كتب الكاتب الفاتح جبرا المتوفرة بمعرض الدوحة
|
|
 مهرجان سودايز اون لاين...حيكون اون لاين
|
جاءتنى هذه الرساله من صديق عزيز بالبورد ذهب لزيارة السودان " الحلم" بعد سنين من الغربه:
فساذيع انطباعاته هنا..دون ذكر اسمه..الا اذا سمح، لاحقا بذلك:
تماضر ازيك وكل ستة وانت طيبة
لمحتك اونلاين وانا في الخرطوم قلت اوريك كضبة مشاعرنا
قبل السفر كنت اناتل زي المربوط لامن قطعت حبلي وجيت
وهسع انا بمحطة البلابل منتظر تاكسي
يوصلني بحري ..
جايي من صفوف والزكاة والضرائب...وهسع مقررررررب اطرش...
ويبدو لي انو البلد القي راسنا واحلامنا راحت...
قمة في الفوضي وعدم التظام والناس كلها روحها محرقاها
ومن هسي مؤتمر سودانيز اونلاين بكري الا يعملو اونلاين...
الحكاية جايطة جوطة ما حصلت
اقتراحى نعملو فى نفس الصاله الناقشو فيها اتفاقية السلام..على الاقل فى تكاسى..
والله من قريت رسالتك يا صديقى العزيز...والنوم طاير من عينى..والمهموم ما بنوم...اخخخخخخخ
وبرضو يقول ليك "شنو و شنو و شنو؟؟"
|
|
 
|
|
|
|
|
|
|
|
Re: مهرجان سودايز اون لاين...حيكون اون لاين (Re: Tumadir)
|
تماضر تحية
المهرجان عنده لجنة من بورداب الخرطوم فيها فتحي وفيها المهندس وابو يسرا وعدد مقدر من اعاء المنبر النشطين اجتمعوا اكثر من مرة
هل يا تري هذا رايهم
بالرغم من انهم قطعوا شوطا في تصور الاعداد للمهرجان
حتي البرنامج قراته مكتوبا عنده
يا تري هم ما شايفين الشافه صاحب الرسالة؟
اذا كان دا رايهم تبقي عوجة انهم بضيعوا وقتهم وزمنهم في اجتماعات ساكت .. علي العموم نتمني نسمع منهم
لانهم بروضو اصحاب وجعة
بس البيمنع المهرجان يقوم شنو
الجوطة ؟ استعدادا للسلام كما اظن والترقب والحزر للقادم الجديد؟
شخصيا ناس الضرايب خلوني استفرغ عديل
| |
|
|
|
|
|
|
|
|
 Re: مهرجان سودايز اون لاين...حيكون اون لاين (Re: Tumadir)
|
العزيزة بت الشيخ..
لا تحزني ونومي قفا..
الوضع قد يكون جايط ومأساوي..
ولكن أليس هذا ما نود أن نسهم في تغييره..
ليت كل من حمل هم البلد عافاه النوم يا تماضر
أحييك (ولو كره الحاقدون) وسوف يكون المهرجان
بعزيمتكم وجهد الحادبين إضافة إيجابية لسودان معافي طالما حلمنا به..
| |
|
|
|
|
|
|
|
|
|
Re: مهرجان سودايز اون لاين...حيكون اون لاين (Re: خالد الحاج)
|
التحيه ليك ياخالد وتطمينك..لينا بالتفاؤل..
ولابد يوم باكر يبقى اخير
اما عن تحيتك..رغم الكره..فاطمنك انا من تاحيتى... اننى لا ابه بحقد الحاقدين.الا قليلا اذ هو مجرد.."لسان"..رملى يخرج من خضم بحر الحب..
وانا هى التى تحب..كاصفى ما يكون النبع..وكل اصدقائى فيه يسبحون..
| |
|
|
|
|
|
|
|
|
|
Re: مهرجان سودايز اون لاين...حيكون اون لاين (Re: Tumadir)
|
الوارفة تماضر
لك التحية
أنا أتفق مع رأي الأخ المتصل من السودان حول أوضاع السودان ، فهو قد عكس الصورة الواقعية ، وربما أنه ينتظره الكثير من القرف ، لكن هذا لا يحبطني ، فما رآه أخونا هذا أفضل مما كان يرى قبل خمس أو ست سنوات ، والغائب لا يرى الفرق بين الأمس القريب واليوم الذي يليه ،، وهناك سؤال هام ، كم من السنين غاب صاحب الراي هذا ؟
لاحظي تماضر أن المهرجانات والاحتفالات والمعارض والعروض الفنية والندوات وغيرها لم تتوقف مطلقا ، وقد كنت كتبت بوست بعنوان :
جوة قدرة فول وحلة وموية للعطشان في قلة
أو شيئا من هذا القبيل ، وقابلت أناسا غير سودانيين عائدين من الخرطوم وهم يلعنون هذا الوطن الذي نحب ،،وهناك تغيير كبير يكتنف البلاد ، قد يأتي هذا التغيير بأثر إيجابي على نفسيات الناس الزهجانة والروحها محرقاها ، ولن يكون ذلك فجائيا بل يحتاج إلى وقت طويل ،
بس تعرفي لو الإنقاذ تسيب الشعب في حالو ( وهي في طريقها إلى ذلك ) يمكن تنحل كل مشاكلنا ، ولذا فقد تساءلت أنا هنا في اجتماعات بورداب الرياض :
يا جماعة لو الوضع السياسي في السودان ظل على حاله فهل سيقوم المهرجان ؟
بعضهم قالوا : فال الله ولا فالك ، وبعضهم قالوا : أيوة طبعا، مافي مشكلة .
| |
|
|
|
|
|
|
|
|
|
Re: مهرجان سودايز اون لاين...حيكون اون لاين (Re: ودقاسم)
|
وهى لو خلت الناس فى حالهم يا ود قاسم ياخوى، ما اظن يكون فى فوضى..
بقى ان نؤمن على قيام المهرجان..ولكن ليس فقط من اجل "التمهرج" ولكن من اجل اوضاع..اكثر استقرارا للكائن السودانى المفروض انه "جميل"..
وشكرا على تفضلك بايراد التفاصيل..
قطع " ياعملات مريم محمد الطيب"
********
والله الواحد لمن دمو بقى تقيل من كترة الحذر واللغه العربيه الفصحى...وحساب الانفاس
يا جماعه انا ممثله ..وكوميديه..
ارفعوا عنى هذا القيد اللعين.."الحذر"
اشعر بالارتباك.. والاختنااااااق
الله يجازى الكان السبب
| |
|
|
|
|
|
|
|
|
 Re: مهرجان سودايز اون لاين...حيكون اون لاين (Re: Tumadir)
|
اختي تماضر
خدي راحتك عديل وافردي روحك في هذا البورد
تدفقي محبة وانسابي معزة
لا تدعيهم يرهبونك
لا تجعليهم يظنون انهم نجحوا فيما يقصدون
انهم يقصدون ما تعانينه الأن
ابتسمي واضحكي وغني مع العميري
ضحكت ما هماني شي
لا تكوني الأ تماضر الكوميدية المرحة الحنونة
لا تكوني كما يبغي الظلاميون
بعيدن حكاية المهرجان
والله بطنكم تطم جنس طمام والبلد انعدم فيها الليمون
وقولوا لي بكري لازم من هسع
يدبر ضرائب المهرجان مقدما
| |
|
|
|
|
|
|
|
|
|
Re: مهرجان سودايز اون لاين...حيكون اون لاين (Re: Raja)
|
Quote: <وهناك سؤال هام ، كم من السنين غاب صاحب الراي هذا ؟
|
كل سنة وانتم جميعا بخير ...تماضر ودقاسم ورجاء
سيد الراي كل سنة بمشي يا ودقاسم...علّ السنة دي جيت راجع بطني طامة طمة....علي غير المرات السابقة...الجري زاد علي الناس
وبعدوا اكثر من السودانية البنعرفها...نجدة مافي...فزع مافي..اغاثة ملهوف مافي....تندق في الشارع والحجازين ماشين بي جنبك
زي كلاب الخرطوم الما بهوهون ان فلعتهن بي حجر...في طمع وجشع لا حد له وسباق قروش وموبايلات...في رقشات وامجادات لعرقلة الحركة..وعدم نظامها...في سباق مباني...غنا فاحش وفقر يبكي علي الطرقة البايتة..
الروشيتات الحايمة للدواء كتيييييرة والمرضانين اكتر من المرافقين والزوار...والمطار ياهو المطار...
الونسة بقت بي MESSAGES
والببيع الموية عندو موبايل....لا لحوجة اتصال او اهميةاو علامة لراحة وانما دهشة
والناس لا تبالي...الخرطوم جغرافيا وصلت الجزيرة والغرب من ناحية امدرمان ومن ناحية الشمال مافي مكان فاضي حتي الجيلي التي كنا نسافر لها سفر ونفطر في الطريق قبل ان نصلها...
الناس لا تناقش اشياء جادة وما عادت تستغرب الشاذ والدخيل من السلوكيات....وما يثير فيني وفيك الدهشة والغرابة اصبح عادي هناك
المنطق كله قدر ظروفك ومشي حالك باي وسيلة وطريقة
ويا تماضر لا عليك جناح ان قلتي انا الكنت في البلابل وكتبت ليك
لاني لحظتها كنت موجوع موجوع موجوع ولا هسي...امكن التعميم هنا مضر ولكن لما كتبت ليك كنت اعكس لك حالة لحظية وانا شاهد عيان ...حتي حركة الرقشات عبورا من البلابل الي محطة سبعة واستهتار اصحاب هذه الشويطينات كان جزء من المشهد...فقيمة الانسان عندهم هو هذا الاف جنيه قيمة المقعد...ولا رقيب ولا حسيب...تراب وغبار بلا هواء يثيره وانما يستثار من ارجل المارة والمتسكعة...شمس حارقة قبل دخول الصيف ...تناقض صارخ ما بين بناية وبيت جالوص ....الاختلاف الذي يفسد للجمال قضيته...خروف العيد بي ميتين الف وهو نفس الخروف الذي يتم تصديره الينا واشتراه ابوي بي ما يعادل مية وسبعين الف...تعادل واحد في المية من الدخل بينما هناك يمكن تكون كل الدخل....البامبرز...في داعي يبيعوه بي الواحدة ويربحوا فيها 300%
المدارس بي قروش...والمستشفيات بي قروش...والدواء بي قروش...والبترول كان ارخص المستورد...والسكر ارخص المستورد واسعلي الناس البجيبوه من مصر...
الحكاية جايطة ان قعدت احدثكم لا الصباح ما بتكمل
| |
|
|
|
|
|
|
|
|
|
Re: مهرجان سودايز اون لاين...حيكون اون لاين (Re: nazar hussien)
|
"ملحوظة: يا جماعة والله العظيم ما باقي لي خالص انو المهرجان يكون في الخرطوم في قاعة الصداقة والرجال يلبسوا البدل ونحنا نعمل شعرنا في الكوافير.. ونتبسط ونتصور.."
الأخت رجـاء،
دا كان رأى من أول يوم طرحت فيـه هـذه الفكــرة، لكن راح شمـار فى مرقـة.
أما رأى الأن، فأقتـرح إنو المؤتمــر يكون فى تشــاد فى مخيمـات اللاجئين.. كل واحـد مننا يجيب معاه بطانيـة وعلبتين لبن فورموست أو نيـدو فقـط للأطفال.. وشــوفـو المسـألـة دى حتعمل فرق واللا لا.
أعضاء البورد يمشـو يسـاعدو الناس ديل.. كل واحـد من منطلقو.. كان كوز، كان متمـرد، كان متعاطف.. ما يفرق.. وأنا أكـد مافينا زول الناس ديل حيسألـوه من إتجاهاتـه الفكــريــة!!!!
عليكم الله أنقـروا فى هـذه الوصلـة وشـوفوا الحاصل:http://www.sudan.org
وشكـــرا
| |
|
|
|
|
|
|
| |
Tumadir
اساسي
ودقاسم
ahmed haneen
Raja
Abureesh
فيس بوك
تويتر
انستقرام
يوتيوب
بنتيريست