|
|
 سيناريوهات : المطيار
|
صحيفة الرأى العام
عدد الجمعة الموافق 27 فبرائر 2009م
_______________________________________________________________________________________________________
وضعت حاجة (سعاد) صينية (الخدار) على التربيزة وجلست لتقوم بمهمتها اليومية بتجهيزة الذى ينتهى بوضعه داخل (حلة الملاح) بينما جلست جارتها (زينب) فى مقابلتها تساعدها فى تقشير حبات (البطاطس)
- ما سمعتى يا زينب بالزواج الجديد ؟
- يطرشنى يا يمة؟ ياتو واحد فيهن ؟ ما كل يوم منزلين لينا موديل جديد
- (المطيار) !
- الشنوووو ؟
- المطيار.... المطياااار ... إنتى طرشا ما بتسمعى؟
- وده كيفينو ياختى !
- ده قالو ليك (زواج الطيارات) !
- المضيفات يعنى !
- مضيفات شنو يا غبيانه ! ده بتاع (الركاب )
- والله يا سعاد أكان فهمت كلامك ده إن شاء الله (إتقصا) !
- طيب أقيفى النشرح ليكى براااحة براااحة ... أها قالو ليكى أى راكب فى (طيارة) يشوف ليهو واحده راكبة
تعجبو ممكن يتقدم ليها على طول والعرس يتم فى نفس (السفرية) !
- أها وبعدين ؟ بعد داك البحصل شنو؟
- لا بعدين ولا قبلين أول ما الطيارة تعمل (لاندنق) للحته الماشين ليها كل زول يشوف عفشو وين و(يشتت) يمشى
حتتو الماشى ليها !
- أها ويعنى تانى ما يتقابلو ؟
- كيفن هم أزواج ما يتقابلو ؟ أكان ما إتقابلو ما ببقى (زواج متعه حرام) قالو ليكى كل زول يشيل عنوان
التانى ويتقابلو لكن بس حسب (السفريات) أقصد التساهيل !!
- والزواج ده الناس عرفتو؟
- كيفن ما عرفتو؟ كدى أمشى شوفى (وكالات السفر) مليانه كيفن ! وأكان للإذاعة واتلفزيون أها شغالين ليكى
اليوم كلو (المطيار) المطيار !! هسه كان فتحتا ليكى (الرادى) ده تلاقيهم بتكلمو عنو
إفتاء على الهواء :
- سيداتى وسادتى .. يسرنا فى هذه الحلقة من برنامج إفتاء على الهواء أن نستضيف مولانا (عوض تساهيل) يشرح
لنا مووضوع زواج (المطيار) الذى شغل المجتمع هذه الأيام ، مرحب بيك يا مولانا وأول حاجه عاوزين نعرف
الزواج ده صحيح وإلا ما صحيح !
- الحمد لله والصلاة والسلام على رسول الله وعلى آله وصحبه أما بعد:
زواج (المطيار) هو زواج مستوفى جميع الأركان والشروط المطلوبة في العقد من وجود المهر والولي وشاهدي عدل،
إلا أن الزوج يشترط في العقد إسقاط النفقة أو المسكن أو المبيت فيكون الزوج غير مكلف بالسكن والنفقة
عليها !
- طيب يا مولانا إسم (المطيار) ده جا من وين !
- أيواا ... نحنا كلنا بنعرف الزواج العادى الفيهو الزوج بيوفر سكن لزوجتو !
- نعم !
- وكمان بنعرف زواج (المسيار) الفيهو (الزوجة) بيكون عندها بيت (الراجل) بيجيها فيهو
- نعم !
- أها زواج المطيار ده لمن الزوج يكون ما عندو سكن ! و (المرا) ذاااتا ما عندها سكن أو السكن بتاعا ما
(بسمح) ليها !!
- ووكت الإتنين ما عندهم سكن معرسين ليه !
- كيفن معرسين ليه ؟ إنتى ما عارفه الزواج ده نص (الدين) !؟ إنتى عاوزانا نخلى الناس دى كووولها ماشة بى
(نص دين) ؟ عاوزانا نتخلى عن مسئوليتنا ؟
- لا معقول ؟ كيفن تتخلو عنها يا مولانا ؟ لكن بس (الناس دى) تتلاقى وين عشان تمارس حياتا الزوجية
- كيف يعنى يتلاقو وين ؟! هو نحنا سميناهو زواج المطيار ليه ؟ ما عشان ح نخصص فى كل طياره (غرفه بتاعت خلوة
شرعية) !
- ما فاهمة يا مولانا !
- يا بنتى الدين يسر .. والزواج ده اساسا عملناهو للناس الما عندها سكن ! يعنى ما يتزوجو؟
الزوجه ما عندها سكن والزوج ما عندو! طواالى كل واحد يلم ليهو حق تذكرة إن شاء الله (عطبرة – الخرطوم)
وبالعكس وياخدو ليهم خمسة دقائق (خلوة شرعية) ويجو راجعين !
- مواصلاً – مش أحسن من إنو الناس تقع فى (الحرام) ؟
- والله يا مولانا ما عارفه أقول ليك شنو لكن كدى خلينا نشوف مداخلات المستمعين
إتصال (1):
- آلو برنامج فتاوى على الهواء؟
- أيوه معاك ... برنامج فتاوى على الهواء معانا منو؟
- معاك حسن دبرسة من (أمبده بالردمية)
- إتفضل يا حسن معاك مولانا !
- الحقيقة أنا عاوز أسال مولانا يعنى لو حكايت الطيارة دى غلبتنا وما قدرنا نلم حق التذكرة ما ممكن تشوفو
لينا طريقت زواج (أمجاد) !
- والله يا إبنى الزواج عندو شروط ولو الشروط دى إستوفت ممكن يكون فى أمجاد فى ركشات فى أى حته !
- لا لا يا حاج عاوزنكم (تفصلو) لينا فتوى بتاعت (زواج أمجاد) لأنو والله قدر ما نحاول نلم لينا (قريشات) نقول
نأجر لينا بيت (نعرس فيهو) ناس (المرور) ديل يشيلوها مننا (غرامات) هسه الواحد دق فى الخمسة وأربعين وما
قادر يعرس !
إتصال (2):
- ممكن ناخد إتصال تانى ؟ آلو معانا منو؟
- معاكى (نوسة) من (الكلاكلة) !
- إتفضلى يا نوسة معاكى مولانا !
- أنا بس عاوزه أسال يا مولانا (الزواج) ده ممكن يتم فى أى (خطوط) وإلا بس (السودانية) ! عشان الواحده من
هسه تشوف ليها طريقت حجز وكده !
- والله يا بنتى (الفتوى) ما ليها علاقه (بالخطوط) هى فتوى عامة بتقول إنو الزواج (جائز) فى (الطيارة) ما دام
مستوفى الشروط الشرعية المعروفه ! بعد ده العرس يتم فى (الأماراتية) فى (الأثيوبيه) فى (اللفتهانزا) دى ما
مشكلة !!
- طيب يا مولانا ممكن يتم فى سفرية داخليه ولا إلا (خارجية) !
إتصال (3):
- ممكن إتصال أخير .. معانا منو؟
- خليكى من معاكى منو أدينى فلاصة فى الشيخ ده !
- معاك الشيخ!
- قلت ليا زواج الشنو يا شيخنا؟
- المطيار إسمو المطيار !
- وكل الشروط مستوفيه !
- أجل يا إبنى كل شروطو الشرعية مستوفيه !
- والناس (تولد) وتجيب (أولاد) !!
- شوف يا إبنى إنا عارفك عاوز تقول ليا (الأولاد) يتربو كيف؟ والأسرة وما إلى ذلك لكن أعرف يا إبنى إنو
القاعدة الفقهية بتقول (درء المفاسد مقدم على جلب المصالح) وعدم الزواج مفسده ما بعدها مفسدة لذلك فهو
مقدم على مسألة (تكوين الأسرة) !
- بالله يا مولانا ده إسمو كلام ؟ عشان تحلو مشكلة (الزواج) تقعدو تعملوها لينا زواج (المطيار) و(المركاش) و
(المقطار) وتفكو (الأولاد) البجو من (جنس الزواج) المهبب ده (عكس الهواء) ! هو هسه الأولاد والبنات القاعدين
مع أبهاتهم (مالين الشوارع) كمان تجيبو لينا (أولاد) الأبو فى حته و(الأم) فى حته ؟ و(طيارات) وما بعرفو
شنو داك !
- شوف يا إبنى أنحنا جاتنا حاله وأفتينا ليها ! ما قلنا زواج (المطيار) ده لأى زول !
- يا شيخنا بلاش كلام ما عندو معنى .. إنتو قلتو الحاجه دى (جائزة) وشرعية يعنى أديتو رخصة لأى زول يعملا ما
(لمن يعصروكم) تقولوا (جانا زول) وأفتينا ليهو وما بعرفو شنو داك !!
- (المذيعه تتدخل) : طيب إنت يا متصل رأئك شنو؟
- أنا رأئى إنو المسألة واضحة .. الناس ما قاعده تعرس عشان الظروف الإقتصادية بتاعت الناس سيئة
وقروش (البلد) رايحة (عربات) و(بنزين) وسفريات وموبايلات وشركات وهمية و(خمش) وناس مولانا ديل شايفين
(الفيل) وبيطعنو فى ضلو ! وبدل ما يقولو للمسئولين (أضبطو) المال (العام) وصلحو (للمواطنين) المعيشة
وإهتمو بالشباب ده وشوفو ليهو (شغل) ووظائف كل يوم ناطين لينا بى نوع زواج جديد وما هماهم البلد كلها
كان إتقلبت (شماشة) ! والله الكلام البسووا فيهو ...................... (تيت تيت تيت تيت ) !
إتصال (3) :
- الظاهر الخط إنقطع .... ناخد إتصال تانى ... معانا منو؟
- معاكى هنادى من الصافية
- أهلن هنادى إتفضلى
- والله الزول الإتكلم آخر حاجه ده زول (مغرض) ساكت .. مالو هسه (الزواج) ده ؟ مش شرعى وكده ؟ وعاوز يطلع
البنات من (البورة) ! تانى فى شنو؟ والله نحنا بنأيد زواج (المطيار) ده وأنا من هسه جهزت (جواز السفر
بتاعى) وبكرة من الصباح ح امشى أحجز أى حته إن شاء الله (أفغانستان) بس ألاقى عريس .. أنا عاوزه عريس يا
ناس ... عريس ... عريس !!
وكالات سفر :
إنتشرت فى المدن المختلفة وكالات (السفر والزواج) والتى وضعت ضمن ما تقدمه للركاب خدمة (الزواج المطيار) بالإتفاق مع شركات الطيران التى قامت (بفرش) وتخصيص (حجرات) بالطائرات معده (خصيصا) للخلوة الشرعية أضافة لوجود (مأذون شرعى) على كل رحلة ليقوم بمسألة (العقد) ولم تكتف (وكالات السفر) بذلك بل أصبحت تقوم بطلب (صورة فوتوغرافية) لكل راكب وراكبة (فى السفرية) تضعها فى (ألبوم) لتقديمة لمن يود الحجز على خطوطها وذلك عشان (الإختيار وكده) !
- لو سمحتى بس عاوز ليا تذكرة !
- لى وين لو سمحت
- أى حته !
- أيوااا .. إنت عاوز مطيار !
- حاجه ذى دى
- سفريات داخليه وإلا خارجية
- والله نحنا لا بنقدر على ناس (السفريات الخارجية) ديل ولا حاجه ! كدى شوفى لينا (الداخلية)
- طيب ده (الألبوم) بتاع (الأبيض) وده بتاع (الفاشر) وده بتاع (الجنينة) !
- (يقلب فى الالبومات) : ما عندكم سفرية (بورسودان) ، (كسلا) وكده !!
إتنين فى الحلال :
تعلن شركة (إتنين فى الحلال) للطيران عن قيام سفريتها المتجهه إلى (القاهرة) على جميع (المسافرات) الإتجاه إلى دورات مياه (الصالة) لتصليح مكياجهن كما على جميع (أولياء الأمور) التأكد من صلاحية (البطاقة الشخصية) ، يوجد بالطائرة (مأذون شرعى) ومحل لتأجير فساتين الزفاف و(حنانة) متمرسة !!
- وإنتى ياختى ماشة (عرس) وإلا (علاج) !
- والله أنا ماشة علاج لكن قلت أهو فرصة كان ضربت معاى (أعرس) وإتعالج من (الرطوبة) دى وأجى راجعه !
- والزول السايقاهو معاكى ده منو؟
- ده جدى ! أقنعتو يمشى معاى عشان يشيل الموية (البيضاء) الفى عيونو دى ومنها يكون معاى (ولى) وكده كان
حصلت القسمة !!
فى ركن من أركان الصالة كان يقف (صلاح وكمال) فى إنتظار مغادرة طائرة شركة (إتنين فى الحلال) المتجهه نحو القاهرة ، كان يقومان بتفحص وجوه المسافرين (لتحديد الاهداف) :
- يا الله يا كمال ... شفت القنبلة الماشى معاها أبوها ديك !
- يا تا ما كوولهم قنابل!
- لا اللابسة توب أخضر ليمونى فيهو ورده حمراء ديك !
- أيواا .. الماسكة الباسبورت فى أيدا ديك !
- ياها ذاتا ... والله دى (ختره) جنس ختورية !
- وكمان جاااهزة بى (ولى أمرها) شفت (الجولكين) المعاها داك..
- (صلاح يتجه نحوهما بينما كمال ينادى عليه ) : ماشى وين يا صلاح ؟ تعال ماشى وين
- شنو الماشى وين ؟ ماشى أرتب المسائل قبل ما يجى زول يختفا مننا !
صلاح يقترب من (الشابه) ويضع على وجهه إبتسامة متصنعة :
- إذى الحال !
- أهلن وسهلن !
- فى الحقيقة .. أنا إسمى (صلاح) خريج (زراعة) عام 2001 ومقدم ليا لى كم شغلانه يعنى ..
وأهو كولها خمسة سته سنين والظروف تتصلح والدولة تلاقى لينا (وظائف) و...
- (تتابعه فى إندهاش) : وأنا دخلى يا أستاذ فى الموضوع ده شنو؟
- كيف يا أستاذه دخلك شنو؟ مش (مطيار) وكده ؟
- ما فاهمة ؟ بتقصد شنو يا استاذ إنت ؟
- لا يعنى إنتى مش حاجزه معانا فى السفرية بتاعت شركة (إتنين فى الحلال) دى ؟ وبتفتشى ليكى لى (ود حلال)
وكده؟
- (زوجها الذى كان يتابع) : حلال أيه يا ود يا هلفوت .. نحنا منتظرين الطيارة الماشة لندن يا (حيوان) !
|
|
 
|
|
|
|
|
|
|
|
Re: سيناريوهات : المطيار (Re: الفاتح يوسف جبرا)
|
دا بالظبط الحا يحصل لقدام يا استاذ الفاتح ما دام فتحوا الطريق لمثل هذا الغثاء فالناتج حا يكون اجيال افشل من اجيال هذه الايام
فليذهب علماء الحيض.و النفاس و الجنس الى الجحيم
كل همهم في هذه الدنيا اشباع رغباتهم وبعد ذلك لا يهم ما سوف يحصل لهؤلاء.البنات
all they want is to have sex with young girls. pinheads
| |
|
|
|
|
|
|
|
|
|
Re: سيناريوهات : المطيار (Re: الفاتح يوسف جبرا)
|
الأستاذ الفاتح
شكرا لك على هذا الامتاع النادر والخيال الحاضر0
لقد قرأت المطيار أكثر من مرة فزاد اعجابي بأسلوب التناول
والحوار وبنفس القدر بما هو خافي بين السطور0
مع خالص تحياتي
صلاح يوسف
| |
|
|
|
|
|
|
|
|
|
Re: سيناريوهات : المطيار (Re: Salah Yousif)
|
الأعزاء
ناجى - صلاح
تحية طيبة :
والله أنا حزين جداً لما آلت إلية طريقة (حل مشكلاتنا)!!! عليكم الله بس شوفو جنس (الحلول) دى !! وكأنما تم إختزال (مؤسسة الزواج) كوووولها فى (الحته دى) !! ولتذهب (الأسرة المتماسكة) إلى الجحيم !!
كسرة :
إذا قمت بسؤال أحدهم عن (التعدد) و(المسيار) والإيثار والشنو ما عارف .. الإجابه (جاهزة) وهى (حل مشكلة العنوسة) وتلقاهو (معرس ليهو أربعه) أكبر واحده فيهن عمرها (عشرين سنة) !!! ســــــــــــــــــــــنة!
| |
|
|
|
|
|
|
|
|
|
Re: سيناريوهات : المطيار (Re: الفاتح يوسف جبرا)
|
Quote: معاكى (نوسة) من (الكلاكلة) !
- إتفضلى يا نوسة معاكى مولانا !
- أنا بس عاوزه أسال يا مولانا (الزواج) ده ممكن يتم فى أى (خطوط) وإلا بس (السودانية) ! عشان الواحده من
هسه تشوف ليها طريقت حجز وكده ! |
والله سؤال نوسة ده مهم بالحيل !!
تحياتى استاذنا الفاتح
| |
|
|
|
|
|
|
|
|
|
Re: سيناريوهات : المطيار (Re: الفاتح يوسف جبرا)
|
| Quote: تلقاهو (معرس ليهو أربعه) أكبر واحده فيهن عمرها (عشرين سنة) !!! ســــــــــــــــــــــنة! |
استاذنا الفاتح ليك التحية والاجلال
تفرف انا لمن سمعت بزواج الايثار فى البداية افتكرت انو واحد من الكونو عندهم اربعة ديل بقوم يطلق ليك واحدة ويتكفل بتكاليف الزواج , فرحت وقلت يمكن يعد كده الواحد ممكن يلفى ليهو واحدة استعمال دبلوماسى .
لكن لمن عرفت الحقيقة بتاعت الايثار لقيت انو بفرغ الزواج من محتواهو وعلمائنا الاجلاء ديل لو شوية اجتهدوا فى فتواهم دى كان لقوها انها بتهدم الاصل فى الزواج (الاسرة -الذرية ) وحتى الجابو الفتوى دى ما برضو يزوجو بناتهم واخواتهم كده يعنى كلامهم ده كلام للاستهلاك
لك حبى
| |
|
|
|
|
|
|
|
|
|
Re: سيناريوهات : المطيار (Re: عبدالله الامين صالح)
|
عزيزى عبدالله الأمين
أسعدنى جداً مروركQuote: تعرف انا لمن سمعت بزواج الايثار فى البداية افتكرت انو واحد من الكونو عندهم اربعة ديل بقوم يطلق ليك واحدة ويتكفل بتكاليف الزواج , فرحت وقلت يمكن يعد كده الواحد ممكن يلفى ليهو واحدة استعمال دبلوماسى
|
ياخى والله إنت زول طيب (خلاس) وعلى نياتك ... قلت ليا يطلق واحده ويتكفل بى ما عارف شنو؟ !!!
| |
|
|
|
|
|
|
|
|
 Re: سيناريوهات : المعيار!! (Re: Nasr)
|
الاستاذ الفاتح تحياتي
سرد جميل ورائع لكن دار في خلدي السؤال التالي:
اتفقنا ان كل الفساد والموت وكل المساوئ موجودة في ظل هذه الحكومة..
لكن اذا ذهبت الحكومة (وهذا السؤال للعلم فقط)..
هل كل هذه الفوضي وهذا الفساد القائم سيندثر ام سيتواصل؟؟؟
واذا تواصل والحكومة غير موجودة..هل نقول ان الفساد والوهم
موجودان اصلا في المواطن السوداني ولا يتغير بتغير النظام
ام ان الاوضاع ستتغير ولن نصل الي مثل هذه الاشياء في ظل الحكومة الجديدة..؟؟
| |
|
|
|
|
|
|
|
|
|
Re: سيناريوهات : المعيار!! (Re: ASHRAF MUSTAFA)
|
العزيز الفاتح .. كيفك ياخي
سرحت بي تعرف سرحه شديده .. فى تصاريف الواقع واحوالُه
وقلت اهلنا زمان الظاهر نظرتهم كانت بعيده وليست مجرد شمارات
لما اقولو ليك :
:البت دي عينه طايره
: والود داك هيلوكوبتر ..
وحاجات بالشكل ده !!
ولا رايك شنو .. ؟
.
هذا زمان الكوميديا السوداء يا صاحب
لك خالص الوُد
.
| |
|
|
|
|
|
|
|
|
|
Re: سيناريوهات : المطيار (Re: الفاتح يوسف جبرا)
|
الأستاذ الفاتح ..
والله وضعت يدك على الداء وهو ( عوض تساهيل ) ده ..
لكاتب الرد أدناه الأخ اشرف
Quote: الاستاذ الفاتح تحياتي
سرد جميل ورائع لكن دار في خلدي السؤال التالي:
اتفقنا ان كل الفساد والموت وكل المساوئ موجودة في ظل هذه الحكومة..
لكن اذا ذهبت الحكومة (وهذا السؤال للعلم فقط)..
هل كل هذه الفوضي وهذا الفساد القائم سيندثر ام سيتواصل؟؟؟
واذا تواصل والحكومة غير موجودة..هل نقول ان الفساد والوهم
موجودان اصلا في المواطن السوداني ولا يتغير بتغير النظام
ام ان الاوضاع ستتغير ولن نصل الي مثل هذه الاشياء في ظل الحكومة الجديدة..؟؟ |
تعرف اخي العزيز
الحكومة لم تكن جادة في محاربة اي شكل من اشكال الفساد لأن ذلك يعزز من استمراريتها فاذا جاءت حكومة اخرى وكانت جادة في ايجاد حلول أو توعية فقط ومحاربة لكل ما تم (تسويقه ) - في الفترة النحس الفاتت دي - ستكون هناك نتائج جيدة لأن الشعب ليس سيئ ولا يمكن يكون سيئ ...
اسامة
| |
|
|
|
|
|
|
|
|
|
Re: سيناريوهات : المطيار (Re: Osama Mohammed)
|
لقد استمتعت كثيرا فشكرا يا الفاتح.
يا اخوانا عايز تلفونات الشيوخ البيطلعو الفتاوي ديل. عايز اركب خيم في كل الاحياء
لزوم الخلوة الشرعية و الايجار بالساعة.
دي فرصة اعمل قروش .... عمري ما سويت قروش .... وبرضو نفك العنوسة و العزوبة.
ساعدوني بعناوين ناس الفتاوي ديل.
| |
|
|
|
|
|
|
|
|
|
Re: سيناريوهات : المطيار (Re: Zoal Wahid)
|
السلام عليك أخي الفاتح جبرا والتحية على هذا الابداع ومناقشة هذه الظواهر بهذه الآلية الساخرة ...
....
حضرت الحلقة الأخيرة والسابقة لبرنامج أحمر بالخط العريض والذي تبثه قناة LBC كل أربعاء في تمام الساعة التاسعة والنصف مساء والذي تناول مسألة الطلاق - التتيس بمعرفة بعض الأفراد - وانواع الزيجات التي سادت في العالم العربي - وضحاياه خاصة فتيات من المجتمع اليمني تعرضن لزواج عابر من خليجيين يقدمون للبلاد في الصيف ثم يتركونهم للأبد مع أطفالهم وحرمانهم من الزواج مجدداً - تحدث الكثير من المستضافين عن تجاربهم وكلهم برر فعلته بأنها ذلك نوع من تبرير الزنا لا غير ولا أكثر ...
وهي تبرير لضعاف النفوس لفعل المنكر بإسم الدين و بمسميات مختلفة نجم عنها أطفال ونساء سقطن في شرك العزوبية الأبدية بسبب زيجات كزواج المسيار , المسفار , العرفي ،المطيار ، المتعه ، الفريند، المؤقت والفندقي والوناسة "تتونس ساي"، - المصياف والسياحي – زواج المصلحة والكاميرا والنهاريات والزواج الفندقي طبعا تختلف الاحكام من مكان لاخر، والدم والكاسيت والزواج السري والزواج على بيتها والمدني وعييييييك – في ناس بتتزوج خمس دقائق فقط "مش افضل من المصاحبة" – كما ذكرت الشابة اللبنانية المضافة على البرنامج في نفس الحلقة والتي تزوجت تسع زيجات منها ما كان لمدة خمس دقائق زواج متعة – وحينما ضحك أحد الحضور أحتجت " مش أحسن من المصاحبة".
هي ظواهر لزيجات غريبة عرفت طريقها إلى أوساط بعض المجتمعات العربية ، تنتشر في السعودية في الآونة الأخيرة ظاهرة جديدة باسم زواج المصياف ، خاصة بين سيدات ورجال الأعمال ، للسفر في عطلة الصيف إلى الخارج بصحبة زوجة مؤقتة !! ، تنتهي علاقتهما معا بمجرد انتهاء الإجازة والعودة من السفر .
ما عجزت عن فهمه هو كيف يتم زواج الكاميرا وماذا يقصد بزواج النهاريات "وجه النهار" يعني بالنهار معاها وبالليل مع أم أولادك القديمة ولا كيف..
0
| |
|
|
|
|
|
|
| |
الفاتح يوسف جبرا
Salah Yousif
waleed nayel
اسعد الريفى
عبدالله الامين صالح
حمور زيادة
Salahaldeen Nadir
Nasr
ASHRAF MUSTAFA
khatab
Al-Shaygi
Osama Mohammed
othman mohmmadien
فيس بوك
تويتر
انستقرام
يوتيوب
بنتيريست