دعواتكم لزميلنا المفكر د.الباقر العفيف بالشفاء العاجل
|
|
 (سـيناريوهات) : الحاوى وفك التسجيلات
|
العدد الأسبوعى - صحيفة السودانى
الجمعة 9 فبراير 2007
أصابت الدهشة كل (العالم ) وهو يستمع إلى هذا الخبر الذى تناقلته وكالات الأنباء العالمية وبثته (الفضائيات) :
فى (الخرطوم) وبعد أن تم تبادل الأدوار (سلمياً) وصار (المسؤولون) هم (الرعية) وأصبحوا خداماً (للشعب) الذى أصبح بدوره (مسؤولاً) عنهم وبعد أن أصدر (الشعب) بعض القرارات الخاصة بترشيد (السفريات) الخارجية للمسؤولين وتخفيض (بدل السفرية) لهم من (خمسميت دولار فى اليوم) إلى (خمسين دولار فقط) تجمع عدد من المسؤولين فى الميدان المسمى بـ(ميدان أبوجنزير) وقامو بتسيير (تظاهرة) وهم يحملون اللافتات التى كتبت عليها شعارات تندد بقرارات (الشعب) الأخيرة هذا وقد تصدت (شرطة الشعب) للتظاهرة حيث قامت بفضها مستخدمة الهراوات والغاز المسيل للدموع مما جعل (المسؤولون) يهربون مستخدمين (الأزقة) ويحتمون ببعض (المحلات التجارية ) هذا وقد وقعت بعض الإصابات فى صفوف (المسئولين) حيث تم نقلهم لتلقى العلاج بالمستشفيات كما تم القبض على بعضهم هذا وفى تصريح أدلى به (الشعب) أفاد بأن المقبوض عليهم سوف يقدمون لمحاكمات عادلة فى الأيام القليلة القادمة .
- إتخيل قالوا (المسؤولين) مشو (للشعب) عشان يديهم (تصريح) بتسيير المظاهرة قام رفض وما أداهم !!
- والله الشعب عمل كويس .. هم زمان قاعدين يدو زول تصريح ؟
- هم مشكلتهم إتعودوا على (الترطيب) والراحات عشان كده (التخفيضات) دى بقت ليهم
حاره
- لكن هم بثبتو ؟؟ ما مما هبشوهم (الجرسه) ما تديك الدرب
- عليك الله شفتا نحنا زمانك (ثبتنا) ليهم كيف؟؟ على باليمين قبل الجماعه ديل ما يجو
كنت عايش أولادى (التسعه) ومعاهم (أمهم) هسع نزلت المعاش اولادى التسعه ما قادرين
(يعيشونى) أنا براى !!
- آآى والله (هلكونا) شئ جبايات وشئ أتاوات وشئ رسوم وكل يوم يطلعوا لينا فى(القرارات)
- بى مناسبة (القرارات) دى قالو )الشعب) الليلة الساعة 8 فى المساء عندو(بيان)
للمسؤولين ح يطلع فيهو (قرارات) وح يكون (مذاع) و(متلفز) !!
بيان من (الشعب) للمسؤولين :
فى تمام الساعة الثامنة مساء تماما توقفت الحياة تماما فى كل المدن والأحياء وخلت (الشوارع) من المارة و(تسمر) الجميع أمام شاشات التلفاز وأجهزة الراديو للإستماع (للبيان) الذى سوف يحتوى على (القرارات) التى سوف يتخذها (الشعب) تجاه (المسؤولين) :
الإخوة المسؤولون الأعزاء:
السلام عليكم ورحمة الله تعالى وبركاته :
إن الحياة كما تعلمون لا تسير بوتيرة واحدة وكما تقول الحكمة المأثورة ( فيوم لك ويوم عليك ) وبعد أن صار (الشعب) هو (الحاكم) وأنتم (الرعية) فقد جاء اليوم (العليكم) فأحسن تثبتوا وتبطلوا (الجرسة) ذى ما (الشعب) زماتك (ثبت) وربط (الحزام) ..
الإخوة المسؤولون :
الحقيقه نحنا فى (البيان) ده عاوزين نوريكم (سياستنا) الجايه بالواضح كدا عشان بعد ما (المسائل) إتقلبت والأوضاع (إتغيرت) تعرفوا البيكم والعليكم ..
الأخوة المسئولون الأعزاء :
أولن بالتبادى عاوزين نقول ليكم حضروا (حزماتكم) من هسع والما عندو (حزام) يمشى يشترى ليهو (حزام) ليهو ولى (عيالوا) وناس بيتو عشان خلاص البذخ و(الفشخرة) والقروش السايبه و(العربات) واللاندكروزرات و(الضبائح) والعوازيم والعطلات الخارجية والسفر والطيارات والنسوان (المثنى وثلاث ورباع) ده كلو (الشعب) ح يضع ليهو (حل) وكان بتفتكرو إنو كلما (الشعب) يطلع ليهو (قرار) إنتو ح (تقوموا) مظاهرات تكونوا (غبيانين) لأنو (شرطة الشعب) ح تتصدى ليها بقوة وحزم شديدين وبراكم شفتو الحصل ليكم فى (مظاهرات أمبارح).. إنتو مشكلتكم إنكم كنتوا بتفتكرو إنو الشعب ده (خدامكم) وجاء الوكت الإنتو تعرفو فيهو إنو إنتو (خدامين للشعب) وإنو (الشعب الفضل) ده هو القاعد يدفع ليكم مرتباتكم (المليونية) وبدل سفرياتكم (الدولاريه) وبنزين عرباتكم (الفارهة) والحاجات التانية الأحسن (نخليها مسنورة) !! – ثم فى حزم وجدية - أيها (المسئولون) لقد قرر (الشعب) إنفاذ القرارات التالية :
قرار رقم 1: زوجة واحده لكل مسؤول :
بهذا فقد قرر (الشعب) أن تكون فى عصمة كل (مسئول) زوجة (واحدة) ما لم يثبت (المسئول) أن زوجته (عاقر) أو (مصابه بمرض) تستحيل معه الحياة الزوجيه .. القرار ده يعنى بالعربى كده (عرس) بتاع متعه و(عدم موضوع) تانى مافى ... يعنى تانى حكاية الواحد فيكم جاب ليهو (سكرتيرة) عجبتو وقام (متنى) ده خلاص إنتهى .. أو شاف ليهو (واحده) فى (مؤتمر) قام (متلت) .. دى تانى (تلقوها فى الغافل) .. إنتو طبعا عملتو لينا (الزواج الجماعى) أها نحنا ح نعمل ليكم (الطلاق الجماعى) ... القرار ده بيقول من بداية الشهر الجاى إنو أى (مسئول) فيكم (يحتفظ) بى (مرا) واحده بس و(يسرح) الباقيات ..- مواصلا- عليكم الله هو بس لو كان عندكم إنتو شوية (خجل وإستحاء) أنحنا (أفراد الشعب) ده الواحد (مرا) واحده ما قادر عليها يعنى (بيت واحد) ما قادر عليهو بس معقول إنتو الواحد عندو فى ذمتو (تلاته وأربعه )؟؟؟؟ الناس دى بتأكلوها من وين ؟؟ وبتشربوها من وين؟؟ وبتسكنوها أفخر السكن وين؟؟ وبتعلموها أرقى التعليم بى شنو؟؟ وبتركبوها أحدث (العربات) من وين؟؟ وبتمشوا بيهم (لندن) و(باريس) بى ياتو تذاكر وياتو (نثريات)؟؟ - مواصلا فى حزم - شوفو يا أيها (المسئولين) قدامكم أسبوع ( فك تسجيلات ) كل مسئول فيكم يقعد فى الواطه ويحدد (عاوز يسجل منو) ويقوم يشطب الباقيين !! نعم بعد ده إنتهى عهد (التثليث والتربيع) :
(الكاميرا) تركز على شخص يقف خلف (المتحدث) الذى يتلو البيان مباشرة (وهو يرفع عصا أبنوس) ويهتف صائحا :
- تطليق
- (أصوات) : لا إله إلأ الله
- تسريح
- (أصوات) : الله أكبر
شخص آخريقف يمين الشخص (السابق) ذو حنجرة (مايكروفونية ) :
- لا تثليث ولا تربيع يا مسؤول خليكا مطيع
- (أصوات تردد خلفه) : لا تثليث ولا تربيع يا مسؤول خليكا مطيع
قرار رقم 2 : صالح شعبى عام :
بموجب هذا القرار سوف يتم تخفيض (جماهير) المسؤولين وإحالة 99% منهم (للصالح الشعبى العام) بعد أن ثبت أن (نصف) عدد (السكان) هم مسؤولون فى الدولة .. شئ وزراء (ساكت) ... وشئ وزراء (دولة)
.. شئ إتحاديين... وشئ ولائيين... وكل وزير عندو (مدير مكتب) و(سكرتير) وسواق (للمدام) وسواق(للأولاد) وسواق (ليهو) وبعد ده كمان نجى للمستشارين وعددهم حتى الساعة العاشرة والنصف من صباح الأمس كان 31124 مستشار وكل مستشار عندو (سواق ليهو) وواحد (للمدام والأولاد) بعد داك نجى للجبانه الهايصة الإسمها (المحليات) و( المحافظات) و(المعتمديات) شوفو البلد دى فيها قريب التلاتين ولايه وكل ولايه فيها قريب الكم وكمين محافظة أها يعنى يكون فى كم محافظ ؟؟ ونائب محافظ ؟؟وكم معتمد؟؟ وكم نائب معتمد؟؟ وكم رئيس محلية؟؟ وكم نائب رئيس محلية؟؟ وكل واحد فى ديل عندو (مدير مكتب) وسكرتير وسواق (ليهو) وسواق (تانى) وكل واحد من ديل عندو قال أيه (مستشار إعلامى) ومستشار (شنو داك) - مواصلا وهو يرفع رأسه من الورقة –-ثم مواصلاً – عليكم الله يا (مسؤولين) إنتو هسع عارفين (ربع البصل) بى كم ؟؟ ولا عارفين (ملوة الفيتاريتا) بى كم ؟؟ - وهو يرفع رأسه عن الورقة مواجهاً الكاميرا - وحكمت الله يوم واحد ما شفنا لينا واحد من (جيش المسؤولين) ده إشتكى قال (مرتباتنا إتأخرت) أو ما صرفت (ماهيتى) ؟؟
قرار رقم 3 : ركشة لكل مسؤول :
الأخوة المسؤولون :
(الشعب) قرر بعد دراسة مستفيضه (سحب) جميع (الركشات) من (الشوارع) وتعويض أصحابها تعويضاً مجزيا ومن ثم منح هذه (الركشات) للمسؤولين وإعطاء كل مسؤول (ركشة) من أجل تنقلاته بدلاً عن (الليلى علويات) و(التاتشرات) و(المرسيدسات) و(الـ BM دبليوهات) الفارهة والتى يكفى ثم الواحده منها لإطعام خمسيت مليون (جائع) من غالب (قوت) أهل البلد – مواصلا متهكما- إذا كان رئيس وزراء (اليابان) قاعد يستخدم (عجلة) فى تنقلاتو ولمن يكون متأخر قاعد يقوم (سدارى) يعنى إنتو يا (مسؤولينا) أحسن منو؟؟ وإلا بلدنا أغنى من (اليابان) ؟؟ أها تانى بس (ركشات) نشوفكم تانى ح (تظللوا) شنو ؟؟ قزاز مافى !!!
قرار رقم 4 : الحساب ولد :
الشعب بفتكر إنو فى (مسؤولين) بفتكرو إنو (الشعب) ده (عوير) وريالتو (سايله) .. يعنى (المسؤول) أول ما يتعين يكون ساكن ليهو فى بيت (جالوص) وباب الشارع بتاعو (زنكى) وضلفه بتقفل والتانية مسنوده بى (حجر) وعفش البيت كلو (دولاب هدوم) وخمسة سراير و(بنبرين) وتربيزة و(الشفع) كل يوم طاردنهم من (الدرس) عشان ما دفعوا (الرسوم) يقوم (المسؤول) بعد كم سنه من تعيينو تلاقى (الشفع) كبرو وقاعدين يقروا (طب) فى جامعات (خاصة)
وساكنين فى عمارة (المنشية) ومأجرين عمارة (قاردن سيتى) وخالين (الفيلا) بتاعت (كافورى) فاضية !!
- مواصلاً فى حزم- الشعب قرر إنو يدى (المسؤولين) ديل فرصة (أسبوع) عشان يجيبوا (الحاوى) العمل ليهم (الشغل ده) !! وأى مسؤول يفشل فى ذلك فسوف تنزع منو هذه (الحيازات) لصالح (الشعب) ..
الإخوة المسؤولين الأعزاء :
إن (الشعب) كله أمل فى أنكم سوف تلتزمون الهدوء وضبط النفس والتعامل مع هذه القرارات (بمسؤولية) ولتعلموا بأن أى محاولات إحتجاج من تظاهرات وخلافه سوف يتم التعامل معها بحزم وقوة كما حدث لتظاهرة الأمس
والتى قام بها بعض (المسؤولين) الرافضين لقرارات (الشعب) الخاصة بـ(تخفيض) بدل السفرية وتقليص (الرحلات الخارجية) !!
الإخوة المسؤولين :
لا يخفى على أحد منكم أن (الشعب) قد صبر على (مهازلكم) طويلاً ينظر إليكم وأنتم فى (أبراجكم العاجية) تأخذون أضعاف أضعاف ما تعطون تلبسون (حرير) الثياب وتأكلون (لذيذ) الطعام وتمتطون فاره (الجياد) وتحجون إلى بيت الله الحرام (ملح) ومن أموال هذا الشعب (الغلبان) وتتطاولون فى بنيان (الفلل والعمائر) وتنكحون ما لذ لكم وطاب مثنى وثلاث ورباع غير عابئين بهذا (الشعب) الذى أذله الفقر وهدته (المسغبه) وأضناه (المرض) فأصبح أفراده كالأيتام على موائد (اللئام) !!
أيها المسؤولون :
لقد حان الوقت أن تمشوا على العجين وما تلخبطوهو .. والقرارات دى أول (الغيث) ويا نحنا يا إنتو ووراكم والزمن طويل والسلام عليكم ورحمة الله وبركاته !!
تداعيات القرارات :
فى حديقة إحدى (الفلل) الفاخرة بأحد الأحياء الراقية جلس المسؤول ومعه جاره (المسؤول الآخر) يرتشفان (القهوة التركية) وأمامهم (سبائط) من العنب و(الخوخ) والتمر (الشفاف) يستمعان إلى (القرارات) :
- الشعب ده جن ولا شنو؟؟ طيب إذا هو (مسؤول مننا) نحن نكون (مسؤولين) من منو؟؟
- شوف والله بعد (الضرب) الإنضربناهو فى (المظاهرة) أمبارح ده الظاهر (الشعب) ده جاد فى الموضوع
- يا خوى كان كده أحسن الواحد (يبيع) ويتخارج
- يا حبيب بيع شنو؟؟ إنت ما سمعت فى (البيان) هسع قالوا أدونا (إسبوع) نجيب (الحاوى) ؟؟
-إنت (الحاوى) ده سيبو هسع (فك التسجيلات) ده نعمل معاهو شنو؟؟ (النسوان) ديل نوديهم وين؟؟
-(يبتسم فى خبث) : والله أنا (حمتى خفيفه) ح أطلق (واحده) وأخلى (واحده) ذى ما الشعب قال فى قرارو ؟؟
- طبعا يا أبوها ح تفك (القديمه) عكس الهواء !!
- يعنى إنت فاكرنى ح أفك (النوبيرا تو) وأخلى (الهيلمان) !!
-(وهو ساهم) : والله المشكلة مشكلتى أنا هسع (الأربعه) ديل يفكوا منهم ياتو (تلاته) !!!
بينما كان هذا الحديث يدور فى الحديقة بين المسؤول وجاره كانت (ست البيت) زوجة المسؤول (الرابعه) تجلس مع زوجة (المسؤول الجار) الأولى على إحدى البلكونات وهن يناقشن القرارات :
- والله ووالله يلحق (يفك تسجيلى) ألا أفك ليهو رقبتو!! كمان أنا بلعب والا بلعب
- والله يا (ست النفر) ياختى الرجال ديل ما عندهم ضمان وقالوا (الجديد شديد) !!
- بتقصدى شنو يعنى يا (شيراز) ؟؟ عشان إنتى يعنى جديده و(نمرة أربعه) ؟؟
- لا ما كدى والله لكن (الرجال) ديل أنا عارفاهم كان فى (فنيش) بفنشو ناس (الخدمة الطويلة) !!
- خدمة طويلة خدمة قصيرة .. وحاتك إنتى دى يلحق يفنشنى إلا (إفنشو ليكى من الدنيا) –مواصلة- وهو ذاتو بينى وبينك قالو ليكى بعد ما يشيلو منو (العمارة) دى و(العربات المكندشة) دى ويركبوهو (ركشه) ويحرموهو (السفر) أنا عايزه بيهو شنو؟؟؟
فى (فيلا) أخرى لا تبعد كثيرا عن (الفيلا) الأولى كان مسئول آخر وزوجته يديران حوارا من نوع آخر :
- أنا يانى العارفاها .. من زمان أنبح ليك يا (سعادتو) سجل العمارات دى للأولاد ..
أنبح ليك يا (سعادتو) سجل العمارات دى للأولاد !! أها هسع نعمل شنو؟؟ تجيب ليهم
(حاوى من وين) ؟؟
- والله صدقتى السودان كلو فيهو حاوى واحد .. (خضر الحاوى) ومات !!
- إنت صدقت حكاية الحاوى دى ؟؟؟؟ والله حاوى ما يعمل العملتو ده!! الناس كلها عارفاك (موظف دوله) مما قمت معقولة بس (ماهيتك) تعمل العملتو ده !! والله (عماراتك) دى ياها الشايلنها شايلنها !!! – مواصلة فى شماته- هسع كان كان سمعت كلامى وسجلتهم ليا ولى وليداتك ديل ما كان أحسن ليك؟؟
- أنا عارفك زعلانه عشان سجلت (بيت كافورى) للمرا التانيه !!
- والله (الشعب) يقلعو منها ذى العجب .. إنت قايل فى حاجه على (الشعب) ده بتندسا ؟؟
فهم (سعادتو) من كلمات (زوجته) الأخيرة بأنها سوف تقوم بالوشايه به وتفضح مسألة تسجيل (بيت كافورى) لزوجته (الثانية) وأن ما قالته ليس إلا (تهديد مغلف) فقام بتصعيد الحوار معها حتى درجة (الغليان) وما لبث أن رمى عليها (يمين الطلاق) وهو يقول فى نفسه:
- أهو الواحد يرتاح منها وكمان (يفك تسجيلات) !!!!
تظاهرات :
لأن (الشعب) ضايق (الشغلانه) فى نفسو وعارف إنو (قرارات التخفيض) بالنسبة (للمسئولين) هى كما (قرارات الزياده) التى كان يفرضها عليه المسئولون وأنه لا يوجد فرق بينهما سوى (علامة سالب بره القوس) فقد وضع (الشعب) كل قواته على أهبة الإستعداد تحسباً لأى تظاهرات أو (أعمال شغب) يقوم يها (المتضررون) من هذه القرارات وقد كان حدس (الشعب) سليماً وفى (محلو) إذ سرعان ما إنتظمت فى اليوم التالى مباشرة المظاهرات التالية :
الإتحاد العام لزوجات المسؤولين :
نظم الإتحاد العام لزوجات المسؤولين تظاهرة سلمية تحركت من أمام (مول عفراء) مشياً على الأقدام متجهه لمبنى ( الأمم المتحدة) لتسليم (المندوب السامى لحقوق المسؤول) مذكرة مندده بقرارات الشعب الأخيرة ..
المتظاهرات رفعن (لافتات الإحتجاج) الملونه وسرن فى خطوط متناسقة .. التظاهرة تعبق بمختلف (الروائح الباريسية) .. (الحنن) المنقوشة مرسومة (بعناية) .. الثياب (شيفون) و(توتال) أصليه .. الجزمة لون (شنطة اليد الجلدية Genuine Leather) وشنطة اليد لون (التايير) و(دهب الخليج) يزبن (الأيادى) الناعمة التى لم تذق (غسيل العده) يوما ً والتى تمسك بلافتات صغيرة كتب عليها :
(عين الحسود فيها عود ) .... (بس معقول نركب ركشات) .. (الـ الله بيديهو منو البحميهو ) (لا تخفيض للسفريات )
بينما كن يرددن بعض الهتافات :
- مافى طلاق مافى طلاق ... موتو موتكم يا عولاق !!
- بى (بنوكنا) وبى (شــركاتنا) ما بنخاف من الجاتنا
الهيئة العليا لأولاد وبنات المسئولين :
فى تزامن ينم عن تخطيط محكم للفت أنظار (العالم) لهول المأساة التى تحدق بهم وبمصائرهم إنطلقت من أمام (شارع المشتل) وفى ذات الوقت الذى إنطلقت فيه نظاهرة (زوجات المسؤولين) تظاهرة أخرى نظمتها
(الهيئة العليا لأولاد وبنات المسئولين) مستخدمة فيها (العربات) التى جلس بداخلها (أولاد) و(بنات) المسئولين من كافة الأعمار وبعضهم قد قام بإخرج (رأسه) من خلال (الزجاج) حاملاً بعض (اللافتات)
وها هو (هيثم) و(لينا) يقومان بتنظيم المسيرة قبل إنطلاقها :
- ياجماعه .. يا جماعة ... ناس (الفستو) الصفراء يجو الصف القدام ده .. وبعدهم العربات (الأتوس) الحمراء .. يا جماعه أى زول سائق BM أو مارسيدس يكون بالجنبات ... يا ....
- يا هيثم كلمتهم إنو (البارد والسندوتشات) فى اللاندكروزر بتاع (شيرين) و(حماده)؟؟
- يا وليد .. ياوليد كلم السواق يجينا بعد نهاية (المظاهرة) طوالى وما يتأخر!!
وإنطلقت التظاهرة بعد أن تم (تنظيم ألوان صفوف العربات) وبدأ ترديد الهتافات عبر (مايكرفون) مثبت فى عربه (لاندكروزر 2008 ) بيضاء (مظللة) وتعالت الهتافات :
- بيرقر بيرقر ماكنتوش ... ليه عاوزننا ناكل بوش
ثم فى (نبرة) أكثر جدية وتشنجاً :
- شعب جبان عايز كشـه .. ليه عاوزنا نركب ركشــة
لم تمر دقائق حتى توقف (الركب) لتتم إذاعة (رسالة عبر الموبايل) من (أولاد المسئولين) الذين يدرسون بالجامعات (البريطانية)
- إخواننا أبناء المسؤولين (بالداخل) نحييى فيكم روح الصمود .. ونرجو منكم التصدى بكل قوة وحزم لهذه القرارات (الجائرة) .. إخواننا .. سيروا وعين (الله) ترعاكم .. وما تشتغلوا بالشعب (المسكين) ده - دى قرارات (فشنك) ساكت !!!
وما أن إنتهى (مذيع التظاهرة) من (إذاعة المحادثة) على (المتظاهرين) حتى دوى ( تصفيق حاد) وهتاف متقطع حفزه لقراءة (البرقية) التالية :
- وهذه برقية من إخواننا أبناء (المسئولين) الذين يدرسون بالجامعات (الإسكندنافية) تقول :
ولا يهمكم دى حساده ساكت .. قف .. لو حصلت ليكم أى حتاجه تعالوا لينا هنا .. قف .. الـ (الله بيديهو منو البحميهو ؟؟)
تلاقت المظاهرتان (أبناء المسؤولين وأمهاتهم) عند تقاطع (سانت جيمس) وإزدادت حده الهتافات :
- يا شعب يا شعــب يا جبان .. إنت حاســـد ولا (بقران)
- بيرقر بيرقر ماكـــنتوش .. ما بتجبرنا ناكل البوش
بينما كانت (شرطة الشعب) تراقب (المظاهرتبن) فى حذر ... إتجهت المظاهرتان نحو مكاتب ( الأمم المتحدة) بشارع الجامعة لمقابلة (المندوب السامى لحقوق المسؤول) بعد أن قامت (زوجات المسئولين) بالركوب مع أبنائهن فى (العربات) وهن يمسكن بزجاجات (المياه المعدنية البارده) ويصلحن من مكياجهن الذى أفسدته (حرارة الشمس) .
عند وصول (المظاهرتان) لمكتب المندوب السامى تفاجأ الجميع بوجود (تظاهرة) صغيرة (غاضبة) يقودها عدد من الأشخاص ذوى (الملابس المزركشة الغريبه) والعمائم (الملونه) .. أحد المتظاهرين كان يمسك بثعبان ضخم من فصيلة (الأصلة) يلفه حول عنقه بينما آخر يقوم بإبتلاع (سلسلة من الأمواس) وعدد آخر يقوم بإخراج بالونات (لهب) من فمه بينما إنهمكت مجموعة أخرى منهم بالمشى على (النار) وهم جميعا يحملون (لافتات إحتجاج ) غاضبة .
إتجهت زوجة أحد المسئولين (قائدة التظاهرة) غاضبة نحو أحدهم :
- شنو يعنى؟؟ ما تشيلو (دبايبكم) وحاجاتكم دى من هنا .. يعنى عاوزين تبوظوا لينا (مظاهراتنا) دى؟؟
- ما تبوظ كان باظت .. إنتو (رجالكم) ديل ما بوظو (سمعتنا) وفضحونا (فضيحة).. هسع ( أكبر حاوى) معانا هنا من الشايفاهم ديل بيقدر يبنى ليهو (عمارتين) بى عشرين (مليار) من ماهيتو ؟؟؟
|
|
 
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
| Quote: لا يخفى على أحد منكم أن (الشعب) قد صبر على (مهازلكم) طويلاً ينظر إليكم وأنتم فى (أبراجكم العاجية) تأخذون أضعاف أضعاف ما تعطون تلبسون (حرير) الثياب وتأكلون (لذيذ) الطعام وتمتطون فاره (الجياد) وتحجون إلى بيت الله الحرام (ملح) |
لا تعليق
عاطر التحايا
ناصر موسى
| |
|
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
| Quote: هو بالله يا جبرا انت حساس للدرجة دي تجاه الملاحظات! |
عزيزى الأستاذ ملاسى
إن المسألة ليست بهذه (الحساسية) التى تراها غير أننى فقط وددت أن أوضح لك بأن ما أسميته (ملاحظات) يندرج تحت باب (النقد الإنطباعى) فى (أحسن) الأحوال وهو نقد إن كان إيجابياً يمكن للكاتب عدم التوقف عنده ولا يشكل له هاجساًإذ أنه لا يشكل إضافة له .. على غير (النقد الإنطباعى السالب) وما أسميته أنت (ملاحظات) إذ عندها يصبح هاجس الكاتب هو أن يلم بالأسباب (الموضوعية) التى أدت بالقارئ لإبداء تلك (الملاحظات) حتى يقف الكاتب عليها تجويداً (لبضاعته) .
عزيزى الأستاذ ملاسى
لأن الكتابه شأنها شأن كل أشكال الفنون الاخرى لا تقاس بالحجم يعنى non volumetric ولكن بمعايير أدبية وفنية كنت أتمنى لو أن وصفك لما نكتبه بالإسهاب والرتابة والتكرار قد بنى على تلك المعايير حتى يستفيد منها شخصنا الضعيف .. لذا يظل ردكم (أكتب - أسهب - إن شاء الله تملأ الجريده كلها) غير مشبع لنهمنا فى معرفة أماكن الخلل فيما نكتب والتى أفضت بكم إلى تلك (الملاحظات)
كسرة :
بمناسبة (الحساسية) دى صدقنى أنا أكثر (الكتاب) ترحيباًوسعة صدر بالنقد... وخاصة النقد (غير الموضوعى)!!
| |
|
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
الوجيه محمد عمر الفكى
إن شاء الله تكون الامور إتحسنت من آخر مرة قريت ليك فيها والأزمات كلها إتحلت بما فيها (الأزمة الحصرية) - الفلس وكده- مع إنو دى غايتو (اللهو يعلم)!! بخصوص (السيناريوهات) والتلفزيون وطاش ما طاش والله الكلام ده ممكن بس بعد (الطشاش) ده مايروح !!
| |
|
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
| Quote: ولم نلاحظ ما لا حظته من تكرار |
عزيزى عزان
مسأله النقد بلا شك هى مسأله تندرج بحال من الأحوال تحت حرية التعبير والرأى والرأى الآخر و(الكلام الكتير ده) إلا أنه يقترض على (الناقد) أن يستخدم أدوات ومعايير متفق عليها للوصول إلى النتائج موضحاً أماكن الخلل فى (الأثر الفنى) وهذا ما إلتمست ورجوت الأخ ملاسى القيام به ولا شك إنه لـ (فاعل) !! ولك منى أصدق الود
| |
|
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
Quote: بمناسبة (الحساسية) دى صدقنى أنا أكثر (الكتاب) ترحيباًوسعة صدر بالنقد... وخاصة النقد (غير الموضوعى)!! [/QUOT
عجبتني اخي الفاتح نضوجك وحكمتك وحلمك (وخاصة النقد غير الموضوعي ) نعم يا حبيبي ربي يديك العافية فانت كبييييييييييييييييييييييييير وهذه ثروة لا يملكها الصغار .
| |
|
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
Quote: عزيزى عزان
مسأله النقد بلا شك هى مسأله تندرج بحال من الأحوال تحت حرية التعبير والرأى والرأى الآخر و(الكلام الكتير ده) إلا أنه يقترض على (الناقد) أن يستخدم أدوات ومعايير متفق عليها للوصول إلى النتائج موضحاً أماكن الخلل فى (الأثر الفنى) وهذا ما إلتمست ورجوت الأخ ملاسى القيام به ولا شك إنه لـ (فاعل) !! ولك منى أصدق الود |
| |
|
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
Quote: عزيزى عزان
مسأله النقد بلا شك هى مسأله تندرج بحال من الأحوال تحت حرية التعبير والرأى والرأى الآخر و(الكلام الكتير ده) إلا أنه يقترض على (الناقد) أن يستخدم أدوات ومعايير متفق عليها للوصول إلى النتائج موضحاً أماكن الخلل فى (الأثر الفنى) وهذا ما إلتمست ورجوت الأخ ملاسى القيام به ولا شك إنه لـ (فاعل) !! ولك منى أصدق الود |
| |
|
|
|
|
|
|
|
|
|
Re: (سـيناريوهات) : الحاوى وفك التسجيلات (Re: الفاتح يوسف جبرا)
|
الأستاذ الفاتح جبرا
نحن نقرأ السيناريوهات ونستمتع بها ونتناقلها عبر الإيميلات لبعضنا البعض، أما أولئك الذين يحاولون بنقدهم (المغروض) إسكات صوتك عبر تلك الواحة فحالهم حال المثل القائل "المابتلحقو جدعو"
Quote: نهار الخير
رشوة بسيطية من جريدة السوداني عشان تذكروا موضوعي والله اكتب فيكم موضوع
ـــــــــــــــــــــــــــــــــــ
وأنا أجلس في مكتب صديقي (الواصل) وجدت (كرت دعوة) زواج على مكتبه، غرابة شكل الكرت دعت حاسة (الفضول) في نفسي أن تتحرك وتتحرك إثراً لها يدي لتلتقط (الكرت) والذي هو عبارة عن قطعة من الجلد (الأصلي genuine) ملفوف على طريقة تلك الرسائل التي كان يبعث بها (المقوقس) ملك (الروم) إلى ملوك البلاد التي تتاخم (إمبراطوريته)، قمت بفض (الشريط) الذهبي الذي يلف (الكرت) لأقرأ بخط (كوفي) جميل و(حبر) بماء الذهب أن آل (المسؤول) فلان الفلاني يدعوكم لحضور (عقد قرآن) إبنيهما (المهندس فلان) و(الطبيب علان) وذلك على كريمتي (المسؤول) علان العلاني (الدكتورة علانة) و(المهندسة فلانة) بمسجد الشهيد بالمقرن وذلك بعد صلاة العصر مباشرة كما يدعوكم لتناول طعام العشاء بمنزلهم الكائن بالمنشية شمال شرق (سوق عفراء)!!
سألت صديقي (الواصل) كم يا ترى يكلِّف مثل هذا (الكرت) فرد عليَّ مندهشاً بما معناهو (بتسأل ليه) فأجبته (ياخ مش احتمال أعرس للأولاد وأفكر أعمل ذيو؟) ضحك (صديقي) ضحكة لم أجتهد في تفسير أنها (ده شَعر.. ما عندك ليهو راس)!!
طفقت أسأل نفسي ترى كم يكلِّف مثل هذا الزواج الذي تكلف (كروتو) فقط ملايين الجنيهات؟؟ عن (تمر) و(حلويات) و(بسكويتات) العقد ثم (العشاء) وما يحتويه من (سمك) و(دجاج) و(تحليات) وأطايب و(حاجة باردة) بالطبع ذلك غير قيمة إيجار (الصالة) الفارهة ذات (الكراسي) و(الكوشة الوثيرة) وكاميرات (الفديو) وشاشات (البلازما) والتصوير (الفوتوغرافي) و(فستان الزفاف) و(زفة الليزر) -التي أسمع بها فقط- وأخيراً (غير) شهر العسل من (تذاكر سفر) و(إقامة) وهدايا والذي بالطبع لن يكون في (أركويت)!!
قلت لصديقي (الواصل) بعد أن عدت من (تلك التضريبات):
- يعني (عرس بالجوز) وكمان بالمليارات
- العندو (حناء)!!
- هسع (حناء) ذي دي معقول الزول يكون جابا بي عرق (جبينو) هو أصلو (جبينو ده) قدر شنو؟؟
تذكرت ما دار في مكتب صديقي أعلاه عندما كنت أجلس بالأمس مع جاري (الموظف السابق) والذي لديه ست من البنات كلهن في سن (الزواج) يود أن يزوجهن ويرتاح من (المسؤولية) إلا انه حكى لي حكاية أغرب من الخيال.
قال لي بأن أحد الشباب تقدَّم لخطوبة (ابنته الكبرى) فوافق على الفور لا سيما (أنها الكبرى) غير أن (الشاب) قد طلب أن تخرج معه (الخطيبة) مرة مرتين حتى يتعارفا بصورة أكبر فوافق (جاري) على أن يصطحبان معهما (شقيقها) الصغير، وخرجا إلى أحد (المنتزهات) حيث قضيا وقتا لا بأس به وبعد أن عادت (البنت) إلى المنزل سألها والدها عن رأيها في (العريس) فقالت له إنه لا بأس به سوى أنه طوال جلوسهما لم تفارق (اللبانة) فمه، امتعض (جاري) لما قالته له (ابنته) ولم يترك المسأله تمر حيث قام بمخاطبة (الخطيب) في أول سانحة قائلاً له: والله يا ابنى إنت ما فيك أي حاجة لكن بس حكاية (مضغ اللبانه) الطوالي ده ما عاجبني فرد عليه الخطيب: والله يا حاج (اللبانه) دي ما (بلوكا) إلا لما ما (أدخن) وهنا رد عليه أبو البت في استغراب: وكمان بتدخن؟
- والله بس ما بدخن (حمراء) إلا لمن أكون داير (أحبس) بيها (خضراء).
- الله وكمان بتتسطل؟
- لا يا حاج ما بتسطل إلا لمن (الشربة) تكون مافي.
- وكمان بتشرب؟؟
- والله يا حاج الشراب ده إلا لمن أقعد مع الشلة الكانت معانا في (السجن).
- لا.. لا.. لا وكمان كنت مسجون... قضيتك شنو؟؟
- لا بس كتلت ليا واحد.
- وكتلتو ليه؟
- خطبت بنتو وقال أنا ما عاجو.
بعد أن حكى لي جاري (الموظف السابق) هذه الحكاية الغريبة سألته في شغف:
- أها وقلت لي بتك شنو؟
- أقول ليها شنو يعني؟ ما قلت ليها شنو يعني لو (لاك لبانة) ما الناس دي كلها بتلوك (لبان)!!
الفاتح يوسف جبرا
|
| |
|
|
|
|
|
|
|
| |
الفاتح يوسف جبرا
عزان سعيد
Abdelmuhsin Said
Hussein Mallasi
Adel Sameer Tawfiq
محمد عمر الفكي
الطاهر ساتي
الطيب شيقوق
فيس بوك
تويتر
انستقرام
يوتيوب
بنتيريست