|
|
 بعيدا عن زقاقات السياسة...حكاية مرض حامد...
|
{FONT SIZE=4}
حامد ود الزين ود حامد...
حامد لا يحتاج إلي إسم ثلاثي في الفريق التحتاني كتلك الأسماء التي تكتب على البطاقات والجوازآت...
بمجرد أن تتفوه بإسم حامد في الفريق التحتاني تقفز إلى أذهان الناس صورة حامد ود الزين ود حامد.
شعلة من النشاط لا تنطفئ في ربوع الفريق. شاب في مقتبل العمر وعنفوان الشباب, إكتسب من عيشة القرية الخشنة الكثير
من التجارب والخبرات. إضافة للقوة الجسمانية, فالعمل في الحواشة, والسباحة في النيل’ والحركة الدآبة وهو مندلي علي البحر
وسادر علي الفريق, جعلته يكون صلب كما شجر الحراز, بيد أنه يحمل بين جوانحه قلب لين كماء النيل, ونفس صافية صفاءه,
وروح مرحة كما العصافير على أغصان الأشجار...
يثور حامد كجاموس الخلاء إذا إنتهكت حرمات الفريق, فالثورة كامنة في داخله كمون النار في العود...
|
|
 
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
{FONT SIZE=4}
يوميا مع البياح, ونسمات الصباح تداعب مساحات الفريق, يكون حامد قد جهز نفسه للذهاب للحواشة. الطورية, والسلوكة, والمنجل,
وكل مستلزمات الزراعة. يحمل أغراضه على كتفه ويندلى لا تحت.
كل الأ شياء حوله تتجاوب معه, الزراعة الخضراء في الحيضان تحركها نسمات الصباح كانما تلوح له بايد باسمة. العصافير المرحة علي
أغصان الأشجار تعزف له أجمل الأنغام. الأبقار والحيوانات تصدر أصوات لا تخلو من عبارآت الترحاب والسعادة برؤية حامد. الجداول الممراحة,
وأشجار النخيل البازقة, كل الوجود منتشئ بوجود حامد.
حامد ينثر في مساحات الفريق حيوية ونشاط وفرحة بلا حدود...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
{FONT SIZE=4}
حامد دئما وآفد الحضور...
في الجبانة تجده بسرواله الطويل ونصفه الأعلى عار, يعالج ود الأحد بعضلاته المفتولة. بعد إنتهاء الدفن يسبق الناس للخلوة ليقوم بكل
التجهيزات الازمة, ولا يهداء له بال إلى أن يصبح المصاب في طي النسيان...
بنفس السروال الطويل والنصف الأعلى عار تجده وسط دارات الفرح راكز للسوط كما الجبل الأشم لا يرمش له جفن, يزداد فتوة وقوة بسماع
الزغاريد الصادرة من بنيات الفريق. حامد يمرح ويلعب مع أطفال الفريق, ويأخذهم إلي النيل ليعلمهم السباحة. يحادث بنيات الفريق فوق درب الورود.
يجالس الأجداد والحبوبات يستمع إلى حكاويهم وحكمهم, يضاحكهم ويمازحهم ويقضي حوائجهم.
الناس يحبونه وهو يالف الجميع...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
{FONT SIZE=4}
ليس هنالك مساحات مابين حامد وأهل الفريق, حامد أقرب اليهم من حبل الوريد, لذلك يتعامل معهم بأريحية وإنبساط. يتردد صوته الرخيم في أسماعهم
ليلا بعد أن يروي حيضانه وينتكي علي طوريته ويردد:
الدنيا بتهينك والزمان يوريك
وقل المال بفرقك من بنات واديك
والطبع الفسل لاتخلي يوت دخريك
والقمر الساطع يضيف إلى مساحات حامد ضوءه الفضي المنعكس علي أشجار النخيل والجداول الرقراقة...
حامد ضو الفريق التحتاني...
يتعامل مع بنيات الفريق بعفوية تمنحهن إحساس بأنه أكثر من أخ شقيق. لكن هنالك شئ ما بداء يزعج حامد. إحساس وشعور غريب بداء يعتريه عندما يرى
أمونة بت حسن الجمال ( حسن الجمال بضم الحاء )...
أمونة حلوة, غضة , طرية, ممتلئة نشاط وحيوية كما شتلة نبتت على حافة جدول ممراح. إبتسامتها تجعلها تدخل قلوب الناس دون إستئذآن. براتها كما التذكارات
التي خطت بعفوية على رمال برندات بيوت الفريق تجعل الناس يشتاقون إليها كما يشتاقون إلى أحباب قد مضوا بعد أن خطوا عباراتهم على جدران البيوت...
أمونة أيضا لاتجد تفسير للشعور الذي أصبح ينتابها عندما ترى حامد!!!. أصبحت كلما غاب حامد إشتهت أن تراه, وكلما راته تمنت أن يختفى من أمامها بأسرع
وقت. شد وجذب وإضطرآب عنيف في دواخل أمونة أفقدها الكثير من ملامحها الجميلة وروحها الممراحة في صمت. سهوم وشرود ذهن, شئ ما في دواخلها يقلق
مضجعها لاتجد له تفسير.
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
{FONT SIZE=4}
تحت وطاءة هذا التاثير الغريب الذي إنتاب حامد أصبح حامد موجود في الفريق بجسده لكن روحه وعقله كتر كما يقول ناس الفريق. يتعامل مع الناس دون تركيز,
لذلك يأتي تعامله مشاتر كما يقولون أيضا. أصبحت علامات الإستفهام تطارده كما تطارد أمونة من الناحية الأخرى. أصبح نشاط حامد يضمحل ويذوب وسحب الحزن تبتلع
شمسه المشرقة رويدا رويدا إلى أن أسلم جسده للفراش...
إنكفاء ظلام الحزن على ضوء الفريق بغياب حامد...
لا الفريق هو الفريق, ولا الحواشة هي الحواشة, ولا النيل هو النيل. تغيرت كل الملامح بغياب حامد, وأصبح شغل الناس الشاغل مرض حامد. ضربوا أكباد أرجلهم
إلى كل الإتجاهات ورجعوا محملين با لبخرات والمحايات لكن دون جدوى. حاولوا كل أنواع الأعشاب, وندهوا كل الأولياء الصالحين, والحالة تزداد سوء يوما بعد يوم.
أسلموا أمرهم لله, وأصبحوا في إنتظار أن يسلم حامد الروح له.
ترقب, حزن, خوف ,الم. إنتشرت كل هذه الهواجس في سماء الفريق التحتاني, وأصبح المصير طي المجهول...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
{FONT SIZE=4}
أصبح حامد فاقد الوعي. يفيق أحيانا, يتمتم بعبارات غير مفهومة ينتكس بعدها إلي عالم اللاوعي واللاشعور.
تكاد تكون الحركة قد إنشلت في الفريق بسبب مرض حامد. إنتبه إلي ذلك الإعيسر وقال:
الإعيسر: يا جماعة خلآس, كلو زول يمشي يشوف شغلو, مرض حامد ده ما بيتحارس...
رد ود جاد الكريم: يا زول ده كلام شنو البتقول فيهو ده؟. أكان فتنا خليناهو في رقدتوا دي البيخدمو منو؟. كلامك ده بشوفوا أعوج...
الإعيسر: أها عاد نسوي شنو؟ نعرسلوا يعني؟. الناس يخلوهو في رقدتوا دي ويمشوا لي مصالحهم , ومرة مرة يجو يفقدوهو. والله كلامي شنو ليكم؟.
ود جاد السيد: والله يا جماعة فكرة العرس دي أنا بشوفها في محلها...
الشاموقي: والله يا ود جاد السيد كلامك ده ياهو الخرف زاتو. الزول راقد ستا تقول يعرسولوا؟. الإعيسر رمى الكلمة ساكت إنت تسويها جد!...
ود جاد السيد: باقيلك المراة دايرة تبقالوا دوا؟, مياهه تقعد تمارضو لآمن نشوف أخرة مرضو شنو؟...
تدخل حاج عوض الكريم, وهو مسموع الكلمة في الفريق قائلا...
حاج عوض الكريم: يا جماعة فكرة العرس دى في محلها. الجنى نسويلوا صفاح, وبعدين الله كريم...
ود جاد الكريم: لكن يا جماعة بحالتو دي البتاخدو مني في الفريق؟...
ود جاد السيد: أمونة بت حسن الجمال. باقي رقدتوا دي موجعاها بالحيل...
الشاموقي: والله يا ود جاد السيد الليلة بترميلك في جنس كلام!, البنية دي صغيرة يا زول هوي...
ود جاد السيد: النشاورها يبقى ترضى...
حاج عوض الكريم: رسلولا مرة تشوف رايها...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
{FONT SIZE=4}
أتى المرسال بموافقة أمونة بت حسن الجمال, وتم الزواج وسط جو كل الوجود فيه كان في حالة إرتباك وزهول.
آثرت أمونة أن تكون بجانب حامد تقدم له كل ما تملك.
الليل هادئ, والقمر ساطع. يآتي من الحين إلي الحين صوت بقرة تخور, أصوات ضفادع وحشرات. الإعيسر, و ودجاد السيد, والشاموقي,
مستلقين على الرمال الفضية.
الإعيسر: يا جماعة باكر من الصباح نقوم نشوف الخبر شنو؟. قبل ما نمشي الحواشات نفقد حامد وبت حسن الجمال.
الشاموقي: صباحات الله بخيرهن, كدي النقوم نمشي على أهلنا.
الشمس آتية من وراء الأفق البعيد, والصباح قد بداء يتنفس, وبدات الحركة فاترة تدب ببطء في جسد الفريق التحتاني...
الشاموقي: دق الباب يا الإعيسر... ( الإعيسر يطرق الباب )...
صوت من الداخل: أحم , أحم, أحم...
ود جاد السيد: يا جماعة هوي, أمشاكن على حواشاتنا. الزول ده كان حصلتلوا حاجة بت حسن الجمال دي كانت نضمت.
صباح اليوم التالي أعادوا الكرة مرة أخرى.
نفس الصوت: أحم, أحم, أحم...
الإعيسر: هوي, يا ناس هوي, باكر الصباح إيآني الفاتح الباب وداخل, الناس ديل ما معروف يبقى حصلت لهن مصيبة...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
{FONT SIZE=4}
الشمس بداءت تتفلت من أحضان الأفق البعيد...
ود جاد السيد, والإعيسر, والشاموقي, متجهين نحو بيت حامد. الشمس من خلفهم وظلا لهم ممتدة طويلة أمامهم على الأرض, وجزء منها بداء يظهر
على باب حامد. فجاءة فتح الباب ليلقي بالظلال إلي الداخل, وأطل حامد لترتفع الظلال وتنعكس على جسمه المنحول واضعا معدات الزراعة علي
كتفه وإبتسامته المشرقة على ثغره تضئ المكان.
ود جاد السيد, والشاموقي, والإعيسر فردوا أيديهم وهرولوا متسابقين نحو حامد, وأشرقت شمس ذلك اليوم كأنما هي تشرق لأول مرة في
سماء الفريق التحتاني...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: SHIBKA)
|
أختي أميرة...
الهيام داء يصيب الإبل ويجعلهافي حالة عطش شديد
وحريق جوف مستديم, لذلك أطلق على الذي يكابد نيران
الغرام فهي جحيم لا يطاق وقد تصل بالمحب إلي الدرجة
التي وصل اليها حامد.
وكما قلت حامد متمثل أمامنا في شخصيات كثيرة
تعيش بيننا...
الشكر الجزيل لك علي مرورك...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: ALGARADABI)
|
ماهي دي الحبيبة الداخلة من بين مسامات العرق رقراق...
وسايقاني في كل الدروب ساساق...
رامياني حد القريفة...
وقالياني زي قهوة بجة...
معاوية لك الود..
كلنا إصطلينا بذاك العشق..
وفرقنا الزمن من بنات وادينا...
ومازال في القلب شئ من حتي..
مبرووووك للعريس
وحمدا لله علي سلمة أختك..
وربنا يجيبك لينا سالم غانم فلك وحشة..
السيف..
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: نوفل عبد الرحيم حسن)
|
العزيز \ ود المدير,,,, مشتاقين كتيييييييييييير
الديار من غيرك اصبحت خلا,,,, والله مرض حامد مرض عضال
لكن دواه شافي وحاضر,,, كعب المرض الماعندو دوا,,
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
يا نوفل اها مرض حامد معاك كيف,,, ما بدور العلاج؟
عندي سعال يا ود المدير صحي مرض حامد ده زي الحصبه
بجي مرة واحده؟ ما بتاور الزول تاني متل الم الضرس؟
معزتي يا غالي
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: حامد محمد حامد)
|
Quote: انتا صاحب بشيرحسن يوسف؟
ياخ حوش صاحبك عني |
القرضابي حبابك الف. نورت المساحة...
يأخي إنت قاعد في دبي والزول السجمان ده
ما يكلمني؟! علما بأني كنت متواجد في دبي
لمدة ثلاثة أيام.
بشير أكثر من أخ وصديق, وليهناء لك جواره
بس كلموا تاني ما يكرر الحركة البايخة دي...
شكرا لك أخي القرضابي,والمرة الجاية
ما بفوتك تب...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
Quote: عندي سعال يا ود المدير صحي مرض حامد ده زي الحصبه
بجي مرة واحده؟ ما بتاور الزول تاني متل الم الضرس؟ |
والله يا نديدي ما عندي فكرة, لكن العارفو إنو الحصبة
كان جاتك مرة تانية بتلحقك أمات طه, وكذلك مرض حامد
أعمل حسابك وأعلم إنو شوقنا قدر بحر المحيط...
تحياتي للوليدات وأمهم...
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: معاوية المدير)
|
Quote: يا نوفل اها مرض حامد معاك كيف,,, ما بدور العلاج؟
|
خدك البلور زي بنات الحور انا ما عيان
عيااااان جيبوا لي بخور
في الطيف او في صحيان زورني
يا حبيبي انا عيان
وهكذا نجد كثير من النسخ لمرض حامد في الغناء السابق .. وحتما اللاحق
لكن يا ابو السيوف انا مرضي دا غلب الحكما والفقرا
زي ماقالوا .. حير الطبيب طبي
يعني ممكون وصابر و فايت حامد يوم وضحوه ... الا برضو فايتو بالصبر
ياخ خليتنا فتيناهو عديل كده :D
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: سيف الدولة كامل)
|
Quote: خدك البلور زي بنات الحور انا ما عيان
عيااااان جيبوا لي بخور
في الطيف او في صحيان زورني
يا حبيبي انا عيان
|
مرضان باكي فاقد...
يا حبيبي أنا عيان...
أنا المرضان وماطيبة...
جابولي حكيم خير وشر قال لي يازول مرضك كتر
سببك أم شلاخا خدر...
يا نوفل قايل إنت وحامد براكم
شوف الناس دي مقلقلة كيف؟!!
| |
|
|
|
|
|
|
|
|
|
Re: بعيدا عن زقاقات السياسة...حكاية مرض حامد... (Re: عبدالعزيز الفاضلابى)
|
Quote: ياخى نحن اصلها الغربة مطلعا زيتنا ,, انت بيكلامك ده طلعت ايثانولنا عديل .
|
العزيز عبدالعزيز...
سلام...
أنا الآن بالسودان, وصادف قبل أيام كنت في مشرع الفاضلاب بالمساء
قابلت أهلنا ناس الفاضلاب هناك وسألتهم عنك, وقالوا لي أسال عنو
رملات الجروف...
سالت عنك كل رملات الجروف
قالن لي الزول الولوف
سافر زمان بس طيفو في
الفاضلاب يطوف
بفوقها يتقطر حنان
ولدا عطوف
في الغربة ساكن
في مسامات الحروف
ينضم غنيواتا حنان
يا ريت يعود لديارنا
يرجع زي زمان...
أرجع يا عبدالعزيز, إنجمة شوية...
| |
|
|
|
|
|
|
| |
معاوية المدير
SHIBKA
ALGARADABI
سيف اليزل برعي البدوي
نوفل عبد الرحيم حسن
سيف الدولة كامل
حامد محمد حامد
علي الكرار هاشم
عبدالعزيز الفاضلابى
فيس بوك
تويتر
انستقرام
يوتيوب
بنتيريست