إسماعيل عباس ده من ياتو كوكب يا جماعة ..ويا عمران عفيت ليك السرامس والكبابي..

Quote: خلفية تاريخية : عمران حسن صالح زميل البورد وفي احدى يالي امشير قام بتحنيكي سيرمس شاي وكبابي اعتز بها كثيراً كونها اول عدة لي في بيت الزوجية ..اتجرجر معاي وكمية من الزوغانات اضرب ليهو يا عمران انت وين عشان اجي اشيل الحاجات يقول لي انا بعيد مرني بكرة .. امرو بكرة يقول لي معليش يا ابو عمير تعال ليها المسا بخليها ليك عن بتاع البقالة .. اجي لي بتاع البقالة الاقي ليك عمران مخلي لي ورقة مكتوب فيها : العزيز عمر معليش طلعت مشوار والاسرة ما ناسي موضوع السيرمس بس كنا مستعجلين .. الصدفة وحدها جمعتنا في حديقة واذا بعمران قااااشر بي كباياتي وسيرمسي الما بيغباني وقال تصدق يا عمر كنت حاااااسي انو حا الاقيك وهاهاهاهاهاهاها قعد يضحك ولمن جو يقوموا يرجعو عااااااادي ضاير ليكم سيرمسي والكبابي في ضهرية عربيتو وفووووو كسح .. حينها ادركت تماما إنو السيرمس والكبابي غادرت دون رجعة مما كلفني شراء طقم عشاء كامل لارضاء الحكومة بعد ما اقنعتني انو دي كانت سيرمس حبنا وكباية حبنا ولا تعوض وان وزونها ذهبا مع العلم إنو خاتم واااحد بس كان كفيل بي انها تنسى الموضوع .. ومن يومها وانا اضمر لهذا العمران شئ من حتى وما توقعت ان تزول هذه الحتى .. فلاش باك : البوست ده عبارة عن تكسير تلج واااااضح وماا داسيهو ولا ناكرو ..يا جماعة والله عندنا هنا في الرياض زول اسمو اسماعيل عباس اصصصلو ما ممكن يكون بني ادم زيينا كده !!! انا كنت قايل روحي براااي الطيبان واخو اخوان لكن طلع في زول بينافسني:) الناس البعيدين ممكن يراجعوا مداخلات هذه الاسماعيل الذي تبدو بسمة في شفتيه ..وسيجدون كل الاحترام من هذا الاسماعيل .. الناس الفي الرياض هنا باقي لي لو ما ايدوني في كلامي ده احتمال يطلعوني لم افي هذا الرجل حقه .. مشاركة فعالة في كل الفعاليات حضور انيق ضحكة من القلب يلقاك هاشا باشا .. مع الكبار كبير ومع الشباب تحلف تقول تحت العشرين وممكن عادي يستضيفوهو في برنامج النيل الازرق بتاع تحت العشرين ديلك.. حكيم يدعو الي لم الشمل .. وحقاني بيقول للاعور اعور في عينو .. والاهم من ده كللللللللللو زول خدوم وده السبب الاساااااااسي للتلج بتاعي :) طيب واييييييه دخل عمران ؟ الحسنة الوحيييدة إنو قررت في يوم اعمل كمين ومداهمة لي عمران عشان اشيل السيرمس والكبابي بتاعتي فخططت للهجوم دون سابق انذار لي عمران في البيت وفي وقت غداء لاني واثق تماما انو عمران يقدم الشاي للضيوف مستخدم سيرمسي العزيز .. وقد كان وفي جمعة جامعة دقيت لكم الباب كو كو كو كو كو فتح لي ولدو المسيخ محمد (محمد صرح لي امو إنو بيت ناس عمر الفاروق ولااااا حلو تقول ليهو لالالا يا حمودي قصدك حلو ؟ يقول ليها لالالالالا ولاااااااااااااااااااا حلو ).. دخلت وما خاب ظني والسيرمس تتوسط الناس ويمها اذكر تمبس ومعتصم وعبدالله داش من الحضور .. اها في اليوم داك لاقيت ليكم الزول الجميل اسماعيل عباس ده .. وعقدت مقارنة سريعة بين كونو عمران يحنكني سيمرس وكبابي وبين انو يعرفني بي زول زي اسماعيل ده .. في البداية ما اكضب عليكم كفة السيرمس رجحت ..لكن شوية شوية بدت الكفة تتوازن إلى ان اتخذت اخيراً قرار إعفاء السيرمس والكبابي لي عمران مقابل معرفة اسماعيل .. تخريمة : يا عمران ياخ تعال شيل ليك حلة وكمشة وعرفني بي زول تاني ..

تاني شي فقد أعلنت عليكـ الحرب وتؤازرني أم محمد ( لأنو راس السوط لحقه ) ..
تالت شي تمبس وداش واسماعيل عباس ومعتصم أقيفوا بعيد الدم ما يرشكم ..
رابع شي شوف ليكـ محامي شاطر يا سجم ...

Quote: عمران ووووووووب عليكـ

Quote: اما الاخ عمران فهو لا يختلف كثيرا عن اسماعيل

Quote: أرجو ان تعم فائدتها القراء قبل الأعضاء وعاش ود ام بعلو وبت أبو بعلو برضو

Quote: توثق شنو يا عمكـ رجع للزول دا كبابيهو ياخ!

شكلي بعد ده بنضم للمعارضة ( ود البشرى وصحبه )

Quote: عمران انا جاي الرياض بعد اسبوعين وبجيب ليك معاي موية زمزم لكن ما عندك لى كبابي؟

Quote: خلى شروق ابوالناس لافة صينية عديل تجي انت تلف ليك ترمسة

Quote: ( معليش مافي وجوه ضاحكة )

واحد هدية لي محمد عمر الفكي ...
بالمناسبة يا هاشم بتفق مع الفاروغ في طريقة سمعو للأغنيات