هكذا يموت الشعراء مرض وإهمال .. محجـوب سـراج .. مثال

حفل دعم الجالية السودانية بمنطقة واشنطن الكبري بالفنان عمر احساس
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 21-09-2018, 09:29 PM الصفحة الرئيسية

مكتبة ثابت محمد الجاك(ثابت محمد)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
23-02-2006, 09:52 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


هكذا يموت الشعراء مرض وإهمال .. محجـوب سـراج .. مثال

    ونسة حزينة
    مع زول رقيق جدا
    الرئيس كان ما مشغول بجيني ..
    الشاعر الغنائى محجوب سراج :
    عميان وعندي ثلاثة اولاد متخلفين عقليا
    -----------------------------------

    اما قبل :
    عربة الصديق وليد محمد خالد ما قصرت معنا ... فقد تبرع بها لتوصيلنا لهذا المشوار
    الذي شاركنا فيه الصديق الفنان غدير ميرغني لحبه الشديد لهذا الشاعر الرقيق ..
    اذن فقد نجحنا في الوصول الى منزل الشاعر محجوب سراج ...
    نحن الآن في وسط الحارة {18} بالثورة .. فسحة الجامع الكبير .. شاب سألناه : وين بيت محجوب سراج ؟
    اجابنا متسائلا : الشاعر ؟ .. جاري .. يلاكم اوصلكم انا الخير .. وذهبنا حتي وصلنا الى بيت من الجالوص طرقنا الباب.
    صوت من الداخل .. منو ؟
    الخير : انا الخير يا خالة نعمات ..
    حوش واسع عليه ثلاثة سراير حديد بلا مراتب .. الغرف مظلمة .. الا من لمبة واحدة في الحوش .. شابة لم تأبه لنا ..
    تقدمتنا خالة نعمات زوجة محجوب سراج حتي وصلنا الى سرير محجوب واقف مد يده في اتجاه غير اتجاهنا
    همس لنا الخير : اصلو عميان ..
    في اقصي الحوش سرير آخر عليه شاب نائم ذهلت .. هل صحيح هو محجوب سراج الذي نقصده ام هو شخص آخر يحمل ذات الاسم .. قطع هذه التساؤلات صوته العميق :
    مرحب حبابكم .. شرفتونا .. زمن ما جوني ناس زيارة ..ثم عرفناه بأنفسنا ..
    خليفة من الصحافة ..
    قاده الخير لندخل الى غرفته .. سريرين ودولاب من الفورمايكا ابوابه بلا مفاتيح .. تربيزة متوسطة واخري صغيرة ..
    لحظات صمت يكسرها هو بتكرار ترحابه بنا ولعله شعر بحرج موقفنا .. ثم بدأت عملي معه .
    * استاذنا محجوب جينا نسمع رحلتك الجميلة مع الشعر والفن ؟
    < والله انا طبعا اتخرجت من الثانوي قبل حوالي خمسين سنة .
    * انت من مواليد ام درمان ؟
    < ايوه ياخي مواليد ام درمان حي العرب.
    * اتولدت سنة كم ؟
    < اتولدت سنة 1938م وقريت في ام درمان لغاية الثانوي
    اتخرجت من المؤتمر الثانوية سنة 1957م ..
    بعدها طوالي مشيت ابحث عن شغل وصادف اني اشتغلت في الكهرباء والمياه سنة 1958م
    في المصلحة اتعرفت فيها بالفنان السني الضوي ..
    * كنت بتكتب شعر وقتها ؟
    < كنت بكتب شعر فصيح ما شعر غنائى ونشاطي كان في الجمعيات الادبية في المؤتمر الثانوية.
    * ................؟
    < انا والسني في نفس الوقت داك اشتغلنا في مجلة الصراحة وبقينا نقدم فيها اعمالا فنية ..
    والسني كان بعزف وابتدأ يلحن لي من اشعاري ..
    * هو اول من لحن ليك ؟
    < لا اول زول لحن لي هو صالح سعد فنان قديم ربنا يرحمه وده كان في بداية الستينات.
    * بتتذكر الاغنية ؟
    < في القطار انا قلبي طار يوم حبيبي ودعتو .. مسجلة في الاذاعة بي صوتو.
    * السني بدأ معاك شنو ؟
    < انا كنت بكتب شعر ما للفنانين لكن هواية عندي السني بدأ بتصفح الاعمال البكتبها لقي فيها جانب غنائى
    وهو كان يعزف على العود قال لي انا حألحن الحاجات دي وفعلا ابتدأ من اوائل الستينات يلحنها ويديها للفنانين .
    * وبديتو مع منو من الفنانين ؟
    < أدينا ابراهيم عوض ليه بتسأل عني تاني واغنية مين قساك مين قسى قلبك ..
    والاغنية الثالثة قصدني ما مخليني راخصني ما مغليني يا قلبي يا معذبني ..
    بعدين ادينا صلاح بن البادية اغنية الجرح الابيض ودي لقت رواج كويس.
    * مستحضر كلماتها ؟
    < دقيقة اتذكرها ليك (بعد لحظات)
    لو نعيم الدنيا عندك احرميني لو جحيم الآخره ملكك عذبيني يا ضناي ياوهج اشواقي الحبيسة جرح اصبح ما بسيل لو تجرحيني ..
    وصلاح ده برضو غنا لينا اول حب وآخر حب حبك نار وكله ودار منه بقول انا آه يا رب ..
    * لكــن انت مرتبط كثير بي الفنان صلاح مصطفي ؟
    < اتعرفت بي صلاح مصطفي وهو كان يادوب ناشئ سجل اغنية للاذاعة ويعزف في البيت وبلحن يحاول يخلق من نفسو فنان
    اديتو عددا من الاغاني ولحنها وقدمها للناس.
    * حبة شوق ؟
    < ايوه اغنية حبة شوق واغنية الماضي والحاضر البقول فيها :
    انت لو فكرت تتذكر غرامك وتبكي ماضيك البعيد
    برضي زيك كنت عاشق وكانت ايام عمري عيد
    يا سلام ..
    وغنا لي ما بغيرني صدودك عني ما بحولني غرورك يوم
    سيب نيران الشوق تحرقني واملأ ليلي عليا هموم
    غناها لي صلاح مصطفي هي احسن اوادعك وتودعني مادام حبك بيضيعني
    * عثمان حسين ما اديتو حاجة ؟
    < تصادف مرة لاقيتو في الاذاعة قال لي انا عملت لحن جميل لي كلمات عوض احمد خليفة
    لكن اللجنة ما اجازت الكلام دايرك لو بتقدر تعمل لي كلمات لي اللحن ده وسمعني.
    اللحن كان جميل وعجبني
    وكتبت ليه كلمات ؟
    < ايوة عملت ليه :
    احبك احبك الي ما لا نهاية
    واغنيك حنين وشوقي وهوايا
    لانك حبيبي وغاية رجايا
    * وتاني اديتو شنو ؟
    < لا غير دي ما غنا لي شئ لكن ثنائى العاصمة غنوا لي من زمن ما كانوا ثلاثة
    كان معاهم الحويج الله يرحمه اتوفي وهسة برضو ابودية اتوفي ربنا يرحمه.
    غنوا لي عددا من الاغاني ذي حيرت قلبي معاك خليتو بيك مشغول
    يا احلي من ضماك ما بصح عذابو يطول
    وتاني اغنية : يا حبيبي وانت غايب قلبي وراني العجائب ، مره شاكي ومره باكي وعمري ماحسيتو طايب.
    وبرضو اغنية : مهما تصدي عني ومهما زعلتي مني
    برضي بحبك يا حياتي
    * ده كلام عملتو في الستينات ؟
    < لغاية الثمانينات بتلقي فيه جزء.
    * الاغنية القدمتك للناس ولفتت الانتباه لشاعر اسمو محجوب سراج ؟
    < أغنية اول حب وآخر حب لصلاح ابن البادية .
    * واجمل اغنياتك في حسابك انت ؟
    < اغاني كلها مقربة لي نفسي ومحبوبة ولكن في حاجات استغرقت وقتا في كتابتها ذي الجرح الابيض لصلاح ابن البادية .
    * لسة بتكتب شعر ؟
    < لا وقفت من ما اتأثروا عيوني ديل .
    * طيب خلينا نتكلم عن حالتك الصحية .. انت مالك عندك شنو ؟
    < مشكلتي عيوني .. قبل ستة سبعة سنين عميت عديل ..
    وده خلاني ما اكتب شعر واقعد في البيت ما اشتغل وما عندي دخل ولا امكانيات وغايتو.
    * والاسرة كبيرة ؟
    < الحمد لله ثلاثة اولاد وتلاتة بنات واحدة منهن اتوفت الله يرحمها .. والباقي بتين وثلاثة اولاد ..
    منهم ولدين وبت عندهم قصور في النمو العقلي وبت واحدة اتزوجت وبقي معانا الصادق بس هو البعولنا مع المعاش بتاعي.
    * نحن مشينا فتشناك في حي العرب ؟
    < انا اصلا كنت ساكن في حي العرب في بيت ورثة كانت فيه 60 متر حقتي
    وهبتها لي خالتي بعتها بعد ما طلعت لي قطعة ارض في الحارة دي بنيتها جالوص بي ثمن الـ 60 متر في حي العرب.
    * قبيل قلت لينا مافي زول يزورك ؟
    < ايوه ..
    * الزملاء الشعراء واتحادكم والفنانين والمسؤولين ؟
    < ولا واحد منهم جاني لا شعراء لا فنانين لا مسؤولين .
    * قاعد تلومهم ؟
    < والله ما بلومهم ظروفهم امكن تكون صعبة.
    تدخل هنا خالة نعمات تحمل زجاجات البارد وجاءت منفعلة
    كأنها كانت تنتظر هذا القدوم لتفضفض : كدي يا ولدي هسة انتو براكم شفتو الحال ..
    ونحنا بنثق في عيونكم ده حالة شاعر اسمو محجوب سراج ؟
    راقد عميان مافي زول جايب خبرو .. والله كنا متعشمين في الحكومة .. اولادو مجدعين في السراير دايرين العلاج .. .
    معاشو كله 100 الف بس الولد الوحيد الشغال الصادق سائق ليه ركشة ما حقتو ..
    البجيبها كلها بنتعشى بيها ..
    وعمك ده سقناه مستشفي بر الوالدين كشفوا عليه وديناه المغربي كشفوا عليه وقالوا بتعالج وبشوف
    بس العملية دايرة قروش لكن يا للاسف ..
    * انتبهنا فاذا الشاعر محجوب سراج يبكي ؟
    ـ كدي يا خالة نعمات مشكلة العيون ليه ما تابعتوها ؟
    < يا ولدي انا مشيت اى حتة الثقافة والفنون وناس الشعراء
    في واحد منهم جا لقي اولادي واقعين مع المرض اداني عشرة الف جنيه كتر خيرو.
    * تقرير العيون شنو؟
    < عندو ضغط في العين بعدين ناس المغربي قالوا دايره عملية بتاعة الضغط وقالوا ممكن يعملوا قرنية للعين الثانية
    لكن العملية دايرة قروش وايدنا ما واصلة خشمنا يا ولدي.
    * البعولكم الصادق ؟
    < ايوه ومرات انا بسوي شباشب ابيعها لكن مافي سوق
    ومرات كمان ناس يجيبوا لي جلابية جلابيتين رجالية اعمل ليها عمود
    والقي لي فيها قرشين تراها تساعد.
    * ...............؟
    < ناس المصنفات كانوا بدونا 75 الف في الشهر
    لكن بعد ما اتغير علي الماحي جابو مدير مالي جديد بدلوا واظنها موظفة قاموا وقفوها مننا
    كانت الـ 75 الف بتجيب لي دقيق وزيت وكده يعني بتساعدني والله لكن الحمد لله وقفت هسة كلو كلو .
    * اردنا ان نغير دفة الحديثة لان الاستاذ مازال يبكي ؟
    < ليه ما عملت ديوان ؟
    < والله يا ابني جمعتها كلها في دفاتر وفلسكاب ووديتها للاخ الصديق التجاني الحاج موسي
    كان الوقت داك في الهيئة القومية للثقافة والفنون لكن بعد فترة قالوا الاشعار دي ضاعت وخلاص اتعوضنا الله فيها.
    * كتبت شنو في الخالة نعمات ؟
    < كتبت ليها : ذي عينيا وغالية عليا دي العاجباني مشاعر حية.
    * ضحكت الخالة ومسحت دمعتها ؟
    < قلت لها : اهو مسجلة انت في وجدان الناس.
    < قالت : والله يا ولدي امنيتي هو يفتح بس .. لكن اقول ليك حاجة سر غايتو البتعرس ليها شاعر حتجن كلمهن كلهن.
    (وضحكنا كلنا).
    * يعني هسة مافي شعر يا استاذ ؟
    < والله يا ابني بجيني واقعد اردده بس لغاية ما انساه اكتبو كيف ؟ وتعرف ذي الحصلت جفوة غير متعمدة بيني والشعر.
    * ممكن تسجلو علي جهاز تسجيل ؟
    < «يضحك» هو انحنا لا راديو لا تلفزيون تقول لي مسجل.
    * يعني ما قاعد تسمع اذاعة ؟
    < من وين انا ما بتحرك من البيت وهنا ما عندنا راديو او تلفزيون (تتدخل الخالة نعمات) الصادق بكتب شعر.
    * اجزتو انت كشاعر ؟
    < الصادق شاعر جيد ورانيا اختو برضها شاعرة .
    * منو البعجبك من الشعراء ؟
    < حسين بازرعة شاعر مافيه كلام.
    * آخر حاجة بترددها من شعرك شنو ؟
    < جاتني خاطرة قبل فترة بقول فيها :
    اتمني اسعد في الحياة اصلو الشقا في الناس وهم
    اصوات تقول لي عيش هواك واصوات تجرعني الألم
    غردت بي حب الحياة اصدق غنا واجمل نغم
    وسبحت ضد الموج سنين انا في الوجود قبل العدم
    موج المظالم والعذاب لاقاني ذي طير الرخم
    احمل احباي وعناى فوق الجبال اعلى القمم
    * رسالة للرئىس والمسؤولين ؟
    < ياخي الجماعة ديل مشغولين خلاص ..
    لكن بس نقول لهم كان مافيها ازعاج اتوصوا بيننا خير والله لو انا الليلة ما محتاج لي الالف جنيه ما بكلفهم.
    اما بعد :
    هذه تراجيديا سودانية ... بطلها شاعر رقيق سكن في وجداننا
    وهذا ذاته الذي يديننا ويجرمنا ويحق لمن هو بلا هذا الجرم ـ جرم صمتنا عنه ـ ان يرمينا بحجر قاتل ..
    او يدفعنا للوقوف امام المحكمة كلنا .. سادة وشعب.

    *** سيدي الرئيس : لم يحدثونك عنه ولو فعلوا لكان هو اول باب تطرقه في برنامجكم بين الراعي والرعية
    ولكنه مازال رعيتكم ومازلتم سيدي الرئيس الراعي له ولأمثاله .. سادتي وزراء الثقافة الاتحادية والولائية عشمنا فيكم كبير ..
    يا مجتمع .. تحركوا نحو هؤلاء الذين يعطون من دمائهم ويموتون في صمت فقط لاننا لا نسمع صرخاتهم المكتومة.
    سيدي الشاعر الرقيق املنا في الله كبير ان يستجيب لحالتكم من يهمه الامر ومن بيده الامر
    وحتي يتم ذلك سنواصل في تذكيرهم لعلهم كما قلت مشغولين.

    * اهدي هذا الحوار الحالة للزميل بألوان عثمان شبونة
    فقد ظل يكتب عن محجوب سراج وهو الذي حرضني بكتاباته تلك للبحث عنه وها انذا افعل ...
    عزيزي الغاضب الشقيق شبونة نعم لم يسلم الشاعر من النسيان الطويل ولعنة المرض ولؤم الراهن ..
    ولكن ماعسانا نفعل ..؟؟؟؟؟

    ( جريـدة الصحــافة عدد الجمعـة )
                   |Articles |News |مقالات |بيانات

23-02-2006, 09:58 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    قـدّم كل هذا الإبـداع ويفقـد بصره لضيق ذات اليد
    أعطى كل هـذا ويقتلـه الفقـر
    المال يتناهشـه دهاقنة السياسة وعتاتها
    ويموت الشعراء والمبدعون كل يوم ألف مرة

    آآآآآآآه .. يا بلد
                   |Articles |News |مقالات |بيانات

23-02-2006, 09:58 PM

القلب النابض
<aالقلب النابض
تاريخ التسجيل: 22-06-2002
مجموع المشاركات: 8418

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    الرائع ثابت

    سلامات

    دوماً حالنا لا نقيِّم أشياءنا إلا بعد أن نفقدها ولا نكرم عظماءنا إلا بعد أن يرحلوا.

    شكراً لك أخي

    لهذه اللمسة الإنسانية في نقل الحوار الحزين المليئ بالحياء والعتاب

    تحياتي
                   |Articles |News |مقالات |بيانات

23-02-2006, 10:05 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: القلب النابض)

    Quote: لهذه اللمسة الإنسانية في نقل الحوار الحزين المليئ بالحياء والعتاب

    القلب النابض
    شــكراً نبيلاً على المـرور السريع

    لكن
    لكن أكثر إنسـانية
    لنكن عمليين مرة واحـدة في حياتنا
    لنساعد هذا الرجل في محنتـه
    فهو لايزالُ قادراً على العطـاء

    خوالص المودة
                   |Articles |News |مقالات |بيانات

23-02-2006, 10:09 PM

القلب النابض
<aالقلب النابض
تاريخ التسجيل: 22-06-2002
مجموع المشاركات: 8418

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    إقترح حاجة ممكن نعملها ونحن معاك

    وانا بقترح تكريم بواسطة جهات في السودان وكذلك الناس ممكن تتصل بالإذاعة بمن تعرف

    والبعيدين ممكن يتبرعوا بما يستطيعون

    رأيك شنو

    والصحفيين والإذاعيين يمكن يتحركوا.

    يلا همتك

    تحياتي
                   |Articles |News |مقالات |بيانات

23-02-2006, 10:16 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: القلب النابض)

    القلب النابض
    كم أنتي مدهشــة أختي العزيزة
    كم تتوارد الخواطر ؟؟
    لنجعل ( سودانيز اونلاين ) منبع الجمال
    ليبدأ علاجـه من هنا .. من كل الأعضـاء
    .
    .

    عفواً
    مداخلاتنا تتقاطع
    ولكن
    في نفس الإتجــاه
                   |Articles |News |مقالات |بيانات

23-02-2006, 10:10 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    لتتكون بأسرع وقت لجنة من بورداب الخرطوم
    لجنة لا تتعـدى أصابع اليد الواحـدة
    تُسـجل زيارة لمنزل الشاعر المُرهف محجـوب سـراج
    تقوم بتقدير تكلفـة العمليــة
    ومن ثمّ يبدأ العطــاء كُلٍ بما يستطيع

    ما رأيــكم ؟؟
                   |Articles |News |مقالات |بيانات

23-02-2006, 10:55 PM

Saifeldin Gibreel
<aSaifeldin Gibreel
تاريخ التسجيل: 25-03-2004
مجموع المشاركات: 4079

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    Quote: لتتكون بأسرع وقت لجنة من بورداب الخرطوم
    لجنة لا تتعـدى أصابع اليد الواحـدة
    تُسـجل زيارة لمنزل الشاعر المُرهف محجـوب سـراج
    تقوم بتقدير تكلفـة العمليــة
    ومن ثمّ يبدأ العطــاء كُلٍ بما يستطيع


    اوافق على هذا المقترح وادعمه بكل مااستطيع من جهد
                   |Articles |News |مقالات |بيانات

24-02-2006, 06:09 AM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: Saifeldin Gibreel)

    سيف الدين جبريــل
    خـوالص المودة

    هــذا هو العشــم
    أصبحنا إتنين والبقيـة تأتي بإذن الله
    في أنتظاركم
                   |Articles |News |مقالات |بيانات

24-02-2006, 01:43 AM

سفيان بشير نابرى
<aسفيان بشير نابرى
تاريخ التسجيل: 01-09-2004
مجموع المشاركات: 9052

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)


    اخوتى هنا تحية طيبة

    انا متواجد بشكل دائم فى الخرطوم

    هذا هو ايميلى ارجو التنسيق عبر ه :[email protected]

    او [email protected]
                   |Articles |News |مقالات |بيانات

24-02-2006, 06:19 AM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: سفيان بشير نابرى)

    سفيان بشير نابري
    المــودة الخالصة
    أنت وبورداب الخرطوم جميعاً هم من عنيناهم بالأمر
    نتمنى عليكم أخذ الموضوع بعين الرحمة وبالجدية المطلوبة
    فقط تدبروا أمركم وكونوا لجنة مصغرة

    هذا الموضوع لن يأخذ سوى أيام إن واظبتم
    وسيكون مردوده عظيماً
    كما تقدمت هنا في البورد نتعشم منك التحرك هناك في الخرطوم
    فقط لتكوين اللجنة
    وانا أعلم تماماً أن بورداب الخرطوم رجال ونساء
    لو نظروا للأعمى سيرتد إليه بصره
    أصيليين وجميليين فتمموا المكارم بالتعاضد

    في إنتظارك
                   |Articles |News |مقالات |بيانات

24-02-2006, 06:45 AM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)


    Quote: وبديتو مع منو من الفنانين ؟
    =أدينا ابراهيم عوض ليه بتسأل عني تاني واغنية مين قساك مين قسى قلبك ..
    والاغنية الثالثة قصدني ما مخليني راخصني ما مغليني يا قلبي يا معذبني ..


    سنسأل من أجل الوفاء
    ولن تقسو قلوبنا أبداً
                   |Articles |News |مقالات |بيانات

24-02-2006, 06:54 AM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    Quote: بعدين ادينا صلاح بن البادية اغنية الجرح الابيض ودي لقت رواج كويس.
    * مستحضر كلماتها ؟
    < دقيقة اتذكرها ليك (بعد لحظات)
    لو نعيم الدنيا عندك احرميني لو جحيم الآخره ملكك عذبيني يا ضناي ياوهج اشواقي الحبيسة جرح اصبح ما بسيل لو تجرحيني ..
    وصلاح ده برضو غنا لينا اول حب وآخر حب حبك نار وكله ودار منه بقول انا آه يا رب ..

    هل يستحق مُبدع الجُـرح الأبيض كل هذا الإهمال ؟
    نبدأ بعمليه العيون وما تبقى يذهب لمساعدة الأسرة في حياتها اليومية
    فقط جهدكم والموضوع أكثر من مقدور عليه
                   |Articles |News |مقالات |بيانات

24-02-2006, 11:01 AM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    فـــــوق
    من أجـل الإنســان والإنســانية
    وفي
    إنتظــار بورداب الخـرطوم
                   |Articles |News |مقالات |بيانات

25-02-2006, 00:55 AM

الحارث سرالختم عبد الله
<aالحارث سرالختم عبد الله
تاريخ التسجيل: 28-12-2005
مجموع المشاركات: 602

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    الأخ ثابت : الشكر لكم على القاء الضؤ على حالة هذا الشاعر المرهف

    فالعديد منا قد سمع بهذة الكلمات وربما تغنى بها ولكن لايعرف مصدرها

    وهناك العديد من امثاله فى هذا المجال او مجالات اخرى اصابهم الأهمال

    ولكن ابناء الوطن امثالك بالمرصاد لرفع معاناة هؤلاء المبدعين ومن هنا اناشد كل من له

    علاقه بهذا الفنان الأنسان ان يدلى بدلوة ومن هنا اناشد ايضا الأخوة بورداب الرياض

    بالمملكه بالمساهمه وليكن شعار الجميع (معا يد واحدة ) والله من وراء القصد .ولدى اقتراح ان تحدد تكلفة العمليه من المستشفى المعالج ومن ثم باقى التكاليف والمجال مفتوح
    لكل صاحب راى او ناصح حتى يتم علاج هذا الفنان المرهـــف .
                   |Articles |News |مقالات |بيانات

25-02-2006, 05:43 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: الحارث سرالختم عبد الله)

    Quote: تحدد تكلفة العمليه من المستشفى المعالج
    ومن ثم باقى التكاليف والمجال مفتوح

    الحارث سرالختم
    شكراً على روح التعاون والمؤازرة الإنسانية
    وحديثك هو ما طالبنا به في صدر البوست

    ومنتظرين
                   |Articles |News |مقالات |بيانات

25-02-2006, 01:53 AM

قرشـــو
<aقرشـــو
تاريخ التسجيل: 05-02-2002
مجموع المشاركات: 11371

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    أخى ثابت

    لك الشكر الجزيل ولك التحية لهذا الموقف الانسانى النبيل...

    قرات اللقاء وتاثرت كثيرا به وبالشاعر الرقيق وانزلت الموضوع هنا مرتين ولكنى لم اوفق فى جلب تعاطف مع الشاعر فارجو ان يكون بوستك هذا ضربة البداية للوقوف بجانب هذا الانسان الذى يستحق التعاطف من كل الجهات لانه قدم للاغنية السودانية الكثير فهو أسعدنا وابهجنا وأطربنا بحلو كلماته ...

    لك شكرى وامتنانى

    الشعراء يتبهم الفلس ... شعراء وراء خط الفقر ..
                   |Articles |News |مقالات |بيانات

26-02-2006, 04:08 AM

قرشـــو
<aقرشـــو
تاريخ التسجيل: 05-02-2002
مجموع المشاركات: 11371

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    Quote:

    ما بغيرني صدودك عني ما بحولني غرورك يوم
    سيب نيران الشوق تحرقني واملأ ليلي عليا هموم

                   |Articles |News |مقالات |بيانات

26-02-2006, 05:07 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    مرة أخرى للأعـــلى
                   |Articles |News |مقالات |بيانات

26-02-2006, 06:33 PM

ثابت محمد
<aثابت محمد
تاريخ التسجيل: 17-10-2005
مجموع المشاركات: 2006

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)
                   |Articles |News |مقالات |بيانات

26-02-2006, 06:48 PM

القلب النابض
<aالقلب النابض
تاريخ التسجيل: 22-06-2002
مجموع المشاركات: 8418

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    الأخ ثابت

    لك التحية

    ولتستمر الحملة

    وليساهم كل بما يستطيع

    تشكر يا أخ سفيان على المبادرة عن بورادب الخرطوم

    keep it up
                   |Articles |News |مقالات |بيانات

26-02-2006, 06:51 PM

عماد شمت
<aعماد شمت
تاريخ التسجيل: 02-12-2004
مجموع المشاركات: 3857

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    اشكرك اخ ثابت.. فقط اقول حسبي الله ونعم الوكيل
    حسبي الله ونعم الوكيل
    حسبي الله ونعم الوكيل

    لك التحيه وللشاعر الرقيق.. ستبصر غدا ان شاءالله وستعم الفرحه اسرتك
    وستكتب من جديد اجمل الالحان والاشعار.. ربنا يديك العافيه ويطول في عمرك ... امين

    جيت اخت الايد مع الايادي الخضراء ..........
                   |Articles |News |مقالات |بيانات

03-05-2006, 02:20 AM

قرشـــو
<aقرشـــو
تاريخ التسجيل: 05-02-2002
مجموع المشاركات: 11371

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: ثابت محمد)

    الاحباب

    ثابت

    القلب النابض

    عماد شمت

    ربنا يجعل كل دعمكم فى ميزان حسناتكم
                   |Articles |News |مقالات |بيانات

03-05-2006, 05:34 AM

Sawsan Ahmed

تاريخ التسجيل: 29-11-2004
مجموع المشاركات: 0

للتواصل معنا

FaceBook
تويتر Twitter
YouTube


Re: هكذا يموت الشعراء مرض وإهمال .. محجـوب سـراج .. مثال (Re: قرشـــو)

    ان الحرب والخراب وانتظار الموت موجود في كل ركن بعيد !
    ما ابشع الظلم ..
    اين الشعراء الذين لم يمروا بمثل ظروفه وكانت الحياه اقل قساوه عليهم!
    اين ضاعت ثروته الادبيه!
    لك الله ان ينعم بالشفاء
    up
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de