قنبلة تاريخية :مقستو هايلي ماريام شايقي من الدهسيرة

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 13-11-2018, 01:14 AM الصفحة الرئيسية

مكتبة فيصل الزبير(Faisal Al Zubeir)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
01-05-2007, 02:15 PM

Faisal Al Zubeir
<aFaisal Al Zubeir
تاريخ التسجيل: 25-10-2005
مجموع المشاركات: 9313

للتواصل معنا

FaceBook
تويتر Twitter
YouTube


قنبلة تاريخية :مقستو هايلي ماريام شايقي من الدهسيرة

    قنبلة تاريخية :مقستو هايلي ماريام شايقي من الدهسيرة
    اخوانه تحدثوا لـ"الوطن"
    الرئيس الإثيوبي السابق منقســـتو سوداني «شايقي»..!

    صدق أو لا تصدق .. الرئيس الإثيوبي السابق ، منقستو هيلي مريام أصله شايقي .. وتحديداً من منطقة الدهسيري ..!.
    «الوطن» وثّقت لهذه المعلومة، وأكدت صحتها من خلال تحقيق مثير وحوار كبير مع «اخوان» منقستو بأمدرمان «أولاد ابوه» وهم : محمد أحمد الحسين محاري ، والحسن احمد الحسن محاري ، وعمة منقستو السيدة «ست نورالشيخ محاري».
    محمد أحمد قال لـ «الوطن» : «نحن سعداء بأن يكون اخونا هو الرئيس منقستو ، ونسعى للتواصل معه ، لذلك نحاول أن نلتقيه وهو في زيمبابوي»، وأضاف أنهم لا يمانعون في اعطائه نصيبه من ميراث الوالد.
    فجّرت قنبلة تاريخية: حكاية منقستو «الشايقي»..!
    إنها إحدى الحكايات التي بخل بها الزمن العنيد لأكثر من أربعين عاماً.. وكذلك القصص التي ترويها «الحبوبات» لم يكن بطلها هو ذات البطل الذي يقود «قصتنا»..
    وما بين الواقع والخيال مساحة للبحث عن الحقيقة التي روتها الحاجة «ست نور»..
    تقول الحكاية: كان في قديم الزمان رجل اسمه أحمد الحسن محاري، هاجر إلى الحبشة من منطقة «الدهاسير» بالولاية الشمالية وهو شايقي «ميه الميه» وهناك تزوّج من الحبشة وجاب ليهو ولد اسمو «منقستو»..
    أبقوا معي لتعرفوا الحكاية..
    الوالد أقرّ بنسبه له.. وقال الابن يبحث عن الوالد وليس العكـس..!
    أسرة منقستو ونظرة تقول «لما ترجع يا حبيبي..!»
    في عهد مايو أرسل منقستو مندوباً للشمالية ولكن وجد والده «يحتضر»..!
    حكايـــــــة
    جلستُ إليها وهي تجتر الذكريات الجميلة التي أخذت من الشمال الحبيب المحنّة وسماحة المعشر وطيب الخلق.. وبعدما ضمتني إليها كثيراً وهي تلقي عليّ حديث الأم التي تحضن ابنتها بعد طول فراق.. إنها الحاجة ست نور الشيخ محمد محاري بنت أخت أحمد الحسن محاري والد «منقستو» ـ أي أنها بنت عمته وبدأت حديثها قائلة:
    يا بتي الحكاية طويلة وقديمة من الخمسينيات وأحمد الحسن كان بالشمالية، وُلد وتربّى بها وترعرع، وكان يعمل بالزراعة في أمان الله بعد داك عرّس من أقربائه وكانت مرتو حبلى بي ولد، وجاء الخرطوم للشغل في بيوت السكة حديد وبعد داك طلع طوالي مشى الحبشة وانقطع منو الخبر وما جاء زول منو نهائي ولا في واحد من بلدنا مشى الحبشة غيرو عشان يجيب لينا خبر.. وطالت السنين والكلام كان قبل الستينيات وبعد داك زوجته وضعت ليها مولود وسماه جده طه.
    وبعد زمن طويل وسنين مرّت عليه وما تعرفت ليه جه يمين وللاّ شمال قاموا أهلنا بكوهو وفرشو عليه والناس نسو نهائي وحتى نحن قنعنا والله منو «الحكاية ما طالت شديد».
    الحي بيعـــــود!
    سكتت برهة وتناولنا ماءً بارداً ورجعنا تاني نحكي الحكاية الجميلة جداً أشبه بـ«الحجى» الزمان الذي تحكيه الحبوبات لأطفالنا الصغار.. قالت «سبحان الله» بعد داك رسلت بت عمتنا من كسلا قالت أحمد الحسن شفتو بي عينيّ في كسلا معاهو تجار جايين من الحبشة وأنا جبتو معاي البيت وما بتكلم عربي بتكلم حبشي.. وأنا ما بفهم لكن جبت لي واحد حبشي وفسّر لي حديثو وقال اسمه أحمد الحسن محاري أهله من «الدهاسير» في الشمالية وأنا بقول دا خالي طوالي قام أهلنا قالوا ليها انتي لازم تكوني متأكدة من انو دا محاري.. قالت يمين متأكدة وبالفعل مشو جماعة مننا ومعاهم خالاتنا وعماتنا ومرقوها في كسلا.
    يقطع الحديث أخ «منقستو» محمد أحمد الحسن محاري، والذي جاء إلى هذا اللقاء من منطقة الكلاكلة ومعه ابنه وبنته وأحفاده الاثنين وبعد سلام وكسلام وبعد ما تعرفنا عليهم و«شربو المويه».. أها واصلت الحاجة ست نور حديثها وقالت بعد ما وصلو الجماعة كسلا لقوه قاعد مع أختنا وهاك يا ونسة وهاك يا ضحك، اتعرفوا عليهو وعرفوه ياهو زولهم الما يغباهم وطوالي جابوه بسرعة للشمالية والناس اتلمت عاد دا ما حدث كبير زول بعد ما يموت يحيا تاني.. وقلنا كدي عملنا ليه الكرامة «الما خمج» ودعينا الناس كلهم وطبعاً ما كان بتكلم عربي نهائي وكلامو كلو حبشي ورطانة كدي ذاته ما بتتفهم، ولكن بعد طول زمن وأيام طالت بدأ يعرف العربي شوية شوية وبدينا نسأله عن هجرته الطويلة دي للحبشة وقال إنو مشى عشان التجارة وأظنها نجحت معاهو عشان كدى نسانا.
    مريــــــم أم منقســــــتو..
    بعد حكايات طويلة زولنا بدأ يحكي عن حاجاتو الخاصة «الحديث مازال للحاجة ست نور» قال لينا أنا هناك كنت متزوّج لي واحدة حبشية اسمها مريم وسكت على أسرار خاصة بيهو وما حكى عن إنو عندو منها ولد وللا ما عندو يعني ما كان واضح معانا ونحن كمان ما سألناه وخلينا الأمور على كدى والسنين مشت والزمن طال.
    خبــــــــر يقيـــــــن
    تواصل ست نور حديثها بعد ما شربنا معاً كوباً من عصير الفراولة الجميل وكانت هذه المرأة الكريمة تصر على أنها لا تتحدّث إلاّ نتناول معها وجبة الغداء إلاّ أنني وزميلي المصوّر سعيد عباس كنا نحب أن تواصل هذه الحاجة حكايتها التي لا يستطيع الشخص أن ينقطع عنها ولو لثانية واحدة.. وبعد وعد قاطع بأننا سنتغدى معها واصلت قائلة: في زمن حكومة نميري جاء منقستو في زيارة إلى الخرطوم وكان عندنا ضابط من أولادنا في الحكومة قابل منقستو في جلسة خاصة قام منقستو حكى للضابط قال ليه أنا من الشمالية من قبيلة الشايقية أبوي اسمه أحمد الحسن محاري، وهسي أنا بسأل من المنطقة دي عشان أشوف أبوي وطبعاً ما جانا هناك انشغل بالمؤتمرات والحكومة وبالفعل جاء الخبر إلى الحاج أحمد محاري بالشمالية وقلنا ليهو يا حاج الزول دا رئيس «بي حالو» قال ولدك قال نعم هو ولدي لكن الوالد بمشي للولد وللاّ الولد بيجي لي أبوه إذا أصلاً أنا بهمو بيجيني لحدي عندي.
    مرســـــــــــــــــال
    يحلو الحكي والحديث مع حاجة ست نور وتواصل: بعد ما انتهى منقستو من مؤتمراته ذهب للحبشة وعاد مرة أخرى بعد زمن طويل إلى الخرطوم وبعث بمرسال إلى الشمالية منطقة الدهاسير والناس قالوا المرسال دا جايي للحاج أحمد الحسن محاري من الرئيس منقستو ولكن بعد إيه المرسال لمّا جاء لقى حاج محاري في فراش الموت بين الحياة والموت ولا قِدر يودي ولا يجيب ورجع المرسال للرئيس بالخبر «الموسمح» وقال ليه أبوك بحتضر، بعد داك رجع منقستو إلى الحبشة وانقطع منو الخبر «وينقطع الحديث من جديد ويدخل علينا الحسن أحمد محاري» وهو أخ أيضاً لمنقستو وجاء للمقابلة هذه وبعد جلوسه واصلت الحاجة حديثها قائلة بعدما رجع منقستو توفى الحاج عليه رحمة الله.
    وصيـــــــــــة
    أجابت عليّ عندما سألت هل ترك الحاج أحمد الحسن وصية بخصوص ابنه منقستو.. قالت لا والله وأردفت بعد دا أنا حديثي انتهى خلي محمد أحمد يحكي ليك شوية.
    جلست بالقرب من محمد أحمد الحسن - أخ منقستو - وقلت له ما رأيك في كل الحديث الذي ذكرته الحاجة..
    هذا حديث صحيح ومافيه شك بس طبعاً كان في تقصير مننا ومن الحاج في انو ما أدانا الحقيقة كاملة وعشان نحن نمشي نفتش علي اخونا.. وأحب أذكرك بأن الوالد عندما رجع تزوّج للمرة الثالثة من الشمالية والدتي واسمها عشمانة الطيب وتاني اتزوّج أم حسن أخوي دا.. وكانت الأولى الاختلف معاها أم هاني البعدها طوالي مشى الحبشة واتزوّج مريم أم منقستو والأخيرة كانت اسمها خديجة ابن عوف عندها ولد وبتين.
    واخواتنا حضرة أحمد الحسن وفاطمة أحمد الحسن ورقية أحمد الحسن.
    رسالــــــــــــــــة
    قلت للعم أحمد الحسن أريد رأيك بصراحة في هذا الموضوع وهذا النسب الذي جمع بينك والرئيس السابق منقستو..
    أنا سعيد جداً بأن يكون لنا أخ ولا أرفض أن يكون الوصل بيننا ممكناً.. ووالله هسي لو جاء نمشي معاهو الشمالية ونوريه قبر الوالد ونقاسمو الحلو والمر.
    قاطعته: ولو طالب بالميراث ممكن تدوه نخيل وطين وبلح؟
    أكيد وهذا حقه الشرعي فيكف نحرمه منه ونحنا طبعاً عايزين المحنّة.. والخوّة ما حاجة ساهلة.
    هنا قاطعتنا الحاجة ست نور قائلة: نحن يا بتي دايرين المحنّة والقذرة.. وهسي انتي لو جاك أخوك من أبوك بترفضي ونحن الشايقية بطبعنا حنينين شديد وبنحب التواصل والله ما دايرين منو أي حاجة سوى انو يكون قريب لينا نسالمو ونطايبو.
    أخبــــــار منقستـــــــو
    رجعنا للعم أحمد الحسن وقلت ليه هل تعرف أي أخبار الآن عنه «أقصد منقستو»..
    نعم أنا أقرأ عنه منذ أن عرفت به أنه أخي وحتى عهده عندما كان رئيس وحياتو الكان بيعملها قصة الخباز الذي أدخله داخل الفرن شأنه شأن الرغيف.. عندما مرّ بالشارع ووجد الشعب يقيف صف سأل عنهم قالوا ليه ديل وافقين في صف «العيش» بعد داك جاء طوالي طبّق النظرية في الخباز.
    أنا متابع جداً حتى بعد ما فشل في مواصلة الحكم وأخذ اللجوء السياسي إلى زيمبابوي وهناك حاول بعض الأحباش أن يغتالوه لكنهم فشلوا والآن هو شخص مرموق وله مال كثير في زيمبابوي وله مشاريع ضخمة.
    وحياته الخاصة؟
    أجاب على سؤالي بأنه يعرف حتى حياته الخاصة فهو متزوج وله ثلاث بنات وولد واحد، وواحدة من البنات ديل دكتورة كبيرة.. وأولاده بتكلموا الانجليزية ونحنا كمان برضو أولادنا بتكلموا إنجليزي يعني كان جو ما عندنا مشكلة في الونسة معاهم.
    دعنا نتعرّف على الأولاد؟
    أمل بنتي طبيبة في مستشفى الذرة، وأميرة إدارة أعمال خريجة، وماجدة متزوجة وأولادي ماجد يعمل في هيئة الأوقاف الإسلامية، وخالد يعمل بشركة النيل الكبرى للبترول، وأسامة تاجر عربات، وصلاح ومعاوية وأمير.
    دعـــوة للتواصــــــــــــــل
    العم الحسن أحمد الحسن افتخر بأخيه منقستو وفترته الرئاسية واتفق مع أخيه أحمد على أنه لا مانع في التواصل ولا مانع حتى في السفر إلى زيمبابوي للإلتقاء به ومشاركته الأفراح والأتراح وإن أراد المجيء إلى السودان كمان حانقاسمو النخيل ونديهو التمر ويأخد حقو في الطين.. وأضاف نحن والله دايرين المحنة والاخوة الصادقة ودايرين كمان نكون قبيلة كبيرة ولو الجريدة لها موقع...
    قاطعته وقلت له عندها موقع في الانترنت..
    قال: خلاص اتمنى انو يقرأ هذا الحديث في الانترنت ويعرف انو نحنا اخوانو دايرين نقابلو ونسالمو ويجيب أولاده عشان يعرفو أخوانهم ويكون التواصل والمحنة بينا.
    حــــديث شـــــــاب
    من الشباب الذين كانوا حضوراً أبناء أحمد محمد الحسن محاري وأبناء ست نور وأبناء الحسن محمد الحسن، وتحدّثت الأستاذة نجاة المحامية بنت الحاجة ست نور بعدما سألتها عن رأيهم كشباب وأحفاد للحاج محاري في هذه القصة ونسب منقستو..؟
    قالت والله نحن نسعد جداً أن نلتقيه ومن هنا بنرسل ليه رسالة عبركم نقول ليه تعال إلى السودان ويكون التواصل بيننا وتمتد هذه العائلة إلى الحبشة وزيمبابوي ونقول لابنائه نحن محتاجين نشوفكم ولا نريد أي شيء سوى رؤيتكم الغالية.
    أميرة تطــــــالب بعـــــودته
    أميرة هي بنت محمد أحمد الحسن محاري - أي أن منقستو هو عمها - قالت أنا بقول ليه لازم نشوفك ولازم تجي السودان، ولو لم يأت إلى السودان يكون في وسيلة عشان نواصلو بيها.. ولو عرفنا أخباره ما عندنا مانع نزوره ويزورنا.
    مشاهــــــــدات
    تشكر «الوطن» جزيل الشكر والثناء الأستاذ عبدالعظيم تاج السر عبدالحفيظ تاجر العطور بسوق ليبيا والذي تربطه علاقة بالأسرة لترتيب هذا الحوار وجمع كل أطراف الأسرة ووقوفه معنا حتى انتهت مهمتنا الصحفية.
    أيضاً نشكر أفراد الأسرة الكريمة الذين توافدوا من الكلاكلة والصحافة إلى منزل الحاجة ست نور بالثورة لتسهيل المقابلة والحوار.
    ما لفت انتباهي هو أن هذه الأسرة تحب هذا الرجل حباً كبيراً والدليل أنني سألت الطفل الصغير النور فيصل «3 سنوات» حفيد محمد أحمد الحسن قلت له «منقستو» يبقى ليك شنو؟ قالها بسرعة «جدو» فضحك الجميع وهذا يعني أن هذه الأسرة حكت لصغارها عن هذا الرجل العظيم.
    أسرة أحمد الحسن محاري أسرة مريخابية عظيمة تعشق المريخ لحد كبير، وسأل زميلي المصور سعيد الطفل النور أيضاً قائلاً له انت هلالابي وللاّ مريخابي.. فردّ أنا فيصل العجب.. ولا تعليق..!
    كنت أثناء الحوار قد سألت العم محمد أحمد الحسن عن سر الاسم «منقستو هيلا مريم» فقال.. يحكى أن هذا الاسم جاء من امه التي كانت تعمل مع ملكة هيلي.
    أكرمتنا الأسرة كرماً حاتمياً وهذا إن دلّ إنما يدل على صفات أبناء الشمال الحبيب الذين أخذوا الكرم من النيل العظيم.
    * قلت للعم محمد أحمد الحسن هل يمكنك أن تسمي أحد أحفادك على جده «منقستو» قال ولِمَ لا ولكن بشرط حتى أتأكد من أن يكون الاسم للمسلمين بعدها لا أتردد

    الوطن السودانية امايو 2007

    (عدل بواسطة Faisal Al Zubeir on 01-05-2007, 02:16 PM)
    (عدل بواسطة Faisal Al Zubeir on 01-05-2007, 03:46 PM)

                   |Articles |News |مقالات |بيانات

01-05-2007, 02:49 PM

بكري الصايغ

تاريخ التسجيل: 16-11-2005
مجموع المشاركات: 19331

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    أخـر خـبر مـصـري : ظـهـور حـفيـد مصـري للإمام محمـد احمـد المـهـدي!. ...

    ... مـحـمـد نـجـيـب جـده كـان ســودانيـآ،
    ... انـور السـادات جـدتـه كـانت سـودانيـة،
    ... عـيـدي أمــيـن أصـله ســودانـي،
    ... النـبي مـوسـي عليـه السـلام كـان نـوبيـآ " مـن انـديـنا!!"،
    ... الـملكـة الفـرعونيـة "نـفرتيـتـي" كـانت نـوبيــة،
    ... سـكان مـنطقة "الـمجراب " بشـمال السـودان أصـلهـم مـن دولة المجـر،
    ... "الـرشــايـدة" - بشـرق السـودان أصـلهـم مـن عـرب السـعـوديـة،
    ... انتقلت الـحضارة السـودانية القـديمة مـن الجـنـوب الي شمال مـصـر،
    ... الجـنرال " تيفراي " الاثيوبي الذي انقلب علي هيلاسلاسـي اصله سـوداني.
    ... مـلكة بريـطانيـا بعـظـمتها وجـلالة قـدرها جـدها الـمانـي،
    ... ... جـون كـنيـدي اصــله جـدوده القـدامـي مـن أسـكتلنـدا،
    ... ادلـوف هـتلـر أصـله نـمسـاوي،
    ... الدكتور عون الشـريف قاسـم أصـوله يـمنـيـة،
    ... محـمد محـجـوب سليمان " مستشار للنميـري" اصـله مصـري،
    ... بوشـكـيـن " شـاعـر روسـي " اصـله اثيـوبـي،
    ... بـلال " مـؤذن الرسـول " اثيــوبـي،
    ... عـرب السعـوديـه، اصــولهـم يـمنيـــة،
    ... جـوزيـف سـتاليــن، لـم يكـن روســيآ،
    ... مـحـمد عـلي كـلاي، اصــوله افريقيـة،
    ... مقستو هايلي ماريام شايقي من الدهسيرة,
                   |Articles |News |مقالات |بيانات

01-05-2007, 03:23 PM

Elmuez

تاريخ التسجيل: 18-06-2005
مجموع المشاركات: 3488

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    يعني هسة بقى عندنا مشكلتين من طرف الشايقية

    عوض الجاز

    و منقستو



    صنفرة:

    مافي شايقي يجي ينف فيني لأنه زوج إحدى خياتي شايقي.

    (عدل بواسطة Elmuez on 01-05-2007, 04:58 PM)

                   |Articles |News |مقالات |بيانات

01-05-2007, 03:25 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    و نتن ياهو من مروي
    و سيدنا موسى عليه السلام كانت أمه نوبية من حلفا
    والمغني العالمي (لو بيغا) من كسلا أبوهو كان بيحارب الطليان ومنها هاجر لي أمريكا !!

    والمغنية ماريا كيري برضو سودانية من جبال النوبة إسمها الحقيقي مريا خيري !!

    وتاني شنو ؟!!!
    السودانيين منكشحين في بلاد الدنيا متل الروب المخستك
                   |Articles |News |مقالات |بيانات

01-05-2007, 03:31 PM

Elmuez

تاريخ التسجيل: 18-06-2005
مجموع المشاركات: 3488

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    ناذر إنت نسيت

    بشاشا ذاتو مش جلابي ?
                   |Articles |News |مقالات |بيانات

01-05-2007, 03:37 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Elmuez)

    وتراجي برضو قالو سودانية جذورا من بورتسودان قبال تمش كندا وتتجنس بي جنسيتا !!
    وبقال برضو قالو أساسا هو أصلو وأجدادو من السودان يعني ما متشبر فينا ساكت !!
                   |Articles |News |مقالات |بيانات

01-05-2007, 03:37 PM

عبد الغفار عبد الله المهدى


للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    نان ابو الحسين
    دحين تانى بريحنا
    خبر متل ده حقو تدسهو منو
    وما بعيد بكره يطلع لينا انه (كونداليزا رايس)
    من الدلنج
    او بان كى مون
    من مواليد تنقاسى السوق
                   |Articles |News |مقالات |بيانات

01-05-2007, 03:46 PM

Elmuez

تاريخ التسجيل: 18-06-2005
مجموع المشاركات: 3488

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    غايتو الحزب الشيوعي يلحق رقبتو سريع و يضيفو للإنقساميين

    لأنه بكرة ناس ألوان بلقو ليهم موضوع !
                   |Articles |News |مقالات |بيانات

01-05-2007, 03:55 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Elmuez)

    حلوة يا المعز

    ;D
                   |Articles |News |مقالات |بيانات

01-05-2007, 03:56 PM

ASAAD IBRAHIM
<aASAAD IBRAHIM
تاريخ التسجيل: 26-11-2003
مجموع المشاركات: 3920

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: ناذر محمد الخليفة)

    العملوا منقستو في اثيوبيا كانت تبدو فيهو ملامح الغتاتة الشايقية المعروفة
                   |Articles |News |مقالات |بيانات

01-05-2007, 04:05 PM

wadalzain
<awadalzain
تاريخ التسجيل: 16-06-2002
مجموع المشاركات: 4194

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: ASAAD IBRAHIM)

    ما تنسوا نتنياهو ياجماعه الزول ده اهلوا من جنبنا
                   |Articles |News |مقالات |بيانات

01-05-2007, 05:28 PM

Adam Omer
<aAdam Omer
تاريخ التسجيل: 14-03-2007
مجموع المشاركات: 4477

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Elmuez)

    طــــــــيب كولين باول من وين
                   |Articles |News |مقالات |بيانات

01-05-2007, 04:05 PM

Elmuez

تاريخ التسجيل: 18-06-2005
مجموع المشاركات: 3488

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    Quote: حلوة يا المعز


    الأدهى من كده يا ناذر

    أنهم ممكن يقولوا إستلم السلطة في أثيوبيا بإيعاز من "قريبه" عبد الخالق

    ثم عاث فيها فسادا و تقتيلا

    كل شئ وارد

    خاصة و أنهم عايزين يحموا ضهر تجربتهم الماثلة

    و الحيطة القصيرة معروفة!


    صنفرة:

    لو كنت ضياء البلال لأسرعت للقاء نقد مجددا .. تبع (بند الطارئ)!
    طبعا نقد حا يقول ليه ( بعد ضحكة) "ده كله كلام فارغ" !

    (عدل بواسطة Elmuez on 01-05-2007, 04:11 PM)

                   |Articles |News |مقالات |بيانات

01-05-2007, 04:14 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Elmuez)

    والله يا المعز الليلة متعتني عديل كدة ;
                   |Articles |News |مقالات |بيانات

01-05-2007, 04:37 PM

Biraima M Adam
<aBiraima M Adam
تاريخ التسجيل: 04-07-2005
مجموع المشاركات: 12828

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Elmuez)


    ناذر

    الله الله! هل أنت متأكد ماريا كارى من جبال النوبة
    Quote: والمغنية ماريا كيري برضو سودانية من جبال النوبة إسمها الحقيقي مريا خيري !!

    وتاني شنو ؟!!!

    دى أكيد تكون بقارية .. كل ما أشوف عيونها العسل ديل أقول تشبه لى بنات البقارة .. بروكلن جاك نفر فى نهاية الأسبوع.

    بريمة
                   |Articles |News |مقالات |بيانات

01-05-2007, 04:27 PM

Elmuez

تاريخ التسجيل: 18-06-2005
مجموع المشاركات: 3488

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    أها النزيدك

    المشكلة التانية اليومين ديل في إرهاصات لقاء صحفي مع أبو القاسم و غالبا يسمع بي خبر منقستو,

    ممكن يقول لي ناس ألوان إنتو ركزوا علي عبد الخالق و أنا خلو لي ناس هاشم العطا و بابكر النور,

    حا يقول ليهم منقستو كان المشروع التاني لي هاشم بعد مايو

    و منقستو كان كثيرا ما يتردد علي أم درمان أصلو أهل أمه من الدعيته(ناس هاشم)

    و يواصل: "أها أنا فتشت جيب الشفيع و لقيت أوراق الخطة التالية 'منقستو'..و ده سبب إعتدائي على الشفيع" !

    تصور !
                   |Articles |News |مقالات |بيانات

01-05-2007, 04:38 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

                   |Articles |News |مقالات |بيانات

01-05-2007, 04:54 PM

Elmuez

تاريخ التسجيل: 18-06-2005
مجموع المشاركات: 3488

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    الترابي طبعا حا يلقى ليه زيادة "خير" يضمها لي حلف المعارضة "الشعبوية"!

    ده لو ما كانت ندوته الجاية في مصوع,

    الصادق ما أظنه يمانع بس حا يقول ليهم ممكن نقبل نقدو الذاتي بعد التعديل !

    الميرغني يادوووب حا يقول للجماعة فعلا بعد ده (الباب يفوت جمل)!

    نتمنى أن لا تشطح (الحركة الشعبية) و تسعى لتكوين (قطاع الهضبة) و نبقى في (عرمان قرر يواصل دراسة الطيران في أثيوبيا)!
                   |Articles |News |مقالات |بيانات

01-05-2007, 05:00 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    بريمة ...

    Quote: الله الله! هل أنت متأكد ماريا كارى من جبال النوبة


    والله يا بريمة كتبت ليك كلام كتير هنا ولمن داير أرسلو لمحت خالد دافنشي في المنبر قمت صراحة كدة هرشت وإتراجعت

    الخواف ربى عيالو يا أبوي

    بجيك بعدين أرد ليك بعد ما دافنشي يتخارج
                   |Articles |News |مقالات |بيانات

01-05-2007, 05:03 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    المعز ..

    Quote: نتمنى أن لا تشطح (الحركة الشعبية) و تسعى لتكوين (قطاع الهضبة) و نبقى في (عرمان قرر يواصل دراسة الطيران في أثيوبيا)!


    غايتو لو دايرين يعملو قطاع الهضبة فأنا أرشح لرئاسة القطاع صحبي محمد E سليمان الحبشي
                   |Articles |News |مقالات |بيانات

01-05-2007, 05:25 PM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2548

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: ناذر محمد الخليفة)

    هاكم دي كمان ..
    في بوست جديد لنج .. قال أسياس أفورقي جعلـــــــــــــــي من المحمية ...


    الأرباب
    جعلي من المكنية
    قريب الرئيس أسياس أفورقي
                   |Articles |News |مقالات |بيانات

01-05-2007, 05:36 PM

wesamm
<awesamm
تاريخ التسجيل: 02-05-2006
مجموع المشاركات: 5128

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Khalid Saeed)

    انتو الشوايقة ديل قصتهم شنو
    نتنياهو طلع شايقي منقستو طلع شايقي والبشير فيهو دم شوايقة!!!!!!!!!!
                   |Articles |News |مقالات |بيانات

01-05-2007, 05:39 PM

JOK BIONG
<aJOK BIONG
تاريخ التسجيل: 14-11-2006
مجموع المشاركات: 5378

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Khalid Saeed)

    اسحق روبين كمان شايقي!!
                   |Articles |News |مقالات |بيانات

01-05-2007, 06:16 PM

Adam Omer
<aAdam Omer
تاريخ التسجيل: 14-03-2007
مجموع المشاركات: 4477

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Khalid Saeed)

    الاخ خالد الســــــــيد ســــــلامـــات اســياس افورقى دا اكيد من بقايا حملة الدفـتردار ولا انت قاسض شنو؟
                   |Articles |News |مقالات |بيانات

01-05-2007, 05:53 PM

ود محجوب
<aود محجوب
تاريخ التسجيل: 22-04-2003
مجموع المشاركات: 7227

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: ناذر محمد الخليفة)

    السلام عليكم


    بعيدا عن هترشات ناس ناذر وجماعتو


    فاذا كان والد منقستو المزعوم ذهب الى اثيوبيا فى الخمسينات كما ورد فى التحقيق الصحفى فلا يمكن أن يكون والد منقستو

    فاذا كان منقستو كان ضابطا كبيرا شارك فى الأنقلاب ضد هيلا سلاسى عام 1974 وتولى الحكم عام 1976 فكم يكون عمره انذاك

    وتقديريا منقستو من مواليد اوائل الأربعينات وحتى الخمسينات كان والده المزعوم بالسودان


    دى كيف دى؟؟
                   |Articles |News |مقالات |بيانات

01-05-2007, 06:31 PM

Balla Musa
<aBalla Musa
تاريخ التسجيل: 30-12-2004
مجموع المشاركات: 15238

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: ود محجوب)

    وكوندليزا رايس ماتنسوها أصلها من دارفور واسمها قونقليزا الريس.
                   |Articles |News |مقالات |بيانات

01-05-2007, 06:25 PM

بكري الصايغ

تاريخ التسجيل: 16-11-2005
مجموع المشاركات: 19331

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    1- السـفيـرالـبريطاني في الخـرطوم يصـرح: ثلث وزراء حكومة الوحدة الوطنية بريطانيون!!.

    2- هناك ممثل بريطاني معروف جده الإمام المهدي ويمكنك أن تبحث عنه في الشبكة.. إسمه:
    Siddig El Fadil
    وإسمه الفني
    Alexander Siddig.

    3- ..... جـاء فـي كـتب التاريـخ، ان الـخـواجة الاغـريقـي " كـوسـتا" هـو اول " خـواجـة " وصـل الي منطقة "كـوسـتي" ولـم يكن وقتها تحـمل ذلك الاسـم، واعـجـتبة المنـطقة كثيـرآ فاقام فيـها مع سـكانهـا الاصلـييـن وعلمهم زراعة الشـاي والتبـغ ، وشـيـد مصـنعاصـغيـرآ لصـناعة الشـاي وجـلب من مصــر واليونان معـدات الـحصاد وادوات الزراعـة،ولكنه فشـل فـي زراعـة الزيتون الذي هـو عـماد الزراعة فـي اليونان، وبعـد تطـور المنقطة اقتصـاديآ وازدهـارها، اطـلق علي المـنطة اسـم " كـوسـتا" وتــول الاسـم فيـما بعـد الي " كــوســتـي ". وكان الخـواجـة " مـزواجـا"
    بلغ عـدد زوجـاته اكـثر مـن سـبعيـن زوجــة!!!!!، بعـض احـفاده هـناك في كـوسـتي مازالوا يـحـملون لـون بشــرته البيـضاء بـجـانب الشـعـر الناعـم!!!.
                   |Articles |News |مقالات |بيانات

01-05-2007, 06:44 PM

عمر ادريس محمد
<aعمر ادريس محمد
تاريخ التسجيل: 27-03-2005
مجموع المشاركات: 6771

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    Quote: طبعا نقد حا يقول ليه ( بعد ضحكة) "ده كله كلام فارغ" !


    ونص وخمسة
                   |Articles |News |مقالات |بيانات

02-05-2007, 02:29 AM

يسرى معتصم
<aيسرى معتصم
تاريخ التسجيل: 25-12-2006
مجموع المشاركات: 4033

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: عمر ادريس محمد)
                   |Articles |News |مقالات |بيانات

02-05-2007, 03:00 AM

حيدر حسن ميرغني

تاريخ التسجيل: 19-04-2005
مجموع المشاركات: 20142

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: يسرى معتصم)

    ناذر والمعز

    الراحل د. عبد الله الطيَب قال عنترة زاتو سوداني

    وكمان سيدنا بلال رضي الله عنه برضو قال عنه انو سوداني

    يعني الفضل منو بعد ده
                   |Articles |News |مقالات |بيانات

02-05-2007, 03:28 AM

القلب النابض
<aالقلب النابض
تاريخ التسجيل: 22-06-2002
مجموع المشاركات: 8418

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: حيدر حسن ميرغني)

    الشوايقة يحكمون العالم من اسرائيل الى منابع النيل ..

    دي مشكلة في الجينات ..

    معقولة بس يا جماعة ...

    وهم بيقولو كان نجح للعسكريي وان فشل للطوريي ..

    مشاركة من خارج الاستديو ..











    دا الجايب ليهم العين

    (وش ضاحك)
                   |Articles |News |مقالات |بيانات

03-05-2007, 09:59 AM

بكري الصايغ

تاريخ التسجيل: 16-11-2005
مجموع المشاركات: 19331

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    لثلاثـاء 07 رمضـان 1423 هـ 12 نوفمبر 2002 العدد 8750


    السودان في الكتب المقدسة.
    ---------------------------

    إمام محمد إمام.

    «الشرق الأوسط»

    بدأت في العقدين الماضيين محاولات بعض الباحثين والمؤرخين السودانيين في البحث عن جوانب تاريخية دينية مهمة غير معروفة عن بلادهم، وذلك من خلال الكتب المقدسة، فمن هؤلاء الباحثين البروفسور عبد العال عبد الله عثمان مدير جامعة جوبا الاسبق وأستاذ الجراحة في كليات الطب بالجامعات السودانية، الذي حاول في دراسته القيمة، التي اصدرها اخيراً في كتاب بعنوان «تاريخ السودان في ظلال الكتب المقدسة»، الربط بين الاحداث التاريخية والمواقع الجغرافية.

    فيستخلص الباحث من الحقائق التاريخية التي تشير الى ان بلاد النوبة (شمال السودان) اصبحت جزءا لا يتجزأ من مصر لفترة ستة قرون (1600 الى 1000ق.م)، ولقد بلغت الصلات قمتها في عهد الملك رمسيس الثاني (1301 ـ 1235ق م). وكان لمصر ثلاث عواصم في عهد الملك رمسيس الثاني، طيبة (الاقصر) في الوسط ثم مدينة رمسيس شمالاً في شرق الدلتا وكذلك ابو سمبل جنوبا في بلاد النوبة. ان معبد ابو سمبل الكبير هو المعبد الوحيد في بلاد النوبة الذي بني على ساحل النيل، كما تشير الآية الكريمة في قوله تعالى «ولقد مننا عليك مرة اخرى اذ اوحينا إلى أمك ما يوحى ان اقذفيه في التابوت فأقذفيه في اليم فليلقه اليم بالساحل يأخذه عدو لي وعدو له وألقيت عليك محبة مني ولتُصنَع على عيني»، الى ان تيار المياه المنحدرة من الجنوب الى الشمال هو الذي حمل التابوت الى منطقة الساحل لان كلمة (فليُلقه) تشير الى القوة المائية التي حملت التابوت. فلقد برهن الاعجاز الالهي ان سيدنا موسى عليه السلام ولد في بلاد النوبة ثم حمله اليم الى ساحل ابو سمبل. وهكذا شاءت العناية الالهية ان يلتقط آل فرعون موسى وجعل الله سبحانه وتعالى له محبة من آل فرعون حيث قالت زوجة رمسيس الثاني لزوجها «لا تقتلوه عسى ان ينفعنا او نتخذه ولداً».

    ويذهب الباحث الى ان هذه الالفة والمحبة التي وجدها في بيت رمسيس الثاني وبين عشيرته تنفي انتماءه او انتسابه لبني اسرائيل، وذلك لانه جاء من بلاد النوبة بينما بني اسرائيل كانوا موجودين في منطقة الدلتا التي جاءوا اليها من ارض كنعان. وفي حقيقة الامر ان اسم موسى اسم مصري وقد اثبته مونتي، وكذلك مسّى اسمان في قائمة الاشخاص في اللغة الهيروغلوفية لرانك، وكلمة موسى هو نقل لهذا الاسم في القرآن الكريم.

    ويخلص البروفسور عثمان الى ان هذه الدراسة هدفت الى تأصيل نسب سيدنا موسى، وأن الادلة تشير الى انه ليس يهوديا، وانما كان نوبياً، ويؤكد ان الحجة البالغة في ذلك تأتي من احاديث الرسول صلى الله عليه وسلم في فتح الباري (شرح صحيح البخاري)، حيث ذكر النبي صلى الله عليه وسلم ليلة أسري به فقال «موسى آدم طوال كأنه من رجال شنوءة» أيضا كتاب احاديث الانبياء عن ابن عباس رضي الله عنهما قال: قال رسول الله صلى الله عليه وسلم «رأيت موسى وعيسى.. الى: وأما موسى فآدم جسيم سبط كأنه من رجال شنوءة». وكذلك في كتاب الايمان باب الاسراء برسول الله صلى الله عليه وسلم الى السموات وفرض الصلوات عن ابن عباس قال: قال رسول الله صلى الله عليه وسلم «مررت ليلة أُسري بي على موسى بن عمران عليه السلام، رجل آدم طوال جعد كأنه من رجال شنوءة». كلمة آدم تعني سواد وسُمرة الجلد، ومن المعلوم أن بني اسرائيل من أبناء سام، وجلودهم بيضاء وليست سوداء، ولكن اليهود يزعمون ان الفلاشا الذين جلودهم سمراء تناسلوا من منليك الاول، وهو ابن سليمان من ملكة شيبا.

    وتطرق الباحث الى زواج سيدنا موسى، مؤكداً انتماءه الى اهل السودان، بانه قد تزوج امرأة كوشية اي مواطنة من شمال السودان تتحدث بلسان قومه (سمي السودان كوش في حقبة تاريخية معينة). ولو كان سيدنا موسى يهوديا لما استطاع ان يتزوج امرأة غير يهودية بأي حال من الاحوال، ومما يثبت ذلك ما جاء في الكتاب المقدس (العهد القديم والعهد الجديد).

    وفي هذه الدراسة يذهب البروفسور عثمان الى ان لقمان الحكيم من اهل السودان، ويدلل على ذلك بان هنالك احاديث عديدة لرسول الله صلى الله عليه وسلم تشير الى ان لقمان من اهل السودان، فيقول «عندما قرأت سيرته في تفسير ابن كثير وجدت ذلك مؤكداً، وانا اؤكده زيادة على ذلك من ناحية صنعته، حيث كان نجاراً وهذا يعني انه كان يصنع المراكب التي تسافر بها الوفود على النيل بين الحضارة السودانية والحضارة المصرية..». وأوضح الباحث ان الرسول صلى الله عليه وسلم اشار في احد احاديثه الى الناس بأن يتخذوا السودان لأن فيه بلال والنجاشي ولقمان. وكذلك استشهد الباحث بقول النبي صلى الله عليه وسلم «من لم يكن له أخ فليتخذ أخاً نوبياً».

    ولم يكن الباحث هو الوحيد الذي اشار الى ان هجرة الصحابة الاولى الى الحبشة، كانت في حقيقة الامر هي هجرة الى السودان، اذ اشار الى ذلك كل من البروفسور عبد الله الطيب (شفاه الله) مدير جامعة الخرطوم الاسبق، والبروفسور حسن الفاتح قريب الله مدير جامعة أم درمان الاسلامية الاسبق، والبروفسور احمد علي الامام مدير جامعة القرآن الكريم الاسبق وغيرهم. يؤكد الباحث في دراسته ان الهجرة الاولى كانت الى سوبا، وهي براهين لا تقبل الشك، حيث اصبح هنالك حي بالمدينة يحمل اسم المسلمين عبر التاريخ، وكذلك وجود اللغة العربية كلغة اساسية في الحبشة، وكذلك في الجزء الجنوبي من بلاد النوبة المعروف بمملكة علوة وعاصمتها سوبا، واعتنقت هذه الدولة الديانة المسيحية. وأورد الباحث برهانا آخر، وهو سهولة الطريق بين جزيرة العرب وسوبا. وعليه فقد أنشئت مواني عديدة في اراضي السودان بحدوده الحالية. وان اول ميناء انشأه العرب سمي باضع وهي مشتقة من كلمة بضاعة.

    واورد الباحث ما ذكرته بعض الكتب التاريخية عن الهجرة الاولى للمسلمين، حيث قال الرواة: لما رأى رسول الله صلى الله عليه وسلم ما يصيب اصحابه من البلاء، قال لهم «لو خرجتم الى ارض الحبشة فان بها ملكا لا يظلم عنده احد، وهي ارض صدق يجعل الله لكم مخرجا مما انتم فيه». فخرجوا اليها متسللين سيرا على اقدامهم، حتى اتوا الشعيبة فاستأجروا لهم سفينة وعبروا بها الى الشاطئ الغربي الذي به بلاد الحبش اي السودان.

    ويجتهد الباحث في هذا الصدد قائلاً: «وأقول انهم عبروا الى ميناء باضع لانه يقع جنوبا بالنسبة للموانئ التي أسسها الاوروبيون للتعامل مع مملكة مروى ولانها اقرب الى مكة، ولقد أنشأها العرب، فهي اولى بالتعامل واني اجتهد وأقول ان الطريق من باضع يتجه غربا حيث يلتقي بنهر عطبرة، ثم يتبع نهر عطبرة حتى يلتقي بنهر النيل في منطقة الابواب ومنها يتجه جنوبا في نهر النيل حتى يصل الى منطقة الكدرو، وهي من اقدم المدن في تلك المنطقة.

    ولقد كانت هذه الدراسة محاولة جادة من البروفسور عثمان لابراز جوانب مهمة غير معروفة عن تاريخ السودان هدفت الى تأصيل هذا التاريخ من خلال الكتب المقدسة، لرسم حقائق غائبة في الخارطة السودانية. فالتاريخ لا يكتب بالأهواء ولكن يسطر بالحقائق والوقائع. فعليه نلاحظ ان البروفسور عثمان بذل جهداً مقدراً واجتهادا معتبرا في الربط بين الاحداث التاريخية والمواقع الجغرافية وصولا الى معرفة حقيقة «تاريخ السودان في ظلال الكتب المقدسة».


                   |Articles |News |مقالات |بيانات

03-05-2007, 12:04 PM

doma
<adoma
تاريخ التسجيل: 04-02-2002
مجموع المشاركات: 15894

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: بكري الصايغ)

    Quote: قديمة من الخمسينيات وأحمد الحسن كان بالشمالية، وُلد وتربّى بها وترعرع، وكان يعمل بالزراعة في أمان الله بعد داك عرّس من أقربائه وكانت مرتو حبلى بي ولد، وجاء الخرطوم للشغل في بيوت السكة حديد وبعد داك طلع طوالي مشى الحبشة وانقطع منو الخبر وما جاء زول منو نهائي ولا في واحد من بلدنا مشى الحبشة غيرو عشان يجيب لينا خبر.. وطالت السنين والكلام كان قبل الستينيات
    Mengistu Haile Mariam (IPA: mɛngəstuː hɑjəlɛ mɑːʀjɑm) (born 1937 [1] [2]) is a Communist politician who was the President of Ethiopia from 1977 to 1991. During much of this period, the country was led by the Mengistu-allied Workers' .>..
    لا حولا يا ناس منقستو دا من مواليد 1937 والراجل دا مشي الحبشه في الخمسينات كما قالت حاجه ست نور كيف يكون ولد منقستو ؟؟؟
                   |Articles |News |مقالات |بيانات

03-05-2007, 12:16 PM

doma
<adoma
تاريخ التسجيل: 04-02-2002
مجموع المشاركات: 15894

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: doma)

    الطبزه التانيه في القصه الراجل محمد الحسن محاري دا يا كافي البلاءا طلع من اليلد رجل محمل و مكمل وترك زوجته حامل رجع لما بت اخته شافتوا في كسلا عرفته وساقتو البيت وهو ما بعرف عربي نهائي الا جابو ترجمان حبشي سائلو من اسمه لووووووووول دي تجي كيف دي ؟؟ ناسك ديل ان بقيتا عندهم طين دايرين يقسموا كلنا ولاد محمد الحسن محاري
                   |Articles |News |مقالات |بيانات

03-05-2007, 01:41 PM

Faisal Al Zubeir
<aFaisal Al Zubeir
تاريخ التسجيل: 25-10-2005
مجموع المشاركات: 9313

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: doma)

    Quote: تعليقاً على إنتماء منقستو للشايقية
    الوزير هاشم هارون : سمعت بالقصة منذ الثمانينيات..!
    لاقت القنبلة التاريخية التي فجرتها «الوطن» أمس حول إنتماء الرئيس الأثيوبي السابق منقستو هيلي ماريام لقبيلة الشايقية ولمنطقة الدهسيرة تحديداً.. صدى واسعاً بين مصدق ومندهش ومكذب.ولكن الوزير هاشم هارون وهو من أبناء تلك المنطقة اتصل برئيس التحرير في الصباح الباكر أمس وأبلغه بأنه سمع ذات هذه الرواية التاريخية من الدكتور احمد عمر في النصف الأول من ثمانينات القرن الماضي.
    وقال الوزير هاشم هارون إن والد منقستو كان يعمل بالفعل في الشمالية عندما طُلب منه الإتصال بابنه منقستو فقال لمن حاول معه « الصغير يجي للكبير والولد يجي لأبوه»..!
    الوطن 2 مايو 2007
                   |Articles |News |مقالات |بيانات

03-05-2007, 02:15 PM

Muna Khugali
<aMuna Khugali
تاريخ التسجيل: 27-11-2004
مجموع المشاركات: 22503

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Faisal Al Zubeir)

    طيب وايه يعني..
    بوش عنده ود عمه.. امه كانت متزوجه ابن عم جدي الباشا..
                   |Articles |News |مقالات |بيانات

03-05-2007, 02:40 PM

Tragie Mustafa
<aTragie Mustafa
تاريخ التسجيل: 29-03-2005
مجموع المشاركات: 49964

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Muna Khugali)

    مايقوله الاصيوبين الامهرا اقرباء هيلوسلاسي

    ان منقستو من (عبيد الامبراطور الامهري ) وانه نشأ في القصر الامبراطوري

    وحقد على الامبراطور لاجل معاناته داخل القصر.
                   |Articles |News |مقالات |بيانات

03-05-2007, 04:21 PM

ناذر محمد الخليفة
<aناذر محمد الخليفة
تاريخ التسجيل: 28-01-2005
مجموع المشاركات: 29123

للتواصل معنا

FaceBook
تويتر Twitter
YouTube


Re: قنبلة تاريخية :مقستو هايلي ماريام شايقي من الدهسيرة (Re: Tragie Mustafa)

    قطعت أم رشيرش قول كل خطيب !!
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de