|
Re: هذه صورة والدتى صاحبة اغنية (يا ناس القوز علينا ظلم) (Re: amar adam)
|
قولوا ما شاء الله عبنى باردة الصورة حديثة والشاعر بله ود مبلول الرواية الصحيحة (شال السيدة وما خلا حرم) باقى القصيدة: امانى القوز ما سوالنا مقوس شال العيش وخلا الروس شال الشيك اب دبوس وخلا الكمتر اب ناموس ردت عليه واحدة: انشاء الله القوز يشيلنا عموم ان ما شالنا عاد يااللوم وان خلانا خبر الشوم كيتا للعريبى البوم رد عليها: انا العريبى البوم يا الزرقة المتل كلتوم انشاء الله التيبى عليكى تحوم ما يلقو علاجها فى الخرطوم:
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: خالد عبد الله محمود)
|
الاستاذ عمار سلام
اعتقد أن هناك بعض التشابه او أن الرواية مختلفة اعتقد أن الاغنية قيلت في قوز الخرطوم وكانت المناسبة زواج السيد عثمان عسى رحمه الله وهوكان رئيس القضاء الاسبق وحرم والسيدة من نساء قوز الخرطوم والعائلة هناك معروفة الرواية معروفة في منطقة القوز الخرطوم ولكن انا تخونني الذاكرة الان
الاغنية في تركبتها لاتشبه شعر الشاقية وهي قريبة لاغاني امدرمان في ذلك الوقت وعلاقة القوز بامدرمانعميقة وكبيرة وفيها نسب ودم واهل القوز هم اصلاً مكوك
اتمنى أن يتداخل احد من منطقة القوز ليصصحح المعلومة وتحياتي
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: انور التكينة)
|
عمار
في خريف 98 وبينما انا وانت وعلي عبد الرحمن وعبد الرحمن حيدر ومروان العبادي ومحمد حسن الفيل جلوس في "السيغما"
انتا قتا الكلام ده.. وانو حرم التي قصدها الشارع في اغنية الكابلي هي والدتي..
ومن 98 وحتى اليوم سمعت الكثيرين الذين قالو بان السيدة هي فلانة وحرم هي فلانة بنت فلان
وهانت تاتي دون ان توضح من هي السيدة ومن هي حرم
فهلا ابنت..
وخلي بالك يا خينا الشهود لايزالو على قيد الحياة
محمد حسن الفيل في لندن علي في الخرطوم عبد الرحمن في الحلفايا مروان في كل مكان
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: amar adam)
|
الأخوة المتداخلون
لكم التحية جميعا. وأشكر الأخ عمار على فتح هذا البوست. شايف هناك تضارب في وجهات النظر بخصوص (القوز) و(السيدة وحرم) وهل القوز هو (قوز الشايقية) أم (قوز الخرطوم).. وهذا دليل على غياب التوثيق في كل أوجه حياتنا نحن السودانيين.بالنسبة لي ، وقد كنت لصيقا بحفظ ورواية تراث المنطقة منذ نعوم أظفاري، أؤكد بأن القوزالمقصود هو (قوز قرافي) أحد أحياء القرير. أما الشاعر فهو بلة مبلول من قبيلة الحسانية الذين يعيشون في ديار الشايقية. والشاعر ما زال على قيد الحياة ومنزله بحي القلعة بالقرير. وقد حاولت في عام 2000م أن أسجل بعض أشعاره بصوته ولكنه أمتنع متحججا بأنه نسي أغلبهاوأن ذاكرته قد ضعفت لكبر سنه. وعند سفري طلبت من الشاعر عبد الوهاب كاره أن يحاول معه وبالفعل تم تسجيل شريط(احتفظ به) فيه بعض الذكريات بصوت الشاعر بلة وذكر فيه الكيفية التي وصلت به بعض مقاطع أشعاره للفنان الكابلي وضمنها في أوبريت (مروي). وكما هو معلوم، فقد عمل الكابلي كاتبا بمروي في خمسينات القرن الماضي. أما بالنسبة لأشعاره فقد امتنع أن ينشدها ولعله تحرج من ذلك. وسأحاول إفراغ شريط المقابلة مع الشاعر بلة صاحب (ناس القوز) وانزال مادته. وأرجو أن يقوم التلفزيون أو الاذاعة بمقابلة الشاعر الذي أنصفه شاعرنا السر عثمان الطيب حيث كتبه عنه قبل سنوات موضوعا في جريدة الخرطوم بعنوان (بلة ود مبلول العبقري المجهول)
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: maman)
|
شكرا الاخ مامان اسوا شى نقل التراث مشوها وهذا ما قعله كابلى الرواية الصحيحة(حليل عاشة وحليلها حرم) وروى الاستاذ احمد عبد القيوم ات الصاح(شال السيدة وما خلا حرم) وكابلى يقول سفر الثلاثاء والصحيح سفر التلاتة وهن حواء بت عبد المجيد والتى غنوا فيها (حواء بت عبد المجيد..ياسبيطة الموز النجيض ..والله ود ادم سعيد) وود ادم هو عمى عبدالله ادم وهو ود ادم خليفة (قوز قرافى) ةالتانية هى امى حرم صاحبة الصورة والتالتة عاشه بت خلود والردت على بله هى حواء بت بت طيبه وكلهن امد الله فى اعمارهن(كتلن رجالن وقعدن)!!طبعا الحلبى بيقول (خلا حرم) مرة امى زهجانه من ابوى سمعت الكابلى يغنى (خلا حرم) قالت (يا ريتو لو خلاها)!!حبوبتى بت بابابكر غنى فيها جدى ابراهيم ودطيبة(بت بابكر قصبة رعودها..والرقيبة حزوز حزوز وكتين تقودها..مدى راسك ليا بالقد..وخلى روحى شوييى تترد..لامن البركاوى ينجض )
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: jini)
|
و الله يا عمار زكرتني ود عما لينا قطيم جاي راكب حمارتو من الطاحونة(كانت حوالي 4 كيلو من حلتنا) .لا قتو مراة كبيرة وقالت ليه: "و الله يا ولدي اكان عارفاك ماشي الطاحونة كنت اديتك حبات القمح ديل تدققن(تطحنهن) لي". تتصور كان الرد كيف؟ "و الله ما كنت بشيلن ليك" ربنا يدي الوالدة ووالداتنا الصحة و العفية و انتا جاييك بعد اسبوع احقق في الأمر دا مع حميدو
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: حمزاوي)
|
احيانا عمار ياتى بابداع جميل ..شعر وفن بعد ما ترك الجماعة واسرهم لهذه الشخصية فترة من الزمان فى اطار التنظيم الحديدى .. كما قال مامان واذا قال مامان صدقوه فهو متخصص ومن المنطقة ..وان فنانا الكبير الكابلى جمع تلك الاغنيات التى كانت متداولة محليا فى شمال السودان ولم تظهر بالراديو فى ذلك الوقت عندما كان الوسيلة الاعلامية المبهرة وملك الساحة بلا منازع .. جمع الكابلى هذا التراث فى اغنية سماها اوبريت مروى وليس مروى لان المعنى هنا يفرق .. اغانى التراث التى لم تجد حظها فى الاعلام كثيرة وممكن لاخونا مامان يستغل هذه الفرصة ليعطينا المزيد ويخرجنا من حكاية المغالطة التى انتقلت الينا من اهل السياسة والكورة وكمان بقت تجينا فى الغنا والتاريخ التراثى لفننا الجميل .. لهذا فالتوثيق مهم واخونا الله يرحمه عمر الحسين ما قصر وعمل بجهده كاملا من اجل اخراج ديوان حسونة ولكن الاخ سيف الدين حسن بابكر استطاع استكمال المسيرة والديوان الان جاهز للطبع شوف عينى ما شيتا يتقال .. لو كان الاخ عمار مشى فى درب الابداع دا وترك درب الاخوان المسلمين الضيع فيه زمنه كان افادنا بالكثير ولم يخسر من عمره الضاع عندهم و ما وجده عندهم من ذلة وعذاب .. لكم جميعا تحياتى
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: doma)
|
السلام عليكم ...... ملاحظة ذكية يا دوما ولكن يمكن الرد عليها أظن ان هذه الأغنية غنت في أواخر الخمسينات وخلينا نقول تجاوزاً 1957 عندما بدا الكابلي الغناء أو عندما كان يعمل في مروي إذن منذ تلك السنة وحتى الآن (2009 ) 52 عاماً ولو افترضنا أن عمر البنت القطعوا فيها الغنية كان أكبر من الطفولة وأوائل المراهقة فيمكن أن تضيف لها 15 عاماً وبذا يكون عمر الوالدة حرم أطال الله في عمرها ومتعها بالصحة والعافية في حدود 67 عاماً ويمكن أن تكون الصورة بدون شك ل(شابة) في هذه السن كما يمكن أن تكون الصورة نفسها قديمة وصورت قبل كم سنة لا تعارض في رأيي تأريحياً أن تكون الأغنية قد نظمت في والدتنا الحرم ..... تحياتي
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: amar adam)
|
تيتا دوما:
Quote: لكين حرم الصورتها قدامي دي بتكون من جيلي كيف الغنيه دي تكون مقطوعه ليها ؟؟؟ |
محمد سليمان بتاع برنامج بدون عنوان كان عندو سغلات كده بيطبقا في الجمهور اها مرة سأل عن قصيدة اتكتبت قال من اغعاني الحقيبة وسنة 1937 وقال شاعرا منو ؟؟ الحضور كللو جاوب غلط وما عرفا .. اها في النهاية كده عمك قاعد ورا رفع يدو محمد سليمان قال ليهو ايوة اتفضل على المايك تعال جاوب.. زولنا طلع كبيير لابس جلابية وعمة وماشي على المايك محمد سليمان سألو وقال ليهو اسمك منو : قال ليهو اللمين .. قال ليهو تعال تعال يا اللمين والله انا خايفك تكون كتبتها انت زااااتك:)
اها دحين يا دومة والله انا خايفك تكوني انتي سيدة الشالوهو وخلوا حرم :)
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: doma)
|
Quote: أمين محمود يا صاحبي
كيفك والأسرة
ناس قوز الخرطوم بيقولوا :
زرعنا الموز لقينا سلم
وزرعنا البرتكان هضلم
يا الله القوز علينا ظللم
أماني القوز سوانا مغوس
وشال العيش خلالنا الروس
ومن حسن الطالع يا زوربا أنه عمنا بله ود مبلول شاعر الاغنية حي يرزق واثنين من النسوان القصدن بلة عائشات وحيات يرزقن ...
والمناسبة أنهن من بنات العامراب والقلعة وتزوجهن ثلاثة من ابناء قوز قرافي ، الرجال ربنا يرحمهم ويغفر لهم لكن النسوان حيات ...
إلا أن بعض الروايات في منطقة كريمة تقول أن السيدة وحرم من نساء كريمة وهن يعشن الآن في منطقة بربر والاثنين على قيد الحياة ... لكن أعتقد أن هذه المسألة ممكن يحسمها عمنا بلة ود مبلول وهو على قيد الحياة ، والتوثيق مهم يا مامان والقصة بالذات ممكن نقدر نطلعها منه ربنا يديهو طول العمر ..
الأخ عمار لك التحية والشكر الجزيل على فتح البوست وربنا يدي والدتكم الصحة والعافية وطول العمر وهي بالمناسبة جدتي عمة الوالد عليه رحمة الله .. ولاننا نحن حبوبتنا عائشة بت الفكي الأمين ود تويم .
ولك التحية يا حبيب ...
أبو قصي |
العزيز الغالي كتي لك ولافراد اسرتك ماتشتهي تعرف السودان فيه عجائب كتيرة والناس لقت الاغنية ونحن صغار كدي ورونا دي السيدة ودي حرم الفي الاغنية ويبدو أن الاغنية تغنت في ذلك الزواج ووجدت الرواج ويبدو أن السيدة وحرم ( بتاعات القوز الخرطوم) رقصن في الاغنية تشكر وربنا يحفظ عمكم -عمنا الشاعر والشكر للاستاذ عمار على هذا البوست الجميل وحقيقي هو استراحة من كمية الاموات في الفترة الماضية والله يحفظ الجميع
كما وأن الشكر موصول للاستاذ مامان على التوضيح واتمنى أن نحفظ تراثنا حتى نتيح الفرصة للاجيال القادمة وهنا اتذكر الوالد محجوب كرار الذي سعى بشكل كبير لحفظ هذا التراث و
ولكم جميعاً الود
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: amar adam)
|
Quote: اغنية بابا ( البشيل فوق الدبر ما بميل ) التى يقول فيها : انا بشرح بقول و البشاقرة تصنت |
انا عندي تسجيل لي الكابلي بنفس النص "انا بشرح بقول البشاقرة تتصنت" الكابلي ليس متخصصا في التحريف والتشويه وانما في بعض الجلسات تتم بعض المجاملات لي بعض الجالسين فتدخل اسماء بعض الحضور في محاولات لاثراء جو الجلسة.. واظن دخلت الطنابرة دي دخلت بهذه الطريقة دون قصد تشويه..
مودتي
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: amar adam)
|
عمار
تحية للوالدة حرم ولي احفادها محمد ولينا ولي جميع الشوايقة فهي قبيلة اثرت وجدان السودان باغنيات خالددات.. وكان لهم القدح المعلى في اثراء وجدان ابناء الشمالية باغاني الطنبور..
صححني صديق قديم قائلا: ياخي عمار زمان قال الكلام ده" انو حرم هي والدته" وانا كنتا موجود..فمن اين اتيت بغيره.. قتا ليهو ياخينا عمار نفض ايدو من الكلام ده في جلسة اخرى وانا اذكر..
عمار اقترح صادقا ان تبدا في كتابة مذكراتك.. وكلي ثقة انو لو تحريت في كتابتها الصدق وقليل من الموضوعية فسيجد المنقبون عن تاريخ الحركة الاسلامية في السودان كثير من الاسرار الغميسة..وستنال منها ربحا وافراً..
وتقبل سلامي
| |
|
|
|
|
|
|
Re: هذه صورة والدتى صاحبة اغنية (يا ناس القوز علينا ظلم) (Re: amar adam)
|
Quote: التحية لكل امهات بلادي واخص الخصوص لي بت العجب والتي كتب فيها الشاعر شيخ الدين محمد احمد اغغنيته المشهورة : لي في المسالمة غزال .. مع انها ساكنة العباسية :) |
ياخ دي كانت أغنية كل المواسم نالت الرقم القياسي في كونها ( أغنية الموسم ) وأدرجت في موسوعة جينز للأرقام القياسية استمرت كـ أغنية الموسم حتى تزوج الشاعر شيخ الدين من محبوبته بت العجب ولأن الجمال ينتج بالضرورة جمالاً فكان إبنهما الفنان الشهير عمر الفاروق الذي شدا برائعة والديه زماناً طويلاً ، فكان يبدأ بها وصلات حفلاته ويختمها بها ( قبل أن تبدأ عادة أن تختم الحفلات بأغنية يا حمامة مع السلامة )
ولأن ذلك الزمان كان زمان ( مجاراة ) ، فقد أعجب الشاعر الكبير عبدالرحمن الريح بهذه الدرة الفريدة فنجر أغنية مماثلة لها تقول بعض أبياتها
لى في المسالمة غزال .. نافر بغني عليهو جاهل وقلبو قاسي ... وقلبي طائع ليهو مصباح الظلام الربنا معليهو .... زايد في الجمال نور الجمال جاليهو لو شافو الغزال على نفرتو بواليهو
__________________________
عمار آدم
حفظ الله والدتكم الكريمة وخالتنا بت العجب ووالدتي صفية بت التلب
وكل الأمهات
__________________
الفاروق
مشتاقين
| |
|
|
|
|
|
|
|