كتب الكاتب الفاتح جبرا المتوفرة بمعرض الدوحة
|
|
 حين غسل : مشتاقين ياست مكدار
|
فجاءة...
جات يدك واقعة نسيت كل كلام الواعظة وفي عيوني صورة واحدة دي زاتها ياها يده البتمسكني بالليل لمن نجي ننوم وامد ليكي يدي عشان اوريك انو سريري قريب من سريرك وتمدي يدك وتقولي القلب البريدك بتعرفه وبتريده و حسيت بانو لازم امد يدي ومديتها ومسكت يدك لقيتها ما زي كل مرة لقيتها باردة صابعينك ما حاوطو اصابعيني وصوت الواعظة تقول دخليها جوة الغطاء دخلتها كان نفسي اهبشك اكتر واكتر صوت الواعظة ارح نرفعها هنا اجري جري وامسك وتقول اقلبوها اجري واقلبك تلتلناكي اعفي لينا ماجدة تقول لي فضي الجردل اشيل موية غسيلك واكبها في حوض الحمام لمن اتصرفت الموية في الحوض حسيت باني فقدتك قلبي اتقبض رجعت سريع الاوضة لقيتك لسة راقدة بدون حركة ووشك مغطينه بكيت والواعظة تكورك لا لا ما ببكو هنا !!! كده بتبعدو منها الملايكة والله الليلة بالذات انا عاوزة ليكي الملايكة والرسل والاولياء الصالحين عاوزاهم معاك عشان ما تمشي هناك براكي سكت وقشيت وشي والموية تكب في جسمك وامي ترفعك وتكب الموية من فوقك اعاين ليها منهمكة زي عوايدها لمن تكون بتعمل في حاجة من حاجاتك اعاين لي لمياء اقول اشوفها بتبكي عشان ابكي زيها القي لمياء عاملة خاطر للملايكة و خاتة يدها في قلبها وبتعاين ليكي بي وش باكي بدون دموع يوجعني منظر لمياء بتودعك ولطالما كانت لمن تجي مفارقاك المساء بتحسسني انها خايفة انو تجي بكرة ما تلقاكي اشيل الجردل الأتملا تاني وامشي الحمام ادفقك مويتك امي غسلتك بالموية دي كلها ؟؟ لا حولا وانتي ما بتحبي يكبو الموية كتيرة في جسمك ودايما بتقولي يكبوها براحة ولازم تكون دافية يا ربي الموية الباردة وكتيرة الليلة استحملتيها كيف .. وفجاء الغطاء وقع وظهر وشك واضح زي امبارح لمن لاقيتك لمياء كوركت لا الواعظة بتقول لا ما تبكو اقرو الفاتحة اقرو ليها قران وترفع يدها وتقرا الفاتحة وترفع امي يدها وعيونها دموع ولمياء ترفع يدها وصفاء وهدي بيقرو بخشوع الله يا ربي القي ماجدة ما قادرة ترفع يدها الله يا ماجدة دي انت الصبورة ما قادرة و اتشجعت ولقيت رانيا بتقرا رفعت يدي ما لقيت الفاتحة في راسي ياربي الفاتحة وين ؟؟ وقلت انا بحبك يا ماما مكدار بحبك شديد وخايفة شديد والواعظة تقول لا لا ما تبكو الملايكة بتمشي وهدي تقول الفاتحة الفاتحة وانا بقول بريدك يا ست مكدار قومي نمشي اوضتنا .
مشتاقين يا حجة ياحليلك وحليلنا بعدك
|
|
 
|
|
|
|
|
| |
ريهان الريح الشاذلي
إسماعيل حميم
خدر
فيس بوك
تويتر
انستقرام
يوتيوب
بنتيريست