|
|
 سوق المبادرات ... أين (مبادرة سودانيز اونلاين) منها ...؟؟
|
الناظر إلى الحالة السودانية يلحظ كثرة المبادرات كان داخلية كان خارجية ...!!!
و كمان انا شايف انو المبادرات الخارجية اكتر من الداخلية و ما عارفين زاتو فضل منو في العالم دا ما اتبنى مبادرة ...!!! اللهم إلا دول مثل (النيبال) و (تلايلاند) و ديل زاتم اظن عندهم (قوات) تبع القوات الدولية هنا..!
يعني ما في زول ما خت (كراعو) في البلد دي مافي ....!!!
داخليا تقوم المبادرات على أساس (المصلحة) من (المحصلة) المرجوة ...!! يعني ما انطلقت مبادرة مبنية على اساس (الوطن فوق الجميع) ...!!
يعني في ناس شعار مبادراتم (شركونا) و واحدين مباداتم شعارها (خارجونا) .. و مبادرات شعارها (نحن هنا)...!!
و طبعا خارجيا ما في واحد يقدر يقول بموت في (عيون السودان) .. و كفى ....!!
نرجع للمبادرات الداخلية .. بإختصار كدا هي كلها مبادرات ( ما جايبة حقها) لأنها ترتكز على (من طرحها) و ليس على (المطروحة من أجله) ...!!! و المقصود به هو الوطن ...!!
طيب داير اقول شنو ..؟؟
داير اقول كدي نحسبها ..!! الأعضاء هنا في (منبر سودانيز اونلاين) يمثلون مخلتف (مناطق و أعراق السودان) و في مختلف (الفئات العمرية) و بالطبع يغلب العنصر (الشبابي) فإذا سألنا أي عضو أو أي مجموعة أعضاء يمثلون (حزب) أو (منطقة) أو (عرق) .... ..إلخ ما هي رؤيتك لــ (بناء وطن) يمثل الملاذ و الحضن و (الجنة) للأجيال القادمة ...؟؟
ستتعدد الرؤى و لتبدأ (مثلاً) فئة تقول دايرين شريعة و فئة تقول لا علمانية ..... واحدين يقولو في شأن الرياضة مثلا فليعود جهاز الأشبال واحدين يقولو لأ نحن مع رأي شداد جهاز الأشبال دا كلو تزوير في تزوير .....إلخ ..
أها يا جماعة الأعضاء هنا ناس واعين و فاهمين أكيد لما يختوا (صورة البلد) قدامم أكيد التنازلات حتحصل .. لأنو اللحيابا معناها دا زول (تابع) (تفكيرا) للناس اللي هم جزء من (اصل الأزمة) ...
طيب قولوا اتشكلت لجان في مختلف انحاء العالم بعد ان شكلت أي (فئة) رؤيتها و تم نقاش هذه الرؤى و بلورتها عبر مناقشات في إجتماعات اكان مشكوفة ولا في (المسنجر) و لا في الفيس بوك ... إلخ
المهم قولوا (حلمنا ) إنو اتفقنا .. تقوم لجنة داخلية بعرض هذه الرؤية (لحل المشكل السودانية) و (بناء وطن) يضمن مستقبل زاهي للأجيال القادمة , ليس للأحزاب أو الهيئات , بل للطلاب ...!! نعم الكيانات الطلابية في الجامعات هي أقرب للإتفاق من الأحزاب الموجودة في الساحة ..!!
طيب خلونا نحلم و نقول انو الطلاب اتفقوا يبقى أكيد الطلاب ديل حينقلوا الكلام للأهالي في الريف و الحضر و بكدا نضمن (الشعب) إلى جانب المبادرة .. و ما حيلقى (قادة) الأحزاب و الحكومة سوى القبول أو مواجهة الشعب الذي سيعرف حينها من الذي يقف ضد (البلد) ..!!!!!!
أعلاه في واحدين ممكن يعتبروها مجرد (أحلام) .. و واحدين ممكن يفكروا فيها جادين و يبلورها حسب فهمهم و يشوفوا ممكن البيقيف في طريق تحقيقها شنو و يقعدوا يزيحوهو ... !!!
ما عارف لكن أنا من وجهة نظري إنو أعضاء المنبر دا هم اكثر ناس متكوين بنار (الأزمة) السودانية سواء من اغترب بسبب (السياسة) أو بسبب (إقتصادي) .. أو واحدين السياسة التعليمية هنا ما بتحقق ليهو (امنيته) و واحدين بسبب (عادات المجتمع) هربوا ..... إلخ .. عشان كدا هم مفترض يكونوا اكتر ناس قلبهم على البلد و مفترض وقتهم يكون فيهو جزء للتفكير في (كيف نتلم مع الأهل هناك) .. ميتن نحس بالأمان في ديارنا و نشارك أهلنا و احبابنا افراحم و اتراحم ... متين .. متين نحس على الأقل بإنو عندنا (بلد) نفاخر بيهو قدام الغير ...!!
ربنا يصلح الحال
تقبلوا تحياتي
|
|
 
|
|
|
|
فيس بوك
تويتر
انستقرام
يوتيوب
بنتيريست