(هذه هي الحياة أنك تتنازل عن متعك الواحدة بعد الأخرى حتى لا يبقي منها شيء وعندئذ تعلم أنه قد حان وقت الرحيل) - نجيب محفوظ -
صلة الماضي: لحظت أن في المنبر نفر من جيل بعينه لهم ذات الذكريات فانتخبت الإندياح.
نفر تستهويهم شخوص بعينها وأحداث لن تتكرر وصور لن يعاد إنتاجها، يعني ناس فتحوا عيونم على حال محدد ولهم لغة مشتركة ويبكون ويفرحون لذات الأشياء تقريبا في توحد نادر لجغرافيا القلب وكنتور الوجدان ، ممكن نسميهم (جيران الضمير) ، تبتدرهم بكلمة فيكملون العبارة ، تفكر في فعل تجدهم سبقوك إليه ، سيأتي بعضهم بأريحية معهودة ، هي بعض صفات ذلك الزمن الأخضر وأهله التلبثانيين ، ليحكي عن (ناسنا) وزمنهم ويضيف إلى هنا.
ربما يقال أننا في حال بكاء مستمر على ماض لن يعود وأننا جيل كله من مواليد برج الفجيعة ورغم ذلك يعزي النفس بأنه شهد أياما جميلة وبشرا جميلين في كل زواياالحياة ، في السياسة والفن والرياضه والأدب والضواحي وطرف المداين ، هؤلاء البشر الجميلين أسميتهم (ناسنا) ، هم الذين شكلوا وجداننا وذاكرة خلايانا وغزير ملفات أجسامنا الأثيرية.
هذه مساحة للكثير، مساحة لاستكمال فراغات في الذاكرة نشأت بفعل عوامل تعرية الخاطر، بالنسبة للبعض هي تباك على ماض وممارسة عادية للأحزان لكنها عندي تقوم مقام الغُسل في تطهير الروح ، ولآخرين ربما تكون استنهاضا لهمم، أوهكذا ظننت.
ايام كانت بهية بصوت عوض عمر يوقظنا فجرا وتغارب الشمس ونحن امام تلفاز تصدح فيه تلك السمهرية السمراء (مريام ماكيبا) بغناء لانفهمه ولكن نعرفه وكاس أفريقيا بيد أمين زكي ، ظهيرة أطربنا فيها إنشاد حامد العربي و أبوداؤود ، شقيش قول لي يا مروح ..الدلنج؟ رويحة الهاويه يا مجافيه تنقلك كصرح بلقيس من المسالمه إلى النهود مساءا عبر كونكشن ( الخُوَي) ، كينياتا جيتنا وفيك ملامحنا والبي جيز و مشترك الخرطوم نيالا فلواري الفاشر. البلوستارز، زمن كان فيه مانديلا وسانتو وناصر وهوشي مِنَّه ينظمون حماسنا وحمدي بولاد أو بدرالدين ووردي في الميدان يلملمون أشجاننا.. وسهرتنا الليلة فادن مني وخذ اليك حناني، خارطة يرسمها تاج السر الحسن لآسيا وافريقيا بدعم لوجستي من مظفر ونزار وإسناد ظاهر من على المك وودالمكي . جبل مره أو فراش القاش ، الربوع والنعام آدم وال kung fu fighting.
أيام تربع فيها جيفارا على القلوب والقمصان وما كنت عارف وبادي الما هو عارف قدمو المفارق ، حكاوي الخؤولة عن لوممبا وتقدم الفياتكونغ في أخبارنا بعد السماني أحمد عالم وأشياء لاتنتهي ، زي الهوى .. ياحبيبي حبيب اصطمبوليه منوت بول أو وليم أندريه و عشه الفلاتية ورحمك الله يا شيخ الهديه. هي الذكريات ضاع منها الكثير وولّى الإرشيف فمن كان له منها فليعد بها علينا ، وينكم يا ليلى ليلك جنَ، لاشوفةً تبل الشوق ولا رداً يطمِّن ، اكتبوا عمن تختاروه من (ناسنا) بغالي الحروف كتعويض مُجزِ عن صور إبتلَّت بمياه آسنة حتى كادت أن تنمحي من صومعة الذاكره,
أنظركم أن تتداعوا لتعيدوا لخلايا ذاكرتنا البهاء بصور كانت جميلة الوضوح وواضحة الجمال حتى أنهكها سفر الليالي الطوال و حمى الضنك والنيران ( الصديقة) ،
حاشية: (أصدق الحزن ابتسامة في عيون دامعة)
11-24-2007, 08:49 AM
tmbis tmbis
تاريخ التسجيل: 10-19-2002
مجموع المشاركات: 24862
Eagles - Hotel California On a dark desert highway, cool wind in my hair Warm smell of colitas, rising up through the air Up ahead in the distance, I saw a shimmering light My head grew heavy and my sight grew dim I had to stop for the night There she stood in the doorway; I heard the mission bell And I was thinking to myself, this could be heaven or this could be hell Then she lit up a candle and she showed me the way There were voices down the corridor, I thought I heard them say... Welcome to the hotel california Such a lovely place Such a lovely face Plenty of room at the hotel california Any time of year, you can find it here Her mind is tiffany-twisted, she got the mercedes bends She got a lot of pretty, pretty boys, that she calls friends How they dance in the courtyard, sweet summer sweat. Some dance to remember, some dance to forget So I called up the captain, please bring me my wine He said, we havent had that spirit here since nineteen sixty nine And still those voices are calling from far away, Wake you up in the middle of the night Just to hear them say... Welcome to the hotel california Such a lovely place Such a lovely face They livin it up at the hotel california What a nice surprise, bring your alibis Mirrors on the ceiling, The pink champagne on ice And she said we are all just prisoners here, of our own device And in the masters chambers, They gathered for the feast The stab it with their steely knives, But they just cant kill the beast Last thing I remember, I was Running for the door I had to find the passage back To the place I was before relax, said the night man, We are programmed to receive. You can checkout any time you like, But you can never leave! .. Miriam Makeba
11-24-2007, 09:48 AM
Emad Abdulla Emad Abdulla
تاريخ التسجيل: 09-18-2005
مجموع المشاركات: 6751
فتك به الشجن القديم ود المرتضى .. قلت بذلك و أنا أجوس فيما كتبته يا صاحب , و معه تجيش بي الذواكر التي كانت .. قيل جلدٌ هو للذات .. و ربما محاولة لرتق شملة كنيز الروح .. ماهم إن كان هذا أو ذاك .. عني أنا أحسبها ردة تحريضية على الحراك - و نفخ في الروح - لعل الجذوة ما تزال هناك تحت السجم و الرماد تتقد . ثم يا تمبس ما تلاوز لينا الله يرضى عليك . المهم .. قرأت العنوان ( ناسنا ) .. فخيل لي أن مرتضى يتحدث عن " ناسا " الأمريكية .. قلت مرتضى ما يخليهو في الإبداع و القانون و الفنون .. مالو و مال الشعر الماعندو ليهو عنقرة .. قال العبادي : حليل الناسا وناسا طريت أم در حليل ناسا وكيف أنساها وأتناسا ومفتون بي ظبي كناسا طربت يا صاحبي المرتضى .. شفت ( حليل ناسا ) دي يا مرتضى .. !! متعبة ياخ .. و مليانة حياة كاملة .. زمان و مكان .. محتشدة بتفاصيل التفاصيل البتطلع زيت الواحد و تعصر قلبو لامن ينفقع ..
طربت من حديثك هذا يدخلني في كورجة ( ناسنا ) .. أخيرا جداً عندي ( ناسنا ) ..
جاييك .. مودتي .
11-24-2007, 09:54 AM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
حبيبنا تمبس، ميريام ماكيبا، كم أعجبنا بها ونحن وقتها لانفهم شيئا عن أفريقيا والتحرر وغناويها وصوتها الذي يصادر حقك في التقييم بدكتاتورية سافرة فلا يترك لك سوى الإنحياز والإنشداه. كنا صغارا لانعرف لماذا جاءتنا إلى الخرطوم ولكن في ذلك الزمن كانت الخرطوم محجا لكل المدهشين والعابرين من اليسار الى الحنين على اعتقاد بأن الخوارق (يمكن) أن تعاد، إنبسطت من أسلوب غناها وبقيت اتابع أخبارا التي لم تقصر وسائل الخرطوم في نقلها لنا وتابعنا الخيط حتى ستوكلي كارمايكل وغيابه الغيني من عند سيكوتوري. تمبس ، الفيديو كليب بتاع السمحه دي (أبيض واسود) لو كنت جبت غيرو واحد جديد ملون كان خذلتني لأنك تعرف عبقرية الزمان والمكان ، لكنك ما بتخذل ابدا. قربك يضيف إلى هنا ما أبتغيه. أحييك دوت كوم ألف سلام .
11-24-2007, 11:47 AM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
Quote: ايام زمان يا حليلا راحت زمن كسر رأس السكر بي البلنجة والموية من الزير
خالد مراحب يا ما منسي، قلت لي راس السكر؟ بالطبع لم نشهد تلك الأيام الجميله لكن دائما ما نسمع عن راس السكر ووحدة وزن تسمى ( الوَقََه) وقيل أن الدنيا كانت (رخا) بمستوى لايصدق. تعرف يا خالد كلمة (بلنجه) دي آخر مره سمعت بيها متين ما عارف. أهو جبت لينا مصطلحات اندثرت من زمن وبالفعل أتيتنا بكلمات من ذلك الزمن ، ويبدو لي ان سلسلة أفلام بد سبنسر وترنس هيل ( ترنتي) وناس جوليانو جيما ( ديجانقو الإيطالي) تقفز كلها للذهن مع كلمة (بلنجه). عاش الشعب وسحقا ل (اللوج). أرجو ان تبقى ملازما لهذه المساحه.
04-25-2008, 03:33 PM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5671
Quote: لاحول ولا قوة الابالله --- بعد مسافة حتي اتذكرت معني الشعب واللوج
يا عبداللطيف في زول بينسى الشعب؟
Quote: ولولا اللوج الشاذة لما اتذكرت الشعب.
اللوج؟ لاحول ولا قوة إلا بالله ، اللوج شاذ؟ يا عزيز دا لما كان الأنوار تضاء في الإستراحه وتشوف ناس اللوج ، أقصد ناس اللوج زمن كان في لوج ، يعني تقول... غايتو. ياعبداللطيف قول يا لطيف.
ياالعزيز مداخلتك دي يعلم الله شفتها هسي في مراجعة سريعة للبوست لأنك عملتها في الصفحة الأولى في وقت كان الصفحة الرابعه (شغاله) وقلت (الشيك) ده أحسن آخدو وأصرفو بسرعه قبل البنك يقفل أو الشيك تنتهي مدة صلاحيته. ِشكرا يا أمير
11-24-2007, 02:34 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ربما يقال أننا في حال بكاء مستمر على ماض لن يعود وأننا جيل كله من مواليد برج الفجيعة ورغم ذلك يعزي النفس بأنه شهد أياما جميلة وبشرا جميلين في كل زواياالحياة ، في السياسة والفن والرياضه والأدب والضواحي وطرف المداين ، هؤلاء البشر الجميلين أسميتهم (ناسنا) ، هم الذين شكلوا وجداننا وذاكرة خلايانا وغزير ملفات أجسامنا الأثيرية.
رغم خروجي من السودان وانا في الربع الاخير من العقد الثالث (العشرينات اقصد) والان انا في السادس (الخمسينات) الا ان "ناسنا" كانو هم ناس جيل سبقني واجيال بعدي وما زالو "ناسنا" في الخاطر .. هم علائم في خارطة حياتنا ان التفتنا خلفنا نراهم في ماضينا وانا نظرنا الي الامام نراهم في وجداننا .. بقيو معنا ارثا يوميا لزمان حسبناه لا يذهب وذهب وذهبنا وبقيت ايام في وجداننا .. ناسنا كانو في تجانس مع ذلك الزمن فلا ينفصلون عنه ولقد كان الزمن لهم خاصتهم فبقينا جميعا في ذاك الزمن ... ومعكم في معية ناسنا
انها حقا لحظة مخاض انتظمت حروفا و كلام يحكى عن حكاوى و اهات و اشواق تقول للناس حكاية... رجعة الامل المسافر.. رجعة المساء فى عيون متغربة... رحلة الحب والصبايا.. فعلا نحن من يقتله الطرب و الانتشاء حين يسمع ذكرياتنا مهما كانت برضو ترديدا بيألم انه وحيح الذكريات الذى يقتلنا ثم يحيينا من جديد... نحن نتفاعل مع وراء البسمات كتمت دموع بكيت من غير تحس بى نعيد الشريط مرة و مرة و نسمع بعدها بكرة الريد بدون مواعيد يزورك يا حياة عمرى و تقول يا ريتنى لو حبيت زمان من بدرى... انها كالرسالة تحت الماء التى لا بد من الغوص لفتحها و قرأتها...و اهلنا عيونهم تتمنى الهم ما يلاقينا.. ربما نعيش فى زمان غير زماننا.. ربما انه عصر المفارقات الذى يريد ان يعيد صياغتنا من جديد و نحن نرفض و نرفض التخلى من اشياءنا الجميلة نرفض التخلى عن بنحب من بلدنا ما من برة البلد و حتى فى الحزن القديم نتمسك بأمل الدوش عندما يقول تجينى و يجينى معاك زمن امتع نفسى بالدهشة... لقد ادمنا الكلام والشعر والرسم والموسيقى.. لن نترك مواهبنا تموت فى دواخلنا اننا دايما ننتظر الربيع لنتعطر برايحة الورود ونتأمل الفراشات وهى تنشر هذا العبير الفواح للمجبين والعشاق..لن ينقطع حبل الغناء المدود ولن يسكت صوت الكلام وستظل رموش اعيننا عرشا للكلام الما كمل..
و بمحااسن الكون و بجماال الغيد يلا نمشى النيل فى اواخر الليل بين رماال و نخيل يغنى لينا جميل: بوبا عليك تقيل القمر بوبا عليك تقيل و انت ريحتك ريحة الفرير ولا بت السودان اصيل... و يلا............
و لك التحية يا ود المرتضى....
11-24-2007, 11:57 AM
abubakr abubakr
تاريخ التسجيل: 04-22-2002
مجموع المشاركات: 16044
قال رسول الله (صلي الله علية وسلم) : "رحم الله رجلاً سمحاً إذا باع ، سمحاً إذا اشترى ، سمحاً إّذا اقتضى" .
(محمود) مرفوع الهامة يمشي
عماد عبدالله
Quote: عني أنا أحسبها ردة تحريضية على الحراك - و نفخ في الروح - لعل الجذوة ما تزال هناك تحت السجم و الرماد تتقد .
Quote: زمان و مكان .. محتشدة بتفاصيل التفاصيل البتطلع زيت الواحد و تعصر قلبو لامن ينفقع ..
ياعمده ، لا اجامل في انحيازي لجمالك وأدبك ، الردة التحريضية تعبير لايتوفر لأمثالي فيعجبهم ويظلوا يرددونه في دواخلهم ولرفاقهم ، أجمل مافي هذا المنبر أنك هنا تلتقي بشرا لا يضيفوا لمفرداتك النفيس بل يطلقوك في خيال معان ومضامين جديدة كنت تراها قصية ، والتحريض الإرتدادي يذكرني بالتسونامي والإنشقاق في قاع المحيط. أحمدالله يا عمده أن جل ذكرياتي كانت جميلة وإلا فما أتعسني لأنه كما قال أحدهم : (إن كانت لك ذاكرة قوية وذكريات مريرة فأنت أشقى أهل الأرض).
أنتظرك فاعصر قلبك هنا حتى يلين.
11-24-2007, 12:19 PM
abubakr abubakr
تاريخ التسجيل: 04-22-2002
مجموع المشاركات: 16044
جيلي جيل الستينات ومطلع السبعينات في جامعة الخرطوم .. جيل اكتوبر وما بعده وجدناه بيننا كاتحادنا ومظاهراتنا وليالينا الثقافية ومعارضنا ومسرحنا وانتخاباتنا ورحلاتنا كان معنا ينتمي الي نفس الجامعة كان يعمل فيها ونحن ندرس فيها وكان من ناسنا الذي اثرو ليالينا حماسة وبهجة و صار قائما في وجداننا نحن القادمون الي صرة بلادنا من كل اركانها وبالسن وسحن شتي و حتي اليوم والي وان غادر الفانية فهو من ناسنا ..عليه الرحمة
نا سنا استاذ محمد المرتضى سلامات نعم بلحيل أننا فى حال بكاء . ديك يا محمد ايام ديك ايام الطموحات السياسية والأدبية ايام العلاقات الحميمة عهد الصداقات الجد __ كانت يا محمد تطل أمنيات السودان الواحد الكبير وما بين النيلين كانت جنة افريقيا لكن الفاس وقع فى الراس واتشربكت شربكت السبيب فى كراع السوسيوه انشاءالله يا محمد ما تختفى تلك الأحلام من الحياة . الشعب ده يستاهل كل خير وعلينا واجب ضخم .. تحياتى
11-24-2007, 03:48 PM
فضيلي جماع فضيلي جماع
تاريخ التسجيل: 01-02-2004
مجموع المشاركات: 6315
أعترف أن شهادتي عن بعض (ناسنا) الذين نلتقيهم في هذا الموقع من الرجال والنساء شهادة مجروحة، ذلك لأني لا أخفي محبتي لهم وإعجابي بهم حتى وأنا أسن قلمي مقرظا بعض إبداعهم أو منقبا عن هفوة أدعي أنني أعالجها. ورجل القانون الأديب / محمدالمرتضى حامد أحد هؤلاء الذين أحسب شهادتي عنهم مجروحة- خاصة حين تكون الشهادة إيجابا. من جميل ما تعلمه المرتضى من ممارسة مهنة القانون (وهو ما شاء الله يخطو سلم النجاح بثقة رغم صغر سنه).....(( والأخيرة دي طبعا حتريحوا شديد يا عماد عبدالله!)) أقول..من جميل ما تعلمه محمدالمرتضى من أزقة ومنعطفات مهنة القانون استخدام مهماز الإيعاز والإشارة الخاطفة إلى مساحة مهملة وملقاة في مكان نسيناأن نغشاه..هذا المكان قد يكون مربعا في تجاويف الذاكرة ودهاليزها وقد يكون مجرد إشارة إلى شيء فينا بمقام الماء والهواء والنفس لكنا لا نذكره رغم إننا نعيشه كل لحظة أو نحاول أن نعيشه لأن الحياة بدونه عدم..وأشير هنا إلى (الحب في المنبر)، هذا البوست الناجح بكل المقاييس والذي جعلنا رجالا ونساء (نتكلم هبطرش) ..التقول الحب دا كان غايب وجانا مقبل النهار دا! وحين يكتب محمدالمرتضى قائلا:
Quote: هذه مساحة للكثير، مساحة لاستكمال فراغات في الذاكرة نشأت بفعل عوامل تعرية الخاطر، بالنسبة للبعض هي تباك على ماض وممارسة عادية للأحزان لكنها عندي تقوم مقام الغُسل في تطهير الروح ، ولآخرين ربما تكون استنهاضا لهمم، أوهكذا ظننت.
يستطيع أي قاريء حصيف أن يدرك ذكاء بعض الكتابة من رتابة بعضها الآخر. بمثل هذا المهماز المعافى أيقظ المرتضى ذاكرة وهموم أجيال تراوحت بين ستينات القرن الماضي وثمانيناتها. هنا يصبح للتذكر والرحلة في الأمس القريب/البعيد طعم ولون ورائحة.
أيها الصديق الأديب محمدالمرتضى حامد، فتحت بهذا المقال البسيط والعميق في الوقت ذاته ناقذة في أعماق كثير من النساء والرجال ممن أتوا مستطلعين، وكأني بكل منهم -إذ يقرأ البوست - يبحر وحيدا في عالمه ليلاقي ناسه الذين هم في واقع الأمر......(ناسنا) !!
جيتني في الصميم و أصبت الوتر الحساس أو بلغة القتال ضربتني في التنك أنا غايتو لحدي يوم الليله ما قادر أتعايش مع الحاضر حق اليومين دي نصف حياتي اليومية أعيشها في ماضي الزكريات أقضي نصف يومي مستمعا الي أغاني اذاعة أمدرمان بتاعت زمان ديك حاولت ولم أستطيع أن أطرب لأي فنان غني بعد 1979م تتخيل انو الأن ما عندي أي علاقة بالتلفزيون أو الاذاعة لكن لحدي يوم الليلة حافظ أسماء المذيعين وبرامجهم وشعارات البرامج ومواعيد تقديمها الكانت زمان حتي كل الاعلانات الكانت بتبث عبر الأثير
عبر الأثير بكتب حروف لست هواي و أرسلها تلقاها من مخلص عزيز تنزل دموعها تبللها تقراها لي أخر حرف وتعيدها تاني من أولها
أتذكر جيدا برنامج عمر الجزلي " أغنياتي و زكرياتي " وشعار البرنامج يغني فيهو ابراهيم عوض "أنا عهدي راح ما أظنو أتي وما فضل يا ناس غير أغنياتي" وعثمان حسين " انها رقيتي التي خلدت لحن شهرتي ".
ويوم الخميس يفكونا بدري من المدرسة نجي جارين جري عشان نحصل برنامج الحان بتاع معتصم فضل وبرضو برنامج حقيبة الفن لو نمت يوم الثلاثاء ممكن تحضروا يوم الجمعة الصباح.
باختصار يا ود المرتضي ما بتلقي زول يحبك زينا نحن يانا ناسك ولو بتلقي ما بنعاتبك.
11-24-2007, 04:21 PM
خالد علي محجوب المنسي خالد علي محجوب المنسي
تاريخ التسجيل: 04-09-2006
مجموع المشاركات: 15968
والله يا ودالمرتضى الله يديك العافية كبيت الماء في الجحر فخرج وخرجت كل أرباب المعشات
Quote: ماعارف الاغنية دي راكبة مزاجي ليه كان لها وقع غريب فى نفسي هل نحن فعلا كنا امة امجاد
وحتى انا كنت ومازلت. من أكثر الأناشيد الوطنية التي تعجبني
عليكم الله فقط مطلعه ألا يصلح أن يكون هو نشيدنا الوطني بدل الخرمجة التي أرثناها من نميري دي وعضت عليه الأنقاذ بالنواجز. أمتي يا أمة الأمجاد والماضي العريق يانشيد في دمي يحيَّ ويجري في عروقي آذن الفجر الذي شقَّ الدياجي وطريق النصر قد لاح فسيرّي في الطريقي
حبيبنا الزاكي الباهي، هي استدعاء جماعي لأيام نتمنى ، لجمالها، ألا تغادر مخيلتنا حتى في المنام. تعرف يا زاكي ، من فرط حبنا لتلك الأيام اصبحنا نحب حتى من ظلمنا فيها. أنت ممن يضيف هنا لأن لديك الكثير مما ينسب لتلك الفترة. محبتي ايها الأديب.
11-24-2007, 11:06 PM
معتصم عبدالرحيم معتصم عبدالرحيم
تاريخ التسجيل: 01-24-2007
مجموع المشاركات: 425
لااريد ان اقول ايام لها إياقاع, بل الحياة كلها كانت ايقاع,لك الثناء كله اخي المستشار وانت تُهز شجر الزكريات الطيبة هزاً , فبطرقك هذا ياتينا الثمر الطيب إنشاءالله, وهاهي بوادر الغيث قد جادت وسيأتي الكثير.
كان السودان ,ومنقو لاعاش من يفصلنا وكان عمك تنقو والعازة وهناك المدونة الطبيعية, كان مكي سنادة وخطوبة سهير وكان المسرح القومي واكل عيش وتور الجر, كان التلفزيون متوكل كمال وكمال كيلا وفريد عبدالوهاب ومختارات وابا تصدح بداً وختاما.وهناك افطار رمضان والمسلسل الاذاعي الدهباية وشنقلي طوباية ومحطةالتلفزيون الاهلية المبدع فناًالراحل العُميري وعادل امام السودان محمد نعيم سعد.
كان كسلا وكان يشارة وكان ابوالعز وفوزي الاسد كان سانتو والموردة بتلعب الصياد والعاتي اخوان وعصام باسطة, كانت زهرة السوسن سيكا وقدورة وبكنباور , كان الفن في كل مكان من الاستاد والي اقرب صيوان وفرح للصباح يمتد.
كانت الجرايد تُقراء من كلمة التحرير والي اين تسهر هذا المساء , كانت احبار اليوم والجمهورية وصباح الخير , كان العالم كله بين يديك,
انه عالم فسيح أُهيج , فصعب ان يُجاري بالكي بورد, ولكن لنا عودة
معتصم العربي
11-25-2007, 09:15 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: ربما يقال أننا في حال بكاء مستمر على ماض لن يعود وأننا جيل كله من مواليد برج الفجيعة ورغم ذلك يعزي النفس بأنه شهد أياما جميلة وبشرا جميلين في كل زواياالحياة ، في السياسة والفن والرياضه والأدب والضواحي وطرف المداين ، هؤلاء البشر الجميلين أسميتهم (ناسنا) ، هم الذين شكلوا وجداننا وذاكرة خلايانا وغزير ملفات أجسامنا الأثيرية.
سئل الاصمعى كيف تعرف وفاء الرجل قال اذا اردت ان تعرف وفاء الرجل فانظر الى حنينه الى اوطانه وتشوقه الى اخوانه وبكائه على ما مضى من زمانه .
(ثمة هويات متعددة دون ان تتناقض فهي هويات لا ترتكز على الدين اوالإثنيه او القبلية او العقيدة، ولكنها ترتكز على قيم انسانية صرفة . ولعمري فالشخصية التي تتدثر بهذه الخواص لا يمكن ان نعتبرها (كوزمو بلوتينيه) بمعني انها فاقدة الانتماء، ولكنها تنتمي الى قيم انسانية شاملة وعامة يمكن ان تعمل داخل أى بيئة اومحيط جغرافي) راجع مقال الدكتور حيدر ابراهيم في جريدة الصحافة عن الهوية السودانية في تيار ( كما تشاء يا استاذنا فضيلي جماع) او رواية الغابة والصحراء .
فشخصية الاستاذ المرتضى الاديب الاريب عابرة لحدود المكان والمعتقد واللون والأصل ولهذا تجد كتاباته المتميزة القبول من نخب وصفوييّ المنبر العام بتباين انتماءاتهم .
بوست ناسنا الوليد هذا يمثل في تقديري مساحة للكتابة عن ماضي متميز بثقافاتــه وهوية انسانه . ثقافة صنعها رجال طيبون يحبون الارض والعرض والوطن . ناسنا عنوان لا اجد اقرب اليه في التشبيه الا مفهوم الرجل العادي((The reasonable man في فقه القانون الانجلوسكسونى . ناسنا فيهم الذين اسهموا بفكرهم في الحياة الانسانية جمعاء فهولاء ناسنا (Globally) وناسنا من هم اسهموا في صناعة تاريخنا السياسي والادبي والفني والرياضى وهولاء هم ناسنا (Domestically) .
ناسنا يا المرتضى قد يكون جيل المدارس الصغرى بمناهجها ( غنمي ترعى طول اليوم وبها اسعى طول اليوم وتمتد الى طه القرشي مريض ) او المدارس الاولية باناشيدها (في القولد التقيت بالصديق انعم به من فضل صديق ثم الى اناشيد منقو قل لا عاش من يفصلنا) . ويقيني ان العلاقات التي صنعتها تلك الحقبة والحميمية التي تجسدت في وجدان هولاء تجاه زملاء واساتذة تلك الفترة لا تضاهيها اى علاقات في المراحل التي تلتها في الثانوي او الجامعة . فلا اخال اى منا ينسى اى طالب زامله خلالها حتى وان كان من المراحل الخلفية او المتقدمة ويعود ذلك الى عدة اسباب اولها انتقال الطالب من حياة القرية الذي كان يجد فيها حرية الحركة التي قد تكون تشرّك للزرزور بالشبكة او صاري عينه طول النهار مع نيشان النبلة ليرمى اى طائر في الهواء او محربس فوق فرع شجرة ،الى مرحلة منظمة في زيّها المدرسي وسكنها ووجباتها وساعات الدراسة وحتى ساعات الرياضة . كان برنامج هولاء اليومي يسمح بالتواصل اما من خلال قاعات الدراسة او المذاكرة المسائية او تمام الداخليات الذى يعمل مرتين في اليوم مرة بعد القيلولة واخرى عند النوم او في ميادين الرياضة او حتى في المسارح المدرسية .
كانت المدارس والمنتديات وحتى ليالي السمر ملتقى لناسنا منهم البندري وفيهم الريفي ومعهم البدوي و تتلاقح ثقافات المدينة والقرية والبادية لتنتج تشكيلة فريدة تعكس الهوية الكلية للشعب السوداني خلال حقبة من الزمن ولعل اميز مثال لذلك اغاني الحقيبة عند ود الرضى والمساح وابو صلاح وخليل فرح ويمتد هذا الى العبادي مع هوندة الرماش في رحلته مع امين نابري على متن الفيات في ضهاري سنجه .
ذهبوا وهم باقون وتواروا وهم حاضرون وصرنا نتعاطى من فتات ما خلفوه من ابداع في شتى امورنا الحياتية وها نحن آنئذ نتلمس الخطى في نفق مظلم نستغرق السمع لمن حتى يشجينا ب :
ياحليلو زمان لما الطبيب انسان تعال وشوف الآن ياعوض دكام العلاج قاسي والكشف أرقام كلام ياعوض دكام جينا نحكي ليك ياعوض دكام جينا نشكي ليك جامعة بالدولار والفهم أقسام ياعوض دكام يوروب ونايل سات كتروا القنوات كلو دي في دي وخلو بال سيكام ياعوض دكام شوف درامتنا ياعوض دكام شينة شاشتنا السينما غلبتنا ياعوض دكام شوف ناس كايرو وشوفو ناس الشام كلام ياعوض دكام شوف لعيبتنا ياعوض دكام شينة كورتنا ياعوض دكام
لك ايها الحبيب اطيب امنياتي
11-27-2007, 08:48 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: . ناسنا عنوان لا اجد اقرب اليه في التشبيه الا مفهوم الرجل العادي((The reasonable man في فقه القانون الانجلوسكسونى . ناسنا فيهم الذين اسهموا بفكرهم في الحياة الانسانية جمعاء فهولاء ناسنا (Globally) وناسنا من هم اسهموا في صناعة تاريخنا السياسي والادبي والفني والرياضى وهولاء هم ناسنا (Domestically) .
الطيب الودود، تعرف معيار الرجل العادي ده حلحل لي كلام كتير والله يديك العافيه أصلك بتقول الكلام المابقدر عليهو وهشام هباني دا ما تحقق معاهو كتير في قصة الهدايه دي ، في ذلك الزمن كان هشام ، وأنت شاهد على ذلك، الطالب الوحيد في كلية القانون الذي لاتفارق الإبتسامة وجهه الصبوح واللي ما شاف هشام منذ عقدين أو على (أرض الواقع) حايعتقد إنو اللي في المنبر دا نسخه من (رامبو) ،أنا قاصد سلفستر ستالوني، التحايا لك يا شيقوق ولحبيبنا هشام.
11-27-2007, 11:49 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
شوف ناسنا من قبيلة المحامين زمان يا المرتضى اخوى :
يروى ان الاستاذ عبد الغفار يوسف المحامي - الله يرحمه- كان معروف بتشدده مع من يؤجر له عقاره فلا يخلي المحل لمالكها الا بعد مقاضاته .
استاجر الاستاذ عبد الغفار محلا من احد مواطنى سنجة وبعد انتهاء الفترة التعاقدية طالب المالك الاستاذ عبد الغفار لاخلاء عقاره . لم يستجب عبد الغفار لطلب المالك مما اضطر الاخير لاقامة دعوى مدنية ضده امام محكمة سنجة مطالبا اياه بالاخلاء.
بحث ،المواطن المغلوب على امره ، عن محامي ليترافع نيابة عنه ضد عبد الغفار وللاسف ذهب لجميع محاميي سنجة وسنار ومدنى وجميعهم رفضوا التمثيل ضد زميل لهم في المهنة .
سافر المواطن هذا الى الخرطوم وفي ساحة المحكمة الجزئية صار يصيح ( والله مافي عدالة والله العدالة انتهت - المحامين يقلعوا حقنا ولا نجد من يدافع عنا)
في تلك الاثناء اتي الاستاذ احمد خير المحامي وسمع الرجل يصرخ . استوقف الرجل وساله عن الحاصل وروى له ما بينه وعبد الغفار في سنجه. غيرة الاستاذ احمد خير على العدالة وسيادة حكم القانون دفعته ليبادر لهذا المواطن بقوله له انه سيكون في سنجة في الجلسة المقررة دون ان يسأل المواطن عن اى اتعاب .
في يوم الجلسة المحددة وصل الاستاذ احمد خير مدينة سنجة وذهب على طول الى مكتب الاستاذ عبد الغفار . بعد التحية استفسره الاستاذ عبد الغفار عن اسباب حضوره سنجة فقال له احمد خير (انا جيتك انت يا عبد الغفار اخوى) وحكى لعبد الغفار مشهد المواطن وهو يصرخ في ساحة المحكمة . وقال لعبد الغفار قيمة اشعار المواطن بسيادة حكم القانون والعدل اكبر من قيمة علاقاتنا الشخصية واتيتكم اليوم لاضحى بعلاقة الزمالة المهنية لصالح قيمة العدل . رد عليه عبد الغفار (اذا دى الجابتك من الخرطوم يا استاذنا فتفضل استلم مفتاح هذا الرجل وساذهب معك المحكمة لاستصدار حكم اقراري ضدى .
بالفعل ذهب الاثنان المحكمة واقر عبد الغفار بطلبات المواطن البسيط وصدر حكم اقراري بالاخلاء .
الغريب في الامر ان المواطن نفسه وقف امام المحكمة وقال للقاضى (انا كنت بس عايز اعرف البلد فيهو عدالة ولاّ لا . وطالما انتو كدا على الطلاق هاك يا عبد الغفار المفتاح وامشى اسكن في المحل ما دمت حيا) .
11-25-2007, 04:50 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: في تلك الاثناء اتي الاستاذ احمد خير المحامي وسمع الرجل يصرخ . استوقف الرجل وساله عن الحاصل وروى له ما بينه وعبد الغفار في سنجه. غيرة الاستاذ احمد خير على العدالة وسيادة حكم القانون دفعته ليبادر لهذا المواطن بقوله له انه سيكون في سنجة في الجلسة المقررة دون ان يسأل المواطن عن اى اتعاب .
المرحوم الاستاذ احمد خير هو من ناس السودان كلهم ...دوره في استقلال السوداني رائد الم يكن الاهم ولكنه فضل ان يبقي بعيدا طالما ادي دورا وطنيا تاريخيا مجيدا .. دة من "ناسنا"
11-25-2007, 10:29 AM
mamkouna mamkouna
تاريخ التسجيل: 12-05-2004
مجموع المشاركات: 2246
الأخ العزيز / ابوبكر انه من ناسنا فعلا فلقد سيطر على الوجدان واحتل مساحة كبيرة في القلب لذلك كان في الذاكرة دائما لان هذا الرجل الفن عنده قضية ومسئولية ..بادي محمد الطيب كل من عرفه أحبه واحترمه لأنه رجل يحترم فنه ووهب حياته لهذا الفن فلذلك يجبر كل من يعرفه ومن يستمع له أن يحبه ويقدره ويحنى هامته له ... حقيقة يا ابوبكر لقد هيجت علىّ الذكرى كما تغنى إبراهيم عوض من كلمات عبدالرحمن الريح.... اذكر اخى ابوبكر انه في نهاية سنة 2000 كان معي هذا العظيم في شقتي المتواضعة بسلطنة عمان فزارنا المقدم معاش محمد عثمان محمود وطلب من بادي أن يغنى له واحدة من أغانيه وكان بادي يلبس ملابس البيت العادية فقال لنا يجب أن أتميز فدخل إلى الغرفة فلبس جلابية نظيفة وكذلك عمته وشاله فقال له الاستاذ محمد عثمان نحن فى البيت يا بادى ومافى داعى لذلك فقال بادى انى لا اغنى الا كذلك وبعد ذلك بدأ في الغناء ارايت اخى ابوبكر كيف يحترم هذا الفنان نفسه وفنه .. أما إنسانيته فمواقف هذا الرجل تحكى عنها فلقد ذكر لي الأخ الأستاذ عوض بابكر بان احد الأشخاص اعتاد على سرقة أموال بادي الموجودة بدولابه بمنزله بالعباسية وفى إحدى المرات تم القبض عليه بواسطة أهل بادي الذين كانوا يقيمون معه في المنزل وأرادوا ضربه وتسليمه إلى الشرطة وكان السارق من أبناء حي العباسية الذي يسكن فيه بادي ولكن بادي رفض تسليمه إلى الشرطة وقال لهذا السارق وسط دهشة الحضور اذهب يا ابني ولا تفعل مثل هذا مرة أخرى .. وقال للحضور كيف سيقابلني أهل هذا الشاب في هذا الحي إذا عرفوا إن ابنهم كان يسرقني لا أريدهم أن يخجلوا منى ويطأ طئوا رؤوسهم عندما يروني... أما الموقف الثالث فكان في سلطنة عمان أيضا في بداية رمضان في بداية حضوره حيث أعطى بعض المتسولين من الجنسية الباكستانية دخل حفلة أقامها في السلطنة ولم أكن موجودا معه في تلك اللحظة فاستغربت كثيرا فقال لي انى مصاب بالسكري وهذه كفارة عن هذا الشهر فقلت له يا بادي ما دفعته لهم كفارة عن سنة كاملة وليس شهر واحد وما كان يدرى قيمة الريال العماني لأنه لايحدد أسعار حفلاته بل يقبل باى شى يعطى له .. ومن ذلك اليوم قررت استلام كل دخل حفلاته لأسلمه له في نهاية رحلته تلك .. أما الموقف الرابع فكان في مايو 1997 حيث كان بادي معي في بارا والأبيض ليشاركني في زواج ابن خالتي عثمان إسماعيل مكي فتوفيت والدته في نفس يوم مغادرته الأبيض فلحقته ومعي الأخ خالد الشيخ حاج محمود فوصلنا إلى حلة عباس مساء ذلك اليوم فتأثر بادي كثيرا وقال لي لماذا تركتم بقية مراسم الزواج وأتعبتم نفسكم بالحضور كان يمكنكم الحضور في اليوم الثاني وقال لي بالحرف الواحد أكرمكم بشنو يا احمد لو ما امى ميتة كنت غنيت ليكم... رحمك الله رحمة واسعة يا بادي الأعزاء / محمد المرتضى وابوبكر كل ما حاولت الكتابة عن بادي أقول إن الوقت ليس مناسبا ولكن هذا البوست ومداخلة الأخ ابوبكر جعلتني أن اكتب هذه الأسطر كشهادة للتاريخ بعظمة وإنسانية هذا الرجل .
Quote: كل ما حاولت الكتابة عن بادي أقول إن الوقت ليس مناسبا ولكن هذا البوست ومداخلة الأخ ابوبكر جعلتني أن اكتب هذه الأسطر كشهادة للتاريخ بعظمة وإنسانية هذا الرجل
ياودالقرشي .. اطربتنا بهذا الحديث الجميل عن مبدع انسان جميل سيبقي في وجداننا سماحة وابداعا .. بالنسبة لامثالي من الناطقيين بغيرها حيث ان غناؤنا النوبي يعبر عن مجمل ثقافتنا النوبية وبالتالي يشغل كل ملم من وجداننا فلا يترك حيزا كبيرا لغيره الا ان بادي هو احد الذين تفسح لهم اغانينا حيز مرنا يشغله كما شاء..ارتبط في وجداننا باغنيات وطنية في اكتوبر وفي الجامعة كما ذكرت كان مبدعنا ينتمي اليها مثلنا فعاش في وجداننا الي اليوم ...
11-25-2007, 04:46 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: ربما يقال أننا في حال بكاء مستمر على ماض لن يعود وأننا جيل كله من مواليد برج الفجيعة ورغم ذلك يعزي النفس بأنه شهد أياما جميلة وبشرا جميلين في كل زواياالحياة ، في السياسة والفن والرياضه والأدب والضواحي وطرف المداين ، هؤلاء البشر الجميلين أسميتهم (ناسنا) ، هم الذين شكلوا وجداننا وذاكرة خلايانا وغزير ملفات أجسامنا الأثيرية
لاحولالالا ياصديقي
أتاريك كابي الجرسة بي جاي والله لشد ما أعجبني هذا البوست ولايتهد الحنين جواك أبد
واصل أيها النبيل
11-25-2007, 06:38 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
شكرا بكري أبوبكر يا هندسه وشكرا ياهشام هباني، قبل الرد بالترتيب أعتذر عن الخلل الفني الذي حدث في فيديو كليب (حمى ليلة السبت) لحبيبنا هشام هباني. يا هشام أطالب بإعادة مداخلتك مع جون ترافولتا بكاملها (بدون خلل فني ). عشان أوريك الشغل بتاع الأيام ديك يا هشام أهديك الصوره دي.
11-25-2007, 06:44 PM
Muna Khugali Muna Khugali
تاريخ التسجيل: 11-27-2004
مجموع المشاركات: 22503
Quote: نفر تستهويهم شخوص بعينها وأحداث لن تتكرر وصور لن يعاد إنتاجها، يعني ناس فتحوا عيونم على حال محدد ولهم لغة مشتركة ويبكون ويفرحون لذات الأشياء تقريبا في توحد نادر لجغرافيا القلب وكنتور الوجدان ، ممكن نسميهم (جيران الضمير) ، تبتدرهم بكلمة فيكملون العبارة ، تفكر في فعل تجدهم سبقوك إليه ، سيأتي بعضهم بأريحية معهودة ، هي بعض صفات ذلك الزمن الأخضر وأهله التلبثانيين ، ليحكي عن (ناسنا) وزمنهم ويضيف إلى هنا.
قد لا تتكرر بنفس الطعم ونفس الأشخاص..ولكن نكررها دون ان نشعر بنفس الشعور..محاوله خلق جديده لتفاصيل قديمه..فيها نجتمع ونضحك للنكته بسرعه..نستجيب للونسه بسلاسله ويجول في عقولنا نفس التفكير ..وعندما نعلق تخرج تعليقاتنا سهله مفهومه دون هموم.. ناسنا؟ ناسنا موجودين..في الحياه بعضهم وفي الروح معظمهم بعد انتقالهم أوغيابهم في دروب الحياه الكثيره.. في الخرطوم تعود ناسنا علي اللقاء والمحبه..علي البرامج المشتركه..علي خلق الزمن الجميل ان حدث وعشته..ظننت لحظه حدوثه انك تعيش في الماضي مرة أخري..فكثيرا ماتكون اجمل اوقاتنا هي التي مضت.. ويوم السبت عند ناسنا..هو تشبس بيوم الجمهة عند ناسنا في الماضي..تلك التجمعات التي تجعلك تصلي لله بايمان وخشوع أكبر..كيف لا والحب قد غمر القلوب..والله حب بلا حدود؟؟
تجلس تلك الجلسه الجاده او الهاذره وتسابق الزمن بونسه عاليه في صوتها وصداها..وفي القفز بين مواضيعها.. ضحكات تشرح القلب ونكت تقتلعك من جذور نفسك المرهقه بالفراق والهموم وربما الخوف..ناسنا هي لمتنا التي نتمسك بها..والزمن الجميل!! ناسنا الأمس البعيد.. خلقت في الأمس القريب روح ثائره علي التفريق..غدا ثورتها تكبر..ينقص عددنا ونخلي المقعد في الغرفه ونعلق الصوره..ولكن ناسنا يظلون في داخلنا يوصونا بالزمن الصالح..زمن الهدوء واللطف والأمانه والضمير.. المحنه مابيشحتوها..المحنه في القلوب..ناسنا دايما يقولوا كده.. تصدقوا حبوباتنا من ناسنا كان كحلهم يشبههم..فريد..لا يغيب من عيونهم ولا يفقد مكانه بالماء..كان اصيل وثابت كحديثهم ومواقفهم.. ناسنا لم يبعدوا كثيرا..ان ناديناهم أتوا الينا.. فان نفتهم ارواح البعض فمن الممكن أن نناديهم..
ناسنا؟؟
جبت السم ده كيف وقلمتنا في بوكانا ده؟؟
11-25-2007, 06:59 PM
munswor almophtah munswor almophtah
تاريخ التسجيل: 12-02-2004
مجموع المشاركات: 19368
المنصور مفتاح الأدب، والله يا منصور مرات الواحد يقول يغمِّد ويلقى نفسه في تلك الأيام ولولا إيمان المرء بما ورد في القرآن لفرحت لنظرية قرأت عنها فحواها أن هناك دورة متكررة للحياة إلى ما لانهاية ، يعني الحياة اللي عشناها بذات شروطها وأهلها ستتكرر وستنتهي ثم تعود وهكذا وبالتالي ممكن نرجع لزمن سبق أن عشناه بعد عصور طويله. على أية حال نحن يا منصور كان دخلنا الجنه (حيث لاعين رأت ولا أذن سمعت) حانطلب ، ضمن طلباتنا ، حاجات خليها بيني وبينك وانت عارفا، مش ورد في القرآن الكريم (ولهم فيها ما يشتهون) وهذا وعد صدق خير من أي نظرية. سلامي ليك كتير وباعتبارك من ناسنا(القراب) كلامك هنا يضيف الكثير والجميل. تحاياي ومودتي يا العزيز.
11-25-2007, 07:04 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: هم علائم في خارطة حياتنا ان التفتنا خلفنا نراهم في ماضينا وانا نظرنا الي الامام نراهم في وجداننا
والله والله يا ابوبكر ماقلت إلا الصح، ياخ (ناسنا) اللي ذكرتهم أعلاه مجرد نماذج لبشر مازلت أحس أنهم أهلي وأصحابي ولايساورني شك أن مارتن لوثر كينج I have a dream من أولاد المسالمه ، ولي الحق في تبني ذلك لكثر ما قرأت عنه وهو كان مثار إعجاب بعض الأهل الذين يحتفظون بصور كبيرة له في القلوب والأطر المزينة للصوالين وعندما كناببراءة الطفولة نسأل من هذا الرجل الذي نراه صباح مساء ببذلته الأنيقة معلقا على الجدار كانوا يحكون لنا عنه وكأنه أحد أفراد الأسرة ، تقول لي ما من ودنوباوي؟
11-25-2007, 08:19 PM
هشام هباني هشام هباني
تاريخ التسجيل: 10-31-2003
مجموع المشاركات: 51292
وفي الخرطوم تطورنا كريفيين من شرب المريسة الي شراب البيرة (الساقطة)علي اسطح(بارالليدو) و(بار الاستقلال) بالمحطة الوسطي و(الشيش كباب بسان جيمس) وفندق الشرق وقهوة اتينيه وبارات اخر في حديقةالريفيرا بالموردة وشارع كاتريناوفي جامعة الخرطوم ونحن طلاب احتسينا بكل حرية( الجعة الهينيكين والداب) في عقر دار اساتذة الجامعة ونحن نحييهم تحية الحب والاخاء والسلام وتاب الله علينا بعد شبع جميل!
11-26-2007, 06:12 AM
هشام هباني هشام هباني
تاريخ التسجيل: 10-31-2003
مجموع المشاركات: 51292
وعندما طاب لنا المقام بالرصافة والجسر بالخرطوم (الطراوة الزول حلاوة) انعدل مزاجنا البدوي (الجهمي) من الريفي الهندي الباكي الراقص الساذج والرعوي العاشق لافلام الكاوبوي بابقارها وثيرانها وبنادقهاالي مزاج مدني نعم وجداناتنا بالق العاصمةوبهارجها وعطرها وغنج بناتها الفاتنات ( الهجاليب) وصرت بعدها من عاشقي افلام ملك الروك اند رول وهو ايضا من ناسنا اي (الفيس بريسلي) وكنا له في وفاء الكلب في حفظه للود ونزود عنه كما التيس في قراع الخطوب!!
وبثقافتي الريفية كنت مولعا بهذا النمط من الافلام التي غرست في دواخلنا شيئا من ثقافة الكاوبوي الريفية الامريكية البدوية والتي صرت استعين بها في ايامي الحالية في قضاء حوائجي في التعايش في تكساس الامريكية من هذه الخلفية المتناغمة وفي مهنة نمتطي فيها هذا الحصان الحديدي الاصفر كل يوم نقتلع ارزاقنا عنوة من بين فكي المنون في قلب ام المخاطر الامريكية اي مهنة التاكسي وانت تعيش الخطر حالة يومية لا فكاك منها!
كانت امي امد الله في ايامها تعطيني هذه الطرادة وهي تغطي مصاريف البيت اليومية كلها والباقي له( تعريفة بلح بركاوي ) تشبع جائعا(بايت القوا) من بنغلاديش من دكان عمنا الحاج كمبال وفي طريق العودة من الدكان الي البيت ب( علبة السكر نص رطل مشفوعة باوراق شاي بنت الصباح المبتهلة الي الله بلا حجاب ولا خمار) وفي الطريق( جغمة جغمتين سكر) حلال من سكر سوداني حلال بلال غير منهوب او مهرب او ملوث!
11-25-2007, 08:40 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ماعارف الاغنية دي راكبة مزاجي ليه كان لها وقع غريب فى نفسي هل نحن فعلا كنا امة امجاد
كيف ما تركب مزاجك يا حيدر ، تعرف ياالعزيز النشيد اللي جبتو دا (أمة الأمجاد) ، وأظن أنه لشاعر يسمى مصطفى عبدالرحمن وكان غلطت قول لي عووك ، النشيد دا في صميم هذا البوست لأنه كان يغمر حواشاتنا بمساحة تبلغ ( نميري) متر مربع ودي مساحة بالنسبة لنا زُرِعت فيها معظم محاصيلنا المعرفية زي الزريزيرة الإشتراكية والفتريته اليمينية وال (مايو) العلمت الناس أساس الوطنية وقدم الخير عليك يا بلادنا. كان هذا النشيد بصوت الثنائي الوطني يُبث إلى مسامعنا من صباح الرحمن وفي مايكرفون المدارس وبعد الغداء في الراديو وعندما نأوي إلى الفراش ليلا نجده تحت (الفرده) ، اثناء إذاعة النشيد طوال اليوم ولخمسة عشر عامامررنا بملايين الأحداث فأصبح يذكرنا بأيام وشخوص وناس جميلين رغم أننا كنا نعتقد أنه كتب لمايو ، وهسه يا حيدر لما جبتو هنا قربت أبكي من ذكرى وعبق تلك الأيام المقدسة ، ايام أحببناها بكل ما فيها ورغم ما فيها ( فهل تراها بعد الذي وهبتْ ------- أبقتْ لغيري في الحبِّ ما تهبُ ؟ )
11-28-2007, 03:41 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: أتاريك كابي الجرسة بي جاي والله لشد ما أعجبني هذا البوست ولايتهد الحنين جواك أبد
خضر عزيزنا ، هي داب جرسه، من منا لم يكن يحفظ عن ظهر قلب (إختاري) لواحد من أجمل ناسنا .. نزار. كثير منا اختار الموت على ضفاف الماضي وأحرق في كانون القلب دفاتر كل الأشعار. بالله ما تتأخر أكتر من اللزوم يا خدر.
11-25-2007, 08:59 PM
Tumadir Tumadir
تاريخ التسجيل: 05-23-2002
مجموع المشاركات: 14699
اتنشلنا يا محمد المرتضى حامد ...اتنشلنا فى ذاكرتنا وانتماءنا وعشقنا ...
نشلتنا الاكاذيب والاوهام ..
كنت أتصفح سودان فوراول ...وقرأت مقالا للدكتور حسن موسى "صديقنا الزمان والحسة" ...ينعى فيه ذاكرتنا مع "امتى" ..
ديوان محمد المكى ابراهيم بعد أن قال عنه ما معناه انه من ترهات الشباب ...راح "نافضه" ...وعقب المعقبون وذكر آخر أن الكابلى تنكر لآسيا وأفريقيا ..وان مين تنكر لمين ...هذه هى احداثيات وجداننا المهترىء هذا ...
عندما كنت احضر فى بوسطن اللقاء بين نساء السودان من أطرافه المختلفة ...شعرت ببؤسى تاريخى الذى عشته ...وكما قال محمد الامين فى أغنية ود مدنى ...دار ابويا ونعمتى وعجنى ...كل هذا كان على حساب الآخر اللامرئى لنا والذى لم نعى حتى فجيعته ..ونحن ندخل المدارس والجامعات ونمشى الاسبتالية لما نمرض ..وكمان نمشى سينما النيل الازرق ونحضر المعارض وعروض الدبلوم ومواسم المسرح ...وساسستنا الكرام بفرموا فى انسان الجنوب وجبال النوبة والنيل الازرق ودارفور والبجا فرم ..ونحن ننعم بالشباب وننظر فى الثقافة والسياسة ونتمشى فى شارع النيل "ونرتاد دواوين الحكومة) ..والبص والطرحة "التكسى المشترك" ..نتفلهم بى بلدنا ونتباهى بى حصاد تعليمنا ...ونسمع موسيقى ونكتب شعر ..ونطلع مظاهرات من حين لآخر...
ووالله لو جاء زرادشت نفسه وتكلم عنا لما وجد التعبير المناسب لما حدث لنا من نكسة عمر ...ونشلة ذكريات حلوة ...
ياللخزى ..ويالعار الذاكرة ...
أها انت من ناسنا ولا من ناس تانيين؟؟؟
11-25-2007, 09:04 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: وفي الخرطوم تطورنا كريفيين من شرب المريسة الي شراب البيرة (الساقطة)علي اسطح(بارالليدو) و(بار الاستقلال) بالمحطة الوسطي و(الشيش كباب بسان جيمس) وفندق الشرق وقهوة اتينيه وبارات اخر في حديقةالريفيرا بالموردة وشارع كاتريناوفي جامعة الخرطوم ونحن طلاب احتسينا بكل حرية( الجعة الهينيكين والداب) في عقر دار اساتذة الجامعة ونحن نحييهم تحية الحب والاخاء والسلام وتاب الله علينا بعد شبع جميل!
Quote: ربما نعيش فى زمان غير زماننا.. ربما انه عصر المفارقات الذى يريد ان يعيد صياغتنا من جديد و نحن نرفض و نرفض التخلى من اشياءنا الجميلة نرفض التخلى عن بنحب من بلدنا ما من برة البلد و حتى فى الحزن القديم نتمسك بأمل الدوش عندما يقول تجينى و يجينى معاك زمن امتع نفسى بالدهشة...
يا محمد ، ربما يصدق القول بأن لكل زمان رجاله، لكننا أهل كل العصور، يا محمد لا أدري هل لسوء حظنا أم لحسنه أنّا كنا من مواليد برج الفجيعة ، لم أختلق هذا المصطلح لكن هو إحساس صادق في داخلي وخارجي ، إحساس الفجيعة ، الفجيعة أن تفقد عزيزا لديك فجأة ، ونحن جيل فقدنا معظم ما لدينا فجأة ، هذه الفجاءة حتى ان تطاولت لعقدين أو ثلاث فهي (فجأة) بحسابات تاريخ الأمم، تتدهور الأمم على مدى قرون وفقا للتاريخ لكن التدهور حدث عندنافي بعض مناحي حياتنا كأن ملحوظا لجيلنا. الجيل الذي أعنيه هو الذي حدد مساحته الزمنية أستاذي الجليل فضيلي جماع وحكى عنه الباش أبوبكر ، منه من شهد الإستقلال وحواء الطقطاقه تبث في آبائنا الحماس والحكومه الوطنية الأولى ثم عبود وطلعت فريدواكتوبر والصادق والأزهري وزروق فمايو والصادق تاني ثم عهد سنتر الخرطوم كما وصفه شيقوق في أغنية أحد (مطربي) هذا العهد ، هذا الجيل كأنه عمل تعجيل سريع لشريط فيديو FFW، فقد شهد في مساحة زمنية وجيزة ما يمر به شعب آخر في ألف عام ، ومع الذاكرة الجيدة تبدأ المقارنه وتصبح المحصله ليلي دون الناس كلو آهات كلو ويل ، لكن رغم ذلك أرى أن الجميل سيأتي لأن هذا الشعب له موعد مع القدر.
نفحات الصباح تأتيك صوتاً يدخل القلوب والعقول دون استئذان.. صوت مترع بالفرح الباعث على التفاؤل.. صوت يستشرف أفاقاً أرحب..ليلى المغربي تستنطق كلمات النثر الموحية والمعبرة عن الخير والجمال..ليلى بأدائها الرائع المموسق وقدرتها على تشكيل مفردة القصيدة حسب الضرورة، كانت ممن فتحوا أبواب "الفجيعة" حين رحلت باكراً فارتضينا بالفجيعة "برجاً"...
لوحة ثالثة: (بدون تعليق)
"أنا أم درمان تأمل في ربوعي وأنا السودان تمثل في نجوعي أنا ابن الشمال ضميت ضلوعي أنا أم درمان سلوا النيلين عني وعن عزمات فتاي عند التجني فخير بنيك يا سودان مني سلوا الحادي سلوا الشادي المغني"
لوحة رابعة:
صوت طه حمدتو يملأ الأمكنة وهو يقسم دار الرياضة إلى مربعات..كنا نعرف (المسافة من المرمى) حين يكون جقدول في المربع ستة أو دريسة في المربع ثمانية..صوت كان يحكي لك سير المباراة بأجمل ما يكون الوصف " لذلك لم نكن تحت رحمة ART
لوحة خامسة:
جماهير تقر بأن المدخل العملي والمفتاح الذكي المتبصر للخروج من النفق المظلم بكل إشكالياته التي أقعدت الوطن طيلة سنوات خلت وبددت قدراته وإمكاناته منذ بزوغ فجر الاستقلال، يقوم على الاعتراف بالآخر وأن الديمقراطية التي تغنت بها وتطلعت إليها لإرساء مقوماتها ومكوناتها ما هي بأقل أو أكثر من ثقافة احترام الآخر والحرص على أداء الواجب قبل تصيد الحقوق..
جماهير "نانسا" رددت مع محمد المكي ووردي:
"القيود انسدلت جدلة عرس في الأيادي.. كان أكتوبر في أمتنا منذ الأزل.. كان خلف الصبر والأحزان يحيا صامداً منتظراً حتى إذا الصبح أطل أشعل التاريخ ناراً واشتعل"
صديقي العزيز –حادي الركب محمد المرتضى:
هذه بعض لوحات نوستالجية تحكى عن ماض جميل عاشه "ناسنا" وما وسموا بماضوية في التفكير بل هم يترجمون ليل نهار ما قاله شيخ الحركة الرومانسية في الشعر الانجليزي ويليام بليك:
Don’t write your name on sand, waves will wash it away.. Don’t write your name in sky, wind may wash away.. Write your name in hearts of people you come in touch with.. That’s where it will stay..
لك ودي ولي عودة..
الزاكي
11-26-2007, 04:52 AM
الزاكى عبد الحميد الزاكى عبد الحميد
تاريخ التسجيل: 12-09-2005
مجموع المشاركات: 895
تسلم يا ملك علي الهدية القيمة( الطرادة) ففي اريافنا الحبيبة في الزمن الجميل كنا عندما نرتدي ( عراريق الساكوبيس) نتابط جيوبا صغيرة في اعاليها بالميمنة ما ان نعمرها بهذه ( الطرادة) حتى تشعر بخيلاء وزهو بين رفاقك واندادك عندما تبان هذه (الطرادة) الحنينة من هذا الجيب الشفاف وانت في قلب الحفلة تتقدم لتاخذ (شبالا) من (شويفعونة ضوايةتضوي زي ضي الرتينة)..فكانت جالبة للحظ لانهامن مال حلال بلال واسموها الطرادة حسب اجتهادي انها طاردة النحس والفقر!
11-26-2007, 05:54 AM
د.محمد حسن د.محمد حسن
تاريخ التسجيل: 09-05-2006
مجموع المشاركات: 15194
وسينما امدرمان واستاد المريخ واستاد الهلال وعلى قاقرين وكمال عبد الوهاب ( الدكتور) ولان عادل مختار من النادرين في الزمن النادر
اهديك منه شئ لي ناسنا
كانو بيلعبوا هارت
وتجاوزت الساعة الثانية صباحا بتوقيت شارع بورسعيد
نظر في الورقة
كلهم زون الاهو اسفل سافلين اذا واحد جاب عشرين بتقوم اذا اتنين جابوا 10 ،10، برضو بتقوم اذا اكلها كلها برضو بتقوم لازم هو يجيب 20 وكانت دي زي احتمالية ان يكون كاتب هذ السطور من امراء النفط قلب ليهم التربيزة
وجر البطانية وقال ليهم
( قومموا اسككم كلكم ؟
هو انا الكشيف)
وتسلم ايها الشاه
11-26-2007, 08:18 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: وما بين النيلين كانت جنة افريقيا لكن الفاس وقع فى الراس واتشربكت شربكت السبيب فى كراع السوسيوه
ياعثمان بتبالغ ، لي مليار سنه من التشبيه اللي جبتو لينا دا ، الخيط وكراع السوسيوه ، وغير الخيط كان الجداد ( الدجاج) بيشبك في رجلينو شَعَر البنات وبيسبب ليهو مشاكل خطيره قد تودي به إلى الحَلَّه كأحد مكونات (الزِغني). طبعا شَعَر البنات كان برضو بيسبب لآخرين مشاكل أخطر. من الحاجات المالياني سغربه هذه الأيام غُنية الضخم أحمدالمصطفى اللي بيقول فيها (أيام زمان كانت أيام ) وهي من غناوي الخمسينات حسب علمي ، فإذا كان ذلك تباكي جيل أحمد المصطفى فلا يبقى لنا من دور سوى رفع (الفُراش).
11-26-2007, 09:19 AM
الفاتح الجنيد الفاتح الجنيد
تاريخ التسجيل: 08-19-2007
مجموع المشاركات: 1003
مع هؤلاء تحلو قعدة العصرية فى ضل الحيطة ، النصها مليّس بالزبالة والنص التانى عريان ، ضارباهو المطره لمن طوباتو إمتزجن بطين المونه ،،، وحاجة أمنة فوق البمبر ، قدامها الكانون نارو تشطشط من احتراق البعر لزوم توليع النار فى الفحم ،،، فى إيد ماسكة الهبابة ، والتانية القلاية تحاور فيها حبات البن ، وتحوشها من طرف القلاية ما تقع كلاعب الهوكى ،،، عندها يتصاعد زخم رائحة القلوة ، فتقوم بتمريره على الجالسين لزوم فك القريفة ،،، وتحلو الجلسة بين قصص الحواشات ، وجنى الطماطم والعجور والبطيخ من الجروف ، مرورا بالغنيمات ياتا فيهن الدارَّه وياتا فيهن الولدت ،،، وياتا فيهن الرضعت جناها رغم المصرار المعمول فى الضرع ،، والوليدات باتو بدون عشاء ... ويستمر السامر الجميل حتى يتوقف عند رفع آذان المغرب ....
أستاذنا فضيلي، ياخي شكرا على كلامك عني وقصة (رغم صغر سنه) ريّحتني شديد حتى غشيت المرآة فقالت لي يازول هوي أرجع شوف ليك شغله تانيه فضيلي دا منحاز ليك بشكل مكشوف. أما وصفك لي بالأديب دي عايز أصدقا وأعيش عليها لكن ما قادر ، كتابتنا هنا يا حبيبنا تتم بأسلوب التداعي الحر free associations method بتاع فرويد وهو أسلوب يستخدم في العلاج بالتنويم المغناطيسي كما تعلم ودا بيطلِّعني من طبيعة الكتابه المستمره في العمل ، وباستثناء النقطتين ديل يا فضيلي كلامك أعلاه عن جيلنا في محله ، صدقني كنت أدرك أي فئة من الناس ستأتي وتتدفق هنا ولم يخب ظني ولاشك أن البقية في الطريق. ننتظرك بالكثير فأنت من (ناسنا) منذ أدهشتنا على الصفحات الثقافية والليالي الشعرية في الزمن الجميل.
12-08-2007, 07:12 AM
saif addawla saif addawla
تاريخ التسجيل: 12-07-2006
مجموع المشاركات: 911
كان ( ناسنا ) حين وعيت على الدنيا هم جدة والدي وجدة والدتي ، كانت كلتاهما قد تجاوزت المائة ، ثم رحلتا ليخلفهما ( ناسنا ) من جيل كبير من الحبوبات ، لم تكن واحدة منهن تسمى باسمها فكل تسب لابيها – على الطريقة العمانية – فجدتاي كانت بنت حمد وبنت نمر ورفاقهما بنت مناع وبنت خرومي وبنت وبنت ... الخ ، كنا نرى الدنيا بعيونهن ، بل كانت الدنيا لا ترى الا بعيونهن .
كنت في مدرسة الكارة الابتدائية في كسلا حين زارتنا بنت حمد لتبقى بجانب والدتي ( عليهم جميعا الرحمة ) في مرضها بالايرغان ، وحين همت بالعودة كنا نبكي ونخبئ حقيبتها لتبقى معنا ، وتصادف في ذلك التاريخ ان سمعت لاول مرة ( 1966 ) محمد الامين يغني :
لو تسافر دون رضانا بنشقى الدهر كلو ..... الى اخر الاغنية ، ومنذ ذلك التاريخ وحتى الآن لم تستطع الكلمات الرصينة والرائعة التي عني بها الشاعر محبوبته حين يقول : الدقيقة وانت مافي مرة ما بنقدر نطيقا ( مش نطيقها ) لم تستطع ان تقنعني معاني القصيدة بأن المقصود بها شخص اخر غير ( بت حمد )
ومضت بت حمد وبت خرومي وبت نمر ومضت بعدهم والدتي ، وهكذا تسلل ( ناسنا ) من الدنيا حتى وقنا نحن في اول الطابور .
لك يا مرتضى طول العمر ولضيوفك ، ونأسف لهذه الخاطرة الحزينة عن ناسنا .
11-26-2007, 11:25 AM
abubakr abubakr
تاريخ التسجيل: 04-22-2002
مجموع المشاركات: 16044
Quote: وبثقافتي الريفية كنت مولعا بهذا النمط من الافلام التي غرست في دواخلنا شيئا
ودهباني سلام بدرو .. ديانغو .. اميغو .. تكيلا ...وووbullet between the eyes!!! كثير من مفردات اللغة البرتغالية والاسبانية كنا نلتقطها من تلك الافلام ...اشتهرت كلوزيوم بها واحيانا غرب وبحري .. لسبب او اخر وربما سياسة تقشف جعلت مجموعة من الطلاب كانو امامنا ومنهم من صار مهما في زمن نميري وانزوي بعدها يصرون علي ان نمشي كعابي من البركس الي غرب او كليزوم او بحري يوم فيلم الكابوي ديانغو .. التذكرة 5 قروش وسيجارة قرش ونص وغالبا تخميسة في حالة انو اخدنا سندوتش تصبيرة .. اهم ما كان يحصل هو عند العودة كان في طريقنا ثلاث اشياء مهمة: **دكاكين ينام امامها اصحابها (الدنيا كانت امان) وبالقرب منهم قدرة فول تكون في اخر الليل قد استوت فيتكرم علينا بفول ساخن ان كان احدهم صاحيا (ببلاش .. اولاد الجامعة المفلسيين ) ** سوق الخضار وكان غسيل المصاطب يبدء عند منتصف الليل وترص صناديق الفاكهة ورزم الموز امامها فننال بعض منها "اكراميا لطلاب الجامعة " **اما الاخيرة فحلل كبيرة في صفرة بحر الجبل او العرب مليئة بالحليب يتركها لناولمن فاته العشاء القائميين علي المطبخ فننال منها ما يشبعنا ...
كل ذلك مقابل ستة قروش ونص ( ثمن التذكرة وخق السجارة) : فيلم كابوي وعشا وتحلية بفاكهة وكباية حليب...
دة كان زمن ناسنا ....
(عدل بواسطة abubakr on 11-27-2007, 02:41 AM) (عدل بواسطة abubakr on 11-27-2007, 02:43 AM)
11-27-2007, 05:57 AM
هشام هباني هشام هباني
تاريخ التسجيل: 10-31-2003
مجموع المشاركات: 51292
Quote: بدرو .. ديانغو .. اميغو .. تكيلا ...وووbullet between the eyes!!! كثير من مفردات اللغة البرتغالية والاسبانية كنا نلتقطها من تلك الافلام ...اشتهرت كلوزيوم بها واحيانا غرب وبحري .. لسبب او اخر وربما سياسة تقشف جعلت مجموعة من الطلاب كانو امامنا ومنهم من صار مهما في زمن نميري وانزوي بعدها يصرون علي ان نمشي كعابي من البركس الي غرب او كليزوم او بحري يوم فيلم الكابوي ديانغو .. التذكرة 5 قروش وسيجارة قرش ونص وغالبا تخميسة في حالة انو اخدنا سندوتش تصبيرة .. اهم ما كان يحصل هو عند العودة كان في طريقنا ثلاث اشياء مهمة: **دكاكين ينام امامها اصحابها (الدنيا كانت امان) وبالقرب منهم قدرة فول تكون في اخر الليل قد استوت فيتكرم علينا بفول ساخن ان كان احدهم صاحيا (ببلاش .. اولاد الجامعة المفلسيين ) ** سوق الخضار وكان غسيل المصاطب يبدء عند منتصف الليل وترص صناديق الفاكهة ورزم الموز امامها فننال بعض منها "اكراميا لطلاب الجامعة " **اما الاخيرة فحلل كبيرة في صفرة بحر الجبل او العرب مليئة بالحليب يتركها لناولمن فاته العشاء القائميين علي المطبخ فننال منها ما يشبعنا ...
كل ذلك مقابل ستة قروش ونص ( ثمن التذكرة وخق السجارة) : فيلم كابوي وعشا وتحلية بفاكهة وكباية حليب...
العزيز ابو بكر
وعلي ذكر الجامعة اتذكر دوما في الجامعة في ذلك الزمن الجميل كنا نستضيف في حجرات اقامتنا ضيوفا احيانا من الاهل زائرين للخرطوم و احيانا بعض من زملاء الدراسة وخاصة من اخوتنا واقربائنا( الفراعة...اخوتنا بجامعة القاهرة الفرع) ايام امتحاناتهم حيث يقيمون معنا اسابيع الي حين انتهاء امتحاناتهم...وكانت السفرة و(السبيشال ميل) ولديك حق استضافة فرد او فردين في سفرة الطعام.... والحليب كان ثابتا خارج القوس في كل الوجبات والافطار كان اما( فول + سمك محمر او عدس مع الكبدة) والغداء اللحمة( العضة) والسلاطة ثابتة... والباسطة ايضا في العشاء...وكان هنالك من ينظف لك الحجرة ويغير لك ( الملايات واكياس المخدات) وايضا كنا نحوز منحة مالية وهي خمسة جنيهات من الجامعة....واه من مسيرة الاول من مارس والهتافات الشهيرة( مارس جا وما بنرجا..وناقص ناقص يا فبراير..وعميل عميل يا ابريل... والثانوي العام حاجة تمام... والثانوي العالي عرس طوالي وبنات الجامعة بنات سمحات.. وترد اخواتنا....محجوزين مخطوبين..مغتربين... وينتهي الاحتفاء الجميل بحرق الجثمان الرمزي للامتحانات امام قاعة الامتحانات الشهيرة ويلقي فيه شيخ البركس خطابه الهام وينصب فيه خليفته... ويرجع المتظاهرون بعدها الي البركس وفي الطريق يمرون علي داخلية اخواتهم الطالبات وتبدا( المناقرة) .. ويزدحم شارع الجامعة بالسيارات التي ياتي اهلها خصيصا وهم من متابعي هذه الاحتفائية الهزلية كل عام..ليتابعوا هذا الاحتفال الجميل.....اه....اه ااااه!
صباح الخير..روز اليوسف..العربي...طبيبك الخاص..حواء..الكواكب...الشبكة..الموعد...الصياد...و... مجلة سمر! فرانكو داني...لورا أنطوانيللا...كاتيوشا...و...فرانكو كاسباري!
سُكر..سُكر..سُكر.. وحات عينيٌا سُكر.. و أكتر.. أحلى نغم في منظر.
سلامات يا أحباب ، ويا صديقي صاحب البوست محمد المرتضى سلام
منذ البارحة وأنا أهم يتعقيب آخر بعد أن هجمت الذاكرة على أجيال من الناس والرجال فتنادوا على البوست زرافات ووحدانا..كل يدلي بطرف من خيط الذكريات حتى إذا أعياه الرحيل في سهول الذاكرة وقنع من الغنيمة بالإياب بكى كما يبكي الوليد كما قال شاعر أندلسي..وهو البكا دا يا ناسنا إلا تسيل ليه الدموع على الخدود.
قلت بأني جئت كم مرة لأداخل ليس عن ناسي الذين عشتهم ولم أبرح..ولكني أردت أن أقول حديثا أحسبه سمحا عن ناسنا هنا في البورد ورائع ما قالوه وقلنه في (ناسنا). لم أقدر وأنا أحاول منذ الأمس وذلك بسبب أكثر من شاغل.
سأعود إليكم فإن لي أكثر من تعليق منبهرا برائع ما خطه أكثر من قلم في التداعي والتماهي حين يكتب الواحد منكم من قلبه ويدلق ذوب روحه دونما اكتراث بمقص الرقيب. أعجبني مثلا هشام هباني وهو ينساب بصراحته المعهودة لكن بشيء من الشاعرية والحنين القاتل..رائع أنت يا هشام عندما تنزع من صلبك الديناميت وتحمل الورد..لكن ذلك قليلا ما يحدث ، فإن استراحة المحارب لا تحدث كل يوم.
طراوة أطربني بسهله الممتنع ودارجته الفصيحة وكذا الدكتور الفنان احمد القرشي المسكون بالحقيبة
Quote: أعجبني مثلا هشام هباني وهو ينساب بصراحته المعهودة لكن بشيء من الشاعرية والحنين القاتل..رائع أنت يا هشام عندما تنزع من صلبك الديناميت وتحمل الورد..لكن ذلك قليلا ما يحدث ، فإن استراحة المحارب لا تحدث كل يوم.
استاذنا المبدع الشاعر فضيلي جماع من غيركم ضمخ وجداناتنا بقيم الجمال والخير والابداع وانتم معشر قبيلة الادباء والشعراء قد بنيتم فينا هذه الاحاسيس والانفعالات جراء غرسكم للجمال في حياتنا شعرا ونثرا وقصصا ونشيدا و( جيناك زي وزين ترك الرهيد يوم جف)وزادنا في المنفي هذا المخزون من الاحاسيس النبيلة ونحن نحصد غرسكم وهو سلوانا وحصننا الحصين! محبتي واحتراماتي
11-26-2007, 03:50 PM
فضيلي جماع فضيلي جماع
تاريخ التسجيل: 01-02-2004
مجموع المشاركات: 6315
Quote: جيتني في الصميم و أصبت الوتر الحساس أو بلغة القتال ضربتني في التنك
يا معاويه ، أي واحد هنا بضرب التاني في التنك ، شوف الناس اللي اندلق حديثم الشجي هنا ديل ، أنا متأكد انو أي واحد أو واحده أحسَ كما لو أنه هو الذي خط ما كتبه الآخر. دي هي يا معاويه الرابطه الوجدانيه لناسنا والتي تجعلني أثق في كثير منهم بسبب بنيانهم المعرفي المتشابه حد التطابق غض النظر عن موقع النشأة أو العرق أو القبيلة وتلك المرجعيات الكذوب ، أولئك يكفي أن تنظر الى الواحد منهم فيفهم ما ترمي إليه وإن حدث شئ ستعرف سلفا كيف سيتصرف. تعرف يا معاويه زي ديل لو نزّلت ليهم أغنية المصير لإبراهيم عوض كلهم ، وبصوت واحد ، يرددوا معاك : تاني ما تقول انتهينا ، والأغنيه الأسطوريه دي بالذات أسأل منها الفنانه تماضر شيخ الدين أو الطيب شيقوق أو أي واحد/ه من الفوق ديل..
Quote: باختصار يا ود المرتضي ما بتلقي زول يحبك زينا نحن يانا ناسك ولو بتلقي ما بنعاتبك.
دي أبصم عليها وإلا لما افتتحت هذه المساحة. محبتي يا معاويه بصوت ليلى المغربي عطر الله ثراها
11-27-2007, 04:18 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3793
Quote: واسموها الطرادة حسب اجتهادي انها طاردة النحس والفقر!
سمعت تفسير آخر للإسم، وهو تشبيهها بطائرات ميج 17 والتي كان يملك السودان منها عدداً، وهي طائرات مقاتلة حمراء اللون سريعة (قبل اختراق حاجز الصوت)، وكان اسمها غير الرسمي (طرّادة).
11-27-2007, 09:26 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
فاق عدد المترددين عليه في اربع اسابيع فقط اي رقم وصل اليه اي بوست اخر في سودانيزاونلاين اكثر من ثلاث عشلرالف في 28 يوم ...رقم قياسي يوضح اهمية "ناسنا" في وجدان هذه الاعداد من البشر السوداني .. كل هؤلاء كانو يبحثون عن "ناسهم" مع صوت الشباب كل ليلة .. كانت الاغاني هي المحطات التي يقفون عندها منتظرين عناق ناسنا ...الاغاني كونها تتعامل مباشرة مع الوجدان هي التي تفتح باب الوجدان لتخرج الذكريات الساكنه هناك تعانفنا وتعود بنا الي ناسنا ....
11-27-2007, 12:15 PM
hameem hameem
تاريخ التسجيل: 01-10-2005
مجموع المشاركات: 325
QUOTE]] نفر تستهويهم شخوص بعينها وأحداث لن تتكرر وصور لن يعاد إنتاجها،[[/QUOTE
أها كل المتداخلين والمتداخلات هنا هم من الشخوص التي تستهوينا ولا على كيفنا .. ناس سمحين ولديهم منها ما هو مشع إشعاعاً حميداً مستطاب ناس زي الورد للذاكرة شأنها العجيب في انتخاب ما تبقي وما تذر ، والأعجب شأناً أن تتهيأ لك في حياتك فرصة العيش في أمكنة متعددة كأن يكون أبوك شغال في السكة حديد أو التعليم مثلاً . في مدرسة الميرم الابتدائية المختلطة كان المكان كأروع ما تكون الأمكنة وكذلك الزمان بحسب فهمنا له حينها ستة كرانك معروشة بالقش تقوم على مجموعة شِعَب متراصة غير منتظمة ويسند الكرنك عند المنتصف شِعَباً أكبر وأطول تتوسط شقي السقف المائلين ذلك كان الفصل وبداخله تتلاصق صناديق الشاي المصنوعة من الخشب المضغوط وعليها كتابات تشير إلى جهة تعبئتها ، كانت هذه الصناديق هي المقاعد في الشتاء كان يطلب منا ملء الفراغات بين الشِعَب بطين نجلبه من (البوطة) القريبة من المدرسة التي تتمدد بجانب (العرديبة) العتيقة إلى الجنوب في الخريف كان يطُلب من أي تلميذ أن يأتي ب (جراية ) و (مكمك) لتنظيف المدرسة بعد أن تكون نباتات (الكَوَل) والنيادة قد تكاثرت بغزارة في حوش المدرسة الأستاذ الجليل حامدين موسى أجبر كان مدير المدرسة زمانها ، كان معلماً يُسِّر لهذه المهنة ويُسِّرت له فبرع .. أدرك الان ذلك وأنا أذكر كيف كان يشد انتباهنا بأدائه المسرحي المميز .. الكتابة صعبة يا ناسنا .. على كثرة الذكريات والشخوص .. قال أستاذ حامدين بعد أن انتهت حصة القصة .. كان في حصة اسمها قصص .. قال وقد لحظ مبلغ استمتاعنا وفرط تكيفنا : لما تمشو الثانوي العام حا تلاقيكم قصص عجيبة زي دي لما تدرسو الانجليزي كان ذلك دافعاً استثنائياً لنتعجل تعلم الانقليزي حتى نقرأ تلك القصص
أسجل بهذا حضوري المتأخر وأعد بمواصلة ما كانت في الوسع تحياتي واحتراماتي
11-27-2007, 03:03 PM
abubakr abubakr
تاريخ التسجيل: 04-22-2002
مجموع المشاركات: 16044
من عادة الزمن أن يمضي... ولا يتوقف ولكن بعد أن يكون قد نحت ما نحت من ذاكرة فأكسبهامنحنياتها ودفئهاوطرق تداعيها... كان الزمن من قبل يؤثر بشكل جماعي على الإنسان على ذاكرته ووعيه ومقدراته وأحلامه كأن الكل هذا النسيج الواحد ...رغم الوانه النافرة أحيانا برابط ما ..كان بمقدور الزمن ان يطبع سماته على ذاكرة كل من كانوا هناك الآن هو لا يستطيع إن لنا الآن ذواكر منفصلة حتى الرعب.. لكل منا حلم مختلف ..من الصعب أن تصب أحلامنا عند مصب كبير .. مضيء لم يقدر علينا الزمن .. أكثر شتاتانحن مما ينبغي ...عفوا ولكن (ناسنا) هذا البوست أتاني من مناح عدة.. هو صندوق ثمين... دعوة أخرى .. لفتح نوافذ على أشياء ثمينة مخبوءة في ذواكر حية وجميلة وضاجة...
.... .. . لي عودة..
11-27-2007, 08:09 PM
معتصم عبدالرحيم معتصم عبدالرحيم
تاريخ التسجيل: 01-24-2007
مجموع المشاركات: 425
هند محمد .. نعم يا هند ، فتحنا لهم عيوننا وقلوبنا ومسامعنا فكتبوا عليها ما أرادوا ، كل الذين عنيتهم من ناسنا وآلاف غيرهم لم اشأ ذكرهم فمنهم الجد والحبوبه والخال والخاله والعم والعمة و أساتذة في مختلف مناحي الحياة وجيران ومغمورين ، أولئك جمّعوا حتى هذه الحروف التي أكتبها وصاغوا أغنياتي وحددوا إحداثيات ما يسكرني وما يعيدني إلى صوابي ولون مأساتي وملهاتي وما يجب أن يكون عليه مقدار دموعي. ناسنا ؟ يا سلام على ناسنا... يا هند
11-27-2007, 08:53 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
معتصم عبدالرحيم، الناس اللي كتبت عنهم ديل خترين والدهبايه وخطوبة سهير وكمال عبدالوهاب ومباراة المريخ النيل في ودمدني وهزيمة فاطيما التشادي مع أغنية البلابل مشيناأو حسنك أمر، وهتافات الثانوي العام حاجه تمام ، ياخ موسيقى أخبارالتلفزيون الكان فيها رجّه بتاعت ناس كتار بيتكلموا والكره الأرضيه ويجيك الصوت الأسطوري حمدي بدرالدين مع وجهه المريح ( دا اللي خلاّ معاويه يتوقف عن متابعة أجهزة الإعلام هذه الأيام وفقا لمداخلته أعلاه لأنو عايز يحافظ على نظافة عيونو وإضنينو) وشعار سهرتنا الليله من تصميم ادمون منير والكنغ فو فايتنق ، ياخي زي ماقال الزاكي عبدالحميد وصف طه حمدتو للكوره بالمربعات ده شغل عبقري مش زي مذيعين اليومين ديل البيقولوا ليك - كسافه سكانيه في وسط الملعب - يا معتصم الحاجات اللي كتبت عنها ممكونه دي براها عايزه بوست طولوعشرين سنه ، يعني بوست عباره عن (كسافه سكانيه). إنت بس قول ربنا يلطف.
11-27-2007, 08:53 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
عارف يا مرتضى .. من يومين بس .. وبدون مقدّمات، إشتغل جوة راسي شريط من الزمن داك .. وجاني صوت أبوعركي يقول: قطر ماش ** وعمّي الزين وكيل صنفور ** وزي ما الدنيا سكة طويلة، مرة تعدّي مرة تهدّي مرة تدور ** عمّي الزين محكّر في قطار الهم ** يشرِّق يوم ** يغرِّب يوم ** شهور ودهور .... بعدها يجيك صوت عمي الزين يقول: قطعنا السكة محطّة محطّة ** جبل موية ** جبل عطشان ** جبل رويان ** ود الحوري ** ود النيِّل ** ود سجمان ...................... زمن
11-28-2007, 06:49 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
يا جميلة ...و مستحيلة... إنتي دايماً..زي سحابة.. الريح تعجل برحيلها.
المين رود....البنشات....المكتبة..ال exam hall ...النشاط...ليمون بيزنس...الميدان الشرقي...دوري الكليات...
بإسمك الأخضر يا أكتوبر الأرض تغني... الحقول إشتعلت..قمحاً و وعداً و تمني.
الميدان الغربي...اليوم الحار ما بندار..يوم الهندسة و المعمار....الفول المصلح....و.....
يا والدة يا مريم..يا عامرة حنية.. أنا عندي زيٌك كم..يا طيبة النية.
دار الإتحاد..نادي الأساتذة...الداون تاون...دار النشر...الإنمائية...البولتكس.... الداخليات...بحر الغزال...النيل الأبيض...النيل..الواحة...المناهل..بحر العرب..فلسطين..العبير..الرحاب.. الطَرحَة...الlate permission ...السُفرة..اللبن المَقنن...اللمٌة...الغناء...رقيص العروس...الإمتحانات...النتايج...البكا...المباركات...التعزية...الشرارة طقطقت..فداسي الحليماب...الحلاوين...نمرة 2...بحري...بورتسودان..زالنجي..كُتُم..المودة و الحب و الترابط..الضحك و الونسة لامن قسمنا الليل....و لمٌا الحنام إتجقلبنبو الخيل..لا بخلت عليٌ..لا جادت عليٌ بالحيل!
بحوث..سمنارات..محاضرات...ليالي شعرية..أسابيع و ليالي ثقافية..سينما ال BN ..إنتخابات...رابطة...رحلات...قوافل...ثراء فكري...صداقات أبدية..عُشرة عمر..
خمسة سنين و درب الريد معاك أخضر.. خمسة سنين بريدك كل يوم أكتر.. أحاول مرة بس أنساك...عشان يا غالية أتذكر.. أجي و ألقاكِ ديمة معاي...و ألقى هواك ملٌك دنياي.. و في أعماقي..إتحكر... خمسة سنين!!
يا ممكونه ماك طالباني حليفه ، مش تحتِلي في البوست وبس إنتي صاحبة حق عديل وأي زول من الناس اللي كتبوا هنا سيد حق وسيد البوست ده ، نحن ما زلنا بنهتف ( حريه – إشتراكيه – وحده) ، يعني في حيطه نجت من الشعار دا أيام ناسنا ؟ حتى لو كانت زباله؟ والإشتراكية دي بنريدا في البوستات وبس ، والحريه دي بنهتف بيها لما نكون في المعارضه، أما الوحده المعنيه فكنا عايزنها مع دول عدم الإنحياز في الأول بعد باندونج الفتيه وبعد شويه نزلنا شويه وقلنا وحده مع العالم العربي وبعد شويه قلنا مع أفريقيا بس ولما ما اتحققت قلنا مع ليبيا ومصر بس ولما مااتحققت قلنا تكامل ولما فشل قلنا نتوحد بيننا وبيننا بس والظاهر حانمشي في تنازلاتنا لما نشتهي تتوحد المسالمه مع أبوروف عشان لما نمشي من سماية ناس علوبه لصبحية ناس عاصم في ودالبنا نتفادى ال check point بتاعت ناس طراوه ، وهل كان الوضع في لبنان بين 76 إلى 1990 غير هذا؟ تعرفي ناس لوزه ونوسه وسوبرمان والوطواط ( شايفك فطيتي بونانزا ) دي أسماء لم تفارقني حتى في المنام ، رغم انو منامي بقى خزاز لأنو مازلت أحلم انو عندي امتحان ووزعوا لينا الورق وانا ماعارف أجاوب سؤال واحد، وسألت مفسر أحلام زي الألوسي داك قال لي انت عمرك كلو حاتعيش مِقَشِّط. نرجع لناس الروايات والكتب إياها ، بحق كان الواحد لما يلقى مجلد سوبرمان يوم الخميس ممكن نفتح لبرنامج من خارج الأستوديو ويوم الجمعه من الصباح قرايه مع المجلد (يتبع) وما يفكني إلا برنامج من الشرق والغرب للنور موسى لأنو بجي بعد نشرة عشره مع عبدالرحمن أحمد ، من الشرق والغرب كان مكيفني فيهو فهد بلان واشرح لها عن حالتي وصباح الشحروره (البساطه ) وعشيني بطاطا ثم ريتشارلس ( unchain my heart _ set me free ) وجيمس براون والرولنغ ستونز لكن حليمه الصوماليه (صومليئن) دي كانت كوم تاني. المهم إني كنت ما بحب (ناسك) ناس فرانكو كاسباري وفرانكو داني لأنهم كانوا أسمح مما يجب و (خاربين علينا السوق) رغم انعدام المقارنه أصلا خصوصا انو البنات الزمن داك بيقرن اي شئ ولايكتفين بنوال السعداوي أوغاده السمان ، أما بحري الثانويه بنات اللي جات في (غنيتك) ماهوَّبنا بي جنبها لأنو أمدرمان الثانوية كانت زي فرض الكفايه بالنسبه لبقية المدارس من زمن بص الكومر الرمادي لكن لاأشك ( ولا ينبغي لي ) التشكيك في الدور المحوري الذي لعبته بحري في طب القلوب وصيدلة الريده ويا مراهم جروحا ويا ملكا وملاكا هووووي أرحم يا سميري أسترا زينيكا ، ولولا علو كعب بحري وبناتها لما تغنى الرائع رمضان زايد يا بنات بحري قالوا بتحبو أبقو حبونا. بالله يا ممكونه ما تتأخري علينا وماتمشي حفيانه في المغارب دي وغسِّلي البستله قبال سيد اللبن يجي
11-28-2007, 09:43 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
اخى مرتضى يشترك اخويا..دالى رحمة الله الحبوب وبشير حسين للاول طول العمر وللثانى الرحمه والمغفرة فى نهما موسوعة حكاوى. تحضرنى قصة دائما ما يحكيها دالى . تتفق مع (ناسنا) يقول دالى انه فى مطلع الستينات زار قريتهم ( الكريبة) السيد محمد عثمان المرغنى وشمل الاحتفال به فيما شمل دخول ( التلج ) لاول مره فى (الكريبه) حاضرة النيل الابيض ويحكى ان اطفال الحلة وهو بينهم كان هدفهم الحصول على (كسار تلج ) ليتعرفوا عليه عن قرب بعد ان سمعوا عنه كثيرا – اى الثلج - وكان يحول دون تحقيق الرغبة كتيبه شباب الحلة. ومع ذلك استطاع احد اقربائه من اعمامهم الكبار من ختف قطعة تلج كبيره وهرول بها انفلت دالى وبقية اولاد الحلة خلفه دون ان يدروا المصير الذى تؤول اليه قطعة التلج وحين وصولهم المنزل قذف قريبه بالقطعة داخل الزير والتفوا حول الزير يراقبون النشاره تطفو فوق سطح الماء وكانت القطعة من صغر حجمها .. ذابت بالكامل فور وصولها قاع الزير بينما قريبه ظل يدخل اصبعه السبابه فى الزير كل 5 دقائق ويطمئن الحضور قائلا (هسسسه بتبرد ) الله يجازيك يا دالى مع خالص تحياتى لك ولدالى اخوك سيف الدولة
12-05-2007, 06:42 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
والله يا سيف دي إبداع حقيقي، رحم الله حبيبنا طيب الذكر بحق بشير حسين ، بالطبع كان مع دالي ثنائي مبدع، عزيزنا يوسف الحبوب ودالي رغم انهما من قدماء المنبريين إلا أنهما أكسل أهل المنبر من حيث المشاركة هنا. بمناسبة الثلج وكتيبة دالي، يا ترى ما زالت عربة (الداندرمه) تجوب الحواري ومعها البائع المتطرف في نظافته؟ هل نسينا قمع البسكويت الذي توضع عليه والمزمار الشهير بصوته الذي يعيدك إلى زمن سمح قبل أن يرتد إليك طرفك. يا زمن .. وقف شويه.. واهدي لحظات هنيه. شكرا يا سيف وأنت بحق من ناسنا.
11-28-2007, 03:43 PM
abubakr abubakr
تاريخ التسجيل: 04-22-2002
مجموع المشاركات: 16044
Quote: تعرف يا معاويه زي ديل لو نزّلت ليهم أغنية المصير لإبراهيم عوض كلهم ، وبصوت واحد ، يرددوا معاك : تاني ما تقول انتهينا ، والأغنيه الأسطوريه دي بالذات أسأل منها الفنانه تماضر شيخ الدين أو الطيب شيقوق أو أي واحد/ه من الفوق ديل..
(الشكر لمن سجل وحفظ في اليوتيوب)
11-28-2007, 06:57 PM
abubakr abubakr
تاريخ التسجيل: 04-22-2002
مجموع المشاركات: 16044
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد المرتضى حامد
tmbis
Emad Abdulla
Ishraga Mustafa
الزاكى عبد الحميد
خالد علي محجوب المنسي
عبداللطيف حسن علي
abubakr
حيدر حسن ميرغني
Osman Musa
فضيلي جماع
Moawia Mohammed
هند محمد
معتصم عبدالرحيم
الطيب شيقوق
mamkouna
Ahmed al Qurashi
خضر حسين خليل
Muna Khugali
munswor almophtah
هشام هباني
Tumadir
محمد أبوالعزائم أبوالريش
د.محمد حسن
الفاتح الجنيد
saif addawla
hameem
اسعد الريفى
noon
فيس بوك
تويتر
انستقرام
يوتيوب
بنتيريست