الفاتح يوسف جبرة ... أشهر كاتب في السودان

Quote: (الشــ ـا شة) في خدمة الشعب!! كانت هنالك (شاشة تلفزيونية) إعلانية مقاس (ألف وميتين بوصة) قد نصبت عند (صينية) تفتح على (خمسة شوارع) و(كبري).. كثرت حوادث (العربات) نسبة لانشغال (السائقين) بالنظر إلى ما تبثه هذه الشاشة (المشعة) من صور (تلفزيونية متحركة) و(فديو كليبات إعلانية) فاْرتفعت أصوات الاحتجاج على (هذا العبث) بأرواح المواطنين وتوالت وفود المواطنين على اعتاب المسؤولين وكتب كاتب (فايق ورايق) وما عندو شغله ولا مشغله (وعاوز يضيع وكتو) في هذه المساحة من قبل ينبه إلى ضرورة إزالة هذه (الشاشة) لأنو ما معقول (الزول يسوق ويشوف فى آن واحد) فى هذا التقاطع الخطر علماً بأن تحدث السائق فى الموبايل (لاحظ كلام مش شوف!!) يعد خطراً فى الطريق و(مخالفة إيصالا مضمون). لكن على الرغم من أن الموضوع هام وgenuine ويتعلق بحياة وأرواح (الشعب الفضل) إلا أن المسؤولين (صهينو) ولم يعيروا المسألة اهتماما ولكن أخيراً أثبتت الأيام أنهم كانوا (بايتين ليهم فوق راي) وأنهم مسؤولون بحق وحقيقة ولم يجهلوا الموضوع كما تبادر الى أذهاننا (الوحشة) لأنهم كانوا يعملون ليل ونهار ويخططون لمعالجهة الآثار السلبية لوجود هذه (الشاشة) فى ذلك الموقع الخطر. حيث شوهدت عدة شاحنات تفرغ حمولتها من مواد البناء قرب (الشاشة)، وبدأ العمل ثم جاء أحد كبار المسؤولين في موكب عظيم ووضع (الحجر الأساسي) ورفعت عند ذاك في المكان يافطة كتب عليها: (هنا يبنى المستشفى الوطني لمعالجة ضحايا الشاشة) وكما جاء على لسان المسؤول الذى قام بوضع حجر الأساس فإن وجود هذا المستشفى على بعد (أمتار) من (الشاشة) يوضح مدى اهتمام (الدولة) بإنقاذ حياة (ضحايا الشاشة)... وبقيت الشاشة على حالها. ونامت قضية (الشاشة) بعض الوقت ثم استيقظت بعد أن استيقظ الإخوة المسؤولون فى (إدارة المرور) فقرروا إيقاف هذا العبث بأرواح المواطنين فقاموا بوضع (لافتة) تنبيه كبيرة على سور (الصينية) تقول: (عزيزي السائق من أجل سلامتك لا تنظر للشاشة) فأصبح بعدها ينظر (السائق) إلى لافتة (لا تنظر) ثم (ينظر ليرى) ثم يجد نفسه فى (الحوادث) الشئ الذى جعل عدد المطالبين (بإزالة الشاشة) يزداد خاصة بعد أن أصبحت (الشاشة) إضافة للإعلانات التجارية تبث (حلقات المسلسل اليومى) حيث يمكن (للسائقين) وهم يقودون (عرباتهم) معرفة مجريات أحداث (الحلقة قبل الأخيرة) من (مسلسل بكيزة وزغلول). لم تقف السلطات بعد ازدياد حوادث الشاشة مكتوفة الأيدى (كلا وحاشا) إذ كان لها رأي آخر لمعالجة الأمر حيث تقرر اتخاذ (آلية) جديدة فقامت بإرسال عدد من الخبراء والمهندسين يجوبون المكان ومعهم خرائط وملفات، وأدوات (مساحة) وما لبث أن تمت مباشرة العمل فى (الورشة الفنية الحديثة لإصلاح عربات ضحايا الشاشة) والتى مهمتها إراحة (الزبائن الضحايا) من (التلتله) والبهدله وما يكلفه (جر العربية) للمنطقة الصناعية من وقت ومال..... وبقيت (الشاشة) على حالها. وبسبب عرقلة السير على (صينية الشاشة) في أغلب الأوقات، واضطرار (السائقين والركاب) للتوقف عندها لوقت طويل فى أحيان كثيرة فقد خطر لأحد (الباعة الشطار) أن يضع (تلاجة حاجة باردة) بالقرب من (الشاشة) وحذا حذوه (بائع) آخر فأقام (كشكا) لبيع (الساندوتشات) الشئ الذى جعل بقية الباعة الآخرين يهرعون لموقع (الشاشة) فانتشرت أكشاك (الاتصالات) و(قدر ظروفك) و(سلطان الكيف) وطبالى (السجائر ومناديل الورق) وستات (الشاى) وبائعى (البطيخ) والفاكهة و(غاسلى العربات) الذين يمكن أن تترك لهم عربتك (لغسلها) بينما أنت تشاهد على (الشاشة) إحدى حلقات (المصارعة الحرة). وباتساع رقعة (سوق الشاشه) الذي تحول إلى ساحة من المشاحنات والمشاجرات الدائمة بين السائقين والراجلين والباعة أقام المسؤولون (مركزاً صغيراً للشرطه) خلف (الشاشة) حفاظاً على استتباب الأمن و(سلامة المواطنين) ريثما يتم بناء (سجن) خلف (المركز) لتوقيف (المشبوهين) و(النشالين) ومثيرى الشغب الذين يمتلئ بهم (السوق)... وبقيت الشاشة على حالها وراجت بعد ذلك إشاعات وتناقلت الألسن أن (الدولة) قد طرحت الأرض التى عليها (سوق الشاشة) لبيعها في مزاد علني بعد أن أصبحت بفضل (الشاشة) موقعا استراتيجياً تسويقياً هاماً حيث قامت بمسحها وتقسيمها إلى متاجر ومعارض ومحال تجارية وذلك بأسعار (فلكية) تتناسب واسم المشروع وهو (مخطط سوق الشاشة النموذجى) وقد شوهد سماسرة بيع الأراضى يجوبون المكان فى زيارات ميدانية استعداداً لخوض (المزاد)!! تمسك الباعة المتجولون وستات الشاى وأصحاب الطبالى والأكشاك بحقهم كمؤسسين (لسوق الشاشة) ورفضوا أن يتم (ترحيلهم) من الموقع دون منحهم تعويضاً مجزياً وقاموا بالتظاهر رافضين لقرار الترحيل الشئ الذى دعا (المسؤول الكبير) الذى قام بمخاطبة التظاهرة أن يطمئنهم قائلاً: - يا جماعة الموقع الح نرحلكم ليهو ده موقع (أحسن) من ده ميت مرة.. لأنو (الشاشة) بتاعتو (بلازما) وحجمها (أكبر) من دى وكمان (ناصية) بتفتح فى (صينية) فيها سبعه شوارع رئيسية و(كبرى)!!! - كسرة: شفتو كيف (الشاشة في خدمة الشعب)... الفضل!!! الفاتح يوسف جبرا

Quote: هو بالتأكيد ظاهرة لا يمكنك إغفالها، هو الموضوع الأساسي طوال يوم الجمعة ونهار السبت وربما طوال بقية الأسبوع ... لا أعتقد أن هناك كاتب في السودان تباع الجريدة باسمه سوى الفاتح جبرة ...

Quote: بعد أن عدت إلى البلاد بعد قضاء شهر خارجها فى مهمة عمل دعتنى الضرورة إلى الذهاب لشراء بعض الاغراض (للأولاد) من سوق أم درمان وقد كان ذلك فى منتصف النهار حيث شمس الصيف تلقى بأشعتها الناريه على شوارع السوق المزدحمة بالبضائع والبشر وبعض (الحيوانات) . فى خضم إنشغالى بعملية البحث والشراء لفتت إنتباهى عده ظواهر غريبة فبينما تكدس الناس وإزدحموا يستريحون من ضربة الشمس فى فى ظلال بعض (العمارات) والمحال التجارية كانت بعض (ظلال العمارات) والمحال الأخرى (فاضية تماماً) من جنس (إنسان) كما أن هنالك عدد من (مظلات القماش الضخمة) نصبت خارج السوق لا يتناسب عدد (الناس) الذين (يستظلون) تحتها مع عدد الناس الذين يقفون ينتظرون (المواصلات) بجانبها تحت حرارة الشمس هذا إلى جانب (ظاهرة غريبه) وهى وجود بعض (الناس) فى المحطه وهم يقفون تحت (اشعة الشمس) الحارقة إتنين إتنين ... إتنين إتنين إذا عرف السبب : ما إن عدت إلى المنزل حتى قمت بسؤال إبنى (ناجى) عن هذه الظواهر الغريبه التى رأيتها .. ضحك (ناجى) كثيراً وهو يقول لى : - يا بوى إنت عشان سافرت اليومين الفاتو ديل وما عارف الحصل ؟ - والحصل شنو؟؟ - (الحكومة) طلعت قرار تبيع للناس (الضل) ؟ - هى (الحكومة) دى ما باعت أى حاجه بس فضلت على (الضل) - والله يا بوى (الجماعة) قالو الشمس دى بتاعت (ربنا) وهم ناس (بتوع ربنا) وبالتالى (الشمس) البتعمل (الضل) لمن ينعكس على (الحاجات) دى (بتاعتهم) والضل البجى منها دا بالتالى بتاعهم !! - أها وبعدين؟ - وبعدين أى ضل ..ضل عربيتك .. ضل بيتك .. ضل عمارتك ده ضل (بتاع الحكومة) تستثمرو ذى ما عاوزه وأى زول تلقاهو (قاعد فيهو) تدفعو (رسوم ضل) لكن فى حاجه ؟ - اللى هى شنو؟ - لو (الزول) سيد (العماره) أو (البيت) أو (المحل) دفع للحكومة (ضريبه ضل) خلاص (الضل) بيكون بتاعو لو عاوز يأجرو أو يستثمرو أو لو عاوز يخليهو مجانى سااكت (وقف ساكت) للمسلمين - أيواا عشان كده أنا فى السوق لقيت (عمارات) الناس قاعده تستريح فى ضلها و(عمارات) ما فيها جنس إنسان قاعد - آآى يا بوى هسع (النسوان) ذاتم بقو يقولو (ضل حيطه ولا ضل راجل) عشان (ضل الحيطه) بقى يجيب قروش أكتر !! - أها والناس الواقفين إتنين إتنين ديل شنو؟؟ - (يضحك) إنت ما عارف يابوى إنو (ضل الزول ذاتو) يا يدفع عليهو (ضريبه) ويكون حقو يأجرو أو يعمل فيهو العاوزو وإلا ببقى حق (الحكومة) وكان وقف فيهو أى زول تشيل منو رسوم ؟ - وهسع الزول لو عاوز يدفع رسوم (الضل) دى و(يترخص) يدفع كم ؟ - خمسين ألف غير رسوم (الفحص الآلى) عشان (الفحص الآلى) ده بيوضح إنو الزول صحتو بتتحمل الشغلانه دى ولا ما بتتحمل - والشغل ده كلو .. ترخيص وفحص آلى وجمع رسوم والحاجات دى كلها البيقوم بيها منو؟؟ - إنت ما قالو ليك؟؟ دى شركه إسمها (يستظلون) – مواصلا- إنت يا بوى فاضى ولا عندك حاجه - لا فاضى .. - خلاص خلينى أحكى ليك (السيناريوهات) الحصلت بعد ما سافرت دى نشالين الضلله : وهم أؤلئك الأشخاص الذين يمتازون (ببسطة) وضخامة فى الجسم ثم ينتشرون حيث يقومون بإختيار أكثر الأماكن (سخونه) ومواجهه لأشعة الشمس اللاسعة فى منتصف الظهيرة حيث يغريك ضلهم (الواسع الممتد) بالوقوف عليه ثم ما أن تقف حتى يبرز لك (إثنين) من رجال (مباحث الظل) الذين كانا يختبئان خلف الشخص فيقف خلفك أحدهم حتى لا تنصرف وتغادر قبل (الدفع) ثم يقف الآخر موجهاً حديثه لنشال (الضل) : - إنت بتوقف الناس فى ضلك أصلك (مرخص) ؟؟؟ - لا ما مرخص - طيب لو إنت ما مرخص معناها ضلك ده ضل (حكومى) - أيوه - (ثم يلتفت لك) : إنتو (الحكومة) دى طوالى (ماكلين) حقها ؟؟ - (زميله الذى كان يقف خلفك) : يعنى عاوز تقعد وترطب فى ضل الحكومة (البااارد) ده (ملح ساااكت) - (فى توسل) : يا جماعة والله أنا وقفت هنا صدفه سااكت - ده علينا نحنا ؟؟ .. طيب ما كنت تمشى تقيف فى الشمس الحارة ديك (صدفه) ساكت ؟؟– ثم موجها حديثه لنشال الظل- - الزول ده واقف فى ضلك أقصد (ضل الحكومة) ده من بتين ؟؟ - (يسرح كمن يتذكر) : واللله كان ساعه كان ساعتين - ياااخى حرام عليك أنا و(قفت فيهو هسع) دقيقة ما أخدتها - (كمن عثر على شئ) : شوف شوف بتقول وقفت فيهو هسع .. كده إنت إتقبضت (بالثابته) !! - يا جماعه (ثابتت) شنو؟؟ أنا واقف فى (بنقو) - بنقو .. كمنقه .. أدفع لينا بس رسوم الساعتين ديل - يا جماعه والله ما ساعتين ديل دقيقتين فى زول بقعد فى الشمش الحارة دى ساعتين؟ - (يا زول) أدفع وما تخلينا نتخذ معاك إجراءآت !! وتنهمك وأنت (مغبون) فى إدخال يدك فى جيبك لإخراج محفظتك لدفع (رسوم ضل ساعتين) لتكتشف أن الشخص الذى كان يقف خلفك وأنت تتحدث مع (نشال الضل) لم يكن إلا (نشال جيوب) !! حاجه أمونه: - يعنى هسع لزومو شنو نرجع السوق تانى فى الشمس الحارة دى عشان نرجع (الجزمه) بتاعتك دى ؟ - لكن يا أمى طلعت (ضيقه) وأنا ماشه بيها عرس ناس (نهله) الليله المساء - ما تلبسى ليكى أى واحده تانيه .. بس إلا هى يعنى؟؟ - ألبس أى واحده كيف يا أمى؟ دى أنا إخترتها لون (الفستان) فى ذلك النهار الحار والشمس تتوسط كبد السماء ركبت حاجه أمونه وبنتها (سعاد) ركشه إلى السوق حيث وقفتا أمام (طبلية) بائع الأحذيه وبينما كانت (حاجه أمونه) تشرح للبائع كيف أنهم قد وجدوا أن (الجزمه) ضيقه وإنهم عاوزين نفس اللون بس (مقاس أكبر) وقف أمامها أحد الأشخاص مخاطباً : - إنتى يا حاجه (البت) الواقفه فى (ضلك) دى مأجره ليها ولا إنتى (عندك رخصة) - (فى إستغراب) : مأجرة ليها شنو كمان؟ - لا يعنى ما فيها حاجه لو مأجرا ليها لأنو القانون بيسمح (للنسوان) يأجرو لى بعض - يا ولدى قانون شنو ونسوان شنو؟؟ دى بتى أقيف فى ضلها تقيف فى ضلى دى ما شغلتكم - يا حاجة شوفى بتك أمك أختك أبوك دى ما مشكلتنا .. إنتى لو (مرخصة ضل) وعندك ما يثبت تكونى إنتى حرة فى (ضلك) وما بنسألك إن شاء الله أى زول يقيف (يرطب) فيهو.. لكن كان ما (مرخصة ضل) الضل ده بيكون بتاعنا .. حقنا نحنا .. يعنى بالعربى كده (ضل الحكومة) مش لو وقفت فيهو (بتك) كان قعدتى إنتى ذاتك فيهو بندفعك (رسوم ضل) !!! - (وهى تفتح محفظتها لتعطيه الرسوم) : شاحده ربى الكريم (تقعدو فيهو) الجمر الحار داك يوم القيامه أكان ما خليتو لينا صفحه نرقد عليها !!! تستظلون : بعد أن أصبح وجود (الظل) فى الأماكن ذات الشمس المحرقه حكراً بل (حصرياً) على شركة (تستظلون) قامت الشركة بإختيار (أسخن) المواقع وبخاصة أماكن التجمعات ومواقف المواصلات العامة لتنشر فيها أعداداً مهولة من (المظلات القماشية) الضخمة ليقف عليها (المستظلون) بعد دفع الرسوم المقررة علاوة على بيع الماء البااارد لهم . - بالله شوف بالله .. (فلس) الزول الواقفه معاهو البت داك ليهو ساعتين موقفها فى الشمس الحارة دى بدل ما يدخل يقيف بيها فى واحده من (المظلات) دى!! - يكون ياخى (مفلس) وما عندو قروش - طيب لزوم (الجكيس) فى الشمس الحارة مع (الفلس) شنو؟؟ - هم ديل كويسين عليك الله شوف الراجل ( أب صلعه) ونضارة الماسك (الجريده) داك .. العرق نازل منو ذى المويه كيفن؟؟ مستخسر فى (روحو) ألف جنيه يدخل بيها جوه (تستظلون) !! حكاية عبدالسميع : عبد السميع يسكن (أمبده بالردمية) ويعمل (باشكاتب) بإحدى الوزارات عاد إلى المنزل من العمل فى نهار ذلك اليوم القائظ الحر ليجد أن طفلته تعانى من (النزلات الحايمة اليومين ديل) - (البت) من الصباح (تطرش) وجسما مولع نار وحلقها مسدود - أها ونعمل شنو يعنى؟؟ - كيفن نعمل شنو يلاكا نوديها هسع (المستشفى) عاين ليها بقت كيفن دون أن يستريح (عبدالسميع) دقبقه واحده ويآخد نفسو أخذ طفلته ومعه زوجته وخرجا إلى محطة المواصلات التى خلت تماماً من الحافلات المتجهه إلى ( أم درمان) حيث المستشفى العام وذلك بسبب تهرب السائقين من العمل فى ذاك الجو المشمس الحار. بينما كانت زوجه عبدالسميع تقف على (ظل) زوجها إتقاء الشمس وهى تضع طفلتها على كتفها إقترب منها أحد رجال (مباحث الظل) : - بالله لو سمحتو بطاقاتكم - (عبدالسميع فى إستغراب وزهج ) : الله ؟؟ وعاوز بيها شنو؟؟ - كيف عاوز بيها شنو؟؟ - فى صرامه- إنتو بتبقو لى بعض؟ - (عبد السميع فى لماضة ) : ودى تخصك فى شنو؟؟ - (فى حزم وجديه) : إتكلم عدل وجاوبنى ( يخرج له كارنيه مباحث ظل) - طيب ما تقول كده من زمان ... دى زوجتى - وهل لديكا ما يثبت ذلك؟؟ إنت مش عارف ممنوع تأجير ضل الراجل لى (مرا) إلا يكون (محرم) ؟ - أيوه لديا (مشيراً إلى الطفله) : الشافعه الشايلاها دى - أقول ليك ما يثبت تقول ليا (شافعه) يعنى (مكتوب) فيها (تاريخ إصدار) وإلا ( إنتهاء صلاحية)؟؟ - يعنى إنت عاوز شنو هسع ؟؟ - قسيمه طبعاً - (وهو يكفكف فى أكمام القميص والشرر ينطلق من عينيه) : يازول البت عيانه والفلس مطلع عينا والشمس حارة وجايين من الشغل هسع ما إسترحنا دقيقه و... - (خائفاً) : المره دى أنا ح أسيبك عشان (الطفلة العيانه) المعاكم دى – بعد أن إبتعد – لكن تانى أعمل حسابك والله ألقاك موقف ليكا مرا فى (ضلك) إلا أوقفك بين يدى (الرحمن) .. !! ضل متحرك : - يا خى والله أنا منتظر ليا تاكسى والشمس دى ضاربانا فى نص راسنا .. أها تأجر ليا ضلك ده نص ساعه بى كم ؟؟ - بى تلاته ألف - تلاته ألف كتيره ..ليه إنت مرخص؟؟ - (يلف ويعطيه ظهره) : طبعا مرخص إنت ما شايف (الرخصه المدورة) دى ؟؟ - طيب خلاص وكت مرخص نديك ألفين ونص - عليك الله هسع دى شمس ألفين ونص والله ألفين ونصك دى (مويه) بارده ما تروينا – مواصلاً – بعدين عليك الله هسع شوف (الضل بتاعى) ده واسع ووهيط كيفن عليك الله ما ذى ضل عمارة ؟ - خلاص يا زول تلاته تلاته وقف عابدين) فى (ضل الراجل) وأخرج (جريده) أخذ يقرأ فيها بعد أن قام بمسح (نضارة القراية) بكفة قميصه فى ذات الوقت الذى أشتدت فيه أشعة الشمس عل صاحبنا فبدأ فى تكسير الوقت بالغناء حيث أخذ يغنى ويتمايل يساراً ويمينا الشئ الذى جعل عابدين يجد نفسه تارة فى (الشمس) واخرى فى (الضل) : - شوف يا زول والله أنا ما بقدر على (القميز) بتاعك ده .. أنا مأجرك (ضل ثابت) ما (ضل متحرك) عشان تقعد تتجارى ليا بى جاى وبى جاى - يعنى شنو؟؟ ما نغنى ونكسر زمن فى الشمس الحارة دى؟؟ - متهكماً- طبعا يا أبوها إنت قاعد فى ضلى الكبير ده ومرطب وما عارف الشمس الحارة دى مديانا فى (صنقورنا) كيف؟؟ - ياخى لا (صنقورك) لا ما (صنقورك) – وهو يطبق الجريده ويبتعد- أنا ما ضلك ده ؟ ما عايزو - (يتبعه ويمسك به من ياقه قميصه) : تعال .. تعال ماشى وين قاعد فى (ضلى) ربع ساعه وعاوز تمشى كده ساااكت؟ - يا زول ربع ساعة شنو؟؟ والله بى (قميزك) وحركتك الكتيرة دى ما أكون قعدت فى (الضل) دقيقتين - يعنى شنو ما ح تدفع إيجار (الضل) ده؟ - (وهو يلتفت إلى الجمهور الذى بدأ يلتف حولهما) : يا جماعه بس معقول الزول يدفع ليهو إيجار (ضل) ما قعد فيهو ؟؟ بدأ صاحبنا متشنجا وهو يمسك بتلابيب (عابدين) وهنا فج أحدهم أفراد الجمهور الذى شكل حلقة حولهما : - (وهو يخرج الكارنيه ويكشفه لهما) : معاكم (مباحث الضلله) – ثم موجها سؤاله لعابدين : - إنت الزول ده كان مأجر ليك (الضل) بتاعو مش كده؟؟ - أيوه صاح وكمان سألتو قلت ليهو (مرخص) قال ليا أيوه وورانى (الرخصة المدورة) الملصقه فى (ضهرو) دى - (رجل المباحث ينظر فى ظهر صاحبنا وينهره قائلاً) : تأجر فى (ضلك) وكمان معلق ليك رخصه (مفوته) - (يحاول التملص) : ضل شنو الأنا مأجرو ؟؟ أنا واقف فى وقفتى دى الزول ده جاء وقف فى (ضلى) قمت أبيت أقول ليهو زح .. قلت شنو يعنى برضو؟؟ (فضل ظل) وربنا ح يدينا عليهو شويت حسنات ضل راجل : - هسع يا راجل بدل ما اليوم كلو (تترقد) من سرير لى سرير قاعد لا شغله لا مشغله (طويل وعريض) كده أكان مشيت موقف المواصلات فى الشمس الحارة دى أجرت (ضلك) ده ما كان جبتا لينا (قرش قرشين) - إنتى وليه مجنونة ؟؟ أأجرو كيف وأنا ما (مرخص) عاوزةه ناس (مباحث الضل) يكشونى؟ هسع كان كشونى ألقى ليهم قروش (غرامه) من وين؟؟ - هو ترخيص الضل ده كمان بى قروش ما كلها خمسين ألف فى السنة؟؟ - وخمسين دى يجيبوها ليهم من وين؟؟ - طيب وكت إنت عارف ما عندك خمسين الترخيص ما تمشى تشتغل فى شكت (الضل الجماعى) دى العملا جارنا (عباس) راجل (التومه) دى - وإشتغل معاهم شنو؟؟ - (فى سخرية) : يعنى ح تشتغل (جراح) ما ح تشتغل (ضل راجل) - كيف يعنى؟ - ناس (ود أب دقن) ديل أدوهم (إمتياز) يعملو شركه سموها شركة( الضل الجماعى) قاعدين يشغلو فيها الناس (الطوال وعراض) ذيك كده وكل عشرة عشرين نفر يطلعوهم يمشوا يقيفو مع بعض ذى (حيطة الكورة) عشان يعملو (ضل جماعى) يأجروهو (للعوائل) والناس الفى مجموعات فى حتات السخانه (الما فيها ضل) !! - يعنى هسع (ود أب دقن) رأسمالو شنو فى الشركه دى؟؟ - إنت عوير؟؟ هو (أبان دقون) ديل عاوزين ليهم (رأسمال) ما كلو قايم من (مافيش) !! ومن (دقنو) وفتتلو – مواصلة- عليك أمان الله عشان شركة (الضل) دى سايق ليهو عربيه (إستثمار) آخر موديل!! يخاف من ضلو : ما أن جلس (عثمان) على مكتبه فى (المصلحه) فى صباح ذلك اليوم حتى أخذ يردد (معقوله بس) معقوله بس ... معقوله بس .. الشئ الذى جعل زميله (مصطفى) يسأله فى إستغراب : - شنو مما جيت شابكنا معقوله يس .. معقوله بس ؟؟ هو شنو الما معقول؟؟ - (يفتح يديه علامة الإستغراب) : معقوله بس ؟؟ - يا (عثمان) ياخى إستهدى بالله وورينا الحاصل - والله البلد دى وصلت مرحله خطيره خلاص؟ - كيف؟؟ - إتصور ياخى الواحد بقى يخاف من ضلو ؟ - ما فاهم - يا خى دى عاوزه ليها فهم ..تكون واقف فى أمانت الله و(ضلك قدامك) بس كان جا زول (بالغلط) وقف فيهو سااكت يجووك ناس (مباحث الضل) وهاك يا أسئله .. إنت الزول ده بتعرفو؟؟ إنت مأجر ليهو؟ عندك (رخصة) ؟؟ - وهسع الواحد لو ما إتكلم معاهم وقال ليهم أعملو العاوزين تعملوهو - إنت بتلعب يا زول؟؟ دى مبااااحث تعرف شنو مباحث ؟؟ والله يودوك (النيابه) بتاعت شركة (يستظلون) تانى تفتش (للبظلك) ما تلقاهو !! - هو الشركات عندها (نيابات) براها - يا بوى البلد دى بقت أى حاجه فيها فيها حاجه براها ما شايفا بقت ذى (السلطه) كيف؟؟ - والله كلامك صاح يومداك لقينا لينا واحد لابس (مبرقع) إتغالطنا يكون شغال فى ياتو (حته) القال ليك يكون فى (المظلات) والقال ليك يكون فى (المدفعية) والقال ليك يكون (سجون) والقال ليك يكون (إستخبارات) والقال ليك شنو ما بعرف وفى الأخير طلع (طالب) فى الثانوى العالى !!! - والله فعلاً الواحد بقى يخاف من (ضلو) !! العريس مالو؟ بثينه تجلس فى (البرنده) أمام (المطبخ) تورق فى (خدرا) وعلى السرير المقابل لها تجلس إبنتها (صفاء) : - يا بتى العريس مالو ؟؟ والله ضلو ولا ضل (حيطه) عليكى أمان الله يقعدو فيهو (نفرين) - لكن يا يمه دى شغلانه دى؟؟ - مالا شغلانة السرور .. – تلتفت إلى إبنتها – هو إنتى قايلاهو واقف على ( إيجار ضلو) بس؟ - يعنى نان قاعد يعمل شنو؟؟ - لا لا ده ود (كسيب) وطور نفسو .. أولن بالتبادى رابط ليهو فى ضهرو (بنبرين) للزباين وتانى حاجه مالى ليك جيوبو (مروت شحن) وسجائر و.. - (فى ضيق) وشنو كمان يمه؟؟ - وشايل ليهو حفاظت مويه بااارده – مواصله – والله وبالله قالو ليكى البدخلو فى اليوم (هايس) ما بدخلو !! - يا أمى ما عايزاهو ما عايزاهو مش كان (هايس) كان (حافله روزا) ما دايراهو - مالو هو الشغل يا بتى حرام؟؟ - يا أمى ما حرام لكن هسع قولى عاوزين نسافر بره فى (الباسبورت) بتاعو فى حتت (المهنه) يكتبو شنو؟ - ما يكتبو اليكتبوهو إن شاء الله يكتبو (مستثمر) !! أكل عيش : بينما كان حاج (سليمان) يحمل (خرطوش) المويه خارجاً من منزله ليقوم برش (ضل ابيت) فى صباح ذلك اليوم إستوقفته (زوجته) قائله : - اليوم كلو يا راجل شايل خرطوشك فى الشمس الحارة دى وترشرش .. وبعدين (المويه دى ذاااتا ما بى قروش إنت ما شايف (جمرة المويه) الركبوها دى؟؟ - ما إحتمال (إيجار الضل) يغطى !! - يغطى شنو؟؟ من زباينك ؟؟ هسع كان فى لزوم (ترخص) ضل بيتك ده وتخسر ليكا قروش فى الفاضى؟ - ما قلنا نأجروا كان نزيد (ميه) المعاش دى شويه؟ - أها الزبائن وينهم .. كل يوم من صباحت الله بالخير خاتى كرسيك بره فى الشمس الحاره دى وقاعد ؟ - ده كلو من جارنا (مختار) ده ؟؟ - مالو كمان مختار عمل ليكا شنو؟ - إتصورى شافنى قاعد أأجر (الساعه) بى (ألفين) قام عمل (الساعه) بى ألف .. ومش كده كمان عمل معاها خدمات - خدمات ذى شنو يعنى؟ - جاب ليهو (كراسى) و(بنابر) ومويه بارده وكمان قام (طول) حيطت البيت عشان (الضل) يكون (ماهل) - وإنت مالك ما تعمل ذيو ؟ - أعمل ذيو من وين أنا عندى قروش؟ ده عندو (ولدو) مغترب قاعد يرسل ليهو - أقول ليك (خت) المسجل بتاعك ده وشغل ليك (أغانى) كان الزبائن يخلوهو يجوك - حليلك يا حاجه – يكلم نفسو- (قالت أيه أغانى) !! - شنو مالو ما فكره كويسه؟ - يا حاجه أغانى شنو ؟؟ (مختار) ده جاب ليهم (دش) ربطو ليهم فى (الضل) !!! الفاتح يوسف جبرا

Quote: المديح في حضرة الجبهجية تقلصت مشاركاتي الاجتماعية جداً (وأحسب أن الكثيرين أضحوا مثلي)، صرت لا أذهب إلى مناسبات (الأفراح) من (حفلات زواج) أو (عقد) أو (سمايات) أو خلافه بل أكتفى بإرسال رسالة قصيرة SMS لصاحب المناسبة أقوم فيها بتهنئته.. أضحت كل مشاركاتي الاجتماعية محصورة في حالات (الوفاة) حيث أقوم بالذهاب إلى (مكان الدافنة) ومواسآة أقارب المتوفي ثم العودة معهم إلى (صيوان العزاء) ثم الحضور (يوم الرفع) وخلاص . صديقي (ن) فاجأني بدعوته لي لحضور (كرامة) عودة (عمه) –وهو أحد أثرياء الغفلة- من الأراضي المقدسة وعلى الرغم من أنني استخدمت (الأعذار) كافة متملصاً من دعوته إلا أنه أبدى إصراراً عجيباً مما دعاني أن أذعن بالموافقة . توقفت عربة صديقي أمام فيلا (عمه الثري) بضاحية (قاردن سيتى).. العربات (الجديدة الفارهة) ما تديك الدرب، وقد تراصت حتى اكتظت بها جنبات الشارع الفسيح .. الباب الخارجي (الزجاجي) مفتوح على (مصراعيه) حيث تجاوزناه ونحن نسير عبر ممر (أسمنتي) يفصل بين جنبتي (الحديقة الوارفة) التي تراصت عليها المقاعد والترابيز ذات الأغطية البيضاء الناصعة ونحن نصل إلى باب الصالون الخشبي الضخم لفت نظري (الأحذية) التي يبدو أنها للضيوف الذين بالداخل.. أحذية جلدية ذات ألوان وأشكال غاية في الروعة يبدو من جمالها أنها مستوردة لم تعرف (الأورنيش) كما ليس بينها أي (فردة) بها ضربة حجر أو (خدشة قزازة) أو بقايا طين (مكدِّب) كل الأحذية كما لو تم إنزالها من (فترينة العرض) الآن !! الصالون بحجم ملعب (كرة سلة) تتدلى منه (النجف) الذهبية ذات الأضواء البيضاء الباهرة محاطاً بصنوف من أطقم الجلوس ذات الكراسي الوثيرة التي يجلس عليها الضيوف الذين تبدو على سيمائهم علامات (الراحة والترطيب) والذين يتساوون في لبس الجلاليب (الذبدة) البيضاء و(العمم) التوتال الأصلي بينما يختلفون في ألوان (الملافح) والشالات وأشكال (الذقون) والساعات اليدوية التي (غطست) داخل (المعاصم) الندية (المبغبغة). قمنا بمباركة (الحجة) لعم صديقي والتي عرفت فيما بعد أنها (السابعة عشرة) جلسنا على الكراسي الوثيرة بينما طاف علينا (ولدان) بصحون من أطايب (التمر الشفاف) الشهي وما لذ من (أعناب) وأشياء لم أتعرَّف عليها حينها .. لم يمض كثير من الوقت حتى انتظمت (الصالون) حركة غير عادية لم تلبث أن كشفت عن نفسها بعد أن انتصبت سماعات (الساوند سيستم) في أركان الصالون وتم وضع (أورغن) مكرَّب ما لبث أن اصطف خلفه ستة (ولدان) دون أو بعد (البلوغ) بقليل يرتدون أزياء متشابهة بل هم أنفسهم متشابهون وكأني بهم وقد تم (إستنساخهم ). وعلى نغمات الأورغ بدأ (الأولاد المغنون) يتمايلون يساراً ويميناً وهم يمسكون (بالمايك).. لدهشتي أن معظم (المدحات) التي قاموا بأدائها هي في الأصل (أغان هابطة) تم إفراغ (نصوصها) وإستبدالها بنصوص (مدائحية) مع الإحتفاظ باللحن. (كده كده يا الترلا القاطرا قندراني) أصبحت (كده كده يا المدينة يا النورك يلالي)، أما أغنية الكاشف المعروفه (الحبيب وين قالوا لي سافر) فقد أضحت (الحجيج وين قالوا لي سافر).. وبينما كان (الأولاد) يقدمون هذا (الفاصل) الذي على شاكلة (الكلام مديح) واللحن (قعدة) كان القوم يتمايلون فى إنتشاء ويهزون (بالعصي) حتى تطير (الملافح) وجدت نفسي أتأمل في ما وصل إليه حالنا من (خواء مقرف) و(استخفاف مزرٍ) بفن من أرقى الفنون (الرزينة) التي تخاطب رهيف أشواقنا (للأراضي المقدسة) وشفيف مشاعرنا نحو حبيبنا رسول الله . توقفت (قعدة المديح) في إستراحة يتناول فيها المدعوون طعام العشاء والذي (أحسب) أنه قد جئ به من أحد الفنادق ذات (النجوم) الكثر، حيث امتلأت ترابيز (الحديقة) بما لذ وطاب من كافة أنواع اللحوم المشوية و(المندية) والأسماك (المقلية) وعديد من أنواع المتبلات والسلطات من (مايونيز) و(أبريلنيز) وأطباق (الأرز) ورقائق (البطاطا) وقد تراصت (جكوك) العصائر الباااردة ذات الألوان و(الكثافات) المختلفة إلى جانب أطباق التحلية من (خشاف) و(باسطة) و(عين جمل) وكنافات . (ضرب) القوم حتى شبعوا ثم (حلوا) ثم (شربوا) فتمطوا و(تدشوا) ثم عادوا للجلوس حيث بدأت (فرقة الإنشاد ) تستعد (للغناء) من جديد.. هنا قلت لصديقى إن هذا يكفى وعلينا بالرجوع إلا أنه أجابني في إصرار: (بس نسمع الفاصل الجاى ده ونمشي) إلا أنني أجبته بعدم رغبتي في الإستمرار واتجهت نحو (باب الفيلا الخارجي) في طريقي نحو العربة.. عندما أخذنا مكاننا داخل العربة كان صوت (الساوند) يردد : وين.. وين مقدرة.. (حج البيت) ده حلو حلا!!!

Quote: خليك ويانا يا أستاذ ...

Quote: سيناريوهات(الحاوى) وفك التسجيلات أصابت الدهشة كل (العالم) وهو يستمع إلى هذا الخبر الذى تناقلته وكالات الأنباء العالمية وبثته (الفضائيات): فى (الخرطوم) وبعد أن تم تبادل الأدوار (سلمياً) وصار (المسؤولون) هم (الرعية) وأصبحوا خداماً (للشعب) الذى أصبح بدوره (مسؤولاً) عنهم وبعد أن أصدر (الشعب) بعض القرارات الخاصة بترشيد (السفريات) الخارجية للمسؤولين وتخفيض (بدل السفرية) لهم من (خمسميت دولار فى اليوم) إلى (خمسين دولاراً فقط) تجمع عدد من المسؤولين فى الميدان المسمى بـ(ميدان أبوجنزير) وقاموا بتسيير (تظاهرة) وهم يحملون اللافتات التى كتبت عليها شعارات تندد بقرارات (الشعب) الأخيرة هذا وقد تصدت (شرطة الشعب) للتظاهرة حيث قامت بفضها مستخدمة الهراوات والغاز المسيل للدموع مما جعل (المسؤولين) يهربون مستخدمين (الأزقة) ويحتمون ببعض (المحلات التجارية ) هذا وقد وقعت بعض الإصابات فى صفوف (المسؤولين) حيث تم نقلهم لتلقى العلاج بالمستشفيات كما تم القبض على بعضهم هذا وفى تصريح أدلى به (الشعب) أفاد أن المقبوض عليهم سوف يقدمون لمحاكمات عادلة فى الأيام القليلة القادمة. -إتخيل قالوا (المسؤولين) مشو (للشعب) عشان يديهم (تصريح) بتسيير المظاهرة قام رفض وما أداهم!! -والله الشعب عمل كويس.. هم زمان قاعدين يدو زول تصريح؟ -هم مشكلتهم إتعودوا على (الترطيب) والراحات عشان كده (التخفيضات) دى بقت ليهم حاره -لكن هم بثبتو؟؟ ما مما هبشوهم (الجرسه) ما تديك الدرب -عليك الله شفتا نحنا زمانك (ثبتنا) ليهم كيف؟؟ على باليمين قبل الجماعه ديل ما يجو كنت عايش أولادى (التسعه) ومعاهم (أمهم) هسع نزلت المعاش اولادى التسعه ما قادرين (يعيشونى) أنا براى!! -آآى والله (هلكونا) شئ جبايات وشئ أتاوات وشئ رسوم وكل يوم يطلعوا لينا فى (القرارات) -بى مناسبة (القرارات) دى قالو (الشعب) الليلة الساعة 8 فى المساء عندو(بيان) للمسؤولين ح يطلع فيهو (قرارات) وح يكون (مذاع) و(متلفز)!! بيان من (الشعب) للمسؤولين فى تمام الساعة الثامنة مساء تماما توقفت الحياة تماما فى كل المدن والأحياء وخلت (الشوارع) من المارة و(تسمر) الجميع أمام شاشات التلفاز وأجهزة الراديو للإستماع (للبيان) الذى سوف يحتوى على (القرارات) التى سوف يتخذها (الشعب) تجاه (المسؤولين): الإخوة المسؤولون الأعزاء السلام عليكم ورحمة الله تعالى وبركاته إن الحياة كما تعلمون لا تسير بوتيرة واحدة وكما تقول الحكمة المأثورة ( فيوم لك ويوم عليك ) وبعد أن صار (الشعب) هو (الحاكم) وأنتم (الرعية) فقد جاء اليوم (العليكم) فأحسن تثبتوا وتبطلوا (الجرسة) زى ما (الشعب) زمانك (ثبت) وربط (الحزام).. الإخوة المسؤولون: الحقيقه نحنا فى (البيان) ده عاوزين نوريكم (سياستنا) الجايه بالواضح كدا عشان بعد ما (المسائل) إتقلبت والأوضاع (إتغيرت) تعرفوا البيكم والعليكم.. الأخوة المسؤولون الأعزاء: أولن بالتبادى عاوزين نقول ليكم حضروا (حزاماتكم) من هسع والما عندو (حزام) يمشى يشترى ليهو (حزام) ليهو ولى (عيالوا) وناس بيتو عشان خلاص البذخ و(الفشخرة) والقروش السايبه و(العربات) واللاندكروزرات و(الضبائح) والعوازيم والعطلات الخارجية والسفر والطيارات والنسوان (المثنى وثلاث ورباع) ده كلو (الشعب) ح يضع ليهو (حل) وكان بتفتكرو إنو كلما (الشعب) يطلع ليهو (قرار) إنتو ح (تقوموا) مظاهرات تكونوا (غبيانين) لأنو (شرطة الشعب) ح تتصدى ليها بقوة وحزم شديدين وبراكم شفتو الحصل ليكم فى (مظاهرات أمبارح).. إنتو مشكلتكم إنكم كنتوا بتفتكرو إنو الشعب ده (خدامكم) وجاء الوكت الإنتو تعرفو فيهو إنو إنتو (خدامين للشعب) وإنو (الشعب الفضل) ده هو القاعد يدفع ليكم مرتباتكم (المليونية) وبدل سفرياتكم (الدولاريه) وبنزين عرباتكم (الفارهة) والحاجات التانية الأحسن (نخليها مستورة)!! – ثم فى حزم وجدية - أيها (المسؤولون) لقد قرر (الشعب) إنفاذ القرارات التالية: قرار رقم 1: زوجة واحده لكل مسؤول بهذا فقد قرر (الشعب) أن تكون فى عصمة كل (مسؤول) زوجة (واحدة) ما لم يثبت (المسؤول) أن زوجته (عاقر) أو (مصابه بمرض) تستحيل معه الحياة الزوجيه.. القرار ده يعنى بالعربى كده (عرس) بتاع متعه و(عدم موضوع) تانى مافى... يعنى تانى حكاية الواحد فيكم جاب ليهو (سكرتيرة) عجبتو وقام (متنى) ده خلاص إنتهى.. أو شاف ليهو (واحده) فى (مؤتمر) قام (متلت).. دى تانى (تلقوها عند الغافل).. إنتو طبعا عملتو لينا (الزواج الجماعى) أها نحنا ح نعمل ليكم (الطلاق الجماعى)... القرار ده بيقول من بداية الشهر الجاى إنو أى (مسؤول) فيكم (يحتفظ) بى (مرا) واحده بس و(يسرح) الباقيات..- مواصلا- عليكم الله هو بس لو كان عندكم إنتو شوية (خجل وإستحاء) أنحنا (أفراد الشعب) ده الواحد (مرا) واحده ما قادر عليها يعنى (بيت واحد) ما قادر عليهو بس معقول إنتو الواحد عندو فى ذمتو (تلاته وأربعه) ؟؟؟؟ الناس دى بتأكلوها من وين؟؟ وبتشربوها من وين؟؟ وبتسكنوها أفخر السكن من وين؟؟ وبتعلموها أرقى التعليم بى شنو؟؟ وبتركبوها أحدث (العربات) من وين؟؟ وبتمشوا بيهم (لندن) و(باريس) بى ياتو تذاكر وياتو (نثريات)؟؟ - مواصلا فى حزم - شوفو يا أيها (المسؤولون) قدامكم أسبوع ( فك تسجيلات ) كل مسؤول فيكم يقعد فى الواطه ويحدد (عاوز يسجل منو) ويقوم يشطب الباقيات!! نعم بعد ده إنتهى عهد (التثليث والتربيع): (الكاميرا) تركز على شخص يقف خلف (المتحدث) الذى يتلو البيان مباشرة (وهو يرفع عصا أبنوس) ويهتف صائحا: - لا تثليث ولا تربيع يا مسؤول خليكا مطيع - (أصوات تردد خلفه): لا تثليث ولا تربيع يا مسؤول خليكا مطيع قرار رقم 2: صالح شعبى عام بموجب هذا القرار سوف يتم تخفيض (جماهير) المسؤولين وإحالة 99% منهم (للصالح الشعبى العام) بعد أن ثبت أن (نصف) عدد (السكان) هم مسؤولون فى الدولة.. شئ وزراء (ساكت)... وشئ وزراء (دولة).. شئ إتحاديين... وشئ ولائيين... وكل وزير عندو (مدير مكتب) و(سكرتير) وسواق (للمدام) وسواق (للأولاد) وسواق (ليهو) وبعد ده كمان نجى للمستشارين وعددهم حتى الساعة العاشرة والنصف من صباح الأمس كان 31124 مستشاراً وكل مستشار عندو (سواق ليهو) وواحد (للمدام والأولاد) بعد داك نجى لـ(المحليات) و(المحافظات) و(المعتمديات) شوفو البلد دى فيها قريب التلاتين ولايه وكل ولايه فيها قريب الكم وكمين محافظة أها يعنى يكون فى كم محافظ؟؟ ونائب محافظ؟؟وكم معتمد؟؟ وكم نائب معتمد؟؟ وكم رئيس محلية؟؟ وكم نائب رئيس محلية؟؟ وكل واحد فى ديل عندو (مدير مكتب) وسكرتير وسواق (ليهو) وسواق (تانى) وكل واحد من ديل عندو قال إيه (مستشار إعلامى) ومستشار (شنو داك) - مواصلا وهو يرفع رأسه من الورقة – ثم مواصلاً – عليكم الله يا (مسؤولين) إنتو هسع عارفين (ربع البصل) بى كم؟؟ وللا عارفين (ملوة الفيتاريتا) بى كم؟؟ - وهو يرفع رأسه عن الورقة مواجهاً الكاميرا - وحكمت الله يوم واحد ما شفنا لينا واحد من (جيش المسؤولين) ده إشتكى قال (مرتباتنا إتأخرت) أو ما صرفت (ماهيتى)؟؟ قرار رقم 3: ركشة لكل مسؤول الأخوة المسؤولون (الشعب) قرر بعد دراسة مستفيضه (سحب) جميع (الركشات) من (الشوارع) وتعويض أصحابها تعويضاً مجزيا ومن ثم منح هذه (الركشات) للمسؤولين وإعطاء كل مسؤول (ركشة) من أجل تنقلاته بدلاً عن (الليلى علويات) و(التاتشرات) و(المرسيدسات) و(الـ BM دبليوهات) الفارهة والتى يكفى ثمن الواحده منها لإطعام خمسيت مليون (جائع) من غالب (قوت) أهل البلد – مواصلا متهكما- إذا كان رئيس وزراء (اليابان) قاعد يستخدم (عجلة) فى تنقلاتو ولمن يكون متأخر قاعد يقوم (سدارى) يعنى إنتو يا (مسؤولينا) أحسن منو؟؟ واللا بلدنا أغنى من (اليابان)؟؟ أها تانى بس (ركشات) نشوفكم تانى ح (تظللوا) شنو؟؟ قزاز مافى!!!. قرار رقم 4: الحساب ولد الشعب بفتكر إنو فى (مسؤولين) بفتكرو إنو (الشعب) ده (عوير) وريالتو (سايله).. يعنى (المسؤول) أول ما يتعين يكون ساكن ليهو فى بيت (جالوص) وباب الشارع بتاعو (زنكى) وضلفه بتقفل والتانية مسنوده بى (حجر) وعفش البيت كلو (دولاب هدوم) وخمسة سراير و(بنبرين) وتربيزة و(الشفع) كل يوم طاردنهم من (الدرس) عشان ما دفعوا (الرسوم) يقوم (المسؤول) بعد كم سنه من تعيينو تلاقى (الشفع) كبرو وقاعدين يقروا (طب) فى جامعات (خاصة) وساكنين فى عمارة (المنشية) ومأجرين عمارة (قاردن سيتى) وخالين (الفيلا) بتاعت (كافورى) فاضية!!. - مواصلاً فى حزم- الشعب قرر إنو يدى (المسؤولين) ديل فرصة (أسبوع) عشان يجيبوا (الحاوى) العمل ليهم (الشغل ده)!! وأى مسؤول يفشل فى ذلك فسوف تنزع منو هذه (الحيازات) لصالح (الشعب).. الإخوة المسؤولون الأعزاء إن (الشعب) كله أمل فى أنكم سوف تلتزمون الهدوء وضبط النفس والتعامل مع هذه القرارات (بمسؤولية) ولتعلموا بأن أى محاولات إحتجاج من تظاهرات وخلافه سوف يتم التعامل معها بحزم وقوة كما حدث لتظاهرة الأمس والتى قام بها بعض (المسؤولين) الرافضين لقرارات (الشعب) الخاصة بـ(تخفيض) بدل السفرية وتقليص (الرحلات الخارجية)!!. الإخوة المسؤولون لا يخفى على أحد منكم أن (الشعب) قد صبر على (مهازلكم) طويلاً ينظر إليكم وأنتم فى (أبراجكم العاجية) تأخذون أضعاف أضعاف ما تعطون تلبسون (حرير) الثياب وتأكلون (لذيذ) الطعام وتمتطون فاره (الجياد) وتحجون إلى بيت الله الحرام (ملح) ومن أموال هذا الشعب (الغلبان) وتتطاولون فى بنيان (الفلل والعمائر) وتنكحون ما لذ لكم وطاب من النساء غير عابئين بهذا (الشعب) الذى أذله الفقر وهدته (المسغبه) وأضناه (المرض) فأصبح أفراده كالأيتام على موائد (اللئام)!!. أيها المسؤولون لقد حان الوقت أن تمشوا على العجين وما تلخبطوهو.. والقرارات دى أول (الغيث) ويا نحنا يا إنتو ووراكم والزمن طويل والسلام عليكم ورحمة الله وبركاته!!. تداعيات القرارات فى حديقة إحدى (الفلل) الفاخرة بأحد الأحياء الراقية جلس المسؤول ومعه جاره (المسؤول الآخر) يرتشفان (القهوة التركية) وأمامهم (سبائط) من العنب و(الخوخ) والتمر (الشفاف) يستمعان إلى (القرارات): - الشعب ده جن وللا شنو؟؟ طيب إذا هو (مسؤول مننا) نحن نكون (مسؤولين) من منو؟؟ - شوف والله بعد (الضرب) الإنضربناهو فى (المظاهرة) أمبارح ده الظاهر (الشعب) ده جاد فى الموضوع - يا خوى كان كده أحسن الواحد (يبيع) ويتخارج - يا حبيب بيع شنو؟؟ إنت ما سمعت فى (البيان) هسع قالوا أدونا (إسبوع) نجيب (الحاوى)؟؟ - إنت (الحاوى) ده سيبو هسع (فك التسجيلات) ده نعمل معاهو شنو؟؟ (النسوان) ديل نوديهم وين؟؟ - (يبتسم فى خبث): والله أنا (حمتى خفيفه) ح أطلق (واحده) وأخلى (واحده) زى ما الشعب قال فى قرارو؟؟ - طبعا يا أبوها ح تفك (القديمه) عكس الهواء!! - يعنى إنت فاكرنى ح أفك (النوبيرا تو) وأخلى (الهيلمان)!! - (وهو ساهم): والله المشكلة مشكلتى أنا هسع (الأربعه) ديل يفكوا منهم ياتو (تلاته)!!! بينما كان هذا الحديث يدور فى الحديقة بين المسؤول وجاره كانت (ست البيت) زوجة المسؤول (الرابعه) تجلس مع زوجة (المسؤول الجار) الأولى على إحدى البلكونات وهن يناقشن القرارات: -والله ووالله يلحق (يفك تسجيلى) إلا أفك ليهو رقبتو!! كمان أنا بلعب واللا بلعب -والله يا (ست النفر) ياختى الرجال ديل ما عندهم ضمان وقالوا (الجديد شديد)!! -بتقصدى شنو يعنى يا (شيراز)؟؟ عشان إنتى يعنى جديده و(نمرة أربعه)؟؟ -لا ما كدى والله لكن (الرجال) ديل أنا عارفاهم كان فى (فنيش) بفنشو ناس (الخدمة الطويلة)!!. -خدمة طويلة خدمة قصيرة.. وحاتك إنتى دى يلحق يفنشنى إلا (إفنشو ليكى من الدنيا) – مواصلة- وهو ذاتو بينى وبينك قالو ليكى بعد ما يشيلو منو (العمارة) دى و(العربات المكندشة) دى ويركبوهو (ركشه) ويحرموهو (السفر) أنا عايزه بيهو شنو؟؟؟ فى (فيلا) أخرى لا تبعد كثيرا عن (الفيلا) الأولى كان مسؤول آخر وزوجته يديران حوارا من نوع آخر: -أنا يانى العارفاها.. من زمان أنبح ليك يا (سعادتو) سجل العمارات دى للأولاد.. أنبح ليك يا (سعادتو) سجل العمارات دى للأولاد!! أها هسع نعمل شنو؟؟ تجيب ليهم (حاوى من وين)؟؟ -والله صدقتى السودان كلو فيهو حاوى واحد.. (خضر الحاوى) ومات!! -إنت صدقت حكاية الحاوى دى؟؟؟؟ والله حاوى ما يعمل العملتو ده!! الناس كلها عارفاك (موظف دوله) مما قمت معقولة بس (ماهيتك) تعمل العملتو ده!! والله (عماراتك) دى ياها الشايلنها شايلنها!!! – مواصلة فى شماته- هسع كان سمعت كلامى وسجلتهم ليا ولى وليداتك ديل ما كان أحسن ليك؟؟ -أنا عارفك زعلانه عشان سجلت (بيت كافورى) للمرا التانيه!! -والله (الشعب) يقلعو منها زى العجب.. إنت قايل فى حاجه على (الشعب) ده بتندسا؟؟ فهم (سعادتو) من كلمات (زوجته) الأخيرة بأنها سوف تقوم بالوشايه به وتفضح مسألة تسجيل (بيت كافورى) لزوجته (الثانية) وأن ما قالته ليس إلا (تهديداً مغلفاً) فقام بتصعيد الحوار معها حتى درجة (الغليان) وما لبث أن رمى عليها (يمين الطلاق) وهو يقول فى نفسه: -أهو الواحد يرتاح منها وكمان (يفك تسجيلات)!!!! تظاهرات: لأن (الشعب) ضايق (الشغلانه) فى نفسو وعارف إنو (قرارات التخفيض) بالنسبة (للمسؤولين) هى كما (قرارات الزياده) التى كان يفرضها عليه المسؤولون وأنه لا يوجد فرق بينهما سوى (علامة سالب بره القوس) فقد وضع (الشعب) كل قواته على أهبة الإستعداد تحسباً لأى تظاهرات أو (أعمال شغب) يقوم يها (المتضررون) من هذه القرارات وقد كان حدس (الشعب) سليماً وفى (محلو) إذ سرعان ما إنتظمت فى اليوم التالى مباشرة المظاهرات التالية: الإتحاد العام لزوجات المسؤولين نظم الإتحاد العام لزوجات المسؤولين تظاهرة سلمية تحركت من أمام (مول عفراء) مشياً على الأقدام متجهه لمبنى ( الأمم المتحدة) لتسليم (المندوب السامى لحقوق المسؤول) مذكرة مندده بقرارات الشعب الأخيرة.. المتظاهرات رفعن (لافتات الإحتجاج) الملونه وسرن فى خطوط متناسقة.. التظاهرة تعبق بمختلف (الروائح الباريسية).. (الحنن) المنقوشة مرسومة (بعناية).. الثياب (شيفون) و(توتال) أصليه.. الجزمة لون (شنطة اليد الجلدية Genuine Leather) وشنطة اليد لون (التايير) و(دهب الخليج) يزبن (الأيادى) الناعمة التى لم تذق (غسيل العده) يوما ً والتى تمسك بلافتات صغيرة كتب عليها: (عين الحسود فيها عود ).... (بس معقول نركب ركشات).. الـ (الله بيديهو منو البحميهو ) (لا تخفيض للسفريات ) بينما كن يرددن بعض الهتافات: - مافى طلاق مافى طلاق... موتو موتكم يا عولاق!! - بى (بنوكنا) وبى (شــركاتنا) ما بنخاف من الجاتنا الهيئة العليا لأولاد وبنات المسؤولين فى تزامن ينم عن تخطيط محكم للفت أنظار (العالم) لهول المأساة التى تحدق بهم وبمصائرهم إنطلقت من أمام (شارع المشتل) وفى ذات الوقت الذى إنطلقت فيه نظاهرة (زوجات المسؤولين) تظاهرة أخرى نظمتها (الهيئة العليا لأولاد وبنات المسؤولين) مستخدمة فيها (العربات) التى جلس بداخلها (أولاد) و(بنات) المسؤولين من كافة الأعمار وبعضهم قد قام بإخرج (رأسه) من خلال (الزجاج) حاملاً بعض (اللافتات) وها هو (هيثم) و(لينا) يقومان بتنظيم المسيرة قبل إنطلاقها: -ياجماعه.. يا جماعة... ناس (الفستو) الصفراء يجو الصف القدام ده.. وبعدهم العربات (الأتوس) الحمراء.. يا جماعه أى زول سائق BM أو مارسيدس يكون بالجنبات... يا.... -يا هيثم كلمتهم إنو (البارد والسندوتشات) فى اللاندكروزر بتاع (شيرين) و(حماده)؟؟ -يا وليد.. ياوليد كلم السواق يجينا بعد نهاية (المظاهرة) طوالى وما يتأخر!! وإنطلقت التظاهرة بعد أن تم (تنظيم ألوان صفوف العربات) وبدأ ترديد الهتافات عبر (مايكرفون) مثبت فى عربه (لاندكروزر 2008 ) بيضاء (مظللة) وتعالت الهتافات: -بيرقر بيرقر ماكنتوش... ليه عاوزننا ناكل بوش ثم فى (نبرة) أكثر جدية وتشنجاً: -شعب جبان عايز كشه.. ليه عاوزنا نركب ركشة لم تمر دقائق حتى توقف (الركب) لتتم إذاعة (رسالة عبر الموبايل) من (أولاد المسؤولين) الذين يدرسون بالجامعات (البريطانية): -إخواننا أبناء المسؤولين (بالداخل) نحيي فيكم روح الصمود.. ونرجو منكم التصدى بكل قوة وحزم لهذه القرارات (الجائرة).. إخواننا.. سيروا وعين (الله) ترعاكم.. وما تشتغلوا بالشعب (المسكين) ده - دى قرارات (فشنك) ساكت!!! وما أن إنتهى (مذيع التظاهرة) من (إذاعة المحادثة) على (المتظاهرين) حتى دوى (تصفيق حاد) وهتاف متقطع حفزه لقراءة (البرقية) التالية: -وهذه برقية من إخواننا أبناء (المسؤولين) الذين يدرسون بالجامعات (الإسكندنافية) تقول: ولا يهمكم دى حساده ساكت.. قف.. لو حصلت ليكم أى حاجه تعالوا لينا هنا.. قف.. الـ (الله بيديهو منو البحميهو؟؟) تلاقت المظاهرتان (أبناء المسؤولين وأمهاتهم) عند تقاطع (سانت جيمس) وإزدادت حده الهتافات: - يا شعب يا جبان.. إنت حاسد وللا (بغران) -بيرقر بيرقر ماكـــنتوش.. ما بتجبرنا ناكل البوش بينما كانت (شرطة الشعب) تراقب (المظاهرتبن) فى حذر... إتجهت المظاهرتان نحو مكاتب ( الأمم المتحدة) بشارع الجامعة لمقابلة (المندوب السامى لحقوق المسؤول) بعد أن قامت (زوجات المسؤولين) بالركوب مع أبنائهن فى (العربات) وهن يمسكن بزجاجات (المياه المعدنية البارده) ويصلحن من مكياجهن الذى أفسدته (حرارة الشمس). عند وصول (المظاهرتين) لمكتب المندوب السامى تفاجأ الجميع بوجود (تظاهرة) صغيرة (غاضبة) يقودها عدد من الأشخاص ذوى (الملابس المزركشة الغريبه) والعمائم (الملونه).. أحد المتظاهرين كان يمسك بثعبان ضخم من فصيلة (الأصلة) يلفه حول عنقه بينما آخر يقوم بإبتلاع (سلسلة من الأمواس) وعدد آخر يقوم بإخراج بالونات (لهب) من فمه بينما إنهمكت مجموعة أخرى منهم بالمشى على (النار) وهم جميعا يحملون (لافتات إحتجاج ) غاضبة. إتجهت زوجة أحد المسؤولين (قائدة التظاهرة) غاضبة نحو أحدهم: -شنو يعنى؟؟ ما تشيلو (دبايبكم) وحاجاتكم دى من هنا.. يعنى عاوزين تبوظوا لينا (مظاهراتنا) دى؟؟ -ما تبوظ كان باظت.. إنتو (رجالكم) ديل ما بوظو (سمعتنا) وفضحونا (فضيحة).. هسع ( أكبر حاوى) معانا هنا من الشايفاهم ديل بيقدر يبنى ليهو (عمارتين) بى عشرين (مليار) من ماهيتو؟؟؟. الفاتح يوسف جبرا

Quote: التحية لك وأنت تداوي جراح المغلوبين بهذه السخرية اللازعة

Quote: عندي سؤالين : اولا ... كنت وين من زمااان ؟؟؟ ثانيا ... يعني - معقولة - بدر الدين ده ما ولدك يا أستاذنا .. طيب جبتو من وين؟؟؟

Quote: سؤال : لييه ما جربت تكتب نصوص درامية تساعد في تقدم الدراما الفي البلد ؟!!

Quote: يا سلام عليك يا الفاتح يوسف جبرا.

Quote: 1. انت يا استاذ الكلام السمح دا قاعد تجيبو من وين 2. كيف بتبدا معاك فكرة السيناريو وكيف (بتخمر) في راسك وكيف بتنفذها وهل عندك طقوس معينة ؟؟ 3. سؤال بيهمني شخصيا: شنو العلاقة بين (تحليل النظم) والكتابة ... وياتها فيهم بتمتعك أكتر .. وياتو واحدة بتعبترها هي الأصل؟؟؟ 4. بتقرا لمنو؟؟

(عدل بواسطة amara on 03-31-2007, 10:51 PM)

Quote: 1. انت يا استاذ الكلام السمح دا قاعد تجيبو من وين 2. كيف بتبدا معاك فكرة السيناريو وكيف (بتخمر) في راسك وكيف بتنفذها وهل عندك طقوس معينة ؟؟ 3. سؤال بيهمني شخصيا: شنو العلاقة بين (تحليل النظم) والكتابة ... وياتها فيهم بتمتعك أكتر .. وياتو واحدة بتعبترها هي الأصل؟؟؟ 4. بتقرا لمنو؟؟

Quote: والله قصتنا قصة مع الجماعة ديل.