|
|
 بين بنت الازيز..ملتوف الشوق... واندلاع الوجد.. انا انز وطناً
|
عبأتنى بنت الازيز الطائرة،
ملتوفا من شوق
رسمت ثلاثة ارباع قوس قزح فى افق الارضية،
وقذفت بى فى تراب الوطن.
اندلعت بعدها اضّخ وجدا،
اتلاطم بين ضفتى الحزن والفرح،
حتى امتصت عبوتى... قلوب احببتها
وطويت من اجل عيونها ...الارض والزمن،
بحر من الالفة والصدق والاصدقاء
وجىء لى بسرتى المدفونة خلف جدار ما
وكوبا من الآبريه
وما تبقى ولم يباع من نهر النيل
والغبرة والشمس الحارقة
والمعاد الفارغة
اكراما لمجيىء من بلاد السطوة والكبر
ومحمد احمد منزوع الحقوق والدسم...يفسح لى فى المجلس... والقلب
ونظرات رجل امن النظام تجبرنى على ضرب مزيد من الحجاب على فرحى... ودموعى الضاربين فى الغور
وامى مافى
وابى شيخ كبير
آه يا اصدقائى
قصيرة كانت تلك الزيارة
ولكنها كانت عميقة المعنى وضاربة الجذور
لست ادرى من اين ابدأ؟
اسمحوا لى ان اجادعكم اوراق الوطن واحدة تلو الاخرى...
وادونى رضاكم
|
|
 
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
أولا حمدلة على السلامة ..
طبعاً أكاد أحس ببعض الذي صادفك .. فعند عودتي في أول إجازة كنت أرى الناس إزدادوا سمارا وقصراً وهزالاً .. وأرى البيوت قصيرة أكثر من وضعها الطبيعي والغبار أكثر من زمان والحر كذلك .. لكن هناك فرق ، فمدة غيابك أطول وعيونك التي تنظرين بها أوسع فهناك الفنانة ، الشاعرة ، القادمة من بلاد اليانكي ، المرأة ، أم الأولاد ، البنت التي زرعت السودان وبلاد أخرى كثيرة شرقا وغربا ، وأشياء أخرى .
بعض الناس يرون أن الناس هم الناس والبلد هي البلد ، لكن عيوننا تغيرت أو تعودت على رؤية أشياء كبيرة ، جميلة ، نظيفة ، ضخمة ، عطاء مستمر ، كهرباء لا تنقطع ، مياه لا تعكر ..
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Ahlalawad)
|
صدقنى يا اهل العوض انا لم انظر الى قصر المبانى والمناظر المغبرة هذه الا فى عيون الناس ، وجعتنى عيونهم الضالة ورقابهم المنحنية ونظرتهم المنكسة اكتر من قصر المبانى،
وجعنى الواحد فيهم لمن يقطع الشارع بكون زاهد فى الدنيا ان شا الله يموت، وجعنى
وجعتنى عدم اهمية الانسان وعدم انتباهه لضياع قيمتو
وجعنى النيل... الباعوهو شريحة شريحة زى صينية الباسطة
وجعنى الهم الرسى فى الناس وسكن
وبحبو
لو فضلت منو سريحة بحبو
واموت فى سرسار موية نيلو وشمسو
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
ياحليلك ياتماضر
حمدلله على السلامة وكل سنة وانت طيبة
أسئلة صديقنا يحي فضل الله علي خطى قصيدته
(أسئلة ليست للاجابة)
أعذرك وانت تلخصين التجربة
بسؤال (هل مااتلاقينا وللا اتعاقبنا)؟
أعرف أن الغربة سكنتنا فأضيف تساؤلا
جديدا:هل نملك أن نخلص منها أرواحنا؟
----------------------------------------------------------------------
فقط يبدو أنك شرعت في وصف موجوع عما تبقى
لك من وطن. لهفي عليه... أخشى
..أن يكون قد تبدد ولم يكفه التبدل
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
عزيزتنا
كويس انك متماسكة بعد ان رايتى ماتبقى من مدينة انتهكت ذات ليل!!
الناس الكبار لا يتغيرون ولكن المكان هو الذى تغير بالقصد والتعمد,,واثار النازحين يجرجرون اثمال التيه فى مدينة انحنت بفعل فاعل؟؟كنا نروح ونجى والخرطوم هى هى ايدى امينة ترعاها,,فلا شارع النيل قد خلعت اشجارة ولا السوق المركزى بيع عند الغسق وتغور فجرا!! هذا خطل لتبرير الجريمة السوداء
واسر قوافل الشبيبة داخل قوقعة التاصيل ونهاية احلام المسرح والمسرحيين
لك اللة فلكم اعلم ان الوجع سيمضى ,,,
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
سلامة الأسفار- كما يقول اهل الخليج- ياتماضر
ويا أهل العوض اتخيل لي (حمداً لله على السلامة) تقال لمن يعود للوطن
واتخيل لي كمان انو الغبار والتراب والمويه العكرة وبيوت الجالوص وريحة عواسة الآبري والحلو مر هي ما تشتهيه النفس في بلاد ناطحات السحاب والشوارع الملساء زي القزاز والناس النضيفين من بره، وما بيعرف قدر الوطن إلا البيفارقو، واللا شنو يا تماضر؟
ونورت بيتك وبوردك
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: منعمشوف)
|
هاكم الورقة الاولى ورقة الاجابة على اسئلة يحيح:
السؤال:
كيف وجدتي النيل في اول موجاته امام المسرح القومي؟
النيل كان صائما، والدبابة حجبتنى من رؤيته ، وعنكبوتك القديم شاخ واولد بنينا وبنات
هل لازالت الدبابة تحرس بوابة المسرح القومي؟
هل استطعت ان تحرجي الموت و لو لحظة و انت تحاولين ان
تلمي صوت عميري من الاثير و هناك قمر يخبئ دمعة ثكلي
في شعاع يغازل موجة و صوت طرمبات مياه توتي يشاكس
ما تبقي من ذكريات؟
اتحفتنى ايمان محمد الحسن وعبد الرحمن الشيخ ابن اخت عميرى بملف عميرى، وتسجيلات اغانيه وعمل دؤوب لطبع ديوانه ولم تراثه.... المرة الوحيدة السمعت صوت عميرى من الراديو كنت فى حافلة متجهة للخرطوم واقام موظف امن الهدف(!!!) حجة ليس لها آخر اخذونا بعدها لنقطة البوليس وعلا صوت الشجار واغلق صوت الراديو وبقية صداه يتردد فى جوانحى... ياقمر انا مابطولك
ادينى من نورك وميض
عشان انور وابقى طولك.
هل لازال مصطفي احمد الخليفة يحاول ان يخلص الكوميديا
من الشوائب ويمنح ضحكته الصافية لاشواق الطريق؟
مصطفى والاصدقاء اول من احتفل بى فى معسكرهم القائم فى الملازمين
يقومون بانتاج فيلم وعمل درامى كبير ومسرحية
سحنتاتهم يبدو عليها الاعياء الشديد يقال ان احد الاثرياء برهم بالمكان والمال حتى يعاودوا انشطتهم وهم الآن يعملون كالنحل لآنتاج اعمال مسئولة وجديدة ومستقلة من تسلط التلفزيون... دعونى لاظهر كضيفة شرف فى الفيلم المزعوم... كان تحقيق ذلك مستحيلا لضيق الزمن.
وفى اليوم الكنت بتصل بمصطفى عشان علاقة محمد عوض بالخطوط الجوية قلت ليه مصطفى انا عندى مشكلة طيارة، قالى طيارة تشتريها ولا الطيارة البرسلوها للسكر ولا طيارةالله والرسول دى، وكان ذلك داب مصطفى يقطع مصارينك بالضحك( ويفكك عكس الهوا.)
عقد الجلاد وبلاحرى عثمان النو عزمنى فطور رمضان وبعدها حفلة فى دار المحامين وكانت دى اول حفلة احضرها فى السودان ، رحب بى عثمان وقدمنى للحضور واجهشت بالبكاء ...من عوارتى البتعرفها.
هل رايتيني هناك اخب بين الاذاعة و التلفزيون وبي من
ظلامات وظلومات الزبدين ما يكفي كي يحاصرني الغبن و
تنهشني تفاصيل من تبدل من اصدقاء؟
كان رجال امن الاذاعة والتلفزيون ينظرون الى تجمع اصدقائنا يايحى وهم يحتضنوننى ويجعرون فى ضل الشاتى القدام الاستديوهات القديمة بالاذاعة وكنا نخلط الدموع بالتعليقات الساخرة ونضحك ، رايتك يا يحيح معنا لم يتبدل معدن الاصدقاء ومع انو سلام الرجال والنساء فى الحيشان محدود بالمصافحة الا انهم جميعا عاملونى كشقيقة .
ولم اسكت كنت اسالهم بصوت عال: البقى فيكم كوز يكلمنى
ويؤشرون على السر السيد الذى يرفع يديه للسماء والله يا تماضر انا سبت الكوزنة من المعهد وينادونه السر الكوز، ويضحكون
محجوب هو الوحيد الكوز وصار مديرا كبيرا تحفه حاشية وسلم على بطرف اصابعه ولم يدع عيونه تقع فى عيونى..، صلاحالالفاضل قابلتو وهو ضيف فى نفس الحلقة الانا فيها ضيفة كان يريد ان يقول الكثير عن الظلم الذى جرى له لم تسمح ظروفنا باللقاء ثانية ولكنى عرفت انهم (بهدلوه)
وجوه جديدة ما لها حد والا بدر الدين حسنى فى التلفزيون القومى يقول مايريد ويفعل مايريد وتحيط به المحبة من كل صوبز
.
هل ضحكتي لنكتة ساخرة لمحمد نعيم سعد او عبد السلام جلود؟
محمد نعيم كان يؤكد اننى مازلت ابدو( جكسا)من كثرة اكل التفاح، وانا اصر على انهم عجاز لانهم ما سعيدين.
هل لازال جمال حسن سعيد يملا فراغات الظهيرة بثرثرته
المتداعيه؟
عندما استجوبت مكى سنادة عمن يحمل عبء المسرح على كتفيه الان قال، جمال حسن سعيد الفاضل سعيد والمسرح القومى، يضحك من فرط جرأتى ويقول لى والله ما كوز انا مؤتمر وطنى قلت له لو ما اصلحت حال المسرح القومى ما عافية ليك وياكا كوز ومؤتمر وطنى دة هو مش ياهو الكوز التابع للحكومة؟ يعنى ما الحردان؟
تري كيف تحمل اخونا عوض بابكر رحيل صديقه خضر بشير؟
اتعاقبنا انا وعوض بابكر العربة تزاحم المركبات لتدخل الشارع وينزل عوض بابكر وقد زاد سنه عن اقرانه عشرون سنة شفتو من بعيد وانا الوح لطيفه وابكى لم نتقابل، للاسف.
هل تناولتي فتة عدس بالقراقير من يد خالد جاه الرسول
في بوفيه المسرح القومي بينما ابو قبوره يخترع نكتة وليدة اللحظة؟
لا
كيف تبدو شوارع الثورة و بالذات محطة شقلبان؟
كالدبيت الاغبر، الركشات اكتر من الرايحات اصطف الشارع بالبوتيكات والبقالات ومحلات الكاسيت والنت كافيهات ومراكز الاتصالات والاجزخانات والدكاترة والغبرة ، وهو شارع الحركة فيه عشوائية والقوى ياكل الضعيف ولاعبور للمشاة الا للحريف وتكثر فيه الحوادث وتنقلب الامجادات فى كل خور عميق، شارع خرافى
هل تحملتي غيابك كل هذي السنين؟
هل عرفت لماذا بدلوا اسم شارع النيل الي شارع الشيخ زايد؟
نحن لانملك شارع نيل هناك احد الشيوخ يملكه
باعوه وباعوا كل غنماية حائمة بالقطر لشيخ آخر ويبيعون الاشلاقات هذه الايام والبيه مزاد مفتوح فى العاصمة والاقاليم ، لو عندكم قروش امشوا اشتروا الباقى
هل لازال مزارعو توتي يرشون الجرجير بالماء و المعدية تراوح بين توتي و الخرطوم والصباح يسرب نداوته في التفاصيل؟
ما شفتهم، شفت البنطون من بعيد وانا بسلم على النيل لحظة الوصول
هل رقصتي في حفلة عرس صاخب يجمله عركي البخيت؟
ابوعركى عزمنى عرس فى نادى الفنانين وقالى حاغنى فى العرس دة عشانك وجاب اولادو وجونى لحظة الميعاد ووجدوا بيتى معبأً بالضيوف واعتذرت ولم يذهب عركى ولم يغنى، لكنه سجل لى شريط كامل مع ولدو محمد واهدانى ليهو ولى رشا وللوافر
هل لاحظتي ما فعله السكري بهاشم صديق؟
التقيت هاشم صدبق بدعوة منه وبترتيب من احلام من هذا االمنتدى وبامسيكا وحبيب الكل كانوا هناك، هاشم صار وحيدا فى هضبة النضال، ابرقه عوض احمد خليفة برقية جافة وجارحة ليتوقف عن كتابة قصائده فى الحرية وبالتحديد لايقاف حاج مشاتر اتنشرت هنا فى المنتدى، قابلت لينة بنته وبنت نعمات هارون، نعمات هرون مكرر.
هل خصك الشبلي او موسي الامير بانس حميم تحت راكوبة ام نوار ست الشاي بادارة الانتاج السينمائي؟
لا،من زمنى الخاين
هل لازال قرني يمارس توهجه الدرامي؟
لم اره وسالت ولم اقابله ، زمنى الخاين
هل قضيتي ليلة كانت قمرية مع الهام بابكر؟
نهارية رمضانية وكم زيارة بيتية وتلفونات ومعسكر الاصدقاء ، زادت الهام نضجا وعامتلأت عيالا وازددت لها حبا، صديقتى واولاد مصطفى احمد الخليفة عبئا على عاتقها.
هل سألتي قاسم ابوزيد لماذا صام عن المسرح؟
لم اقابله ، كمن زمنى الخاين
هل مر بك طيف عو ض صديق في استديو كرومة؟
كنت اصرح لمحققة صحيفة من جريدة الدائرة بان فقد عوض صديق دخل على، وكنا نتاهب لذلك اللقاء التلفزيونى فى اروقة قناة النيل ا لازرق، حين نادت الصحفية على مجدى، ابن عوض صديق عرفت مؤخرا ان القناة قامت على عاتقه عزينا بعض على مفقودينا وبدانا حوارا جادا للتعاون وسنبدأ قريبا ، ان شا الله.
وهل تخلصت من مغبة فعل النوستولوجيا؟
لا والف لا
تماضر
حمد الله علي السلامة و اعلن اني احسدك علي ذلك
مع هميم ودي و كثيف محبتي و تقديري
يحيح محبتى لك
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
حمدا لله على السلامة
Quote: جات داخُلِي ، زيْ مرْقَةْ غضَبْ
من جُوف حليم في زمن صعبْ
رَمَت السلامْ زيْ شنْطَة من كتفْ المسافر بي تَعَبْ .
زيْ رُدخَة ربّ
الله يا ربّ
قعدت على طرف العنيقريب المحاذي ا
ضايرت التراب كُسر العويش الفوقو شالت باصبعه
وشخَتتْ شخِيت
الله يا ربّ
عاينَّا فيها نكُوس سبب
للكفرنة وفورة الزهجْ
من دروة البال الوهيط
ماعودتنا تدس عوج
تكتم فرح
زيْ حالة الزول البسيط
صنْقعْنا في قعدتنا
راجعت الوضوض
دنقرنا عند رفعةْ وشيها
المتعب الجاد الرحيم
الطيِّب السَمِح المعافَى .
رهاب رهاب
ينشاف وسيم
إنوهطت فوق العنيقريب القديم
ومن تاني ضايرت التراب
كُسر العويش الفوقو
شالت باصبعه وشختت شخِيت
وقالت تصدقوا يا ولادي بقيت
أبيبت الليل أفكِّر في التميرات
القُدُر فوق راسه ما خمَّت سبيط
غّلبه الجرورة الفوق ضهرنا تنزِّله
وتطلق وشينا مع الجماعة
إشن دهانا دي كم سنين
والحال وقفْ
قطَّ وحلف
ما فيهو لو نقاط بسيط
كان بوشنا في حش التمور
الليلة دوشنا مع اللقيط
أي لا حِكت
هي ولا بقت |
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: tmbis)
|
قصاصات وقعت من ورق الحيشان:
اجرى معى التلفزيون القومى حلقة فى برنامج عاش من شافك، لم يشاهدها المتفرج لانو التوب وقع من راسى!!!!!!!!
عملها معاى عبد العظيم قمش الصديق المخرج
حاولت فيها اكون صادقة واقول رايى فى الدراما التلفزيونية القليلة الشاهدتها وعدم اعتنائها بهموم المتفرج وقدمت مشهد درامى ، معليش كنت دايرة المشاهد ( العزيز) يشوفنى بحبو قدر شنو...
وعدنى عبد العظيم قمش بعمل تقطيع للاجزاء ( الفاضحة) تصوروا التوب واقع من راس امراة سودانية مشهد محرج؟
يايحى يتفرجوا على المسلسل السورى والمصرى وممثلاتهم (ماشات ساى
ويحرمونا من حب وطننا؟
الممثلات السودانيات واجريت حوارات فردية ثنائية وجماعية معاهن ممتعضات من الخناق وعدم الاحترام...
والبقية تلحق
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: tmbis)
|
مبدعتنا تماضر
كل كلمة وعبارة..تحمل من وطننا سحنة وصفة وعمق...فى أسطر قلائل..أتت رحلتك الحميمة لوطن النجوم...وكأنها من كل حزن دمعة...
أهى بانوراماالتوحد...كيف تسنى لك جمع أحزان الوطن ...من خلال شهقة واحدة؟...من تداعيات رحلتك أعلاه...عشنا كل تلك الجوانب المشحونة بظلم الظالمين...ونتوءات الاحباط على سطح من نشيج ساخن...
هذه شهادة من برق...من خالص الانتماء...وسنبحث عنك طويلا خلف كلماتك الموحية...
وآه من وطن تتنازعه قدرة الجيوب على الامتلاء واللحى على ملامسة الزراير....
لاتفتحى حقائبك....فهنالك فى قاعها...أحزان تتمدد بصوت المفاتيح...وتنكمش بصمت الأقربين.....عليك كسر أقفالها فقط..
لتأتينا بحديث الوطن المقفى ...
تحياتى
ودعزة
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: wadazza)
|
ورقة البشير سهل جمعة سهل:
هو خريج المعهد قسم دراما ود كنبتى..ز وصديقى كنا نتنافس على الامتياز والتميز ونتبادل الحب الزمالى والرفقة...
جاء لزيارتى فى البيت فى لاند كروزر معه الصديق الزميل عبدالله الشيخ
البشير سهل وزير التعليم فى القضارف
جاء ليستلم منهج المسرح المبنى على الالعاب السودانية _ للمدارس الذى اعددته سلفا لانو يريد اجازتو والعمل به...
البشير قام بوضع مشروع تعليم الرحل بالموبايل والاند كروزر، يترحل الاساتذة عبر شريط الشرقى فى محافظات الشرق والغربى فى كردفان ودارفور ويعلمون الطلبه فى الخلاوى الكتابة والقراءة والخراطة والبرادة، حكى لى قصة الصراع الطويل ورفض الاهالى فى البداية حتى انتشار النظام المدرسى الآن وشملو لآلاف الخلاوى وعكوف الاهالى على التعاون مع المشروع بالمال والجهد وكيف ان منظمات اليونيسيف واليونسكو ساهمت فى اخراج البرنامج الى النور، الان بشير سهل يجمع النانين التشكيليين والموسيقيين وانا من المسرح لكى يضيفوا منهج فن وابداع للمدارس النظامية فى منطقة القضارف،
التحية لبشير سهل
وهو بسلم على كل الاصدقاء من المعهد فى هذا المنتدى
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: tmbis)
|
يا تمبس:
هاك بهنس تانى
آه من دلق
دواية فى بحر الصور
البوم عوايل الشمس والافق الحنين
اشخاص تزامل معدنا الاصلى الدفين
والانطباع الاولى مسحور برىء...
اجمل من العرفة المراس
والالفة مخلوق من انين
لمن تغور كل السبب جمعتنا
نفضل نحن بس
مسعانا واقع فى التبس
تفضل اواصر بينا مبهمة
>ى سؤال الموت وكل العشرة هانت ياسنين
ايه الفضل
كيف ننعتق
نعمل شنو؟
وا>ا طلعنا من الفراغ نطلع منو؟
تعريفة وقعت دون رنين!
مشكور مخيتة بالمقاس
لى كل احساس
فى جدارات الاوض والناس
وليل العاشقين
لى كل راحل ضوت اعصابو
الطرق
لى ازمان مكبرتة بالحزن والغربة
لى وقع الخطى المرسومة
شهر عسل حزين
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
يا ناصعه في عتمة نوايا الأنكسار
مرحب حباب رحة الطمي الشانكه فوق توبك فاحت ملت كل البيوت الغادي من الحوش،،
جيداً رجعتي بي شوق الشوارع و شوق بعيد ممكون و صابر،،
في شهوه للأرض البكر، و تانيه للبيت الكنير و تالته للناس الحنان و رابعه لي كل البيوت و خامسه لأمدرمان الثانويه و الاذاعه و سماع هنا أُمدرمان، و جنة الأطفال و جدو شعبان و جحا الحزين، و الساقيه القالو إتهتكت و وصلنا الرقم كم في الشواق؟ كان فكيتوني بسرح،،،
مرحب حبابك يا البنيه الشايله وطن الريد سفر،،، و أنا لازلت أبحث عن جوازٍ كي أعود إلي الديار
سوميتا
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Soumeta)
|
سوميتا
فى سجعك الجميل دة عارفة نبهتينى لاجمل الاشياء
الاوبريت واغانى الاطفال
جميلة
واهمها حاجة اسمها حكاوى حبوبة ولا اسم قريب ليه، مصورة فى متحف السودان واظن الشعر محجوب شريف وفيها اطفال اذكيا وموهوبين
بتروى قصة ناس ترهاقا ةبعانخى.... شغل محترم ويستحق التحية وسط الف حاجة عابسة وصارمة فى التلفزيون، بسمة بكرة وندية
شكرا على رسالتك
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
العائدة تماضر……..
كنا دوماً بانتظار ما تكتبين ونتلهف عليه
…………
فأنت ومن على البعد تمتلئين وطنا
وتغمسين مفرداتك في طينه
ولا شك أنك تستحمين بماء النيل ركنا ..
ركنا من روحك الألقة……..
وتولين كلك
شطر الوطن
وتمسحين جبهتك بعرق محلي من صنع شمسنا..
فكنا نألفك كثيراً
ونشتاقك
فكيف وأنت العائدة
وأنت تنزين وطنا؟؟؟؟؟؟؟؟؟؟؟
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
يتحكر مصيري الهيمة مفدوع الرهاب من طرفى
سهران الطيور بكنى غير وجع النسيج في حرفي
سادر خطوتى الراعيانى تم مرجيحة الوجع نان يكفى
نهرت القافية تنضح منى قولا فيكى كان متخفي
الا اذاك يالصايبانى بالحذر الطليق متدفى
سالتك بالملوك العاطلة امحى العشب من شوقى
وابقى حداى فى الزن الوطيد بتعرفى
ترج الداجة خيم الليل نصب اعوانو
طرق الكاكى فى بابك وليلك مكفى
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: atbarawi)
|
ورقة بهنس:
بهديك الفوضى
شجار طفلين فى ساحة روضة
بهديك الغربة
هتاف الموتى وصمت التربة
بهديك حزنك
ستات الفول اثناء الخمشة:بعد اذنك
باهديك طلة
لى بيوت الخيش وخيم تفتيش
واسواق ارخص ما فيها حليفة الله
بهديك مرة
الاعبك فيها بالمعدن اقول
حرية احبك ولا اغمد شارع يربك
تسقطى طرة كتابة مجمرة....حرة
باهديك الليل
البين جبلين فقدك... لقى ديل
باهديك متمرد
والنيل فى الجركانات باعوه: برد
باهديك ولاشى
واقطع
وديان
السهو
مشى
بهنس شاب متعدد المواهب ...مثله الكثير من الشباب اوجدتهم سنين غيبتنا ... واحرقتهم مجامر الوطن فخرجت اشعارهم ترابية اللون يومية التناول حزينة ومعبقة بنفح الواقع..
اهدانى دفتر اشعارو ... وآملا فى ان ابلغكم عنه التحايا
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: dreams)
|
اوراق لم تصدر:
لم ار رقصة عروس
بيت زار
حمدالنيل
معهد الموسيقى والمسرح
لم اخرج من العاصمة
لم ار شرحبيل احم
ولم ازر محمد الامين
وسعاد احمد ابراهيم
طلعت (كشفة جديدة ) اسمها سجمى القرد
والنبق النبق
والكلمات الطقشتنى فى خشم باب السودان هى
الجمرة الخبيثة... لشراء الكهربا فى صورة كرت
ويسمون كرت التلفون الموبايل شريحة
ويقول ليك حاجة مشفرة اى بها شفرة
وجودية وكلمات غريبة نسيتها للفاع الشعبى
ولغة الشارع بقت مختلفة
لى....
الحقوا
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: الجعلي)
|
ايتها العظيمة المترعة استاذتنا تماضر
هنيئا لك شوفة اهلك وهنيئا لصحبك كم الالق الذى نثرتيه عليهم واريجك الطيب الذى عبق سماوات وطن يئن من ظلم السنين
اقسم لك أن أسئلة الاخ المبدع يحى واجاباتك عليها ابكتنى الى حد التنهف
ساتابع الفرح الحزين فى سكنية وتمعن وانا اتخذ ركن قصى فى المسرح
واصلى فى سردك الممعن لما وجدتى عليه الابداع والمبدعين فى بلادى واجهزته التى تحرسها الدبابات خوفا من اذاعة بيان فى فجر يوم منتظر
لك التحية ام سارية ومتعينا بما اوتيتى من هبة فى تصوير المشهد
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: khider)
|
ملف العيد
حثيثا... ها انا اعدو.. من الرمضاء للنار... بعيدا عنك يادارى
ها انا ذى انتحب ثانية
.....................
واجتازت وفود العشيرة عتبة الباب الموصد،
وتقاطعت اصوات السلام وفرطقة البوبلين والدبلان والتوتال من الجلابيب البيضاء النظيفة والعمائم المنمنة الاطراف ،
مع اصوات البلونات والصراخ البريىء، ومسدسات الهواء والخيلاء الطفلة
وتتوارى خلف كل رجل وطفل سعيد، امراة
حين عكفن على المنازل بالتنظيف وعلى الاطفال بالقبلات وعلى الابناء بالدعوات وعلى الحياة بالايقاظ من السبات
وسكتت الجوامع عن التكبير المملح بالتقوى والفرح والتذكير، واخرجت الارض حلواها وتهانيها بغبطة المهرجان المشرب بالزهد والبساطة
افتقدك اليوم يا وطنى ويا بيتنا الكبير
افتقد جيرانى واهلى واصدقائى واحبائى
ممن عطرونى بالدفء والتهانى والامانى الطيبات
كل عام وانت وطنى
اشتاق لحضنك الدافىء وترابك الاغبر وسماءك الرحبة
وحبك السرمدى
واصابع النيل تداعب ثرى الصحراء منك وتتخضب بالنخيل وتتجرتق بالغابة والعشب
احبك يا رحم الام يا وطن
وكل عام وكلكم بخير
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
سلام اخت تماضر
و كل سنة و انتي طيبة
اقترحتي سابقا فكرة التقاء اهل امريكا في سودانيز اونلاين....ما عارف الفكرة لسه قايمة و للا حصل تنصل..افتكر الناس ممكن تتلاقي في نهاية السنة ديا او بداية السنة الجاية...الناس دي كلهافي انحاء العالم اتلاقو زمان و اتلمو عدا ناس امريكا، افكارهم بطيئة شوية في التنفيذ
و نسمع برضو من الاخوان
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
أزيك يا تماطم يا غالية والله الف مليون حمدلله على السلامة
وربنا يخليك لينا والله ضربت السودان اتكلمت مع زوجة اخوى حكت لى قصة قطعت مصارنى بالضحك
عندى جدى كبير مخرف شوية قالو وقعت الجريدة بتاعت
الخرطوم فى ايدو شاف صورتك فيها قبض الجريدة وقال
لىود بتو القاعد جنبو ها شافع البنيه الحلوة دى منى
الناشرنها فى الورقة دى قالو ياجدى دى تماضر شيخ الدين
الفنانة قالو وخبارا مصورنها قالو عاملين معاها لقاء
مالك انت بتسال يا جدى بتدوربها شنو قالو آجنا ماتشوفا لى
آبتاخدنى قالو حبوبتى راقدة بين نايمة وصاحية نط على
طولا آرجل ياخدك العطش
طبعا الاتنين فوق التمانين والله قالت لى مانمنا من الضحك
مرة تانية حمدالله على السلامة
اخوك دوما ودالجعلى
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
تـماضـــر..
عـفوك،
ضـاق الخـيال، وقصـرت معاي مداخل الكــلام، وما لقيت حرف يحـتوي القــول..
لكــــن ، مـن ياتـو حـرقة مـرقتي يا بينة ها..
و شـقيتي عـواتـم اللـيل..و الـويل ..و السؤال/الشوق؟
ومـن ياتو حـرقة تـورتـي ..براكين الجرح الهـدار، اللي ادعى الخـفوت..ونام؟
الكـــلام ، سـكاكين ..يابنيـه
سـكين مملوحة، غارت لحـد النصـل وفجـرت الدم/الدمـوع
"أمــــي مافي"
ياربـي، كـم زول ح يتسرب ،ونحن مشغولين بعد النجوم؟
و ياربي "رجل أمن النظام" ده ،أصلو ما مـمكن يكون مافـــي؟
هـم يتـسربون، الجـميلون،
ادانـة صـامته، علي عدم احتـمال الغربة داخل الوطن..
القـهر جـرح، والجـرح يابنيه ـ خلي بالك ـ لسه فاتح!!
ثـــم، توبـك وقـع؟ سـبحانك يا تعــب..
توب عرض الوطــن وقـع ، ومـافي شعرة اتهزت..التقـول وقفت فيـكي انتــي وبس..
ثـم، عقــد النجـيـمات، اللســه بيلمع فوق سمانا/الوطن..
قرني،سعد،جمال حسن سعيد، أب قبورة،جلود ..كلهم ،كلهم..ما أجملهم..
ومـن ياتـو حـرقه، مــرقـتي..
منذ تـموز1989 ،لحـظة أول جهد قـدمـته في أول تأبين للعميري، وأنا أكتب القصـاصـات الخجـلى لايـمان محمد الحسن، قصاصات عن الصـدق لـما يبقى عزانا في مقاومة التسرب نحـو الأفـق الشــهيق..
ألـم يكن العمــيري، هـو سـيد الـمتسربين طـرا، حـزنا علينا وعلي قوادم الأيام وحـوفرها السنينه؟
ثــم،
غلبـني الكـلام..و فاض بي..
ســلام لايـمان، في الرائعين أفق من الوفاء..
و في تـموز الفات، بلغت القـصاصات احدى عشر قصاصة من الحزن..احدى عشر قصاصة من السؤال ورمـضاءالتذكر ..احدى عشر قصاصة من التعب ومصاقرة الجنون في مدن الصقيع الحالكة..
و لينا عودة تاني،
و حتى ذاك الـميعاد ..تأكدي يا بنيه، لينا الله وعيشةالسوق..
و في أحـسن الأحـوال : حابسين الدمعة بالصــنقاع..
و مـن..ياتو حــرقة ، مـــرقتي؟
ودمت
محمد النور كبر
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
ورقة عقد الجلاد:
عندما رآنى عثمان النو فى وسط انفعال السلام واللقاء فى الاذاعة وسط عشرات الزملاء، من بعيد كان يردد بصوت عالى وكانى بقابلو كل يوم: تماضر شيخ الدين دى الليلة فاطرة عند ناس عثمان النو،
وانتبهت لجملتو اللايووقة، وقلت ليهو لا تماضر شيخ الدين فاطرة عند ناس شيخ الدين
ولسه ما سلمنا على بعض هو يلح بطريقتو الباردة : لا هى فاطرة عند ناس عثمان النو،
انتى شفتى لوران عثمان النو؟
اقول ليهو لا، يقول لى طيب خلاص انتى فاطرة عند ناس عثمان النو... انتى شفتى نجوى عمورى جكس كيفن؟ اقول ليه لا، خلاص يبقى انتى فاطرة عند ناس عثمان النو...
وهكذا ... وعندما بدينا نتسالم كانت اتفاقيته قد برمت وقتلت برما ، حضر المواصلات ووصف البيت، جيران الصادق المهدى كان مالقيتيه دقى باب الصادق المهدى وقول ليه بيت عثمان النو وينو....
المهم مشينا الفطور وكان جماعى... عقد الجلاد كلهم وماشين حفلة فى دار الفنانين
ومشينا الحفلة، طبعا بعقد الجلاد، لوول
يا سلااااااااام على جرعة حفلة بعقد الجلاد تحت سماء الخرطوم بالليل، بعد حداشر سنة غربة،
بكيت وفرحت ورقصت وبشرت وكنت الوحيدة الفايرة والناس علاقتهم بالحفلات اتغيرت؟ ولا فترانين؟ ولا ما بحسوا،
الناس اتغيرت يا جماعة ، الشعب السودانى ما طيب...
المهم
عقد الجلاد ، ثبات واداء ومعرفة بادوات فنهم
من القدام عوضالله وزوجتو حوا
وشريف شرحبيل
وهو، عثمان طبعا
الباقى... مهندسين ومحامى،
وعقد الجلاد
واحة فى صحراء السكون
ومحرض خفى للتجمهر ضد الخنوع والانكسار
بحر ثورة بشق عتامير الطأطأة
وحب للحياة
شكرا ياعثمان النو على فطورك... ونجوى عمورى دى ورقة تانية
واحلى زول لوران
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
سلام مربع
للناس الحلوين
اللي هنا
تماضر
حمد الله علي سلامة الرجوع
ماعارفة ، لكني اتساءل
ما علاقة حرفك وحالات الشجن التي احال اليها
لحد النواح ..
قبلها كتب يحي فضل الله في الخرطوم
قصيدتك
عن امك
قراتها حتى انداحت فيني ترجني
تقصفني حته حته
وتعيد انسجتي من تاني
وهانذي اقرأك
وانت تنقرين على انسجة كانت متحينه للبكاء
ربما تعزيني ، او تطبطب علي
تشهد اني لست مايرام
احتاج لهذه الوسادة التي ينام
عليها الوطن
احتاج لهذا الحزن الذي
يمتدد في ملاءة
هذا السرير الكبير الذي
كسروا (رجلينه) واحضروا اليه حجارة
كيفما اتفق (يوقونها) به
احتاج جدا لهذه الاحلام التي تفر من رؤسنا
مع كل طلقة تطلع من (بنادق)يشترونها
بتعبنا ، بشقانا ، بهمنا،
بقوت اباؤنا ..
احتاج لهذا الحضن الكبير
الذي لغموه بالف وعشرمائة
لغم حتى لا يعود يضمنا
اليه .. ينشر حولنا الامااااان
احتاج جدا حد البكاء والعويل
لهذا الاماااان االان
فمن يمنحنا ايااااه
فليعطونا اياه
ويشتتتوا في ستمائة الف داهية
الهي ما يوعوا ويقوموا منها تاني
ااااامين يارب
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Elmosley)
|
سنوات تمضي ..ونفسي تلك العنيدة يا تماضر تمنيني بساعة العودة ولقاء الأحبة.. اليوم فقط هزمتها بعد أن طال إنهزامي أمامها هذي اللعينة الغربة ...أتدرين كمُ ما قد مضي من لحظات بحثت فيها عن وطن ...ظمأت فيها لذاك العظيم الذى لم أرتوى منذ أن فارقته ؟؟؟.... وجدتني اليوم أرى كل ما قد أفتقدت بعيونك التي رأت الأرض الحبيبة حين مشت خطواتك فيها... أشكرك كثيراً على هذا التصوير الرائع وهذا السرد الأروع
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: bitalneel)
|
ورقة نجوى عمورى
خريجة المعهد قسم العرائس
تقدم برنامج تلفزيونى اسبوعى بالعرائس، لللاطفال
تبهج اطفال الحدائق فى كل جمعة بعروض مسرحية بالدمى
تشارك فى اقامة حفلات اعياد الميلاد باستخدام مسرح العرائس والشخصيات التنكرية
تشرك اطفالها معها فى تصوير الشخصيات وتقيم لهم عالما اسريا مبنيا على حب الاخرين
زوجة عثمان النو، الموسيقار المعروف
احتضنتنى بالضيافة وحكت لى عن همومها وحفرها فى الصخر من اجل اسعاد الاطفال
لها التحية
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
تماضر زيديني عشقا زيديني "كلميني عن اخيار المسرح
كيف هي المواسم مازالت تسيطر عليها نفس الشلة
اما زلو يغلقون الابواب في وجه الواعدين خوفا من نجاحهم
مازالو يطبخون المؤامرات خلف الكواليس .
من يفرد اشواقه على الخشبة ؟ اما زالت الهام تجافي المسرح والحركةل المسرحية بسبب القرف .تماضر ناس المسرح البنعرفهم كلهم هاجرو ولا ركبو الموجة ولا انزو "
قبل مدة طرحت للمسرحين بوست في سودنت لاجمعهم فيه واعرف منهم الحاصل
لكن لا حياةلمن تنادي ومات هذا البوست في صدري ؟ طبعا انت يا تماضر ما حضرت لمن فنشونا بالاجماع بالذات ناس المسرح واظن معظمهم رجعوهم
بشروط لا ادريها لاني بعد داك سافرت اول التسعينات
سافرت السودان مرة واحدة بسبب مرض امي ولم اتمكن من لقاء احد لان ها كانت سفرة قصيرة
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
يااا،إنيييي ،،كدي أمهليني ثواني حتى إستجمع انفاسي وأرتب ما احدثتيه من فوضى لي يومين بقرأ ومرة اضحك ومرة ابكي ومرة تغلبني القراية ،،جهجهتني عبارات والعبرات بدءآ بي امي مافي صلبتني في حائط مبكى ،،وتتوارى خلف كل ........وعلى الحياة بالايقاظ من السبات ،،المجد للنساء الامهات ،،والامهات الرجال وانثى ولا دستة رجال وكل مقاطع الحياة لك ،،لها وللخرطوم دمعتين وللوطن آلآف الدموع الاوراق شفيفة وماتعة وإستعادت للذاكرة وجوه واحداث ومشاهد ،،،الوطن ياتماضر بخير كنت هناك لمدة تلاتة شهور حتى مابعد عيد الاضحى ،،وغصت عميقآ قابلت وسألت وناقشت على مستويات متعددة وادركت ان ما بدألك من الخوف وطاطأة الروؤس كاد ان يخدعني انا ايضآ ولكني بعد ما تابعت اشياء كثيرة من ضمنها ما ذكرتيه انتي عن غازي سليمان والإستفادة من هامش الحرية في الجرائد وما تذخر به من مقالات جريئة ومحاولات مصطفى الخليفة وزملائه لإنتاج اعمال مسئولة ومستقلة وأضيفي لكل هذا نشوء جيل تفتح وعيه تحت هذا المسخ وبرغم مندة معظمهم الغالب يحمل المشروع الوطني الديمقراطي رايتهم في المنتديات التي تعج بها الخرطوم وهذا دليل عافية آخر وهاك منتدى الخرطوم الثقافي في مجمع طلعت فريد الذي ينعقد كا إثنين ويأمه عشرات المبدعين ،ومنتدى الخرطوم جنوب الثقافي وفيه مغنواتية تمام يستلهمون مشروع مصطفى سيد أحمد ،ومركز عبدالكريم ميرغني ، ومركز الدراسات السودانية حيدر إبراهيم ورفاقه هذا+المكتبات التي تفيض بالكتب الجادة دار عزة ومكتبة الشريف وآفاق جديدة ورايت فيها اعمال ميلان كونديرا والاعمال الكاملة لمظفر النواب وفاطمة المرنيسي وماركيز واركون و......إستمعت لما صار يسمى بالقصيدة التسعينية عدد من الشباب يقارب المئات يكتبون شعرآ رهيبا كلهم في الداخل وفرقة سيمفونية تضم شباب خريجين من كلية الموسيقى والدراما اكثر من 25 شباب من الجنسين معمهم يعزف على كل الالآت اعادوا توزيع عدد من اعمال مصطفى ,,ووو والملاحظة الرئيسية هو إنعطاف الشباب ناحية التنظيم وثقتهم في جدواه وضرورته لتاسيس وطن ديمقراطي الجماعة الكحيانين ديل اتاري راقدين لهم فوق رأي واسوق لك مثال ليلة رأس السنة كانت الخرطوم مثل خرطوم الستينيات واكثر شباب باعداد هائلة في منطقة النوادي قرب المطار وكل الشوارع الممتدة للوسط والاطراف خاصة جنوب الخرطوم نمرة إتنين وتلاتة والديم وماخلفه شباب في العربات وراجلين يتراشقون بالمياه وغيرها وناس الجبهة غتخلعوا وعبروا عن صدمتهم في عدد من المقالات وكتب راشد عبدالرحيم انه لايصدق ان الشباب ديل نشأو في عهدهم وإعترف بالفشل يا تماضر هذا الشعب عبقري فإتصبري شوية .
| |
|
|
|
|
|
|
|
|
|
Re: بين بنت الازيز..ملتوف الشوق... واندلاع الوجد.. انا انز وطناً (Re: Tumadir)
|
والله كل القلتوا صاح بل احجمت عن ذكر تفاصيل كثيرة تؤكد عظمة هذا الشعب وقدرته على تجاوز كل الكوابح التي يضعونها لتاجيل القادم الذي حتمآ حايستعيد الوطن الذي نعرف ،،،شيء واحد أقلقني هو موقف من ناقشتهم من ألأخوة الجنوبيين وعددهم18 كان 13 منهم مع الإنفصال وبالمناقشة أبدا 2 من ال13 إستحسانهم لوجهة نظري ،ولا اكتمك إنها كانت لاتخلو من إنتهازية بأنه طالما الجنوب مضمون ليكم بلا منازع فلماذا تصوتوا للإنفصال وتهدروا فرصة المشاركة في حكم الشمال ويكون لكم الجنوب فقط وهو في كل الاحوال لكم بخلاف ذلك فإن المستقبل للمشروع الوطني اليمقراطي عدد المنادين به في إزدياد وسط الشباب وخاصة وسط الشلبات وعموم النساء ولاتندهشي لذلك فالمرأة وجودها قوي جدآ في النشاط العام ومكاتب الدولة والمحاميات حتى يبدو ان عدد النساء في الشارع ضعفي عدد الرجال ديل إمكن ماتوا في الحرب أو غابوا في الشتات في نزيف الهجرة وهذا تعرفينه احسن مني .
| |
|
|
|
|
|
|
| |
Tumadir
Ahlalawad
almohndis
نصار
Abomihyar
قرشـــو
Mandingoo
منعمشوف
yasiko
tmbis
Soumeta
atbarawi
بت قضيم
عزيز
الجندرية
alsngaq
Al-Masafaa
اسامة الخاتم
AbuAla
khider
Ishraga Mustafa
MOHDY
WAD ELGAALI#4
أحمد أمين
Kabar
shiry
Elmosley
bitalneel
عشة بت فاطنة
أبو ساندرا
فيس بوك
تويتر
انستقرام
يوتيوب
بنتيريست