كتب الكاتب الفاتح جبرا المتوفرة بمعرض الدوحة
|
|
 عندنا عواسة آبري
|
تلفزيون السودان _ إحتفالات الإسراء والمعراج أعاده الله علينا وعليكم بالخير والبركات
يعني يا شباب رمضان فضل ليهو كم شهر ؟
كم شهر ؟ قول كم يوم
يا زول ؟ !! فعلا بلد إعلاما ضعيف .. طيب ما تمد جك الموية ده , عطشنا من هسع
حليل رمضان في السودان , المواعيد دي تجي ماري بي أي شارع تشم ريحة عواسة الآبري
انا ما بزهجوني إلا شفع حلتنا البجهزوا ليك ضرى رمضان الجاي قبل ماالستوت تكمل
عاملين زي طائرات الإنذار المبكر
رايكم شنو السنة دي نعوس ؟
شنو ؟ نعوس آبري قصدك ؟
والله ده حيكون حدث الساعة , إتخيل عزمنا أمهات عيون خدر ديل يجن العواسة
يا ناس الشغلانةما بالصعوبة دي
ما صعبة ؟ والله أنا امي كانت لامن تجي للعواسة بتعمل نفير في البيت الأمريكان ما عملوهو لي بغداد
يا جماعة انا جادي
يا زول غير قناة الهم دي كان حاج نظرية ده يغير أفكارو
طيب الحيعوس ليك منو ؟
انا
انت ؟ جيب حلة العدس خلينا نتغدى ولا نتعشى ما عارف
انا الفكرة دخلت راسي
وينو الراس ؟
بقينا اتنين , بعدين ما تجونا تقولوا تعبتوا من عصير البودرة
ياخي خليك منطقي , وين حتلاقي فتريتة الزريعة ومنو الحيعمل ليك الخلطة ؟
تعرف مرات انا بتخيل معامل كوداك للتحميض ما بتعرف تركيبة الحلو مر ده
انا بعرف انتوا بس قولوا خير
دايرين فتريتة في البلد دي مافي نعمل شنو ؟
نجيب قمح
آبري قمح ؟ يا جماعة أنسوا الشغلانة
انا زاتي أول مرة أسمع بيها دي
يا جماعة الأرضة جربت الحجر
بس ما جربت تقرض ليها آبري قمح
من وين نجيب القمح ؟
تعجبني أسئلتك العملية , نشوف المرة البتبيع قمح للسياح في صينية الحمام
نشتري منها قصدك ؟
نحنا سياح ؟ نتابعا ونشوف بتشتريهو من وين
دي واحدة من سلبيات رأفت الهجان وروايات الجيب
طيب نسألا , كدة مفهوم يا أسامة أنور عكاشة ؟
إنت متأكد القمح ده بكفي ؟
دي إغاثة السيول ما جابوا ليها قمح قدر ده
وحنعمل الزريعة كيف ؟
نفرش شوال ونفرش فوقو القمح ومن فوقو شوال تاني ونرش بالموية لي مدة اسبوعين
الوصفة دي في صفحة كم من كتاب أبلة نظرية ؟
طيب عنقريب ما عندنا وشوالات كمان , خلينا نشد القمح بليلة أرحم من العدس
جبت شوالات من مصنع الدقيق
مفضوح
ده سريري , انا حانوم وين ؟
فوق السرير ما تحتو يا ميكانيكي
إنت متأكد بس كدة ؟ يعني ما دايرين طين بحر ؟
لا دايرين مزهريات
الإسبوعين ما تموا ؟
فضل تلاتة أيام
ياخ أنا شايف في شعر قام في القمح وفي حاجات بتتحرك فيهو يكون داير مبيدات حشرية ؟
المبيدات دايرنها ليك انت ده
طيب الحاجات القامت فيهو دي نعمل ليها شنو ؟
نبيعا لي شركة ليف العدة
وده حتطحنو وين ؟ حنلاقي لينا طاحونة وين في البلد دي قصدي ؟
ندقو بالفندك
فندك ؟ أحسن مفرمة اللحم
تعرف مفرمة اللحم لو كانت فتحتا كبيرة كنت دخلت راسك ده وفرمتو وشلت عينة من المخ إن_وجد_وعلقتو في المتحف وكتبت عليهو أبلد إنسان في التاريخ
يا جماعة بالجد حنطحن البتاع ده وين ؟
قلت ليكم ندقوا في الفندك وبعدين نسحنو بالسحانة
قصدك الخلاطة ؟
دايرين مرتبة قطن
ودي علاقتا شنو بالخلطة ؟
عشان الإزعاج , عارفين الجيران الجنّهم نقة ديل
قصدك عازل صوت , دي حصاد ما فكرت في التقنية دي
|
|
 
|
|
|
|
|
|
|
|
Re: عندنا عواسة آبري (Re: tabaldy)
|
يا جماعة قربنا
يا زول ده داير ليهو شهر
لا ياخ كلها يومين
أسمعوا نتقسمو , السحانة بتساوي كباية عصير , يعني كل زول يسحن ليهو تلاتين كباية
ولو طلع رمضان تسعة وعشرين يوم نكون تعبنا ساي ؟
طيب مش ممكن يطلع واحد وتلاتين ؟
لييه نحنا في ليبيا أصلو
إنتهينا
الباقي ده نعمل بيهو شنو ؟
نزرعوا لي رمضان الجاي
ده لو كنا حيين ما متنا
لكن الدقيق ده لونو اصفر كدة مالو ؟
ده آبري نادي المريخ
اهاااا انا قايلو قشطة حليب الهلال
ياخي بعدين الصلصة بتغير لونو
صلصة ؟
دايرين كزبرة
كسبرة ولا شمار ؟
بقدونس ,,, نحنا دايرين نعمل طعمية قمح ؟ قال شمار قال
الخلطة دي حتقعد كم يوم ؟
كمان يومين
كمان ؟ ياخ البيت لو جا بوليس ما حيصدق انو هنا مافي مصنع كحول بلدية
بختك غايتو ضمنت ليك مهنة , راس مالك برميل وجردلين وكم عبار
وده حنعوسو وين ؟
إتفقت مع بتاع تاكسي يجي يودينا الخلا , كأننا ماشين رحلة
وحنعوسوا في شنو ؟
شلت صواني الفرن وإشتريت لي قطعة صاج حرقتها عشان تبقى صاج عواسة
حرقتها بي شنو ؟
جاز ,, ما بي زيت , معقولة
وحننزل الجرادل دي كيف قدام ناس العمارة بي ريحتا دي ؟
بي حبل بي الشباك الوراني
اعمل حسابك ما ينكشح في التاكسي
ياخ قربنا اصبروا
ايوة هنا يا أسطى
أمشي جيب حطب إنت
والغاز جايبنوا لي شنو ؟
مش يمكن يقطع
جبت القرقريبة ؟
القرقريبة دي شنو ؟
حاجة زي مضرب التنس
أنساهو الحنكوش ده , ياهو دي القرقريبة
يلا نعمل اللداية واللداية يا سيد أربعة حجار بنرفع بيهم الصاج عشان نولع تحتو النار , قبل ما تسألني
البتاع ده مالو بيبقبق كدة ؟
يمكن الصاج سخن , برد النار
ياخ ده بتكشح زي اللوحة السريالية
سخنو
أسمعوا أمشوا إتغدوا وخلوهو لي
أها يا الجعلي حتسويهو حمرة عين ؟
خلي حاج نظرية ده
أسمع نحشي ليك سندوتش ؟
سندوتش شنو ؟
موية ماجي , ما عدس يعني حيكون شنو
تعالوا شوفوا أول طرقة شكلها حلو كيف
ومالا عاملة زي الفرومايكة كدة
ياخ ضوق وبطل كلام
يا زول مالك ؟
داير أمي
أمك وين يا زول انت هنا
نادوا لي أمي ما عارف
أدوهوا موية
أنت عملت الفلفل كتير ولا شنو ؟
داير أمي
ما بتموت ما تعذبنا ساي
ياخي إتصل بي بتاع التاكسي خلينا نحصل المستشفى
طيب خلوني أكمل الطرقة التانية
أبنوسي
| |
|
|
|
|
|
|
| |
اساسي
فيس بوك
تويتر
انستقرام
يوتيوب
بنتيريست