كلام النســوان .. * عيب *

Quote: راينا ان رصد لغه الجسد والتدقيق في حروف اللسان من متابعات علم الاجتماع الراقيه.. ونزداد تشوق للمزيد من اقوال انثى حضاره كالسودانيه الناطقه بعصاره شعوب و امم و تاريخ ..

Quote: والمرأة تحكي له عن الغلاء والتدهور الذي ألم بالبلاد وهو كلما تحكي له يقول ( ووب علي .... سجمي سجمي .. كر علي كر علي ) وانشدهت المرأة مستغربة دون تعليق فأدرك الموقف أخ وأخذه لخارج الغرفة وقال له شنو ياخي انت شابك المرأة ووب وكر وسجمي دا كلام شنو يا اخوي .. بكل بساطة اجابه الأخ اياه ( مُش زمان الناس في السودان لما يدورو يحلّو الونسة بقولوا كدا ) فرد له الاخ يا اخي ديل النسوان البقولوا كدا

تعرف يا خالد زولك ده كان "ود أمو" وبتاع جلسات الحريم
عندنا واحد كان معانا فى الثانوى . فى الكورة فردة باك وعنيف ولسانو طويل بأسلوب أنثوى وغير معقد مهما تعرض له الناس بالألفاظ ومعروف إنو راجل سوى والناس بتداعبو . يوم فى حصة البايلوجى الأستاذ بتكلم على الهرمونات وتواجدها لدى الإنسان ذكر أو مرأة بنسب منسقة. قال أحيانآ تزيد الهرمونات المذكرة لدى المرأة فتخشوشن فى صوتا ويقوم ليها شنب الى آخره . ونفس الشيئ لدى الرجل ويحصل ليهو كذا وكذا فنط صاحبنا وقال ليه (سجمى يا أستاذ أنا هرموناتى ما عالية )

كل سنة وإنت طيب

Quote: لما كنا صغار ونتشاكل وتقوم لاوي يد زول مشاكلوا أول حاجة بتقولها ليهو: قول (واي).. يقول ليك : ما بقولا.. تزيد لوية إيدو لحدي ما يقولواااااااي)..تقوم تفكوا! وده دليل علي انتصارك!

طفولتكم شريرة ياخى . نحن كنا نخليه يا "يكد الدوم" ولا يقول "الروب"

Quote: وحتي في اغاني البنات بتلقاها في : واي..واي.. خلاني براي..المسافر ما جا ..خلاني براي!

واى عند البنات مسموح بيها ولزيزة لكن عند حمادة بت شينة وما بتبلع
لما كنا طلبة كنا بنسجر . الوالدة زرت صديقى محمد شايل سجارة . قالت ليه "سجمى يا محمد" قال ليها سجمى أنا الليلة ياحجة .

كل سنة وإنت بخير

Quote: فى أمدرمان قديمآ المرأة المثقفة تتعرض للنقد الحريمى لطريقة حديثها بأنها تنقصها الأنوثة انت ما سمعت ب سجمى جدا ووب على خالص?

ما بس الكلام مثلآ يقولن ليك "فنسة فى العنقريب زى النسوان ما بتعرف زى العسكرى .. دى مرة شنو؟

سجمى جدآ ووب على خالص دى بتاعة بت قضيم . الله يرحمو الفاضل سعيد

ودى

Quote: العزيز رافت تحياتي كر طولت الغيبة ان شاء الله خير ووب علي من غيابك نحنا ما بنقدر ليهوا

Quote: اها رايكم شنو اوعى تصنفوني من الجماعة

تبرا وتستبرا يا يمه منهم

Quote: والله يا رافت هذا الموضوع عنوان لبحث علمي رايكم شنو انا الفيني مكفيني من بحث الماجستير

ده شعر ما عندى ليهو رقبة . نشوف د. شهاب .
ربنا يعينك وبالتوفيق والنجاح بإذن الله

كل سنة وإنت طيب

Quote: المغتربات حاولن مجارات التعابير السودانية في ما يتناسب ووضعهن في بلد الغربة : الرسول يا انتي ما عندك الشنو داك ما عارف ؟؟؟ ترد الاخرى والله يا انتي يبقى لي بخروج نهائي ...

دى ترجمة خليجية لـ"يدخل علىّ بالساحق والماحق" .
الخوف ما من الكفيل الخليجى الخوف من القريب يقوم يدبل وتطلع بى خروجين

مودتى

Quote: بنـاتنا الـحـلفاويات ماقاعـدين يسـتعـملواالكلمات بتاعـت البنات العـرب وعـنـدهـن مـصـطلـحاتهـن الأخـري. نفـس الكلام ده ينطبق عـلي بنات الـدينكا او البـجـا!!!. فياريـت لـو راح "البـوسـت" ده واتوسـع واسـتقبل مـصـطلحـات مـن كـل قبيـلة وتعـم الفائـدة

برضو لغة نسوية بالرطانة ؟
بنات الحلفاويات والبجا هادئات الا قدام المزيكا بتتفجر حواسهم كلها . أما الدينكا نساء قويات من كلو حالة عجب . يا ريت كلمات بترجمة على الشريط . خلينا ليك الحلفاويين والدينكا لشوقى بدرى أما البجا نشوف ماضى بس ما يعملا لينا كلها جبنة

Quote: بالـمناسـبة، الـمسـلسـلات العـربيـة خـربت طـبع بعـض بناتنا اللأئـي اصـبحـن يقلـدن الـمصـريات ويسـتعـملن مـصـطلحـاهـن: 1ـ ياي بلـدي خـالص، 2ـ دقـة قديـمة، 3ـ ياعـمـي- تـحـولت الي " ياعـمو " 4- و"الـحـبوبة" ماحـصل ليها اي تغـييـر. وهناك كمـان فـي يا" خـالو " وياجـدو!!"،وضـاعـت كـلمات " ياخـالي، ياجـدي ياعـمي!!".

زكرتنى النسوان الما بحبو الكبر لما تداعب الواحدة بى خالتو تقول ليك "يخلخل نيبانك" ولما تقول عمتو تقول ليك "عما كباسا"

المعجم الجديد فيهو كمان لبنانى زى "يا بعد عمرى" لزيزة لكن ..

مودتى

Quote: والموضوع مافيهو أى جندرة ]

Quote: يعني نحنا ما نجي ولا شنو؟ كان كدة الرماد كال خشمنا والتراب كال خشم البوست

تنورى البوست بس إنتى باين ما بتعرفى الجندريات . مهابشة الحريم بالسالب بقلبوا فى راسك التربيزة محل تقبل ما تلقاهو عشان كدة بنفدم السبت

Quote: في الحقيقة الكلمات دي او معظمها في طريقه للانقراض الشباب (اقصد الفيميلز) بقوا ما بيستعملوها ويمكن بيتحاشوها كمان في مجتمعاتهم الشابة. عشان كدة حقو نلحقها بي قاموس سريع قبل ما تنقرض (قاموس اللهجة العامية لي عون الشريف فيهو ذكر للكلمات دي؟) لانو لو انقرضت كُر علينا وسجم خشم تراثنا اللفظي.

والله عوجة . هى لغة تلقائية ومميزة وقريبه من الروح . فيها ريحة الوالده والخالة العمة و الحبوبة الجارة وإنتماء كامل .

كنت يوم فى لندن فى "مول" كبير فيه تخفيضات وزحمة . طبعآ الناس كلهم سود وما بنفرزوا . قدامى سودانيتين عند الصراف وأنا مصهين منهم . بيتشاكلوا فى قميص لراجل واحده منهم . واحدة تقول سمح وواحدة تقول شين . قالت ليها "برى يختى مجغمز" فقعتها ضحكة وعرفونى سودانى

كل سنة وإنتى بألف خير

Quote: ان كان من آل اندريه هناك من هاجر منهم في كند ا واتقدهم

إسمو "مانوس" هاجر اليونان ويعانى هناك من الإضهاد وبسموهم "اليونانين العرب" . إمتهنوا كلهم شغل البواخر لوجود أكبر "Drydock " فى اليونان ومتخصصين فى السفن لعربية وبيستفيدوا من اللغة .
قابلتو فى السعودية فى شركة بواخر مع آخر إغريقى من أصل مصرى . كانوا يتكلموا مع بعض باليونانى ولما يتشاكلوا يقلبوا عربى واحد بلهجة سودانية والتانى مصرية وبأقبح الألفاظ

Quote: جندرني في عز الشهر وانت في ابوست بتمر وانت عارف انو عارف قلبي ما بحمل سهر

الله يكملو ليك الشهر بدون خسائر

Quote: ( احييييييييييي) بتدووووووووووووووووووووب با رافت قبال ما البت تكمل وحوحتها

قول واحد ... دى قبل ولا بعد الفطور .. أيوووووووو

Quote: عشا البايتات ويبقى لى السم صباح خيرى ود امى ـ بت امى حبيب قساى ضو البيت ود بطنى ـ بت بطنى صباح العافية نور عينى

عليك الله دى ما قصيدة هسة ! كلام سمح جد

Quote: امى الله يرحما كانت دى من كلماتها الحفظناها عنها مرة جات ضيفة عندنا قدمنا للضيفة عصير لمن خلصت العصير امى عليها الرحمة قالت للضيفة ـ هنيا الضيفة ردت بقولها ـ آممم

الله يرحما ويحسن قبولا . ناس هداوة بال ومافى صرمعة الزمن ده . بس (آممم) دى جديدة .

Quote: وبالمناسبة معظم هذه النداءات بدات تندثر بين الناس وحلت محلها مفردات مصرية وشامية مطرح مايسرى يمرى مثلا او كما قال سعيد صالح فى العيال كبرت(مطرح مايمشى يمشى ) عندنا فى بربر بتستخدم النساء دائما للتعبير عن الدهشة قولهن نوح من دا ،او نوح منك لا اعرف هل هو سيدنا نوح ام نوح اخر الحكاية جرت

يا ريت تجر طوالى ونوثق كلامك الجميل . الكلمات الوافدة (موضة) وتختفى لكن يبقى الأصل

Quote: عندى زول صحبى طوالى بقول (وتربة ابوى) يوم قاعد مع ابوه وبتونس معاهو فاذا به يقول ـ وتربة ابوى الابو طبعا انبهم قال ـ يا ولد خلينى اموت بعدين احلف بى تربتى اقعد عافية

زولك ده الله يجيبو ليهو قوى

الله يعافيك
وكل سنة وإنتى طيبة (مرتين)

Quote: الكلمة الوحيدة و التي فلتت , في ما أظن, و أصبحت مشتركة دون أن ينتبه ليها الرجال و ظلوا يستخدمونها مع أنها تستخدمها النساء عندنا هي كلمة " عاد " .. عاد ياخواني , عاد لكن , و عاد يا بنات أمي .. إلخ هي كلمة شينة في فم الرجال .. و لا تجد إنتباه مثل مثيلاتها المذكورات فوق ديل .. أم هي كلمة دبل هورمون !

تعرف "عاد" ما شينة طوالى . فى ناس بدلعو بيها الكلام خاصة مع الجنس اللطيف .
كنا مراجعين حسابات وبنحوم على الشركات فى بحرى . ود أبو سن رئيس التيم زول ظريف وكلامو بتاع ناس البطانة الحلو داك . فى الفطور بقول كتروا الروب "الزبادى" . كان فى سكريرة قبطية سمحة بتداهما فى الفطور . وقعت فى الزبادى وقالت ليه "كملت عليك الروب يا شيخ العرب " قال ليليها" ونان مالو عاد الروب وين يلقى خشيمك الحلو ده" ضحكت لامن الزبادى شرقا

Quote: فهل هناك ما يسمى باللغة النسوية و الأخرى الرجالية ?! أم مجرد تعابير !

فى لغة حريم سمحة وما مدسوسة . فى لغة رجال من شناتا بدسوها . وفى لغة مشتركة .

مودتى

Quote: نرجع لك فيما بعد باذن الله..

إنشاء الله برجعة ما زى بتاعة منال

منتظرنك

مودتى

Quote: ما عارف اتذكرت يوم قاعدنى مع واحد لبنانى عطس صاحبى قال ليهو يرحمكم الله رد ليهو (حبيب البى ).

Quote: في عام 1980 كنت بتمشى في شارع كوينزواي Queensway وهو شارع مشهور في لندن بالقرب من الهايدبارك Hyde Park تكثر فيه الجنسيات العربية والمسلمة نسبة لوجود المطاعم التي تبيع الأكل الحلال.. وعندما وصلت بالقرب من نادي قديم للتزحلج Skating Club صادفت في أثناء سيري ستات إثنين لونهن أسمر واحدة فيهن كانت تدفع عربة صغيرة Baby Stroller تحمل عليها طفل. توقفت الست الثانية وفتحت محفظتها وأخرجت فكة ودفعتها لرجل شحاد كان بيغني ويعزف بالجيتار للناس المارة. قامت الثانية صاحت فيها وقالت ليها: ووب علي.. وحات الله الراجل دا نصيييييح وما عميان ليه أديتي قروش؟ لما سمعت كلمة (ووب علي) ضحكت وعرفت أنهن سودانيات.

Quote: وفعلا..بدأت هذه اللهجة والكلمات النسائية الخالصة في الإنقراض...وأصبح كثير من الحبوبات الآن خريجات جامعيات ومن حملة الدكتوراة..وبقى السجم أفرنجي..ولاتيني...وحال التاباني بقي بقدرة قادر undesireable condition وخلاص..تلك التعابير المشبعة بالاحساس غاية ما نتمناه أن تؤرشف (من الأرشفة) للرجوع الأجيال القادمة.. أو ستحنط مثل اللغة الهروغلوفية أو القبطية القديمة...

يا ريت الإعتناء بها وياريت يضعها النساء تحت أجندة الدفاع عن النفس والمحافظة على الإرث ,

عندما يشب البنات فى المراهقة ومقتبل العمر يتمردن على هذه اللغة بأنها نوع من التخلف ومن الجيل الماضى الأقل تفتحآ . عند النضوج يعدن لها بحنين وإنتماء . فهى لغة محببة ومن الحزن أن تزول وهى بلا شك تضيف على الأنوثة دلال وتميز .

Quote: ورد أن عبارة "بعد قلبي/ أو بعد عمري" لبنانية.. والصحيح أنها خليجية..

والله كتبتها خليجية لكن الحجة غالطننى . تقافتها بقت ضعيفة

تحياتى

Quote: بس ملاحظتي انه كلام نسوان العاصمة القومية كلام نسوان الاقاليم فيهو اضافات حلوة وخاصة عندما تنتقل احداهن من الاقاليم الي العاصمة وعندما ترجع الي هنالك لاي مناسبة تتهم بإنها قلبت حسها

يقولوا ليك "من ما راحت الخرتوم إتفرنجت ولسانا إتلكن وماصنقرت فى الو اطة تانى "
نساء الأقاليم حاجة تانية الصوت فيه جرا زيادة ووصافاااات والكلام مقعد ويبدأ بالتشويق والقطيعة المكاوا فيها لويح باليدين ولولوة بالخشم ويمكن تقوم تحاكيها وتكعوجا بهزهزة الصلب


تصوم وتفطر على خير

Quote: فيو كلمات وعبارات طريفة النبي الرسول اليقيف ليك في السكة اليعتر ليك هي النبي فيك طلبتك بالرسول يدشدشك عرّضتك القطاعة إقيف ليك جبل إزاول ليك

إنتى عاد لا تتهدى لا تتمدي
خسمتك بالشيخ أب شرا أموت ليك وتدفنينى ما تطولى الغيبة تانى

رمضان كريم وكل سنة وإنتى طيبة

Quote: ارى انها وبرغم كونها عبارات انثوية الا انها تدل على حنان جارف فى كثير من الاحيان رجولتنا السودانية ارتوت من العبارات الانثوية الحنينة من الام والحبوبة بالتحديد مثل ان تلحظك الام وانت قادم من مشوار بعيد وتقول لك كر على شوف الولد ده خشمو اغبش كيف من الجوع او ان تشكرك امرأة عجوز اسديت لها خدمة بان تقول لك كتر خيرك ياحشاى باختصار هى عبارات اثوية ذات دلالات حنينة اورثتنا الرحمة على بعضنا والاهتمام ببعضنا يجب ان تبقى ولا تندثر

Quote: وااا شريري يا رأفت يا ود أمي

Quote: وحات وليداتي أعدم جناي وحات نظري وعافيتي وحات سماعاتي ودماعاتي وحاتك إنت الما بحلف بيك بالكضب

لكن لقيتك وصاااافة
تربية حبوبتا

بس نسيتى
وحات أبو الوليدات سندى ودخرى
يقوم الراجل يدق سدرو ويدبل قفة الخضار


كل سنة وإنتى بألف خير

Quote: البقولن سندي ودخري ديل ما بقولوا أبو الوليدات لأنه الاحترام عندهن يقتضي عدم ذكره مباشرة لكن بقولن: وحات سيد بيتي

Quote: لغاية ما أجيكم بعدين ..

Quote: الرجال أخي رأفت في الكثير من المرات يستخدمون نفس المصطلحات بس بحرفنة ..... شديدة أنظر لهذاالشاعر: الليل والنهار واحد على العميان **** واللوم والشكر واحد على السجمان وأنظر لهذا حينما قال: إبكنَّك بنات والدك وبت والديك******وقالن ووب علينا وطال حُزُنّا عليك ..

كلام النسوان عشان حنين بدى الشعر رونق . وبليغ فى الوصف وتلقا أغانى الحماس والشجاعة أبلغها من النساء وبلغة النسوان . هى لغة شاعرية فعلآ

Quote: يضربك الضريب اليسل روحك . هل الضريب هناالمقصود بيه أبوفرار= السحائي؟ وهل هنالك تفسير للكثير من الكلمات المستعصاة مثل كر (ماذا تعني؟) - وأجي أيضاً

والله فعلآ كان لقينا زول يفتى فى أصل الكلمات أو حتى إجتهاد يفلسفا يكون فعلآ إثراء . لكن قصة "الضريب" هى السحائى ما ظنيت . عندنا بقولوا "إضربك الضريب شقاق العناقريب" سحائى شنو البشق ليه عنقريب .
مرات بتكون تكونت من مناسبات وحوادث مثلآ "جوعة بت الغرب الشوت رحطا" مرتبطة بمجاعة سنة ستة والله أعلم

Quote: قيل بأنه في مدينة رفاعة جابوا واحدة متقرضمة من الموظفات المتفلهمات للولادة. من باب المستشفى شابكا ليك الناس "اللهُ ليِ) - ضامة هاء الله وكاسرة ياء لي. عمك غفير المستشفى حرقته ليك المسألة. وراح متابعة ليك لغاية مادخلوها العملية ووقف بالشباك. بعد شوية - سمعها ليك تكورك - الله لي الله لي بالطريقة المعهودة - وسمع بكاء الشافع. قال ليهاك بت الكلب يا القضارف عارفك ما بتسرتيه لو ما قلت - الله لي حقتنا ديك - خلي اللهُ ليِ.

طبعآ الولادة تلتلة المرأة الحقيقية وبقت من أدبياتها . تقول والله الليلة كان تلد عديل ما بسوى ليك الشى الفلانى .

خالتى كانت عميدة مدرسة الدايات فى أمدرمان وكنت بزورا كتير . يوم الطالبات إتشاكلن وواحدة زعلانة وتشتكى من الحقارة قالت ليهم "آآآى أنا ما الجاية بالصلب"

مودتى

Quote: يالهوي على الحر النهار دا يالهوي على الأهلي كنت قايلة الكلمة دي برضو بتدخل في كلام النسوان العيب

أولا بمبة ديل خلينا منهم . ديل نسوانم أرجل منهم
ما عارف أنا بشوفا شينة فى خشم الرجال

يوم هنا فى سويسرا حضرنا خطوبة أقباط سودانية ومن المدعوين مصريين جابوا ليك أغانى مصرية والرجال إتحزموا ورقصوا . وفيهم واحد بتلولو رقاصة ما زيو وحولهم نسوانم وعيالم كشف للصباح . ديل جندرة ما عندهم مش بقولوا "نحن أخوات"


تحياتى

Quote: صايم؟؟؟ و لا زي كل مرة.

ماسمعتى بالمسيحى المشى الجامع لقى حلفاوى قال ليه داير يسلم . قال ليه "وعايز تسلم ليه" قال "مرتى مطلعا روحى داير أطلقا" قال ليه "والله يا خوى عندنا فى الإسلام حاجة إسمو رمضان اظرط من مرتك ده"

Quote: و بقوا يستعملوا مصطلح (( كلام حبوبات )) كدلالة على قِدَمُه و إنتهاء صلاحيته. الواحد لمن يتكلم كلام حبوبات بيكون....ما شادي حيلو. الواحدة لمن تتكلم كلام حبوبات بتكون...قليصة و مقدٌرة ومتنسونة و قاهر و ب قلباً مساهر.

هو من زمان فى مفردات ممنوعة للبنات الصغار والشافعة بقيلوا عليها قليصة . ومستهجنة لغير المتزوجات ودايمآ نهرت السكيت "يا بت إنقهرى"

زمان أختى كان عندها زميلة إتزوجت من المدرسة . قابلتا بعد فترة طويلة فبتقطع فيها قالت "كلاما بقى نسوان نسوان"

Quote: تتعلى ما تتدلى أو.. تتكسي هيبة..بركة الساكن طيبة أو.. تتبارك عليك شقيش ما تقبل أو.. ودعتك لسيد الوداعة الما بيخون وداعتو..

لكن والله كلام سمح ودعوات تطمن

كل سنة وإنتى طيبة