كتب الكاتب الفاتح جبرا المتوفرة بمعرض الدوحة
|
|
 ممنوع الاقتراب ....
|
الرسالة دى الى بكرى فى الاول, باعتباره سيد الحوش,,, ماتقترب لانو فى عفاريت...عيال ماما هايجين بدستورهم....
العفريت الاول هيبة- يوم السماية كان اسمه عبدالوهاب على الحاج
بين سنوات وسنوات سموه هيبة ومرة وهبة وغايتو.... عفريت ود لذينا
ماطعم ضحتك الآن؟
ماطول نهرك يا اطول انهار الدنيا الصادحة طيبة وانسانية ؟
حاولت امس الغناء, تذكرت تلك الاغنية التى كم فعقت {مرارتك} بها..
{تعال نتحدى حتى الخوف, تقول واقول اهواك}, وحين يكون مزاجك كما فى العادة معتدلا كطقس روحك الحلوة, تلكزنى لافعل,,
...
..
.
كان الزمان انقلاب..
انقلاب برضو عاطفى,
كنت عاشقة وانت اول من اكتشف ضجيج سمرته فى دمى
{ أحبك الآن وغدا افكر فى الطريقة} - يالشوقى ليك ياحنان
تغيظنى مشاكسا حين اصابتنى حالة الاكتئاب
حين جئت كوستى, مع ذلك الحشد المهيب,
{ يابت اللذينا ماتقولى دى الريدة اموت ركن انا ياخ.. }
كنت ياهيبة زمانها وطيلة فترة المرض لم اضحك..
وانت كما انت تعرف ان تكلكل الحزن وتخلى الفرح اللى مات يفرفر- يا ابن اللذينا آمنوا بالحياة.
حكانى {حبيبى} يومها عن عبدالملك,
عن ذلك البيت- بيت العنكبوت – فى بحرى
وحكانى عنك, عن الشعر, الكتابة, والبنات الجميلات,
حكانى عن ددرويش,
سمعنى اشعار حميد
واشجانى بسيرة زوربا, ماركيز, وواسينى الاعرج..
وكنتم عناكب القراءاة والاطلاع,
على شارع النيل, قصاد حدائق ابريل التقينا,
مجموعة من الاصحاب والصحبات
كنت يومها خريجة مشردة تنام على قدميها وشنطتها البائسة, كانت الدنيا ايضا بائسة بالانقلاب وسيرة الدبابة.
ضحكتك ياهيبة هى اول من رجّ كبابى روحى.
منذ تلك اللحظة صرنا اصحاب,
ترافقنا كثيرا,
تسكعنا فى حديقة الحيوانات, ولم انسى كم حاولت زمانيئذ ان تغرس فى روحى الفرح,
سرنا يوما- كدارى- بعد ان منّا الله علينا بعربيتك الفكسواجن- التى خسرت وتعبنا من دفرها.
خليناها متكولة جنب حديقة الحيوانات ودقينا الكدر, منو كان فيكم بيقدر على كدرى؟! الاجابة خليها فى سرك.
فى ميدان ابوجنزير قلت لك بدون مقدمات ودون ان التفت قلت لك {صاحبنا جاى} وقد صدق حدسى,
{يابت يانتى فكى ولا بتريدى صاحبنا ده}
عاد اكضب عليك, صحى بريدو, قلت لك ثم ضحكنا وانت تعانقه,
عشرون عاما تكاد تفصلنا عن ذلك الزمان,,
هى ذاتها سنوات من فرح, كفاح, شدو, بكاء, وفقد فادح ياصديق......
حزرتك ان تقول له اعترافى- ثم جريت كلمتك المحببة- الله كيييييييييييييييييييييييييف!!
حنين يا هيبة, عرفتك, حنين وفاتح قلبك للناس,
----------
بيتكم البسيط فى بحرى كان وسيعا بطيبة ناسه
ملاح القرع والحلة البنقعد نتشاكل فيها- تفاصيل اخوان واخوات- كانت الارض الرحم اللى جابهم للدنيا..
مجانين بالحياة كنا,,
جنون مابعده جنون,,
اتذكر تلك الدجاجة التى اجتهدنا يومها ان نوفر سعرها؟ شىء من حمدى السر, شىء منك وشىء من شقل
عرفنا يومها انو ايوب معتقل فى بيوت الاشباح, كيف فات علينا انو الدجاجة دى مابتصل الاّ الى اللى حولوا حياتنا الى اشباح؟!!
لمن حولوا ايوب لكوبر, سالته ان كان استلم الدجاجة؟ طبعا لا؟!!
حرقتنا القصة- انشاءالله ماتنفعهم بركة جاه النبى.
مجانين؟!! كنا, وياله من جنون.
مقطعين ومساكين وبنحب الحفلات,
وكم عرس {كجيناهو}!!
البنية – صاحبة نجوى- فى حى السكة حديد بالخرطوم,
بالله الحفلة ما انتهت وكانت الخطوبة اتفرتقت
البنية ديك, قلنا ليها نحنا جايين حفلة عرسها- قالت لينا لا عليكم الله, عافية ليكم
ياخ شدة ماكنا كج- خطوبتك الاولى- الله يطراها بالخير اتفرتقت,, هو صحى اللى فرتقها شنو ياهيبة؟
ياخ كان تكلمها تقول ليها البنات ديل- ناس حنان, اشراقة، جوى اخواتى لله والرسول ساى..
جنونا كان يا صاحبنا فى جنون الحياة..
لو ما مجانين نسافر للجزيرة, هناك وراء الترعة اللى شهدت دروب غرامى, بالفلكسواجن؟
انا كنت بسببى, انت كنتوا بتلوكوا فى جاه منو؟
كانت ايام ياهيبة..
تفاصيل عمر,,
توابل حياة
وطاعمة زى قهوة امى...اللى كانت بتحبك زى ولدها,, زينا واحد
لكن قول لىّ كيف حافظت على ضحكتك زى ماهى ياهيبة؟
قرابة العشرين عاما,,
تغيرت اشياء واشياء
وانكسرت فناجين الروح وصينى القلب اللى كان بيلمع داك, تتذكرو؟
يومها وانا اقرأ ايميلك- يامستهبل- كيف فاتت علىّ
ان اكون وسلمى الشيخ سلامة فى رسالة واحدة- يا ابن الحياة؟
حين اتصلت بيك, ما توقعت ان تدشر ضحكتك, ضحكتك ياها ذاتها..
هى ذاتها ياهيبة..
يالضحكتك الضاجة بالحياة..
يالانسانك الطيب.... ياطيب...
|
|
 
|
|
|
|
|
|
|
 Re: ممنوع الاقتراب .... (Re: Ishraga Mustafa)
|
العفريت التانى, ختييييييييييييير جدا, ده كان لبع زول خلاص الله قال بقولو....
اسمو تمبس, ايوه تمبس.....
اقروا عنو هنا... ودستوركم ياعيال ماما...
تمبس ود الحلة اللى بيقعد فى اللستك مكفكف جلابيتو السمنية وخاتى السفة بمزاج ويقوم سدارى لاولاد الحلة البعيدة اللى بيجوا يشاغلوا بنات حلتو
تمبس نجار, ينشر احزان الناس ويرميها فى تلج النفس المطمئنة
وطلبة بناء, يناول طوبة وراء طوبة ويبنى بيت للسكينة
تفقدو بالليل وتلقاهو مافى,
تعرف بعدين انو كان بيحفر فى الجابرة لمثوى الحبوبة الاخير
تمبس, سواق الحافلة, يشغل ليك الغنا السمح
تلقى الحافلة كلها صبحية عرس
تمبس – كمسارى بص ابورجيلة-
يضارى فى البنات من الواقف سدارى هناك يشاغل فى الصبية الناهد فيها شوق الحياة
تمبس مافارقة معاهو, يودو البص كلو للنقطة, المهم مافى زول يغلط على بنية
تمبس الخدرجى, يفرش خضار روحه ويديها للمساكين
ويرجع البيت غابة انسانية,
تمبس سيد الدكان, حلاوة حربة شوق طفولته يديها للصغار,
والطحنية للبنيات,
والبن للجارات,
مافرقت معاهو, كان جردوا الدكان وخسر,
المهم تمبس كسب نفسو..
تمبس, طالب فى الجامعة, طالب معرفة وعلم وطريق لبكره
قلمو فى جيب جعفر
وكراسو فى شنطة البت الحلوة ديك
جعفر ده منو مافارقة
والا البنية ديك فارقة
لانو تمبس بيعملها مع كل الطلبة, وبينحاز بشكل خاص لبنات الضهارى واولاد الريف
تمبس اللى بيسك الحرامى,
يقبضو ويجيبو البيت ويقاسموا العصيدة اللعملتها امو فى يوم ماطر
يقسم معاهو السفة ويخمس معاهو السيجارة ويقولو ليهو قوم فرتق,
تمبس تلقاهو فى نص المظاهرة..
يهتف عشان الناس الطيبة وفقرانه
وعشان تخدر ضرعات البلد ويتملى شطرها حليب عداله
يمشى الجامع يصلى وتلقاهو بالليل فى الحلفة عجاجة فرحو قايمة فى دارة الحلة
الحفلة اللى بيرص كراسيها,
بيرش ترابها لاقدام الحمام,
بيدق الصيوان, ويعرشو بقش روحو للامهات, اللى بيجهزن فى اكل العرس
يتفق مع الفنان, ويحاججو بمنطق الفرح, ويشرف شخصيا على عشاء الفنانين
تمبس يخلى عرضتو ويقوم بعضلات تبش السماحة يجر الولد اللى جنو يعبى الشكلة فى الحفلات,
تمبس يدق فيهو شواطين شرو,
يقوموا من الواطة وينطف معاهو بنطلونو
ويجى معاهو راجع يشاركو الرقصة والضحكة
تمبس يمشى الحجاز,
يشتغل ويرسل القروش عشان البيت والاخوات
ويشترى فى الهديمات والتياب لنسوان الحلة
وفى قلبو تلمع دبلة الحبيبة,
آمانة ماجاك بلد ياحبيتو, بلد ليهو مليون وش اسمو تمبس
يقعد يناقشك,
لايوق زى ويكة حقول خريفها تريان بمحبة ناس الريف
تزهجو يقوم بكش الولد يكاوش على كوتشينة حراق روحك
تلقاهو بيلعب فى {الضمنة} وضمانة حياتو وسط الناس
يلعب وخاتى باقى سيجارة وراء اضانو ويصحى فيهو شوق النجار
يخمسها مع الوليدات ويخمش سفة ويكفكف جلابيتو السمنية ويغنى ويعبيك فرح
شرامى نحو الحياة
ومقرم نحو الناس ودروبهم
مليون وش= مليون ميل مربع
تمبس لاقيتو فى دروب كتيرة مشيتها
شفت فيهو اخوى, ود الجيران, النجار, الخدرجى, وبتاع الطبلية الجاى من ضهارى البلد
شفت فيها الصديق اللى بتلقاهو وقت الضيق
وشفت فيها اخوى ود امى وابوى
تمبس عندو مليون وش.... ليها منحازة, بكل تناقضاتها الجميلة وحية..
| |
|
|
|
|
|
|
|
|
 Re: ممنوع الاقتراب .... (Re: Ishraga Mustafa)
|
د. إشراقة يا عمتكـ
ياخ خليكـ مفتحة شوية
لمن تكتبي وهبة تعملي $$$
لمن تكتبي تمبس تعملي ****
بكري شغال اليوم كلو سيرش بالاسمين ديل
محل ما يلاقيهم بشخت ليهم
ياخ بقى يغير
مع معقولة يومو كلو قصاد الناس ديل
هسي كدي عيبي لي صلعتو دي
| |
|
|
|
|
|
|
|
|
|
Re: ممنوع الاقتراب .... (Re: Ishraga Mustafa)
|
تعرفي يا إشراقة
بي توق شديد لونسة سعين يوم معاك في بوست كدة ما يمسخو لينا أي ممسخ بالكلام الناشف
الأيام دي عندي نزعة الله يديني خيرها وهي التواصل مع كل من أحب
وديل ما ضروري ناس أكون لاقيتهم
ولا حتى بعرفهم
لكن زي ما قلت ليك نزعة الله يديني خيرها
عايزة اتونس معاك وأقرأ كل بوستاتك الندية
برضومشتاقة أسمع من حنين للبلدية
صفية الصفية
| |
|
|
|
|
|
|
| |
Ishraga Mustafa
محمد عبد الماجد الصايم
فيس بوك
تويتر
انستقرام
يوتيوب
بنتيريست