|
|
|
 Re: المرحاض (Re: shaheen shaheen)
|
قُصاصة من صحيفة يومية
العثور على جثة طالب الصيدلة فى مدينة كوستى يزيد من غموض القضية .
قُصاصة من صحيفة يومية
مهدى الماحى يُطالب جميع الأحزاب العمل بجدية لانقاذ السودان من الكارثة الوشيكة .
| |
 
|
|
|
|
|
|
|
|
Re: المرحاض (Re: shaheen shaheen)
|
انت .. انت يا من بقيت فى الذاكرة المثقوبة مثل غربال قديم , تشبثت جيدا على حوافها , رغم كل من صعدوا على ظهرى , تبقى انت الاول والدائم فى لحظات المتعة الصافية .
- هل حزبكم على استعداد .. عشان يخوض الانتخابات الجاية , فى العام 2009 ؟ .
تتعثر ذات الثدى النافر بين اللغة العربية الفصحى , واللهجة الدارجة
ادور فى المقعد الدائرى الجلدى , نصف دورة جعلت كتفى الايمن بمحازة وجهها
- Droughts occur regularly in our political parties .
لمحت ارتسام ابتسامة نصف بلهاء على وجهها من خلال زجاج النافذة المصقول
- الترجمة لو سمحتا يا دكتور , عشان انا الانجليزى بتاعى شوية كده أأأأأ ...
استدرت فى مواجهتها مرة اخرى
- يعنى احزابنا السياسية فى السودان عندها فترات بتاعت قحط وجفاف دورية .. حاجة زى الجفاف البيحصل فى قارة افريقيا , لكن مع الحراك السياسى بترجع تانى تستعيد نشاطها وحيويتها .. واعتقد مع الانتخابات الجاية ممكن نشوف حيوية ما موجودة فى الظرف الراهن .
- هناك اتهامات لحزبكم انه يخدم رجل اعمال مشهور .. أأأ انو يعنى فى ملياردير سودانى أنشاء هذا الحزب عشان يكون مخلب ..
- لا .. لا , كلام ما صحيح , بالتحديد المقصود بالكلام ده هو السيد مصطفى غالب , وده كلام عارى من الصحة , ما اعتقد انو فى مشكلة لو رجل اعمال ناجح ساهم فى تأسيس حزب سياسى مع مجموعة من الاكاديمين المهتمين بالشأن العام , السيد مصطفى غالب انسان وطنى زيو زى اى زول عضو معنا هنا فى الحزب , وبعدين الاسطوانة المشروخة بتاعت انو من اصول يمنية وما سودانى بالميلاد , ده كلام ضد مفهوم المواطنة .. نعم من حق الانسان بعد الحصول على الجنسية فى اى بلد ممارسة نشاطو السياسى , والسيد مصطفى غالب حاصل على الجواز السودانى من 1990 ومتزوج من سودانية .
- هل السيد مصطفى غالب ممنوع من دخول اليمن , عشان عندو علاقة مع تيارات الاسلام السياسى اليمنى ؟ .
- مجرد اشاعات غبية .. والدليل انو السيد مصطفى غالب فى اللحظة دى بالذات متواجد فى اليمن السعيد هو وزوجتو وبناتو التلاتة .
- طيب , لماذا هذا الهجوم والاشاعات بالتحديد على شخص واحد , والحزب فيهو اعضاء كُتار ؟ .
- انا شخصياً رئيس الحزب مافى زول بهاجمنى , هاهاهاها .. شوفى , بالتحديد فى جهات تجارية بتنافس شركات السيد مصطفى وعندها مصلحة فى الهجوم الاعلامى عليهو , زى ما انتى بتكونى عارفة فى ناس بتفتكر انو التجارة قذارة .. مرة تانية بكرر , القرار فى الحزب عندنا قرار جماعى , والحزب ده ما حق زول واحد .
- انتم علمانيين ولا اسلاميين ؟ .
- احنا حزب وطنى .
انظر لساعتى السويسرية المضادة للماء والخدش
- افتكر يا استاذة نص ساعة كفاية على لقاء صحفى , مش كده ؟ .
- معليش يا دكتور .. اخدتا من وقتك كتير , انا اسفة .
- ما مشكلة , فى السكرتارية ح تلقى صور اختارى منهم واحدة تنزل مع اللقاء .. انا ما بحب اتصور الا مع المصور الخاص بتاعى , بيفهم فى الزوايا بتاعت الوش كويس .
- شكرا مرة تانية .
مدت يدها للمصافحة ابقيتها داخل كفى لثوانى
- عارفة انك حلوة يا انسة بديعة , بالجد انتى بديعة زى اسمك .
- شكرا ليك دكتور مهدى .. ده اطراء اتمنى اكون بستحقو .
لملمت اوراقها فى ارتباك واضح
- بالمناسبة , أسمك الثلاثى شنو ؟ .
- بديعة تاج السر الامين .
- خلاص يا بديعة خلى نمرة تلفونك فى السكرتارية .. عندنا مشروع جريدة يومية عايزين نصدرها باسم الحزب واكيد ح احتاج ليك ولخبرتك .
اشرقت مثل قمر فضى حزين فى تمام اكتماله
- يااااه .. انا شاكرة شديد للثقة دى يا دكتور .
تأخرت عليه , سوف يفتعل التذمر كالعادة
- ايوه يا غسان انا جاى فى السكة , لا خليك فى الشقة , ربع ساعة بكون معاك , كان عندى لقاء صحفى , معليش .
ضجرت منه – انا الذى لا احب العلاقات الجنسية طويلة المدى - , ضجرت من ابتزازه , ارهقنى مادياً ابن الحرام , تحصن جيداً ضدى
حمل ذات يوم كاميرا ديجتال صغيرة بين يديه
- تعال شوف .
جلست على حِجره الرجولى الساخن , وضعت راسى على غابة شعر صدره العريض
- ده شنو يا ولد يا قليل الادب ؟ .. فيلم سكس ؟ .
- ده انا وانتا .
وضع لسانه داخل أُذنى واخذ يُربت على فخذى فى نعومة خبيثة .. حملقت فى الشاشة الصغيرة , لحظة بين الحلم والواقع , كنت انا فى الفيديو المصور ارقد تحت جسده الرياضى , ارتعد من التاؤه , خلجات وجهى فى لحظات القذف الفريدة
انتفضت واقفاً
- ده شنو يا غسان ؟ .. انتا صورتنى ؟ . . صورتنى كيف ؟ .
- تخيل لو الفيديو ده نزل فى youtube.. رئيس حزب سودانى معارض يمارس الشذوذ مع طالب جامعى .. هاهاهاها .
- مجنون .. انتا مجنون .. عارف انا بصرف عليك كم فى الشهر ؟ .
هجمت عليه بكل شراسة , جلس ساكنا دون اى مقاومة
- عايز تحطمنى بعد ما شبعتا من قروشى يا ود الكلب , صرصار زيك داير يحطم دكتور مهدى الماحى .
انتزعت منه الكاميرا الديجتال الصغيرة , حطمتها على الارض فى عنف
- عندى نسخة عامل ليها save فى الاب توب بتاعى .
كان الدم ينزف على شكل نقاط صغيرة من شفته السفلى بعد لكمتى القوية
- انا عملتا ليك شنو يا غسان ؟ .
- انا بهظر معاك .. انتا الظاهر عليك بقيت ثقيل ما بتحب الهظار .
- اوعك تلعب معاى يا غسان , اوعك , انتا الظاهر عليك ما عارف انا منو , وممكن اقدر اعمل فيك شنو .
تغيرت لهجته فجأةً
- مهدية ما تزعلى منى , انا كنتا بهظر معاكى .
التصق بى بقوة من الخلف , شعرت ببداية عملية الانتصاب لعضوه الفحل
- ما تزعلى منى يا مهدية , مافى نسخة تانية من الفيديو , انا بتكلم ساكت عشان ازهجك .
- لحمى مُر .. اعمل حسابك منى يا ولد .
كيف وضع الكاميرا فى غرفة نومى ؟ .. كيف ؟ , كيف وضع الطوق حول عنقى ؟
فتحت الباب الخشبى السميك , كان يجلس امام شاشة التلفاز فى هدواء يحتسى كوب مياه غازية كبير
- غسان كيف ؟ .
- تمام .
دون ان يرفع عينيه من على الشاشة البلورية , يُحب ان يُمارس معى لعبة التجاهل
ارتميت عليه مُنهكاً من الرغبة والشبق
- معليش على التأخير حبيبى .
- مفروض فى وعد بتاع عربية يا دكترة , مش كده ؟ .
- انا هسع مزنوق ماديا يا غسان , اول الشهر الجاى العربية ح تكون عندك .
تتحرك يدى فى اجزاء جسمه بولع , اغمض عيونى
- كل مرة الشهر الجاى ؟ .. والشهر الجاى ده اصلو ما بيجى .
خرج منى ذلك الصوت الانثوى الرقيق - الذى لا اعرف من اين يأتى ! -
- غسان .. غسان , خلى الكلام الكتير , انا محتاج ليك شديد الليلة , تعبان يا غسان .
اين تلك الرائحة التى احبها ؟ .. رائحة البول وعطن المراحيض البلدية
الايام التى لن تعود , وحاسة الشم التى تراجعت مع التقدم فى العمر .. (الخفير) ضخم الجثة يضعنى بين فخذيه , حقيبتى المدرسية على الارض , اصوات اقدام ثقيلة , صوت الباب ينفتح على مصرعيه , صوت حاد خشن , يرتجف من الدهشة
- ده شنو ؟ بتعمل شنو يا حاج خليفة ؟ .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
ليلة امس كانت ليلة حمراء رائعة
من الليالى النادرة التى يُبدع فيها .. اوصلنى للذروة اربع مرات متتالية , تركت عندى تشنجات ذات ألم طفيف فى ذلك الجزء الاسفل
يبتزنى الوغد .. فهمت الرسالة عندما عرض على الفيديو المُصور , طالب الصيدلة الفاشل الذى يمتلك فحولة الشباب العفية
اعرف ماذا يُريد وهو لا يعرف اننى اعرف .. تلك العلاقة العاطفية القديمة مع زميلة جامعية اتجهت للصحافة - مهنة من لا مهنة له - .. (بديعة تاج السر الامين )
اشترى ابن الكلب من ثمن صراخاتى تحت جسده القوى قطعة ارض كبيرة جنوب (الخرطوم) , والان يُريد السيارة , وربما بناء ناطحة سحاب
- ها ها ها ها .
فى كل الاحوال كنت اريد انهاء العلاقة , لا احب العلاقات طويلة المدى , تُصبح مثل مؤسسة الزواج اللعينة .. احب التجديد فى الجنس والاشخاص ونوعية النقاشات والاهتمامات المختلفة
والان اعرف ان لديه نسخة مُصورة , او ربما اكثر .. أصبح موضوع انهاء العلاقة شبه مستحيل , لن يقبل ان يتوقف صنبور النقود من التدفق , الفاشل ابن الأسرة الفقيرة
لم انتبه طيلة حياتى ان الطرف الثانى فى العلاقة لديه شجاعة تسجيل ما يحدث على السرير .. هذه واحدة من لعنات العولمة , تلك الاجهزة صغيرة الحجم فائقة الدقة
كيف ؟ واين ؟ وضع تلك الكاميرا الصغيرة
- داير تلعب مع بابا مهدى يا ود الحرام ؟ .. انا بحب اللعب القذر زى عيونى .. بالظبط زى ما بحب ال sex .
الصباح الباكر , اول طقوسى المقدسة - انا الذى اُحب التجديد - هى اشعال سيجارة احملها معى لدورة المياه , استمع لنشرة السادسة صباحاً على موجات أثير (لندن) العربية وانا اجلس على المقعد الرُخامى للتبرز .. دماء فى كل مكان (العراق) , (باكستان) , (دارفور) , أزمة رهن عقارى فى بنوك (امريكا)
طلاسم لا استطيع حلها , مقالاتى الصحفية تجميع منظم من معلومات الشبكة العنكوبتية , مثلى مثل كل من يكتب , ليس هناك ابداع عقلى وثقافى حقيقى بين السطور
- دكتور مهدى الماحى .. انتا خراء كبير .
اتحدث مع نفسى كثيراً عند الاستيقاظ من النوم .. اتحدث مع نفسى حتى اطرد الوحدة الخانقة
رئيس وهمى لحزب وهمى , مجرد سكرتير تافه لملياردير يمنى الاصل عنده نفوذ كبير فى تنظيم (الاخوان المسلمين) العالمى
انا بلا فخر مُجرد يافطة , اكاديمى ذو توجهات ليبرالية , مؤمن باقتصاد السوق الحر والخصخصة , الشخص المناسب فى المكان المناسب للقرن الحادى والعشرين
ألم فتحة الشرج بدأ فى التصاعد , تجاوزت الخمسين بقليل يجب ان اتوقف عن المُمارسة الماراثونية , مرة واحدة تكفى فى الأسبوع
عندما نهضت عارياً لدورة المياه , لمحت بقعة دم متجمدة ومتوسطة الحجم على (المرتبة) البيضاء , هذه هى المرة الثالثة التى انزف فيها خلال النوم , يجب استشارة طبيب
حملت جسدى الخمسينى المرهق ووقفت امام المرآة انظر له فى تمعن , عندى بشرة ناعمة جميلة , ودرجة معقولة من الوسامة واجتماع حزبى غير هام فى العاشرة صباحاً .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
أجتماعات المكتب السياسى للحزب ثقيلة على القلب , اعرف كيف اجعلها جحيم لا يُطاق
اولاد (وِسخة) كلهم .. أعضاء مكتبى السياسى الحبيب
كل فرد فيهم يُمارس مهنة التجسس ضدى لمصلحة (مصطفى غالب) , كلهم يحلمون بالجلوس على كرسى الرئاسة , وكلهم يعلمون ان هذا الحزب هو (بوتيك) للعلاقات العامة يخدم المصالح التجارية للسيد المحترم فى غابة الصراعات
الم فتحة الشرج , والمزاج غير الصافى , وقرارى اننى لن ترك الحزب الا جثة هامدة
كم فرداً فيهم يعرف حكايات شذوذى الجنسى ؟
وكم فرداً فيهم يعرف مغامرات زوجتى (عطيات غالب) الجنسية الفاضحة ؟ , (عطيات) هى الثمن لهذا الكرسى .. الشقيقة الصغرى للملياردير المتغطرس , التى اشبعت شبق مدينة (لندن) بكاملها , المدمنة السابقة للمخدرات الثقيلة , لم تترك عضو اى زنجى فى (بريطانيا العظمى) الا وادخلته فى فرجها العجوز
هذه هى انجازاتى الرائعة فى دنيا البشر الفانية , زوجة عاهرة بالكامل لديها ابنة غير شرعية تحمل أسمى , ورئاسة (بوتيك) يعرض (طُراش) كريه الرائحة على انه مشروع فكرى طموح
سوف اُعذبهم , انا الوحيد الذى احمل شهادة عليا فى العلوم السياسية فى (زريبة) الابقار هذه
- ح نناقش هسع التقرير السياسى .
اخرجت رزنامة ضخمة من الاوراق .. وجدتهم ينظرون لى وللاوراق فى هلع
- عندى هنا 230 ورقة عايزين نقاش مستفيض حولها .. ومفروض ننتهى منها الليلة .
شهقوا من الغضب والاستنكار , كتمت ضحكة عالية كادت تفلت من فمى
- معليش يا اساتذة , ح نتعب شوية الليلة , بس ظروف البلد تستحق نتعب عشانها .
نظروا فى صمت لبعضهم البعض
قلت فى نفسى
- يا اولاد الحرام انتو قايلين السياسة دى سهلة ؟ .
كيف اتخلص من (غسان) ؟ .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
بدايات الشتاء هذه تبعث فى نفسى الشجن
اخرج من دار الحزب فى التاسعة مساءً .. اللوحة المضيئة على المدخل تُذكرنى بمدارس العبث المسرحية
(حزب التنمية الاجتماعى) .. اسماء الاحزاب مثل اسماء البشر تحمل التناقض الصارخ
(حافظ ابراهيم) المُعارض العراقى لنظام (صدام حسين) , هو الذى منحنى الحب الحقيقى فى شتاء (لندن) القارس
كوب الشاى على الطريقة العراقية , الوحيد الذى لم المح نظرات الاحتقار بين عينيه عندما ننتهى , رسام تشكيلى ومخرج مسرحى .. تعرفت على جميع أطياف المعارضة العراقية فى شقته المتواضعة الصغيرة , شيعة وشيوعيين , سُنة وأكراد , بعثيين فاتهم قطار الامتيازات وعسكريين حلموا بالسلطة وتورطوا فى انقلابات لم تتجاوز مرحلة التخطيط ونجوا من الاعدام باعجوبة , وعرفت عنده عملاء اجهزة أمنية رسمية يُريدون تقارير ليكتبوها لأسيادهم الثوريين فى (بغداد)
مُعارض نشيط .. مثقف من طراز رفيع , يفهم ويعرف معنى الحب الانسانى الجسدى
- ليش يعنى علاقة الحب لازم تكون انثى وذكر ؟ .. ممكن تكون بين ذكر وذكر , وبين انثى وانثى .
عيونه العسلية الحادة , ولهجته العراقية الرصينة , همسه الراقى الرجولى
- انا بحبك يا مهدى .
أضع يدى فى جيب معطفه , ويضع يده على كتفى , نمشى متلاصقين , يُحب (مظفر النواب) , ويكره شعر من يحمل أسمه
لديه تقطيبة جميلة عندما يتحدث فى السياسة
- الحرية لكل الشعب العراقى .
رصاصة وحيدة من كاتم صوت استقرت فوق الفك الاعلى من وجهه , سقط على واحد من شوارع أسفلت العاصمة الاردنية جثة هامدة , خافوا من اغتياله فى (المملكة المتحدة) حتى لا تحدث ازمة بين البلدين
تعلمت ان لا اخجل من نفسى على يديه
كان حبى الحقيقى
......
شاهين.
| |
|
|
|
|
|
|
|
|
|
Re: المرحاض (Re: Sabri Elshareef)
|
يتجرد من ملابسه .. يقف عارياً تماماً
احمل خطواتى الصغيرة المترددة اليه
- ابوى انا دكتور مهدى .
ينظر لى بعيون حمراء , وشعر اشعث
الحمى التى صعدت للراس ودمرت ذلك الاستقرار
كانت تبكى ذات الصوت الملائكى
- ابوكم الملاريا طلعت فى راسو .
فى الذاكرة الشبحية بقايا حية ونابضة من الانسان الذى كان .. قبل الحطام الذى استقر ردحاً فى (التيجانى الماحى)
امى وهى تُمسكنى من يدى ونحن نقترب من المكان , تمتحن ذكائى
- دكان ابوك وين ؟ .
- اهو داك , الواقف جنبو الكارو .
لافتة خضراء جميلة اعلى الواجهة , عرفت بعد ذلك معنى الحروف المكتوبة فيها ونوع الخط العربى
(الماحى عبدالعزيز مهدى .. تجارة اجمالى)
لا تدخل هى معى , من نساء الطراز القديم , تقف على بعد امتار من (الدكان) وتنتظر حتى ادخل
- خلاص ارجعى يمة .
اجده يجلس على مقعده مثل الاسد , يُبعد (مبسم الشيشة) عن فمه فى فرح حقيقى ويضعنى على حِجره الواسع
- دكتور مهدى الماحى , ازيك يا بطل .
طلب من جميع من يعمل معه ان يُطلق على لقب دكتور
- ولدى مهدى ده ح يكون اعظم جراح فى السودان .
روائح (الصابون) وزيوت الطعام تفوح فى المكان كله .. انام على حِجره وفى يدى (بسكويت) تنبعث منه رائحة (الفانليا) الحلوة
امى كانت تُقسم انها مُجرد
- ملاريا طلعت فى راسو .
ماتت على أُمنية ان يعود كما كان
عندما استلمت الجثة من مشرحة (مستشفى الخرطوم) .. بكيت وانا انظر لوجهه الحزين العجوز .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
تخلصت من كل رصيدى من الافلام الاباحية , كلها احرقتها قبل أيام , أشرطة فيديو واسطوانات كمبيوتر , اصبحت لا تجلب اللذة القديمة , كأننى اُشاهد مبارايات حيوانية فى المصارعة الحرة بدون اى أثارة
ابحث دون جدوى عن حب حقيقى , عن لمسات انسانية صادقة , عن (حافظ ابراهيم) جديد يُحب اغانى (فيروز) , ويُحدثنى عن المدارس الفلسفية والاجتماعية الجديدة فى انحاء العالم
يتغير الانسان كثيراً عندما يقف على عتبات الخمسين , عندما تنفتح ابواب الكهولة الصدئة امامه ويعلم بالحساب البسيط ان ما مضى أكثر من القادم
كم مرة فكرت فى الهرب ؟ .. حلمت اننى ابتعد , اُقدم استقالتى بكل بساطة من هذا الحزب الوهمى , ابتعد بورقة الطلاق عن العاهرة العجوز .. كم مرة فكرت فى الهرب الى مكان لا يعرفنى فيه انسان ؟ .. (الولايات المتحدة) , (استراليا) , (كندا) , او ربما العودة مرة اخرى (لانجلترا) .. حياة جديدة سعيدة , حياة بعيدة عن بصاق الناس فى الشوارع القذرة وعن الاحباط الذى ينام امام ابواب المنازل المتهالكة
ولكننى اقف فى منتصف الطريق حائراً
- عمرك هسع 52 سنة ح تمشى تعمل شنو بعد ده ؟ .
انا ضحية الروتين اللذيذ , ضحية الخوف من البدايات الجديدة , انا الباحث عن الحب المستحيل
حتى انتِ يا (نوارة) ؟
حتى انتِ ؟ ولعنة الجنون .. امواج البحر الاحمر وهى تبعث على الضجر والاكتئاب القاتم , الحرارة اللزجة مثل مُخاط السائل المنوى , وذُباب مدينة (بورسودان) الاهوج , والميناء من بعيد مثل كائنات حكايات الطفولة الخرافية
هكذا بكل بساطة طلب منى زوجها الطبيب البشرى , ان احملها وابتعد عنه
- اختك يا دكتور بقت خطر على الاولاد , هم ذاتم نفسياتم اهتزت بعد مرض نوارة .. افتكر العلاج فى الخرطوم احسن , وانتا عارف انا ما بقدر اخلى العيادة هنا فى بورسودان .
تتعرى وتقف بشعرها الاشعث , تُريد الخروج للشارع
لعنة فى العائلة .. لعنة وراثية , الاب والعم والاخت الصغرى .. جنون لا مقدمات له
يا (نوارة) .. اين تلك الايام الذهبية ؟ , اكواب (الكركديه) البارد وقطع الثلج الصغيرة تطفو على السطح فى نعومة مثيرة .. نلعب فى دكان ابى بين (الكراتين) المُرتصة بشكل افقى حتى اعلى السقف
(نوارة) لفظك الزوج والابناء
- نوارة انا مهدى .
تنظر ولا تعرفنى .. زبد ابيض على حواف الفم .. لعنة زواج الاقارب
ايامى وانا فى قمة اللياقة الذهنية اتخوف فيها من اللعنة , ان اقف عارياً فى دار الحزب وانا اُحدق فيهم , اعضاء مكتبى السياسى الحبيب , اعدائى الاوغاد .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
(اخلاص وهبة)
فزُورة هذه العانس النوبية .. ابنة (جزيرة صاى)
عندما تُكور شفتيها وتصرخ
- الوطن .
اشعر بانقباض حاد فى صدرى , انقباض وألم لا يُحتمل على الاطلاق .. استقرت بعد رحلة قصيرة فى صفوف الحزب الى منصب المسئول التنظيمى , لديها ذلك الاصرار العجيب على العمل السياسى , اول من تأتى للاجتماعات واخر من تذهب .. لا ذرة من الجمال , لا ملمح انوثة واحد يُوحد الله فى وجهها الحزين , تحتضن الكمبيوتر المحمول فى الاجتماع وتكتب كل شاردة وواردة , تكتب بسرعة فائقة واتقان , تكتب المحضر وهى تتحدث , وهى لا تنظر للوحة المفاتيح , وهى تُمسك كوب الشاى بيد وتكتب باليد الاخرى
- حزب التنمية الاجتماعى ده حياتى .. تعرف يا دكتور انا بعد ما دخلتا الحزب لقيت هدف لحياتى .
عندما تُكور شفتيها وتصرخ
- الوطن مُحتاج لينا .
اشعر بانقباض حاد فى صدرى
تخوفت منها فى البداية , خريجة (امدرمان الاسلامية) التى لم تجد الا الاعمال الهامشية من نوعية الجلوس فى محل للاتصالات , تنتظر العاشقين وتنظر لهم فى ضجر وهم يتحدثون مع حبيباتهم فى مكالمات طويلة مُملة
قُلت هى رقم اخر يُريد ان يعبُر من بوابة الحزب الى وظيفة فى شركات الملياردير المخبول .. ارتعبت منها وهى تضع امامى كل فترة عشرات الاوراق المكتوبة بخط ركيك
- ده شنو يا اخلاص ؟ .
- دى طلبات عضوية للحزب يا دكتور .. انا لما ارجع للبيت فى الكلاكلة بتكلم مع الناس هناك عن الحزب وبديهم البرنامج , وقريب انشاء الله ح نحتاج دار للحزب فى الكلاكلة .
توجست من حماسها الطاغى .. قُلت هى تُريد احداث تغيير ديمغرافى فى تركيبة الحزب لمصلحتها .. اصبحت اُعاملها بجفاء
صرخت فيها بكل حدة , وانا ارمى الاوراق على الارض
- يا اخلاص ده شنو الكلام الفارغ ده , احنا ما حزب رطانة عشان كل اسبوع فى عشرين زول من اهلك واصحابك عايزين يدخلوا الحزب , لعب الشُفع ده ما بينفع فى العمل السياسى .. احنا حزب قومى يا بت الحلال , حزب قومى بتاع الناس كلها .
تخاف من الكلام الحاد وتتلعثم
- أأأنا ممما ققصدتا .. يييا دددكتور , أأأنا بببس كككان قققصدى ...
- خلاص يا اخلاص انتهينا, اتفضلى مع السلامة .
لم اصدق ما شاهدته بعد ذلك , نهضت من على المعقد وهى تتبول , نصفها الاسفل كله كان مُبتلاً
- أأأنا , كككنتا ..
جحظت عينيها, وسقطت على ارضية (السيراميك) سقطة قوية
نهضت من مقعدى فى فزع
- ياساتر يارب .. ياساتر .
حتى قبل ان اقترب منها , عرفت انها نوبة من نوبات الصرع
انا الموعود بالجنون الوراثى .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
- لسه زعلانة منى يا اخلاص ؟ .
- لا ابداً يا دكتور .. أأأنتا استاذى فى النضال والعمل الوطنى .
ألم الصدر الحاد لكلمات (النضال) و(الوطن( و (الجماهير المسحوقة) .. كلمات رخيصة ابتذلها التكرر الاحمق الممجوج
تجلس على حافة المقعد كأنها على استعداد للركض فى مسابقة العاب اولمبية .. وجهها وهى تنظر للارض فى خجل يزداد دمامة - انا الخبير فى زوايا الوجوه -
- معليش يا اخلاص انا قاعد براى , زوجتى وبتى فى لندن , ممكن اعمل ليك شاى عزابة ؟ .
- لا شكراً دكتور .. العفو , انا المفروض اقوم اعملو ليك .
زيارة غير متوقعة .. لا احب هذه المُفاجأت , البيت هو اشد خصوصياتى , انا (العنكبوت) الذى ينسج شبكة ضخمة حول ذاته , يتعذب كل من يقترب منه , يتعذب حتى الموت
- انا اسفة ازورك من غير مواعيد .. واسفة اجيك البيت , بببس عععندى ممموضوع مهم .
اخاف ان تضربها نوبة الصرع
- خير ! .. فى مشكلة فى الحزب ؟ .
اخيراً رفعت وجهها , نظرت مباشرةً فى عيونى
- انا بحبك .
لم اعرف اين اتجه ببصرى .. مشهد غريب , اُريد ان اضحك
- من اول يوم لى فى الحزب وانا بحبك .
- اخلاص انا انسان متزوج .
- كان لازم تعرف عشان ارتاح .. ما عايزة منك حاجة , صدقنى ما عايزة حاجة .. بس كان لازم تعرف , اخلاصى وتعبى فى الحزب ده كلو عشانك انتا .
يا (اخلاص وهبة) .. العالم ليس تسليات مجلات (ميكى ماوس) المُلونة الجميلة , العالم ليس رومانسيات سلسلة روايات (عبير) الفجة .. العالم قبيح يا (اخلاص) .. قبيح بنفس قُبح وجهك يا عزيزتى .. عندما ارتطم راسك على (السيراميك) القاسى , عرفت انك انسانة من عالم مختلف , انسانة تُريد ان تُحقق ذاتها بالركوب على شعارات سياسية وانسانية غبية لا يؤمن بها حتى من اخترعها .. تحقيق الذات , وايجاد مغزى للوجود بطريقة شريفة فى بلد داعر !
مسكينة .. انتِ القادمة من كوكب غير بشرى بعيد
- اخلاص انا انسان متزوج .
كررت اكتشافى الذهبى فى بلاهة
نهضت بجسمها الاسمر الممشوق , اقتربت منى , انحنت وطبعت قُبلة على شعر راسى بكل شجاعة
- كان لازم تعرف .. مع السلامة .
سمعت صوت صرير الباب الخارجى وهى تخرج , وضعت يدى على جبينى وانهمكت فى تفكير عميق , خُطة جهنمية بدأت فى التخمر فى ذهنى .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
- هذا العالم السعيد بتعاسته , التعيس بسعادته .
اعتقد انه (البرتو مورافيا) .. تشابهت الكلمات بشكل مشوش فى ذهنى .. قبل ان اُعطى ظهرى لجدار القراءة الجادة , وقبل ان تتحول مكتبتى لمتحف اثرى لا يزوره انسان غير ذرات الغُبار العنيدة
- هذا العالم السعيد بتعاسته , التعيس بسعادته .
وانا دكتور (مهدى الماحى عبد العزيز) , حكمت عليك بالاعدام حتى الموت يا (غسان مختار الفاضل)
انا القاضى والجلاد , جلست على منصة القضاء واصدرت حكمى , ابدلت ثيابى وتابعتك حتى ساحة التنفيذ
انت المُتهم .. لماذا لم تذهب بهدواء مثل الأخرين ؟ , تبتعد دون اى دليل مادى ملموس , لا اُحب الدماء , على ما اعتقد انت تعرفنى جيداً , ولكننى ايضاً لا اُحب الاهانة والابتزاز
- اسمع هنا انا راجع بكرة شندى .
- انتا سكران يا غسان ؟ .
- ما عندك شغلة سكران ولا مسطول .. لما الاجازة تنتهى عايز العربية تكون معاى وامشى بيها الجامعة , فاهم الكلام ده يا لوطى ولا ما فاهم ؟ .
- اوعا تقول لى لوطى يا ولد يا فاشل يا حيوان .
صفعته وقبضت بقوة على كتفه الايمن
- غسان انتا ما عارف انا ممكن اقدر اعمل فيك شنو .
يرن صوته المخمور العالى فى الشقة الصغيرة الخالية
- ح تعمل شنو يعنى ؟ .. طُظ فيك وفى علاقاتك مع الناس المُهمين فى البلد .. انا عندى تسجيلات ليك ممكن تحطمك .. مش داير تنزل انتخابات السنة الجاية ؟ , انا بعرف اعمل ليك دعاية كويسة .
- غسان انتا سكران .
- داير العربية لما ارجع من شندى .. مفهوم ؟ .
اصدرت حُكمى عليك .. والتفاصيل تحتاج للتخطيط ولصبر (ايوب)
لا داعى للضجة , وللصوت العالى
- حااااضر يا غسان , العربية ح تكون عندك .. انا بس مزنوق ماديا شوية حبيبى , لكن ح اتصرف , ok ؟ .
اِنحنى للريح يا شجرة التخطيط البديعة .. اِنحنى ثم ابصقى عليها عندما تبتعد
- ماشى وين زى الوقت ده ؟ .. انتا سكران وتعبان وممكن تعمل مشاكل فى الشارع , خليك معاى لحدى الصباح .
اخاف ان تتكلم وانت فى هذه الحالة .. لقد صدر الحُكم
يااااه يا (غسان) , المُقابلة الاولى , ذكرى النظرات التمهيدية والاقتراب الحذر .. كانت جميلة تلك البدايات الاولى .. كيف انقلبت لهذه النهاية التراجيدية ؟
كيف استطعت تصويرى يا ابن الحرام ؟
- هذا العالم السعيد بتعاسته , التعيس بسعادته .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
تعلمت عزف الة (العود) فى تلك الايام الذهبية , (حافظ ابراهيم) كان يُحول قطعة الجماد الخشبية هذه الى كائن حى , كائن يحزن ويضحك .. تعلمت كيف اعزف جميع اغانى (الست) , اطير على السحاب , اتحدى ضوء البرق الساطع وصوت الرعد الخارق .. بعد الكأس الثالثة تتحول الشقة اللندنية المتواضعة الى شلالات من الانغام
- يا نسينى وانتا على بالى
وخيالك ما يفارق عينى
ريحنى , واعطف على حالى
وارحمنى من كُتر ظنونى .
تعلمت منه عزف المُوشحات الشرقية .. يُدندن وهو يقبض على الكأس الزجاجية بكلتا يديه بموشحات اتدلسية شجية
- الاندلس يا مهدى , دليل خيبة العرب .. الاندلس وفلسطين , والبقية تأتى .
اعزف وحدى , اُداعب الاوتار ليتبدد الملل الخانق .. فقدت القدرة على التركيز , كان يجب على الاستمرار فى القراءة الجادة والتثقيف الذاتى , ربط الاحداث بعضها ببعض حتى لا تتحول الى طلاسم كما هى الان .. اكتفيت من الرحلة بشهادة عليا فى العلوم السياسية حول القرن الافريقى الجائع ومكتبة ضخمة اشعر بالغثيان عندما انظر لها
- وبعدين يا مهدى ؟ .. انتا عايز شنو بالظبط ؟ .
جرس الباب الخارجى افزعنى , ما زالت السابعة والنصف مساءً , عرفت انها هى , اخبرتها اننى مريض , ادركت انها سوف تأتى .. تصنعت السعال وانا افتح لها الباب
- سلامتك دكتور .. قلقتا عليك .
- اهلا اخلاص اتفضلى .
- انتا كويس دكتور مهدى .
- دى بس نزلة بسيطة وصداع داير يفترك راسى , وقلتا ارتاح شوية فى البيت , ما تقلقى .
يبدو على وجهها قلق حقيقى .. انا ايضاً اعرف الحب الحقيقى , صدقينى .. أيام (لندن) الباردة تعرف ذلك
- ما كان فى داعى تتعبى نفسك .
اكياس بلاستيكية سوداء مثل اكياس القمامة , عرفت من الرائحة ان بها بعض الفاكهة الطازجة
- تعبك راحة .. ده واجب على يا دكتور .
- بالمناسبة .. عايز منك خدمة يا اخلاص لو سمحتى .
نظرت نحوى فى ترقب
- تحت امرك .
- هى حاجة خاصة بالحزب بشرحها ليك بعدين بالتفصيل .. فى زول قدم خدمات لحزبنا وانا عايز اقدم ليهو عربية هدية , بس ما عايز اشترى العربية باسمى .. عارفة الصحافة ما بتريح السياسين , ح يقولوا عندو كم عربية ؟ ومن وين ؟ وليه ؟ .. يعنى أأأأأ , ممكن تشتريها انتى باسمك وانا ادفع ليك القروش ؟ .
واصلت النظر لى فى استغراب
- انا مستعدة اعمل اى حاجة انتا تطلبها يا دكتور .
نهضت , وجلست بجوارها , تعمدت ان تلمس ساقى ساقها المكتنزة , شعرت بسخونة عجيبة , سخونة انثى مستعدة للمضاجعة
- انا سعيد انك بتحبينى يا اخلاص , عارفة ليه ؟ .
- ل ل ل ليه ؟ .
- عشان انتى انسانة عظيمة , انسانة واعية ومثقفة .
- أأأأنتا بتحبنى يا دكتور ؟ .
- مهدى يا اخلاص .. ارجوك , مهدى بس بدون دكتور .
عندما انحنيت بفمى على شفتيها اليابستان , اغمضت عينيها بشكل مسرحى , وذكرنى وجهها بجثث المشرحة الشاحبة مُغمضة العيون .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
وحيد .. والليل طويل .. ليل الشتاء المتقلب , بالامس مائل للبرودة , واليوم له لهيب الصيف الخانق
وحيد .. عيونى على الشاشة الملونة , فيلم من افلام الرعب التى احبها , خطوات لمجهول يتحرك فى الظلام , يكسر باستمتاع اعناق فتيات شقراوات جميلات وهو يرتدى قفاز اسود اللون .. عيونى ثقلية , يجب ان انهض بعد دقيقة , وضعت الحليب على العين الصغرى الهادئة (للبتوجاز) , وعندى اصرار ان اعرف من هو القاتل , قلت لنفسى فى تكاسل
- اللبن ح يكون فار .
سمعت خطوات ثقلية خلف ظهرى , وصوت تنفس حاد , صرخت دون ان التفت ورائى من الخوف
- منو ؟ .
نزلت يد خشنة على عنقى من الخلف
- انا اخلاص وهبة .
وقف شعر راسى من المفاجأة , شعرت ببرودة فى اطرافى
- دخلتى هنا كيف ؟ .. الباب مقفول بالمفتاح ! .
- داير تلعب بى يا مهدى ؟ .. داير تقتل غسان وتخلينى انا المتهمة ؟ .
اخذت تضغط بقوة على عنقى من الخلف .. شعرت بألم رهيب .. صرخت فى استعطاف ذليل
- اخلاص .. اخلاص لا .
- لازم تموت يا مهدى لانك كلب .
اخذت اقاوم .. احاول ان اُبعد يديها القويتان عن عنقى
- اخلاص لا .
رائحة غريبة تنبعث .. لا استطيع , تُحكم قبضتها , اُريد ان اصرخ , اتنفس بصعوبة , ألم رهيب , سوف اموت
- حرام عليك يا اخلاص .. غسان عايز يدمرنى , غسان لازم يموت .
رايت (نوارة) عارية , تبتسم فى بلاهة وهى تنظر لنا
- نوارة ؟ .. نوارة انا ح اموت .
صوتى يخرج فى شكل فحيح متقطع .. يخرج بصعوبة , لُعابى يسيل على صدرى , اختنق , اغطس فى غيوم داكنة من الغيبوبة
رنين حاد متواصل .. رنين هاتفى المحمول , استيقظت بصعوبة على ظلام دامس , انقطع التيار الكهربائى , رائحة الغاز القوية تملأ ارجاء الشقة الصغيرة , هرولت باتجه (المطبخ) فى خطوات متعثرة , اغلقت مفتاح (البتوجاز) , احرق السائل الابيض المنسكب فى سخونة طرف اصبعى , انقذنى رنين الهاتف المحمول , تخبطت فى الظلام وانا افتح النوافذ على مصرعيها لتجديد الهواء .. عاد للرنين من جديد , بعث اضاءة خافتة جميلة فى العتمة من شاشته الصغيرة زاهية الالوان
- الو .
- دكتور مهدى الماحى ؟ .
- اهلا وسهلا .
- معاك ادارة مستشفى التيجانى الماحى .
خفق قلبى .. (نوارة) .. صديقة الطفولة , الايام الحلوة , ضحية اللعنة الوراثية
- خير .. فى شنو ؟ .
- عندك معنا نزيلة هنا اسمها ...
قاطعته فى لهفة وخوف
- نوارة الماحى عبد العزيز .. حصل ليها حاجة ؟ .
- لا خير يا دكتور , لكن الظاهر نوارة دى هربت .
- هربت كيف ؟ .
- شردت يا دكتور .. بس دايرين نعرف لو جات عندك .
انحنيت على النافذة , وتركت الهواء الجاف يلطم حبات العرق من على صدرى العارى .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
(الماحى عبدالعزيز مهدى .. تجارة اجمالى)
اللافتة الحديدية الخضراء التى كانت , عرفت منها ما يفعل الزمن حتى فى الحديد .. احتفظ بها فى اصرار أبله , تحولت الى بقع كبيرة من الصداء المتسخ , كنت اعتنى بها فى السابق , اغسلها بالماء وقطع القماش الناعم حتى لا تنخدش .. منذ ان بدأ الطلاء فى التساقط منها , ابتعدت عنها خوفاً على حياتى من (التيتونس) , انظر لها الان فى حزن , الكتابة التى فيها اصبحت تبعث على السخرية بشكل غريب بعد ان تساقطت منها حروف مُهمة
(ما زيز مهد .. تج لى)
والاسد الجالس هناك فى اقصى الركن الشمالى , له سِنة امامية جميلة من الفضة وخاتم ضخم من الفيروز الاحمر على اصبع اليد اليمنى , يقبض على (مبسم الشيشة) فى رجولة , عنده كاريزما طاغية ولسان فاحش عند الغضب
- يا عبدالقادر يا خراء .. الفاتورة بتاعت امبارح وين يا زفت الطين ؟ .
- اسمعوا هنا يا اولاد الكلب ده محل اكل عيش الداير يشتغل , يشتغل بذمة وضمير .
(عبدالقادر الخراء) كان يتحول فى حضوره الطاغى الى قطة .. قطة انثى تموء بين الاقدام بحثاً عن الحنان والذكور
يتيم الابوين , قادم من بلدتنا التى لم احبها , (الكاملين) .. له جدة عجوز عمياء تفوح منها رائحة بالوعة راكدة .. ينام امام (الدكان) , يجلس وعيونه على الارض عندما يأتى لبيتنا , نتغامز انا و (نوارة)
- عبدالقادر الخراء قاعد بره .
تنهرنا امى وهى تكاد تبتسم
- عيب عليكم يا اولاد .. ربنا كده ح يوديكم النار .
تتحول القطة الانثى الى أسد ذكر .. يضيع الأسد الحقيقى فى رحلة مُضنية هدفها الوحيد هو التجرد من الثياب
تتكلم فى حزم
- الدكان امانة فى رقبتك يا عبدالقادر لحدى ما ربنا يكتب السلامة لحاج الماحى .
لا يرفع عينيها من على الارض
- ربنا لطيف بعباده , ده عمل يا حاجة ثنية .. فى زول عمل ليهو عمل .
جلس فى اقصى الركن الشمالى , قبض بيديه على (مبسم الشيشة) , ووضع بين اصابعه خاتم من الفيروز الباهت اللون , اصبح لا ينظر للارض فى مسكنة , فسبحان مُغير الاحوال , سبحان الذى اعطاك مُلكاً وعلمك الجلوس على السرير
- حاجة ثنية .
انقلبت بلا اهتمام الى
- يا ثنية .
هى فى بدايات ثلاثينيات عمرها , وهو فى منتصف العشرينيات , وطاقة الجسد البشرى لها حدود فى احتمال الحرمان , والغائب يرفض العودة من الغيبوبة .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
البراجماتية
اُحب هذه الكلمة كثيراً .. استخدمها بافراط فى الاجتماعات عديمة الفائدة لمكتبى السياسى الحبيب
البراجماتية
ستار اخلاقى رقيق ونظيف لتبرير افعال لا اخلاقية , فردية او جماعية .. تحمينى هذه الكلمة من سياط عذابات الضمير النادرة , وتُمهد الطريق لتقلبات المواقف السياسية الفاضحة للحزب الذى اجلس كالخازوق على راسه
- الغاية تُبرر الوسيلة .
ما هو الفرق نظرياُ على الاقل بين البراجماتية والميكافللية ؟
وطلائع الاسرة المقدسة ستصل الى ارض وطنها الثانى الشقيق بعد نصف ساعة , زوجتى الوهمية والعاهرة مثل حزبى , و (شوشو) ابنة غيرى التى تحمل اسمى الثلاثى .. اقود سيارتى فى شارع (المطار) المزدحم كيوم حشر اخير للبشرية البغيضة .. اُفكر فى (نوارة) , اين هى الان ؟ .. امسح الشوارع بعيونى , تُعذبنى فكرة انها الان تتسول المأكل والمشرب من بقايا الناس , ابنة العز القديم تنام الان فى الشارع , ابنة الايام القديمة , قبل الجنون , وقبل ان يعبث (عبد القادر الخراء) فى الاصول المادية واللحم الحى للاسرة السعيدة , انقض كصقر جارح على سريرى وعلمنى معنى دفع الثمن .. ثمن الصمت غالى
حكيت (لحافظ ابراهيم) عنه وفى عيونى دموع
- تعرف يا مهدى .. لما ظهرت الداروينية كانت طفرة فى علم الاحياء , لكن صارت مشكلة كبيرة فى علم الاجتماع , البقاء للاقوى والاوسخ .. والبقاء لله يا صديقى .
اختنق من انبعاثات (عوادم) السيارات فى شارع (المطار) .. اتسع يا ثُقب (الاوزون) , اتسع , واصهرهم , اجعلهم كتلة تغلى من العظام السائلة .. الانسان يجب ان ينقرض مثل الديناصورات , هذا هو الحل الذى اقدمه سراً لانقاذ الكوكب الارضى
لمحت العاهرة العجوز ذات المؤخرة الملساء اللينة فى نهاية صالة الوصول , تتحرك وهى تنظر للفراغ – مُدمنة المخدرات الثقيلة السابقة - , بيضاء اللون وقصيرة القامة , وضعت طناً اضافياً من اللحم على جسدها البدين اصلاً , اصبحت بقرة تعيسة تُثير الرثاء .. بعدها بقليل لاحت (شوشو) وهى تُحرك شعرها الحريرى المنسدل مع خطواتها السريعة الرشيقة
هذه وبلا فخر اسرتى , وسندى فى ايام الشيخوخة التى تقترب .. يا مرحباً بالحياة
رفعت لهما يدى من بعيد فى تهليل
- عطيات .. شوشو .
صوبت لى العاهرة نظرة احتقار مُحايدة .. انا اعرف , وهى تعرف , وشقيقها الملياردير الوغد يعرف
يا مرحباً بالحياة .
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
اتعذب يا (اخلاص وهبة) .. اتعذب فى وحدتى وضجرى .. يستيقظ ضميرى , امس اوشكت ان انصحك بالابتعاد
اقول لنفسى
- حرام .. حرام يا مهدى , دى زولة مسكينة .
يا صحراء القسوة , اى شمس حارقة هذه ؟ .. يا يوم النجاة , الضعفاء فقط هم من يسقطون تحت الاقدام
- العربية خخخخلاص الاجراءات بتاعتا انتهت .
- ما عارف اشكرك كيف يا اخلاص .. دى خدمة ما بنساها ليك عمرى كلو .. وطلب بسيط كمان , ما داير زول يعرف الحكاية دى .
- أأأأنا بعرف احفظ السر كويس .. للللما احب زول ممكن اديهو عيونى .
انحنيت عليها وطبعت قبلة بدون طعم على شفتيها
- حمدالله على سلامة مدام عطيات وشوشو .
اذاً هى تترصد اخبارى من فم اعضاء مكتبى السياسى , وكالات الانباء الثرثارة
- الله يسلمك اخلاص .
- بببتحبها ؟ .
- منو ؟ .
- زوجتك .
احترس .. احترس يا ملك التخطيط , امامك كمين
- هاهاها .. فى زول بيحب زوجتو ؟ .
- ما فهمتا .
اللعنة عليك
- مرات يا اخلاص الزول بيكتشف بعد سنين طويلة انو مفروض كان يتزوج انسانة تانية غير زوجتو .
- ولقيتها ؟ .
- منو ؟ .
- الزولة التانية .
نظرت لها فى حنان
- أكيد .
- منو ؟ .
- لا ده سر .
- عليك الله .
- واحدة اسمها اخلاص .. بتعرفيها ؟ , هاهاهاها .
- يمكن .. بتحبنى من متين ؟ .
اللعنة على هذا التحقيق الامنى , اللعنة على النساء
- من زمان يا اخلاص .. بالجد من زمان .
- بالجد ؟ .
- والله العظيم .. وحياة اى حاجة مقدسة فى الدنيا .
هل مازالت هناك اشياء مقدسة عندك يا (مهدى) ؟
- وانا كمان يا دكتور .. وانا كمان بحبك شديد .
اقتربت منى واحتضنتى بقوة , شعرت فيها بنهديها ينسحقان على صدرى
- اخلاص احنا فى دار الحزب .
- ما قادرة يا دكتور .. والله ما قادرة .
يا عذاب الضمير , متى ينتهى الخداع بين البشر ؟
......
شاهين.
| |
|
|
|
|
|
|
|
|
|
Re: المرحاض (Re: shaheen shaheen)
|
(15)
أوغلت فى العمر يا (مهدى الماحى) , كبرت , والتجاعيد على الوجه تفضحك .. بينى وبين اللوحة الزيتية المعلقة على جدار مكتبى فى دار الحزب علاقة حميمة .. لوحة لقطار ينطلق مُسرعاً يبدو فى اقصى اللوحة مثل نقطة صغيرة بينما القضبان الحديدة فى بداية اللوحة ضخمة .. انا ذلك القطار الذى سيختفى , اقترب من الستينيات بخطوات عسكرية رشيقة .. اين انت يا (حافظ ابراهيم) ؟ , يا صاحب المناقشات المثقفة الرائعة فى شتاء (لندن) البارد
واصل هاتفى المحمول رنينه الشجى - نغمة عود يعزف موسيقى عراقية قديمة - .. (غسان) يتصل للمرة الخامسة , يُواصل لعبة الابتزاز
- اهلا يا غسان .. معليش كان عندى اجتماع , لا , الامور كلها تمام التمام .. ايوه العربية خلاص تحت امرك .. راجع متين من شندى ؟ .. طيب يلا مع السلامة .
ادور دورة كاملة فى مقعدى الجلدى , ادور وانا اُفكر , من الممكن بسهولة رصد مكالمات من يتعرضون للقتل لفترات ماضية , هذه واحدة من كوارث التكنولوجيا.. جريمة القتل فى هذا الزمن الملعون تحتاج لتخطيط ذكى وفاعل معروف وادلة لا تقبل الشك
تقتحم زوجتى (البقرة الضاحكة) مكتبى دون استئذان , تعرف اننى مُجرد عبد فى املاك شقيقها المعتوه
- مرتضى لسه ما وصل ؟ .
- عطيات .. مرتضى ده شافع صغير يا عطيات , حرام عليك .
حدجتنى بنظرة الأحتقار المعتادة
- انتا اخر واحد يتكلم عن الاخلاق .
- مرتضى ده عمرو 25 سنة .
- حاجة ما بتخصك .
انتزعته من صفوف الحزب , وخلقت له وظيفة وهمية فى واحدة من مشاريعها التجارية غير المفهومة , حتى تنفرد به جسدياً .. وفى اقل من شهر ظهر عليه شحوب شديد
- الولد ما قدرك .
- اعتبر دى غيرة يا دكتور ؟ .
- احتمال .
- عليهو ؟ .. ولا عليا انا ؟ .
اطلقت ضحكة ماجنة
......
شاهين.
| |
|
|
|
|
|
|
| |
shaheen shaheen
shahto
فيس بوك
تويتر
انستقرام
يوتيوب
بنتيريست