|
اتوكلت عليك يا الله 00000 للرائع هاشم صديق
|
(1) اتوكلت عليك يا الله شديت لحصانى درعت السيف وفى المخلاية حشرت الزاد وقُت بسم الله ركبت مرقت غبار الحافر غتّا الحلة. اتوكلت عليك يا الله مرقت اكوس ولاد حسب الله الجونا (مناظر) اول مرة وبعدو اتعرض الفيلم الاصلى (القدر البغلى) اتمدّ مخافر بطلو مغامر منع القُحة
(2) كسّر وكفّر وعجن الملة باع ساقيتنا شال عافيتنا رفد اولادنا ورقّا الشلة. ديل ناس اضرب انهب اختف لفّق شرّط فتّق ربى دقيتنك بس شان تسرق اقبض حاصر بشتن
(3) حقق اغرف اسرف كضّب اختف وان كان راجل اغضب واهتف تجيك الكشة تقول (ست عرقى) وتطلع كافر بره الملة مهدور دمك ومازول قِبلة
اتوكلت عليك يالله مرقت اكوس ولاد خادم الله السفّو الخزنة وكتلو الناقة بالجبخانة وحلبو بقرنا صفايح جبنة
(4) طفحوا لبنّا وسووا جمودنا براميل سمنة دسوا عروسنا فى ليلة الدخله وسجنو عريسنا فى يوم الحنة
ديل ناس دنيا سياحة وراحة وبرضو كمان محجوزة الجنة
جابو قٌرادهم عاس فى وريدنا ومصّ لحَمنا صنّوا اضينا صراخ (حرّينا). سرقوا الجوكر فى الكوتشينة وجدعو البايظ كلو بلدنا شتلو اضينه فى كل جنينة (5) سووا سواتهم عاسوا عواسهم واتمحّنا راسنا اتكهرب عامل زنّة واتبشتنّا واتعشكبنا واتمسكنّا اكلو عشانا - تقول غنماية - وشربوا عسلنا وطردوا نحلنا. رقّوا حمارهم والى معالى عملوا مسيره شنّه ورنّه اتوكلت عليك ياالله مرقت اكاتل ناس سعد الله ولاد رخم الله قت بسم الله
(6) نبينا معانا ما تغشانا قلت الليلة ابازر راجل زى (ترسانة) لقيت الفارس زول (كوديانة) قلت اشوف كان القى حريف ومخيف وتحدى لقيت (حنكوش) لا يجيب لا يودى قلت اواجه وش لى وش لقيتو كتالهم كيد بالغش ....... قلت اجادل بالقرآن وكمان بالسنة لقيت الرد ضرب الانكل وفلق الجٌلة (7)
طلع (فرمان) من حاج (طرزان) سوانى ملاحد نافر كافر هَدَر الدم وقال حرّم عملنى كنافة عصرنى جوافة اكلنى جغم ديل ناس الله الجونا كرامة حصدنا الذلة. ديل الخبرا الجونا يعافرو صلاح المكنة ابت ما تندوّر بالمنفلة. ديل الجونا يعافوا مرضنا زادوا العلة. ديل ناس (اعصر) تقضى الحاجة ( صلاحهم كضبة وليلهم عرضة دقونهم هاجّة. ....... عوير السيرة الكان تامبيرة اترقى وزير واتجنّح طيره. وحاجة هنايه - زمان غنماية- سووها أميرة. ديل ناس الله خير المله الخربو الرصّة وجاطو الحله. الراقص اميرهم أب تمبله ديل ناس كامرى وعشرين فيللا. وسٌمان وأٌمان الواحد شاحنة وقاطرة تريللا
اتوكلت عليك يا الله (9)
شديت لى قلمى وشلت دواتى مرقت اكوس الطغمة الشلة مرقت أبازر مرة عصابة ومرة المافيا ومرة خلاقَه مرة الوطنى مرة الشعبى مرة اللٌعبى. مرة جرايد مرة قصايد مرة عوايد ما بتتخلا. ناس كضابه ناس مكريّه تسد الخانة.
وناس رجّافة بتكتل روحها وبى نشّابها
(10)
وناس ما بتعرف غير قانونها ختم الغابة. ناس مأمورة وناس مكسورة وناس ما بتعرف غير تنذلاّ اتوكلنا عليك يا الله بكره بنمرق كلنا بره. من كل مدينة من كل حوراى من كل حله بكره بنمرق كل خلق الله. ما نخلى حرامى سرق جركانة ما نخلى منافق طار بالزانه ما نخلى معولق داسنا اذانا ما نخلى الباعو النيل وهوانا. (11) ما نخلى العقروا لناقة صالح وحشٌوا وريدها وبالجبخانة ما نخلى السووا الدين تلجين والعرقى مدوّر عن عشمانه.
اتوكلنا عليك يا الله بكره بنمرق كلنا بره من كل مدينة من كل حوارى من كل حله. نقوقى نصفق للحريه غببنا كاسر ميه الميه ندوس الكاتل والف سريه (12)
نقلع حقنا بالزنديه ناخد تارنا وتبرد نارنا ونبنى بلدنا. ود أبو سوار
|
|
|
|
|
|