها محاربة العطش!
- ده فريق كلو شباب وأولا صغار بندرب فيهم عشان الدوري المحلي. انتو افرحوا بي محترفينكم ديل يومين وبعدين حتشوفوا.
- أولاد صغار وسيد البلد والله صدقوا الجماعة السموكم سيد اللبن.
| |
|
|
|
|
|
|
|
|
|
Re: نقة زرقاوة (هلالاب) (Re: abdelwahab hijazi)
|
.
(8)
- السلام عليكم ورحمة الله.
- قلت لي مؤامرات عديل كده ضد الهلال؟
- مالكم كتيرة عليكم؟
- ما كتيرة علينا كتير عليكم انتو المربوطة.
- آآآآآخ ده ما الواجعكم زاتو.
- واجعنا في شنو مربوطة وبكرة بتفنس.... باقي ليكم قبول واحد مع المريخ والجماعة حالفين يسنفكوكم في قبولكم.
- هو قبلي كده سنفكونا متين عشان يسنفكونا في المقبرة.
- مقبرة؟ لأ جداً شكلكم انتو زاتكم صدقتوا الوهمة دي.
- ياخي أنتو أول أمس القريبة دي ما غلبوكم ناس سطيف لما قلتوا كده كفاية أخير نقيف. ناس الجالية في الجزائر لي هسع يكونوا منتظرنكم في المطار.
- ياخوي هوي هوي شوف ليك حاجة جديدة انت لسه عندك نفس تتكلكم عندكم نقطة وكمان لسة فيكم روح. أخجلوا ياخي.
- والله فعلاً مفروض نخجل؟ لكن انتو الخجل بجيكم متين؟ زي ما قال واحد أخونا في الانترنيت إنتو لي يوم الليلة ما عارفين الكاس لما يجيبوه من بره بدفعوا فيهو جمارك ولا لأ.
- بعدين ياخي ده الشنو العاملنوا الليلة ده كمان؟
- عاملين شنو؟
- ياخي لما المريخ ده غلب كمبالا سيتي مش مليتوا الدنيا كوراك وقلتوا حمام ميت وعمال نظافة وشنو شنو الليلة صحيفة " حبيب الحكم" طلعت ليك مباراتكم مع كمبالا سيتى تجربة من العيار الثقيل قال. هاها صحافة قرف يقرف يومكم. لأ والمشاهد جايبة خبر عجيب إنو رئيس البعثة والمدرب بتاعم متشاكلين في قروش وارقو. حيرتونا معاكم عديل. حسع ياخي عمال النظافة ديل جايين ينظفوا "المغبرة" ويدفعوا ليهم الفيها النصيب زي ما قلنا في أولاد شمال الوادي .... واراقو الدخلو الموضوع شنو؟ والله فعلا الهلال حارقو...
- انتو ياخ ما بتخجلوا ما كفاكم تلزلزوهم عشان يشتكو .. تشموا كمان تقولوا للنيجيريين الحكام الليبيين ببيعوها.
- ياخ أقول ليك حاجة أنا كتاب الهلال ديل كلهم ما هامني في شيء. عشان الموضوع عندهم أكل عيش وممكن يلفقوا أي حاجة لكن انتو المشجعين البجبركم على البلاهة دي شنو؟
- بلاهة شنو ما كلامم صاح؟
- الصاح شنو إنو في مريخابي مشا المطار قال للنيجيري الحكم الليبي راشيكم راشيكم. يازول انت ما عندك راس.
- بتعملوها بتعملوها.
- حسبنا الله ونعم الوكيل. أقول ليك حاجة الموضوع ده يكون قالوه ليهم الثلاثي النيجيري بتاعنا. بعدين لما قالوهوا بالهوسا ايفوسا كان واقف وسمع الكلام. قام فتاهو لتيبان الزراق. كده هسع مش أحسن من نجركم الما جايب همو ده.
(9)
البسمع الجوطة ما يقول مربوطة
- حواء كيفك.
- عليكم السلام.
- ود الباريا....
- ود الباريا خليهو زولك داك قدا لي راسي عديل. كل يوم يجي يقول لي أنا شايف الكاس زي كانونك ده. وحنشيل الكاس وانحنا متصدرين وشنو شنو. حيرنا.
- سمعت بيها دي. لكن انتي ما حسمتيهو عديل كده. الناس هسع عاملينا ليك فيهو نكتة.
- في شنو؟
- قالوا قلت ليهو " البسمع الجوطة ما يقول مربوطة". قال لي هسع أب سنينة يضحك على ابسنينتين. المربوطة علاقة شنو بأبو الدو بتاعكم.
- قولي ليهو أبو الدو جبناها بي عرق جبينا مش زي مربوطتكم الفيها ستة كور ماشين بمساعدة صديق لما جريدتكم "وصيف البلد" سموها " حبيب الحكم".
- الليلة والينا طمنا عديل كده.
- متين ؟
- قبل شوية كان بتكلم في الرياضية قاليهم وارقو قاعد أربعة سنوات وكان انتو موضوعو ده عامل ليكم " قلق " أنحنا موضوعو في البرد الصافي لينا " دافي". وقاليهم من 2007 ما شميتوها مع المريخ.
.
| |
|
|
|
|
|
|
| |
Dr.Elsadig Abdalla
فيس بوك
تويتر
انستقرام
يوتيوب
بنتيريست