دعواتكم لزميلنا المفكر د.الباقر العفيف بالشفاء العاجل
|
|
 (ســــيناريوهات) : لـقوها ماشــه
|
فى وقت واحد فوجئ المواطنون بوجود أعمال حفر فى مساحات تتراوح بين 100 -150 متر مربع بكافة (أسواق العاصمة) ومواقف المواصلات و(أماكن الإزدحام) .. لوارى الطوب والرمل والخرسانة .. قلابات السيخ والحديد .. العمال آسيويي السحنة يعملون فى كل المواقع ليل نهار :
- يا ربى المرة دى عاوزين يعملو فينا شنو؟؟
- إنت ما بتعرف عربى ؟؟ قول يعملو (لينا شنو) مش (فينا شنو؟؟)
- هو متين قاعدين يعملو (لينا) ما (فينا) طوالى .. هسع المبانى دى يكونو عاوزين يعملوها شنو؟؟
- والله ما عارف لكن أكيد تكون حاجة لى صالح المواطن
- طيب نحيا ونشوف
كان ذلك الحوار يدور tفى (السوق الكبير) بين (صالح) صاحب كشك الجرائد القريب من مكان (المبانى التى يتم تشييدها) وبين (برعى) صاحب البقالة المجاورة له ..
بعد حوالى الشهر من العمل المتواصل بكل همة ونشاط (ليل-نهار) كانت جميع الإنشاءآت بالعاصمة المثلثة قد إكتملت فى يوم واحد وأخيرا علم المواطنون أن تلك المبانى ذات الشكل (الدائرى) المميز والطلاء (الأزرق) ما هى ألا (دورات مياه) وذلك بعد أن تم وضع لافته تقول (شركة الخرطوم لدورات المياه العامة)
- ما قلت ليك يا (صالح) الناس ديل حاسين بالمواطن .. أها هسع شوف عليك أمان الله دى (أدبخانات) خمسة نجوم .. بالله شوف (السراميك) والحنفيات (النيكل) و(الوضاية) الهناك دى فيها كم حنفية ؟
- يعنى يا برعى عاوز تقنعنى إنو (الجماعة) ديل عاملين المسألة دى عشان خاطرنا ؟
- مال شنو؟؟
- طيب نشوف
فى هذه الأثناء كان هنالك (بوكس) قديم عليه (مايكرفون) يتجول فى السوق :
- عزيزى المواطننننن ... عزيزتى المواطننننا .. اليوم .. شركة الخرطوم للمراحيض العامة .. تدعوكم للإفتتاح الكبير لجميع منشآتها بالعاصمة المثلثة .. أيها المواطن وداعا (للزنقات) وداعا (للتبول على الحيطان) وداعا .... وداعا
على فسحة صغيرة جوار (المبنى الجديد) تم نصب (الصيوان) ورص (الكراسى) وتثبيت (الساوند سيستمات)
ووضع (منصة) عليها مايكرفون ولم ينس من قام بتنظيم هذه الإحتفال (كالعادة) أن يقوم بوضع (كراسى جلوس وثيرة ) على الصف الاول ليجلس عليها كبار (الضيوف) ..
الإخوة والأخوات السلام عليكم ورحمة الله تعالى وبركاته :
بعد أن إستمعنا لكلمة (شيخ السوق) والتى أوضح فيها معاناة العاملين فى الأسواق من جراء عدم وجود (دورات مياه) عامة وتثمينه للدور (الحكومى) فى إنشاء هذه المراحيض العامة وكذلك بعد أن إستمعنا للأخ رئيس (اللجنة الشعبية) لحى السوق لابد أن نستمع للذين قاموا بهذا الإنجاز العظيم ..للرجل الذى نذر نفسه لراحة (المواطن) للمسؤول الذى لا يعرف النوم إلى عينيه سبيلا ..
سيداتى آنساتى سادتى :
إذا ذكر (الإنجاز) فلابد أن يذكر إسم هذا الرجل
وإذا ذكرت (راحة المواطن) فلابد أن يذكر إسم هذا الرجل
هذا الرجل لا هم له إلا (راحتكم)
ها هو الآن يقوم بتنفيذ ما عجز عنه كل المسؤلين فى كل العهود الماضية
ها هو يقوم بتنفيذ مشروع (دورة مياه لكل 100 مواطن)
لا أطيل عليكم (فالكلام الآن) لرجل الإنجاز والإعجاز : (تصفيق حاد) :
شكرا ... شكرا ... بسم الله الرحمن الرحيم .. الإخوة والأخوات ... الضيوف الكرام .. السلام عليكم ورحمة الله تعالى وبركاته يطيب لى فى هذا المقام أن أزف لكم البشرى بإكتمال آخر إنجازاتنا فى مشروع (العاصمة الحضارية) فبعد أن قمنا (بسفلتة) جميع (الشوارع) الرئيسية والجانبية وتثبيت وتوفير (الإمداد الكهربائى) والتخلص من جميع (النفايات) بصورة يومية وتنظيم (الأسواق) وتوفير (العلاج والدواء المجانى) وإجلاس الطلبة والتلاميذ وتوفير (المدارس) المؤهلة لهم دون (رسوم) وتوفير (فرص العمل) لجميع (الخريجين) بعد كل هذا وإنجازات أخرى كثيرة كان لابد من أن نقوم بإنجاز هذا المشروع الحضارى الكبير والذى يقضى بتوفير (دورة مياه عامة) لكل 100 مواطن لنضع بذلك حدا لمعاناة المواطنين ولنكون كما الشعوب المتحضرة ... لقد كان من إهتمامات (الحكومة) وإهتماماتى (الشخصية) كمسؤول أن يقوم (المواطن) بقضاء حاجته فى سهولة ويسر (يالمناسبة أصلو ده الفضل للحكومة) وهذه كما تعلمون أقصى غايات (الترفق) بالمواطن !!
وبعد أن نقلت (كاميرا) البث (الحى) كلمة المسؤول التى قوطعت بالهتاف والتصفيق والتهليل واصل (المذيع) الذى يقوم بنقل مراسم الإفتتاح :
الآن يقوم (المسؤول) بقص الشريط إيذانا بإفتتاح (المبنى) وسط تصفيق وهتافات (البائعين) وأصحاب (المحلات)
- مواصلا النقل- كما ترون أعزائى المشاهدين قإن المبنى قد تم إنشاءه على أحدث طراز وبأحدث (التقنيات) وبأرقى المواد (الفاخرة) ..وكما تشاهدون أعزائى المشاهدين فى كل مكان أن المبنى قد تم تقسيمة فهنالك قسم (للرجال) وآخر (للنساء) كما لم ينس المسئولون كدأبهم دائما كل فئات المجتمع فقد تم تخصيص قسم (لذوى الحاجات الخاصة) - مواصلا- غنى عن القول سيداتى آنساتى سادتى أن (العاصمة) قد شهدت فى هذه الحقبه من الزمان تطورات هائلة فى البنى (التحتية) والمرافق (الخدمية) وها هى هذه (الدورات النموذجية) تقف شاهدا ودليلا على ذلك ... الآن سيداتى سادتى وبعد أن قمنا بنقل (مراسم) إفتتاح هذا المرفق الهام نعود بكم إلى إستوديوهاتنا الرئيسية وكل (إفتتاح) وأنتم بخير !!
صباح اليوم التالى :
كالعادة ما أن جاءت الساعة التاسعه حتى أجتمع (منصور الحلاق) و(سليمان الصائغ) وصالح بتاع كشك الجرايد فى دكان (برعى) فقد تعودوا أن يقوموا بتناول (الفطور) هنالك ويتناقشون فيما تجود به (الصحف) من أخبار :
- أها يا جماعة الليلة الفطور شنو؟
- والله أنا نفسى فى (فسيخ) كارب و(شطة خدرا) وبصل والا رائك شنو يا (برعى) ؟
- والله يا جماعة أنا الليلة الفطور ده خلونى منو أمس إتعشيت بى (كمونية) لخبطت ليا بطنى وعامله ليا (لوايه) هسع وبطنى (مكركبه) كدى عن إذنكم أمشى (دورات المياه) الجديده دى
هب (برعى) واقفا متجها صوب مبنى (دورات المياه) الجديد :
- شنو يا حاج داخل (تووش) كده
- يا ولدى ما (مذنوق وكده) !!
- آآى يا حاج (مزنوق ما قلنا حاجة) لكن ما لازم أول تدفع
- أدفع شنو ؟؟ هسع دى حاجة يشيلو فيها قروش لو ما ساى !!
- يعنى بس يا حاج عاوز (ترتاح) مجانا؟؟ يعنى (مواهينا) دى البدفعا لينا منو؟؟ -مواصلا- طيب يا حاج خلاص وكت إنت (مذنوق) أمشى وبعدين تعال أدفع !!
- أها أدخل وين؟
- شوف يا حاج لو عاوز (تبول) بس أدخل هناك .. ولو حاجه (تانيه) أمشى الباب داك وما تنسى إنت داخل تسحب ليك ورقة من (الساعة) بتاعت الوكت ديك القدام الباب وكمان إنت طالع تسحب ليك ورقة منها وتجيب ليا معاك الورقتين أحاسبك بيهم !!
دخل (برعى) للمكان (الثانى) بعد أن قام بسحب ورقة من (مكنة التوقيت) المثبته أمام الباب وبعد أكثر من عشرة دقائق بقليل خرج ولم ينس أن يقوم بسحب ورقة أخرى من ذات المكنة
- حمدالله على السلامة يا حاج
- (وهو يضع الورقتين على التربيزة) الله يسلمك
- (يمسك بالورقتين وينقر على آله حاسبة أمامه ثم يرفع رأسه مخاطبا (برعى ) : ألفين وسبعمية يا حاج
- (فى إندهاش) قلت كم ؟؟
- ألفين وسبعميت جنيه يا حاج
- (مستنكراً ) لييه يعنى أصلو هو (قطع جمار) وإلا (قطع جيوب)؟
- يا حاج الدقيقة هنا بى خمستاشر دينار !!
- لييه أصلها دقيقة (موبايل) ولا قالو ليك (محادثة عالمية) ؟؟
- يا حاج نحنا عشان (حركاتكم) دى ختينا ليكم (الأسعار) فى اللافته ديك (قدام الباب) أمشى شوفا وإتأكد من كلامى ده وتعال ... قام (برعى) بالذهاب والوقوف أمام لافتة الاسعار التى كتبت بخط جميل وواضح وعليها بعض الإرشادات :
إرشادات : على المواطن إتباع الخطوات التالية :
- وضع أمنية خمسة ألآف قبل الدخول
- تحديد مكان الخدمة التى يريدها (مويه - غير ذلك)
- قبل دخوله :سحب ورقة تحديد (زمن الدخول) من (ساعة الوقت) المثبتة أمام الباب
- بعد خروجه : سحب ورقة سحب ورقة تحديد (زمن الخروج) من (ساعة الوقت) المثبتة أمام الباب
- تقديم الورقتين المذكورتين أعلاه للموظف لخصم قيمة (الخدمة) من (التأمين) المدفوع
قيمة الخدمات (بالدقيقة) :
- تبول (خمسة دينار)
- أشياء أخرى (خمستاشر دينار)
مع خصم 1% لذوى (الحاجات الخاصة)
بعد أن قام (برعى) بقراءة اللافتة عاد مسرعا إلى (الموظف) حيث قام بدفع (المبلغ) قائلاً :
- والله حاجة عجيبة هسع يعنى ذى بطنى (اللاويانى) دى معنى كده (عشرين ألف) الليلة ما تحلنى منكم !!
- ما مشكلة يا حاج نحنا هنا عندنا إمكانية نفتح ليك حساب شهرى(جرورة) يعنى !!
- يعنى كمان عاوزننا نزيد (الديانات) العلينا أول الشهر ؟ ما ندفع الإيجارات و(الجمرات) و(المفايات) !!
عاد (برعى) لدكانه حيث وجد (أصدقائه) ينتظرونه بالفطور بعد أن قامو (بتظبيط) الفسيخ والشطة الخدراء وسلطة الدكوة :
- يا زول إتأخرت مالك ؟
- لا حولتن ولا قوتن إلا بالله
- مالك يا زول (بتتحوقل) ؟
- والله أكان قلت ليكم ما بتصدقو
- شنو الما ح نصدقو
- عليكم أمان الله مشية بطنى (اللاويانى) دى مكلفانى قريب التلاته تالاف !!
- ليه مشيت إشتريت ليك (حبوب) من الصيدلية ؟؟
وقص عليهم (برعى) الحكاية :
- بالشكل ده (الجماعة) ديل يكونو عاوزين يطلعو (خسارتهم) بتاعت (المبانى) دى فى (أسبوع)
- هو المسؤول أمبارح فى الإفتتاح مش قال (الدورات) دى لى (راحة) المواطن ؟
- والله أكان ما أخاف الكضب (الدورات) دى تكون لى راحة (المسؤول) !!
- هسع يا جماعة أنا عندى (سكرى) وببول فى الساعة (خمسة مرات) كدى ضربو ليا دى تعمل ليها كم دقيقة؟؟
- والله حكاية .. الحكومة دى تشيل من المواطن وتشيل وتشيل وتشيل أصلها ما بتقول ليهو (هاك الحاجة دى) مجانا ؟
- تعرف دى ذى الراجل قال لى مرتو يا ولية إنتى طوالى بس جيب جيب جيب مرة واحده هاك مافى؟؟ قامت قالت ليهو طيب (هاك) الانبوبة دى أمشى أملاها ليا !!!
الأولى (علينا والتانية عليك) :
نسبة لمحدودية دخل (المواطن) والقيمة (الباهظة) التى وضعتها (شركة الخرطوم لدورات المياه) فقد أحجم كثير من المواطنين عن التعامل مع (مبانى الشركة) إلا فى حالات نادرة مما جعل (الشركة) تتكبد كثيرا من (الخسائر) المتمثلة فى (مرتبات العاملين) و(أدوات النظافة ) الشئ الذى جعلها تقوم ببعض الإعلانات فى بعض الوسائط الإعلامية حتى تضمن عدم إحجام المواطنين فعلى الصفحة الأخيرة لجميع الصحف اليومية كان هنالك إعلان ضخم يصور مبنى دورات مياه الشركة ذات اللون الأزرق المميز وشخص (وجيه) يشير إليها بينما الإعلان يقول : (الأولى علينا) و(التانية عليك) ثم توضيح يقول : أيها المواطن يسر ( شركة الخرطوم لدورات المياه) أن تعلن للمواطنين الكرام بأنها قد قررت أن تكون الزيارة الأولى (مجانية) ... ملحوظة : على المواطنين إبراز إثبات (الشخصية) !!
بينما واكبت هذه الحملة الإعلانية فى الصحف حملة إعلانية تلفزيونية :
(شخصان يسيران) فى زحمة أحد الأسواق .. أحدهم يقف فجأة ويمسك ببطنه قائلاً :
- (وهو يتألم) والله بطنى دى الليلة أصلها ما طبيعية
- مالك ؟
- لا مافى حاجة .. بس داير أمشى الحمام .. نشوف لينا (ركشة) نرجع البيت
- (وهو يبتسم والكاميرا Close-up على وجهه) : نرجع البيت لييه .. والحل موجود
- (وهو لا يزال ممسكا ببطنه يتألم) : الحل وينو؟؟
- الحل أهو ده قدامك (الكاميرا Close-up على لافته شركة الخرطوم لدورات المياه )
- (بعد دقائق يخرج مبتسما) : يالله والله الواحد كان (مذنوق) جنس (ذنقه) لكن هسه (إرتاح)
(صوت جهورى) : نعم نحن نعمل من أجل راحتكم (شركة الخرطوم لدورات مياه) .. زيارة واحده تكفى !!
لقوها ماشة :
بعد أشهر قليلة وفى وقت واحد فوجئ المواطنون بوجود أعمال حفر فى مساحات تتراوح بين 100 -150 متر مربع بكافة أسواق العاصمة ومواقف المواصلات وفى مواقع لا تبتعد كثيرا عن (دورات المياه) التى شيدتها شركة (الخرطوم) .. لوارى الطوب والرمل والخرسانة .. قلابات السيخ والحديد .. العمال آسيويي السحنة يعملون فى كل المواقع ليل نهار :
- أها يا (برعى) .. المرة الفاتت طلعت (دورات مياه) يا ربى المرة دى عاوزين يعملو فينا شنو؟؟
- والله ي (صالح) الجماعة ديل عملو لينا (دوشه) فى (النخاع العصبى) والواحد بقى ما عارف معاهم أى حاجة !! كدى خلى (المبانى) بتاعتهم دى تنتهى وبعدين نشوف
بعد حوالى شهر وبينما كان الجميع فى دكان (برعى) إنتظارا لتناول (الفطور) تعالى صوت أحد (المايكرفونات) :
يا تجار السوق ... ويا رواد السوق .. أيها البائعون ... أيتها البائعات .. أيها المواطن طن طن طن .. أيتها المواطنة نا نا ااا ... اليوم الإفتتاح الكبير ..( لدورات المياه الحديثة) .. مقاعد (مريحة) .. مياه (ساخن بارد) ... و ...
- الجماعه ديل لقوها ماشة وإلا شنو؟؟
- كيف يعنى ما ماشه هسع شوفو (الخمسه) فول و(إتنين) كباب و(واحد) طرشى وستة (عائلى) الطلبناهم ديل ح يعملوا ليهم كم ؟
- هو (الأرض) البعملو فيها المشروعات دى قاعدين (يشتروها) وإلا (ملح) ساكت ؟ دى غالية وواطات (سوق) ؟
- هو هسه المشروعات (الإستثمارية) دى قاعدين يطلعوها فى (عطاءآت)؟
- بئس الإستثمار ياخى .. عليكم الله ما لقو يستثمرو إلا فى (الحاجات) دى ؟؟
- والله (ديل) يستثمرو فى (أى حاجة) بتجيب (قروش)
- لكن هسع (شركة دورات المياه الحديثه) دى ح تنافس (شركة الخرطوم لدورات المياه) كيف ؟؟
هنا كان جهاز التلفزيون الموضوع على أحد رفوف دكان (برعى) يعرض (إعلانا لشركة دورات المياه الحديثة) :
شخص يخرج من أحد دورات المياه العامة غاضبا وهو يقول : معقول الواحد (يقطع الجمار) ويتوضأ حسابو يطلع (تلتمية دينار) !! يعنى الدقيقه بى (خمستاشر دينار) ؟؟ بينما (شخص آخر) يمسك به ويتقدم به مشيراً إلى لوحة (شركة دورات المياه الحديثه) قائلا :
- إنت ما عارف ؟
- عارف شنو؟؟
- إنو فى (دورات المياه الحديثه) الدقيقه بى (عشرة دينار)؟
- وكمان
- (الكاميرا تركز على قسمات وجهه المندهش) : وكمان شنو ؟؟
- (وهو يبتسم) : كمان (الوضؤ) مجانى !!!
|
|
 
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
إذيك يا ناذر .. ياخى الوالد صحتو بقت كيف؟ إن شاء الله بلغ العافية وفاتا بى غادك .. أنا منتظر صحن (المرارة) الشطة الخدراء ذى بتاعت (فطور) ناس (برعى) ديل .. السيناريوهات (القديمة) قلت أحسن أوقفها شويه وأنزل تانى سيناريوهات (الجمعة) ذاتا ... شكرا ليك يا ناذر وعارفك ما بتقصر وإن شاءالله تكون سيناريوهات الجمعة دى عجبتك ... تحياتى
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
تسلم كتير أستاذ الفاتح ..
الوالد الحمد لله إتعافى تماماً وما عندو عوجة تب ونزل الشغل كمان .. بالنسة للسيناريوهات يا ريت كمان في نص الاسبوع تنزل لينا جذء من السيناريوهات القديمة برضو بينما تواصل في تنزيل سيناريوهات الجمعة ..
مش عشاني أنا لاني صراحة كل السيناريوهات القديمة قريتا كلها في وقتها بالذات سيناريوهات (حكاية في جباية) بس أنا داير الما قراها يقراها ..
ودي ..
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
أستاذ الفاتح ..
السيناريو دا كلو كوم .
أما القفلة دي :
Quote: شخص يخرج من أحد دورات المياه العامة غاضبا وهو يقول : معقول الواحد (يقطع الجمار) ويتوضأ حسابو يطلع (تلتمية دينار) !! يعنى الدقيقه بى (خمستاشر دينار) ؟؟ بينما (شخص آخر) يمسك به ويتقدم به مشيراً إلى لوحة (شركة دورات المياه الحديثه) قائلا :
- إنت ما عارف ؟
- عارف شنو؟؟
- إنو فى (دورات المياه الحديثه) الدقيقه بى (عشرة دينار)؟
- وكمان
- (الكاميرا تركز على قسمات وجهه المندهش) : وكمان شنو ؟؟
- (وهو يبتسم) : كمان (الوضؤ) مجانى !!! |
فدا كمان كوم براهو .gif)
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
الحمدلله يا ناذر السمعنا الأخبار الجميلة دى عن الوالد الله يخليهو ليكم ويديهو الصحة والعافية أما بخصوص السيناريوهات فإن شاء الله أعمل بى كلامك وأنزل واحده من (القديمات) فى نص الأسبوع ... اما (القفلة) فده من (ظرفك) و(جشع) الجماعة !!!!!!
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
| Quote: ولو الواحد - يا الفاتح اخوى - مياكل بني كربو يعمل شنو؟ |
والله فى الحاله دى يا الطيب يا خوى إلا الزول يمشى يآخد ليهو (مرابحة) منهم !!!
كسرة :
يا فاروق حامد يا خوى (كلبوظة) وين .. عليك الله أترو لينا.. يكون لسه مل رجع من (فيجى) ؟؟
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
.
استاذ الفاتح لك التحية :
في مراسم وحفل الافتتاح هل قام المسؤول بعد قص الشريط بتجربة الحمامات ؟؟
..واكيد في نشرة الاخبار قد صيغ الخبر كالاتي : وقد قام سيادته بالافتتاح
الرسمي بتجربة عملية للحمامات بواسطة (مخلفات) سيادته (الطاهره) وسط (تكبير)
(وتهليل) جماهير الشعب (المزنوقة) ...وقد اشاد السيد(الوالي) بالفكرة ووعد
بان (الباصات) القادمة في الطريق ستكون بها (حمامات) خلفية تقديرا وتسهيلا
للمواطنيين (وفكاً) (لزنقات) المواطنيين اثناء (ركوبهم) للمواصلات .
...................................................................
سيناريو حقيقي:
حمامات الجامع الكبير بالخرطوم بعد تحديثها وضعت عليها لافته قماشية
توضح ان السعر هو (500 جنيه) للحمام...بالقرب منها على موقف ابو جنزير كان
هنالك كشك للمرطبات عليه لافتة توضح ان سعر كباية (العرديب) (300 جنيه) ..
ملك الاعلام الشعبي (الخزين) له الرحمه كان يقف في المنتصف بين الحمامات و الكشك
وعبر مايكرفونه الشهير كان يردد بسخرية ..نشرب الموية بـ300 جنيه ونفضيها بـ500 جنيه ؟؟
.....................................................................
فوائد اخرى للحمامات :
قبل عامين تعرضت لحادثة نشل ...حيث قام احد (حرامية الشارع) بنشل محفظتي اثناء
ركوب الحافلة ..وكانت بها (بطاقاتي الشخصية) ...و (العسكرية).. وهذه الاخيرة لم تمنع
اللص الظريف من تفريغ المحفظة تماما ...المهم توجهت الى (شولة)( بسط الامن ) (الشامل)
وقابلت (الشاويش ) (فرقع) وحكيت القصة وبعد تدوينها ...اشار بيده ناحية (حمامات) الشارع
(وفرقعها) في وشي وقال لي : امشي الحمامات ديك حتلقى بطاقاتك لكن عليك ان (تحتسب) القريشات ...
لم اصدق وقلت يازول انا جاي ابلغ عن سرقة تقول لي حمامات ؟؟ فرد كدي انت امشي جرب وكان
مالقيت حاجاتك تعال راجع ..ضربت كف بكف وتوجهت للحمامات ..وقابلت (المسؤول) عنها في المدخل
وطوالي سالني السؤال المعتاد اها شنو ؟( كده ) ولا (كده) فقلت ليهو لا كده ولاكده ...طوالي قال
لي خلاص اكيد عندك (جزلان ) ضايع وجاي من النقطة ؟؟ بدهشة قلت ليهو (اي كده) ...وازدادت دهشتي
عندما اخرج شنطة مليانة بطاقات واوراق ثبوتية اشكال والوان جنسيات بطاقات شخصية وطلاب ..الخ
قال لي شوف حاجاتك هنا حتلقاها ..من الدهشة قلت ليهو كدي اول حاجة اديني(تذكرة) اخش واجيك
راجع افتش (بالراحة) وتحكي قصة البطاقات البتتلقي في الحمامات دي ....
لمن جيت راجع (مرتاح) واثناء بحثي بين (المراجع) و(البطاقات) شرح لي سيادته بان (النشالين)
بعد الحصول على (الغنيمة) بيجوا الحمامات عشان هي المكان الوحيد (الامن) في السوق ..و الواحد
منهم بيلقى (راحتو) خالص خالص في (تقليب) محتويات (الجزالين) و (الماحفظ) بياخذ منها(المفيد)
وبيرمي (البطاقات) و المحفظة الفاضية على ارض الحمام ..ونحن اثناء النظافة بنجمع (المخلفات)
دي وبنختها هنا في (الاستقبال) لحدى ما اصحابها يجو زيك كده ويشيلوها وحسب (توجيهات )
(الشرطة) ما بنسلم زول (بطاقة) الا بعد (إبراز) (إثبات شخصية) ومطابقة الاصل بالصورة ..
..
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: gamal elsadig)
|
Quote: من الدهشة قلت ليهو كدي اول حاجة اديني(تذكرة) اخش واجيك
راجع افتش (بالراحة) وتحكي قصة البطاقات البتتلقي في الحمامات دي .... |
يعني الكلام دة حقيقة ما سيناريو؟؟؟؟؟؟؟؟؟؟
في تذاكر علي دورات المياه في الخرطوم بالجد؟؟؟؟؟؟؟
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
!!!!!!!
Quote: في مراسم وحفل الافتتاح هل قام المسؤول بعد قص الشريط بتجربة الحمامات ؟؟
..واكيد في نشرة الاخبار قد صيغ الخبر كالاتي : وقد قام سيادته بالافتتاح
الرسمي بتجربة عملية للحمامات بواسطة (مخلفات) سيادته (الطاهره) وسط (تكبير)
(وتهليل) جماهير الشعب (المزنوقة) ...وقد اشاد السيد(الوالي) بالفكرة ووعد
بان (الباصات) القادمة في الطريق ستكون بها (حمامات) خلفية تقديرا وتسهيلا
للمواطنيين (وفكاً) (لزنقات) المواطنيين اثناء (ركوبهم) للمواصلات .
|
.gif)
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
Quote: ملك الاعلام الشعبي (الخزين) له الرحمه كان يقف في المنتصف بين الحمامات و الكشك
وعبر مايكرفونه الشهير كان يردد بسخرية ..نشرب الموية بـ300 جنيه ونفضيها بـ500 جنيه ؟؟ |
عزيزى جمال
التحايا والود
رحم الله (الخزين) الى لا زالت أسرته الكريمة تناشد أولياء الأمر التفضل عليها بقطعة أرض تضمها ولكم ....
موضوع البصات طبعا طرشق بعد ما الحكاية بتاعت لـ Reconditioning الفى هولندا إتعرفت !!!
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
المعلم الاستاذ جبرة
طريقة عرضك للقضية فعلا عجيبة وتستحق الاشادة فلا يختلف اثنان علي
اهمية وجود المراحيض في الاسواق فهيي مثال للامة المتمدنة التي تحترم
شعوبها وتسعي الي راحتها اتفق بان معظم دول العالم توفر دورات المياه
في الاماكن العامة لمواطنيها ولكن باسعار زهيدة عدا المساجد فهي بيوت
الله الدخول الي مراحيضها مجانا
اما ان تكون هناك مراحيض بهذه الاسعار فهذا يعني بانها مراحيض خمسة
نجوم تتوفر فيها خط تلفون وجهاز كمبيوتر ومكتبة بها كل الصحف
اليومية فقد قال احد الفلاسفة بان الافكار الجيدة دائما تتقافز الي ذهنه
عند جلوسه علي دورات المياه وقال لي صاحبي بان اروع سيجاراته هي
سيجارة الصباح علي مقعد المرحاض
واهدي الي هذه الشركة الصورة ادناه والتي توضح المواصفات المطلوبة
لدورات السوق العربي للمرحلة الجاية
اخي جبرة نامت عيونك
تسلم يا بحر الزراف
| |
|
|
|
|
|
|
|
|
 Re: (ســــيناريوهات) : لـقوها ماشــه (Re: Dr.Saeed Zakarya Saeed)
|
عزيزي الفاتح
نتابعك بإهتمام وأنت تنتزع إبتسامة ساخرة من على الشفاه إما المتذمرة أو الصامتة!!
وبعدين ما تسيبو الحقد بتاع البرولوتاريا ده إنت يا أخي ما عارف أنو نحن أصبحنا في مصاف الدول المتقدمة زي بريطانيا مثلاً التي تهتم بحقوق الإنسان ومن ضمنها ( حق الإنسان في التغوط والتبول بكل طمأنينة) وفي أي زمان ومكان ممكن تفك زنقتك!!، وهناك مراحيط عامة تشتغل (بالباوند الكوين).. قضاء الحاجة زينا بقروش والما عاجبو الخلا وسيع .. وين المشكلة؟!! ، بي باوند واحد تقضي حاجتك بعد أن ينظف المرحاض نفسو أتوماتيكياً للمستعمل التالي وطبعاً نحن بدينا من حيث إنتى اولاد العم جون .. وبعدين ماأنت عارف أنو السودان بقى من مصاف الدول المتقدمة التي تحافظ وتصون حقوق الإنسان ومن ضمنها حق التبول والتغوط في حرية وطمأنينة وهي لله .. هي لله لا للتشليح ولا لجمع المال.. من الغلابة أولاد الحلال.. وطبعاً لتدخل جيوب أولاد ...!! ( إنت براك عارف أنا قاصد شنو) خلي حمدو في بطنو!!
| |
|
|
|
|
|
|
|
|
|
Re: (ســــيناريوهات) : لـقوها ماشــه (Re: الفاتح يوسف جبرا)
|
عزيزي أستاذ الفاتح
هاك النكته دي ليها علاقه بالموضوع
قالوا واحد دخل الدورة وعمل الدايرو واتوضاء كمان ولمن جاء يحاسب قالوا ليهو 200 دينار ,قام قال ليهم ليه في شنو قالوا ليهو الوضؤ براهو 100 دينار قام رفع كراعو وعمل ( طوووووو....... )
وقال ليهم مش وضؤكم دا أها خليناهو.
| |
|
|
|
|
|
|
| |
الفاتح يوسف جبرا
حيدر حسن ميرغني
ناذر محمد الخليفة
فاروق حامد محمد
هشام هباني
الطيب شيقوق
gamal elsadig
عبدالعظيم عثمان
عبد المنعم سليمان
Dr.Saeed Zakarya Saeed
Moawia Mohammed
فيس بوك
تويتر
انستقرام
يوتيوب
بنتيريست