الفاتح يوسف جبرة ... أشهر كاتب في السودان

مرحبا Guest
اخر زيارك لك: 03-29-2024, 07:05 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة الفاتح يوسف جبرا(الفاتح يوسف جبرا)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
03-26-2007, 12:35 PM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
الفاتح يوسف جبرة ... أشهر كاتب في السودان


    من رابع المستحيلات في الخرطوم هذه الأيام .. الحصول على عدد "السوداني" يوم الجمعة بعد الساعة العاشرة صباحا...

    الكلام ده بدون مبالغة ... ولو سألت أي بتاع جرايد كيف الجريدة تخلص الساعة عشرة ... حيرد ليك زي ما ردوا علي "الفاتح جبرة يا معلّم .. انت ما واعي ولا شنو ؟؟؟"

    هو بالتأكيد ظاهرة لا يمكنك إغفالها، هو الموضوع الأساسي طوال يوم الجمعة ونهار السبت وربما طوال بقية الأسبوع ... لا أعتقد أن هناك كاتب في السودان تباع الجريدة باسمه سوى الفاتح جبرة ...

    قراء "السيناريو" هم من كل الأعمار وكل الخلفيات والثقافات والمستويات ... كهول ورجال وشباب وحتى الأطفال ... فلا تستغرب إن رأيت الأطفال بيكوركوا أثناء اللعب " الجلد الانتعاشيييي"، لا أعلم إن كانوا قرؤوا سيناريو الأستاذ أم أنهم يرددون ما يسمعونه من كبارهم لكن هذا الأمر هو بالتأكيد دليل على التأثير والانتشار الهائل لكتابات الفاتح جبرة ...

    أنا – عن نفسي – عندي طقس خاص مع السيناريو الأسبوعي ... ما بقراه أبدا يوم الجمعة ... باحتفظ بيهو طوال الأسبوع لغاية ما يوم تكون قافلة معاي القفلة اللي هي، أقوم أقراهو ... وبالجد ليهو مفعول السحر

    حقيقة، لا أعرف كيف يمكن تكريم الأستاذ الفاتح ... لكني أعتقد أنه أحد القلائل الذين يستحقون التكريم ويستحقون أن يوصفوا بأنهم "مبدعون" ...

    على العموم، التكاريم "والحاجات دي" تأتي من ناس قد لا يعرفون تأثير الفاتح جبرة جيدا ... لكن التكريم الحقيقي للأستاذ – وأعتقد أن هذا هو ما يهمه - هو هذه البسمة التي يرسمها على شفاه المساكين والشقيانين نهار كل جمعة.

    كسرة: الكلام طالع ملخبط وما منظم، لكن موضوع "الشـــاشة" حق جريدة الليلة ده .. خلاني لازم أكتب أي حاجة عشان أقول للأستاذ الفاتح جبرة ... "شـــكرا"

                  

03-26-2007, 12:36 PM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: (الشــ ـا شة) في خدمة الشعب!!

    كانت هنالك (شاشة تلفزيونية) إعلانية مقاس (ألف وميتين بوصة) قد نصبت عند (صينية) تفتح على (خمسة شوارع) و(كبري).. كثرت حوادث (العربات) نسبة لانشغال (السائقين) بالنظر إلى ما تبثه هذه الشاشة (المشعة) من صور (تلفزيونية متحركة) و(فديو كليبات إعلانية) فاْرتفعت أصوات الاحتجاج على (هذا العبث) بأرواح المواطنين وتوالت وفود المواطنين على اعتاب المسؤولين وكتب كاتب (فايق ورايق) وما عندو شغله ولا مشغله (وعاوز يضيع وكتو) في هذه المساحة من قبل ينبه إلى ضرورة إزالة هذه (الشاشة) لأنو ما معقول (الزول يسوق ويشوف فى آن واحد) فى هذا التقاطع الخطر علماً بأن تحدث السائق فى الموبايل (لاحظ كلام مش شوف!!) يعد خطراً فى الطريق و(مخالفة إيصالا مضمون). لكن على الرغم من أن الموضوع هام وgenuine ويتعلق بحياة وأرواح (الشعب الفضل) إلا أن المسؤولين (صهينو) ولم يعيروا المسألة اهتماما ولكن أخيراً أثبتت الأيام أنهم كانوا (بايتين ليهم فوق راي) وأنهم مسؤولون بحق وحقيقة ولم يجهلوا الموضوع كما تبادر الى أذهاننا (الوحشة) لأنهم كانوا يعملون ليل ونهار ويخططون لمعالجهة الآثار السلبية لوجود هذه (الشاشة) فى ذلك الموقع الخطر.



    حيث شوهدت عدة شاحنات تفرغ حمولتها من مواد البناء قرب (الشاشة)، وبدأ العمل ثم جاء أحد كبار المسؤولين في موكب عظيم ووضع (الحجر الأساسي) ورفعت عند ذاك في المكان يافطة كتب عليها: (هنا يبنى المستشفى الوطني لمعالجة ضحايا الشاشة) وكما جاء على لسان المسؤول الذى قام بوضع حجر الأساس فإن وجود هذا المستشفى على بعد (أمتار) من (الشاشة) يوضح مدى اهتمام (الدولة) بإنقاذ حياة (ضحايا الشاشة)... وبقيت الشاشة على حالها.



    ونامت قضية (الشاشة) بعض الوقت ثم استيقظت بعد أن استيقظ الإخوة المسؤولون فى (إدارة المرور) فقرروا إيقاف هذا العبث بأرواح المواطنين فقاموا بوضع (لافتة) تنبيه كبيرة على سور (الصينية) تقول: (عزيزي السائق من أجل سلامتك لا تنظر للشاشة) فأصبح بعدها ينظر (السائق) إلى لافتة (لا تنظر) ثم (ينظر ليرى) ثم يجد نفسه فى (الحوادث) الشئ الذى جعل عدد المطالبين (بإزالة الشاشة) يزداد خاصة بعد أن أصبحت (الشاشة) إضافة للإعلانات التجارية تبث (حلقات المسلسل اليومى) حيث يمكن (للسائقين) وهم يقودون (عرباتهم) معرفة مجريات أحداث (الحلقة قبل الأخيرة) من (مسلسل بكيزة وزغلول). لم تقف السلطات بعد ازدياد حوادث الشاشة مكتوفة الأيدى (كلا وحاشا) إذ كان لها رأي آخر لمعالجة الأمر حيث تقرر اتخاذ (آلية) جديدة فقامت بإرسال عدد من الخبراء والمهندسين يجوبون المكان ومعهم خرائط وملفات، وأدوات (مساحة) وما لبث أن تمت مباشرة العمل فى (الورشة الفنية الحديثة لإصلاح عربات ضحايا الشاشة) والتى مهمتها إراحة (الزبائن الضحايا) من (التلتله) والبهدله وما يكلفه (جر العربية) للمنطقة الصناعية من وقت ومال..... وبقيت (الشاشة) على حالها. وبسبب عرقلة السير على (صينية الشاشة) في أغلب الأوقات، واضطرار (السائقين والركاب) للتوقف عندها لوقت طويل فى أحيان كثيرة فقد خطر لأحد (الباعة الشطار) أن يضع (تلاجة حاجة باردة) بالقرب من (الشاشة) وحذا حذوه (بائع) آخر فأقام (كشكا) لبيع (الساندوتشات) الشئ الذى جعل بقية الباعة الآخرين يهرعون لموقع (الشاشة) فانتشرت أكشاك (الاتصالات) و(قدر ظروفك) و(سلطان الكيف) وطبالى (السجائر ومناديل الورق) وستات (الشاى) وبائعى (البطيخ) والفاكهة و(غاسلى العربات) الذين يمكن أن تترك لهم عربتك (لغسلها) بينما أنت تشاهد على (الشاشة) إحدى حلقات (المصارعة الحرة). وباتساع رقعة (سوق الشاشه) الذي تحول إلى ساحة من المشاحنات والمشاجرات الدائمة بين السائقين والراجلين والباعة أقام المسؤولون (مركزاً صغيراً للشرطه) خلف (الشاشة) حفاظاً على استتباب الأمن و(سلامة المواطنين) ريثما يتم بناء (سجن) خلف (المركز) لتوقيف (المشبوهين) و(النشالين) ومثيرى الشغب الذين يمتلئ بهم (السوق)... وبقيت الشاشة على حالها



    وراجت بعد ذلك إشاعات وتناقلت الألسن أن (الدولة) قد طرحت الأرض التى عليها (سوق الشاشة) لبيعها في مزاد علني بعد أن أصبحت بفضل (الشاشة) موقعا استراتيجياً تسويقياً هاماً حيث قامت بمسحها وتقسيمها إلى متاجر ومعارض ومحال تجارية وذلك بأسعار (فلكية) تتناسب واسم المشروع وهو (مخطط سوق الشاشة النموذجى) وقد شوهد سماسرة بيع الأراضى يجوبون المكان فى زيارات ميدانية استعداداً لخوض (المزاد)!!



    تمسك الباعة المتجولون وستات الشاى وأصحاب الطبالى والأكشاك بحقهم كمؤسسين (لسوق الشاشة) ورفضوا أن يتم (ترحيلهم) من الموقع دون منحهم تعويضاً مجزياً وقاموا بالتظاهر رافضين لقرار الترحيل الشئ الذى دعا (المسؤول الكبير) الذى قام بمخاطبة التظاهرة أن يطمئنهم قائلاً:



    - يا جماعة الموقع الح نرحلكم ليهو ده موقع (أحسن) من ده ميت مرة.. لأنو (الشاشة) بتاعتو (بلازما) وحجمها (أكبر) من دى وكمان (ناصية) بتفتح فى (صينية) فيها سبعه شوارع رئيسية و(كبرى)!!!



    - كسرة: شفتو كيف (الشاشة في خدمة الشعب)... الفضل!!!



    الفاتح يوسف جبرا
                  

03-26-2007, 12:45 PM

Muna Khugali
<aMuna Khugali
تاريخ التسجيل: 11-27-2004
مجموع المشاركات: 22503

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: هو بالتأكيد ظاهرة لا يمكنك إغفالها، هو الموضوع الأساسي طوال يوم الجمعة ونهار السبت وربما طوال بقية الأسبوع ... لا أعتقد أن هناك كاتب في السودان تباع الجريدة باسمه سوى الفاتح جبرة ...


    التحيه له ولساناريوهاته الناقده الهادفه.. والثريه بمعانيها..

    والنحيه أيضا لك..
                  

03-26-2007, 12:46 PM

حيدر حسن ميرغني
<aحيدر حسن ميرغني
تاريخ التسجيل: 04-19-2005
مجموع المشاركات: 24694

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    يا بخت الجريدة اللي بكتب فيها

    مفروض يطالبهم بـ 50% من المبيعات
                  

03-26-2007, 12:53 PM

السمؤال بدرالدين
<aالسمؤال بدرالدين
تاريخ التسجيل: 02-17-2007
مجموع المشاركات: 1989

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    والله ماقلت الا حقيقة
    صدقني يوم الجمعة عندي همين جريد السوداني وجيب الخضار
    ياخي الاستاذ الفاتح مبالغةبكتب بزهن كل سوداني وخصوصاالمواطن العادي
    ربنا يخليك لينا يالفاتح
    دمت
    السموءل
                  

03-26-2007, 04:12 PM

Dr.Saeed Zakarya Saeed
<aDr.Saeed Zakarya Saeed
تاريخ التسجيل: 12-09-2005
مجموع المشاركات: 1706

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: السمؤال بدرالدين)

    بلا شك الاستاذ الفاتح جبرة هو نجم في عالم الصحافة السودانية
    طلبت منه بعض المعلومات عن معركة امدرمان او كرري فاخجل تواضعي
    اداوم علي قراءة عموده سيناريوهات كل جمعة اتمني منه ان يعرج قليلا
    الي كتابة القصص والروايات من داخل ازقة حاراتنا فاسلوب الفاتح جبرة
    يشبه اسلوب استاذنا نجيب محفوظ وان سالتني من تعتقد خليفة الطيب صالح
    في الادب السوداني لقلت لك الفاتح جبرة اتمني ان يعرج عن الصحافة
    ويتحول الي القصة والمسرح والراوية صدقني سيجد مكانه
                  

03-26-2007, 04:19 PM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: السمؤال بدرالدين)

    الأعزاء منى وحيدر والسموأل ... التحية لكم جميعا ..

    واقرؤوا معي ..

    Quote: أصابت الدهشة كل (العالم) وهو يستمع إلى هذا الخبر الذى تناقلته وكالات الأنباء العالمية وبثته (الفضائيات):

    فى (الخرطوم) وبعد أن تم تبادل الأدوار (سلمياً) وصار (المسؤولون) هم (الرعية) وأصبحوا خداماً (للشعب) الذى أصبح بدوره (مسؤولاً) عنهم وبعد أن أصدر (الشعب) بعض القرارات الخاصة بترشيد (السفريات) الخارجية للمسؤولين وتخفيض (بدل السفرية) لهم من (خمسميت دولار فى اليوم) إلى (خمسين دولاراً فقط) تجمع عدد من المسؤولين فى الميدان المسمى بـ(ميدان أبوجنزير) وقاموا بتسيير (تظاهرة) وهم يحملون اللافتات التى كتبت عليها شعارات تندد بقرارات (الشعب) الأخيرة هذا وقد تصدت (شرطة الشعب) للتظاهرة حيث قامت بفضها مستخدمة الهراوات والغاز المسيل للدموع مما جعل (المسؤولين) يهربون مستخدمين (الأزقة) ويحتمون ببعض (المحلات التجارية ) هذا وقد وقعت بعض الإصابات فى صفوف (المسؤولين) حيث تم نقلهم لتلقى العلاج بالمستشفيات كما تم القبض على بعضهم هذا وفى تصريح أدلى به (الشعب) أفاد أن المقبوض عليهم سوف يقدمون لمحاكمات عادلة فى الأيام القليلة القادمة.

    -إتخيل قالوا (المسؤولين) مشو (للشعب) عشان يديهم (تصريح) بتسيير المظاهرة قام رفض وما أداهم!!

    -والله الشعب عمل كويس.. هم زمان قاعدين يدو زول تصريح؟

    -هم مشكلتهم إتعودوا على (الترطيب) والراحات عشان كده (التخفيضات) دى بقت ليهم حاره

    -لكن هم بثبتو؟؟ ما مما هبشوهم (الجرسه) ما تديك الدرب

    -عليك الله شفتا نحنا زمانك (ثبتنا) ليهم كيف؟؟ على باليمين قبل الجماعه ديل ما يجو كنت عايش أولادى (التسعه) ومعاهم (أمهم) هسع نزلت المعاش اولادى التسعه ما قادرين (يعيشونى) أنا براى!!

    -آآى والله (هلكونا) شئ جبايات وشئ أتاوات وشئ رسوم وكل يوم يطلعوا لينا فى (القرارات)

    -بى مناسبة (القرارات) دى قالو (الشعب) الليلة الساعة 8 فى المساء عندو(بيان) للمسؤولين ح يطلع فيهو (قرارات) وح يكون (مذاع) و(متلفز)!!


    بقية السيناريو على موقع السوداني ... (الحاوى) وفك التسجيلات
                  

03-26-2007, 07:26 PM

وليد محمد المبارك
<aوليد محمد المبارك
تاريخ التسجيل: 12-04-2004
مجموع المشاركات: 26313

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    انت حي يا جيل

    سلامات
                  

03-27-2007, 06:02 AM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: وليد محمد المبارك)


    وليد ... وين يا فرده ؟!

    د. سعيد ... ما عارف لكن انا دايما بتخيل انتظارنا لسيناريوهات الفاتح زي انتظار المصريين لرباعيات جاهين (رغم أن أنا ما أوعاش) ... دايما فيه حاجة بتربط لي الاتنين ... يمكن عشان الاتنين بيوصلوا أفكار كبيرة بكلام ساهل وصغير .. ولا الاتنين تحسهم مهمومين بالناس لكن مصرين يفرقوا عن همهم وهمنا بالبسمة ..

    Quote: يا عندليب ما تخاقش من غنوتك
    قول شكوتك واحكي على بلوتك
    الغنوة مش ح تموتك إنما
    كتم الغنا هو اللي حيموتك

                  

03-27-2007, 07:35 AM

معاذ حسن
<aمعاذ حسن
تاريخ التسجيل: 11-14-2006
مجموع المشاركات: 3353

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    kabaros
    سلام والرجل يستحق وقفة تقدير
    التحية لأبو ناجي
    بعض الواقع احيانا يتفوق على سيناريوهات جبرا.
                  

03-27-2007, 07:47 AM

KalamSakit


للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    الفاضل / kabaros

    التحية لك وإلى الكاتب ( الرائع ) الفاتح يوسف جبرا

    والله أنا معجب لدرجة لا تتصورها بإبداعات السيناريوهات للأستاذ / الفاتح لأسباب كثيرة أهمها

    أنه نادرا ما تجد إبداع وخيال خصب في هذه الأيام مثل سيناريوهات

    أرجو أن تتاح له الفرصة بصورة أكبر وتترك له الحرية المطلقة ليبدع أكثر - لأن الفن أبدا لن يتطور ما دام الحرية مقيدة .

    مع خالص ودي

    KalamSakit

                  

03-27-2007, 07:50 AM

KalamSakit


للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    الفاضل / kabaros

    التحية لك وإلى الكاتب ( الرائع ) الفاتح يوسف جبرا

    والله أنا معجب لدرجة لا تتصورها بإبداعات السيناريوهات للأستاذ / الفاتح لأسباب كثيرة أهمها

    أنه نادرا ما تجد إبداع وخيال خصب في هذه الأيام مثل سيناريوهات

    أرجو أن تتاح له الفرصة بصورة أكبر وتترك له الحرية المطلقة ليبدع أكثر - لأن الفن أبدا لن يتطور ما دام الحرية مقيدة .

    مع خالص ودي

    KalamSakit

                  

03-27-2007, 11:43 AM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: KalamSakit)

    الأعزاء معاذ و kalamsakit

    لكم تحية،

    عارفين أكثر ما أنبهر به مع الأستاذ الفاتح جبرة هو حفاظه على مستوى إنتاجه مع غزارته ...

    احنا دايما متعودين الحاجات تبدا مستواها عالي وتقع بسرعة ... لكن الفاتح جبرة بدأ بنصف صفحة كل أسبوع وزادت تدريجيا إلى صفحة كاملة أسبوعيا ثم صار يكتب بصورة شبه يومية زايد السيناريو الأسبوعي .. وكل مرة الكتابات أعمق وأحلى وأكثر إمتاعا ...

    Quote: يا بخت الجريدة اللي بكتب فيها

    مفروض يطالبهم بـ 50% من المبيعات

                  

03-27-2007, 06:13 PM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: بعد أن عدت إلى البلاد بعد قضاء شهر خارجها فى مهمة عمل دعتنى الضرورة إلى الذهاب لشراء بعض الاغراض (للأولاد) من سوق أم درمان وقد كان ذلك فى منتصف النهار حيث شمس الصيف تلقى بأشعتها الناريه على شوارع السوق المزدحمة بالبضائع والبشر وبعض (الحيوانات) .


    فى خضم إنشغالى بعملية البحث والشراء لفتت إنتباهى عده ظواهر غريبة فبينما تكدس الناس وإزدحموا يستريحون من ضربة الشمس فى فى ظلال بعض (العمارات) والمحال التجارية كانت بعض (ظلال العمارات) والمحال الأخرى (فاضية تماماً) من جنس (إنسان) كما أن هنالك عدد من (مظلات القماش الضخمة) نصبت خارج السوق لا يتناسب عدد (الناس) الذين (يستظلون) تحتها مع عدد الناس الذين يقفون ينتظرون (المواصلات) بجانبها تحت حرارة الشمس هذا إلى جانب (ظاهرة غريبه) وهى وجود بعض (الناس) فى المحطه وهم يقفون تحت (اشعة الشمس) الحارقة إتنين إتنين ... إتنين إتنين


    إذا عرف السبب :


    ما إن عدت إلى المنزل حتى قمت بسؤال إبنى (ناجى) عن هذه الظواهر الغريبه التى رأيتها .. ضحك (ناجى) كثيراً وهو يقول لى :



    - يا بوى إنت عشان سافرت اليومين الفاتو ديل وما عارف الحصل ؟



    - والحصل شنو؟؟



    - (الحكومة) طلعت قرار تبيع للناس (الضل) ؟



    - هى (الحكومة) دى ما باعت أى حاجه بس فضلت على (الضل)



    - والله يا بوى (الجماعة) قالو الشمس دى بتاعت (ربنا) وهم ناس (بتوع ربنا) وبالتالى (الشمس) البتعمل (الضل) لمن ينعكس على (الحاجات) دى (بتاعتهم) والضل البجى منها دا بالتالى بتاعهم !!



    - أها وبعدين؟



    - وبعدين أى ضل ..ضل عربيتك .. ضل بيتك .. ضل عمارتك ده ضل (بتاع الحكومة) تستثمرو ذى ما عاوزه وأى زول تلقاهو (قاعد فيهو) تدفعو (رسوم ضل) لكن فى حاجه ؟



    - اللى هى شنو؟



    - لو (الزول) سيد (العماره) أو (البيت) أو (المحل) دفع للحكومة (ضريبه ضل) خلاص (الضل) بيكون بتاعو لو عاوز يأجرو أو يستثمرو أو لو عاوز يخليهو مجانى سااكت (وقف ساكت) للمسلمين



    - أيواا عشان كده أنا فى السوق لقيت (عمارات) الناس قاعده تستريح فى ضلها و(عمارات) ما فيها جنس إنسان قاعد



    - آآى يا بوى هسع (النسوان) ذاتم بقو يقولو (ضل حيطه ولا ضل راجل) عشان (ضل الحيطه) بقى يجيب قروش أكتر !!



    - أها والناس الواقفين إتنين إتنين ديل شنو؟؟



    - (يضحك) إنت ما عارف يابوى إنو (ضل الزول ذاتو) يا يدفع عليهو (ضريبه) ويكون حقو يأجرو أو يعمل فيهو العاوزو وإلا ببقى حق (الحكومة) وكان وقف فيهو أى زول تشيل منو رسوم ؟



    - وهسع الزول لو عاوز يدفع رسوم (الضل) دى و(يترخص) يدفع كم ؟



    - خمسين ألف غير رسوم (الفحص الآلى) عشان (الفحص الآلى) ده بيوضح إنو الزول صحتو بتتحمل الشغلانه دى ولا ما بتتحمل



    - والشغل ده كلو .. ترخيص وفحص آلى وجمع رسوم والحاجات دى كلها البيقوم بيها منو؟؟



    - إنت ما قالو ليك؟؟ دى شركه إسمها (يستظلون) – مواصلا- إنت يا بوى فاضى ولا عندك حاجه



    - لا فاضى ..



    - خلاص خلينى أحكى ليك (السيناريوهات) الحصلت بعد ما سافرت دى







    نشالين الضلله :







    وهم أؤلئك الأشخاص الذين يمتازون (ببسطة) وضخامة فى الجسم ثم ينتشرون حيث يقومون بإختيار أكثر الأماكن (سخونه) ومواجهه لأشعة الشمس اللاسعة فى منتصف الظهيرة حيث يغريك ضلهم (الواسع الممتد) بالوقوف عليه ثم ما أن تقف حتى يبرز لك (إثنين) من رجال (مباحث الظل) الذين كانا يختبئان خلف الشخص فيقف خلفك أحدهم حتى لا تنصرف وتغادر قبل (الدفع) ثم يقف الآخر موجهاً حديثه لنشال (الضل) :



    - إنت بتوقف الناس فى ضلك أصلك (مرخص) ؟؟؟



    - لا ما مرخص



    - طيب لو إنت ما مرخص معناها ضلك ده ضل (حكومى)



    - أيوه



    - (ثم يلتفت لك) : إنتو (الحكومة) دى طوالى (ماكلين) حقها ؟؟



    - (زميله الذى كان يقف خلفك) : يعنى عاوز تقعد وترطب فى ضل الحكومة (البااارد) ده (ملح ساااكت)



    - (فى توسل) : يا جماعة والله أنا وقفت هنا صدفه سااكت



    - ده علينا نحنا ؟؟ .. طيب ما كنت تمشى تقيف فى الشمس الحارة ديك (صدفه) ساكت ؟؟– ثم موجها حديثه لنشال الظل-



    - الزول ده واقف فى ضلك أقصد (ضل الحكومة) ده من بتين ؟؟



    - (يسرح كمن يتذكر) : واللله كان ساعه كان ساعتين



    - ياااخى حرام عليك أنا و(قفت فيهو هسع) دقيقة ما أخدتها



    - (كمن عثر على شئ) : شوف شوف بتقول وقفت فيهو هسع .. كده إنت إتقبضت (بالثابته) !!



    - يا جماعه (ثابتت) شنو؟؟ أنا واقف فى (بنقو)



    - بنقو .. كمنقه .. أدفع لينا بس رسوم الساعتين ديل



    - يا جماعه والله ما ساعتين ديل دقيقتين فى زول بقعد فى الشمش الحارة دى ساعتين؟



    - (يا زول) أدفع وما تخلينا نتخذ معاك إجراءآت !!



    وتنهمك وأنت (مغبون) فى إدخال يدك فى جيبك لإخراج محفظتك لدفع (رسوم ضل ساعتين) لتكتشف أن الشخص الذى كان يقف خلفك وأنت تتحدث مع (نشال الضل) لم يكن إلا (نشال جيوب) !!







    حاجه أمونه:



    - يعنى هسع لزومو شنو نرجع السوق تانى فى الشمس الحارة دى عشان نرجع (الجزمه) بتاعتك دى ؟



    - لكن يا أمى طلعت (ضيقه) وأنا ماشه بيها عرس ناس (نهله) الليله المساء



    - ما تلبسى ليكى أى واحده تانيه .. بس إلا هى يعنى؟؟



    - ألبس أى واحده كيف يا أمى؟ دى أنا إخترتها لون (الفستان)



    فى ذلك النهار الحار والشمس تتوسط كبد السماء ركبت حاجه أمونه وبنتها (سعاد) ركشه إلى السوق حيث وقفتا أمام (طبلية) بائع الأحذيه وبينما كانت (حاجه أمونه) تشرح للبائع كيف أنهم قد وجدوا أن (الجزمه) ضيقه وإنهم عاوزين نفس اللون بس (مقاس أكبر) وقف أمامها أحد الأشخاص مخاطباً :



    - إنتى يا حاجه (البت) الواقفه فى (ضلك) دى مأجره ليها ولا إنتى (عندك رخصة)



    - (فى إستغراب) : مأجرة ليها شنو كمان؟



    - لا يعنى ما فيها حاجه لو مأجرا ليها لأنو القانون بيسمح (للنسوان) يأجرو لى بعض



    - يا ولدى قانون شنو ونسوان شنو؟؟ دى بتى أقيف فى ضلها تقيف فى ضلى دى ما شغلتكم



    - يا حاجة شوفى بتك أمك أختك أبوك دى ما مشكلتنا .. إنتى لو (مرخصة ضل) وعندك ما يثبت تكونى إنتى حرة فى (ضلك) وما بنسألك إن شاء الله أى زول يقيف (يرطب) فيهو.. لكن كان ما (مرخصة ضل) الضل ده بيكون بتاعنا .. حقنا نحنا .. يعنى بالعربى كده (ضل الحكومة) مش لو وقفت فيهو (بتك) كان قعدتى إنتى ذاتك فيهو بندفعك (رسوم ضل) !!!



    - (وهى تفتح محفظتها لتعطيه الرسوم) : شاحده ربى الكريم (تقعدو فيهو) الجمر الحار داك يوم القيامه أكان ما خليتو لينا صفحه نرقد عليها !!!







    تستظلون :



    بعد أن أصبح وجود (الظل) فى الأماكن ذات الشمس المحرقه حكراً بل (حصرياً) على شركة (تستظلون) قامت الشركة بإختيار (أسخن) المواقع وبخاصة أماكن التجمعات ومواقف المواصلات العامة لتنشر فيها أعداداً مهولة من (المظلات القماشية) الضخمة ليقف عليها (المستظلون) بعد دفع الرسوم المقررة علاوة على بيع الماء البااارد لهم .



    - بالله شوف بالله .. (فلس) الزول الواقفه معاهو البت داك ليهو ساعتين موقفها فى الشمس الحارة دى بدل ما يدخل يقيف بيها فى واحده من (المظلات) دى!!



    - يكون ياخى (مفلس) وما عندو قروش



    - طيب لزوم (الجكيس) فى الشمس الحارة مع (الفلس) شنو؟؟



    - هم ديل كويسين عليك الله شوف الراجل ( أب صلعه) ونضارة الماسك (الجريده) داك .. العرق نازل منو ذى المويه كيفن؟؟ مستخسر فى (روحو) ألف جنيه يدخل بيها جوه (تستظلون) !!







    حكاية عبدالسميع :







    عبد السميع يسكن (أمبده بالردمية) ويعمل (باشكاتب) بإحدى الوزارات عاد إلى المنزل من العمل فى نهار ذلك



    اليوم القائظ الحر ليجد أن طفلته تعانى من (النزلات الحايمة اليومين ديل)



    - (البت) من الصباح (تطرش) وجسما مولع نار وحلقها مسدود



    - أها ونعمل شنو يعنى؟؟



    - كيفن نعمل شنو يلاكا نوديها هسع (المستشفى) عاين ليها بقت كيفن



    دون أن يستريح (عبدالسميع) دقبقه واحده ويآخد نفسو أخذ طفلته ومعه زوجته وخرجا إلى محطة المواصلات التى خلت تماماً من الحافلات المتجهه إلى ( أم درمان) حيث المستشفى العام وذلك بسبب تهرب السائقين من العمل فى ذاك الجو المشمس الحار.



    بينما كانت زوجه عبدالسميع تقف على (ظل) زوجها إتقاء الشمس وهى تضع طفلتها على كتفها إقترب منها أحد رجال (مباحث الظل) :



    - بالله لو سمحتو بطاقاتكم



    - (عبدالسميع فى إستغراب وزهج ) : الله ؟؟ وعاوز بيها شنو؟؟



    - كيف عاوز بيها شنو؟؟ - فى صرامه- إنتو بتبقو لى بعض؟



    - (عبد السميع فى لماضة ) : ودى تخصك فى شنو؟؟



    - (فى حزم وجديه) : إتكلم عدل وجاوبنى ( يخرج له كارنيه مباحث ظل)



    - طيب ما تقول كده من زمان ... دى زوجتى



    - وهل لديكا ما يثبت ذلك؟؟ إنت مش عارف ممنوع تأجير ضل الراجل لى (مرا) إلا يكون (محرم) ؟



    - أيوه لديا (مشيراً إلى الطفله) : الشافعه الشايلاها دى



    - أقول ليك ما يثبت تقول ليا (شافعه) يعنى (مكتوب) فيها (تاريخ إصدار) وإلا ( إنتهاء صلاحية)؟؟



    - يعنى إنت عاوز شنو هسع ؟؟



    - قسيمه طبعاً



    - (وهو يكفكف فى أكمام القميص والشرر ينطلق من عينيه) : يازول البت عيانه والفلس مطلع عينا والشمس حارة وجايين من الشغل هسع ما إسترحنا دقيقه و...



    - (خائفاً) : المره دى أنا ح أسيبك عشان (الطفلة العيانه) المعاكم دى – بعد أن إبتعد – لكن تانى أعمل حسابك والله ألقاك موقف ليكا مرا فى (ضلك) إلا أوقفك بين يدى (الرحمن) .. !!







    ضل متحرك :



    - يا خى والله أنا منتظر ليا تاكسى والشمس دى ضاربانا فى نص راسنا .. أها تأجر ليا ضلك ده نص ساعه بى كم ؟؟



    - بى تلاته ألف



    - تلاته ألف كتيره ..ليه إنت مرخص؟؟



    - (يلف ويعطيه ظهره) : طبعا مرخص إنت ما شايف (الرخصه المدورة) دى ؟؟



    - طيب خلاص وكت مرخص نديك ألفين ونص



    - عليك الله هسع دى شمس ألفين ونص والله ألفين ونصك دى (مويه) بارده ما تروينا – مواصلاً – بعدين عليك الله هسع شوف (الضل بتاعى) ده واسع ووهيط كيفن عليك الله ما ذى ضل عمارة ؟



    - خلاص يا زول تلاته تلاته



    وقف عابدين) فى (ضل الراجل) وأخرج (جريده) أخذ يقرأ فيها بعد أن قام بمسح (نضارة القراية) بكفة قميصه فى ذات الوقت الذى أشتدت فيه أشعة الشمس عل صاحبنا فبدأ فى تكسير الوقت بالغناء حيث أخذ يغنى ويتمايل يساراً ويمينا الشئ الذى جعل عابدين يجد نفسه تارة فى (الشمس) واخرى فى (الضل) :



    - شوف يا زول والله أنا ما بقدر على (القميز) بتاعك ده .. أنا مأجرك (ضل ثابت) ما (ضل متحرك) عشان تقعد تتجارى ليا بى جاى وبى جاى



    - يعنى شنو؟؟ ما نغنى ونكسر زمن فى الشمس الحارة دى؟؟ - متهكماً- طبعا يا أبوها إنت قاعد فى ضلى الكبير ده ومرطب وما عارف الشمس الحارة دى مديانا فى (صنقورنا) كيف؟؟



    - ياخى لا (صنقورك) لا ما (صنقورك) – وهو يطبق الجريده ويبتعد- أنا ما ضلك ده ؟ ما عايزو



    - (يتبعه ويمسك به من ياقه قميصه) : تعال .. تعال ماشى وين قاعد فى (ضلى) ربع ساعه وعاوز تمشى كده ساااكت؟



    - يا زول ربع ساعة شنو؟؟ والله بى (قميزك) وحركتك الكتيرة دى ما أكون قعدت فى (الضل) دقيقتين



    - يعنى شنو ما ح تدفع إيجار (الضل) ده؟



    - (وهو يلتفت إلى الجمهور الذى بدأ يلتف حولهما) : يا جماعه بس معقول الزول يدفع ليهو إيجار (ضل) ما قعد فيهو ؟؟



    بدأ صاحبنا متشنجا وهو يمسك بتلابيب (عابدين) وهنا فج أحدهم أفراد الجمهور الذى شكل حلقة حولهما :



    - (وهو يخرج الكارنيه ويكشفه لهما) : معاكم (مباحث الضلله) – ثم موجها سؤاله لعابدين :



    - إنت الزول ده كان مأجر ليك (الضل) بتاعو مش كده؟؟



    - أيوه صاح وكمان سألتو قلت ليهو (مرخص) قال ليا أيوه وورانى (الرخصة المدورة) الملصقه فى (ضهرو) دى



    - (رجل المباحث ينظر فى ظهر صاحبنا وينهره قائلاً) : تأجر فى (ضلك) وكمان معلق ليك رخصه (مفوته)



    - (يحاول التملص) : ضل شنو الأنا مأجرو ؟؟ أنا واقف فى وقفتى دى الزول ده جاء وقف فى (ضلى) قمت



    أبيت أقول ليهو زح .. قلت شنو يعنى برضو؟؟ (فضل ظل) وربنا ح يدينا عليهو شويت حسنات







    ضل راجل :







    - هسع يا راجل بدل ما اليوم كلو (تترقد) من سرير لى سرير قاعد لا شغله لا مشغله (طويل وعريض) كده أكان مشيت موقف المواصلات فى الشمس الحارة دى أجرت (ضلك) ده ما كان جبتا لينا (قرش قرشين)



    - إنتى وليه مجنونة ؟؟ أأجرو كيف وأنا ما (مرخص) عاوزةه ناس (مباحث الضل) يكشونى؟ هسع كان كشونى ألقى ليهم قروش (غرامه) من وين؟؟



    - هو ترخيص الضل ده كمان بى قروش ما كلها خمسين ألف فى السنة؟؟



    - وخمسين دى يجيبوها ليهم من وين؟؟



    - طيب وكت إنت عارف ما عندك خمسين الترخيص ما تمشى تشتغل فى شكت (الضل الجماعى) دى العملا جارنا (عباس) راجل (التومه) دى



    - وإشتغل معاهم شنو؟؟



    - (فى سخرية) : يعنى ح تشتغل (جراح) ما ح تشتغل (ضل راجل)



    - كيف يعنى؟



    - ناس (ود أب دقن) ديل أدوهم (إمتياز) يعملو شركه سموها شركة( الضل الجماعى) قاعدين يشغلو فيها الناس



    (الطوال وعراض) ذيك كده وكل عشرة عشرين نفر يطلعوهم يمشوا يقيفو مع بعض ذى (حيطة الكورة) عشان يعملو (ضل جماعى) يأجروهو (للعوائل) والناس الفى مجموعات فى حتات السخانه (الما فيها ضل) !!



    - يعنى هسع (ود أب دقن) رأسمالو شنو فى الشركه دى؟؟



    - إنت عوير؟؟ هو (أبان دقون) ديل عاوزين ليهم (رأسمال) ما كلو قايم من (مافيش) !! ومن (دقنو) وفتتلو – مواصلة- عليك أمان الله عشان شركة (الضل) دى سايق ليهو عربيه (إستثمار) آخر موديل!!



















    يخاف من ضلو :



    ما أن جلس (عثمان) على مكتبه فى (المصلحه) فى صباح ذلك اليوم حتى أخذ يردد (معقوله بس) معقوله بس ... معقوله بس .. الشئ الذى جعل زميله (مصطفى) يسأله فى إستغراب :



    - شنو مما جيت شابكنا معقوله يس .. معقوله بس ؟؟ هو شنو الما معقول؟؟



    - (يفتح يديه علامة الإستغراب) : معقوله بس ؟؟



    - يا (عثمان) ياخى إستهدى بالله وورينا الحاصل



    - والله البلد دى وصلت مرحله خطيره خلاص؟



    - كيف؟؟



    - إتصور ياخى الواحد بقى يخاف من ضلو ؟



    - ما فاهم



    - يا خى دى عاوزه ليها فهم ..تكون واقف فى أمانت الله و(ضلك قدامك) بس كان جا زول (بالغلط) وقف فيهو سااكت يجووك ناس (مباحث الضل) وهاك يا أسئله .. إنت الزول ده بتعرفو؟؟ إنت مأجر ليهو؟ عندك (رخصة) ؟؟



    - وهسع الواحد لو ما إتكلم معاهم وقال ليهم أعملو العاوزين تعملوهو



    - إنت بتلعب يا زول؟؟ دى مبااااحث تعرف شنو مباحث ؟؟ والله يودوك (النيابه) بتاعت شركة (يستظلون) تانى تفتش (للبظلك) ما تلقاهو !!



    - هو الشركات عندها (نيابات) براها



    - يا بوى البلد دى بقت أى حاجه فيها فيها حاجه براها ما شايفا بقت ذى (السلطه) كيف؟؟



    - والله كلامك صاح يومداك لقينا لينا واحد لابس (مبرقع) إتغالطنا يكون شغال فى ياتو (حته) القال ليك يكون فى (المظلات) والقال ليك يكون فى (المدفعية) والقال ليك يكون (سجون) والقال ليك يكون (إستخبارات) والقال ليك شنو ما بعرف وفى الأخير طلع (طالب) فى الثانوى العالى !!!



    - والله فعلاً الواحد بقى يخاف من (ضلو) !!







    العريس مالو؟



    بثينه تجلس فى (البرنده) أمام (المطبخ) تورق فى (خدرا) وعلى السرير المقابل لها تجلس إبنتها (صفاء) :



    - يا بتى العريس مالو ؟؟ والله ضلو ولا ضل (حيطه) عليكى أمان الله يقعدو فيهو (نفرين)



    - لكن يا يمه دى شغلانه دى؟؟



    - مالا شغلانة السرور .. – تلتفت إلى إبنتها – هو إنتى قايلاهو واقف على ( إيجار ضلو) بس؟



    - يعنى نان قاعد يعمل شنو؟؟



    - لا لا ده ود (كسيب) وطور نفسو .. أولن بالتبادى رابط ليهو فى ضهرو (بنبرين) للزباين وتانى حاجه مالى ليك جيوبو (مروت شحن) وسجائر و..



    - (فى ضيق) وشنو كمان يمه؟؟



    - وشايل ليهو حفاظت مويه بااارده – مواصله – والله وبالله قالو ليكى البدخلو فى اليوم (هايس) ما بدخلو !!



    - يا أمى ما عايزاهو ما عايزاهو مش كان (هايس) كان (حافله روزا) ما دايراهو



    - مالو هو الشغل يا بتى حرام؟؟



    - يا أمى ما حرام لكن هسع قولى عاوزين نسافر بره فى (الباسبورت) بتاعو فى حتت (المهنه) يكتبو شنو؟



    - ما يكتبو اليكتبوهو إن شاء الله يكتبو (مستثمر) !!







    أكل عيش :



    بينما كان حاج (سليمان) يحمل (خرطوش) المويه خارجاً من منزله ليقوم برش (ضل ابيت) فى صباح ذلك اليوم إستوقفته (زوجته) قائله :







    - اليوم كلو يا راجل شايل خرطوشك فى الشمس الحارة دى وترشرش .. وبعدين (المويه دى ذاااتا ما بى قروش إنت ما شايف (جمرة المويه) الركبوها دى؟؟



    - ما إحتمال (إيجار الضل) يغطى !!



    - يغطى شنو؟؟ من زباينك ؟؟ هسع كان فى لزوم (ترخص) ضل بيتك ده وتخسر ليكا قروش فى الفاضى؟



    - ما قلنا نأجروا كان نزيد (ميه) المعاش دى شويه؟



    - أها الزبائن وينهم .. كل يوم من صباحت الله بالخير خاتى كرسيك بره فى الشمس الحاره دى وقاعد ؟



    - ده كلو من جارنا (مختار) ده ؟؟



    - مالو كمان مختار عمل ليكا شنو؟



    - إتصورى شافنى قاعد أأجر (الساعه) بى (ألفين) قام عمل (الساعه) بى ألف .. ومش كده كمان عمل معاها خدمات



    - خدمات ذى شنو يعنى؟



    - جاب ليهو (كراسى) و(بنابر) ومويه بارده وكمان قام (طول) حيطت البيت عشان (الضل) يكون (ماهل)



    - وإنت مالك ما تعمل ذيو ؟



    - أعمل ذيو من وين أنا عندى قروش؟ ده عندو (ولدو) مغترب قاعد يرسل ليهو



    - أقول ليك (خت) المسجل بتاعك ده وشغل ليك (أغانى) كان الزبائن يخلوهو يجوك



    - حليلك يا حاجه – يكلم نفسو- (قالت أيه أغانى) !!



    - شنو مالو ما فكره كويسه؟



    - يا حاجه أغانى شنو ؟؟ (مختار) ده جاب ليهم (دش) ربطو ليهم فى (الضل) !!!



    الفاتح يوسف جبرا
                  

03-28-2007, 06:08 AM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    الغرامة (الثلاثية)

    Quote: بينما كان عم (خضر) فى طريقه إلى مبنى المعاشات لصرف معاشه وهو يقود عربته (الهيلمان) أمام كبري النيل الأزرق إذا برجل المرور يستوقفه:



    - شنو يا حاج، ما شايفنى قاعد أأشر ليك؟



    - والله يا ولدي المخ شغال... أها في شنو؟؟ ترخيص والعربية مرخصة.. وأهو دي رخصة السواقه بتاعتي (عامة) ومجددة



    - (في لهجه آمرة): أفتح لينا الضهرية دي



    - لا مفتاح عجل لا عفريتة لا إسبير... إنت يا حاج ماشي ساكت كده!!



    - ساكت كيف يعني؟؟



    - هسع أفرض نزل ليك لستك تعمل شنو؟؟



    - أولاد الحلال راقدين يا ابني



    - يعنى ح تخلي العربية في الشارع تعطل لينا (الحركة) لحدت ما يجوك أولاد الحلال.. مش كده؟



    - يا ابنى الظروف وكده.. أنا معاشي الماشي أجيبو ده ما بشتري ليهو (عفريته) خليك من لستك



    - شوف يا حاج المرة دي سامحتك.. القانون الجديد بيقول أي واحدة فى الحاجات التلاتة دى اللي هم (الإسبير والعفريتة ومفتاح العجل) يكون ما موجود في العربية غرامتو تلاتين ألف... يعني أنا هسه مفروض أغرمك تسعين ألف!!! لكن خلاص عملت ليك إيصال بي (تلاتين) بس!!



    - يا ابنى أيصالك ده (نص) معاشي الماشي أجيبو ده!!



    - والله يا حاج (نصو) وللا (ربعو) الإيصال خلاص انقطع..



    كانت (صدمة) حقيقية أن يقوم عم (خضر) بدفع (التلاتين ألف جنيه) والتى هي بالضبط كل ما تبقي له من مصروف نهاية الشهر فأصيب بإحباط كاد يجعله يعود إلى منزله من جديد ويترك موضوع صرف المعاش الذي كلفه ذلك (الإيصال)، لكنه واصل مشواره إلى (صندوق المعاشات) وهو يعلم بأنه لن يتم (تغريمه) مرة أخرى في ذلك اليوم طالما معه (ذلك الإيصال)!! غير أن عم (خضر) عاد إلى منزله بخفي حنين من (المعاشات) حيث قيل له إن المعاشات لم (تنزل) وإن عليهم معاودة الحضور في اليوم التالي!!.



    بعد تناوله للغداء جلس يفكر في كيفية الذهاب في اليوم التالي لصرف المعاش وهو بالقطع سوف يواجه عددا من (الكمائن) و(الكشات) الخاصة بالغرامة (الثلاثية)!! لذلك كان لا بد له أن يقوم بمحاولات لتفادي ذلك.



    - يا راجل إنت جنيت شايل (اللستك) حق (الغسيل) ماشي بيهو وين؟؟؟



    - واديهو (البنشر) أصلحو



    - وتصلحو ليه؟؟ أنحنا ما قاعدين نخت فيهو (الطشت) وشغالين بيهو كويس



    - لا أنا عاوز أشغلو فى العربية (أسبير)



    - والله يا راجل إنت جنيت.. هسع (اللستك) ده بي (خرومو) الكتيرة دي بينفع للعربية؟؟



    - ينفع.. ما ينفع أنا ح أعمل ليهو (جواني) وأعملو إسبير عشان (اتخارج) من ناس المرور ديل



    بالفعل حمل (عم خضر) لستك الغسيل ووضعه أمام (خليفة) بتاع البنشر ولم ينس أن يحمل معه (عجل الحديد القديم) الذى كان يستخدمه (لتكل) باب (الشارع).



    - يا خليفة عاوزك (تظبط) ليا (اللستك) ده كويس!!



    - (خليفه ينظر للستك فى إندهاش) : إنت يا عم خضر بتبالغ؟؟ اللستك ده (صلعة) وكلو (خروم) - ثم متابعاً وهو يمسك باللستك - إنت كدى شوف (الشرط) ده قدرشنو ح (تآآمن) براك!!.



    - يا خليفة أنا شايف اللستك (مصلع) وحالتو (صعبة) لكن نعمل مع ناس المرور ديل شنو؟؟ إنت بس أعمل ليهو (جوانى) وأنفخو إن شاالله أختو (صورة) ساكت!!



    قام عم خضر بدردقة (اللستك) حتى أوصله إلى (البيت) وما أن رأته (نفيسة) زوجته حتى صاحت فيه قائلة :



    - أها قول ده (اللستك) عملتو... تلقى ليكا (عفريته) و(مفتاح عجل) من وين؟



    - (فى زعل) إنتى كان سكتى ومسكتى خشمك ده عليك.. بلقاهم!!



    قام عم خضر بفتح (طبلة) ضهرية العربية وقام بوضع (اللستك) عليها ثم قام بقفلها بينما كان جاره (حاج مختار) ينادى عليه للخروج والإنضمام لشلة (الطاولة) اليومية.



    - مالك إنت يا حاج خضر الليلة ما مركز فى اللعب وراسك (دايش) إن شالله خير؟



    - والله يا جماعة عندى مشكلة كبيرة خلاص!!



    وبعد أن قام عم خضر بشرح الأمر لأعضاء (شلة الطاولة) وكيف أنه من المفترض أن يقوم بتجهيز (عفريته) و(مفتاح عجل) لعربيته فى سبيل أن يستطيع التحرك بها والذهاب للخرطوم لصرف معاشه الشهرى حتى لا يكون عرضة (للغرامة الثلاثية)!!



    - والله يا جماعة مسألة (الغرامة الثلاثية) دى أنا ما عارف (الجماعة ديل) فكروا فيها كيف؟؟؟ طول عمرنا (سايقين) ما فى زول سألنا من (إسبير) واللا من (عفريته) واللا من مفتاح عجل)!! هسع المسألة دى لزوما شنو؟؟



    - والله مش (الجماعة ديل) تلقاهم عملو (موضوع الغرامة) ده بعدما (إستوردوا) ليهم (ستين مليون) لستك وعفريته!!!



    - هسع أفرض ما عندى إسبير أو إسبيرى (نازل) هم ح يتضرروا من شنو؟؟



    - يتضرروا من شنو كيف؟ إنت عاوز تهدد (أمن البلد)؟ ما ممكن (اللستك) ده ينزل ليكا قدام بيت (رئيس حركة) من (الحركات) أها نقعد فى (ثابت عندك) وشنو ما بعرف داك؟؟؟



    - والله (القصة) دى ما عندها أى لزوم



    - كيفن ما عندها لزوم؟ المسؤولين قالو الزول الما عندو (إسبير واللا عفريته واللا مفتاح عجل) كان نزل ليهو لستك فى الشارع بعطل (الحركة)!!



    - بعطل (الحركة) واللا عاوزين (يمصو) باقى دم الشعب المسكين ده!!!



    - المشكلة يا جماعة إنو (الحاجات) دى دايما قاعد يتضرر منها الزول (الأغبش) زينا... يعنى هسع معقولة زول سايق ليهو.. (نوبيرا) واللا (بولو) واللا (باسات) يكون ما عندو (إسبير)؟؟



    - والله قالوا أسعار (اللساتك) و(العفاريت) طارت السماء!!



    - وطيب إنت ما تمشى تشترى ليك عفريته ومفتاح من السوق!!



    قالها (حاج طه) فى تلقائية جعلت (عم خضر) يرد عليه فى تهكم :



    - يعنى يا طه يا خوى أنا (السوق) ما عارفو وين؟ واللا محلات (الإسبيرات) ما عارفهم وين؟



    - طيب المشكلة وين؟؟



    - المشكلة قروش مافى..قروش مااااافى.. نحنا نشترى (جمرات) واللا ندفع (تلفونات) واللا (نفايات) واللا (ناكل) واللا (نشرب) واللا كمان نشترى (عفاريت) هو (المعاش) ده قايلنو كمهو؟؟



    هنا تدخل (المعلم عباس) النجار فى الموضوع بعد أن توقف عن رمى (الظهر) وقال مخاطبا (عم خضر) :



    - شوف يا خضر.. ناس (المرور) ديل الأيام دى (سمهم فاير) أحسن ليك تختاهم وتمشى تشترى ليكا (عفريته ومفتاح) - ثم مواصلا- أمشى (السوق الشعبى) تلقى فى ناس (فارشين) العفاريت (المستعملة) بتلاقى ليكا واحده رخيصة وأكان على (مفتاح العجل) تمنو ما غالى يعنى بى أربعة بى خمسة ألف بتلقى ليك واحد!!



    عفريته للبيع:



    وجد عم خضر أن (كلام) المعلم (عباس) معقول شوية فهنالك فى السوق الشعبى سوف يجد (عفاريت مستعملة) يستطيع أن يشترى واحدة منهن ويتخارج من مسألة (الغرامات) عندما يقوم غدا بالذهاب للخرطوم لصرف معاشه فقام من فوره وارتدى (جلابيته) متجها (للسوق الشعبى).



    - بالله يا معلم عندكم (عفاريت)؟



    - الشايفهم قدامك يا حاج ديل كلهم (عفاريت) - ثم مواصلاً- إنت عاوز عفريته (ترس) واللا (كوبرى) واللا (زيت)؟؟



    هنا أسقط فى يد (عم خضر) فالمسألة بالنسبة له ليست فى (نوعية) العفريته بقدر ما هى فى (ثمن) العفريته فقال مخاطبا (المعلم) :



    - نوع العفريته ما مشكلة يا (معلم) بس أنا عايز ليا واحده تكون (رخيصة)



    قام (المعلم) من كرسية الذى كان يجلس عليه واتجه صوب (إحدى العفاريت) ثم قال وهو يمدها لعم خضر:



    - شوف يا حاج العفريته (الكوبرى) دى أرخص عفريته عندنا



    - (وهو يقلبها بين يديه-) أها تمنها كم؟



    - خمسين ألف!!



    لم يكن (عم خضر) يعلم أنه بعد صدور قرار (الغرامة) الثلاثية ولجوء المواطنين لشراء (العفاريت واللساتك والمفاتيح) تجنبا (للغرامة) بأنه نسبة لزيادة (الطلب) فقد ارتفع (السعر)



    - يعنى هسع يا (معلم) ما بنلاقى لينا كده عفريته بى عشرة خمستاشر ألف؟؟



    - ما تتعب روحك يا حاج والله عفاريت بالتمن الإنت بتقول فيهو ده مافى!!



    - (بعد برهه تفكير) طيب ما عندك (عفريته) بايظه ما (شغاله)؟؟



    - ودى عاوز (ترفع) بيها شنو؟؟



    - إنت مالك؟ إن شالله أرفع بيها (فاتحة)



    وبالفعل قام (عم خضر) بشراء (عفريته) بمبلغ عشرة الاف جنيه شكلها ما بطال غير أنها (ملجنه) ولا تستطيع أن ترفع (إبره)!! ولم ينس أن يقوم بشراء (مفتاح) عجل بمبلغ (ثلاثة آلاف) ليكون كل ما خسره فى هذا المشوار هو مبلغ (ثلاثة عشر ألف جنية) إضافة إلى (حق المواصلات)!!



    عاد عم خضر للمنزل وقد (نزل منو هم) بعد أن قام بتجهيز نفسه لمشوار الغد (للمعاشات) واستعد لكشة (الغرامة الثلاثية).. بالطبع فإن اللستك الإسبير هو لستك غسيل وما نافع لكنه فى الأخير (لستك) و(منفوخ) كما أن العفريته (ملجنه) وما بتشتغل لكنها فى النهاية (عفريته) وشكلها (مقبول) ولن يتم إخضاعها لأى (تجربه) من قبل (ناس الكشة)!!!



    إلى المعاشات:



    قام عم خضر فى صباح اليوم التالى مبكرا كعادتة.. وبدأ بغسل العربة وتلميعها ثم ارتدى ملابسه متوجها (للخرطوم) لصرف (المعاش)... على مدخل (كوبرى النيل الأزرق) قبالة (قصر الشباب) كانت (عربة الكشة) تقف على جانب الطريق بينما كان (رجال المرور) يتحاومون بين (الصفوف المتراصة) يبحثون عن (العربات المخالفة) ويخرجونها من (الصف) مع التركيز على العربات (المهكعة).. قام الرجل ذو اللحية البيضاء والوجه الصبوح الذى كان يجلس فى العربة الفارهة التى تجاور عربة عم خضر بإنزال (زجاج) سيارته وهو يشير بيده مخاطباً عم خضر:



    - يا حاج لستكك (القدام) ده (نازل)!!



    عندما نزل عم خضر لرؤية اللستك كان رجل المرور يقف أمامه وجها لوجه:



    - يا حاج طلع لينا (العربية) دى من (الشارع) عشان تغير اللستك ده!!



    قام عم خضر بمساعدة رجل المرور (بدفر) العربه إلى جانب الشارع وما أن توقفت حتى خاطبه قائلا :



    - أفتح (ضهريتك) دى يا حاج وورينا حاجات (الغرامة الثلاثية)!!



    - (عم خضر يفتح الضهرية) أهو ده (الإسبير).. ودى (العفريته) وأهو ده (مفتاح العجل)!!



    - كدى طلع لينا الإسبير ده بره!!



    - (بعد أن قام عم خضر بإنزال الإسبير على الأرض نظر إليه رجل المرور فى تهكم قائلاً) : يا حاج معقول يكون ده هسع (لستك)؟



    - ومالو شنو يعنى؟



    - (وهو يقلب فيه ويمسح عليه بيده) : يا حاج اللستك ده لى (كارو) ما ينفع - ثم مواصلا- وكمان (الصابونه) الملصقة فيهو دى شنو؟؟ جايب لينا لستك غسيل بى (صابونتو) كمان؟؟



    - يا ابنى (بى صابونتو) بى (ظهرتو) مش (لستك) وممكن يشتغل!!! ويودينى (البنشر)!!



    - طيب يا حاج ما تنضم لينا كتير وغير اللستك النازل بتاعك ده!!



    هنا عرف عم خضر أنه (مغرم) لا محاله فهو يعلم علم اليقين بأن (العفريته) التى قام بشرائها (منظر ساكت) ولا تعمل غير أنه تظاهر بجديته فى تغيير اللستك آملا فى أن يقوم (رجل المرور) بتركه والإنشغال بعربة أخرى ولكن يبدو أن (رجل المرور) قد إستاء للإجابات (اللميضة) لعم خضر وآثر أن (يشوف آخرتا).. تظاهر (عم خضر) بالبحث عن (حجر) لوضعه (دقار) للعربه ورجل المرور وااااقف... قام بفك صواميل (العجل النازل) صاموووولة صامووولة... ورجل المرور وااااقف... وضع (العفريته) تحت (العربية) ورجل المرور وااااقف



    - يا حاج ما تسرع شوية مالك قاعد (تتلكك كده)



    - وإنت ما تمشى مش خلاص شفت الحاجات (التلاته) بتاعات (الغرامة)؟



    - لا... راجى أشوف (العفريته) دى شكلها كده ما شغاله!!!!!



    تم قطع (إيصال) أبو تلاتين ألف لعم خضر الذى حلف (بالتقطعو) بأن (العفريته) كانت شغاله لحدت آخر لحظة وأنها ربما تكون (باظت) عند جاره (عباس) الذى (تسلفها) منه بالأمس و.... و........وتم حجز العربه (فى مكانها) لحين تسديد (إيصال الغرامة) حيث أن عم خضر كان (أباطو والنجم) وليس معه قيمة المخالفة!!!







    فى المنزل:



    - أخت ليك الغداء



    - ما عاوز



    - إنت مالك مما جيت الصباح (مكفرن) وحالتك ما ياها



    وقام عم خضر بسرد الحكاية لزوجته (نفيسة) وكيف أنه لم يستطع الذهاب لصرف المعاش وأن عربته محجوزة لدى (شرطة المرور) لعدم إستطاعته دفع مبلغ الغرامة



    - طيب المزعلك شنو؟



    - المزعلنى إنو المعاش كلو (خمسين ألف)... عشان بس أمشى أجيبو (يغرمونى) ستين ألف!!!!



    - إتغدى غداك وبعدين أمشى لى (محمد سيد الدكان) ده أشرح ليهو (الموضوع) وإستلف ليك منو (تلاتين ألف) خليهو يختهم فى الحساب لحدت ما تصرف المعاش.



    قام عم خضر بتناول غدائه بسرعة ثم توجه لمحمد سيد الدكان وطلب منه (تسليفه) مبلغ التلاتين الف جنيه بعد أن شرح له (الظرف)



    - دى التلاتين ألف يا حاج خضر... لكن أنا عندى ليكا فكرة



    - شنو يا محمد يا إبنى؟



    - إنت يا عم خضر بكرة لمن تجى ماشى المعاشات شيل (اللستك) الأسبير الجديد بتاع (البوكسى) بتاعى ده وكمان شيل معاهو عفريتى (الجديده) دى وعلى كده (ضمان) زول يوقفك أو يعمل ليكا (غرامه) مافى



    - والله يا إبنى فكرة مش بطاله



    - كمان أقول ليك حاجة يا عم خضر إنت شيلهم من هسع لأنى ما عندى الليلة مشاوير بالبوكس ده



    وتانى مشوار المعاشات:



    إستيقظ عم خضر مبكرا كعادته... تناول قهوته.. قام بتلميع (العربه)... وفتح (الضهرية) للتأكد من وجود (اللستك الاسبير) الجديد و(العفريته) اللذين قام باستلافهما من محمد (سيد الدكان).. إرتدى ملابسه ثم خرج متوجها لصرف معاشة الذى قام (بدفعه للمرور) مقدما فى شكل (إيصالات)... كان يقود باطمئنان ومزاج لدرجة أنه قام بفتح (راديو) العربه:



    - سيداتى سادتى فى هذا الصباح الجميل مع هذا التقرير الموجز عن حركة المرور فى العاصمة القومية....



    - أعزائى سائقى العربات والمركبات العامة حركة السير تنساب بسهولة فى شوارع العاصمة القومية ما عدا بعض (الإختناقات) البسيطة عند مدخل (كوبرى القوات المسلحة) و(كوبرى النيل الأزرق) كما ننوه إلى وجود بعض أعمال الصيانه بكوبرى (شمبات)... عزيزى السائق نرجو الإلتزام بالسرعة المحدده تجنبا لوقوع (الحوادث) كما نرجو أن نلفت إنتباهك لضرورة وجود (لستك إسبير) صالح للسير على الطريق و(عفريته) صالحة لرفع (اللستك) فى حالة (العطب) وكذلك مفتاح (عجل) حتى لا تعرض نفسك للمخالفة (الثلاثية).... هنا ابتسم عم خضر وهو يقول لنفسه.. مع (اللستك) الجديد ده..والعفريته (الجديده) دى إلا كان تشوفو ليكم حاجة تانى غيرى!!!







    لم يمض وقت طويل حتى وجد عم خضر نفسه أمام (الكمين الثابت) أمام (قصر الشباب والأطفال) حيث أشار له (رجل المرور) بالخروج من الشارع والذى كان يتصيد العربات (القديمة) بحسبانها أكثر عرضة للمخالفات



    - رخصتك يا حاج



    - ...................



    - (ثم ينظر لزجاج العربه ويتأكد من الترخيص الذى وجده ذا صلاحية)



    - ...................



    - أفتح لينا الضهرية دى نشوف (التلاته)!!



    فى إطمئنان و(ثقة) قام عم خضر بفتح (الضهرية)... نظر (رجل المرور) للستك الجديد... أخرج رأسه ثم نظر للستك (العربية) الخلفى ثم قال مخاطبا (عم خضر) :



    - كدى عاين لى خروم (الصواميل) بتاعت الإسبير دى كم؟



    - (ينظر للستك الأسبير) : خمسة (خروم)



    - وتعال عاين لى (صواميل) عربيتك دى كم؟؟ - فى حده - عدهم ما خمسة (خروم)!!! مواصلا فى غضب



    جايب ليك أسبير (بوكسى) خاتيهو لينا قايلنا نحنا (هنود)... ثم أخرج (دفتر) الإيصالات من جيبه!!!.
                  

03-28-2007, 10:47 AM

عاطف عبدالله
<aعاطف عبدالله
تاريخ التسجيل: 08-19-2002
مجموع المشاركات: 2115

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: المديح في حضرة الجبهجية


    تقلصت مشاركاتي الاجتماعية جداً (وأحسب أن الكثيرين أضحوا مثلي)، صرت لا أذهب إلى مناسبات (الأفراح) من (حفلات زواج) أو (عقد) أو (سمايات) أو خلافه بل أكتفى بإرسال رسالة قصيرة SMS لصاحب المناسبة أقوم فيها بتهنئته.. أضحت كل مشاركاتي الاجتماعية محصورة في حالات (الوفاة) حيث أقوم بالذهاب إلى (مكان الدافنة) ومواسآة أقارب المتوفي ثم العودة معهم إلى (صيوان العزاء) ثم الحضور (يوم الرفع) وخلاص .

    صديقي (ن) فاجأني بدعوته لي لحضور (كرامة) عودة (عمه) –وهو أحد أثرياء الغفلة- من الأراضي المقدسة وعلى الرغم من أنني استخدمت (الأعذار) كافة متملصاً من دعوته إلا أنه أبدى إصراراً عجيباً مما دعاني أن أذعن بالموافقة .

    توقفت عربة صديقي أمام فيلا (عمه الثري) بضاحية (قاردن سيتى).. العربات (الجديدة الفارهة) ما تديك الدرب، وقد تراصت حتى اكتظت بها جنبات الشارع الفسيح .. الباب الخارجي (الزجاجي) مفتوح على (مصراعيه) حيث تجاوزناه ونحن نسير عبر ممر (أسمنتي) يفصل بين جنبتي (الحديقة الوارفة) التي تراصت عليها المقاعد والترابيز ذات الأغطية البيضاء الناصعة ونحن نصل إلى باب الصالون الخشبي الضخم لفت نظري (الأحذية) التي يبدو أنها للضيوف الذين بالداخل.. أحذية جلدية ذات ألوان وأشكال غاية في الروعة يبدو من جمالها أنها مستوردة لم تعرف (الأورنيش) كما ليس بينها أي (فردة) بها ضربة حجر أو (خدشة قزازة) أو بقايا طين (مكدِّب) كل الأحذية كما لو تم إنزالها من (فترينة العرض) الآن !!

    الصالون بحجم ملعب (كرة سلة) تتدلى منه (النجف) الذهبية ذات الأضواء البيضاء الباهرة محاطاً بصنوف من أطقم الجلوس ذات الكراسي الوثيرة التي يجلس عليها الضيوف الذين تبدو على سيمائهم علامات (الراحة والترطيب) والذين يتساوون في لبس الجلاليب (الذبدة) البيضاء و(العمم) التوتال الأصلي بينما يختلفون في ألوان (الملافح) والشالات وأشكال (الذقون) والساعات اليدوية التي (غطست) داخل (المعاصم) الندية (المبغبغة).

    قمنا بمباركة (الحجة) لعم صديقي والتي عرفت فيما بعد أنها (السابعة عشرة) جلسنا على الكراسي الوثيرة بينما طاف علينا (ولدان) بصحون من أطايب (التمر الشفاف) الشهي وما لذ من (أعناب) وأشياء لم أتعرَّف عليها حينها ..

    لم يمض كثير من الوقت حتى انتظمت (الصالون) حركة غير عادية لم تلبث أن كشفت عن نفسها بعد أن انتصبت سماعات (الساوند سيستم) في أركان الصالون وتم وضع (أورغن) مكرَّب ما لبث أن اصطف خلفه ستة (ولدان) دون أو بعد (البلوغ) بقليل يرتدون أزياء متشابهة بل هم أنفسهم متشابهون وكأني بهم وقد تم (إستنساخهم ).

    وعلى نغمات الأورغ بدأ (الأولاد المغنون) يتمايلون يساراً ويميناً وهم يمسكون (بالمايك).. لدهشتي أن معظم (المدحات) التي قاموا بأدائها هي في الأصل (أغان هابطة) تم إفراغ (نصوصها) وإستبدالها بنصوص (مدائحية) مع الإحتفاظ باللحن. (كده كده يا الترلا القاطرا قندراني) أصبحت (كده كده يا المدينة يا النورك يلالي)، أما أغنية الكاشف المعروفه (الحبيب وين قالوا لي سافر) فقد أضحت (الحجيج وين قالوا لي سافر).. وبينما كان (الأولاد) يقدمون هذا (الفاصل) الذي على شاكلة (الكلام مديح) واللحن (قعدة) كان القوم يتمايلون فى إنتشاء ويهزون (بالعصي) حتى تطير (الملافح) وجدت نفسي أتأمل في ما وصل إليه حالنا من (خواء مقرف) و(استخفاف مزرٍ) بفن من أرقى الفنون (الرزينة) التي تخاطب رهيف أشواقنا (للأراضي المقدسة) وشفيف مشاعرنا نحو حبيبنا رسول الله .

    توقفت (قعدة المديح) في إستراحة يتناول فيها المدعوون طعام العشاء والذي (أحسب) أنه قد جئ به من أحد الفنادق ذات (النجوم) الكثر، حيث امتلأت ترابيز (الحديقة) بما لذ وطاب من كافة أنواع اللحوم المشوية و(المندية) والأسماك (المقلية) وعديد من أنواع المتبلات والسلطات من (مايونيز) و(أبريلنيز) وأطباق (الأرز) ورقائق (البطاطا) وقد تراصت (جكوك) العصائر الباااردة ذات الألوان و(الكثافات) المختلفة إلى جانب أطباق التحلية من (خشاف) و(باسطة) و(عين جمل) وكنافات .


    (ضرب) القوم حتى شبعوا ثم (حلوا) ثم (شربوا) فتمطوا و(تدشوا) ثم عادوا للجلوس حيث بدأت (فرقة الإنشاد ) تستعد (للغناء) من جديد.. هنا قلت لصديقى إن هذا يكفى وعلينا بالرجوع إلا أنه أجابني في إصرار: (بس نسمع الفاصل الجاى ده ونمشي) إلا أنني أجبته بعدم رغبتي في الإستمرار واتجهت نحو (باب الفيلا الخارجي) في طريقي نحو العربة.. عندما أخذنا مكاننا داخل العربة كان صوت (الساوند) يردد :
    وين.. وين مقدرة.. (حج البيت) ده حلو حلا!!!
                  

03-28-2007, 11:27 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    شكراً لك أخى – كبروس - وشكراً لجميع الأعزاء المتداخلين لهذا الإطراء الذى لا أستحقه وقد ترددت – حقيقة - كثيراً فى أن أتداخل فى هذا البوست ولم يكن ترددى إلا لإحساسى الطاغى بعدم أستحقاقيتى لما كتبتم عن شخصى الضعيف فأنا ليس إلا (مواطن) معطوب القلب واهن الجسد يمسك بقلم PIC ليكتب هذه (النصوص) كمنشور (مشفر) حصرياً (للقارئ) حتى إذا ما فك شفرته إعترته حالة من الضحك المؤلم لما آل إليه حال (الوطن) !!
    كسرة :
    أنا أتهم نفسى بمساعدة (السلطة) بتنفيس (ضغط) الشعب ومنعة من الإنفجار !! لذلك أطالب بدخولى (القصر) مستشاراً لشئون (التنفيس) !!
    كسرة تانية :
    أشكر الأخ (هبانى) للبوست الذى كتبه عنى – قبل أسابيع- والذى لم أتداخل فيه لذات السبب عاليه الذى جعلنى أتردد فى التداخل فى هذا البوست كما أشكر الأخ (الطاهر ساتى) لما قاله عن شخصى الضعيف فى ذات –ذلك- البوست
    كسرة أخيرة :
    شكراً لكم أحبتى جميعا .. ومعا من أجل سودان واحد يسع الجميع فى حب ووئام
                  

03-28-2007, 12:45 PM

shammashi
<ashammashi
تاريخ التسجيل: 03-10-2002
مجموع المشاركات: 2278

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: الفاتح يوسف جبرا)

    والله يا جبرا من كترة التنفيس لمن بقينا زي اسبير زولك بتاع المعاشات دا.
    شكرا .

    لكن المستغرب ليها انا إنو بكري لسع ما داير يعمل ليك مكتبة ليه عشان كل السيناريوهات تكون في حتة احدة. مع إنو عمل مكتبات لي ناس زي البفرشوا جنب الجامع الكبير ديك.

    يديك العافية ويسكنك الصافية.
                  

03-28-2007, 03:49 PM

وجدي الكردي

تاريخ التسجيل: 07-28-2005
مجموع المشاركات: 581

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: shammashi)

    من المؤسف ان (قاعدة صفيحية سيئة) وضعها عبقري مشلول الافق، تقول بتحريم إشادة الصحافيين ببعضهم، غيرة أو حسداً لست أدري..
    الفاتح جبرا يستحق ان نمنحه (نجمة الابهار)..
    أتمتع جداً بسخرياته الاسبوعية..
                  

03-28-2007, 06:25 PM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: وجدي الكردي)

    الأستاذ الفاتح جبرة

    شكرا ليك على المرور وكسر حاجز تواضعكم الزايد ...

    وصدقني أنا كمان لا أجيد المدح نهائيا لكن ...


    وعشان نرفع الحرج عن الكل ...

    أرجوك تعتبر البوست ده "انتيرفيو" معاك من بعض المعجبين بكتاباتك ...


    عارف يا أستاذنا ... من كتر ما احنا متعودين على مناظر ثابتة ووشوش محددة ... عندي صاحب كان بيأكد لي أنه انت "فلان الفلاني" يبكتب باسم مستعار ... وبعد الصورة ما ظهرت أصر على موقفه واعتبرها حركة ساي من ناس السوداني !!!

    يا ريت نتعرف عليك أكتر - وليعذر البقية جهلنا - الشمار الوصلنا انك استاذ سيناريو .. والمخيلة الشعبية جابت سيناريوهات كتيرة تانية بعضها لا يصلح للنشر...


    Quote: كسرة: الجماعة ديل ممكن عادي يعينوك مستشار شؤون تنفيس ... بس "صاحبنا داك" يمسك توكيل استيراد النفاسات من الصين!


    خليك ويانا يا أستاذ ...

                  

03-28-2007, 06:57 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: خليك ويانا يا أستاذ ...


    يا (كبروس) ياخى لو ما أكون معاكم أكون مع منو؟ بعدين قبل ما أمشى قدام شوية خلينى أسلم على (أخونا) الرائع وجدى الكردى (الرأى العام) وهو ذو باع فى مسألة الكتابة (الساخرة) دى وأنا بستمتع بقرايتو بالمناسبة الزول فى عمر (معين كده) ما بعرف يقول للناس الفى (عمر معين) كده (الأخ) (الإبن) الشنو ما بعرف داك .. المهم أنا قاعد أقول لأى زول (الأخ) إلا زولن أكون إنى متأكد إنو شلتو فى (صفحتى) حتين أقول ليهو (الإبن) فمعذرة أيها (الإخوان) وشكرا ليك يا (وجدى) وبالمناسبه (أخونا) البونى - أخونا دى جد جد - كان معاى أمبارح فى البيت عشان كده أكيد الرأى العام دى ح نسجل ليها زيارة وح نشوفك !! وأفتكر (الكسرة) دى طولت عشان كده نرجع (لأخونا) كبروس وأقول ليهو أنا لا بتاع (سيناريو) ولا حاجه.. أنا (محاضر) بتاع (نظم معلومات) وتحديداً (تحليل وتصميم نظم المعلومات) يعنى systems analysis and design بعدد من الجامعات السودانية وساكن (اب روف - أم درمان ) ومتزوج (على كبر) وعندى (ناجى) 6 سنوات و(نشوى) 3 سنوات وإن عدتم عدنا !!! أكثر حباً
    وترحاباً !!

    كسرة عديل كده :
    شكرا للأخ شماسى والأخ عاطف عبدالله ألف ألف شكر ومعليش لأى زول تانى لأنو البوست ده يا جماعه ما (بوستى) !! وما عاوز (أبوظو) لى سيدو ساكت

    (عدل بواسطة الفاتح يوسف جبرا on 03-28-2007, 07:06 PM)

                  

03-28-2007, 07:21 PM

Hussein Mallasi
<aHussein Mallasi
تاريخ التسجيل: 09-28-2003
مجموع المشاركات: 26230

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: الفاتح يوسف جبرا)

    يا سلام عليك يا الفاتح يوسف جبرا.
                  

03-28-2007, 07:59 PM

حبيب نورة
<aحبيب نورة
تاريخ التسجيل: 03-02-2004
مجموع المشاركات: 18581

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: Hussein Mallasi)

    التحية لك
    وللأستاذ يوسف جبرة
                  

03-28-2007, 08:07 PM

عاطف عبدالله
<aعاطف عبدالله
تاريخ التسجيل: 08-19-2002
مجموع المشاركات: 2115

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: Hussein Mallasi)

    الأستاذ الفاتح يوسف جبرا
    التحية لك وأنت تداوي جراح المغلوبين بهذه السخرية اللازعة
    التخلي الحكومة
    تقطع هدوما
    وتفن الريال
    يعيش النضال
    يعيش النضال

    مع التحية لشاعر المغلوبين محجوب شريف

    أسمخوا لي بأن أنقل سيناريوهات الحاوي كاملة
    وشكرا

    Quote: سيناريوهات(الحاوى) وفك التسجيلات
    أصابت الدهشة كل (العالم) وهو يستمع إلى هذا الخبر الذى تناقلته وكالات الأنباء العالمية وبثته (الفضائيات):

    فى (الخرطوم) وبعد أن تم تبادل الأدوار (سلمياً) وصار (المسؤولون) هم (الرعية) وأصبحوا خداماً (للشعب) الذى أصبح بدوره (مسؤولاً) عنهم وبعد أن أصدر (الشعب) بعض القرارات الخاصة بترشيد (السفريات) الخارجية للمسؤولين وتخفيض (بدل السفرية) لهم من (خمسميت دولار فى اليوم) إلى (خمسين دولاراً فقط) تجمع عدد من المسؤولين فى الميدان المسمى بـ(ميدان أبوجنزير) وقاموا بتسيير (تظاهرة) وهم يحملون اللافتات التى كتبت عليها شعارات تندد بقرارات (الشعب) الأخيرة هذا وقد تصدت (شرطة الشعب) للتظاهرة حيث قامت بفضها مستخدمة الهراوات والغاز المسيل للدموع مما جعل (المسؤولين) يهربون مستخدمين (الأزقة) ويحتمون ببعض (المحلات التجارية ) هذا وقد وقعت بعض الإصابات فى صفوف (المسؤولين) حيث تم نقلهم لتلقى العلاج بالمستشفيات كما تم القبض على بعضهم هذا وفى تصريح أدلى به (الشعب) أفاد أن المقبوض عليهم سوف يقدمون لمحاكمات عادلة فى الأيام القليلة القادمة.

    -إتخيل قالوا (المسؤولين) مشو (للشعب) عشان يديهم (تصريح) بتسيير المظاهرة قام رفض وما أداهم!!

    -والله الشعب عمل كويس.. هم زمان قاعدين يدو زول تصريح؟

    -هم مشكلتهم إتعودوا على (الترطيب) والراحات عشان كده (التخفيضات) دى بقت ليهم حاره

    -لكن هم بثبتو؟؟ ما مما هبشوهم (الجرسه) ما تديك الدرب

    -عليك الله شفتا نحنا زمانك (ثبتنا) ليهم كيف؟؟ على باليمين قبل الجماعه ديل ما يجو كنت عايش أولادى (التسعه) ومعاهم (أمهم) هسع نزلت المعاش اولادى التسعه ما قادرين (يعيشونى) أنا براى!!

    -آآى والله (هلكونا) شئ جبايات وشئ أتاوات وشئ رسوم وكل يوم يطلعوا لينا فى (القرارات)

    -بى مناسبة (القرارات) دى قالو (الشعب) الليلة الساعة 8 فى المساء عندو(بيان) للمسؤولين ح يطلع فيهو (قرارات) وح يكون (مذاع) و(متلفز)!!

    بيان من (الشعب) للمسؤولين

    فى تمام الساعة الثامنة مساء تماما توقفت الحياة تماما فى كل المدن والأحياء وخلت (الشوارع) من المارة و(تسمر) الجميع أمام شاشات التلفاز وأجهزة الراديو للإستماع (للبيان) الذى سوف يحتوى على (القرارات) التى سوف يتخذها (الشعب) تجاه (المسؤولين):

    الإخوة المسؤولون الأعزاء

    السلام عليكم ورحمة الله تعالى وبركاته

    إن الحياة كما تعلمون لا تسير بوتيرة واحدة وكما تقول الحكمة المأثورة ( فيوم لك ويوم عليك ) وبعد أن صار (الشعب) هو (الحاكم) وأنتم (الرعية) فقد جاء اليوم (العليكم) فأحسن تثبتوا وتبطلوا (الجرسة) زى ما (الشعب) زمانك (ثبت) وربط (الحزام)..

    الإخوة المسؤولون:

    الحقيقه نحنا فى (البيان) ده عاوزين نوريكم (سياستنا) الجايه بالواضح كدا عشان بعد ما (المسائل) إتقلبت والأوضاع (إتغيرت) تعرفوا البيكم والعليكم..

    الأخوة المسؤولون الأعزاء:

    أولن بالتبادى عاوزين نقول ليكم حضروا (حزاماتكم) من هسع والما عندو (حزام) يمشى يشترى ليهو (حزام) ليهو ولى (عيالوا) وناس بيتو عشان خلاص البذخ و(الفشخرة) والقروش السايبه و(العربات) واللاندكروزرات و(الضبائح) والعوازيم والعطلات الخارجية والسفر والطيارات والنسوان (المثنى وثلاث ورباع) ده كلو (الشعب) ح يضع ليهو (حل) وكان بتفتكرو إنو كلما (الشعب) يطلع ليهو (قرار) إنتو ح (تقوموا) مظاهرات تكونوا (غبيانين) لأنو (شرطة الشعب) ح تتصدى ليها بقوة وحزم شديدين وبراكم شفتو الحصل ليكم فى (مظاهرات أمبارح).. إنتو مشكلتكم إنكم كنتوا بتفتكرو إنو الشعب ده (خدامكم) وجاء الوكت الإنتو تعرفو فيهو إنو إنتو (خدامين للشعب) وإنو (الشعب الفضل) ده هو القاعد يدفع ليكم مرتباتكم (المليونية) وبدل سفرياتكم (الدولاريه) وبنزين عرباتكم (الفارهة) والحاجات التانية الأحسن (نخليها مستورة)!! – ثم فى حزم وجدية - أيها (المسؤولون) لقد قرر (الشعب) إنفاذ القرارات التالية:

    قرار رقم 1: زوجة واحده لكل مسؤول

    بهذا فقد قرر (الشعب) أن تكون فى عصمة كل (مسؤول) زوجة (واحدة) ما لم يثبت (المسؤول) أن زوجته (عاقر) أو (مصابه بمرض) تستحيل معه الحياة الزوجيه.. القرار ده يعنى بالعربى كده (عرس) بتاع متعه و(عدم موضوع) تانى مافى... يعنى تانى حكاية الواحد فيكم جاب ليهو (سكرتيرة) عجبتو وقام (متنى) ده خلاص إنتهى.. أو شاف ليهو (واحده) فى (مؤتمر) قام (متلت).. دى تانى (تلقوها عند الغافل).. إنتو طبعا عملتو لينا (الزواج الجماعى) أها نحنا ح نعمل ليكم (الطلاق الجماعى)... القرار ده بيقول من بداية الشهر الجاى إنو أى (مسؤول) فيكم (يحتفظ) بى (مرا) واحده بس و(يسرح) الباقيات..- مواصلا- عليكم الله هو بس لو كان عندكم إنتو شوية (خجل وإستحاء) أنحنا (أفراد الشعب) ده الواحد (مرا) واحده ما قادر عليها يعنى (بيت واحد) ما قادر عليهو بس معقول إنتو الواحد عندو فى ذمتو (تلاته وأربعه) ؟؟؟؟ الناس دى بتأكلوها من وين؟؟ وبتشربوها من وين؟؟ وبتسكنوها أفخر السكن من وين؟؟ وبتعلموها أرقى التعليم بى شنو؟؟ وبتركبوها أحدث (العربات) من وين؟؟ وبتمشوا بيهم (لندن) و(باريس) بى ياتو تذاكر وياتو (نثريات)؟؟ - مواصلا فى حزم - شوفو يا أيها (المسؤولون) قدامكم أسبوع ( فك تسجيلات ) كل مسؤول فيكم يقعد فى الواطه ويحدد (عاوز يسجل منو) ويقوم يشطب الباقيات!! نعم بعد ده إنتهى عهد (التثليث والتربيع):

    (الكاميرا) تركز على شخص يقف خلف (المتحدث) الذى يتلو البيان مباشرة (وهو يرفع عصا أبنوس) ويهتف صائحا:

    - لا تثليث ولا تربيع يا مسؤول خليكا مطيع

    - (أصوات تردد خلفه): لا تثليث ولا تربيع يا مسؤول خليكا مطيع

    قرار رقم 2: صالح شعبى عام

    بموجب هذا القرار سوف يتم تخفيض (جماهير) المسؤولين وإحالة 99% منهم (للصالح الشعبى العام) بعد أن ثبت أن (نصف) عدد (السكان) هم مسؤولون فى الدولة.. شئ وزراء (ساكت)... وشئ وزراء (دولة).. شئ إتحاديين... وشئ ولائيين... وكل وزير عندو (مدير مكتب) و(سكرتير) وسواق (للمدام) وسواق (للأولاد) وسواق (ليهو) وبعد ده كمان نجى للمستشارين وعددهم حتى الساعة العاشرة والنصف من صباح الأمس كان 31124 مستشاراً وكل مستشار عندو (سواق ليهو) وواحد (للمدام والأولاد) بعد داك نجى لـ(المحليات) و(المحافظات) و(المعتمديات) شوفو البلد دى فيها قريب التلاتين ولايه وكل ولايه فيها قريب الكم وكمين محافظة أها يعنى يكون فى كم محافظ؟؟ ونائب محافظ؟؟وكم معتمد؟؟ وكم نائب معتمد؟؟ وكم رئيس محلية؟؟ وكم نائب رئيس محلية؟؟ وكل واحد فى ديل عندو (مدير مكتب) وسكرتير وسواق (ليهو) وسواق (تانى) وكل واحد من ديل عندو قال إيه (مستشار إعلامى) ومستشار (شنو داك) - مواصلا وهو يرفع رأسه من الورقة – ثم مواصلاً – عليكم الله يا (مسؤولين) إنتو هسع عارفين (ربع البصل) بى كم؟؟ وللا عارفين (ملوة الفيتاريتا) بى كم؟؟ - وهو يرفع رأسه عن الورقة مواجهاً الكاميرا - وحكمت الله يوم واحد ما شفنا لينا واحد من (جيش المسؤولين) ده إشتكى قال (مرتباتنا إتأخرت) أو ما صرفت (ماهيتى)؟؟

    قرار رقم 3: ركشة لكل مسؤول

    الأخوة المسؤولون

    (الشعب) قرر بعد دراسة مستفيضه (سحب) جميع (الركشات) من (الشوارع) وتعويض أصحابها تعويضاً مجزيا ومن ثم منح هذه (الركشات) للمسؤولين وإعطاء كل مسؤول (ركشة) من أجل تنقلاته بدلاً عن (الليلى علويات) و(التاتشرات) و(المرسيدسات) و(الـ BM دبليوهات) الفارهة والتى يكفى ثمن الواحده منها لإطعام خمسيت مليون (جائع) من غالب (قوت) أهل البلد – مواصلا متهكما- إذا كان رئيس وزراء (اليابان) قاعد يستخدم (عجلة) فى تنقلاتو ولمن يكون متأخر قاعد يقوم (سدارى) يعنى إنتو يا (مسؤولينا) أحسن منو؟؟ واللا بلدنا أغنى من (اليابان)؟؟ أها تانى بس (ركشات) نشوفكم تانى ح (تظللوا) شنو؟؟ قزاز مافى!!!.

    قرار رقم 4: الحساب ولد

    الشعب بفتكر إنو فى (مسؤولين) بفتكرو إنو (الشعب) ده (عوير) وريالتو (سايله).. يعنى (المسؤول) أول ما يتعين يكون ساكن ليهو فى بيت (جالوص) وباب الشارع بتاعو (زنكى) وضلفه بتقفل والتانية مسنوده بى (حجر) وعفش البيت كلو (دولاب هدوم) وخمسة سراير و(بنبرين) وتربيزة و(الشفع) كل يوم طاردنهم من (الدرس) عشان ما دفعوا (الرسوم) يقوم (المسؤول) بعد كم سنه من تعيينو تلاقى (الشفع) كبرو وقاعدين يقروا (طب) فى جامعات (خاصة) وساكنين فى عمارة (المنشية) ومأجرين عمارة (قاردن سيتى) وخالين (الفيلا) بتاعت (كافورى) فاضية!!.

    - مواصلاً فى حزم- الشعب قرر إنو يدى (المسؤولين) ديل فرصة (أسبوع) عشان يجيبوا (الحاوى) العمل ليهم (الشغل ده)!! وأى مسؤول يفشل فى ذلك فسوف تنزع منو هذه (الحيازات) لصالح (الشعب)..

    الإخوة المسؤولون الأعزاء

    إن (الشعب) كله أمل فى أنكم سوف تلتزمون الهدوء وضبط النفس والتعامل مع هذه القرارات (بمسؤولية) ولتعلموا بأن أى محاولات إحتجاج من تظاهرات وخلافه سوف يتم التعامل معها بحزم وقوة كما حدث لتظاهرة الأمس والتى قام بها بعض (المسؤولين) الرافضين لقرارات (الشعب) الخاصة بـ(تخفيض) بدل السفرية وتقليص (الرحلات الخارجية)!!.

    الإخوة المسؤولون

    لا يخفى على أحد منكم أن (الشعب) قد صبر على (مهازلكم) طويلاً ينظر إليكم وأنتم فى (أبراجكم العاجية) تأخذون أضعاف أضعاف ما تعطون تلبسون (حرير) الثياب وتأكلون (لذيذ) الطعام وتمتطون فاره (الجياد) وتحجون إلى بيت الله الحرام (ملح) ومن أموال هذا الشعب (الغلبان) وتتطاولون فى بنيان (الفلل والعمائر) وتنكحون ما لذ لكم وطاب من النساء غير عابئين بهذا (الشعب) الذى أذله الفقر وهدته (المسغبه) وأضناه (المرض) فأصبح أفراده كالأيتام على موائد (اللئام)!!.

    أيها المسؤولون

    لقد حان الوقت أن تمشوا على العجين وما تلخبطوهو.. والقرارات دى أول (الغيث) ويا نحنا يا إنتو ووراكم والزمن طويل والسلام عليكم ورحمة الله وبركاته!!.

    تداعيات القرارات

    فى حديقة إحدى (الفلل) الفاخرة بأحد الأحياء الراقية جلس المسؤول ومعه جاره (المسؤول الآخر) يرتشفان (القهوة التركية) وأمامهم (سبائط) من العنب و(الخوخ) والتمر (الشفاف) يستمعان إلى (القرارات):

    - الشعب ده جن وللا شنو؟؟ طيب إذا هو (مسؤول مننا) نحن نكون (مسؤولين) من منو؟؟
    - شوف والله بعد (الضرب) الإنضربناهو فى (المظاهرة) أمبارح ده الظاهر (الشعب) ده جاد فى الموضوع

    - يا خوى كان كده أحسن الواحد (يبيع) ويتخارج

    - يا حبيب بيع شنو؟؟ إنت ما سمعت فى (البيان) هسع قالوا أدونا (إسبوع) نجيب (الحاوى)؟؟

    - إنت (الحاوى) ده سيبو هسع (فك التسجيلات) ده نعمل معاهو شنو؟؟ (النسوان) ديل نوديهم وين؟؟

    - (يبتسم فى خبث): والله أنا (حمتى خفيفه) ح أطلق (واحده) وأخلى (واحده) زى ما الشعب قال فى قرارو؟؟

    - طبعا يا أبوها ح تفك (القديمه) عكس الهواء!!

    - يعنى إنت فاكرنى ح أفك (النوبيرا تو) وأخلى (الهيلمان)!!

    - (وهو ساهم): والله المشكلة مشكلتى أنا هسع (الأربعه) ديل يفكوا منهم ياتو (تلاته)!!!

    بينما كان هذا الحديث يدور فى الحديقة بين المسؤول وجاره كانت (ست البيت) زوجة المسؤول (الرابعه) تجلس مع زوجة (المسؤول الجار) الأولى على إحدى البلكونات وهن يناقشن القرارات:
    -والله ووالله يلحق (يفك تسجيلى) إلا أفك ليهو رقبتو!! كمان أنا بلعب واللا بلعب
    -والله يا (ست النفر) ياختى الرجال ديل ما عندهم ضمان وقالوا (الجديد شديد)!!
    -بتقصدى شنو يعنى يا (شيراز)؟؟ عشان إنتى يعنى جديده و(نمرة أربعه)؟؟
    -لا ما كدى والله لكن (الرجال) ديل أنا عارفاهم كان فى (فنيش) بفنشو ناس (الخدمة الطويلة)!!.
    -خدمة طويلة خدمة قصيرة.. وحاتك إنتى دى يلحق يفنشنى إلا (إفنشو ليكى من الدنيا) – مواصلة- وهو ذاتو بينى وبينك قالو ليكى بعد ما يشيلو منو (العمارة) دى و(العربات المكندشة) دى ويركبوهو (ركشه) ويحرموهو (السفر) أنا عايزه بيهو شنو؟؟؟

    فى (فيلا) أخرى لا تبعد كثيرا عن (الفيلا) الأولى كان مسؤول آخر وزوجته يديران حوارا من نوع آخر:
    -أنا يانى العارفاها.. من زمان أنبح ليك يا (سعادتو) سجل العمارات دى للأولاد.. أنبح ليك يا (سعادتو) سجل العمارات دى للأولاد!! أها هسع نعمل شنو؟؟ تجيب ليهم (حاوى من وين)؟؟

    -والله صدقتى السودان كلو فيهو حاوى واحد.. (خضر الحاوى) ومات!!

    -إنت صدقت حكاية الحاوى دى؟؟؟؟ والله حاوى ما يعمل العملتو ده!! الناس كلها عارفاك (موظف دوله) مما قمت معقولة بس (ماهيتك) تعمل العملتو ده!! والله (عماراتك) دى ياها الشايلنها شايلنها!!! – مواصلة فى شماته- هسع كان سمعت كلامى وسجلتهم ليا ولى وليداتك ديل ما كان أحسن ليك؟؟

    -أنا عارفك زعلانه عشان سجلت (بيت كافورى) للمرا التانيه!!

    -والله (الشعب) يقلعو منها زى العجب.. إنت قايل فى حاجه على (الشعب) ده بتندسا؟؟

    فهم (سعادتو) من كلمات (زوجته) الأخيرة بأنها سوف تقوم بالوشايه به وتفضح مسألة تسجيل (بيت كافورى) لزوجته (الثانية) وأن ما قالته ليس إلا (تهديداً مغلفاً) فقام بتصعيد الحوار معها حتى درجة (الغليان) وما لبث أن رمى عليها (يمين الطلاق) وهو يقول فى نفسه:

    -أهو الواحد يرتاح منها وكمان (يفك تسجيلات)!!!!

    تظاهرات:

    لأن (الشعب) ضايق (الشغلانه) فى نفسو وعارف إنو (قرارات التخفيض) بالنسبة (للمسؤولين) هى كما (قرارات الزياده) التى كان يفرضها عليه المسؤولون وأنه لا يوجد فرق بينهما سوى (علامة سالب بره القوس) فقد وضع (الشعب) كل قواته على أهبة الإستعداد تحسباً لأى تظاهرات أو (أعمال شغب) يقوم يها (المتضررون) من هذه القرارات وقد كان حدس (الشعب) سليماً وفى (محلو) إذ سرعان ما إنتظمت فى اليوم التالى مباشرة المظاهرات التالية:

    الإتحاد العام لزوجات المسؤولين

    نظم الإتحاد العام لزوجات المسؤولين تظاهرة سلمية تحركت من أمام (مول عفراء) مشياً على الأقدام متجهه لمبنى ( الأمم المتحدة) لتسليم (المندوب السامى لحقوق المسؤول) مذكرة مندده بقرارات الشعب الأخيرة..

    المتظاهرات رفعن (لافتات الإحتجاج) الملونه وسرن فى خطوط متناسقة.. التظاهرة تعبق بمختلف (الروائح الباريسية).. (الحنن) المنقوشة مرسومة (بعناية).. الثياب (شيفون) و(توتال) أصليه.. الجزمة لون (شنطة اليد الجلدية Genuine Leather) وشنطة اليد لون (التايير) و(دهب الخليج) يزبن (الأيادى) الناعمة التى لم تذق (غسيل العده) يوما ً والتى تمسك بلافتات صغيرة كتب عليها:

    (عين الحسود فيها عود ).... (بس معقول نركب ركشات).. الـ (الله بيديهو منو البحميهو ) (لا تخفيض للسفريات )

    بينما كن يرددن بعض الهتافات:

    - مافى طلاق مافى طلاق... موتو موتكم يا عولاق!!

    - بى (بنوكنا) وبى (شــركاتنا) ما بنخاف من الجاتنا

    الهيئة العليا لأولاد وبنات المسؤولين

    فى تزامن ينم عن تخطيط محكم للفت أنظار (العالم) لهول المأساة التى تحدق بهم وبمصائرهم إنطلقت من أمام (شارع المشتل) وفى ذات الوقت الذى إنطلقت فيه نظاهرة (زوجات المسؤولين) تظاهرة أخرى نظمتها (الهيئة العليا لأولاد وبنات المسؤولين) مستخدمة فيها (العربات) التى جلس بداخلها (أولاد) و(بنات) المسؤولين من كافة الأعمار وبعضهم قد قام بإخرج (رأسه) من خلال (الزجاج) حاملاً بعض (اللافتات) وها هو (هيثم) و(لينا) يقومان بتنظيم المسيرة قبل إنطلاقها:

    -ياجماعه.. يا جماعة... ناس (الفستو) الصفراء يجو الصف القدام ده.. وبعدهم العربات (الأتوس) الحمراء.. يا جماعه أى زول سائق BM أو مارسيدس يكون بالجنبات... يا....

    -يا هيثم كلمتهم إنو (البارد والسندوتشات) فى اللاندكروزر بتاع (شيرين) و(حماده)؟؟

    -يا وليد.. ياوليد كلم السواق يجينا بعد نهاية (المظاهرة) طوالى وما يتأخر!!

    وإنطلقت التظاهرة بعد أن تم (تنظيم ألوان صفوف العربات) وبدأ ترديد الهتافات عبر (مايكرفون) مثبت فى عربه (لاندكروزر 2008 ) بيضاء (مظللة) وتعالت الهتافات:

    -بيرقر بيرقر ماكنتوش... ليه عاوزننا ناكل بوش

    ثم فى (نبرة) أكثر جدية وتشنجاً:

    -شعب جبان عايز كشه.. ليه عاوزنا نركب ركشة

    لم تمر دقائق حتى توقف (الركب) لتتم إذاعة (رسالة عبر الموبايل) من (أولاد المسؤولين) الذين يدرسون بالجامعات (البريطانية):

    -إخواننا أبناء المسؤولين (بالداخل) نحيي فيكم روح الصمود.. ونرجو منكم التصدى بكل قوة وحزم لهذه القرارات (الجائرة).. إخواننا.. سيروا وعين (الله) ترعاكم.. وما تشتغلوا بالشعب (المسكين) ده - دى قرارات (فشنك) ساكت!!!

    وما أن إنتهى (مذيع التظاهرة) من (إذاعة المحادثة) على (المتظاهرين) حتى دوى (تصفيق حاد) وهتاف متقطع حفزه لقراءة (البرقية) التالية:

    -وهذه برقية من إخواننا أبناء (المسؤولين) الذين يدرسون بالجامعات (الإسكندنافية) تقول:

    ولا يهمكم دى حساده ساكت.. قف.. لو حصلت ليكم أى حاجه تعالوا لينا هنا.. قف.. الـ (الله بيديهو منو البحميهو؟؟)

    تلاقت المظاهرتان (أبناء المسؤولين وأمهاتهم) عند تقاطع (سانت جيمس) وإزدادت حده الهتافات:

    - يا شعب يا جبان.. إنت حاسد وللا (بغران)

    -بيرقر بيرقر ماكـــنتوش.. ما بتجبرنا ناكل البوش

    بينما كانت (شرطة الشعب) تراقب (المظاهرتبن) فى حذر... إتجهت المظاهرتان نحو مكاتب ( الأمم المتحدة) بشارع الجامعة لمقابلة (المندوب السامى لحقوق المسؤول) بعد أن قامت (زوجات المسؤولين) بالركوب مع أبنائهن فى (العربات) وهن يمسكن بزجاجات (المياه المعدنية البارده) ويصلحن من مكياجهن الذى أفسدته (حرارة الشمس).

    عند وصول (المظاهرتين) لمكتب المندوب السامى تفاجأ الجميع بوجود (تظاهرة) صغيرة (غاضبة) يقودها عدد من الأشخاص ذوى (الملابس المزركشة الغريبه) والعمائم (الملونه).. أحد المتظاهرين كان يمسك بثعبان ضخم من فصيلة (الأصلة) يلفه حول عنقه بينما آخر يقوم بإبتلاع (سلسلة من الأمواس) وعدد آخر يقوم بإخراج بالونات (لهب) من فمه بينما إنهمكت مجموعة أخرى منهم بالمشى على (النار) وهم جميعا يحملون (لافتات إحتجاج ) غاضبة.

    إتجهت زوجة أحد المسؤولين (قائدة التظاهرة) غاضبة نحو أحدهم:

    -شنو يعنى؟؟ ما تشيلو (دبايبكم) وحاجاتكم دى من هنا.. يعنى عاوزين تبوظوا لينا (مظاهراتنا) دى؟؟

    -ما تبوظ كان باظت.. إنتو (رجالكم) ديل ما بوظو (سمعتنا) وفضحونا (فضيحة).. هسع ( أكبر حاوى) معانا هنا من الشايفاهم ديل بيقدر يبنى ليهو (عمارتين) بى عشرين (مليار) من ماهيتو؟؟؟.

    الفاتح يوسف جبرا
                  

03-28-2007, 08:29 PM

حمور زيادة
<aحمور زيادة
تاريخ التسجيل: 03-28-2007
مجموع المشاركات: 12116

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    استاذنا الرائع الفاتح جبره
    لي الفخر ان تكون اول مشاركاتي في الموقع الاشادة بقلمك المميز و سيناريوهاتك المبدعة

    لكن ..
    عظمة سيناريوهاتك تجعلني اتسائل ..
    كان ظني دوما ان الطغاه شديدو الحساسية للفنون و يدركون خطرها قبل غيرهم .. و في ذهني دوما مثال هتلر و فيلم المدمرة بوشكين .. لكن سيناريوهاتك حيرتني .. ليه خالنك الجماعة ديل حايم تكتب على كيفك و كيف الشعب ؟
    الخيارات المنطقيه ثلاثة :
    1/ انو فاكينك مخصوص للتنفيس كما لمت نفسك ( و حاشاك )
    2/ انهم ما طغاة فلا يصح عليهم المثل ( و حاشاهم )
    3/ انهم اغبى من ان يفهمو خطورة ما تكتب
    دي خيارات منطقية لا اختار منها واحده و اليختار يتحمل المسؤولية .. انا في السودان و ما عندي ظهر
    مع تحياتي
                  

03-28-2007, 09:32 PM

Hussein Mallasi
<aHussein Mallasi
تاريخ التسجيل: 09-28-2003
مجموع المشاركات: 26230

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: حمور زيادة)

    Quote: التحية لك وأنت تداوي جراح المغلوبين بهذه السخرية اللازعة

    لا حول و لا قوة إلا بالله .. حتى انت يا عاطف عبد الله!!
                  

03-28-2007, 11:56 PM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: Hussein Mallasi)

    أولا التحية للجميع ... ويا ريت تشاركونا الدردشة لأني ورطت روحي في موضوع "الانتيرفيو" ده وانا مااا قدرها ..

    يا أستاذنا ..

    طبعا أنا بالجد هرشت من موضوع System Analysis and design ده ... مصادر معلوماتي طلعت (مخستكة) لأقصى درجة لكن كده يادووووب وقع لي !!!

    عندي سؤالين :

    اولا ... كنت وين من زمااان ؟؟؟

    ثانيا ... يعني - معقولة - بدر الدين ده ما ولدك يا أستاذنا .. طيب جبتو من وين؟؟؟

    Quote: كسرة ...بمناسبة 50% من مبيعات الجريدة دي ... لازم نعرف عشان نتصرف ليك يا أستاذنا ... انت ولا عثمان ميرغني صكو أكبر ... والله نحكم أمين حسن عمر؟؟؟؟

    وصلك الكارت الرسلتو ليك ؟؟؟
                  

03-29-2007, 02:05 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: عندي سؤالين :

    اولا ... كنت وين من زمااان ؟؟؟

    ثانيا ... يعني - معقولة - بدر الدين ده ما ولدك يا أستاذنا .. طيب جبتو من وين؟؟؟


    عزيزى كبروس هاك الإجابات :

    ج1 : منت بكتب فى صحيفى (الخرطوم) 1996-1999 فى صفحة إسمها (مساحات حرة) أيام كانت
    بتصدر فى القاهرة
    ج2 : بدرالدين أنا ببقى ليهو (عمو) ولأنو السرد القصصى المباشرة فيهو أحسن من
    (اللولوة) قمت عملتو (ولدى)!!
    (ج3 والله يكافينا شرو) : الكرت ما وصل يا كبروس إنتو مرسلو بى شنو؟

    كسرة:
    يا أخوان البنات (البوست) ده ما حقى .. حقى (الإجابه) والشنو ما بعرف داك !! عشان كده بإستأذن منك - أخى كبروس - واشكر الأحباء المتداخلين :
    1- منى خوجلى - (مشتاقين)
    2- حيدر ميرغنى
    3- السمؤل
    4- د. سيد زكريا- (نحن دائما تحت الخدمة)
    5- وليد - شكرا ليك كتير
    6- الرائع معاذ - وين يا زول يا مدهش؟
    7- Kalam Sakit - ألف شكر
    8- عاطف عبدالله - (سيبك من ملاسى ده)
    9- وجدى - (أكيد ح نتقابل)
    10- ملاسى - (وين إنت يا راجل؟)
    11- حمور زيادة (الإجابه هى نمرة خمسة)
                  

03-29-2007, 02:41 PM

Moneim Elhoweris
<aMoneim Elhoweris
تاريخ التسجيل: 06-29-2006
مجموع المشاركات: 429

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: الفاتح يوسف جبرا)


    ياالفاتح وكبروس اسف تاخرت فى الدخول هنا.
    يعلم الله كيف فى غربتى دى بساسق كل جمعة وفى الشغل المردوم بين السودانى وسودانيز اون لاين علشان اقرا السيناريو الاسبوعى.
    الفاتح الله يخليك لينا وواصل.
    وياريت يا جماعة تنزلوا لينا السيناريوهات قبل ما نبقى مشجعين للفاتح "يعنى اى شئ قبل يوليو 2006"
                  

03-29-2007, 03:18 PM

ناذر محمد الخليفة
<aناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    الأخ كبروس ..

    Quote: من رابع المستحيلات في الخرطوم هذه الأيام .. الحصول على عدد "السوداني" يوم الجمعة بعد الساعة العاشرة صباحا...


    صدقت والله وحتى ناس المكتبات عارفين السبب ..
    والله لو ما مرضة قراية الجرايد يوم الجمعة الواحد كان إكتفى بي سيناريوهات الفاتح البينشرا في المنبر بالتزامن مع نشرعا في الصحيفة ..

    شكرا ليك كتير يا جبرا ...




    سؤال :

    لييه ما جربت تكتب نصوص درامية تساعد في تقدم الدراما الفي البلد ؟!!
                  

03-29-2007, 04:59 PM

أحمد طه
<aأحمد طه
تاريخ التسجيل: 03-31-2004
مجموع المشاركات: 580

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    أعزائي الفاتح ..وعاطف
    يسعدني انكم الاثنين اصحابي .. والاتنين من طاقم العدد الاسبوعي الذي يقدمه للقراء مجموغة اصدقاء .. مابينهم اكثر من زمالة الاقلام.. ولكنها القلوب الشواهد
                  

03-29-2007, 05:26 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: سؤال :

    لييه ما جربت تكتب نصوص درامية تساعد في تقدم الدراما الفي البلد ؟!!



    ناذر إذيك وما تقول أنا (صحن المراره) ناسيهو ....... أما سؤالك عن مسألة عدم (كتابة النصوص الدرامية) معقول يا ناذر أكتب ليا نص درامى تكون فيهو (هند) داخل المطبخ مع (هنادى) والإتنين لابسين تياب وأكمام طويلة ورابطين راســــهم ديل قاعدين (يطبخو ولا فى مؤتمر صحفى) !! وتلاقى (هند وهنادى) نفسهم - فى الواقع - واقفات فى (محطة المواصلات) - خليك من بيت العرس- لابسات (إسكيرت وبلوزة) ده كلام واقعيا يا ناذر ما بحصل وعشان (الفن) هو (إنعكـاس) للواقع لذلك فأنا لا أود أن أشارك فى إى عمليات تزييف (شوزوفرينية)!!!

    كسرة : لاحظ إنى إتكلمت عن (الفن) فقط وما إتكلمت عن أى (حـاجه تانية) عشــان ما يقوم
    واحديفهمنا غلط ويقوم (يضحى) بينا !!!

    كسرة تانية :

    عبدالمنعم الحويرص ....... الله يخليك ويديك العافية وإن شاء الله أختار ليكا بعض
    الســيناريوهات الكتبتها قبل يوليو 2006 (ارسل لى عنوان بريدك الإليكترونى) مع
    تحياتى


    (عدل بواسطة الفاتح يوسف جبرا on 03-29-2007, 05:56 PM)

                  

03-29-2007, 06:12 PM

hamid brgo

تاريخ التسجيل: 05-21-2006
مجموع المشاركات: 4981

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: الفاتح يوسف جبرا)

    مع انو الواحد عيان شوية - الا قلت احسن ما تفوتني القومة للاستاذ جبرة
    انت يا استاذ الكلام السمح دا قاعد تجيبو من وين
                  

03-29-2007, 05:36 PM

ناذر محمد الخليفة
<aناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    سلامات يا الفاتح ..

    Quote: ناذر إذيك وما تقول أنا (صحن المراره) ناسيهو ....... أما سؤالك عن مسألة عدم (كتابة النصوص الدرامية) معقول يا ناذر أكتب ليا نص درامى تكون فيهو (نعيمه) داخل المطبخ مع (إحسان) والإتنين لابسين تياب وأكمام طويلة ورابطين راســــهم ديل قاعدين (يطبخو ولا فى مؤتمر صحفى) !! ده كلام واقعيا ما بحصل وعشان (الفن) هو (إنعكـاس) للواقع لذلك فأنا لا أود أن أشارك فى إى عمليات تزييف !!!


    والله أفحمتني وما قلت إلا الحق !!
    بس برضو أكتب والباقي خليهو للمخرجين هم وزمتم ..

    Quote: كسرة : لاحظ إنى إتكلمت عن (الفن) فقط وما إتكلمت عن أى (حـاجه تانية) عشــان ما يقوم
    واحد(يضحى) بينا !!!


    :
                  

03-29-2007, 09:17 PM

Abdelmuhsin Said
<aAbdelmuhsin Said
تاريخ التسجيل: 10-10-2006
مجموع المشاركات: 2678

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: يا سلام عليك يا الفاتح يوسف جبرا.
                  

03-30-2007, 07:07 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    (ســـيناريوهات) : حكـــاية أيوب

    العدد الأسبوعى - صحيفة السودانى
    الجمعة 30 مارس 2007م



    إستيقظ (أيوب) فى صباح ذلك اليوم وكعادته فقد أشعل سيجارة (الصباح) وإتجه صوب (الحمام) ثم بعد أن إنتهت (السيجارة) عرج على (حوض الغسيل) ليتسوك .. أمسك بفرشاة الأسنان وصب (كعادته) على رأسها بعض الماء ثم تناول صباع المعجون الذى وجده ملتصق (الجانبين) تماماً إلى حد (التقوس) مما يعنى أن أحدهم قد قام بعصره لإستخراج آخر ما تبقى منه لذلك لم تنجح محاولات (أيوب) بضغطه ثم لى (عنقه) ثم (لفه) من أجل إستخراج أى جزء منه مما جعله يتناول (مكنة الحلاقه) الموضوعة أمامه على رف الحوض ليستخرج منها (الموس) ويقوم كجراح ماهر بشق (بطن) صباع المعجون طولياً ثم فتحه مستخدماً (الفرشاة) فى (خرت) بواقى المعجون (الحمراء) التى كانت تلتصق فى (أمان) على جدران الصباع مستعيناً فى ذلك بصب بعض الماء عليها ... ثم أدخل الفرشاة فى فمه وهو ينظر للمرآة .
    إنتهى (أيوب) من (السواك) الذى لم يستغرق وقتاً طويلاً بسبب عدم تشبع (الفرشاة) بالمعجون فقام بوضعها جانبا وإعادتها للرف بعد أن قام بغسل فمه ثم مد يده لتناول (كروسة الأمواس) الزرقاء فى محاولة لحلاقه ذقنه فوجدها فارغة وقد إبتلت بالماء مما جعله يتندم بعض الشئ على أستخدام (الموس) التى كانت (بماكينة الحلاقه) وإتلافها فى قطع (صباع المعجون) فربما كانت تقوم بالمهمة ..
    (أيوب) يكره أن تبرز شعيرات (ذقنه) البيضاء لأسباب لا داعى لذكرها الآن لذا فقد قام بإلتقاط (الموس) التى إستخدمها فى (فتح) صباع المعجون .. قام بغسلها ثم بدأ فى حلاقه ذقنه التى بدأ بعضها ناعماً وبعضها غير ذلك .
    - يا بوى عملت ليا شنو فى موضوع الرسوم دى؟؟ ناس (الجامعه) قالو ليا بنديك أسبوع كان
    ما جبتيهم ما ح تدخلى الإمتحان
    - يا بوى الليلة برضو ما نمشى المدرسة عشان (حق مواصلات) مافى؟
    قبل أن يرد (أيوب) رده اليومى (الله كريم ح تفرج) كانت زوجته (صفية) قد بدأت مداخلتها) اليومية :
    - أريتا حالت السواد والرماد .. البيت ليهو إسبوعين نار ما إتولعت فيهو و(جمرتو)
    قاطعه؟ لا سكر لا لبن لا شاى لا ..
    - عليكى الله يا (صفية) المسلسل بتاع (النقه) الكلو يوم ده خلينا منو .. ما تعكسيها
    علينا أصلها معكسة
    - ما معكسا براك أهو راجل (بثينة) جارتنا القريبه دى باع ليهو فرد (كليه) لى (ناس
    شركه بيع الأعضاء) العملوها (الجماعة ديل) زنقاتو كلها إتفكت وكمان إشترى ليهو موتر
    (فيسبا)
    - أنا قلت ليكى ما رافض الفكرة لكن نحنا (كلاوينا) دى تانى (نص إستوا) ما تنفع .. و
    (ناس الشركة) ديل ح يختوها لينا فى (الواطه) – مواصلاً- دى كلاوى إشتغلت ليها كم
    وخمسين سنه ماشه تنفع؟ وكمان (تتصدر بره)؟
    - إن شاء الله إشتغلت ليها ميت سنه .. كل شئ بى تمنو إنت بس أمشى شوفهم بيشتروها بى
    كم؟ - مستدركه – وإلا أقول ليكا أمشى هسع لى (عوض) راجل (بثينة) ده إستفسر منو

    تجربة عوض :
    بعد تردد شديد خرج أيوب من منزله وإتجه صوب منزل جاره عوض والذى وجده (بالسروال والعراقى) أمام منزله يقوم بتلميع (الموتر) بعد أن قام بغسله :
    - كيفك يا (عوض)
    - مرحب (أيوب) إتفضل لى جوه .. وإلا دقيقه أجيب ليك كرسى
    - لا.. لا.. شكرا بس الحقيقه أن جايي استفسر منك فى موضوع وكده
    - إن شاء الله خير
    - لا .. خير ... أصلو فى الحقيقه .. يعنى .. فى الواقع .. اصلو (فى هذه اللحظة
    بالذات فكر أيوب فى مغبه سؤاله لعوض وماذا سوف يحدث لو أن المسأله كانت شمارات
    نسوان ساكت وإنو ما باع كليتو )
    - مالك كده متردد عاوز تستفسر من شنو يا أيوب؟
    - طبعاً يا عوض يا خوى براك شايف الحاله بقت صعبة والناس كلها بقت مفلسه وقعدت على
    الحديده وزول ساكت يدينك والإ تشيل منو قروش مافى والناس باعت كلو حاجه والأكل
    والشراب بقى فى تلتله و الأولاد والمدارس و ..
    - والله الحاله بفت صعبه يا أيوب ياخوى أنا هسع القدامك ده لو ما بعت (كليتى اليمين)
    دى – يشير بيده نحو مكانها الفارغ!!-كان الأولاد ما مشو المدرسة ولا أكلنا حتى !!
    شعر (أيوب بإرتياح بالغ إذ أن عوض قد أزاح عنه الحرج ومشقه (فتح الموضوع) وأدخله
    فيه مباشرة :
    - أها ده الأنا جاييك ليهو ذاتو .. البت طردوها من الجامعة عاوزين منها قسط ما دفعتو
    والشفع ما مشو المدرسة (حق فطور ما عندهم) والدنيا إتسدت فى وشى وما عندى طريقه
    غير إنى أبيع ليا (كليه) وإلا إن شاء الله أى حاجه تانى !!
    - شوف يا أيوب الناس ديل ممكن يشترو منك كاش وممكن يشترو منك بالأقساط ويدوك مقدم
    - ما فاهم
    - أفهمك .. لو إشترو منك (كاش) ح يختو ليكا (كليتك) دى فى (الواطه) وما ح يدوك فيها
    سعر كويس
    - كيف ؟؟
    - طيب أوريك .. قول هسع مثلا (كليتك) دى بعد الفحص طلعت سليمه وما فيها حاجه ح يقومو
    يقولو ليك يا نديك فيها إتنين مليون جنيه كاش أو تلاته مليون أقساط يدفعو ليكا
    مقدما خمسميت ألف والمليون ونص الباقية يدوك ليهو على أقساط 48 شهر .. يعنى على
    أربعه سنين !!
    - فى إندهاش ساخر - وهم تانى عاوزين يقعدو أربعه سنين تااانى؟
    - أنا غايتو بعت ليهم (كاش) عشان المسألة ما مضمونه تجى ناطه ليهم حاجه من (لاهاى)
    وإلا من (جاى) وإلا من (جاى) والمسأله (تجوط) و(كليتنا) تروح شمار فى مرقه !!
    - أها والزول هسع يمشى وين لو عاوز يبيع ؟
    - إنت عاوز تبيع لى شركة ولا تبيع (للبنك) ؟؟
    - والفرق شنو؟
    - أول حاجه عندك شركة (تستأصلون) ودى (بتشترى وبتصدر ) وعندك شركة (تستزرعون) ودى
    (بتبيع للناس المرتاحين) وبتعمل ليهم (زراعه) للإسبيرات أقصد الأعضاء بتاعتم
    البتبوظ
    - طيب والبنك؟
    - نا س (البنك ) ديل بشترو منك (دفع مقدم)
    - كيف يعنى ؟؟ جمرة
    - جمرة شنو؟ ديل بتفقو معاك على مبلغ معين وبيقومو يدوك منو 30% والباقى بيدوهو
    للورثه؟
    - ورثت منو؟
    - ما ورثتك إنت لمن تموت !!
    - لا .. لا.. كان كده أحسن ليا ناس (تستأصلون) كاش !!!!

    أيوب فى تستأصلون :
    بعد أن عاد أيوب إلى منزله شرح لزوجته (بثينة) ما دار من حوار بينه وبين جارهم (عوض) ثم قام بإرتداء (جلابيته) ووضع على رأسه (طاقيته الوحيده) وتوكل على الحى الذى لا يموت قاصدا (تستأصلون) .
    الشركه تقع فى مساحة كبيرة أحتلت (عربات) العاملين الفارهه جزء غير يسير منها بينما إحتل الجزء المتبقى مكاتب الإدارة ومعامل للفحص وستوصف نقل الأعضاء إضافة إلى (مسجد) طلى باللون الأخضر . المواطنون يتراصون فى صفوف طويله متعرجه أمام عدد من الشبابيك التى تعلوها لوحات أنيقه كتب عليها بالترتيب :
    - (قسم الباطنية)
    - (الأنف والأذن والحنجرة)
    - (الأورده والشرايين)
    - (العيون)
    بينما هنالك (شباك) يبعد قليلا وقفت أمامه بعض (النسوة) كتب عليه (قسم النساء والتوليد) ً!!

    وقف (أيوب) حائراً فى أى الصفوف يقف لكن سرعان ما تبددت حيرته عندما خاطبه الشخص الذى كان يقف فى نهاية (الصف) القريب منه :
    - لو عاوز (الكلى) تعال شباك الباطنية ده !!
    ما أن وقف (ايوب) خلف ذلك الشخص حتى بادره مواصلا حديثه :
    - تعرف يا أستاذ عشان (الكلى) دى (إستيريو) يعنى يمين وشمال الناس كلها عاوزة تبيع
    (سماعة) أقصد واحده و(تشتغل) بى واحده .. عشان كده الصف ده طويل !!
    - وطيب صف (الأنف والأذن والحنجرة) ده البيقيف فيهو منو ؟؟ - مواصلا- يعنى أقصد
    البيقيف فيهو بيكون عاوز يبيع شنو؟
    - كيف ياخى ديل ممكن يشترو منك (الأذن الوسطى) أو (الطبله) أو الأذن الخارجية ذاتا
    وبعدين ما تنسى ؟
    - شنو؟
    - (الحبال الصوتية) ذاتا بيشتروها (بالمتر) والعجب لو الزول صوتو (فنان) يدفعو ليهو
    (كاش داون) طوالى
    - والباقين ديل طيب ؟
    - طيب أوريك .. ناس (العيون) ديل للناس العاوزين يبيعو (عدسه) ... شبكية ... عين
    (كومبليت) ... وناس (الأورده والشرايين) ديل للناس العاوزين يبيعو ليهم (بوصة)
    بوصتين .. وإلا (قدم) ..بتاع (وريد) وإلا شريان !!
    - والزول ال ح يشترى (شرايين) ده يعمل بيها شنو؟؟
    - إنت الظاهر ما عندك فكرة ناس القلب والجلطات ديل كلهم قاعدين يعملو عمليات
    (بايباص) – يقصد bypassing- ويشيلو ليهم (شريان) من (الكراع) بدل المقفول فى
    القلب – مواصلاً- أعاالزول بدل ما يشيلو من (كراعو) يقوم (يشترى) من (السوق) !!
    - طيب ده كلو عرفناهو (النسوان) ديل يبيعو شنو؟؟
    - (فى إستنكار) كيفن يبيعو شنو ؟؟ يا خى ديل عندهم أغلى ( إسبيرات) .. أقيف أوريك - يخرج من جيبه ورقة ثم يفتحها مخاطباً أيوب :
    - شوف دى القائمه بتاعت (أسعار الأعضاء) شوف هنا - وهو يمرر بأصبعه على القائمه ثم
    يقف تحت عنوان (أسعار الأعضاء النسوية) - أها شوف سعر (المبيض) الشغال الواحد كم
    ؟؟ ده سعرو أغلى من (إتنين كلاوى) !!!
    - طيب ليه ما عاملين ليهم قسم ذى ده (للرجال) يعنى الزول لو عاوز يبيع ليهو (بروستات)
    وإلا حاجات تانى؟
    - القال ليكا منو هم ما عاملنو؟؟ عاملنو لكن البيع فيهو بالدس .. يعنى تحت تحت
    - (وهو يقوم بعملية مسح بصرى لللافتات) : طيب ما شايف ليا قسم للمخ والأعصاب ؟
    - (يضحك عاليا ثم بعد أن يهدأ) : إنت قايل (الجماعة) ديل عويرين ؟؟ هم ما عارفين
    (أعصاب) المواطنين دى كلها (بايظه) و(أمخاخهم) كلها سلوكا ضاربه والواحد فيهم بقى
    يا طالع (صينية) يا مرشح (للطلوع) !!!


    أيوب قدام الشباك :
    بعد زمن ليس بالقصير قضاه (أيوب) وهو يدردش مع (الرجل) الذى كان يقف أمامه وجد أيوب نفسه أمام الشباك وصوت يسأله :
    - أنت يا أستاذ عاوز تبيع شنو؟
    - إنتو عندكم شنو ؟؟
    - كبده .. كلاوى .. كمونيه أقصد (مرارة) .. مصارين .. شريفه أقصد (رهيفه) طيب أها
    أسعاركم كيف؟
    - طيب أها أسعاركم كيف؟؟
    - (يمد يده إلى ورقة أمامه ويعطيها لأيوب قائلاً) : دى القائمه بتاعت الأسعار .-مواصلاً –
    الأسعار دى طبعاً بإفتراض إنو العضو العاوز تبيعو شغال (تش) يعنى ما فيهو أى
    (لكلكه) !!
    - (يمسك أيوب بالقائمة ويبدأ بالقراءة بصوت خافت كأنه يحدث نفسه : : كليه يمين ..
    كليه شمال .. (مصرا ن غليظ) بالبوصة .. مصران (أعور) المتر خمسميه .. كبده ..
    طوحال .. (ثم يرفع رأسه مخاطباً الموظف) :
    - ياخى أسعاركم دى مالا فى الواطه كده؟
    - (فى حدة) : والله يا أستاذ فى الواطه فى الما (واطه) دى أسعارنا وبين (البائع)
    والمشترى يفتح الله ويستر الله!
    - هى لكن طوااالى نحن (نبيع) وإنتو (تشترو) ؟؟
    - يا أستاذ الصف طويل ما تاخرنا ساكت قول لينا قررت تبيع شنو؟
    - طيب قول بقينا على الكلية (الشمال)
    - إنت عارف إنو (الكلية الشمال) سعرها (أرخص) من (اليمين) ؟؟
    - (فى إندهاش) : ليه مش كلهم (كلاوى)؟
    - آآى كلهم كلاوى لكن اليمين بتكون (مبروكة) !!
    - كان كده خلاص إنتو شيلو (المبروكه) وخلو لينا الفيها (الشيطان) دى !

    لازم نفحصك :
    خرج أيوب من (الصف) بعد أن قام بإستلام (فورم إستئصال كلية) من الموظف الذى أشار عليه بالذهاب إلى معمل الفحص حيث وجد صفين أحدهما أحدهما للرجال حيث وقف والآخر (للنساء) حيث كانت إحداهن وتبدو عليها علامات (الدعة) بعض الشئ تخاطب التى تقف خلفها فى الصف :
    - والله يا بت أمى ما طالبانى حليفة والده ليا سبعة من بنات لى أولاد .. يعنى الحمدلله
    كملت (الولاده) أها قلت شن لزوم (المبايض) تانى؟ عايزه بيهم شنو؟ ما أبيعهم
    (للجماعة) ديل وأجدد عفش البيت
    - والله أنا عرس ما معرساهو قعدت منتظرة ليا عريس لمن قربت (أقطع) أها قلت بجى
    (الخريف) و(المبايض) بتقيف أخير الواحدة تبيعهم الإتنين للجماعة ديل وتمسك ليها قرش
    قرشين حلوين بدل ما (يموتوا) ليها فى يدها – مواصلة- هم عليكى الله رجال (العرس)
    وينهم ؟؟
    - والله صدقتى يا ختى الرجال كلهم قعدو على (الحديده) وكان للجماعة المرطبين ناس
    (مثى) وثلاث و(رباع) ديل ما بعرسو الذينا ديل ... ديل بعرسو الوشهم وش (ممثلات)
    ودشهم (عربسات)
    - آآيا صدقتى والله ياختى هسع بقت (القروش والسماحه) فى حته .. و(الفقر والقباحه) فى
    حتة
    - يحتحتهم يا الله الا نام ولا أكل طعام أكان خلونا على (الحديده) !!

    بعد أن تابع (أيوب) ما كان يدور فى (صف السيدات) إنتبه لكون أنه على بعد أمتار
    قليلة من شباك (المعمل) فقام لا شعورياً بسؤال الشخص الذى كان يقف أمامه فى الصف :
    - هسع الناس ديل ح يفحصوا لينا شنو؟
    - (يلتفت إليه تماماً) : كيف يفحصو ليك شنو ؟؟ ديل ح يفحصوا ليكا أى حاجة – مواصلاً-
    ديل ما شداد و(لضاض) فى (البيع والشراء) قايلهم بيشتروا ليهم حاجه ساكت لو ما
    إتأكدو منها .. والله (يفلفلو) ليكا الزول جنس (فلفلة)
    - كيفن يعنى؟
    - كيفن شنو والله قالو جايبين ليهم أجهزة فحص فى مستشفى (سوبا التعليمى) مافى
    - طبعا طبعاً هنا بجيبوها لكن فى (المستشفيات) يجيبوها ليه؟؟
    - والله يا أستاذ قالو جابو ليهم جهاز هنا بالكمبيوتر بس قالو يدخلو ليكا الزول فيهو
    بى جاى نتائج الفحوصات تجى مكتوبه بى جاى – مواصلاً- والله شدت الجهاز ده ما حديث
    قالو ليكا بيفحص البول والفسحة والدم وهم جوه جسم الزول !!
    - أها هسع كشف (الجماعة) ديل بى قروش؟؟
    - قروش شنو؟؟ إنت قايلهم مغفلين ؟؟ لو عملوهو بى قروش مع (الشعب) المفلس ده ما حقهم
    راح ومافى زول ح يجيهم .. هم خلو ليهم قروش فحص لى زول ما (نفضوا) جيوب الناس
    وخلوهم على (الحديدة)

    لم يستغرق فحص ايوب سوى دقائق معدوده فقد طلب منه الإستلقاء على جهاز الفحص الذى
    قام بسحبه إلى داخله وهو مستلق عليه ثم أخرجه من الناحية الأخرى بينما كانت بيانات
    (نتيجة الفحص) تطبع على الطابعة الملحقة بالجهاز .بعد أن إستلم (أيوب) نتيجة
    الفحص كان همه كله فى معرفة (ما مدى سلامة كليته) لذا فقد قام بطرح السؤال على
    (فنى المعمل) والذى رد عليه :
    - لمن تمشى لى لجنة التقييم هم ح يوروك الحاصل !!
    - ولجنة التقييم دى وين؟
    - شفت المكاتب (الصفراء) ديك ؟ القدام (المسجد) الأخضر داك ؟ .. بس داك محل لجنة
    التقييم

    ماذا تساوى كلية (أيوب) ؟
    دخل (أيوب) بعد طول إنتظار إلى (مكتب لجنة التقييم) الذى كان يضم لجنة متخصصة لتقييم (الأعضاء الباطنية)
    تسلم منه أحدهم (يبدو أنه رئيس اللجنة) نتيجة الفحص .. نظر إليها مليئاً ثم خاطبه قائلا ً :
    - شوف يا أستاذ إنت طبعا عارف (الكلية اليمين) السليمه سعرها كام .. أها هسع كليتك
    دى فيها شوية (إلتهابات) و(الغشاء الخارجى) بتاعا فيهو كم (فتق) كدا .. طيب كدى
    نشوف ح نخصم منك كم؟؟ - ينظر إلى ورقه أمامه ويواصل – ح نخصم منك كم .. ح نخصم
    منك كم ... طيب إالتهابات 10% وكمان (غشاء فيهو فتق) 13% كدا يكون المجموووع ..
    طيب صفر وتلاته يساوى .تلاته وواحد وواحد يساوا إتنين – يلتفت لأيوب) :
    - أنحنا يا أستاذ ح نخصم من السعر 23%
    - أخصموا العاوزين تخصموهو بس (قبضونا الباقى) !!
    - (بعد أن يقوم بالكتابة على فورم التقييم الذى أمامه) : طيب يا أستاذ بعد كده إنت
    تشيل الورق ده وتمشى بيهو (المكتب القانونى) الفوقنا طوالى ده عشان يكملو ليكا
    باقى الإجراءآت

    عقد بيع وإستئصال :
    وقف (أيوب) أمام (الأستاذ) الذى كان منهمكا فى إعداد عقد بيع (مترين مصران عليظ) لأحد المواطنين وبعد أن إنتهى وسلمه العقد رفع راسه ليتسلم ورق (أيوب) وبعد أن (فرفر) الورق قال مخاطباً (ايوب) :
    - الطلب بتاعك الأولانى ده ناقص ؟
    - (فى خوف وإستغراب ) : ناقص شنو؟
    - ما ختيت فيهو (دمغة جريح)؟
    - يا جماعة جريح منو؟؟ أنا ذاتى هسع ما (مشروع جريح ) وكمان ممكن أكون مشروع (شهيد) ؟
    - بالله ما تأخرنا يا أستاذ أمشى خت لينا دمغة فى الطلب بتاعك دا وتعال نكمل ليكا
    الإجراءآت
    لما كان أيوب (أباطو والنجم) ولا يحمل فى جيبه سوى (ألف جنيه المواصلات) فقد قام خجلاً بمحاوله لشرح الأمر (للأستاذ) :
    - والله ... فى الحقيقة ... أصلو يا أستاذ .. يعنى .. فى الحقيقه
    - عاوز تقول ما معاك مش كده؟؟
    - أيوه والله يا أستاذ الحاله صعبه ؟
    - (وهو يكتب على الورقه) : خلاص ح أكتب ليك يخصموها منك بعدين !!
    - أخصمو الإنتو عاوزنو بس (قبضونا الباقى) !!
    - طيب بطاقتك وين؟
    - (يخرجها من جيبه) : أهو دى ؟
    - (ينظر إليها متفحصاً) : دى صلاحيتها منتهية وما مجدده ؟
    - لكن أجددا كيف ؟؟ التجديد ده عاوز ليهو (عشرات الألوف) نجيبا من وين؟؟ هو أحنا
    قادرين ناكل ؟؟
    - طيب خلاص أنا ح (أفوتا) ليك يلا (وقع) لينا فى العقد ده (يعطيه العقد فيقوم أيوب
    بالتوقيع عليه وإعادته له حيث يقوم (الأستاذ) بتسليمه نسخة منه .. يبدأ (أيوب) فى
    قراءة (نصوص) عقد (البيع والإستئصال) بصوت خافت .. أنا المواطن (أيوب صابر أيوب)
    بمحض إرادتى وكامل قواى العقلية قد (تنازلت) لشركة (تستأصلون لشراء الأعضاء
    البشرية) عن (كليتى اليمنى) .... ثم قبل أن يكمل قراءة نصوص العقد يلف الأوراق
    جميعها فى يده ويخاطب (الأستاذ) :
    - طيب يا أستاذ بعد ده أمشى وين ؟؟
    - بعد ده يا أستاذ (أيوب) دربك مرق وبقيت زول (إستئصال) ساااكت
    - (فى تلهف) : يعنى أمشى وين؟
    - تمشى تسجل إسمك فى (مكتب تحديد مواعيد العمليات) هناك فى المكتب البفتح على
    (المسجد داك)
    - طيب ومتين ح (نقبض) ؟
    - بعد العملية طوالى ... وبعدين ما تخاف (حقك يروح)... نحنا ناس بنخاف الله وما
    بناكل (قروش زول)أهو مكتوب فى العقد الشايلو ده إنو حتى لو (العملية) ما نجحت
    وإنت (رحت فيها) نحنا ملزمين ندى (القروش) للورثه بتاعتك !!

    ح نبيع :
    نسبة للعدد الهائل من (العمليات) التى يجريها مستوصف (تستأصلون) حتى بعد إستعانته بفريق أطباء من (ماليزيا)و(هاواى) و(جزر القمر) فقد تم تحديد العملية لأيوب بعد إسبوعين من تاريخه على الرغم من (إستجداء) أيوب للموظف الذى كان يقوم بتحديد تواريخ العمليات بأن (يحجز) له فى أقرب فرصة ممكنة حتى يتمكن من سداد (رسوم) إبنته الجامعية لتتمكن من الجلوس للإمتحانات .
    - أها عملت شنو قاعد هناك لمن الواطا عصرت ؟؟
    - خلاص عملنا العقد؟
    - عقد شنو هى (خطة إسكانية) ؟
    - والله إنتى ما عارفا حاجه ساكت .. فحوصات .. وعقودات .. وطلبات .. وصفوف ما تديك
    الدرب
    - صفوف شنو كمان ؟ الناس كتار وإلا شنو؟
    - ما كتار كيفن؟؟ إنتى ما شايفا (الشوارع) دى بقت فاضيه كيف !!
    - أها والعملية أقصد (القروش) بيسلموك ليها متين؟
    - والله قالو بعد أسبوعين
    - (فى إستنكار) : إسبوعين شنو يا راجل ؟؟ إنت ما عارف إمتحانات بتك بعد أسبوع واحد
    وقالو ليها كان ما جبتى قروش (القسط) ح نحرمك من (الإمتحان) ؟
    - والله شرحت ليهم لكن ما قدرو يعملو ليا حاجه عشان الناس المنتظرين كتار
    - خلاص شيل ورقك وعقوداتك دى أعمل منها صورة وأمشى أديهم ناس الجامعة ووريهم إنك
    منتظر تستلم قروش (الكلية اليمين) !!
    - ما ح يوافقو .. مش (جامعات الزمن ده) والله لو قلت ليهم (قروش القلب) ذاتو ما يحنو

    أيوب يستأصل :
    فى صالة الإنتظار التى تفضى إلى حجرة العمليات بمركز (تستأصلون) الطبى جلس (أيوب) منتظرا دوره لإجراء العملية .. الزمن يمر بطيئاً على الرغم من وجود (عشرين) غرفة عمليات تعمل فى آن واحد
    - إنت عاوز (تستأصل) شنو؟
    قالها متسائلاً الشخص الذى يرتدى ملابس (بالية متسخة) وتبدو عليه أعراض (الإدمان) والذى يجلس على يمين (أيوب) :
    - أنا عاوز (أستأصل) الكلية اليمين ... (فى عفوية) : وإنت شنو؟؟
    - والله أنا كنت عاوز أعمل ذيك كده وأديهم (كلية) لكن بعد ما فحصو والنتيجه طلعت قالو
    ليا (كلاويك) دى ما نافعه عشان كنت (بتشرب) – مواصلا – أها قلت (أبيع) ليهم حته من (
    المعده) أصلو أكل ذاتو عشان تهضمو مافى وقاعده ساكت
    فى هذه الأثناء كان (الرجل) ذو الملامح (المتجهمه) الذى يقوم بقراءة أسماء الداخلين إلى العمليات قد بدأ بقراءة أسماء (الدفعة) الجديده والتى كان (أيوب) فى طليعتها ..

    شمار فى مرقه :
    أفاق أيوب من البنج على صوت (موظف المكتب القانونى) وهو يقول له :
    - معليش يا أستاذ بس كان فى إجراء (قانونى) فات علينا
    - (فى صعوبة) : شنو؟
    - مفروض كان تجيب لينا (خلو طرف) من العوائد و الضرائب والزكاة والنفايات بإنو
    الناس ديل ما عاوزين منك أى قروش لأنو فى حالة (الدوله) عاوزة منك أى قروش ح نقوم
    نخصمها من (البيعه) ونوردها للدوله
    - (بصعوبه) : لكن حالتى دى ما بتسمح ليا
    - ما مشكلة عشان (راحتكم) الناس ديل (عملو) ليكم (مكاتب) هنا فى المجمع بتاع الشركه
    ده وأنا عشانك يا أستاذ ح أمشى أشيل ورقك وأمرروا عليهم وبعدين تلقاهو فى
    (الحسابات) لمن تمشى تصرف
    - بارك الله فيك يا أستاذ

    فى الحسابات :
    جلس أيوب أمام المحاسب الذى بدأ منشغلاً فى (العمليات الحسابية) التى يجريها على (أوراق أيوب) ثم رفع رأسه يخاطبه وهو يضع يده على الآله الحاسبة :
    - شوف يا أستاذ (الكلية السليمة) سعرها إتنين مليون قاموا خصموا منها (بدل تالف) 23
    % كده يكون فضل ليك مليون وتلتمية وأربعين ... طيب (ينظر إلى الورق) عليك متأخرات
    (عوايد) تمنوميه وأربعين كده يكون فضل ليكا خمسميت ألف لمن نطرح منها متأخرات
    (النفايات) خمسميه وعشرين ألف كده نكون عاوزين منك (عشرين ألف) ممكن تجيبا لينا فى
    أى وكت !!!

    عزيزى القارئ :
    إذا رأيت شخصا أشعث أغبر يعتلى (صينية كبرى برى) وهو يخاطب المارة مردداً بإستمرار
    - (تعالو شيلو دى كمان) ... (تعالو شيلو دى كمان)
    فأعلم إنه لا يقصد الدعوة لإزاحة تلك (الشاشة الإعلانية العملاقة) التى رفض المسئولون إزاحتها حماية لأرواح (الشعب الفضل) بل يقصد (كليته اليسرى) التى تبقت له ...
    إنه أيوب !!!!
                  

03-31-2007, 04:30 AM

عاطف عبدالله
<aعاطف عبدالله
تاريخ التسجيل: 08-19-2002
مجموع المشاركات: 2115

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: الفاتح يوسف جبرا)

    أستاذي الفاتح
    صدق العرب حين قالواأن شر البلية ما يضحك ..
    لا أدري .. أقرأ مقالاتك وبعد أن أضحك وأضحك.. أبكي وأبكي

    أخي أحمد طه
    لكم يسعدني التواجد في صحيفتكم الغراء (ولو بغير إنتظام) بجوار هذا الكاتب الرائع الأستاذ الفاتح يوسف
                  

03-31-2007, 11:28 AM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: عاطف عبدالله)


    أستاذنا

    عذرا على القطعة - جمعة ومولد وكده ...

    Quote: (ج3 والله يكافينا شرو)


    1.
    Quote: انت يا استاذ الكلام السمح دا قاعد تجيبو من وين
    كيف بتبدا معاك فكرة السيناريو وكيف (بتخمر) في راسك وكيف بتنفذها وهل عندك طقوس معينة ؟؟

    2.
    سؤال بيهمني شخصيا: شنو العلاقة بين (تحليل النظم) والكتابة ... وياتها فيهم بتمتعك أكتر .. وياتو واحدة بتعبترها هي الأصل؟؟؟

    3.
    بتقرا لمنو؟؟

    أستاذ الفاتح وكل المرور الكرام .. البوست بوستكم كلكم ... فساعدونا في الدردشة دي، خصوصا اني بسأل من منظور معجب صرف .. لكن معانا أساتذة ممكن يوجهوا الحوار لمناطق مختلفة وأكثر عمقا .. فتفضلوا
                  

03-31-2007, 08:32 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: 1. انت يا استاذ الكلام السمح دا قاعد تجيبو من وين

    2. كيف بتبدا معاك فكرة السيناريو وكيف (بتخمر) في راسك وكيف بتنفذها وهل عندك طقوس
    معينة ؟؟

    3. سؤال بيهمني شخصيا: شنو العلاقة بين (تحليل النظم) والكتابة ... وياتها فيهم بتمتعك أكتر .. وياتو واحدة بتعبترها هي الأصل؟؟؟

    4. بتقرا لمنو؟؟




    طيب يا كبروس الإجابات كالتالى :

    ج1 : والله أنا ذاتى ما عارف !!!
    ج2 : كل السيناريوهات التى كتبتها أكتبها على الكيبورد مباشرة ولا تستغرق منى أكثر من ساعة (وده فى حالت (لاحظ حالت دى بالتاء المفتوحة) كونو إنو (الفكرة موجودة) وكمان (شيطان الكتابة موجود) - أعنى كل معينات الكتابة متوفرة- أما عندما لا يكون هنالك (شيطان) - أى المعينات غير متوفرة- فبتبقى القصة طويلة والزول بيحس بإنو عادى جدا وما بقدر يكتب ليهو جملة مفيده !!!
    قصصص السيناريوهات ومواضيعها بتجى من معايشة المجتمع الحقيقية والحمدلله نحن منو بنعايش دقائق الحياة بتاعتو وتفاصيلها ويمكنك أن تعود لجزئية بسيطه فى آخر سيناريوهات (حكاية أيوب) أنظر (أيوب ومعجون الأسنان) !! أترى كم من (متفوه بلسان حزب) أو (حكومة) أو.. أو مر بذات تجربة أيوب هذى وقام (بعصر) و(مصر) و(شق بطن) المعجون !!!
    ج3 : العلاقة بين دراسة تحليل وتصميم نظم المعلومات وبين (كتابة السيناريوهات) علاقة وطيده للحد البعيد فالسيناريوهات من الناحية (البنيوية) تشابه إلى حد كبير (النظام الكبير) الذى تندرج تحته عدداً من الأنظمة الفرعية sub systems والتى هى التداعيات المختلفة التى تتعرض لها (السيناريوهات) فى ظل (الحبكة الرئيسية) !!
    أكيد (تحليل وتصميم النظم) هو الأصل فبفضله كان (المنطق) و(التسلسل) و(البدية) و(النهاية) التى تجدها فى (السيناريوهات) !!
    ج4: بقرأ لمنو ؟؟ نحنا يا كبروس ناكل وإلا نقرأ ؟؟ وإلأ ندفع الشنو ما بعرف داك ؟ ونشترى الشنو ما بعرف داك ؟ القراية بقت مكلفة جداً مش لأنها (باهظة التكلفة) لكن لأن (الدخل بتاعنا) لم يعد (يتماشى) مع (المنصرف) !! على العموم الله يبارك فى أخوانا المغتربين (رغم إنو الدولة ما مريحاهم) غايتو بنقول ليهم رسلو لينا الكتب الفلانية قاعدين يرسلوها لينا !! والكتب دى ممكن تكون لكتاب خواجات ذى (توم شارب) أو (جوزيف هيلر) أو للتركى(عزيز ينسين ) أو لبعض إخوتنا الكتاب العرب (محمود السعدنى) (على سالم) ....إلخ

    كسرة :
    الكرت وصل ... وعندنا كلام كتير


                  

03-31-2007, 11:44 PM

amara
<aamara
تاريخ التسجيل: 07-13-2005
مجموع المشاركات: 204

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    بالجد الأستاذ يوسف جبرة كاتب متميز وأنا عن نفسي لا يوجد يوم يفوت دون ان أقوم بشراء جريدة السوداني أطلاقاً وصباح أمس قرات شركة يستأصلون من الابداية الى النهاية وكيف الراجل طلع مديون 20 الف جنية .
    عندما اجد الكاتب المتميز الاستاذ يوسف أبدأ به وبعده مباشرة أتحول الى الكاتب العملاق زهير السراج وبعده علي اليمين دور لحديث المدينة الذي يوحي لك بان السودان علي وشك الأنهيار وحتماً سيصبح الصبح بكرزاي السودان وبعده أتحول الى عمود بالمنطق وتصيب بخيبة امل وتشعر بان السودان أصبح عراق آخر واتجول هنا وهناك دون ترك حرف واحد فى الصحيفة عداء صفحة الرياضة الذي أمرره مرور الكرام دون حتي مشاهدة العناوين الرئيسية وفي النهاية أختم صحيفة السوداني بالرجل الشايب الزومة ليكون ختامه مسك .
    محمد عوض فرح
    مموشي سيدا
    نوبي من أقصى شمال السودان
    عمـــــــــارة
    مقيم بالمملكة العربية السعودية

    (عدل بواسطة amara on 03-31-2007, 11:51 PM)

                  

04-01-2007, 02:19 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: 1. انت يا استاذ الكلام السمح دا قاعد تجيبو من وين

    2. كيف بتبدا معاك فكرة السيناريو وكيف (بتخمر) في راسك وكيف بتنفذها وهل عندك طقوس معينة ؟؟
    3.
    سؤال بيهمني شخصيا: شنو العلاقة بين (تحليل النظم) والكتابة ... وياتها فيهم بتمتعك أكتر .. وياتو واحدة بتعبترها هي الأصل؟؟؟

    4. بتقرا لمنو؟؟


    كبروس كل سنة وإنت طيب وعموم المسلمين وعشان ما أنسى الكرت وصل وشكرا جزيلا

    الإجابات كالآتى :

    ج1 : والله أنا ذاتى ما عارف !!
    ج2 : (السيناريو) فكرتو دائما بتجى متأخرة يعنى ما قبل يوم (التلاتاء) ، كتابة السيناريو ذاتا ما بتآخد معاى وكت كتير لكن المشكلة دائما فى الفكرة والتى غالبا ما تأتى نتاج لملاحظة أو (قرار) أو خلافه والكتابة (الساخرة) بالطبع هى نتاج (للمتناقضات) و (المفارقات) والضغوط فهى تتناسب عكسياً مع مساحة (الحرية المتاحة) بمعنى أنه كلما قلت مساحة (الحرية) زادت مساحة (السخرية!!) أما طقوس (الكتابة) فليست لى طقوس معينة أنا أكتب فى الساعات الأولى للصباح (على الكيبورد مباشرة!!) مع سيجارة (برنجى) وفنجان (قهوة) - بدون سكر-
    ج3. هنالك علاقة وطيده بين (تحليل وتصميم النظم) والكتابه من ناحية (البناء) فنظام المعلومات يحتوى على أنظمة فرعية sub-systems يجب أن تكون متماسكة وذات علاقات (منطقية) تعمل معا من أجل هدف (واحد) وكذلك (المقال) !!
    4. القراية بقت مشكلة يا كبروس وبعدين أنحنا نشترى شنو وإلأ شنو وإلا شنو وإلا (شنو) ؟
    - لا حظ شنو الأخيرة دى؟- يعنى نقرأ وإلا نشترى (جمرة) وإلا ناكل وإلا نشرب وإلا نتعالج وإلا نعلم الأولاد وإلأ نشحن الموبايلات وإلا نعمل شنو تطير عيشتنا !! عموما البركة فى أخوانا (المتغربين) الدولة ما مريحاهم وأنحنا كمان ما مرحينهم مرة مرة بنطلب منهم يرسلو لينا (كتب) .. أما عن الناس القاعد أقرأ ليهم فهم كتار أهمهم من (الخواجات) واحد إسمو (توم شارب) وقد لفت نظرى إليه الأخ العزيز (أبو الجعافر) وواحد تانى إسمو (جوزيف هيلر) وبرضو فى الكاتب التركى الساخر (عزيز ينسين) أما أخوانا العرب فهنالك الأستاذ محمود السعدنى وعلى سالم وآخرين

    هل لديك (أقوئلة) أخرى ؟

    هذا مع التحية
                  

04-01-2007, 03:54 AM

ابوهريرة زين العابدين
<aابوهريرة زين العابدين
تاريخ التسجيل: 12-28-2005
مجموع المشاركات: 2655

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: الفاتح يوسف جبرا)

    شكرا kabaros
    وشكرا الاستاذ الفاتح يوسف جبرا
    شكرا على المتعة وعلى السخرية وبالفعل تحليل افضل من اي تحليل جاف يوصل المعلومة بشكل بسيط وبدون أن تجرح شعور جهاز الأمن وانت عارف لو جرحت شعور الجهاز ربما توقف الصحيفة، لكن والله حكاية الاولاد المداحين دي بالغت فيها عديل كدة وفي زيارة لي بعد 16 سنة للسودان حضرت عرس وكانت نفس القصة الاولاد البتمايلوا ديل وفي الاول كنت فاكر القصة غناء واكتشفت انه مديح في الالحان المعروفة والله قصتنا قصة مع الجماعة ديل.
    مع شكري على الامتاح وكمية الضحك التي منحتنا لها في ظل هذا الظلام والكآبة الجاسمة على صدر الوطن.
    أبوهريرة
                  

04-03-2007, 04:47 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    Quote: والله قصتنا قصة مع الجماعة ديل.


    هى قصة واحدة بس يا أبوهريرة .. دى قصص و.......... حكاوى .. ربنا يجيب العواقب سليمة ... شوف نحنا كنا فين ؟ وبقينا فين؟؟ على راى أخوانا المصريين !!!

    شكرا ليك كتير ..

    الفاتح جبرا
                  

04-05-2007, 10:16 AM

kabaros
<akabaros
تاريخ التسجيل: 02-05-2002
مجموع المشاركات: 257

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: الفاتح يوسف جبرا)



    أستاذنا ...

    تشرفت كثيرا بلقائك ...

    دي مجرد Break حتى نضمن أنك تنتهي من سيناريو الجمعة وسنعود للدردشة




    Quote: تصديق عدم إقامة حفلة

    لم تسع (عبد العال) الفرحة وهو يستقبل مولوده (الذكر) الأول بعد ستة من البنات (الإناث) لدرجة أنه قام بطلب إجازة (بالخصم) لمدة ستة أيام من المصلحة ليتفرغ بالاحتفاء والاحتفال بهذه المناسبة السعيدة التي ظل ينتظرها لمدة عشرين عاما هي سنوات زواجه السعيدة بابنة عمه (نفيسة).
    علي الرغم من ضيق ذات يد (عبد العال) لكونه من ( الموظفين في الأرض) الإ أن جهات عدة قد قامت بتقديم الدعم و (المواجبة) له احتفاء بالمولود الفارس المنتظر فجيرانه في الحي ما أن علموا باليوم المحدد (للسماية) الإ وقاموا بعمل كشف (مدنكل) يكفي لإقامة (صيوان) محترم بملحقاته من (غسالات الأيدي) و (حفاظات المياه) كما قام صندوق العاملين في المصلحة بإرسال (هايلوكس هايلوكس) ملئ بباغات الزيت وأكياس الشاي والدقيق والسكر إضافة إلي خروف (مدغلب) لزوم المشاركة في هذه المناسبة السعيدة.
    في اليوم الأول لخروج (نفيسة) من الدايات، وبعد انقطاع سيل المهنئين تم عقد اجتماع اسري لمناقشة موضوع (السماية) وقد دار نقاش مستفيض حول كيفيتها حيث تعددت الآراء فبعضهم يري أن تكون غداء (ضلع) وآخرون يرون أن تكون عشاء (كوكتيل) وحيث أن الجميع لم يصلوا إلي أتفاق وحتى يرضى (عبد العال) الطرفين فقد قرر أن تكون (السماية) يومين ، اليوم الأول (غداء ضلع) واليوم الثاني (عشاء كوكتيل).....
    يوم الغداء:
    قام صبية الحي برش أرضية الصيوان وربط لمبات (النيون) .. وغسل (الكراسي) البلاستيكية في حين إنبرت النساء في تجهي(صواني) الغداء بينما كان (عبد العال) يرتدي جلابيته (بتاعت المناسبات) ذات اللون الرمادي الفاتح ولم ينسي أن يضع علي رأسه (طاقية) من نفس اللون والقماش، وكذلك الشال المزركش ( المصاحب للطقم) حيث وقف بعدها في مدخل الصيوان يستقبل المهنئين وهو يتابع عملية إنسياب صوانى (الغداء) وينادي علي (الأولاد) بين الفينة والأخرى:-
    - يا ولد جيب (صينيه) هنا
    - يا ولد جيب زيادة (رغيف) هنا
    وبينما هو كذلك إذ بعربة ذات لوحة حكومية صفراء فاقع لونها تقف بقرب الصيوان ويترجل منها ثلاثة أشخاص يرتدون بدل سفاري (زيتية اللون) ظنهم (عبد العال) للوهلة الأولي أنهم زملاء من (المصلحة) الإ أنهم لم يكون كذلك
    - السلام عليكم
    - وعليكم السلام أتفضلوا
    - لا شكرا.. لو ممكن بالله عاوزين (الزول) العامل المناسبة دي
    - (فى إستغراب) أنا ذاتي في حاجه؟
    - أيوه انحنا بس بنسأل انتو عملتوا تصديق؟
    - نعمل تصديق لشنو؟؟ الليلة غداء وبكره عشاء وما عندنا حفله !!
    - ما دا إلا نحنا بنقصدو ذاتويا حاج
    - كيف؟
    - مش أنتو ما ح تعملوا حفله بكره ؟
    - أيوه
    - يبقي مفروض تجو عندنا تعملوا (تصديق) بعدم إقامة حفله
    - (فى إندهاش )والله حاجه عجيبة... كيف يعني؟ حفله وما ح نعملها نعمل تصديق بعدم إقامتها كيف؟ ولشنو؟
    - أيوااا يا حاج .. أنا أوريك لشنو.. يعني إنت عاوزنا نقعد نراقب فيكم الليل كلو عشان نشوفكم حتعملوا حفله ولا ما ح تعملوا حفلة؟؟؟ نحن فاضين ليكم..(ثم واصل فى جدية) التصديق دا يا أستاذ عشان (السلطات) تعرف أنكم ماح تعملوا حفلة وما
    ( تختكم في حساباتا).. هسع عرفت ؟
    - (في امتعاض وعاوز يخلص) والمطلوب شنو هسع ؟
    - المطلوب تمشي معانا المكتب وتعمل التصديق دا

    في مكتب التصديقات:
    - أها (يا عبد العال) قلت لينا ما ح تجيبو فنان؟
    - أيوه ما ح نجيب
    - طيب ماح تجيبو منو؟
    - (مستغربا) كيف ماح نجيب منو ؟ ... ماح نجيب كل الفنانين
    - لا يا أستاذ لازم (تحدد) لينا ماح تجيب منو .. هسع ممكن تقول ماح تجيبوا (فرفور) تقوموا ما تجيبوا ( ترباس) أها بعدين يكون الموقف شنو؟
    - يعني هسع لازم أحدد ليكم؟
    - أيوه طبعا
    - ودي طيب أعملها كيف ؟؟
    - (فى لا مبالاة) أ تـصرف
    - طيب يا جماعة أدوني فرصة لحدي بكره أصلو عزومة (العشاء) بكره...
    خرج (عبد العال)من مبني (التصديقات) عائدا للمناسبة وكلمات المسئول ترن في أذنيه:
    - *** لازم تحدد لينا الفنانين الماح تجيبهم ***
    - ***افرض حددت لينا أنك ما ح تجيب (فرفور) وقمت ماجبت (ترباس) ***..
    وحينما وصل للصيوان كان الجميع يسألونه ( كنت وين يا عبد العال ) الإ انه ظل صامتا يفكر في حل لتلك المشكلة خاصة وانه شخص (مسالم) ولا يحب (مواجهة السلطات) !!.
    نزار يجد الحل :
    عندما وجد (نزار) خطيب ابنة (عبد العال) الكبرى أن عبد العال ساهما طول الوقت وصامتا اقترب منه متسائلاً :
    - مالك يا حاج ؟؟
    - لا ما في حاجه.. مشكلة بسيطة
    - مشكلة شنو يا حاج؟
    وحكي (عبد العال) لنزار المشكلة الإ أن الأخير قد فاجأ (عبد العال) قائلاً :
    - هسع دي مشكلة يا حاج؟ دي حلها بسيط جداً
    حل المشكلة :
    في صباح اليوم التالي كان (نزار) يقود عربته (الأتوس السوداء) وبجانبه (عبد العال) وهو يحمل قائمة تحتوي علي الأماكن التى يفترض أن تساهم معهم فى حصر جميع (المغنواتية) وكانت هذه القائمة تحتوى على :
    1- مكتبة الإذاعة السودانية
    2- دار فلاح لتطوير الأغنية الشعبية
    3- دار الغناء الشعبي
    4- شركات الإنتاج الفني
    5- جميع مراكز الشباب
    6- إضافة إلي التلفزيون القومي (سم المنوعات).
    وقبل أن تنتهي ساعات العمل الرسمية تحصل (عبد العال) بمساعدة خطيب إبنته (نزار)علي أسماء جميع (الفنانين) و(الفنانات) المسجلين منهم والمسجلات بكل هذه الاتحادات ومراكز الشباب وكان بحوزته 50467 اسماً مرتبة ترتيباً هجائياً .
    فى مكتب التصديقات تانى:
    وضع (عبد العال) هذه (الرزم) من الأوراق التي بها (أسماء الفنانين) أمام المسئول وهو يقول:
    - شوف يا سعادتك ديل كلهم ما ح أجيبهم
    - (المسؤول فى إستغراب)ديل شنو ؟
    - ديل فنانين
    - إنت متأكد انو الما ح تجيبهم كلهم هنا؟ يعني ما في زول ماح تجيبو ما هنا؟
    - أيوه متأكد – ثم مواصلاً-وكمان أنا عملت صورة من القوائم والأسماء دى عشان بعدين ما تغالطونى !!
    - طيب شيل أورنيك ت/ع/ا/ح أملاهو وامشي أدفع الرسوم.
    لم يوضح المسئول (لعبد العال) أين يدفع الرسوم لذلك كان لابد لعبد العال أن يقوم بسؤال أحد الموظفين
    - يا أخ داير أدفع (رسوم تصديق بعدم إقامة حفل) ... أدفعها في ياتو شباك؟
    - شوف الشباك الأول داك بتاع (تصديقات أقامة صيوانات العزاء) تخليهو.. الشباك البعدو بتاع (تصديقات عدم إقامة صيوان عزاء) تخليهو.. الشباك البعدو.. يعني الثالث داك شباك ( تصديقات دفن ميت) والشباك البعدو داك الفيهو (الهنودالكتار الواقفين ديك) .. داك شباك (تصديقات عدم دفن ميت) خليهو .. أها الشباك البعدم طوالي دا حق (التصديق بعدم إقامة حفل).. !!! لحظ (عبد العال) فقد كان الشباك خالياً من أي شخص.. وبعد أن ملأ (عبد العال) الأورنيك ت/ع/ا/ح وأرفق معه قوائم وكشوفات أسماء الفنانين (الما ح يجيبهم) سلمه للمسئول الذي بالشباك والذي قام بتحرير الإيصال وسلمه (عبد العال) قائلا:-
    - خمسة وسبعين ألف...
    العشاء :
    توقفت أرتال وفود المهنئين.. وخرجت آخر صينية للعشاء.. وبدأ عدد من كانو بالصيوان فى التناقص حتى بقي (عبد العال) ونزار خطيب ابنته وجارهم (سليمان) الذى استأذن أن ينصرف بعد أن قام ومعه (نزار) بلم الكراسي والترابيز وفك (حديد الصيوان) وتوضيب الحته حيث كان (عبد العال) قد سبقهم لداخل المنزل ليأخذ قسطاً من الراحة من عناء تعب اليومين السابقين والجري وراء إستخراج مختلف أنواع (التصاديق) .. وعندما كان الجميع يحاولون النوم إذا بجرس الباب يرن :
    - منو في الباب
    - أفتح
    وعندما قام (عبدالعال) بفتح الباب رأى ذات الشخص الذي سلمه (التصديق بعدم إقامة حفله)
    - أتفضلوا يا جماعة أن شاء الله خير
    - لا خير.. انحنا بس عاوزين نعرف
    - تاااانى !! عاوزين تعرفوا شنو ؟ انحنا حفله وما عملناها.. وكل الفنانين القلنا ما ح نجيبهم ما جبيناهم ...وكمان ما جبنا ولا فنان أها تأني في شنو ... عندكم معانا حاجة؟ ؟
    - يا حاج كدى أهدأ شويه ... وامشي جيب لينا (النسخة) بتاعت الفنانين العندك القلت ما ح تجيبهم !!
    قام (عبدالعال) يالخول للمنزل وغاب برهة ثم جاء وقد أحضر (نسخة) الكشف الذى معه وأعطاها للمسؤول :
    - لا إنت خلى نسختك دى معاك وتابعنى
    .. بينما كانا المسئول يقلب فى صفحات النسخة التي معه توقف فجأة فى إحدى الصفحات وقال مخاطباً (عبدالعال) فى حزم
    - امسك نسختك دى وأفتح حرف السين يا (عبد العال)
    (بدأ عبدالعال فى تقليب صفحات صورة الكشف الذى معه ثم بعد بحث قصير توقف وقال مخاطباً المسؤول)
    - يا هو دا (حرف السين) فتحتو
    - طيب هسع الفنانة (سعدية دكوه) موجودة عندك ؟
    - (بعد أن إستعمل سبابته فى تتبع الأسماء التى تحت حرف السين) ..لا ما موجودة
    - طيب مش كان ممكن ما تجيبا.. ما كتبت اسمها مع الفنانين الماح تجيبهم ليه؟ ؟
    .........................................................................................
    .........................................................................................تم دفع (أيصال الغرامة) بواسطة (نزار) إذ أن (عبد العال) لم يستطع ذلك نسبة لوقوعه مغشياً عليه أثر أصابته بجلطة فى (الشريان التاجى) كادت لولا عناية الله أن تؤدى بحياته قبل أن يفرح بقدوم مولوده (الذكر) الذى جاء بعد ست (بنات) .
    بعد سته أيام قضتها أسرة (عبدالعال) فى مستشفى (القلب) وهو فى حالة غيبوبة تامة ، إستيقظ (عبدالعال) فى اليوم السابع فوجد كل أسرته بجوار سريره ..نظر إليهم وفى صوت خافت قام بسؤالهم :
    - أها الولد (ما) ح تسموهو منو؟
    وهنا أدرك الجميع أن (عبدالعال) ما ح يطلع منها !!!!!
                  

04-05-2007, 11:46 AM

الواثق الصادق

تاريخ التسجيل: 02-15-2007
مجموع المشاركات: 1723

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    أكثر ما يميز الكاتب الفاتح أسلوبه السهل الممتنع

    لأنني عندما قرأت له أول مرة ظننت أن بإمكاني كتابة عشرات السيناريوهات لكن بالفعل لا يمكن كتابة ربع سيناريو..

    و من زمن تداعيات يحيى فضل الله و كتابات حساس محمد حساس لم يدخل القلب غير سيناريوهات الفاتح يوسف جبرة.

    لكن عندي ليك سؤال يا كاتبنا الجليل : الزمن دا كلو كنت وين إنت؟
                  

04-10-2007, 10:03 AM

Adel Sameer Tawfiq
<aAdel Sameer Tawfiq
تاريخ التسجيل: 10-05-2006
مجموع المشاركات: 1074

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الفاتح يوسف جبرة ... أشهر كاتب في السودان (Re: kabaros)

    فــــــــــــوووووووووق !!
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de