رســـــــــــالة من تحــــــت المــــــــاء

ياسر ع العزيز+ تهاني
انا مالاقي عناوينكم عشان كدة بكتب ليكم هنا انتو عارفيني انا مطرطش .. ضيعت العناويين
تعرفو اجمل حاجة اسمعها في الستة و تلاتين سنه الاخيرة كان صوتكم في التلفون و سؤالكم عني بعد السنين الطويلة دي
انا كويس مرات بزهج و تاني بفرح و لسة بسرح كتير و بضحك براي
عملت حاجات كتيرة كويسة هنا و برضو حاجات ما كويسة لكن
بقدر اقول انو انا مرتاح
الهجرة قرار قاسي جدا و واقع اقسي ... الناس هنا طيبين لكن زي ما قالت والدة احد الاصدقاء و هي في
زيارة
بلدكم يا ولدي عجيبة في الشتاء شجرها عريان و نسوانها لابسة .. و في الصيف نسوانها عريانات و شجرها لابس
المناخ هنا اتفة من الفريق القومي النايجيري في كاس العالم الاخير
الشتاء طويل و قارس و مراكش بعيييييييييييييييييدة
لاقيت هنا بت لذيذة خالص .. اسمها خدر (انا بدلعها كدة ..) حبيتها بالجد لمن عرستها ليك لكن هي شكالة جنس شكل و
لذيذة جنس لذاذة (لذاذة ببسي يا ياسر) بتزعل مني كتييييييير جدا و برضيها كتير اعتقد اننا حا نعيش حلو
طبعا هنا الجو زي ما قلت ليكم تافة و دة اثر علي معدل نمؤ الشعر لدي الراشدين من امثالي و انا كنت احد ضحايا الجو و الماء الملوث ( لكن علي خفيف) ... لكن منعمشوف صلعتو كبيرة .. انا سمنت شوية و عندي اصدقاء هنا
الهولنديين شعب بخيل و ثقيل و طيب احيانا لانو لمن يتكلم معاك بقول ليك انا ما عندي مشكلة لون و عنصرية مع انو انت بتكون بتتكلم معاة عن اسعار البنزين
الشتاء هنا بايييييييييييييخ .. تتزكرو في السودان مش كنت بحب الشتاء .. اسع بقيت موية من التلاجة ما بشربها
بعد توحيد العملة الاقتصاد بقي ضعيف جدا هنا معظم الشباب بحاول يطلع لي دول تانية يا تهاني لشا اخبارها شنو تعرفو سليمان العب من ما وصل اوربا ما شفتو لكن اخر زول شافو يا ياسر قال لقاهو و اقع في خور مطرف كدة في مدريد
عليكم الله اكتبو لي عن الخرطوم .. الحصل شنو بعد ما مشينا انا سمعت اخبار كتيرة ما لذيذة عن الشعب السوداني الكريم
اكتبو لي
وروني انتو عاملين شنو
و امي اخبارها شنو و ابوي بشاكل منو بعد ما انا سافرت والله ياريت اقدر اشوفو هسع انشاء الله يشاكلني قولو ليهو انا خرمان لي شكلة , نهرة , شلوت , اي حاجة منك بس اشوفك و اشوفكم
ياسر هنا والله في بناطلين خطيرة و تي شيرتات رسل المقاسات
تهاني .. اسف لاتوجد لدينا خمارات و طرح ... للاستفسار اتصل بالسعودية
مع السلامة