11:08 AM Sep, 19 2015 سودانيز اون لاين محمد المرتضى حامد- مكتبتى فى سودانيزاونلاين
-
فيديو زي دا لامن أشوفو دائمأ أسأل ذات السؤال الذي سبق وطرحته عليك ونحن بينهم يطعموننا ويصبون القهوة المُسكِرة تلك مع عبق ابتسامة إرتقى معها بخور يضوع ويأخذك إلى (طيات السحاب).. ليه؟ -
(ليه) هذه مصدرها أن فرصنا مع الإثيوبيين تكاد تكون متساوية، هذا إن لم نكن في وضع من حيث الموارد الطبيعية أفضل منهم، لكنهم يتقدمون باضطراد في كافة الاتجاهات ونحن في تراجع بذات السرعة.. أنا لا أتحدث (من منازلهم)..
09-19-2015, 10:39 AM
محمد الكامل عبد الحليم محمد الكامل عبد الحليم
تاريخ التسجيل: 11-04-2009
مجموع المشاركات: 1968
في العام 1987 زرت أديس ابابا للمرة الأولى قادما إليها من الخرطوم ، كنت أعتقد أن تلك الدولة الفقيرة بقيادة جونتا منقستو لاتعدو أن تكون نسخة أفضل طقسا من الخرطوم. كان مطارهم القديم يفوق مطارنا بمسافات من حيث المساحة والتسهيلات والنظام وعلى مدرجه تهبط كافة طائرات أوروبا وأفريقيا سيما المتجهة إلى غرب أفريقيا فهي أصبحت ال hub وملتقى إفريقيا الجديد بعد أن تراجعت الخرطوم كما هو معلوم..
في زيارة تالية لأديس أبابا هبطت طائرتنا في Bole International على مدرج بمواصفات عالمية ودخلنا المبنى الذي كان نقلة نوعية لمطارات المنطقة إذا ما استصحبنا إمكانيات تلك الدولة الفقيرة. سألت نفسي : ليه؟
Bole International Airport
09-19-2015, 10:53 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
الموضوع: بدعوة من الأخ الصديق يحيى ابراهيم سعيد (قباني) إلى مطعم أثيوبي بمدينة تورنتو العامرة ، قدمت لنا نادلة جميلة طبقا أثيوبيا كلاسيكيا من الزلزل والأنجيرا والزغني ، وحتى هنا والأمر عادي ، لكن قباني أصر على أن يثبت لي عدم صحة مقولة (سمح الغنا في خشم سيدو) فطلب (واحد فول) وفوجئت بأن أولئك المبدعين تخطوا كل من ادعى أنه يعد الفول المصلح، والكلام بجيب الكلام ، فقد تشعب الحديث فقاد إلى السؤال المستدام هو: ليه؟ ليه عندنا جاليه ضخمه في كندا ولم ينجح مطعم سوداني واحد ، فقد كان هناك من بادر وما لبث أن أغلق كحال الكثير من المطاعم في عواصم العالم ..بينما نجحت مثيلاتها الأثيوبية في نفس العواصم؟ جرجرنا الكلام لمناح عدة تراجعنا فيها باضطراد ومازال السؤال : ليه؟
09-19-2015, 11:48 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: في زيارة تالية لأديس أبابا هبطت طائرتنا في Bole International على مدرج بمواصفات عالمية ودخلنا المبنى الذي كان نقلة نوعية لمطارات المنطقة إذا ما استصحبنا إمكانيات تلك الدولة الفقيرة. سألت نفسي : ليه؟
سألت نفسي ذات السؤال مرات!
نزلت في مطار جومو كنياتا، وطدت نفسي على أن كينيا هذه (مننا وغادي واحتمال أشوف كدايس لافات جوة) لأشاهد ما لا عين رأت وأذن سمعت، حتى الطائرات تهبط وتقلع بمعدل لا يتيح لك أن تشرب كباية شاي بينها. هنا في الخرتوم، يمكن أن ترجع البيت في الكلاكلة وتفطر، وتجي المطار وما تكون في طائرة عالمية هبطت. ____ اعتقد أنه الافتراض غير الصحيح بأننا الأفضل في المنطقة أو ربما هو الكسل.
09-19-2015, 12:23 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
التضى فى ثياب قبانى السوداء ... منتزعا وسامة غير متوقعة ..... ياخ البوست دا لو ماعمل اى حاجة غير انه قد وضع قبانى فى حجمه الحقيقى .... تانى ما دايرين منه حاجة ... حولاااااااا كيف تانى نتخيل كلامك بالحجم الجديد ؟
----------- التضى والله انت بتاع مشاكل .... بعثرت احلامنا .... وبعثتها فى اتجاهات جديدة ،،،،
09-19-2015, 01:10 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: اعتقد أنه الافتراض غير الصحيح بأننا الأفضل في المنطقة أو ربما هو الكسل.
شكرا أخي حاتم، كلنا يحب السودان لكن السواد الأعظم فشل في ترجمة ذلك الحب كيما يجعل المحبوب جميلا ونظيفا ولائقا طبيا وظني أن ذلك منبعه ، كما تفضلت ، لاعتقاد بأننا (الأفضل في المنطقة )، مع أن الجميع - دون استثناء - تخطوا (عزه ) الماقامت من نومها وشخيرها..
في إحدى رحلاتي من مسقط للخرطوم عن طريق أديس في 2013 ركبنا طائرة إثيوبية بوينج مترفة الخدمة والأناقة إلى أديس لكن من أديس للخرطوم استقلينا طائرة صغيرة نوعا ما تعمل بالمراوح وعلمت لاحقا أن الطائرة من طراز Bombardier كندية الصنع وفي العودة من الخرطوم لأديس ركبنا ذات الطائرة ، ورغم ضجيج المراوح والمطبات الهوائية إلا أن لطف المضيفة ومهارة القائد ومستوى الخدمة جعل من فترة الرحلة نزهة جميلة ولدى الوصول فوجئت بأن الكابتن كان شابة أنيقة فتحت باب الكابينة لتودعنا مع المضيفات بابتسامات مشعة وكان الوصول مهرجانا للبشاشة .. الطاقم كله يستقبل ويودع بالتبسم .. برضو سألت نفسي: ليه بناتنا مصرصرات ؟
الصوره من قوقل لذات الكابتن
09-19-2015, 01:26 PM
يحي قباني يحي قباني
تاريخ التسجيل: 08-20-2012
مجموع المشاركات: 18742
فى الحقيقة اثرت موضو فى غاية الاهمية .. و هو فشل السودانيين فى اقمة او تاسيس مطعم سودانى فى اى مان فيه سودانيون .. كنت فى بريطانيا فى رمضان الماضى و لم افكر على الاطلاق فى الذهاب الى مطعم سودانى و بعد اصرار احد السودانيين هناك استجبت الى طلبه .. و نفس تلك الصور البائسة للمطعم السودانى فى كل مكان ز. خرجت و لم استطيع الاكل بشهية كما لو ذهبت الى مطعم آخر .. يا كان .. علمت قبل سنوات ان مطعم الخرطوم بمدينة تورنتو الكندية قد اغلقته السلطات الصحية الكندية لعدم ايفائه بالمواصفات ... !!
كتب الاستاذ محمد المرتضى حامد :
ليه عندنا جاليه ضخمه في كندا ولم ينجح مطعم سوداني واحد ، فقد كان هناك من بادر وما لبث أن أغلق كحال الكثير من المطاعم في عواصم العالم ..بينما نجحت مثيلاتها الأثيوبية في نفس العواصم؟ جرجرنا الكلام لمناح عدة تراجعنا فيها باضطراد ومازال السؤال : ليه؟
09-19-2015, 01:56 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ياخ البوست دا لو ماعمل اى حاجة غير انه قد وضع قبانى فى حجمه الحقيقى .... تانى ما دايرين منه حاجة ... حولاااااااا كيف تانى نتخيل كلامك بالحجم الجديد ؟
----------- التضى والله انت بتاع مشاكل .... بعثرت احلامنا .... وبعثتها فى اتجاهات جديدة ،،،،
دونادوني إمنعي الفوضى..
الصورة الأولى كانت بوضعية (غيرة) إثيوبي بزاوية 270 درجة أما الصورة أدناه فهي الأخيرة يوم 10 سبتمبر وبعين فنزويليه محايدة ، وتفريعا على تلك الحقائق الماثلة أمامكم نقول: أعيدي إلى أحلامك صباها وإلى المبعثر من رجاءاتك نظامها.. وبراوية أخرى ، حكِّمي ضميرك..
09-19-2015, 02:15 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
Quote: فى الحقيقة اثرت موضو فى غاية الاهمية .. و هو فشل السودانيين فى اقمة او تاسيس مطعم سودانى فى اى مان فيه سودانيون .. كنت فى بريطانيا فى رمضان الماضى و لم افكر على الاطلاق فى الذهاب الى مطعم سودانى و بعد اصرار احد السودانيين هناك استجبت الى طلبه .. و نفس تلك الصور البائسة للمطعم السودانى فى كل مكان ز. خرجت و لم استطيع الاكل بشهية كما لو ذهبت الى مطعم آخر .. يا كان .. علمت قبل سنوات ان مطعم الخرطوم بمدينة تورنتو الكندية قد اغلقته السلطات الصحية الكندية لعدم ايفائه بالمواصفات ... !!
عزيزي الطيب.. والله كلامك دا أحبطني جد ويزعِّل في العضام فالحقيقة مرة، تتصور كنت أعتقد أنه أغلق لأسباب تجارية لكن أن تكون الأسباب صحية فهذا شئ مؤلم للغاية لأن كندا لاتجارى في جزئية النظافة والبيئة فالقادم إليها حتى من جارتها الولايات المتحدة يلحظ الفارق بسهوله وكان على أصحاب المطعم أن يعرفوا ألا تهاون في كندا في هذا الجانب وأن سيناريو مطاعم سوق الناقه وقندهار وسوق العرضه وناس (خلاص شطَّبنا) لاتصلح في العالم الأول. يعني هسه لو ما السلطات الصحيه أغلقته كان باميتنا وخدرتنا فايرات وريحتن تسقِّط المحافظين وتسطل من أونتاريو ل البرتا.. بالله مش حاجه تزعل يكون شارع Bloor فيهو كذا مطعم وسوبرماركت أثيوبي ونحن ولا شي؟ مررت ذات عطلة بسوق بانت ولفت نظري أن بعض الجزارين يعرضون اللحم في الهواء الطلق ، أقصد في الهبوب الطلق، فأبديت رأيا سالبا لقريبتي فعلَّقت: هيا دا!! إنت قايل أكلنا طاعم ليه؟ ما ياها الكتاتيح والضبان وجيرة التوابل المستفزه للخياشيم والمنكهات المُعطِّسه دي.. عارف يا الطيب، في 2009 تناولت عشاءا أثيوبيا بمطعم معزه بواشنطن بصحبة الصديق الشقيق كوستاوي وحرمه الفاضله نائلة وعزيزنا عادل علي صالح ، وكان مطعما مكتملا صوت وزغني وصورة وقبانيت وموسيقى ووجه حسن وضيافة خمسه نجوم من القال ليهن عبدالرحمن الريح اشهدي على لوعتي وتسهدي ومعاهن قمر دورين ، وكان ذلك تكرارا لتجربة شبيهة لي مع الأخ كوستاوي وآخرين في ليلة كريسماس 1988 بواشنطن دي سي بمطعم رد سي بحضور الرائعة أستر أويكي وهذا موضوع آخر. ذات الحال تكرر بدعوة في مطعم إثيوبي بنيوجيرسي بصحبة حبيبنا د. أحمد طراوه والسيده فايزه دهب منذ عام تقريبا. منذ ذلك التاريخ وفي كل تلك المطاعم كان الخواجات وغيرهم زاحمين الدنيا على المائدة الإثيوبية، لازم تحجز والناس واقفين صفوف زي التقول منتظرين شوفة ساره نورو القيافه وفايته العوين مسافه ، أما المستثمر من أهالينا فحاله كالراهب الساير السنين مشتاق يفتش ليهو دير ، مع اعتذاري لصاحبك هاشم صديق يا قباني..
ليه هم ناجحين ومتقدمين يا أخي قريمان في هذا الجانب وجوانب أخرى ونحن في صولو مع الصول القديم طوااااالي إلى الخلف دور؟ ليه ياخ؟؟
الله يجازيك يا ام فتفت ، كان انتي كان الكوارع كان قندهار. لو ضاقوكم أو شافوكم الكنديين حايقفلوا قنصليتهم في الخرطوم.
09-19-2015, 03:36 PM
محمد الكامل عبد الحليم محمد الكامل عبد الحليم
تاريخ التسجيل: 11-04-2009
مجموع المشاركات: 1968
المرة الجاية تزوروني في منزلي المتواضع في جادة (ميسيساغا)...نستعيض بالفول والزغني او يضاف اليها ومعه شجون الذكريات بعد أن ندلف الي الأجابة علي السؤال المفتاحي(لزوم الهرطقة) ..(ليه)؟...وطبعا نبدا (بالتفكيك) لكن لا ننتهي ( بالتربيط )لأنا نجيد الحديث لكنا نقع في فخ خطة العمل..
لكم الاحترام المستدام
09-19-2015, 05:07 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
والله يا تضى حكمت ضميرى بدون زمزغة ثم اعدت البصر كرتين للقطة الاثيوبية ثم تلاتة كرات بتاعت الافغانية .. لقيتك خارتو خارتو .، ياخ الاسود يليق بك ..... النصيحة :: القصة دى دايرة راوية وتيسير عووضة وحسين ملاسى حكم ،،،، براااااى كدا ما بقدر على جلد حسن موسى لووووووب ..،، قبل كدا جلدنا كلنا ....
وخطاك والهدب المكحل وفتنة التوب الأنيق في لحظة مرت كالظلال تعبر رؤاي إحساس عميق فتحتي جرح الليل عسى من صمتي ما قادر أطيق صحّيتي في نفسي الوجود ورجّعتي لعيوني النهار . ____ المغنية من يهود أثيوبيا كانت تشتغل عاملة في مطار دينفر كلورادو 1997 و تتعلم في مدرسة التمريض . سمعتها والله يا محمد تغني في نفس كلمات التجاني سعيد . لمان سمعت الصوت اتذكرت أندهاش الراوي لحظة سماعو لي مصطفي سعيد وهو يردد في قصيدة الحرب العالمية ( زووس أمين أوف فلاندز زي ويت ذا لوست ) ( موسم الهجرة ) والله يا محمد مشيت سالتها وانا سارح ومهود و زي النايم . جبتي الكلام ده من وين .. ده كلام صعب عليك .. حولا . الناس ديل هيلنا مننا وفينا وما بعيدين . أريتك كان سمعتها وهي بتردد في ( ورجعتي لعيوني النهار ) صوت زي شربات العرديب في شهر ستة . .. تحياتي
09-19-2015, 07:12 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: أما سمعت ب ( على قدر أهل العزم تأتي العزائم )
طلحه ، عوافي يا زول.. الحبش وصلوا السحاب معانا سوا، أسسوا خطوطهم بعون الأمريكان في 1945 وعملوا أول تيك أوف 1946 وطبعا نحن 1947 ، أها ياسيدي الناس ديل هسه عندهم أسطول فيه 127 طائرة بما فيها البوينج 777 وال 787 ، لنج ، وصلوا اسكندنافيا عند ناس شوقي بدري وأختي الجميلة فريده شوره ، طفشوا غرب وشرق أمريكا وكندا وغوانزو في الصين الجديده وصدى الهند العميقه وصوت طاغور المغني وغازلوا ماركيز وباولو كويللو وايزابيللا الليندي في أمريكا اللاتينيه ، وطئوا معظم دول آسيا الدينية واللادينيه ، وفي البيت الأفريقي ما خلو أوضه ، أما نحن فبقيت لدينا طائرة واحده مملوكه لشركة الطيران بالنظر ماركة أندب حظي رابضه في هنقر المشروع الحضاري قالوا عيانه راجيه الصيانه - ياخي بعد الشر عليك - في ظني - وليس كل الظن إثم - قلبا مقطوع منذ غزوة جوهانسبيرج إياها، واقفه تبكي وتنوح وتصيح وتتفرج على الشوفتن بتريِّح حِسان اللتحاد واللمارات .. ونحن في الركشات بقينا قصه ما بتعرف نهاية... قت ليك بدأوا معنا في سنه واحده..
هي لله يا طلحة..
شايف الناس ديل قرّبوا المسافات كيف؟
09-19-2015, 08:42 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20440
شكرا يا المشرف You said it all وعلى الرغم من أن صاحبك قباني زول قيافه وأنيق (سجِّل يا يحيى) لكن (سماحة) الرجال آخر ما يرد فيها الشكل وأنت سيد العارفين، وكما تعلم ، الشجاعة والمروءة والكرم هي معاييرنا للرجال الرجال، والحمدلله صاحبك لايعوزه منها شئ، لكن دندن تعمل بالمدح بما يشبه الذم.. بس كمان الباشمهندس يساعدنا بإزالة الحنانه الجديده دي..
الإلتزام بالحزام وأغاني الحقيبة.. (بي هوى الخلخال) لود الرضي كفيلة بدرء الشتاء الكندي وليتهم سمعوه ينوح : النسيم هبا لي...يا حسينة الذات الجمر هبا لي ياحبيب رحماك...لا تزيد بلبالي ولا تكون شكواي... موية في غربالِ
ياخ دي تذيب القطب الشمالي وتخرج اتلانتيس من قاع المحيط.
09-19-2015, 11:44 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
لماذا نشعر بالتميز على الاثيوبيين ؟ كان هذا السؤال محور نقاش مع بعض اصدقائي وكان ردي عليه لأنهم بيجوا عندنا يشتغلوا شغلات هامشية أقسم لي صديقي بأن بائعة الشاي بمحل شيشة بالسوق العربي تبيع الشاي والقهوة (ولا شئ غيرهن) ترسل لأهلها في اثيوبيا ألف دولار شهرياً فقلت له لا لا كان كدة نحن الشغالين معاهم
09-20-2015, 00:04 AM
munswor almophtah munswor almophtah
تاريخ التسجيل: 12-02-2004
مجموع المشاركات: 19368
على الرغم من كل ما ذكرت يا ود مرتضى إلا الحبش على قناعه تامه بأننا نتقدمهم فى كل شئ فى الفنون والموسيقى والعلم والحضاره والطب والسياسه غايتو نظرتهم لنا هى الباعثه للطمأنينه أما نحن ندرى بأننا نتعثر حتى يفرج الله لنا أمراً ويخرجنا من العسر إلى يسر وميسره وقطعا سنخرج والإبتلآت تصنع الأمم فأورباء كانت فى حروب قبائليه أقعدتهم حتى أسسوا معاهدات التداخل وقفزوا إلى العلالى فحتما سيحدث لنا ذلك فكلنا يعى ما نحن فيه ويشجب وشباب شارع الحوادث سيفرخ شباباً فى كل المناحى وسيؤسس للتآخى وسيزرع الأساس فوق الأساس المتين الموروث وأمم الحضارات لا تبدأ من الصفر ياخ لنا من الطبيخ ما يدوش الأحباش ولكن يتملكنا الحذر والخوف والتردد ففى الأمارات عور عين شيطان الطبيخ إخ وزوجته وأحسبهم بدأوا من فوق الكل وسيصعدون، للأثيوبين فى نفوس السودان محبه ولهم لأهل السودان قدرها بل أكثر ونحن أكثر تأثيراً عليهم من ما يدل على الرياده ولكن الدليل يا ود مرتضى.
09-20-2015, 03:31 AM
حسين نوباتيا حسين نوباتيا
تاريخ التسجيل: 06-06-2008
مجموع المشاركات: 2473
ثبت في الصحيح،أن الكعبة يهدمها ذو السويقتين من الحبشة.. عندما يأتي ذلك اليوم أعتقد أن السودان الحالي سيكون مستعمرة حبشية.. قبل أن يأتي ذلك اليوم،مؤشرات الواقع الآن تقول أن وتيرة الاقتصاد الأثيوبي في تقدم مستمر،وأعتقد أن سد النهضة عندما يكتمل سيكون بمثابة العتبة الجديدة لولوج الاقتصاد الاثيوبي لمرحلة جديدة،والمصريون يعلمون هذا الأمر.. بعد ربع قرن من الزمن أتوقع أن تعمل نساءنا (ستات شاي في أثيوبيا)..إن لم تحدث معجزات. تحياتي
09-20-2015, 05:35 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: أقسم لي صديقي بأن بائعة الشاي بمحل شيشة بالسوق العربي تبيع الشاي والقهوة (ولا شئ غيرهن) ترسل لأهلها في اثيوبيا ألف دولار شهرياً فقلت له لا لا كان كدة نحن الشغالين معاهم
تستاهل كل عاملة مجده تكسب عيشها بشرف يا أحمد.. الغريبه كل الشعوب المغتربة تقوم بتحويل ما تكسب لبلدانها الأصل عن طريق القنوات الرسميه لأن حكوماتها توفر لها معاملات تفضيليه عدا المنكوبين، الحومات الحصيفة توفر للمغتربين كل ما يعدل طريقم وحكومتنا دايمن فارشا شوك. ندفع الضرائب باكر نلقاها لاندكروزرات عند المسئولين الفاشلين الشاخرين والنواب النايمين الدبل كابينه. حظ كعب.
.
09-20-2015, 12:16 PM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: "اكبر مصنع للحديد في الشرق الأوسط وافريقيا"
"اكبر نيل في انيال العالم" "اكبر مصنع لصناعة ال"جياد" في افريقيا ". " اقدم بعانخي في الشرق الأوسط"
أيوة!
"أكبر احتياطي ذهب في العالم منذو أن بدت الواطة تدور بينا البلد دا" "أكبر منتج للصروة الحيوانية وبناكل فول مرتين في اليوم" .... "أرجل رجال في الدنيا، نقبض أم ريكة كربون بيد واليد التانية نورور بيها لي روسيا"
09-20-2015, 01:34 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39370
ليه؟؟ إثيوبيا تنتمي إلي "العالم الحر" يا اتضى، على قول دينا، و نحن قصتنا مسيوطة و عويصة كما تعلم! مودتي،
قول ينطوي على قدر كبير من الحقيقة.. قصتنا سايطنها الدجالين يا معز ، إي والله ، ثيوقراطية برز مفلفل.. لا لحقنا دولة المدينة ولا رجعنا لأيام صفانا.. تسلم يا عزيز على مشاركة ما قل ودل.
09-20-2015, 07:14 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
Quote: البوست دا انحرف عن هدفه و الخوف تكون العواقب وخيمة ...
تتذكر حكيت ليك نكتة الحنكوشه القالت لزوجها في الفطور عن الجبنه السويسريه ياي الجِبنه دي فيها قدود فرد عليها قائلا : مافي مشكله أكلي الجبنه وزِحِّي القدود على طرف الصحن.. أها ، إنت اقرا المداخلات الفي صلب البوست أما المنحرفة فزحها على بكري...
قت لي الزوج رباطابي؟ .
09-20-2015, 08:39 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: وجماعتنا يقولوا ليك (سِدّوا الفُرَق) عشان الشيطان ما يدخل شيطان في عينكم
ههه، قال ليهو وكِت إبليس بقا يجي معانا في الصف فخليهو ياخ، يمكن ينهدي.. يا معاويه الناس ديل فعلا الساعه معهم تبدو ، بل من المؤكد ، أقصر من دقيقه.. الكابينه زي علبة القوديفا..ونحن نتحدث عن المعاملة والمهنية من الباب للباب.. المرأة الإثيوبية تقدمت بثبات في كافة الإتجاهات ونجحت في كل مجال طرقته وهي عنصر أساسي في الخدمة المدنية وسيدات الأعمال تجدهن في داخل وخارج أثيوبيا واثقات الخطى والرؤى، المرأة عندهن تعمل وتعمل وفي كافة الوظائف والحرف والمهن في منافسه حقيقية للرجل...
أزيب أسنك رئيسة هيئة الكهربا الإثيوبيه بين السلوك في تاني دور في ثانية كم سطعت بدور الله يرحمك يا سيد عبدالعزيز
09-20-2015, 08:46 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39370
Quote: الحبش على قناعه تامه بأننا نتقدمهم فى كل شئ فى الفنون والموسيقى والعلم والحضاره والطب والسياسه غايتو نظرتهم لنا هى الباعثه للطمأنينه أما نحن ندرى بأننا نتعثر حتى يفرج الله لنا أمراً ويخرجنا من العسر إلى يسر وميسره وقطعا سنخرج والإبتلآت تصنع الأمم
المنصور سلام، أخشى يا أمير أن يكون كلامك هو المحور الذي أشار إليه ورفضه حاتم إبراهيم أعلاه والمتمثل في فرضية أنا أفضل من الغير ، نعم الإثيوبيون يحبوننا وينحازوا إلينا لكن ليس بقناعة أننا أفضل منهم ولكن لأننا أقرب إليهم والريده يا المنصور من الأشياء التي لاتحتاج معرفة أسبابها ، قِسمه، كما قال إبن شلعوها الخوالده الراحل الجميل عبدالمنعم. ولامن تغيب عننا الأسباب نردد: بنحبهم كدا لله فالله. حول التفوق الفني والموسيقي أقول لك أنهم في هذا الجانب ذهبوا بعيدا خارج بلادهم وداخلها، وأما موضوع العلم دا فلا أظن ولاتغرنك الألقاب الأكاديمية التي توزع في السودان كالهم في الفؤاد، أما الرياضه فما جمعه هايلي جيبراسيلاسي ورفاقه أمثال كينينيسا بيكيلي من ميداليات وجوائز وكؤوس عالمية لا أظن أننا سنحوز مثلها في العقدين القادمين. ديل أبطال العالم وكل العالم يعرفهم لكن لا أحد خارج الكلاكلة يعرف عن رياضيينا.. والله يا المنصور لا تتخيل حسرتي وأنا أشاهد أعلام الدول مهبهبة وأناشيدهم الوطنية تعزف في المحافل الدولية ونحن لاغنيمة لا إياب ولا خُف ولاحُنين والحال من بعضو وانت لو داير بكايا ألف أهلا يا دموع.. نعم الإبتلاءات تصنع الأمم ، لكنها أحيانا تزيلها من وجه الأرض وهكذا يقول التاريخ قديمه وحديثه؟
لا أمل لدينا مع ( أخواتي البنات الجري دا ما حقي حقي المشنقه ...الخ الخ) ليه ياخ المشنقه؟ (جميل أن تموت لأجل وطنك لكن الأجمل أن تعيش لأجله)
09-21-2015, 03:37 AM
يحي قباني يحي قباني
تاريخ التسجيل: 08-20-2012
مجموع المشاركات: 18742
Quote: أخشى يا أمير أن يكون كلامك هو المحور الذي أشار إليه ورفضه حاتم إبراهيم أعلاه والمتمثل في فرضية أنا أفضل من الغير
للأسف هذا ينطبق حتى على المتعلمين، وأخشى أن يكون على الواعين أيضاً!
المجتمع يرتفع به متعلموه، للأسف هؤلاء يعوزهم الوعي وبدلاً عن خدمة المجتمع فهم يعمدون إلى توظيف الدرجات العلمية بديلاً لتراتبيات اجتماعية مفقودة أقصد مبدأ التسلسل الذي يبدأ من "أحقر" مستوى وينتهي بقدسية تقترب من الألوهية هذه بدأت في أوروبا لكنها محكومة الآن بالاجتهاد والانجاز بمبدأ (publish or perish) عندنا (وفي الشرق عموماً) الأمر تم توظيفه بطريقة مخلة لا تخدم غرضاً درست على أيد "دكاترة" يحملون الدرجة العلمية منذ الستينات ولا جديد لديهم سوى التفاخر بالشهادة وكراسات قديمة يعتمدون على "التملية" منها هؤلاء يتم توظيفهم في مواقع حساسة بدون التأكد من صلاحيتهم لشغلها للأسف هذه العادة تتناسل بوفرة
دخلت في نقاشات ساخنة هنا مع من يظنون أن بإمكانهم التفوق على مؤسسات علمية عمرها خمسة قرون بمجرد الحصول على ورقة "تدعي" أن حاملها مؤهل لما مكتوب عليها
شهاداتنا يا سادة مجرد "عُملات ورقية" لا يمكن صرفها في أي بنك علمي محترم
مسألة "تعقيل العقل" لها دور محوري أيضاً، أعني الموروثات الدينية المبتدعة المجلوبة والمحدثة محلياً تحديداً.
(عدل بواسطة حاتم إبراهيم on 09-21-2015, 04:41 AM) (عدل بواسطة حاتم إبراهيم on 09-21-2015, 04:45 AM)
09-21-2015, 07:13 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: المجتمع يرتفع به متعلموه، للأسف هؤلاء يعوزهم الوعي وبدلاً عن خدمة المجتمع فهم يعمدون إلى توظيف الدرجات العلمية بديلاً لتراتبيات اجتماعية مفقودة أقصد مبدأ التسلسل الذي يبدأ من "أحقر" مستوى وينتهي بقدسية تقترب من الألوهية هذه بدأت في أوروبا لكنها محكومة الآن بالاجتهاد والانجاز بمبدأ (publish or perish) عندنا (وفي الشرق عموماً) الأمر تم توظيفه بطريقة مخلة لا تخدم غرضاً درست على أيد "دكاترة" يحملون الدرجة العلمية منذ الستينات ولا جديد لديهم سوى التفاخر بالشهادة وكراسات قديمة يعتمدون على "التملية" منها هؤلاء يتم توظيفهم في مواقع حساسة بدون التأكد من صلاحيتهم لشغلها للأسف هذه العادة تتناسل بوفرة
دخلت في نقاشات ساخنة هنا مع من يظنون أن بإمكانهم التفوق على مؤسسات علمية عمرها خمسة قرون بمجرد الحصول على ورقة "تدعي" أن حاملها مؤهل لما مكتوب عليها
شهاداتنا يا سادة مجرد "عُملات ورقية" لا يمكن صرفها في أي بنك علمي محترم
مسألة "تعقيل العقل" لها دور محوري أيضاً، أعني الموروثات الدينية المبتدعة المجلوبة والمحدثة محلياً تحديداً.
دون مجاملة أو محاباة أقول أن هذا الكلام من أفضل ما قرأت مؤخرا ولي عودة إليه رغم انه يحتاج أن يُفرد له بوست بحاله. شكرا يا حاتم على الكلام الواعي والذي أردت الإحتفاظ به والعودة إليه حين يأتي دوره.
09-21-2015, 07:41 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: كيف لا يتطور الاحباش ...... تكادهم يركعون لتحية بعضهم البعض... من اعظم شعوب القارة السمراء ان لم يكونوا اعظمها...
صدقت يا نوباتيا، وبصدق لا يأتيه التظاهر من بين يديه ولا من خلفه، وكمان الإصغاء إلى المتحدث وحضِّه على الإستمرار في الحديث بشهقة قصيرة خفيفة، شهقة 30 هيرتز إذا صدرت من حسناء يكون لها مفعول الأكسجين والفنتولين لهجمات الربو. ياخ السلام الطيب والوجه الينبسط في الإستقبال يقضيا نصف الحاجة وكل الزيارة، لعن الله الإكفهرار ، ما أجمل الإنسان بالتواضع والتسامح وما أقبحه بالتكبر والتطرف. لإبتسامة هؤلاء الناس أثر يغدو معه هاروت مجرد هاو ، فهم يحركون معالق الجوف بالريموت ويولعوا دواخلك قبل الجلود فمنهم جاءت نظرية المايكرويف. يا سلام على ال Psychokinesis
ساره نورو الإثيوبية الألمانية نجحت في عملها كعارضة أزياء عالمية الألمان يفاخرون بها كالمرسيدس والطوارق لكنها في النهاية نجاشية كابر عن كابر
09-21-2015, 11:09 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: اليوم،مؤشرات الواقع الآن تقول أن وتيرة الاقتصاد الأثيوبي في تقدم مستمر، وأعتقد أن سد النهضة عندما يكتمل سيكون بمثابة العتبة الجديدة لولوج الاقتصاد الاثيوبي لمرحلة جديدة،والمصريون
يا عليش حبابك، الزائر لأديس بين 1987 و2013 سيعتقد أنه في مكان آخر غير سابقه، هناك نهضة معمارية كبيرة وتطور في الطرق التي كانت تعاني في فترات الثمانينيات والتسعينيات من القرن المنصرم، أكيد سد النهضه ( وهو غير السدود المهزلة) سيضيف الكثير إليهم وإلى اقتصادهم ، ما يساعدهم على بلوغ غاياتهم السامية البيستحقوها، مظهر الوحدة بين أبناء الأمة ، رغم اختلاف اللغات والديانات ، كلهم يرفعون علم بلدهم المائز بألوانه الثلاث والمتواجد في كافة المطارات والمحافل الرياضية والمعارض ، حبهم لبلدهم واعتدادهم بأصلهم وحضارتهم يبعث على الغبطة ونحن (بغرانين) ونتمنى كل خير لهم ، على الأقل من باب (البجاور السعيد يسعد).
شوارع بمواصفات عالمية بين المدن كم من نفوس أزهقت بين مدني والخرطوم يا ترى؟ ليه يا عليش؟
هي لله
09-21-2015, 01:57 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
شيقا.. الحت دا بس أكتب Eskista واترك الباقي على اليوتيوب .. لكن طالما جيت ما بنرجعك يدك فاضيه ونرشح ليك الغنيه الشاغله الراقصين والراقصات منذ مدة وعنوانها Sela Bey وتعني ( قول لي كويس)..
دا شعب فنان مطبوع.. بعض السودانيات (في الماضي) كانن بيقدمن عروض إسكستا في تجمعات الزار ويطروا لوليه الحبشيه ونِمر الكِندو.. ومسميات أخرى وهاك يا رقص تمارس فيه بينهن كثير من الممنوعات ( تخميسة سجاير ورشفة واين - قال لي صديق) وتتساقط فيه جُل الإحباطات ثم يخرجن بروح جديدة لمواجهة (قطر الهم) السايقو شمهروش .
09-21-2015, 07:23 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
يا سلام عليك يا محمد والله أنت زول جد فنان .. من وين جبت بت نورو بت نورو هي ضلفة الضو الاثيوبية الجديدة القدرت ألمانيا تفتحها تشعشع في كل الاتجاهات . قالوا يا محمد في الماجك شو الفات في Las Vegas الخلعة ضربت حكام الشو متمحنين في بربحة الكرعين لون البن الامهري . عليك الله أتلهم ود الخال شيقوق بي أي صورة عونكوليب تصادفك في علايل تورنتو .
09-21-2015, 09:20 PM
بابكر قدور بابكر قدور
تاريخ التسجيل: 02-26-2013
مجموع المشاركات: 1561
Quote: مظهر الوحدة بين أبناء الأمة ، رغم اختلاف اللغات والديانات ، كلهم يرفعون علم بلدهم المائز بألوانه الثلاث والمتواجد في كافة المطارات والمحافل الرياضية والمعارض ، حبهم لبلدهم واعتدادهم بأصلهم وحضارتهم يبعث على الغبطة ونحن (بغرانين) ونتمنى كل خير لهم ، على الأقل من باب (البجاور السعيد يسعد).
أخي محمد المرتضى وأخي قباني لكما الود والتحايا الطيبات هذه الألوان الثلاثة التي تميز العلم الأثيوبي ظلت باقية على حالها منذ رفعها الإمبراطور منليك في عام 1897م وستبقى دون تغيير .. لذلك فهي في قلب كل أثيوبي .... في العام الماضي وفي مثل هذه الأيام كنت ذاهباً إلى أديس وبصحبة زوجتي من الرياض بالسعودية .. وعندما تحركنا من الصالة لركوب الطائرة كنا مصطفين وأمامي كانت العديد من الحسناوات .... فما أن بدى ذيل الطائرة وعليه العلم الأثيوبي بألوانه المميزة حتى صاحت الفتاة التي أمامي قائلة بالأمهرية ..... أووووو .. إتيوبيا هقري .. سألتني زوجتي وقد سرت القشعريرة في جسدي إعجاباً بهذا الحب للوطن .. سألتني ماذا قالت هذه الحبشية؟ فقلت لها قالت: وبتعجب شديد إتيوبيا وطني! وكما ذكرت ياصديقي نحن بغرانين .... أما عن المقطوعة الموسيقية التي تفضلت وقدمتها فالتعليق عليها يحتاج لبوست كامل سأقوم بإعداده بمشيئة الله في الأيام القادمة وسيكون إهداءً لك وللاخ قباني .... محبتي وودي وتحياتي ....
09-22-2015, 07:30 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: "اكبر مصنع للحديد في الشرق الأوسط وافريقيا"
"اكبر نيل في انيال العالم" "اكبر مصنع لصناعة ال"جياد" في افريقيا ". " اقدم بعانخي في الشرق الأوسط"
نحن الأكبرات دي بتخلينا نمشي لى قدام يا مرتضى تحياتي لكم
أخي وصديقي محمد.. سبق وكتبت هنا حول التجربة السنغافورية والماليزية واليابانية والكورية الجنوبية وكل تلك الدول يجمعها ، غير الجغرافيا، صدقها الصخري غير القابل للمساومة والمفتوح على كافية أبوب التضحيات لتغيير حالهم بشكل إنقلابي ، قاموا قالوا التعليم والصحة ديل خطين أحمرين وهما أساس الإنسان المنتج ، ثانيا الكفاءة والنزاهة في تولي الوظيفة أيا كانت واحترام القانون وتطبيقه رأسيا وافقيا والإلتزام بقيم المجتمع. بهذه العوامل فقط امتطت تلك الدول صواريخ التقدم وحلقت في سُدم بعيدة وهيمنت على نصف اقتصاد العالم قديمه وحديثه. نحن يا محمد عندنا موارد أحسن من كل تلك الدول مجتمعة ولكن ينقصنا تطبيق الأبجديات المشار إليها أعلاه، فرجل ك لي كوان يو جعل من ميناء قديم يتبع لشركة الهند الشرقية دولة عظيمة نسميها اليوم سنغافورة، فعل ذلك دون تهليل كاذب أو ادعاء ابتلاءات وسحل للعباد.
رغم كل ذلك أثق أن المستقبل لنا وأن الحالة الراهنة حالة عابرة ستزول كزوال غيرها هي وشخوصها وأثق أن أبناءنا وشبابنا سيحدثوا فعلا إنقلابيا ستراه يا باش.
09-22-2015, 07:36 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
Quote: أما الرياضه فما جمعه هايلي جيبراسيلاسي ورفاقه أمثال كينينيسا بيكيلي من ميداليات وجوائز وكؤوس عالمية لا أظن أننا سنحوز مثلها في العقدين القادمين. ديل أبطال العالم وكل العالم يعرفهم لكن لا أحد خارج الكلاكلة يعرف عن رياضيينا
صدقا صادق حرم الله يقطع دابر صحافة المدرجات والهبر
09-22-2015, 07:42 AM
د.محمد حسن د.محمد حسن
تاريخ التسجيل: 09-05-2006
مجموع المشاركات: 15194
Quote: وعندما تحركنا من الصالة لركوب الطائرة كنا مصطفين وأمامي كانت العديد من الحسناوات .... فما أن بدى ذيل الطائرة وعليه العلم الأثيوبي بألوانه المميزة حتى صاحت الفتاة التي أمامي قائلة بالأمهرية ..... أووووو .. إتيوبيا هقري .. سألتني زوجتي وقد سرت القشعريرة في جسدي إعجاباً بهذا الحب للوطن .. سألتني ماذا قالت هذه الحبشية؟ فقلت لها قالت: وبتعجب شديد إتيوبيا وطني!
قبل سنوات جلس إلى جواري أحد الناغمين على (السودان) وعرفت منه أثناء رحلتنا إلى الخرطوم أنه بقي عدة سنوات في دولة خليجية دون زيارة السودان وصب جام غضبه على كل شئ وأنه لولا ظرف معين لم يكن ليسافر هذه المرة الى الخرطوم . بمجرد هبوط الطائرة مدرج مطار الخرطوم بكى الرجل كالطفل ، حدث هذا في كثير من الرحلات مع آخرين وأخريات.. أستطيع أن أعرف لماذا هتفت الإثيوبية مرافقتكم : إثيوبيا هقري، إنه الوطن الذي لايعلى عليه، ما يميز الحبش أنهم يحبون علمهم المعروف كرمز للوحدة ، أتمنى أن يأتي اليوم الذي يلتف أهلنا حول علم واحد، للأسف ما زال لكل فئة وحزب علمه ، بل إني كنت أشاهد في التلفزيون احتفالا أقامته إحدى سفاراتنا كان بعض الأطفال يحملون علما كان المثلث فيه باللون الأحمر، ما زال كثير منا لايعرف حتى ترتيب الألوان في علمنا رغم أنه اعتمد في 20 مايو 1970 .
شكرا قدور.
09-22-2015, 07:39 AM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20440
Quote: You said it all وعلى الرغم من أن صاحبك قباني زول قيافه وأنيق (سجِّل يا يحيى) لكن (سماحة) الرجال آخر ما يرد فيها الشكل وأنت سيد العارفين، وكما تعلم ، الشجاعة والمروءة والكرم هي معاييرنا للرجال الرجال،
نعلم ذلك جيدا يا صديقي .. هو يدخل في باب المعلوم بالضرورة .. وقباني كما وصفته تماما .. ولكنها شهوة المزاح ليس الا .. والكثير من المودة كذلك
تحياتي لكما .. وكل عام وانتما بخير ..
09-22-2015, 02:31 PM
عباس محمود عباس محمود
تاريخ التسجيل: 11-26-2004
مجموع المشاركات: 1441
مولانا المرتضي..التحية ليك وليحيي قباني هذا حكي انيق وممتع
تعليقا علي الصور. ..اراك ما زلت يا مرتضي محتفظا بتلك الابتسامة التي كنت اراها في بداية دراستك الجامعية...ربنا يديم الصحة والعافية. حاول الدكتور النور حمد الاجابة علي سؤالك المطروح في صدر البوست من خلال سلسلة مقالات تزيد عن العشرين في موقع مجاور وكان عنوانها :- لماذا يصحو مارد الهضبة ويغفو مارد السهل متابع هذا السرد الراقي .
منور ياود المرتضى ومعاك ود قبانى قاليك فى امريكا.. لو فى مطعم اثيوبى عايز يفتح جديد المطاعم الفى الشارع كلها بتقفل يومين عشان الزباين كلها تمشى للمحل الجديد وبعد داك..كل ومقدراته الفنية والجمالية بالله فى جمال اكتر من كده او فى حب ياخوانا اكتر من كده
قبعنا فى مكاننا الذى كنا فيه فى زمن ما ثم انحدرنا الى اسفل سافلين.
09-22-2015, 08:23 PM
يحي قباني يحي قباني
تاريخ التسجيل: 08-20-2012
مجموع المشاركات: 18742
Quote: صدقا صادق حرم الله يقطع دابر صحافة المدرجات والهبر.
أتمنى ألا تكون ممن يضيعوا وقتا أو مالا فيها.. يا طلحة الحال من بعضو ..
-----------------
بعد انتهاء منافسات كأس العالم 1982 والتي قدم فيها العماليق والسحره ناس كاريكا وسيرجينهو ومارادونا وتيجانا وبلاتيني ورومينيغه وبروتشاقا ألعابا هوائية وبهلوانيه شي بالكعب وشي بالسمح وتمريرات إلى الخلف دون الإلتفات وإشارات باليدين وأهداف بالصدر والرأس وشغل كباري والمتعه كداري ...الخ، وكنا وقتها طلابا بجامعة الإسكندرية، رسم المرحوم مصطفى حسين كاريكاتيرا فيه كومر بوليس شايل حسن شحاته والخطيب وشطه وفاروق جعفر وغيرهم من المشاهير في مصر وقتها ومكتوب في التعليق (مقبوض عليهم بتهمة الإحتيال). أها ، بالنسبة لناسنا ف .. كيفك يا طلحه يا لورد.. ....
09-24-2015, 04:34 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
كل سنه وانت طيب يا سفيان .. أهلنا ديل (حاجاتنا) زاتا أصبحوا ينافسونا فيها، فمنذ سنوات كنا في حفل عشاء بدبي وتغنت فرقة أثيوبية راقصة بأغنية (ربيع الدنيا) وأتبعتها ب (المهرجان) فأذهلت الحضور متعدد الجنسية ولا أخفيك أنهم أجادوا بمستوى يفوق معظم من تغنوا بالأغنيتين من السودانيين، غايتو الموسيقيين والمغنين عندنا سينتقلوا إلى مصاطب المتفرجين قريبا لو سارت الأمور على ما نرى لاغرو أن الساحة السودانية توقفت عن إنتاج أي جديد في هذا الإتجاه منذ ربع قرن تقريبا.
09-25-2015, 03:54 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: مولانا المرتضي..التحية ليك وليحيي قباني هذا حكي انيق وممتع
تعليقا علي الصور. ..اراك ما زلت يا مرتضي محتفظا بتلك الابتسامة التي كنت اراها في بداية دراستك الجامعية...ربنا يديم الصحة والعافية. حاول الدكتور النور حمد الاجابة علي سؤالك المطروح في صدر البوست من خلال سلسلة مقالات تزيد عن العشرين في موقع مجاور وكان عنوانها :- لماذا يصحو مارد الهضبة ويغفو مارد السهل متابع هذا السرد الراقي .
يا سلام ود الأولياء رفيق الزمن الجميل.. كنت فاكرك بعيد أتاريك أقرب إلينا من حبل الوتين!! شكرا على الإطراء يا عبس ، وشكرا لإفادتي عن كتابات أخي وصديقي الماجد الفنان د. النور حمد في جانب (لماذا) ولاشك سأعود إليه فدكتور النور من أفضل المثقفين السودانيين ورجل مفيد بكل ما تحمل الكلمة من معنى إفتقدته مسقط والجالية السودانية فيها ، ومجالسته يجب أن يحرص عليها كل لبيب حتى لو كانت مشفرة. كلمة (يصحو) التي قلت أن د. النور استخدمها ذات دلالة هي أن أثيوبيا ليست حديثة عهد بالنهضة والحضارة، فسلوك الإثيوبيين اليومي يدل على تلك الحضارة والتي تتبدى في المعاني وليس المباني ، هم الذين احتضنوا اللاجئين السياسيين في صدر الإسلام وعندهم مليك لايظلم عنده أحد ، أديس رغم مشاكل البنية التحتية تحس معها بحميمية ذكية وهذا شأن المدن القديمة الحنينة الفاهمة وعميقة لذا نحبها فنحن لاتغرينا ناطحات السحاب وأبراج الزجاج البهرج والتي تماثل البنت السمحه وبليده ، واعذرني على التشبيه غير اللائق لكنه بيوصل الفكره.. قيل (تحت تحت) أنه كان مسلما وهذا لايغير في الأمر شيئا. يا عباس عندي اعتقاد إنو حا يجي يوم نعمل وحده مع إثيوبيا والصومال وإرتريا وجيبوتي وموريتانيا ، آي موريتانيا وتبقى الصداقه قرابه ونكسب الودين..
09-23-2015, 08:34 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
سلام يا مرتضى ... كل سنة و انت طيب... ببساطة لاننا لا نملك دولة حقيقية ذات سيادة للقانون ومؤسساتية راسخة. إنما هي مواسم من الطاغوت و الجمود و العشوائية.
........................ الهضبة ...... يالجمال الذكريات هناك ! الكلايميت يا مرتضى عجيب انت قايل الناس دي رايقة و سمحة كدة ساي.... ياخي أديس مراوح ما فيها ، شهر خمسة كنا بنوم بي دفاية
09-24-2015, 09:14 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
Quote: لو فى مطعم اثيوبى عايز يفتح جديد المطاعم الفى الشارع كلها بتقفل يومين عشان الزباين كلها تمشى للمحل الجديد وبعد داك..كل ومقدراته الفنية والجمالية بالله فى جمال اكتر من كده
كل العام وأنت بخير يا منعم.. الكلام دا مؤثر جدا وهام للغاية وعرضت له بصورة مباشرة وغير مباشرة في عدة مواضيع هنا تناقش مسألة التعاون والعمل الجماعي لأن في تبنيه نجاح للجميع . لعلك لحظت مدى تعاون الجاليات في المهجر كيما تظفر بقوة أو حماية خارج بلدانها الأصل فتجدهم يدعمون بعضهم وبشكل جماعي ومنظم وذلك للسيطرة على نوع معين من الأعمال بل حتى حمل أفرادهم لبلوغ برلمانات دول المهجر وتكوين مجموعات ضغط لخدمة قضاياهم وعدم إضاعة الوقت وإهدار الجهود بخلق مشاكل بينهم وبينهم والخوض في دنكشواتية تفضي بهم إلى الهامش وصحراء الإهمال فتتضاعف الغربة ووحشة المنفى.. اللبنانيون ، وأهل الشام من أبرز الشعوب التي أوصلت بنيها في العالم الجديد وحتى أفريقيا إلى هيمنة تجارية وسيطرة سياسية حتى أن من أبنائها من تسنم كرسي الرئاسة في تلك الدول. العمل الجماعي المنظم المخطط قوة ساحقة بلدوزرية يغيب عنا كجاليات سودانية في المهجر دون أي مبرر ولو أننا جعلناه عقيدة في النفس ومارسناه في الواقع لتبوأنا مكانا عظيما في شتى المحافل الرياضية والفنية والإقتصادية ولما فكرت طغمة بمغامِرة أن تحكمنا بغير إرادتنا ، ولا أضيف جديدا بقولي أن ديننا الحنيف يحضنا على ما فعله أهل المطاعم الأثيوبية القديمة نحو صاحب المطعم الجديد وهو تعاون في بر صريح .
متى نستوعب ونتدبر الحكمة من أقصوصة الثور الأبيض.
09-25-2015, 05:44 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: ببساطة لاننا لا نملك دولة حقيقية ذات سيادة للقانون ومؤسساتية راسخة. إنما هي مواسم من الطاغوت و الجمود و العشوائية.
ياخ كلمة (العشوائية) دي بفتش ليها مذ كنت طفلا تتهجى لهاتي الأبجدية، ياها ذات الكلمة التي تلخص الكثير في أسباب فشلنا في إنجاز الأعمال المبهرة والناجحة. حكى لنا صديق وزميل، وفي محفل ضم عددا من القانونيين ، أنه حين كان يعمل بالدولة كمستشار قانوني أدرج اسمه قبل يومين ضمن قائمة وفد سيسافر لدولة أوربية لمناقشة عقد بملايين الدولارات وأنه لم يعرف بمضمون العقد ومحله إلا في الطائرة على (انخفاض) قدره 30 ألف قدم من الجهل والعشوائية في حين أن مثل تلك العقود للمشاريع الميقا يتم دراستها بكافة عناصرها قبل شهور طويلة ، وبالطبع كان حاله في الإجتماع بالأوربيين كحالي في مزاد سوذبي وكريستي . المهم، كما يقول تبارك ودالناظر، علم أن الوفد كان يهمه التوقيع على أي شئ ثم الجري للأسواق وال (خم) .
هل حضرت أي احتفال أو مؤتمر في السودان؟ منذ سنوات كنت أشاهد احتفالا رسميا في إحدى القنوات السودانية، وعلى الهامش (على الجنب كدا) استضاف مذيع الحفل فنانا مشهورا شارك في أوبريت أخرج بصورة تثير الغثيان ، فسأله المذيع عن الحفل فكان رد الفنان: والله ياخي أنا سعيد بالمشاركة والحقيقة الشكر يستحقه زميلي الفنان (...) لأنو لاقاني في مدخل دار الفنانين وحلف علي إلا أجي معاهو الحفله دي فجبرت خاطرو رغم ارتباط تاني وطوالي ركبت معاهو وطلعنا المسرح وياهو زي ما شايف ربنا (وفغنا) ..
ذات الرواية حكاها لاعب كرة معروف عن مشاركته في ماتش وقال أنه كان ما جاهز لكن سكرتير النادي حلف عليهو طلاق وهو بيعز الزول دا شديد فقام لعب ، ولولا مريخيتي لأضفت المزيد. أها من وين ننتج عملا متقنا؟ يا خالد ما مرت عليك صورة المذيع الحفيان؟ سمعنا بالخبز الحافي لكن المذيع الحافي دي يستحق عليها السعفة الذهبية..
بدون إعداد جيد تكون احتمالات الفشل هي الأعلى ، كدي يا خالد شوف المدربين في ماتشيات الكرة عندنا، كل مجلس الإدارة والمشجعين والصحفيين والمحللين ( بتاعين التحلل) والتجار والسمار والغاوون وناس التسالي و برِّد والنشالين وأصحاب العمائم والتمائم وباعة السجائر والحزانى والشامتين في الخط وكل واحد فيهم قارديولا أو مورينهو المكجنو، حكى لي صديق شارك في مهرجان للأغنية العربية ضم عدة دول وأقيم بقاعة الصداقة عندما سألته لماذا انقطع صوتك أثناء الأغنية الطويلة فقال لي بابتسامة معجونة بالألم: المايك بطاريتو نزلت.
09-25-2015, 06:11 AM
معروف حمدين معروف حمدين
تاريخ التسجيل: 07-16-2006
مجموع المشاركات: 1601
ليه .. مسكت البوست من الأول .... المتعة هي .. أن تأكل اكل نضيف .. وتشوف مناظر حلوة .. وتشرب ما تحب .. وتقرأ لأناس يمتعوك فى حنانك .. ـــــــــــــــــــــــــــــــــــــــــــــــــــــــــــــــ أكتملت عناصر الرواية .. ولم يتبقي غير حبكم ...
09-25-2015, 06:18 AM
Munir Munir
تاريخ التسجيل: 02-11-2002
مجموع المشاركات: 10496
لمن زوول يجيب سيرتي بتكيف منو كيف؟ وأنا أصلاً متكيف منك يازول يا أنيق ..
ويا ودالمرتضي ويحي كدي علقوا لينا علي هوس بناتنا، خاصة مذيعاتنا بالمساحيق وتبييض البشرة بالمقارنة مع المذيعات الأثيوبيات والأريتريات .. هل لذلك إرتباط بالتعلق بالمعايير العربية ؟؟
وبالمناسبة، رغم أننا ناس كرور لكين رغم ذلك فأخواننا الأثيوبيين والأريتريين يكنوا لينا إحترام شديد وشايفننا أحسن منهم - أو لربما من شدة الإحترام يحسسوك بأنك الأفضل -
سلام استاذ محمد المرتضى منظربسيط شهدته في زيارة عابرة لأديس فسر لي الكثير عن هذه البلاد وحضارتها. قبالة المطعم الذي أجلس فيه مبنى يبدو أنه مهم حيث يقوم على حراسته بعض الجنود المدججين. لاحظت أن أنظار الجنود مشدودة للجهة المقابلة وهم يبتسمون. من تلك الجهة كانت هنالك إمرأة قادمة تصطحب طفلتها الصغيرة عائدة بها من المدرسة كما يبدو. ما أن اقتربت الأم وطفلتها حتى نهض الجنود ليؤدوا التحية العسكرية للطفلة وينحنوا واحدا إثر الآخر ليقبلوا يدها الصغيرة بمحبة وود.
09-25-2015, 05:25 PM
هشام هباني هشام هباني
تاريخ التسجيل: 10-31-2003
مجموع المشاركات: 51292
السلام عليكم ....... نوع الطعام المقدم وطريقة الطهى الجيدة ما حتلقى ليك اسيوي شغال بعمل زغنى بس عادى ممكن تلقى اسيوى بعمل كسرة وملاح ...... اهتمام الحبش بالاكل والتزيين من سلطات وغيرة وقبول الانتقاد عادى ممكن يغير ليك الاكل حتى اتذكر مرة طلبنا اكل وخلينا جزء كبير لاننا مستعجلين فصاحب المحل بسال هل اكلنا فيهو مشكلة عشان كدا ما اكلتوا ...... غير كدا اى اكله عندهم ما فيها عظم ياخى نحنا شيتنا كلها عظام ما تعرف تاكل ولا تطلع فى العظام (( بالنسبة لاديس ابابا فقريبا المترو حيكون افتتحوا )) والشغالين مقدمين طعام فى الخرطوم ديل فيهم خريجين جامعات محترمه بس هم ما لقوا شغل ما بقعدوا ساى بشوفوا اقرب شىء بشتغلوا ..............(( الاثيوبيين يقدرون السودانيين والفن السودانى وجزء كبير من السودانيين لايحترم الاثيوبيين ولايقدرونهم )) أعجبني · رد · 20 سبتمبر، 2015 01:10 صباحاً
أيوا يا عمر، سر المهنة ، الطعام الأثيوبي ليس مجرد مكونات تُشترى من السوق ، النكهة لاتكتمل إلا إذا كان الصانع نجاشي المولد، يقرأون على أواني الطبخ ويضيوفون إليها توابل لاتعرف مقاديرها إلا الأنامل السمراء ونكهة يبثها الفؤاد، الابتسامة والحنان من أسرار الخلطة صنعا وتقديما.. حاولت الكثير من نسائنا إنجاز طبق إثيوبي وفشلن ، نصحناهن بأن يبتسمن للموقد وما فوقه والتغني للبلد والأرض والحبيب وستكون النتائج مذهلة.. أما سؤال صاحب المطعم مستفسرا لِم لم (تحسنوا) وتحسموا أمر الطبق فهذا عمل الكواليتي كنترول لتلافي العيوب واستمزاج آراء من أحسنوا الظن في الزغني،
ياخ أضحكتني بسالفة الشيه أم عضام، نحن العضام زاتا بنضيف ليها عضام، نحن كدَّاداين جد، ما سمعت الهمباتي بيقول ناكل حاره ما نضوق بارده..؟
حاجاتنا كلها صعبه.. صعبه بالحيل..
قهوه بعد الصحن دا وتقول : أين المارينز؟
09-26-2015, 12:38 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
Quote: أكتملت عناصر الرواية .. ولم يتبقي غير حبكم ...
معروف الودود، لامن واحد يشكِّر لي كتابتي (تصيبني) سعادة لحظية لاتخلو من خوف أن ينكشف أمري بأني في الحقيقة لست مجيدا فموضوع الكتابة هو الذي يفرض نفسه جمالا أو قبحا ، وعشان أوضح ليك أكتر عمنا السر قدور سأل الموسيقار وسيم النغم والطلعة الخلوق عبداللطيف خدر (ود الحاوي) مشيرا إلى لحنه الخالد في أغنية (المصير) للفريد في عصرو إبراهيم عوض عبدالمجيد في إيحاء بأنه لحن أسطوري، أها ودالحاوي عِوض أن يهتبلها سانحة وُيلحِق نفسه بموزارت وباخ رد بكل تواضع قائلا: هناك كلمات لجمالها تأتي ملحَّنة في ذاتها ومنها كلمات (المصير) الرائعة لإبن حي العرب سيف الدين الدسوقي، وأنا لم أبذل فيها شيئا يُذكر. والله يا معروف قرررربت أبوس جبين الشاشه وكان الدمع أقرب إلي من المآقي، أها يا سيد ابوك، لامن أكتب عن الإثيوبيين والموريتانيين يتراءى لك أن كتابتي جميلة في حين أن أهل الموضوع وأخبارهم هم الجميلين وتستمد كتابتي من سماحتهم ما ترى، فهم تسبقهم عند القارئ مساحات شاسعة من القبول فينسب لكتابتي الجمال بعد أن يضيف أمثالك من رضاهم عني (هواده)....
نسأل المولى أن يهبك العافية والنجاح والرضا والإخلاص..
09-26-2015, 02:57 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: ويا ودالمرتضي ويحي كدي علقوا لينا علي هوس بناتنا، خاصة مذيعاتنا بالمساحيق وتبييض البشرة بالمقارنة مع المذيعات الأثيوبيات والأريتريات .. هل لذلك إرتباط بالتعلق بالمعايير العربية ؟؟
المعايير العربية براء مما تفعله بناتنا ياع عزيزي منير، وقبل ما نمشي بعيد أقول أن العروبة ليست عرقا له لون محدد ، وإن كنت تعني من ينتسب إلى يعرب بن قحطان والعرب العاربة فهم سمر البشرة ، لكن بناتنا ديل يا منير بيقوموا بعملية تشويه ممنهج لبشرتهن، هن لايعرفن أن لون بشرتهن يجب أن يتماهى مع تفاصيلهن الجسدية ولعل الأسباب النفسية وراء (التبييض) تتعدد و شاركت فيها أجيال كثيرة صورت لعقولهن أن ( وجه القمر سافِر يضوى شعاع ونور وافر ) وهو الأمثل، ليه يا منير ما (يسلخن) وجوههن وشعراؤنا يرددون صباح مساء أن الحظ التعيس لونه أسود (زي لون هضليمها). ليه ما يسعين للون مهند ونور وكل القنوات تمجد شخوصا و(أبطالا) لأفلام ومسلسلات ليس فيها ممثلين من بوركينا فاسو أو سوازيلاند. الإنسان يتأثر بمحيطه والإعلام يلعب دورا محوريا في تحديد معايير الجمال في أذهان البعض. هسه شوف موروث العالم الثالث تاريخيا ضد (المره الكملانه من لحم الدنيا ) وزي كلوديا شيفر وناعومي كامبل والعارضات ديل لو حامن في سوق عكاظ كان بقن مسخره ولطاردتهن كلاب بني هلال وغضفان وكدايس جُرهم.
بذات القدر شوف معايير الجمال في بعض النسوة الأثيوبيات اللائي يقمن ب (شد الشفة السفلى لتصبح أكثر طولا)، أو اللواتي يطلن أعناقهن ب (مط ) الرقبة حتى تصل طولا نراه غير مقبول ويرينه ضرب من الجمال. في اتجاه آخر تتمثل معايير الجمال في حجم بعض الأجزاء وأنت أدرى والتحية لشعراء المعلقات ولأهلنا في الصومال وموريتانيا الشقيقة ولاريث ولا عجل، وخطوة اتنين مستحيل. أما حديثك عن مذيعاتنا العايزات يلحقن فيروز زياني بفاونديشن وكريمات سعد قشره فقد أشبعه الأعضاء هنا بحثا وسخرية، يعني يا منير الوجه بلون والكف بلون آخر وتقاسيم الوجه في واد ، والإضاءة ساطعة وسخانة الأستوديو تحرق المشاهد والعرق يكمل تلك اللوحة السوريالية ، قمة المأساة ياخ. مذيعاتنا ديل أتمنى يتاوقن للقنوات الإفريقية بل حتى بعض الأوربية عشان يعرفن أن الجمال في تناسق الأشياء ، وأنا لا أ لومهن بقدر ما ألوم القائمين على تلك القنوات . الله يسامحك يا إيمان عياد
Quote: من تلك الجهة كانت هنالك إمرأة قادمة تصطحب طفلتها الصغيرة عائدة بها من المدرسة كما يبدو. ما أن اقتربت الأم وطفلتها حتى نهض الجنود ليؤدوا التحية العسكرية للطفلة وينحنوا واحدا إثر الآخر ليقبلوا يدها الصغيرة بمحبة وود
. شكرا أخي عبدالمحمود، مشهد مؤثر ويحكي عن عدة قيَم .. لأول قراءة ظننت أنها ربما كانت إبنة زميل لهم فارق العبوس الغرارة ، لكن الراجح أنه تقدير للطفلة و للعلم والأم ومثابرتها وأيا كان مرجع التحية العسكرية وسببها فهي ينم عن قيمة جميلة .. مودتي
Quote: ود المرتضي وقباني وضيوفكما كل عام وانتم بخير ( متحبشون) ههههههههه
الناظر هباني ، كل سنه وانت طيب.. يا أبا نضال ، لو أني من المؤمنين بنظرية التقمص incarnation لقلت لك أني ربما عشت في إحدى حيواتي السابقة في الهضبة ، ولو أني خضعت لتنويم مغناطيسي إسترجاعي regression hypnosis لتحدثت أمهرية ولوصفت حال البلاد و العباد ومدنهم وقتها ، ربما قبل آلاف السنين، وربما طلبت الإستماع لصولو ساكس من Yared Tefera أو Nadav ولطلبت فنجان قهوة زي البين السماء والأرض أعلاه . وزي ما كل مره جاييني إيدك مليانه ما بنرجعها فاضية..
.
دي من ناداف هبر.. الساكس المزيل للكلوسترول والمذيب للتجلط يا عمده .
09-27-2015, 09:38 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
حبيبنا طارق، قلنا نتقاسم معاكم مرار الهم و(عذاب) ريدتنا .. المثل اللنقليزي بيقول: Fifty lemons are a load for one person, but for fifty persons they are perfume
09-27-2015, 11:55 AM
معروف حمدين معروف حمدين
تاريخ التسجيل: 07-16-2006
مجموع المشاركات: 1601
Quote: لامن واحد يشكِّر لي كتابتي (تصيبني) سعادة لحظية لاتخلو من خوف أن ينكشف أمري بأني في الحقيقة لست مجيدا فموضوع الكتابة هو الذي يفرض نفسه جمالا أو قبحا
يا سعادتو .. عاوز أشكرك وطوالي بقول ليك الكتابة هى روح دواخل الأنسان والواحد جواه ما حلو .. كل المخرجات بتكون ما حلوة .. وأعكس تصب .. وعن مسألة تعاون اولاد أمهرا عندنا فى أبوظبي الشيشة ممنوعة فى القهاوي ومعظم القهاوي هنا للأثوبيات تقوم البلدية تعمل ليهم كشة والقهوة الأولي بس علي نطاق أبوظبي فى خمس دقائق كل القهاوي بتكون خالية من الشيشة لدرجة فى مرة من المرات واحدة دخلت الشيشة بنارا فى عربية احد الزبائن وبتاع البلدية دخل القهوة ما حصل أي مظاهر شيشة طلع بره القهوة والعربية دخانا فى السماء .. ضحك واتصل بالدفاع المدني ..
09-30-2015, 05:47 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
طبعاً يا مولانا الصينية دي عيب كبييير عند اهلنا ديل انك تاكل الانجيرا التحت وزي النبذته الزولة القدمت الاكل ليك يعني مفترض تاكل الانجيرا الملفوفه المفروشه تحت دي تخليها زي ما هي بس نحنا سودانيين ديل احييييييييييي منهم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد المرتضى حامد
محمد الكامل عبد الحليم
حاتم إبراهيم
دينا خالد
يحي قباني
الطيب رحمه قريمان
Osman Musa
محمد حيدر المشرف
معاوية الزبير
munswor almophtah
حسين نوباتيا
عليش الريدة
الطيب شيقوق
MOHAMMED ELSHEIKH
ABUHUSSEIN
بابكر قدور
د.محمد حسن
عباس محمود
سفيان بشير نابرى
عبد المنعم سيد احمد
Khalid Basheer
طارق جبريل
معروف حمدين
Munir
هشام هباني
حمد عبد الغفار عمر
فيصل محمد خليل
فيس بوك
تويتر
انستقرام
يوتيوب
بنتيريست