|
الموية يا دم البحر، الخضرة يا روح الشدر
|
المد:
المد المارق من زفرات الفجه من متاوقة العيون ماشى فيك مع الشهيق مخدوش ملطخ بالدعا من سماك الشاردة شايل ليهو لون حزنو طامح زى وريدك كلما يوسع يضيق
يا صبحك فات بى ليلو سبعة ضحكات بى ليلو ويا فرحك مات بى ليلو سبعة نجمات بى ليلو يا عمرك طال بى سنينو الرايحه ما لاقيه الطريق يا حالك حال مسجون فى ضلوع الغبشه كاسيهو الرماد يا حليلو جافاهو الرفيق
وأماتك الدافقه الحنان تعبت تفتش فوق جزاير الريح تفتش ليكا فى وعر الدرب تنده تقالد فى رواكيب الزمان تطيب خاطر العمر الكسيح ما عارفه ضلك من رهابك حننت قلب المكان ما فارزه جيتك من غيابك والمويه دساها الحريق
الجزر:
الموج سليل المويه المويه يا دم البحر يجرى جنب العيون الكايسه دمعاتا جوه العروق الودرت فى موتا نبضاتا والواطا بت الكون مرقد الناس المشت بدرى لا بضوقو هم لا بشوفو كيمان الكدر الليل غنوة الخايفين ساكت يعاين فى الودار الخضرة يا روح الشدر الموت عديل احسن كتير من الفزع مين البورينا الدرب مين البخت الجمره فى مويه الوجع دربك معلق فى الفضا وفضاك مكتف بالغبار وقلب سفينتك يشتهى الجوه فى خاطر السواحل وبره فى وش النهار
الموج سليل المويه المويه يا ست الروا جيب الكلام مليان عطش والريق يباس المشتهى كبى القصائد فينا ناولينا الدوا
وبين سلّوكة الملح البتيرب من دمانا حليلا قريفة القعاد فوق الحكاوى الصابه عينه وبين ريحة البن الرمانا قايمة حيشان من وِلف سهرانة نيمات الوداد
بين ريحة الملح السكن جنب القلب قفل دروبك بالسهاد رشرش صقيعة الروح نزِف وريحة الشوق الحمانا نفرد جناحو نبلو فى الضل السمح نعطنو فى النيل النِشِف راقدة كيمان العباد الجاورت نبع الأسى الموية يا السقم القديم الموية يا ست الروا سفن الغريب بايته القوا والشوق حلم فرزع غناويهو الهوا
|
|
|
|
|
|
|
|
Re: الموية يا دم البحر، الخضرة يا روح الشدر (Re: أبوذر بابكر)
|
Quote: بين ريحة الملح السكن جنب القلب قفل دروبك بالسهاد رشرش صقيعة الروح نزِف وريحة الشوق الحمانا نفرد جناحو نبلو فى الضل السمح |
Quote: وأماتك الدافقه الحنان تعبت تفتش فوق جزاير الريح تفتش ليكا فى وعر الدرب تنده تقالد فى رواكيب الزمان تطيب خاطر العمر الكسيح ما عارفه ضلك من رهابك حننت قلب المكان ما فارزه جيتك من غيابك والمويه دساها الحريق
|
هل أُعِرناأذنا صاغيه؟؟؟
+ وبس:
توبك مقدقد
نهدك شرَد منو اللبن
بتك حطام، ولدك سجن
مِنِك براكْ
------------------
يديك العافية
جورج
| |
|
|
|
|
|
|
Re: الموية يا دم البحر، الخضرة يا روح الشدر (Re: جورج بنيوتي)
|
أكيد يا جورج لو ما مننا برانا، بنكون مشاركين فى التواطؤ
علينا وعليهم
وزول بسمع مافى
إلا البحر المسكين داك راقد ممدد وساند راسه بى الباقى من الجروف
زمان كان زى سيف صلاح أخو فاطنة داك
مجوهر بالنجوم ومزخرف بالغنا والأحلام المصندلة
يا زول الله فى
ما دام لسه فى البحر ده باقى روح
بنشيل منه شويه منها
والله كلامك صحيح تب
مننا برانا
| |
|
|
|
|
|
|
Re: الموية يا دم البحر، الخضرة يا روح الشدر (Re: Amin Mahmoud Zorba)
|
Quote: الخضرة يا روح الشدر الموت عديل احسن كتير من الفزع مين البورينا الدرب مين البخت الجمره فى مويه الوجع دربك معلق فى الفضا وفضاك مكتف بالغبار وقلب سفينتك يشتهى الجوه فى خاطر السواحل وبره فى وش النهار
الموج سليل المويه المويه يا ست الروا جيب الكلام مليان عطش والريق يباس المشتهى كبى القصائد فينا ناولينا الدوا
|
امنت بالله يا..
أباذر
بدون تعليق
| |
|
|
|
|
|
|
|