|
|
|
 Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: BAKTASH)
|
تلخيص الونسة الشيقة
بواسطة شاهين شاهين
*
تقديم د. الباقر العفيف
نرحب بكم فى هذه الامسية الاستثنائية ونستضيف فيها الشاعر الكبير العائد الأستاذ محمد المكي ابراهيم , نحن سعداء بتشريف احد القامات السامقة لنا فى هذا المركز .
وعند استضافة استاذ محمد المكي فى مركز الخاتم عدلان نعتقد انه قد جاء الى بيته , لان المساهمات الضخمة والكبيرة الفكرية والشعرية التى قدمها أستاذ محمد المكي , مساهمات تستحق الاحتفاء .
انا مدين له بصفة شخصية لانه واحد من الناس الذين ساهموا مساهمة كبيرة وقوية فى طرح الاسئلة الحقيقية , مثل سؤال الهوية , ووضع اسمه مع رفاقه فى مدرسة الغابة والصحراء عندما طرحوا الاسئلة الصحيحة وحاولوا تقديم الاجابات عليها وصاغوا كل ذلك فناً وشعراً فله منا التحية وخالص الترحاب .
ويحاوره فى هذه الامسية الاستاذ الشاعر والكاتب والمفكر كمال الجزولى .
*
أ/ ود المكي .
*
أ/ الجزولي .
*
كمال الجزولى :
بسم الله الرحمن الرحيم
مساءكم الله بالخير
تقديم الباقر مرعب شوية .. نحنا عايزين الامسية تكون خفيفة , طبعا مش خفيفة خالص , المهم تكون خفيف الثقيل , او ثقيل الخفيف .
(مكى) باسم كل الناس ديل مرحب بيك .. احيانا نحتاج بالنسبة للقامات انو نعرفها بصورة مقربة close up بتعبير ناس السينما , مش بس الشاعر العظيم والمفكر الكبير , لكن برضو كانسان .
(مكى) , (الابيض) , (حى القبة) , من (الخلوة) لحدى ما خلصتا ممكن تقول شنو ؟ .
محمد المكى :
انا محمد المكى , وده اسمى الاول وهو اسم مُركب , والذى اشتهرت به , والله يسامحنى لانى ضيعتا اسم جدى , اتولدت قبل اندلاع الحرب العالمية التانية فى مدينة (الابيض) فى (حى القبة) .. فى الوقت داك الدنيا غير الدنيا , وفى رخاء مابعده رخاء , لما دخلتا المدرسة مصروفى كان واحد (مليم) , فى سنة تانية اترقيت وبقوا 2 (مليم) , فى سنة رابعة بقوا 5 (مليم) .. لما دخلتا المرحلة الوسطى كنتا بشترى السندوتش ب (قرش) , سندوتش (طعمية) او (مش) , بعد شوية جاء الغلاء بقى (السندوتش) ب (قرشين) !!
درست الخلوة لمدة شهور , وبعدين كنتا مغرم جدا ب (الكرامة) و (لحم) الصدقة , هى طبعا كانت مُحرمة علينا وما مفروض نمشى , مرة اكلت (لحم) صدقة كتير جدا وبقيت عيان وصارحت الاسرة انى خالفت الاوامر , طلعونى من (الخلوة) ومشيت حاجة بنسميها (الروضة) , اسمها (روضة شنتوت) , وهى عبارة عن (بروش) على الارض ومافى (بلاط) – يضحك - , قعدت فيها كم شهر وبعد داك مشيت المدرسة (حى القبة الاولية) وكانت مصارفيها الشهرية 15 (قرش) وكنا بندفعها بالكامل .
كمال الجزولى :
عبدالله على ابراهيم طوالى بيتكلم انو التعليم عمرو ما كان مجانى فى السودان .
محمد المكى :
شبه مجانى , لانو 15 (قرش) كانت ولا شىء .. كنا شايفين المدرسة عظيمة وجميلة وكان فيها ميدان للعبة اسمها ال ring , وما كان فيها ميدان كورة , وكان فيها اولاد تالتة ورابعة عملاقة وبعد ما امتحنوا مشوا فتحوا محلات (خضار) و (بقالات) وكنتا بمشى اشترى منهم عشان خاطر تلك الايام .. لازمنى نفس هذا الحظ فى المرحلة الوسطى لانو مدرسة (الابيض الاميرية الوسطى) كانت مقصودة لابناء النبلاء والنظار والعمد , كان فيها (داخلية) , طبعا انو فيها ابناء الوجهاء ده ما بيعنى انهم ما كانوا متوحشين , بالعكس كانوا متوحشين تماماً لانهم اقوى مننا وكانوا بيكسروا فى الكورة .
كمال الجزولى :
اتكلم لينا عن الاشقاء والشقيقات والوالد والوالدة .
محمد المكى :
ابوى اتزوج اربعة نسوان , وعندو واحدة توفت وحزن عليها حزن شديد جدا جدا , التانية وِلد منها اتنين وانفصلوا , التالتة ولد منها – يفكر قليلاً - اربعة , والاخيرة هى والدتى وِلد منها بتين وشخصى , ده بيذكرنى اخونا (على قاقرين) وِلد كلهم بنات وبيقول للناس عندى بت وبتين – يضحك - .
كمال الجزولى :
يا (مكى) لحدى ما درستا الوسطى كنتا قرأيت كم كتاب بالعربى والانجليزى ؟ .
(عدل بواسطة مركز الخاتم عدلان on 07-09-2009, 05:21 PM)
| |
 
|
|
|
|
|
|
|
|
Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: مركز الخاتم عدلان)
|
محمد المكى :
افتكر حاجة كده فى المئات , وكان عندى عادة انى امسك السلسة واكملها , يعنى امسك سلسلة (اقرأ) وبرضو سلسلة (كتب للجميع) واحاول اقرأها من اول واحد لحدى اخر واحد وما افط اى كتاب .
كمال الجزولى :
سعر الكتاب فى المتوسط كان كم ؟
محمد المكى :
ما كتير , بداينا ب 3 قروش ونص , وانتهينا ب 6 قروش ونص , المرحلة الوسطى كان فيها مكتبات فى المدرسة .
كنتا مهتم بالمدرسة وكتب المدرسة فى الانجليزى والتاريخ وغيرهم , لكن كنتا بكون مستعجل عشان اقرأ الكتب الخاصة , المدرسة كانت على بعد 2 كيلو , وكنتا بقرأ وانا ماشى فى الشمس وده الخلانى البس هذه النظارات .
كمال الجزولى :
المدرسين الكان ليهم تأثير عليك وعلى عاداتك فى القرأية
محمد المكى :
هم بسيطين لكن احاول اتذكر , - يا جماعة الكلام ده لذيذ ؟ , الكلام ده كويس ؟ , نستمر على كده ؟ - (يضحك) .. مروا بى اساتذة لطفين جدا , كان هناك (ابو القاسم عثمان) هل يا ترى عايش ولا اتوفى ؟ وهو كان شاعر كبير ولعب دور هام فى حياتى الشعرية لانو احنا فى سنة اولى كتبتا موضوع انشاء عجبو وحب يكرمنى واستدعى الناظر عشان يسمع موضوع الانشاء بتاعى , ناظرنا مُربى فاضل (حسن على) رحمه الله وده رجل تلقى الثقافة الانجليزية على اصولها وكنا احنا بنكون ماشين لللمدرسة وهو بيكون راكب حصانو وقدامو كرة البالو لحدى ما يطلع من المدنية , لما نوصل المدرسة بيكون هو رجع المدرسة فى نفس التوقيت زى الساعة .
كمال الجزولى :
ندخل على (خور طقت) .
محمد المكى :
(خور طقت) هى فى الحقيقة كلية جامعية , وكنا بالجد عايشين فى حرم جامعى ومش بس مجرد مدرسة , وهناك اهتمام باى حاجة عند الطالب فى كل المجالات فى العلاقات الاجتماعية والرياضية وغيرها , وكان فى مناخ ممتاز للتعليم انو الطلبة يكونوا مقفولين فى مكان واحد ويتبادلوا المعلومات , اغلبية الاساتذة كانوا خواجات وكل العلوم باللغة الانجليزية ما عدا طبعا اللغة العربية والدين , كان عندنا استاذ (رياضيات) من (ويلز) وكنا متخصصين فى تعذيبه .
كمال الجزولى :
انا لاحظتا انك بتحب الرياضيات جدا .
محمد المكى :
انا كنتا شاطر فيها , لكن عملتا غلطة كبيرة , لما جيت امتحن للجامعة اخدتا الرياضيات العادية واخدتا علوم اضافية ولما قدمتا لكلية الحقوق العميد بتاع الكلية قال لى انتا جاى هنا ليه ؟ ما تمشى تدرس علم احياء ولا اى حاجة علمية , فكرتا انى اغير وحاولت اقدم فى كلية الهندسة والمشكلة انى ما امتحنتا رياضيات اضافية بعد كده فكرتا ادخل ادأب , بس الحقوق كانت ظريفة ودرستها اربعة سنوات ,اول ما دخلتا الكلية النظام اتغير وبقت خمسة سنوات .
كمال الجزولى :
ابرز الزملاء فى (خور طقت) كانوا منو ؟ .
محمد المكى :
ابرز زول فينا , زول ما بتعرفوه , وهو (صافى الضى حامد البشير) وكان رجل شاعر وصاحب رؤية وكان (ماركسى) , لكن توفى فى سنة رابعة او بعدها , وبرضو كان فى اخونا الدكتور (محمد سليمان) صاحب كتاب (حروب الموارد والهوية) وهو رجل ممتاز .
كمال الجزولى :
عالم عباس يقول ان الشاعر يتم تعميده بواسطة اصدقائه كشاعر , متين بدأت التجارب الاولى للشعر عندك , متين شعرت انك شاعر وباى قصيدة ؟
محمد المكى :
انا كتبت قصائد شوية جدا , ديوان (امتى) فيهو 28 قصيدة فقط , والديوان البعده فيهو 8 قصايد , انتاجى الذى اعترف به حوالى 50 قصيدة , وانا ما اى حاجة بكتبها بفتكرها عصماء وبشكك فيها , اخى رحمة الله عليه (محمد عبد الحى) كان من هذا الطراز فى الجامعة كان بيقول لى انو الشعر الكتبو فى المرحلة الثانوية حرقوا كلو , ودى حاجة ما بيعملوها كل الناس وعرفتا عندها انو شاعر اصيل .
اول قصيدة غزلية كان عمرى 14 سنة وكان فى واحدة من بناتنا جميلة جمال خارق , كان فى (سيرة عرس) مشت من (الابيض) لحدى (البان جديد) , حدائق وطبيعة رائعة قالتا فيها
قد عرفت الحب فى فجر الصبا
كاذبُ من قال عن الدنيا الهوى
انها دنيا شقاء او عذاب
كلام عجيب زى ده وكان فى القصيدة امنية انى اقابل اسد عشان افرمو والبت تُعجب بى .
كمال الجزولى :
اول مرة جيت الخرطوم متين ؟ .
محمد المكى :
سنة 1957 جيت فى (لورى هوستن) , والمدينة كانت فى اوج عظمتها , زرنا (ودنفاش) واكلنا (ايسكريم) وغيرتا نوع السجاير الكنتا بشربهالنوع تانى خفيف وظريف , حدائق (الامم المتحدة) كانت حدائقيتن وفيها كل شىء , وكنتا مبهور جدا ب (الخرطوم) .
كتبتا قصيدة (قطار الغرب) فى اواخر عام 1959 بعد ما التحقنا بالجامعة , وكانت الجامعة فى الاجازات بتدينا تصاريح نرجع بلدنا , والاجازات تلاتة مرات فى السنة ومن هنا اتعودت على قطار الغرب بمحطاته ومظاهر الحياة الفيهو
عفوا , عفوا يا اجدادى شعراء الشعب
يا من نظموا عقد الكلمات بشكة سهم
انا اعلم ان الشعر يواتيكم عفو الخاطر وسبقوتنى فى هذا الفن
وداع الاحباب
*
باركتم بالدعوات مسار احبتكم
قاسيتم وانا يا اشياخى قاسيت
كل السودان يقاسى يا شعراء الشعب .
شوفوا بالله الكلام ده سنة 1959 واحنا هسع فى سنة 2009 , والحالة لسه قاسية .
انا دايما بقول انو العذاب بدأ فى السودان سنة 78 لما مشيت الوزارة فى (لورى) بتاع تراب عشان مافى (بنزين) للعربات ومافى (عيش) عشان سندوتشات الاطفال و (الكسرة) بالشكل عشان تشتريها من 78 بدأ العذاب فى البلد دى , (الكهرباء) تقطع ومعها (الموية) , وحتى الان انتم فى هذا العذاب , احنا طبعا شردنا وعن طريق المجاملة بنتألم معاكم - يضحك - .
| |
|
|
|
|
|
|
|
|
|
Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: مركز الخاتم عدلان)
|
كمال الجزولى :
ممكن نقسم شعرك مراحل , من ضمن هذه المراحل عندك ديوان (امتى) و (الخرطوم) الاولى و (الخرطوم) الثانية , اعتقد عندك برضو (جامعة الخرطوم ) الاولى والثانية .. عايز اعرف عن الكلية والداخلية واوائل الاصدقاء ورابطة ادباء الجامعة
محمد المكى :
دى والله مواضيع كتيرة .
كمال الجزولى :
لا , خش من ده على ده , السؤال ده عشان انا عندى اهتمام بظاهرة الادباء التلامذة الكان عندهم تأثير على المجتمع وهم لسه طلبة ودى ظاهرة اختفت الان
محمد المكى :
انا ما كنتا شخصية خطيرة فى الجامعة , ولحدى هسع انا ما شخصية خطيرة , لكن كنتا فى ركن خاص منزوى اقرأ قصصى واكتب الاشعار وبعد ما كنتا طالب متفوق بقيت طالب خامل بسبب الشعر , لانو الحياة الجامعية مفروض تطور نفسك فى مجالك ومفروض نمشى نقرا الاحكام القضائية بتاعت الانجليز فى القضايا القديمة قبل 200 سنة والمجلات القانونية , لكن كل أمسياتى كانت مكرسة لكتابة الشعر لحدى ما انام , صديق فى الغرفة (صالح شريف) كان بجيب لى سندوتش وقت ما اصحا اكلو , انفقت على الشعر زمن كتير خالص خالص , لكن برضو كان فى زمن للاطلاع العام ومحاولة فهم الامور الماشية , ما كنتا بقرأ فى السياسة , وعشان كده لما اشتغلت فى (الخارجية) استعنت ببعض الناس , وبعد التحاقى ب (الخارجية) قرأيت كتير جدا فى السياسة ومازلت اقرأ .
كمال الجزولى :
ما تمشى (الخارجية) خلينا فى (الداخلية) والكلية , منو الكان معاك فى الاوضة ؟
محمد المكى :
فى الاول كنا اربعة فى داخلية (الدندر) فى (البركس) .. (سليمان) و (يوسف) وشخص اصبح من مشاهير السودان وهو (ابراهيم احمد عمر) , بعد كده سكنت مع ناس (الابيض) فى داخلية جب حوض السباحة , طبعا نحنا من غرب السودان وكنا عايزين نتعلم العوم فكنا بنعوم فى الصباح والليل لحدى ما حصل حادث وغرق واحد من الزملاء اسمو (شرف الدين) وكان قلبو ضعيف وحصل ليهو نوبة قلبية اثناء العوم وغرق ومن اليوم داك انا كرهتا الحوض وخليت السباحة . . برضو كان فى زميل الغرفة دكتور (حسن أبشر) .
كمال الجزولى :
بالله انتا من الزمن داك ؟
محمد المكى :
طبعا .. الجامعة كان فيها عتاولة فى مجال الادب , لكن معظهم هجر الادب بشكل نهائى , كان فى (محمد عثمان ابو ساق) الرجل الذى ارتكب غلطتو التاريخية بتاعت, وكان فى (النور عثمان) شعلة من الذكاء وصاحب صوت مجلجل وعندو تعليق على كل شىء ورفض لكل شىء , وكان فى الحبيب الى نفسى (عمر عبدالله قمر الانبياء) وهو رجل ممتاز وقد ترك الكتابة , وفى (حسن أبشر الطيب) وهو ورانا بسنة وهو صاحب شخصية طاغية وعندو حضور فى الاذاعة السودانية , وقتحام لمجتمع الطالبات ما تركهم يموتوا من الوحشة طوالى ونسات ويقدمهم - يضحك - , فيما بعد حاولنا نكون زيو .. كان فى تقديس اكتر من اللازم للطالبات كنا بنقول
اها مشيت اتونست مع البت الديك وطرحتا ليها رأيك فى مشروع المناقل . – يضحك -
كمال الجزولى :
مرة قلتا لى انو (المانيا) هى الدشنت مشروعك الشعرى .. ايه حكاية (المانيا) دى ؟ .
محمد المكى :
الوقت داك كان سنة 62 , خلصتا سنة تالتة وكنتا زهجان وما شغال فى حاجة , حياة من الخمول , ففكرت انو الواحد يمشى يشوف العالم والناس السعداء ديل عايشين كيف , اخدت من اهلى 60 جنيه ومشيت (المانيا) والشاعر (عبد المجيد عبد الرحمن ) رحمة الله عليه هو الورنا درب (المانيا) لانو مشى هناك قبلنا واحنا مشينا نفس المدنية الكان عايش فيها واشتغلنا مع نفس المقاول الكان شغال عندو اشتغلنا طُلب .. كانت (المانيا) طالعة من الحرب واى حتة فيها مهروسة من (الحلفاء) واول صناعة فيها كانت المبانى .. (المانيا) اخذت منى البراءة والرضاء بالحياة البسيطة وخاصة حياة المدن الصغرى واعطتنى عدم الخوف من الحياة الغربية والتجارب واعتقد انها هى التى جعلتنى اذهب واعمل فى وزارة (الخارجية) .
| |
|
|
|
|
|
|
|
|
|
Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: مركز الخاتم عدلان)
|
محمد المكى :
فى (المانيا) برضو اكتشفنا مصنع بيعمل البلاستيك الصغير البيكون فى باب التلاجة , وكان سبهلل فى مواعيد الشغل بتاعتو وكان ممكن تكتب فى الحضور انك جيت الساعة ستة صباحا واشتغلتا لحدى ستة صباحا , لكن انا كنتا بشتغل 12 ساعة وقدرنا نشترى تذكرة العودة للسودان , اشتغل معنا فى المصنع ده زوج وزوجته من (النمسا) وكتبتا فيهم قصيدة
يتوقف التيار لم ينسوا رشاشة حب
اقول الحق , جزء دقيقة وقفت
عاد بسيرها التيار
كمال الجزولى :
جيت راجع من (المانيا) وكملتا سنة رابعة 63 / 64, و (محمد عبد الحى) .
محمد المكى :
(عبد الحى) رحمة الله عليه واحدة من العباقرة , اثبت توفق فى كلية (الآداب) وجذب اليه قلوب الاساتذة الكبار , كنتا سعيد اننا تعرفنا وتبادلنا المحبة وانا كنتا ناوى اكتب الكتيب بتاع تطور الفكر السودانى وبدأت اجمع كل الاشياء المطبوعة , وانا و (عبدالحى) جبنا (طبقات ود ضيف الله) قبل سبعة سنين من تحقيقها كانت ورق اصفر , وبعض الاخوان وجدوا لى نفائس لكنها كلها للاسف كانت اثار شعرية عشان كده الناس بيقولوا ان كتيب تطور الفكر السودانى مراجعو شعر ولكن ده كان المتاح , اثناء التفكير فى كتابة الكتيب , قدم (عبدالحى) قصيدتو العظيمة (العودة الى سنار) كنا ساكنين فى بيت جدتو فى (السجانة) ما بنطلع نمشى الجامعة ونرجع نكتب .
كمال الجزولى :
مجدت ثورة اكتوبر ومجدت جيلك , وفى شباب هنا بيفتكر اننا جيل كلام فارغ .
محمد المكى :
انا مجدت الصمود خلال اكتوبر , وما عندنا غير الصمود , داخليات الجامعة هى بيوتنا ولما البوليس يقول للناس تفرقوا وامشوا بيوتكم يعنى اننا نرجع داخليتنا ونقاوم البوليس وكان مافى غير الاستبسال ضدهم , انا دخلتا الجامعة 59 ولحدى ما اتخرجتا بشترك فى المظاهرات , بكون جريت لى زى 100 ميل عملنا ماراثون – يضحك - .. يا سلام يوم اكتوبر اصبحنا (نيل) من الطالب ماشيين على ميدان (عبدالمعنم) كانت ثورة جاهزة , (حسن عمر) مسك (الميكرفون) وقال استمروا فى الثورة .
كمال الجزولى :
الاتنين كانوا اخوان مسلمين , (الترابى) و (حسن عمر) , فكيف (الترابى) يقول للناس امشوا و (حسن عمر) يقول للناس استمروا فى الثورة ؟ .
محمد المكى :
والله ما عارف , لكن (حسن عمر) من (الخوجلاب) و (جعلى) - يضحك -
من غيرنا يُعطى لهذا الشعب معنى ان يعيش وينتصر
من غيرنا ليقرر القيم الجديدة والسير
كمال الجزولى :
ما هو تأثير الثقافة الفرنسية فى الشعر عندك ؟
محمد المكى :
ما قدرتا استمتع (بباريس) الا بعد سنة كاملة ومعرفة اللغة الفرنسية , طبعا هناك لو ما بتعرف فرنسى ممكن تتبهدل ويزيدوا ليك تمن القهوة وحق التاكسى وكده , كان الكورس نفسه بتاع اللغة مكثف , (فاروق عبد الرحمن) الوكيل الاسبق فى وزارة (الخارجية) كان معاى طوالى .. اتعرفتا على الشعراء الفرنسيين .. مشيت برضو (السنغال) وتعمقت هناك فى الثقافة الفرنسية وهى ثقافة ادبية خالص , حتى فى الشارع هناك فى (فرنسا) تلقى بت صغيرة تقول ليك انا جعانة اشترى منى القصيدة دى , يعنى قيمة كبيرة , هسع انتا لو مشيت فى الشوارع (الخرطوم) عشان تحاول تبيع قصيدة ما عارف ح يحصل ليك شنو – يضحك - .
كمال الجزولى :
الغابة والصحراء , تيار شعرى ؟
محمد المكى :
والله – يصمت - .. فشلنا فى تحويلها لتيار شعرى , كان عندى الحاح انو اللغة العربية لغة بيضاء وعلى احسن الفروض سمراء وانها ما بتقدر تعبر جماليا عن الناس الزينا كده , بل بالعكس هى بتشوف فى الوجه الاسود تعابير الاحتقار .. قدرنا اننا نتكلم اللغة العربية ومافى شعب فى الدنيا يقدر يغير من لغته , فهل من سبيل لتطوير هذه اللغة بحيث انها تحترمنا وتحترم اللون الاسود واليوم الاسود والوجه الاسود .
مشكلة الغابة والصحراء اننا تفرقنا وما استمرينا وتعرضنا لخسارة فادحة بوفاة (عبد الحى) وسفر (يوسف عيدابى) وانا ذاتى انطمستا وخليت كتابة الشعر
الناس مسكت فى الجانب بتاع الهوية , بعد الاغتراب فى دول (الخليج) بدأ الشعور اننا ما عرب ومافى حاجة تجمعنا مع العرب , لا فى الف حاجة تجمعنا بالعرب بس الناس حردانين وزعلانين
صديقنا (الباقر العفيف) من الناس الاهتموا بهذا الامر بكل شجاعة وهدموا الحصون الحصينة .
كمال الجزولى :
الانقاذ بالنسبة ليك مرحلتين , مرحلة انتا عضو فى المجلس الوطنى , ومرحلة انتا معارض وكتبتا سلم مفاتيح البلد فى واحدة من نماذجك العامية .
محمد المكى :
عندما عرض على المجلس الوطنى مشيت باختيارى للمجلس قلتا اكون صوت من لاصوت له ومنبر من لا منبر له زى قناة الجزيرة , ولكن لقيت مصاعب فى فرص الكلام ومن كنت اتوقع منهم السند تركونى وذهبوا , كانت فى بيوت لما امشى زيارة ليها وانا النائب المعارض تغلق ابوابها فى وجهى ما عدا بيت كمال الجزولى .
كمال الجزولى :
اعمل شنو ؟
محمد المكى :
هو انتا لاقى يا كمال ؟ - يضحك –
شعرت بالخذلان , وفى المجلس لما القى بعد صعوبة فرصة للكلام يقولوا لى (اوجز) .. وحتى البنات الكوزات فى المجلس كانوا ما بيردوا لى التحية , كانت فى حالة حصار لا وجدت اهلى من هنا و لا احترام من هنا .. فى اول يوم اتكلمتا فيهو فى المجلس طالبت برفع حظر التجوال وسحب الدبابات من الجسور , استجابت الحكومة وقللوا حظر التجوال ساعتين وكل هذا الكلام ما كتبتوا الجرايد , واتذكر جريدة (الانقاذ) بعد ما كتبت كل الناس الكان اتكلموا فى الجلسة كتبت (كما تحدث العضو محمد المكى ابراهيم) قال شنو ؟ مافى زول عارف , لكن برضو كان فى رجال وقفوا معاى وتفهموا ومنهم هذا العظيم (حاج مضوى) يارب ترحموا .. بدأ البعض فى الهجوم على انو انضم للمجلس القزم وانضم لثورة الانقاذ , انضممت ايه ياخى ؟ انتو حاكمنى بالكلام الكنتا بقولوا فى المجلس وكنتا بحاول اساعد الناس لو فى اى زول قال لى زوجى او ولدى فى السجن , وكنتا بفتكر انى اكتر زول ممكن يتكلم عن السياسة الخارجية فى المجلس الوطنى , الدكتور (حسين ابو صالح) اصر انى اسيب المجلس وارجع (الخارجية) , اتلككو معاى وقالوا انو لازم استقيل الاول من المجلس الوطنى وفعلا قدمتا الاستقالة , واشتغلتا فى (الخارجية) مع (حسين ابو صالح) سنتين وهو رجل ممتاز وكان عندو مشاريع ممتازة فى ترميم العلاقات مع (مصر) و (امريكا) والمجتمع الدولى , ولكن (ابو صالح) واجه كمية من التأمر ولم يستطيع تنفيذ اى شىء وهو مشى بيتهم وانا مشيت (امريكا) .. الان هناك انفراج ونستطيع ان نتكلم فى مثل هذه المنابر
سلم مفاتيح البلد
سلم مصاحفنا
سلم ملافحنا
سلم مسابحنا
عقول اولادنا سلمنا .
طبعا (وردى) دخل فيها سلم (كنائسنا) , هذا شعر (وردى) – يضحك –
كمال الجزولى :
عن قصيدة النثر
محمد المكى :
قصيدة النثر من حيث الاساس شىء سليم ممكن يرتقى بالتعبير الشعرى , من حيث النماذج هناك متفوقين زى صديقى (كبلو) ولانسة (نجلاء عثمان التوم) , ولكن هناك نماذج سيئة وبالذات فى (الخليج)
اقدم ليكم مقطوعة نثرية صغيرة جدا منى لاهل (دارفور) لانهم يستحقوا كل التعاطف معهم , المقطوعة النثرية باسم (قتل الجنجويد غزالى) على لسان طفلة صغيرة
((كنت وحدى , البنات اختفين وراء السياج , والمخيم كان بعيدا , قال لى فارس الجنجويد هاتها , قلت اسورتى ؟ , قال لى هاتها , رفعت يدى , سطع البرق من يدى , رأيت يدى وهى تسقط فى الرمل هامدة , رأيت غزال يولى , ودم احمر يصبغ الرمل حولى)) .
انتهى التلخيص .. شكرا لكم .
| |
|
|
|
|
|
|
|
|
 Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: عبدالله الشقليني)
|
ما أسعدكم بالشاعر : محمد المكي إبراهيم
هو كعود الشماريخ إذا عتق فإنه يرق ويتقوس ويصفر
بمقدمك أيها الشاعر الباهر ، تنهض نسائم " الدعاش " تقهر القحط الذي تمدد من فعائل من لا يُحسنون مهنة التآخي مع الوطن أهاليه وأراضيه وأشجاره التي تنتحب حتى احتوطبت . ننظُرك سيدي على الضفاف التي تنام قرب النيل وتغطس في رحِمه عند الفيضان .
حفرت في تخت الذواكر :
الحقول اشتعلت قمحاً ووعداً و تمني
وكتبتَ من دمِك الشعري أسماء شهداء واراهم التُراب ونسيهُم التاريخ وأنهضتهم أنتَ من سُبات النسيان :
كان أكتوبر في أمتنا منذ الأزل
كان خلف الصبر و الأحزان يحيا
صامداً منتظراً حتى إذا الصبح أطل
أشعل التاريخ ناراً و اشتعل.
ثم تمشي على بسطة العُمر وتمسح على فرو الأعراق .. فتأتلق :
الله يا خلاسية
يا حانةٌ مفروشةٌ بالرمل
يا مكحولة العينين
يا مجدولة من شعر أغنية
يا وردة باللون مسقيّة
بعض الرحيق أنا
والبرتقالة أنت
يا مملوءة الساقين أطفالاً خلاسيين
يا بعض زنجيّة
يا بعض عربيّة
ثم تمشي من فوق حبل صراط الزمان ما شئت ثم تأتينا بجدلية الشِعر :
يختبئ الحريق في الشرر
يختبئ البستان في الوردة
والغابة في الشجر
يختبئ الخروج في الأبواب
والعاشق الخائف فى الدولاب
تظل سيدي شاعراً ، تصعد أعالي الفراديس . تضُم أيادينا وهي تُمسِكُ ببعضها
لعل الوجدان الإنساني الصادق يجعل لهذه الأمم التي اجتمعت في وطنِكَ و وطننا
مزهرية أمل متنوع الألوان والروائح والجذوع .
| |
|
|
|
|
|
|
|
|
|
Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: باسط المكي)
|
تعرف يا الاخ السائل,
أنا بس بكتفي برد الأستاذ الشقليني
Quote:
ظُلمٌ لذا اليَوْمِ وَصفٌ قبلَ رؤيتِهِ .. لا يصدُقُ الوَصفُ حتى يَصْدقُ النظرُ
تَزَاحم الجَيشُ حتى لم يجِدْ سَبَباً .. إلى بساطِكَ لي سَمْعٌ ولا بَصَرُ
فكنتُ أشْهَدَ مُخْتَصٍ وَأغْيَبَـــــهُ .. مُعَايِناً وَعِيَاني كُـلَّهُ خَبَـــــــرُ
|
وكفا الله المؤمنين
شكرا أستاذنا عبد الله الشقليني
أحمد الشايقي
| |
|
|
|
|
|
|
|
|
|
Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: مركز الخاتم عدلان)
|
Quote: مروا بى اساتذة لطفين جدا , كان هناك (ابو القاسم عثمان) هل يا ترى عايش ولا اتوفى ؟ وهو كان شاعر كبير ولعب دور هام فى حياتى الشعرية لانو احنا فى سنة اولى كتبتا موضوع انشاء عجبو وحب يكرمنى واستدعى الناظر عشان يسمع موضوع الانشاء بتاعى , ناظرنا مُربى فاضل (حسن على) رحمه الله وده رجل تلقى الثقافة الانجليزية على اصولها وكنا احنا بنكون ماشين لللمدرسة وهو بيكون راكب حصانو وقدامو كرة البالو لحدى ما يطلع من المدنية , لما نوصل المدرسة بيكون هو رجع المدرسة فى نفس التوقيت زى الساعة .
|
تحية خاصة للشاعر الفز الاستاذ محمد المكي ابراهيم فالشاعر ابوالقاسم عثمان يسكن فى الجريف غرب وتوفى الى رحمة مولاه واسرته تقيم بالجريف غرب الحارة الخامسة وهو شاعر وله عدة دواوين شعرية. وهو من الرعيل الاول الذين عملو فى مدارس خورطقت وحنتوب.
| |
|
|
|
|
|
|
|
|
|
Re: ونسة شيقة بين أ/ محمد المكي ابراهيم و أ/ كمال الجزولى (ملخص + صور) . (Re: مركز الخاتم عدلان)
|
كنت هناك ، وكان لقاء جميلا ووسيما ، نبشنا فيه من سيرة الأشستاذ محمد المكي ، والمركز قد بذل الكثير من أجل الحضور ولأجل تقديم عمل جميل ، والأستاذ كمال الجزولي كان يجتهد من جلنا لينبش المزيد من التفاصيل في مسيرة شاعرنا ، التقيت هناك بالأستاذة إشراقة حيمورة وابنتها ، والأستاذ يحيى فضل الله ، وتعرفت عليه فما أنكرني ، والتقيت الأستاذة هالة عبد الحليم ، وخرجت من المركز وشعيرات الأمل تنبعث في نفسي من جديد بوعد بالتواصل معهم ما وجدت لذلك سبيلا..
| |
|
|
|
|
|
|
| |
مركز الخاتم عدلان
Asaad Alabbasi
Hussein Mallasi
محمد الشيخ أرباب
أحمد الشايقي
BAKTASH
تبارك شيخ الدين جبريل
عبدالله الشقليني
باسط المكي
Saifeldin Gibreel
ودقاسم
munswor almophtah
فيس بوك
تويتر
انستقرام
يوتيوب
بنتيريست