|
|
 عائشة مبارك من بيت بت المنى بت مساعد... الى حوش بكرى الالكترونى... ممكن؟؟؟؟
|
العقد المعهد موسيقى الذى ظل يتقاطر ماسة بعد اخرى فى صدر المنتدى، مؤخرا
سيزدان بفاروظة حمراء ملهلبة، ثمينة
اسمها عائشة مبارك
افترقنا ونحن نلم بروش وفرك مسرحية بيت بت المنى بت مساعد خلف الكواليس،
كانت ميمونة العانس احدى بنات بت المنى، هى لقطتنا التى نستمتع بها فى الخشبة قبل ان يستمتع بها الجمهور،
فحين تاتى فى خلوتها، وتكشف عن المرآة وتعد شيبها المتجمع فى خيبة بورتها وتتراقص مغنية اغنية العروس وتحلم بالفارس الذى لن يات ابدا، تغرق الصالة فى الضحك، وياتى على اثر ذلك تصفيق عميق، يكشف عن متعة الاداء وجودته، ولم تكن تلك البايرة الخلاقة الا عشة مبارك
عشمبيرق، نناديها نسبة لزوجها بيرق.
كانت تناكفنى الصدق والصداقة
وعندما اسميت ولدى سارية اسمت ابنتها سارية
وعندما انقطع عنها تحلم بى وعندما تتحدث عن السياسة تحرض السكون نفسه على الثورة
وعندما تقدم بحثا تجيد سبر اغوار الموضوع وعندما يتسلى الزملاء ويحكون عن زول الله
المهود
التلقائى
العفوى
الجميل
فتلكم هى عشة مبارك
قارئة فار كتب
عندما لفظتها الاوطان
اتخذت انتاج الفيديو والتصوير عملا لها،فى مسقط، تضع فيه روحها الخلاقة فى محك التجربة
فيا بكرى ابوبكر
اسال يحيى فضل الله وعادل السعيد
والموصلى وبدر الدين شناة وحمزة سليمان وبكرى سمندلاوى والصادق شيخ الدين ،
وكل المثقفين والحتادبين عليها
عن عائشة المبارك
وافرد لها مساحة فى حوش الاليكترون الذى بنيته لنا،
والتعبير من يحيح،
تدخل ولا ما تدخل؟؟؟
|
|
 
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
لك التحية والتجلة عزيزتى تماطر وانت تتحدثين عن عائشة المبارك والتى نعتز بنشاطها المميز فى النادى السودانى بمسقط ..وقبل عام بالتحديد ونحن نحتفل بذكرى الاستقلال اخرجت لنا عائشة المبارك عملا مسرحيا رائعا من رواية ضوالبيت وكان ذلك العمل حديث الجالية السودانية بسلطنة عمان ..ويستعد النادى السودانى بمسقط هذه الايام للاحتفال بهذه الذكرى فى نهاية هذا الشهر ومن الاقتراحات التى تقدم بها الكثير من اعضاء النادى ان يعاد تقديم العمل المسرحى الرائع الذى قدمته عائشة المبارك فى السنة الماضية .. التحية لك عزيزتى تماضر وللأخت الكريمة عائشة المبارك ولحواء السودانية فى مشارق الارض ومغاربها ..
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: الجندرية)
|
المبدعة لدرجة العوارة تماضر
دعينى ارحب بعشوش واعزيها ونفسى فى رحيل الرائعة نعمات هارون والذى سيبقى فوق قدرتى على ان اصدقة واقرة حتى اشعار اخر.
وهلا بعائشة فى هذة المساحة التى تزداد كل يوم القا بجهود تماضر
ورغم مخاوف العزيز بكرى سيد الحوش.
وللذين لايعرفون عائشة لهم ان يعرفوا انها بشر استثنائى ونادر..
خاضت تحدايات اجتماعية من اجل قيم سامية ولم تابة بما دفعت من ثمن نيابة عن الجميع.
مارست العمل السياسى بنضج وولجت عالم الابداع بحب واعطت فى كل ميدان بلا حدود وجملت بعفويتها وهويدها كل ما حولها ومن حولها
فلها التحية والترحاب ومرة اخرى شكرا لتماضر التى نبشت حتى اتت بها فهل من مزيد. عادل السعيد
| |
|
|
|
|
|
|
|
|
 Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
شكرا تماضر
حباااب عائشة ما تصدقى لما قريت البوست المنزلاه تماضر كيف فرحت ..قعدت اضحك قلت نحن امس كنا بنقول فى شنو يا بت المبارك ..لكن سبحان الله القلوب شواهد .. تعرفى يا تماضر طبعا عائشة مبارك من اقرب الصديقات لى ومعرفة قديمة جدا فى بلد الشتات ..وصحبة عمل وووو كتير ..بس كلو كوم وانسانيتها وقلبها الابيض ونضالها كوم تانى ..مثال للانسانه العتيقة المعتقة بت البلد المكافحة ..ربنا يديك حسب نيتك ..وافتكر يا عائشة جيتك للبورد دى الليله بتستاهل ليها جية فى البيت وقعدة كدة بى مزاااج معها كباية شاااى عشان تشوفى الوعدتك بيه يلا انا فى انتظارك ...تماضر اتفضلى معانا
| |
|
|
|
|
|
|
|
|
 Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
واسط العقد المتالقة بجدارة حبيبتي تؤم روحي
الغالية بت شيخ الدين بت علوية بت همرور
بيت الكرم والجود " هذا ليس تغزلا في صديقة عمري
انما حقيقة والذي يبحث في مناقب بت شيخ الدين يؤلف كتب ولا يوفيها حقها "
تماضر حقيقي عاجزة عن الكلام مفاجاة هذا الاحتفال وهذا العقد الفريد
الذي نظمتيني ضمنه وطوقتي عنقي به .والله يقدرنا على صخرة سيزيف وشيلتها .من
بيت بت المنى بت مساعد والى حوش بكري ومن المسرح القومي الى مسرح بكري الاليكتروني والله يخلي بكري ابقى لينا شارع ومسرح وغنى .
بيت بت المنى بت مساعد وعماد الدين ابراهيم ويا حليلو بشناتو ليه وحشة شوق للشينة لو صعبة " والسبعة بنات البايرا ت الحرقن البمبر نادية وفايزة وغالية وسامية وسعاد الدوش وبنت المنى بت مساعد تماضر شيخ الدين اروع من يقف على خشبة مسرح حضور وجمال هيبة وجبرا "وبالتاكيدا لم انسى العميري وصوته الندي وجينا نخت ايدينا الخدرة فوقك يا ارض لطيبين" حينايهبط فينا بروحه الاورفية وضحكاته التي مازالت تتردد فينا وتذكرنا بفداحة الفقد " عميري الفرح الذي غاب ليحضرنا حزنا ويلبسنا السواد" ايامـــــــــــــــ لها قوافي بس يا خسارة ومن ناس ديل واسفاي "وا...
وحات الخوة يا تماضر انت الليلة فرحتيني فرح ما مصدقة انا بتكلم معاك اللهم اجعلو خير " وصبحتيني بصوت رشوية الجميل سلي عليهامازلت
وهي حاضنة كراسة الكيمياء وهي تستعد للامتحان هي وعشة اقصد عشة رشا يا حليلهم كفاك بري من الصباح
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
خاص /العزيز بكري
بكري يا رهيب اكيد قاري افكار اعمل حسابك انا قادمون
بكري حقيقي الكلمات ااصغر من الموقف انت جبت لينا المسرح وشارع النيل ولميت شتات المسرحيين الذين شردهم التتار واسدلوا ستارهم في العنفوان "ها انت تجمعنا في مسرحك الاليكتروني والقومة ليك يا وطن والانحناء لبكري ابو بكر وتحية مسرحية وصفقة من الجمهور يلا ياجماعة تماضر وعادل ويحي فضل الله والسماني لوال وينك يلا قومة للجميل بكري
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
استاذنا الفنان الموصلي مرحب بيك الف يابستان
شايل ابداع ودافق غنى " منورة بيكم رغم الضلام
اصلي جاياكم شايلا كمية ظلم تتطفي انوار المدن
وتسو حريقه..
نصار مرحب بيك وسلام على كل الابواب البتجيب وتودي للجميلة تماضر
سمندلاوي اهلا بيك يا اجمل بشارة وشوق واصل ليك ولاهلي الحنان وللبنطون وللغنمات والبهمات ولبنا مقنن فار وادفق وبعد دا عشا الشفع وكفانا شاي " وشوق لناس امنة بت الشول وناس قدورة وناس البيتي والعمراب والذيداب والقبتاب والسناب فريق قدام وفريق ورى وحي السوق وسوق اللبن وسوق الشمش الطاحونة والافران وناس خالتي وفريق الجنينة والكماين والجناين المدارس والداخليات والجوامع والدراويش واهل الله الغبش وقبة الشيخ طه وبس نجر نستلوجيا وحنين ليكم يا اهلي وناسي
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
شكراليك يا شلي زي مابقولو ناس الخليج وفيت وكفيت
وانا حاضرة لكل احتفالاتكم يااعز اهل في الغربة وعقبال الاسقلال الاكبر
يكون في السودان .
الجندرية الف مرحب بيك
male or female?
اعمل شنو كلكم لابسين طاقية الاخفااظهر وبان وعليك الامان
اسماء الجنيد تحية وسلام لرفيقة الحجارة المكافحة
في البلد الهجير "الحجارة دي كناية عن الجبال المحاوطانة
كل يوم الواحد بكتشف فيك انسانة جديدة احييك .وشايك مشروب يا كريمة
الشوق ليك وللاولاد وابوهم .
منعموف هذه هي صديقتي تماضر بت شيخ الدين الاصيلة البتعرفوها
بس تماضر شيخ الين دي* عليها تفاصيل لو قريتوها ماعندها مثيل في كائن** وعليها جنس هوامش منسية لوطلعت بيوت و جناين*
شكرا على الثقة يا حكمة والله يقدرنا على المسؤلية
الزول ذاتو الله يسلمك واخليك يا سيدي
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
عادل السعيد الجميل الشين "حقيقي ما مصدقة
عادل وينك صقيع ولا هجير
انا اتحدث مع اصدقائي اذن انا موجود "
وجه الصباح انت يا عادل " شفت الغربة كيف بتجهجه وتخلي الواحد ابقى رقيق " كيف " يا حليلك وحليل الونسة الصباحية في حوش المسرح الونسة الدقاقة خاصة الليلة انا حافقد سوائل من الدموع دا شنو يا تماضر دا حنين فظيع الواحد كان مفتكر ان دموعة اتكلست من بياخة الاشياء واليوم الواحد يمارس حقو الطبيعي في الحياة فعلا الانسان من غير اهلو وناسو ميت ولا يسوي شي .
نعمات رحلت يا عادل رحلت بطموحها وجمالها ورحابة خيالها رحلت وهي عاشقة للذرى ومفعمة ب الحياة يالله من نعمات نار ما حتبردالله يصبرنا الجميع .
اكتر شي في خيالي منك ابتسامة انشاالله ما تكون ودرتها " والبتراري دي ما تقول لي الصلعة لا لا نحن لازم نعمل ليك زراعة وبمناسبة الصلعة انشا تكون عرست وجبت ليك تيراب .
الخواض اهلين طوالي ولا يهمك بس اسلاكك وعدتك ورى الكواليس
الاخ العزيز يازول
والف مرحب بيك
شكرا للضيافة
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
سلام وافرشباب الازرق الدفاق
سلام وافر حبايبنا وندايدنا
سلام اهلا رفاعتنا
رفاعة العز جمال ونضار
حضارة علم تاريخ عمار ونضال
اهلا بالغالي ابو مهيار
والازرق العاتي مرحب بيك
الواحد فرحان بريحة البلدوحيران
مع منو بتكلم ياريت اعرفكم وسركم في بير
مدفون هناك في البير الجمب شدرة ود الحاج
القطعوها اعداء البيئة والزكريات الجميلة
البوس الرائع ود البلد
اشكرك على الاحتفال والاغنية الجميلة و على الصورة الجميلة
حقيقي انا اليوم سعيدة بيكم بشكل ما عادي
وانشاء الله نتلاقى في ظروف ارحب في سودان اجمل
العزيز بكر ي
مشروع المسرح انا موافقة عليهو والمديرة تماضر شيخ الدين
ونسميهو مسرح الاحلام اتخيل انو رجعنا السودان ومديرة المسرح تماضر شيخ الدين اتخيل الحركة المسرحية حيكون شكلها كيف ياسلام يا بلد لو كنت في يد ناس قلبهم عليك كنت البرنجي في كل شي.
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
يا بت المبارك
يا ريحه من عبق الماضي الجميل خلاص استلموكي ناس المسرح ونسيتي زملان الشقا واركان النقاش بحوش الفرع عندما زارتنا شقيقتك الصغري بهولندا قادمه من المانيا استرجعت معها شريظ تلك الايام الخوالي كم اسعدني انك لا زلت تمتلكين تلك الروح المتمرده رغم المحن
لي قدام
وشكرا للرائعه تماضر التي عودتنا علي الاندهاش في زمن لم يعد فيه ما يدهش
احمد عكاشه محمد
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: almohndis)
|
يا عشة بت المبارك
همبم الود وكثيف المحبة والتقدير
كلما ما اغيب عن البورد يوم او يومين اجد هنالك مفاجاة تنتظرني ولكن اعلن ان عاشه اكثر من فرحة
حتما ساواجه بها هذا الليل الابيض ساتقافز فرحا بها وانا في طريقي الي البيت بعد قليل حين تغلق المكتبة ابوابها وامد لساني لجليد اتاوا الكثيف فعاشة المبارك تملك ان تعيرني دفء طيبتها ونقاء سريرتها وحلو ما كتبت ترحب بترحابها
قبل قليل كنت اتون مع السماني لوال المقيم بمدينة فانكوفر و جات سرة عشة المبارك وبيرق و عمر وسارية وغني لي السماني اهزوجته التي كان يغنيها لسارية بت عشة وهي صغيرة
ما تبكي يا سارية
انت بت فالحه
حكيت لسماني طرفة تخصعشة المبارك بطلتها مهجة عبد الرحمن الممثلة التي شاركت احمد ذكي بطولة فلم البيه البواب في دور زوجته فقد كانت مهجة زميلتنا في عامنا الاول باامعهد والحكاية انها جاءت الي عاشة واخذتها وبحذر شديد عيدا عنا قائله اسمعي يا عاشة البنات في الداخلية بقول عنك كلام وحش
وحين سالتها عشة عن ما يقال بخوف من نميمة اخلاقية ردت
مهجة ديل بقول عنك شوعية
يا موانا
سلام يا عشة
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
يحي فضل الله درويش المسرح الغيب قوي الحضور
مازلت تفترش الحروف وتعانق نفس الكلام " وتشق الجليد الى المكتبات
اهنيك بنفسك يا يحي وامسك الكتاب بقوة "السماني لوال ود الدينكا الجميل من خط الاستواءالى اقصى الصقيع السماني يا دفء شموسنا"الاستوائية اما ذوبت جليد فانكوفر بحرارة روحك وقلبك
"فرح الجنوب المنسي "ام زلت تحكي في براءة الاطفال وترسم الاحزان غنى
مازلنا نتغني باغنية سارية انت وديرك والرشيد وجلسة في ضل العصر في بيتنا الكان في حي الضباط وكباية شاي وونسة من القلب الى القلب
يا حليل زمان وايام ازمان :
ماتبكي يا ساري انت بت فالحة
ماما مشى الشغل
عشان اجيب قروش
لمن اجيب قروش
ماما بجيب لبن
ولمن تشربي لبن
سارية بتكبري
يحي قول للسماني سارية كبرت وقبل اسبوع فصلوها من جوازي لاول مرة
عشان تسافر السودان للجامعة شفتو الظلم انا جيت من السودان ومعاي اولادي الاربعة "عمرو سافر المانيا وسارية سافرت بس باقي لي رانيا ومدثر شفتو الحاصل علينا دا شتات عديل اولادنا ينجعو قبل الاوان
الله يجازي الكان السبب . مافي داعي للمواجع مع السلامة .
التحية لشعب بيرجمان لحدي مهجة في مصر التحية ليك السماني لوال وديرك والرشيد احمد عيسى لتحية للذين مازالو يدافرون في بلد الفجيعة " للذين غيبتهم الغربة وللذين غيبهم الموت وتحية للبلد وناس البلد وشارع النيل والمسرح القومي وانشاء الله اعمر بيكم من جديد" سلام يحي ليك وللاولاد .
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
الجندرية طلعت اماني عبد الجليل يا هلا بناس ديم البحر
اساس العلم والحضارة وسلام ليك ولمحمد عبدالجليل ولاولادك وابوهم
بس بعد الرص دا ماتتطلعي اماني بت اختي "
المهندس مرحب بيك وباستاذنا الموسيقار الماحي سليمان وانشا الله عقدنا اكبر واضوي في جيدك يا وطن .
اهلا بالغالي ود الغالي
انشا الله منور بيكم رغم الضلام
احمد عكاشة اهلا بيك وحبابك يوما سعيد الليلة
جابك وخلانا نسمع عنك .ما اجملني بكم اليوم وما اجملك يا تماضر لاتحافي بهذه الشموع المضيئة .طبعا ما نسيتكم ابدا وايام الفرع بخيرها وشرها وناسا الحلوين والشينين ايام ما بتتنسي ومع قصر الفترة العديته معاكم كانت فترة ثرية مرت بكل زخمها وجمالها وينك انت حسي وانشاء الله اشوفكم واسمع عنكم تحياتي لكم جميعا وابقو عشرة على المبادي
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: عشة بت فاطنة)
|
اهلا ومرحب بيك وحقيقة كان للاستاذة تماضر خاطرة بان التقت مجموعات السودانين فى الشتات فى شكل مجموعات مجموعة المهندسين والقانوينين والاطباء والفانين وخططوا شكل بناء السودان الجديد ومن ثم كان حلم الرجوع.. واعتقد بدات مجموعة الفنانين من مسرحين وشعراء وفنانين ومبدعين بشكل عام فى حوش بكرى واعتقد هذه بوادر جميلة ان يكون ذلك التفاعل بين المبدعين وجمهورهم لان الغربة وقعها شئ مختلف بالنسبة للمبدع عن الشخص العادى ونحنوا سعداء بهذه المة التى اكتملت بوصول الاستاذى عائشة بت مبارك وفى انتظار الرائعين دوما
وحقيقة اثناء احتفالات الاتحاد النسائى بكندا بمرور 50 عاما كان ضمن المشاركين من الولايات المتحدة الفنان عاطف انيس وفرقة عرائس النيل بقيادة الاستاذة تماضر
ولازال الناس يتسسوا ذلك العرض الرائع للشابات بتقديم رقصات شعبيةمن مناطق السودان والشئ الذى اسعدنى اكثر ان اجد الممثلة تماضر بنفس العطاء والروعة لازالت تقاوم الغربة
وفى احتفالات اتحاد الشباب السودانى بكندا بانتفاضة مارس ابريل فرع تورنتو تقدم فيه عرض مسرحى تداعيات الخراب تاليف يحي الاستاذ فضل الله وتمثيلة بمشاركة المسرحى الشاب عصام العجمى وفنيات التشكيلى عز الدين كجور وقد نفس العرض باقليم نيجارا فى احتفالات اكتوبروقد شاركت الاستاذة تحية زروق بجزء من مسرحية دنيا صفا انتباها وقد كان شئ رهيب
واعتقد هذه بشائر خير بان يصر المبدعين على العطاء فى اى مكان واى ظرف بعد هذا التشريد الجماعى واتمنى ان يلتم عقد المبدعين فى الحشان التلاتة واتمنى تكون بسعة الصدر لتسع ذلك الابداع والحشان التلاتة مصطلح يطلقونه المبدعين على الاذاعة والتيلفريون والمسرح وبلمة عاشة انشاء نشوفكم فى الحشان التلاتة
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: عشة بت فاطنة)
|
الى كل المحاورين الاصدقاء والذين شكرونى على عشة بت فاطنة،
انا معاكم شاكرة الصدفة الجابت عشة فى دربنا وخلينا نستثمر وجودها الكثيف بالمبادلة والحب..
عشة لـــــــــــــــذيذة، عندها قصص خرافية...
مرة بتتونس مع سمانى لوال ومريم ...
السمانى قال والله انا داير اعرس
عشة طوالى شجعتووقالت ليه اى ياخ عرس،
قال ليها انالكن ماعندى قروش
قالت ليه عرس بلا قروش، اصلو العرس البقروش ما بطلع سمح، هسى انا بيرق دة عرستو بدون قروش، الليلة الصباح قال لى عملتى فطور لى عمرو قلت ليهو ما تعملوا ليهو انت دة، عملوا ليهو، لو عرسنى بقروش ما كنت بقدر اقول ليهو كدة......
عشة اهلا شرفتينا
وشايفاك فايرة وملخبتة، قايلة دة السودان ... لا دى الانترنيت ساى، فاخدى فورتك... وروقى ...ليناوورينا خبرك
وامبدويات دى رقية وراق، قولى بسم الله،
وزى ما بقول الهادى الجبل
المدينة نيلها صفق
ليلها بق
والفرح فاض بيها دفق
والخيال والوادى فتق
طارت الاحلام عصافير
ظلل العشب الغدير
هزت اشواق المزامير
وانا بين مصدق وما مصدق
انى بلقاها
الا ياها هى زاتها
حبيبتى زاتها
اللحظة نازل فى حماها وفى ضراها
بتقاسم الافرح معاها
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
بسم الله الرحمن الرحيم
السلام عليكم ورحمة الله تعالى وبركاته
طبعاً المرة ممكن يعرسو فيها لكن أنا كنت داير عشة تعرسني في بيرق يعني كنت دايرها تجيبني ضرة لي بيرق قول لي كيف؟
أنا كنت بركب بص المعهد من بانت وعشة كانت بتركب من نفس المحطة وبحسب إني عربي وبرلوم جديد فالظرف والشفافية وروح الفنانة والتلقائية والحضور عند عشة مبارك أنا كنت قايلو حب .. يازول ضحكت معاي مرة مرتين طوالي كلمت الجماعة المعاي في الفتيحاب قلت ليهم أنا خلاص إتكسرت وإترضرضت عديل كدا ولقيت شريكة حياتي وهي أتاريها معرسة وشبعانة عرس.. أها يازول بقيت كل يوم أرجاها ليك في محطة بانت من دغش الرحمن والنوم جفا عيوني وأنتظر لحظة قدوم الحبيبة وتجي الفنانة ونفس الضحكة والروح المرحة وتقعد تتونس معاي لمن يجي البص .. لكن لاحظت كل يوم وأثناء ما هي بتتونس معاي في واحد بيجي يقيف بعيد وعشة بتمش تتكلم معاهو لمدة دقيقة ولا دقيقتين وبعد داك يفوت وأنا الغيرة دايرة تكتلني عديل كدا .. يازول لمن الحكاية إتكررت أكتر من مرة سألتها قلت ليها دا منو الشاب البتتكلمي معاهو كل يوم دا فردت بنفس التلقائية والعفوية والروح السمحة قالت دا بيرق زوجي.. فصدقوني أحببتها أكثر وأحببت بيرق الشفيف الرائع المهذب الخلوق.. فهذه هي عشة مبارك
عاطر التحايا
بدرالدين شنا
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
بدر الدين عسل كيفك ويين بلودك
لحسي في عمان اظهر وعليك الامان
والله الواحد بقا يغني يا حليل زمان وايام زمان
والرسول عليك م بتذكر يوم ابوي جانا في ابو كدوك
وبيرق كان في بلغاريا وكانو قاعدين معاي الهام
ومصطفى احمد الخليفة" مصطفى طلع وكنت انت معانا
غطيناك وعملناك اخو الهام الصغير كلو ما اتذكر الموقف دا اموت بالضحك طبعا الحاج اكورك ساكنين في بيت لا صحي ولا شرعي
بعدين قبل عليك المدمدم دا منو وعارف الباقي اكيد ويا حليل زمان وايام زمان قاعد اغني
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: عشة بت فاطنة)
|
لول ياعشة على البيت اللا صحى ولا شرعى،
دة كان ملاذالاصدقاء
تتذكرى اوضتنا البرج العاجى انا وخالدة الجنيد؟؟؟ اوضة تلاتة فى خمسة امتار المكيف فيها مرسوم بفحمة وطالعة منه كلمة فوووووووو، كناية عن الهواء المرتقب وفيها تلتاشر بت؟؟؟؟
ونتدين الساردين والجبنة والطحنية من سيد الدكان؟؟
وامينة الردية ؟؟
والبلوزات زى الجواكر؟؟؟
والنكت المابتخلص والاجتماعات؟؟؟والجدية والمرح الما بيناتم فاصل؟؟؟
وانفصم العقد؟؟
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
تماضر انت عارفةالاودة دي امس اذكرتها
والعجب السهلة زي بيت الكبريت وقال بنطلع السراير برا وفد شخرة
وسوزكي وخالدة الجنيد يا حليلهم ولا مريم بت خالتك بعد خلت خظاب ليوم الليلة الاودة حارقاها الضحك عايز اكتلني من الذكريات ودكان اليماني والدين البتدفعوا تماضر الداخلية كلها تتدين وتسجل علي تماضر عليكم الله يا جماعة شفتو كرم زي دا بعد البكية حبيبتي تمشس تدفع اعانتها وتتضحك ولا اعداد الممثل لا لا دي زكريات بتاعة مسنجر عديل اعزرونا تذكري يم مشينا انا ونعمات هارون دكان اليماني وتعليق نجاة محمود عشان تغيظ نعمات ونعمات تبكي يا الله يا نعمات اللـه
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
تماضر لووووووووووووووووول على المكيف البسوى فووووووووووو
عشة والله دمديمة البدرى فى السرير دى كتلتينى بيها عديل
اتخيلتو كيفن مطبق فى السريــــــر لوووووووووووووووووووووووووووول
لكن الليلة انا ما مت من الضحك ..شىء منكم فى البورد هنا ومن البدرى الشين بالتلفون ..والله مبالغة.. طبعا بدر الدين الشبكة عندهم ضعيفة كاتلنى انا هنا بالضحك اقرا التعليق بالتلفون وهو يشيل ويعلق وانا خلاص توبة تانى دخلة اكان باكر
تماضر النبى ما تجى مهرجان مسقط ده لوووول
عشة شوفى ليها طريقة ياختى
عشة حا اتصل بيك ان شاء الله الليلة
يلا سلام
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: عشة بت فاطنة)
|
والله بالغت ياعشه
نحن صاح ماقرينا في المعهد ، لكن والله قددناه حتة حتة ، وبروفه بروفه , وعرض عرض .
وكمان مثلنا وأخرجنا .
ورفاعة ذاتها قددناها وحبينا بناتها واحدة وحدة , وفي النهاية عرسنا منها.
مالك يابت فاطنة بتردي على كل الرحبو بيك وبتفطيني .
أكان زعلانة مني , انا بعتذر .
وبرضو برحب بيك تاني وتالث والى مانهاية .
الف مرحب عشه
والف شكراً لتماضر وكل من ساهم في إتحافنا بك .
واكرر سؤالي عن بيرك . لماذا لا يحضر معنا فوراً ؟
ربما لم اصادقه في السودان ولكن حكاوي محمد عبد الحميد وعلي السفوري وعلي بابكر ومحمد الفاتح السفوري وآخرين عنه جعلته صديق حميم جداً .
عثمان تراث
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
اها ياتماضر يا اخيتي ختيت عنقريبي الهبابي في الحوش الاليكتروني وتحت النيمة الافتراضية وسرحت نحو عام 87في مسرح ود مدني عندما تحولنا العميري وانا ونحو الفة نادرة يلفها الق المحبة الى جمهور تيرسو مسرح ناكل التسالى ونشاهدكما تتجليان وسط ذلك العقد النضيد من رائعات المسرح السوداني في ذلك العرض الخاص لهذه المسرحية النوعية والمفتاحية في تاريخ المسرح العالمي واصبحت تاريخا لمسرح المراة السودانية ومحطة براح واستراحة الغت كل تواريخ احتكار الرجل لهذا الفن لا اقول في السودان بل في المنطقة العربية باسرها ولا اعرف من اجترح مثل هذا الفعل الابداعي وبعدكن ايتها الرائعات الا سمير العصفوري في مصر ونضال الاشقر في لبنان فالتحية لكن وتعظيم سلام بعد 16عام لعماد الدين ابراهيم وانا والعميري والله صفقنا لكن كجمهور ونحن نعلم في ذلك الوقت ان شهادتنا مجروحة لاننازملاء ولكننا حلفنا اننا كنا معجبين بفنكما الراقي ووالله لقد ضحكنا من القلب واخبرنا خطاب حسن احمد بما فعلتماه بنا وابلغنا عبود سيف الدين بذلك ايضا لان ورديته باذاعة الاقليم الاوسط في ذلك اليوم وسفته الكبيرة افلتت عنه حضور ذلك العرس واغظناه حتى الصباح ولم ننيمه وقلنا له انت كمخرج يفترض الا يفوتك مثل هذا الحدث وصمم ان يحضر العرض القادم في الخرطوم على فكرة انا نسيت انه انا اساسا دخلت الحوش الاليكتروني المرشوش دة عشان ارحب بعائشة مبارك ربما تكونين قد نسيتي ملامحي بعد كل هذه الغرب جمع غربة وهذه السنين والشتاتات ولكن اؤكد لك ان صورة ابداعك منحوتة في داخلي فمرحبا بك منا وفينا
ابو اشرقت
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: عشة بت فاطنة)
|
سيف الجامعة؟؟؟ كيف عمى الجامعة؟؟؟
والله كتلتنى بالشجن والضحك والانفعالات العجيبة
ايام لها سيقان
وانت ما برضك اطربتمانا واضحكتمانا فى الدنيا الفانا دى لمن قلنا كفانا
تتزكر يوم عند ناس مصطفى احمد الخليفة والهام بابكر فى بيت بانت ولمن كانوا طابخين لحمة كدة اظنها نص كيلو عازمين الاصحاب، وانت جيت ومن برة قبل من تسلم وطوالى عزفت اغنية ما تعودت اخاف من قبلك وانا كنت اول مرة فى حياتى اسمعها وانفقعت بالبكا؟؟؟ ومن يومها داك ما سمعتها من اى زول ولغاية الان بطلبها من كل من هب ودب وحفظتها لعلى السقيد جوة عينو والصادق شيخ الدين ، عشان بس اسمعها تانى ولسه صوتك واحساسك بالغنية دى ما فارقونى.
وبرضو مرة فى بيتنا غنيت غنية اولهاكلمة دفينى..... والناس سكتوا فجاة لانو صوتك شحن المكان بملائكية ملهمة كدة وانت غنيت من جوة قلبك واظن كان لغاية قريب الصباح
انا ما بنسى غناك ياسيف الجامعة ولا صحبتك الجميلة
تقولى اضحكتمانا؟؟
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
هل يمكن احتمال هذا الفرح دفعة واحدة
تماضر+عشةمبارك=فرح غير عادي وجمال يمشي بين الناس محبة+تواصل+فن وابداع يحساب السنوات الضوئية انا ماعارف العدد كم وكانوا بيطردوني من حصة الحساب (اي والله قوم ايه) الهارديسك بتاعي دخل في بعضه كالعادة تذكري مرة انا قريت ليكم رسالة كنت كاتبها لحبيبتي قمت قلتي لي ده حب عديل كده تصوري يادوب عرفت الفرق بين الحب العديل بي وش الباب والحب الساكت والحب الاي كلام والحب الكلام ومرة حكيت للعميري نكتة جايبها وفرحان بيها جداوداسيها لبهو اضاري فيها من مكان لمكان لحدي ما الاقيهو واتاريهو كان زعلان مني عشان طولت مامشيت ابروف عندهم في بيت ناس محمود خالي اتلاقينا فجاة في حوش الاذاعة هو طالع وانا داخل قالي ماتسلم علي انت واحد فنان وبس انت قايلني انا معجب ولا شنو فضحكت لامن وقعت وبحثت عن نكتتي سما ارض مالقيتا وعزيزة بت كابا وفاطنة بت مايو لابسة العراقي وماشة بي غادي وتسمع في الرادي ولا قتا بنية وسمتا سمية وهلكتا الكية والبوليس لابس الطاقية والطاقية خدره بنية وضربولو النحاس ضربولو البندقية دقي البن ابيت ادق البن وسوي الشاي ابيت اسوي الشاي البنيات في والوليدات في شايلة قفتا وماشا حلتها وعقرب طقتا في شلوفتا والجن كبس الجن وانينا تاني ماعندنا شقل بالليل وانينا تاني ماعندنا شغل بالليل وازيك ياعشه مبارك
وياسلام عليك ياسلام
ابو اشرقت
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: saifalgam3a)
|
سيف الجامعة
انتو هناك ماعندكم شولات؟؟
نقطة، سطر جديد؟؟؟ مافى ؟؟
افتح قوس، اقفل القوس دى ما ادوكم ليها؟؟؟
حلتكم دى اسمها شنو؟؟؟ ام دفسو؟؟؟
بلدكم دى مخططها دبيب؟؟؟
ما براحة
اررر ارررر اررر ارررر
وانا ساكة الكلام اقرا فيه
وجغجغجغجغجغجغجغجغجغجغجغجغج
اجغجغ من الضحك
سيف الجامعة
انت واحد فنان فقط لاغير
سبت شرعا
وسبت الوردى شايلو ما ظنو ينسانى،
فى رمضان جيت اكلمهم انه خلاص ثبت انه رمضان،
امى تسال فينى قالوا شنو؟؟؟
اقول ليهاالاغنية بصوت ناس حوا الطقطاقة
وسبت الوردى شايلو
ما اظنو ينسانى
امى قبلت وشها طوالى ما دايرة تضحك لى قدامى
جن السواد يا تماضر
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: عشة بت فاطنة)
|
اولا انا في الامارات وما عندنا لاشولة ولا فل استوبات. ذكرتيني واحدة برلومة في الكلية زمان( لما قالت كدة الرشوة جاتنا قمت ركبت مع واحد فل استوب يعني اوتو استوب بالعربي كدة) المهم ياتماضر نرجع لحكاية الشولات دي انا طبعا ثقافتي الكومبيوترية انجليزية ولما اغير الكيبورد من انجليزي لعربي الشولات بتروح مني ومافي وقت اصلا افتش عليها زي الذال بتاعك .المهم حانشتغل كده بدون شولات لغاية ماربنا يفرجها. بعدين انتو في امريكا مالكم ومال الشولات خليكم في موضوع اسلحة الدمار الشامل والجمرة الخبيثة وهنا عندنا في الامارات اسمها الجمرة الخنيثةعلى فكرة والبت عشة اصبري لي فيها لغاية ماالاقيها في البوست بتاعها بس قاعدة بالجنبة كدة وتضحك. بمناسبة سبت الورد دي ضربت تلفون لخليفة اخوي لو تذكريهو طبعا هو ولد طويل جدا نوع بعد ما يتخرج حيشتغل في حرب النجوم وكدة .المهم ضربتليهو قالي انا عيان ووصفت ليهو دوا اسمو بروكتوقلايفنول قالي ده اخو محمود بلول؟ ومحمود بلول ده واحد صاحبنا ما بتعرفيهو. اتذكرت الوافر شيخ الدين يوم كان خميس وام درمان فيها كتاحة اصلية طبعا انا الان لي 13 سنة ما شفتا لي كتاحةكدة كيفتني زي كتاحة ام درمان. اتذكرت الوافر وانا و داخلين النادي لقينا ليك الفنانين بي بدلهم ومكتحين تمسحي الغبار من وش الواحد حتى تعرفي ده محمد الامين او خليل اسماعيل او عركي . قام الوافر( بدل السلام عليكم) قاليهم ورافع يده لاغبار عليكم ورحمةالله تعالى وبركاته باخوانا. فضج النادي بالضحك وسافر الولد الشقي لاسبانيا وسابني وحدي اشكي وجدي وازرف الاهات مرارا. بالله هو ايه اخباره واخبار كل العقد الشيخ الديني الفريد الوافرة ورشا والصادق ومقداد وتبارك وهمرور الخ ووين سمية خالد وعشة مبارك ازيك تاني
حلينا موضوع النقط الله يجيب الشولات
ابو اشرقت
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: saifalgam3a)
|
الوافر آخر مرة لاقيتو لما مشيت اسبانيا الشهر الفات، ونقرقر النهار كلو، قلت ليه احكى لى نكتة حلوة قال لى كان فى اتنين واحد موسيقى
والتانى، برضو ما عندو قروش.
مرة تانية كان طالع مستعجل قال الساعة كم ياجماعة، ناس البيت كلهم ساكتين ما ردوا عليه، قال وهو طالع، الغميييييييسة دى بتكون سبعة الا ربع
الوافر؟؟؟؟ ببالغ
مرات بعمل امثال براهو، قال وهو مفتاحو رايح، زى ما قال المثل فتش تحت المرتبة
اخوك الطويل دة ياسيف مفروض مع غبار السودان دة يشتغل زعافة، انا ولدى اطول من اى حاجة ومرة مشينا نشترى بيت خليناه عشان ما بقدر يقيف عديل فى السلم، يعنى البيت طلع ما مقاسو، فبخليهو يشتغل معاهو فى نفس الشركة، ولا غبار عليهم الاتنين، غبار علينا نحن ديل المساكين ديل.
انا طبعا عارفاك فى الامارات وحتى بالامارة، سمعت من زول بتكلم معاك فى البالتوك اليومة ديك، وانت تانى ما رجعت لى ليه؟؟؟
والجميع بخير ويسلمون عليكم ونحن لاينقصنا شىء سوى ياهو الكلام القلتو ليك دة.
بس حكاية الشولة دى بتتحل ، نحن عندنا بت جارتناهنا شولة، بخليها تتصل بيكم وكدة، وبس ابقوا اظهروا،
انا زالى مخيرة فيها
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: Tumadir)
|
سلام سيف وتماضر برضو بلا نقط ولا شولات مسؤلين من االخير انتو عارفين الوافر دا معزة خاصة وينو يا تماضر سلمي عليه شديد ما عرس وتبارك
يا الله فعلا ايام لها غبار زي ما قال الوافر الساخر الجميل انتو عارفين البوست دا حيكون بعد شوية اولاد دفعة ومالو اصلو الاليكترون دا لازم اخدم العلاقات والشمارات الواحد صراحة اتوازن وبقى احلم بعد ما لاقاكم وعرف اخباركم سيف الجامعة ما دام انت جمبنا بجاي الرسول كان ما زرتنا انا في مسقط اها سلام ليكم شباب النيل
| |
|
|
|
|
|
|
|
|
|
Re: عائشة مبارك من بيت بت المنى بت مساعد... الى حوش بكرى الالكترونى... ممكن (Re: عشة بت فاطنة)
|
شة مبارك انت بت جيرانا في مسقط وانا لي 300سنة في الامارات وانا قايلك في امريكا وقاعد اتعامل معاك بالشوكة والسكين انت اتاريك من اهل العوض -طبعا دي استعارة مكنية نعيمية بالتقلية- لانه عمان دي ارض العسل وطبعا انت قاعدة قيها يعني زادت اعسولا لن بالتنوين. وتماضر ما تساليني اعسولا ل دى انا جبتها من وين لانه انا زاتي ماعارف (زاتي(حلوةدي؟ والقوس مقلوب والحالة بالبلا وعندي بت اسمها اشرقت وحا اسمي البت الجاية اعسولال عشان اي زول لو عاوز يناديها يمشي يتخص لغة صينية ويجي. على اي حال طبعا ده خبر بمليون درهمحكاية عشة في مسقط دي يعني مليارين تلاتة بالسوداني و(واحد مغترب مستجد رجع السودان بدا يحكي لا صحابه عن السعودية واسعار الحاجات واي حاجة يضربها بالسعودي ويحولها بالسوداني فقال للجماعة مرة مشينا لي حتة اسمها وادي الدواسر بتبعد من الرياض زي 400 كيلو كده وبالسوداني بتبعد زي والناس ماتو من الضحك .اما ياتماضر الوافر ده خليهو ساكت انا كتلت فيهو كتلة كبيرة وما اظن فرقته زول يسدها اصلا . انا مستعد اقول ليك شوال نكت من مباغتات الوافر مرة ماشين حفلة في الشرفة وبعدين راكبين الحافلة و معانا مجدي بتاع الفلوت قاعد ينطط طول السكةعنده حركة زايدة بطبعه التفت ليهو الوافر قا ليهو ياود انت الحتة بتاعتك دي فيها دقداق براها في الحافلة دي؟ الوافر مصيبة وسمعت ابداعاته هو ورشا وده اقل من ماهو متوفع منهم هؤلاء الشباب فنانين رائعين وسابقين العصر بمليون سنة وحرام فيهم الغربة والشتات. ربنا يجمع شملنا جميعا اما انت ياعاشة مبارك انت كده زودتيها خالص وعامة انا جاي مسقط قريب وعندي حفلات وسيلتقي جيل البطولات بجيل التضحيات وسنغيظ سكان مابعد الاطلنطي ايما غيظ وان عدتم عدنا واذا لم تعودوا عدنا
ابو اشرقت
| |
|
|
|
|
|
|
| |
Tumadir
بكرى ابوبكر
Elmosley
نصار
سمندلاوى
تراث
محمد سعيد شلى
الجندرية
adel alsaed
منعمشوف
ALZOLZATOO
Abomihyar
عشة بت فاطنة
يازولyazoalيازول
WAD ELGAALI#4
almohndis
Yahya Fadlalla
HAMZA SULIMAN
Yasir Elsharif
waleed500
امبدويات
Faisal Salih
بدرالدين شنا
bit-alkhaleel
saifalgam3a
فيس بوك
تويتر
انستقرام
يوتيوب
بنتيريست