|
علم السودان يرفرف فوق ....السارية
|
سارية
ولدى حبيبى وتاج راسى ومصدر فخرى
دخل
ٌروشيستر انستتيود اوف تكنولوجى
R.I.T
ولاحظ ان كل اعلام الدول التى ينتمى اليها طلبة فى الجامعة ، لها اعلام ترفرف فى باهتها الدوليه وبدأ مشوار البحث عن الذات
وزاحم وناقش وطالب وجعلهم يرجعون لتفاصيل القانون والمذكرات والمواثيق والاتفاقيات الدوليه
ورجع لحقوق الانسان ولاحق واجتمع واتفق واختلف وما كان من عميد الطلاب الا ان غير نصا فى اللوائح
ورفرف علم السودان فى الآر آى تى
لاول مرة
فوق الساريه
حبيبى وتاج راسى ومصدر فخرى
بالتوفيق يا سرونى
|
|
|
|
|
|
|
|
Re: علم السودان يرفرف فوق ....السارية (Re: motaz)
|
شكرا معتز
وليسدد الله خطاه بالتوفيق دوما
له حبى:
يبراه محل ما يلقاه
يعليهو على المابيهو
يديهو الفى مرادو يغطيه
يفتح له الابواب المسدودة
يبسط ليهو الارض وسدوده
يوصلو غاياتو ، حدوده
يديه الخير يحميه من الحساد وعيونهم
ينجيه من الظنان وظنونهم
يحميه من الرفقه الشينة
قلبو ان شا الله نضيف ديمة من حقد ومن كل ضغينة
خيرو مدفق
كلامو عديل ماهو ملفق مستور فى عرضو وفى فهمو
الشر يبعد من عضمو ومن لحمو
يلم شملنا بيهو
نفرح بيهو ونفخر بيهو وتطول بى فرحتو قامتنا
يبقى علمنا ، سمحنا علامتنا
يارب آمين
| |
|
|
|
|
|
|
Re: علم السودان يرفرف فوق ....السارية (Re: منعمشوف)
|
هذا الشبل من تلك الأم الرائعه عزيزتى تماضر لا أستغرب ما قلته فأنت متشبعه بحب الوطن ورفعتى رأسنا أنت وأخوانك ربنا يخليكم مافعله ساريه حاجه طبيعيه بتجرى فى دمه المخلوط بحب الوطن الشربتيهو ليه عزيزتى تماضر الله يرفع رأسك كمان وكمان وتشوفى أولادك أحسن وأحسن ويخليهم ليك إن شاء الله ويرفعوا علم بلادنا كمان وكمان
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
باقي الكلام يا تماضر... تذكرت أمي و قفز الى مخيلتي ابني الصغير المشاغب حليم.. و سرحت في تطلعاتي ليوم يجعلني مليئا بمثل هذا الافتخار... عيييييك... بالمناسبه عمرو سنه و نص
بلغي ساريه بأنه مصدر لفخرنا و تطلعاتنا
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
تحياتى لك ولنسلك الكريم من مدينة الثغر الباسم بورتسودان... دخلت موقع الجامعة... والله جامعة سمحة تب... أتمنى له التوفيق وأن ينقل للسودان كل العلوم والتكنلوجيا... لكن ما عرفتا... دخل ياتو تخصص؟ لك وله كل الودّ أنور دفع الله AnwarKing
| |
|
|
|
|
|
|
Re: علم السودان يرفرف فوق ....السارية (Re: omdurmani)
|
تماضر
ملايين التبريكات
لهذا السارية الشامخ والذي راي الرفعة والشموخ والعزة من قبل ان تاتيه صيخة الخليفة فمشي الي الجبال الشم ليرفع لنا سارية السودان في زمان تهافتنا فيه علي تمزيق العلم
وتنصلنا في مخابئنا بانتظار مثل سارية وفقه الله وجعله محفوظا لاهله ولوطنه
لكن الغتاتة دي شنو لما كنت بسألك من الاسماء اسم سارية ده جمعتي مع كراس الاملاء والله شنو؟؟؟؟؟
والله لكن ليك حق ما تديه لي زول يسمي عليه طالما ولدا نجيض ورفع لينا العلم بفخر اكتر من فخرنا برفع علم الازهري
عموما جات سليمة وانا جبت بنية لكن الولد سارية سارية حاجزو من هسي نحن بعد ده غير الوليد عندنا شنو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ مع عميق تحياتي لسارية
ابويارا
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
بسم الله الرحمن الرحيم
مبروك عليك يا سارية مبروك عليك يا تماضر مبروك عليك يا بورد
زمان عندي أخوي إسمو التاج كان غاتس في ليبيا بالسنين .. أها بعد طول سينين جاء واحد من طرفه وطمأنا عليهو .. أها نسوان الحلة بقن يجن لي أمي يقولن ليها (البركة الشفتي الشاف التاج) فنحن هنا نبارك لأنفسنا ونفتخر بمعرفة تماضر التي ولدت سارية الذي أجبر الكبار لإحترامه
ربنا يحفظه ويغتيهو ويعليهو
ولك يا تماضر أن تقولي I am very proud
بدرالدين شنا
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
نسمة لطيفة لا مست روحي وأن أتأمل كيف ناضل سارية ليضع علم السودان بين الأعلام ، وقد ألغى سارية بعمله هذا المثل القائل ، البعيد عين العين بعيد عن القلب ، فقد ظل السودان في قلبه رغما عن بعد المسافة والزمن ، إنها التربية ، ربوا أولادكم على حب الوطن يحبونكم ويحبون أوطانهم . ويحبون دينهم
| |
|
|
|
|
|
|
Re: علم السودان يرفرف فوق ....السارية (Re: غدى)
|
Dear Tumadir This how we should teach our kids, children abroad we are from that part of the world sudaannnnn even being far still we are there with all our feelings, Taslami ya bit alblad wa yaslm the prince! 3alik allah ad3i li ana bardo!!shdeed!
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
تهانينا سارية على منالك مرادك بالتصميم ولاقدام وسدد الله خطاك
وكان حتما على سارية أن يكون كذلك كيف لا وهو من زرع فيه خير الاخلاق واحسنها فلابد ان تكون الثمرة عزة وكرامة وغيرة على الوطن حفظك الله يا سارية ورعاك ودمت ذخرا لوطنك وغرة عين لوالديك
وتقبل تحيات خالك شروووووم
| |
|
|
|
|
|
|
Re: علم السودان يرفرف فوق ....السارية (Re: benyya)
|
ونقول آمين لدعواتك المستجابة ،إنشاء الله، له ،وفتى مثله نافح ليرى علم الوطن عاليآ خفاقآ بين اعلام الامم،لا يجوز تدليعه ،ف سروني هذه،ذكرتني ملاحظة قالها لي اكاديمي في مجال علم النفس،سمعني انادي إبن اختي،احمد ب حمادة ،،فحاضرني عن الاثار السلبية لتدليع الاولاد خاصة اسمائهم،،قد تكون مفاهيم قديمة فقدت صلاحيتها
لكني عايشت مشكلة الاسماء مع ولد بت عمي،،وورطته مع اسم والديه ،كلاهما يدعى تيسير سمعته ينادي تيسير ايوه ما انت ،هي وبعد شوية،مرة اخرى ينادي تيسير هوي ماإنتي ،هو حكاويهم كثيرة واحزانه اكثر ولكن من رحم المعاناة يولد الابداع ،،صار يناديها ،تيسيره ،وفض الإشتباك
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
العزيزة تماضر
الف الف مبروك وعقبال الدكتوراة انشاء الله
انا زمان كان مفروض ارفع علم السودان في
M I T ماشسيوتس انستيتوت اوف تيكنولجي لكن نقول قسمة ونصيب ومافشلنا فيهو نحنا حققو لينا سارية
نتمنى ليهو التوفيق وبالجد دي حاجه نفتخر بيها كلنا ولو كنت قريب علي الايمان كنت عزمتو عشاء
زاتوووو
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
المشكلة يا تماضر انا لا مع { الفالحين كده } ولا مع { الغبيانين ديك } انا عصي على التصنيف ،الشيء الذي اربك بنتي ماهيتاب ،،كانت معي وساندرا في طريق شائك ب {الغبيانين ديك } ،ولأنها مزهوة بشعرها الغجري المجنون ،تعمدت عدم إعادة الطرحة إلى مطرحها ،نبهتها بإمتعاض مفتعل ،وانا عامل حساب { الغبيانين ديك }،إكتفت ساندرا برفع حواجبها الهلال،اما ماهيتاب المتمردة ف إستعارت مقطع مع التعديل من بيان هاشم العطا وهي عاشقة للرائد النبيل ،عرفتو من وين انا ما عارف لكنها تبكي في حالة واحدة فقط ،لوجبنا سيرتو او سيرة 19 يوليو ،،،!قالت { انت يوم اقصى اليسار ، ويوم أقصى اليمين ،ويوم بلا إتجاه ،، أربكتنا يأخ }
انا الآن لا غبيان {ديك} ولا فالح {دجاجه} انا كده وبس ،،يا { جنيه } ولك عاطر التحايا ،،وعامر الموده ،،و وافر أخوك
| |
|
|
|
|
|
|
Re: علم السودان يرفرف فوق ....السارية (Re: أبو ساندرا)
|
تماضر : الحبيبه
عجبنا وسر بالنا نجاح ساريه والاولاد كده ولا الولاده بلاها والله من جوه قلبي فرحانه جدا انو لسه في جيلنا من لم ينسي بركات رحم الوطن الجابو .. وساريه بالذات خلاني اعيد تفكيري في مسألة الهويه الاميركانيه .. واقصد بها اتراب جيلنا الذين تربوا في المنافي الامريكيه حقيقي نموذج مشرف ، لانو بتصرفو دا ، اعاد لشريحة الهوية الامريكانيه الثقه وزاد درجاتهم نقاط كثيرة نحو القمه
لك يا تماضر ، انت امه الذي ربيته على ذلك كل رحيق الورد والياسمين والحاقـــــــــدين انشاء الله يتقصوا لهم كمان برضو طعــم الرمــــــــاد
قولي امين يارب العالمين _______________ شكيتكم على الله ياناس بوش بلير وصدام
| |
|
|
|
|
|
|
Re: علم السودان يرفرف فوق ....السارية (Re: زهره)
|
رفرف فوق السارية..ويا سارية الجبل... وياوطن التحليق والأجنحة..الرايات تخفق...والقلوب تخفق شواهد.. لسه المطرة التامنة بتنزل...والعصفورة التاسعة تونس ضلفة شوق فى عين شباك
والبعيد من الشباك قريب من الباب
تحياتى ودعزة
| |
|
|
|
|
|
|
Re: علم السودان يرفرف فوق ....السارية (Re: أبو ساندرا)
|
كل يوم يا ابو ساندرا،وانت بتساهم وانا بقدر اشوف ساندرا اكتر ، وماهيتات؟؟؟ اسم شنو الملهلب دة؟؟؟
وهاشم العطا؟؟؟ قدر شنو البتعرف هاشم العطا دى؟؟؟
انتو اسرة مجنونة، وجميلة ولماحة
تحياتى القلبية لى بناتك الخمسة وامهم
انا معجبااااااااه
| |
|
|
|
|
|
|
Re: علم السودان يرفرف فوق ....السارية (Re: Tumadir)
|
وتماضر تحتل المنبر،نازلة فينا بوستات،واضح إني موعود بوجبة دسمة،لكن في الاول خليني اطلع برة استمتع بالطرة الكابة مباشرة في الخليج عبر النافذة من مكتبي اراها تداعب خده ،وإنسرب لي فوح القرنفل ،ورائحة القهوة التي تعدها زميلتي المغربية محوجة بالهيل { الهبهان } والزنجبيل ،الآن كل حواسي إحتشدت في حاسة واحدة الشم بمشي الخبط الريحة دي بي سمك حااااار ،وسوف اعود مساءآ ويارب استر عبدك الآبق ودع هذه الليلة تمر بسلام
| |
|
|
|
|
|
|
Re: علم السودان يرفرف فوق ....السارية (Re: wa7shny)
|
ماهيتاب ،،بالبون ،ماهي=ضوء ،تاب =قمر وهذه بللغة الهنود الحمر ماهيتاب مولودة في يناير 1985 ومع ساندرا حفظن شريط كورال العيد الاربعين ،وخاصة غنية برق المهيرة،ويسالن عن كل اسم الشفيع جوزيف ،قاسم ونحن نحكي ذات عصر غنت لي هاشم قاطع الحدين قصاصو قصاص،،عاشو ومت يا سفاح ،،في الثانوي ،إتصلت بي أمها خائفة عليها من إتجاهاتها الجديدة ،قالت لي شكلها كدة منظمة ودفترها مليان صور هاشم العطا والقصائد من الصف الثاني كانت تذاكر مع ساندرا وقررت ان تمتحن معها الشهادة السودانية ناطة سنة بتشجيع من اساتذتها ، وإلتحقت بالجامعة وتوطدت علاقتها ب هاشم في 19 يوليو عملنا إحتفال صغير في البيت شرفه بالحضور ازهري ، غنى عاطف انيس اغاني يوليو ،،هي بكت وعاطف إتنخج وما عرفنا نسكتهم كيف انا متأكد ،يا عملت إنقلاب ،يا حضرت رسالة في هاشم ،،في مكتبتها كتب عب الجيش ل محمدسعيد القدال ،محمد محجوب عثمان ،والآن طلبت مني ان ابحث لها عن كتاب العميد عصام ميرغني
تحياتك للبنات الخمس ،وامهن الحلوة زيهن ،وصلت
سارية عمرو كم عشان نطرح الموضوع على ماهيتاب ،،وهي رائعة الجمال ،شديدة الذكاء،،كثيفة الإعتداد والعزة والمغالطة ،،ترسم وتكتب وتغني والآن تدرس موسيقى ،وسوف تتخرج السنة الجاية من علوم كمبيوتر ،مؤهلات تمام ،وتامات وشاطرات لمن عويرات
| |
|
|
|
|
|
|
Re: علم السودان يرفرف فوق ....السارية (Re: أبو ساندرا)
|
سارية كنت اقف منتظرا هذاالبوست كي يذهب للصفحة الثانية واجيبو راجع لكن عذبني شديد لمن مشى الصفحة الثانية وكم كنت سعيد بهذا العذاب وقفت اتأمل هذا الشموخ لهذا العلم الذي يرفف فوق ساريته معلناَ الوصول الى افق الممكن المستحيل وكل هولاء الذين شخصت ابصارهم اليك ولم يكتفو بالتهاني عبر البورد بل اعلنوا فرحهم العامر بك وبفعلك الاجمل ليس هو المكان الذي يحتوينا ولكنه الفعل الذي يغير معنى هذا المكانانت تفعل الفعل الجميل ايها المتسابق نحو ونفسك والخلود وايها المصر على تأكيد فعلك ازدهار كم نحن سعداء بك وكم نحن جمليين حد ان نتغزل فينا لانك فعلت فينا الفعل النبي سارية لك الود كله والافق يتسع من اجلك لرؤية ما بعد حد النظر ام سارية هل نهنئك ام نهني انفسنا ام نهني هذا السودان الجميل وكما يقول صديقي عبد الله جعفر يديكم العافية
| |
|
|
|
|
|
|
Re: علم السودان يرفرف فوق ....السارية (Re: hero)
|
فى كل يوم ياهدهد اجد فى هذا البوست باقة ورد ... من حبيب
يا قول امى ، كل يوم يطل علينا حبيب
ابوساندرا يكلننى تاجا من شرف الانتخاب ، عروس
وهيرو ، يعبق الساحة بياسمين الغبطة
وها انت ذا ياهدهد،
كيف يمكن ان يقول الله لمخلوق ، انا احبك؟؟؟
شكرا ربى على حبك
| |
|
|
|
|
|
|
|