|
|
 حشّاش بي دقنه
|
كل يوم أصحى.. أقول .. الليلة يا بت يا مريم تغسلي الهدوم.. وتنشريهم.. وتكوي البنشف منهن.. وتصلّحي أوضتك.. وتحشّي لي أمّك البصل... وتقشري التوم.. تاني أقول.. يا بت انت عندك مشروع تخرّج... أجّلي الغسيل ده الليلة وأقعدي أقري المقالات عشان تفهمي الحاصل شنو.. وتكتب بحثك .. المفروض يكون ضربه في مجال الكومبيوتر .. يخلي عمّك بيلي يحرد ليك الموضوع كله... تاني أقول البحث ملحوق.. إنت الليلة تقري لي ناس سودانيز أونلاين ديل.. طوّلتي منهم.. ليك زمن.. شوفي الحاصل معاهم شنو.. وأكتبي ليهم.. تاني أقول بكري كان فتحتي ليك بوست جديد ممكن يبلغ عنّك عشان الباندوث تعبان الأيام دي.. بالله الواحد يفتح الموقع.. سوداني عدييييييل.. غير الإسم.. وغير اللهجه.. الواح بالله الواحد مما يعمل "لوغ إن"... يحس زي الصفّق وقال "حباب ناس البيت"... تدخل لي جوّه شويه.. تلقى التياب تتجرجر.. والعمم تتطاقش... والشباشب تكوش.. بالله حتى ألوان حقت الموقع .. تديك ريحة الطمي .. ألقى أب حراز كاتب ومنظّر في أسبوع المرأة.. أخبار.. جماعه بي هناك بتناقشوا في الحق على البشير.. ولا قرنق.. ناس الموصلي يدندنوا على السلّم الموسيقي... أفتش مخصوص ...لي بوستات د.سيجيمان ... ذات الخط الأحمر.. والتي تخترق الخطوط الحمراء.. أضحك لما يُبكي... أقول أكتب.. أحتار أكتب وين وأقبّل وين... تاني أقول انتي يا بت يا مريم.. طوّلتي ما ضربت لصاحباتك.. أضربي ليهن شوفي أخبارن.. شوف جاي جاي.. ألقى اليوم كمل.. بالله كل يوم على الحاله دي... اليوم ورا اليوم.. والأسبوع ورا الأسبوع..
ناس الأردن بسمّوا نوعي ده "زي أم العروس.. مشغوله بلا شغله!".. عندنا بسموني.. حشاش بي دقنه... الليلة بحش الحتّه دييييك.. والحته ديييييييك... ولا بعمل شي
التحية لكم جميعاً...
ومشتاقون
بنت الحسين
|
|
 
|
|
|
|
مريم بنت الحسين
جدو
فيس بوك
تويتر
انستقرام
يوتيوب
بنتيريست