أسنان لولي صافيه تغالب الفضه والدهب عينين برق ساحره رشت على الناس اللهب شفايف طيور حمر سابحات فوق بحيرات سمنه وهاك ياعنب القوام زي النعام والغرور طبيعي ماهو مكتسب شايله جيدا زي شيل الرجال للأزيار والقرب مشت مشيا زي غزال بيرقص صامد تحت الشهب مرت فوق الأرض طيف دقت بالرجل صوت الكعب حصان كان بهرول فايز سمع الكعب قام انغلب مرفوع عن الحصان العتب مهرتنا تقدل مال الشعر شد معاهو الشموس والسحب همست بخت نسيم دافي ملانا وقلبنا بيها التهب من جوا حوشا تحلم والحلم نسيم يجهجه طيرالسما اللي اغترب تمرق في الحله تجهجه في الشعب وتزيد في البلد الشغب مرفوع عن الشعب العتب لون الحنطه لون جيدها لون صدرها لونها العذب لاتلقاهو في أسبانيا لابيروت ولابغداد ولا حلب جسمها العاج بين توب ملفلف في الدغش يرقص من طرب الطرب بايت من الليل لما ماست و هبت زي الأبنوس الوثب مرات تنور زي يراع بحر متدس بين مرجان الشعب ومرات تفور دمنا و دم دمنا ودمنا يتوه منو القلب مرفوع عن دمنا العتب ونخت العتب علي القلب شيلت نسيم الليل ريحة الفل المخالطه الشاف والحطب فراشات الدغش لما حامت فوق فراشا عقلها انشطب مرفوع عن الفراشات العتب والنخل في البلد حس بتوبها حك السعف شال النخل بس من حكة توبها للسعف وأمسى النخل يسقط في الرطب مرفوع عن النخل العتب كيف العتب والنخل متل الأمل عالي ما بنهد ولا بنكسر و آآه من ست الأمل الما بندحر طلتها الصباح بالوشاح مرات تفك الهموم والكرب ونحنا من بعيد تحت الشدر نتاوق عن كثب وننسى البصر وغض البصر - دورية الكجر وعربية الكجر ونقول حليلناالكنا ما بننهز ولا بننرز وكنا نفلق بالحجر بقينا نشوفا نبقا مسعورين كأنو هبشنا داء الكلب مين شافا حتى لو عمدة بلد تلقا اهتز فيهو الشنب حليل بلدتنا الحتى عمدتنا نراهو اهتز من رجليهو للشنب مرفوع عن العمده العتب ونخت العتب علي الشنب تراب الحله والحصاص يتمنى آآخ لو رجلها دهست عز الطلب دهسا ما دهس ، رجلها ما رجل ، دهسا لمس خطوا هرب لو ناسنا سمعو بالغلط أنو جاها زولا خطب كان العيون ما استحملت شوفتا محننه ودمعها انسكب وزيدان ليه غنى شفت الدموع خلف الرموش ؟ داكا كان السبب مرفوع عن زيدان العتب أعقل عقالنا يجن ويفطر رمضان ويصوم لها يوما من رجب أب دقن غنى رهيب والله رهيب وكل شي معقول خاطفو الطرب شيخنا قلنالو ما قلت نوبه ! قلبك وين ؟ قال حبها قد خلب يا حر بقيت عبد - قلنالو أرجع للخلق ، قال يا ناس دا العجب حبتين كمان في دقنو ريل قلنالو يخ يخ قال الاستغفار قد وجب قلنالو أي انت ماك نصيح الليله نقرالك ياسين رجف الشيخ وارتعب قال : زي دا ماااافي ، زي دا مافي لافي الحياة والخبرات ولا الكتب نقول شنو يا ناس ؟ مرفوع عن شيخنا العتب قلنالو بطل عواره - الجن بتداوى كعبه الاندراوه ، قال كعب الكعب زي ده برضو مافي ، لافي النوبة لاشرقنا لاجنوبنا لاغربنا ولا العرب قلنالو خلاس طيب زهجتنا بطل عليك دينك كبكبه وضهب
كفايه ياخواننا نقنقه وحسد شان ما تقرالنا من شر غاسق اذا وقب وزي دي زاتا لا بنطلب منها القرب ولا بنتشرف منها بالنسب وأخير ما نشطح ونقوم نختمها بالقول الذي الآن قد وجب سبحان الله وتبارك الخالق واهب من أراد اذا وهب
1996
09-25-2003, 07:20 AM
سجيمان سجيمان
تاريخ التسجيل: 10-03-2002
مجموع المشاركات: 14875
الأخ سجيمان up wayn ? lao alfog algadeem almajhool da UP falle te7et da (UPside down) and for real notice that it is written and ending with the same words, and the same order. استخدمت نفس الكلمات اللي أنهيت بيها كل جمله و بنفس الترتيب
الكريمة المكرمه زي ما شايفه 1996 قبل ما نتعلم حاجه اسمها غض البصر و نعرف معناها شنو ، أيام كانو بقولو لينا مادام نيتكم حسنه ، فيبقى أعملو الدايرينو وأنساكم من تنظيرات القرآن و المفسرين ديل لأنو كلو شي أساسو النيه وربنا كان ممكن يختصر القرآن ويقول أعملو بالنيات وكان المكتوب برضو يا كريمة الشمايل يا أصيله قبل ما نتشرف الشرف الأعلى بطلب يدكم الكريمه وننال بها شيئا من الأعالي كتبتها قبل سبع سنوات بدون أي مناسبه الا أني كان نفسي أبوللمين يغنيها وسبحان الله بعد كتابتها باسبوع فقط وقبل أن أسلمها للشخص المسؤول ، رآني أحدهم أحمل جيتارا أعزف عليه ، وناداني ثم ذهب بي الى بيته حيث وجدت عنده مكتبة اسلامية كاملة من الأشرطة الصوتيه ، اختار لي ذاك الأخ جزاه الله ألف خير بعضها وأهدانيها ، ومنذها تغيرت أشياء كثيره ، بعد أن كنت أضحك على أمثال هذا الملتحي الأهبل المتعصب ، وأقول معاكي برضو : سبحان الله كتبتها لتغنى قبل ما ربنا يهدينا و يكرمنا ولما أكرمنا ، رفعنا فوق ، و زاد من كرمو و كرمنا باكرامنا بيكي يالكريمة المكرمه بس لو كنتي صبرتي ، ما كنتي احتجتي للتسبيح لاكين انتي مصداق لقول نبينا (فليقل خيرا أو ليصمت ) ، وقلتي الخير والحمدلله أني بناديكي بأم الخير
انتي يالبتسبحي فوق وناسيه أنو الراح زمان ولى وانشطب بعد ما عرفتك يا غاليه نسيت الدنيا وبقيتي همي يا دره ودهب كايس معاكي الجنة في الدنيا و النجاة من جهنم واللهب مين غيرك تنجيني في الآخره وأقزقز معاها بالحب والعنب روعتك يا ست البنات كلهن فيها شيتن طبيعي و شيتن مكتسب وخشيمي يعدم المويه لوما انتي الساقيه بالأكواز من القرب وبخاف لو خنتك حتى لو بنظره من صيد الصواعق والشهب كيف أخون ست البنات وزينة الدنيا أبقى زولن كعب كعب كعب ولو ما كسبت دايما هواكي أبقى الزول اللي كان خيلن وانغلب مرفوع دايما عن المغلوب العتب أحلامي معاكي يا شجرة الياسمين يا فايحه مكانها فوق السحب وانتي المعاكي ما عندو غير بطباعك ينخلب و قليبو بهواك يلتهب لو كان القليب نام عنك مع العيون يبقى القليب حليلو اغترب متل الجريوات اللي يوم عرسك حترجع تملا البلد بالاحتجاج والشغب مرفوع دايما عن البلد العتب يا ساميه بأخلاقك ضقت من فنك و ذوقك حلاوة الماء العذب وبرضع من حسن دينك وعلمك زي الوليد الفي الأبقار نازل حلب ولما رجلك تمشي وتضرب في الأرض من غير صوت برقص من طرب لا صوتن للكعب يضرب لا ريحتن تجي من مسيرة نمرا قد وثب وين الريح تجي وانتي كايسه من يثرب رطب ومن مكة ذكر الشعب انتي اللي جوا بيتنا أميرة أميرات و صلاتك من جوا جوات القلب مرفوع دايما عن قلبي العتب انتي الزيك آآبت الأحفاد ما محتاجه للشاف والحطب انتي اخترتك بديل الحور العين الشطبتهن من عقلي شطب مرفوع دايما عن عقلي العتب وانتي يا عفيفه يالماك خفيفه متل مريم لما جات جنب السعف هزيتي جذع النخل بوجودك هزيتي حياة قلبي الداير ينسعف وبقيت بعد ما اتشرفت و خطبتك متل النخل ماشي أسقط في الرطب مرفوع دايماعن جسمي العتب بدورك يالما بتنحني ياالرافعه راسي وقامتك ما بتنكسر يا ست الأمل وعزتك فوق رقاب الناس ومعاكي تب ما بندحر كيف أندحر ومن يوم عرفتك نسيت كل الضيق يا ساحره والكرب وببحت جواكي عن سـرك وبحاول أكشف ذاك السر عن قرب وعن كثب ياللي من يوم عرفتك قويت وما احتجتا تاني لقوة غض البصر عشان البصر قد انحسر عن غيرك وحماك ربنا من خبث الكجر بت الأحفاد ياللي رجلك بتمشي وتعفص وتشرف التراب و الحجر والناس تعاين تنسى البصر و غض البصر تعاين متلها متل الكلب والكلب حلاتو عويناتو تحرقو من شوفتك و يتلوى فيهو الشنب حليييل أب ضنب البقا يرجف من شوفتك لما يتشابك فيهو الشنب مرفوع عن الشنب العتب ونخت العتب علي الضنب تراب الحله والحصاص وناس الحله يتمنو لو رجلك تدهس عز الطلب دهسك ما دهس آه ، رجلك ما رجل آه ، دهسك لمس ، خطوا هرب لما سمعو البشر يا قمر أنو جاكي زولن من بوردن قديمن خطب البوردات غارت وباندويثاتها فارت وقالت أريتنالحقناالزول الانسكب أنا المسكوب يا درة الأحفاد ما الدمع أنا المجنون بيكي و بالسحر و بالودع انتي السبب انتي الشبب .. انتي السبب .. انتي الثبب .. انتي الثبب .. انتي التتب مرفوع عن جنوني العتب وحاتك قلبتي شهوري أبدا بي رمضان أمر بشعبان وأختم بي رجب ياللي البنات بنسو معاكي في الحفله يا قايمة الليل كل الطرب وين الطرب يا ست العجم والعرب وصوتك بالنصايح للأسماع قد خلب تهمسي للبنات كفاكن رقيص يوم الخميس قدامنا جمعه يابنات ياللعجب ما بتخافي من قولة الحق معاهن لغاية ما يقولن استغفارنا قد وجب كيف ما يجب ؟ وانتي الشعله في ايدك تنور لينا وترعب من لا يرتعب وحاملة اللواء في الجامعه ايدن لواء والتانيه حامله باقي الكتب ربنا يا كريمه يحفظك قولي أعوذ برب الناس وصلي على ابن آمنة ابنة وهب ومرفوع عن جميع الناس كل العتب اتعلمت منك يا أميره أنو الأيام مثيره فيها الجميل وفيها الكعب ولازمن علينا ننبسط مهما جارت الأيام شوف حال الفرس والروم والعرب وقلتي لي ما يهمك يا غالي برضو وما تهتم بكيد الكباكبه والضهب كيف يا غاليه أنسى الضهب ؟ ديل بدورو الخبت لو شافو القمر اذا وقب ويا ست الغاليات بقسم برب الكعبة قدام البورد أني متشرف منك بالنسب وبحلف برب البورد أنو الاخلاص ليكي قد وجب ، وكل الخير من أجلك قد وجب لأنك عندي كل الخير وجيهك فرحة الدنيا ودواخلك زي شعاع اللهب سبحان الله فعلا يا راس الشرف والعزه والرفعه والأدب يا هبة الخالق وأعرفي أني سجدت شكر لما الخالق اياكي لي قد وهب وسبحان الله وبحمده أنو عندي أقصى من أحلم بيها من الواهب الذي يهب مرفوع عني يا بت الأحفاد العتب ؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
obay_uk
سجيمان
bint_alahfad
فيس بوك
تويتر
انستقرام
يوتيوب
بنتيريست