|
|
 حبوبة 000يا حبوبة
|
حبوبة نلك الشخصية الرائعة الممتلئة بالدفء والحنان 00والتى دائما ماتترك اثرا ما فى كل حفيد من احفادها 00 معظم جيلنا تربى فى كنف الحبوبة حيث كانت معين لا ينضب من الدهشة ومستودع هائل للحكايا ودفق من الحنان والحب 000 فى زمن اعتقد انه مضى أخذت الحبوبة مكانة متقدمة فى الهرم الأسرى فهى المرجع فى الحكمة والخبرة بالنسبة للاباء والامهات وهى مصدر الحنان والحماية بالنسبة للاحفاد وهى الفأل الحسن بالنسبة للبين 000 والحبوبة شخصية من طراز فريد اكتسبت خبرة من الحياة أهلتها أن تكون مرجع فى الكثير من الأشياء الحياتية 00 مثل التداوى بالأعشاب وهو ما يعرف اليوم بالطب البديل 00 كأن تقول لك الحبوبة 00 عندك شنو يا حشاى 00 فتقول لها 00 بطنى موجعانى يا حبوبة 00 فتنادى ابنتها 00 يا بت أغلى ليك حبة حرجل وجيبيهو 00 وتلتفت اليك 00 أشرب الحرجل ده والكمدة بالرمدة 0000 وللحبوبة ذخيرتها اللغوية من المصطلحات المعبرة والتى تبدو غريبة فى بعض الاحيان 000 حيث تلجأ الحبوبة الى الغافية عند ممارسة تدليل احد احفادها كأن تقول 00 وليد محمود 00يكبر ويجود أو عبدالرحمن دخرى الزمان أو 00ألخ 000 وهذه اللغة ايضا بها كم هائل من ألفاظ الذم مثل 00السنيح00 المعولق 00 الغبيان 00 المبدول 00ألخ 00هذه الحبوبة الجميلة أزيحت الآن من مكانتها التقليدية داخل الاسرة بفعل فاعل 00 فأخذ التلفزيون مكانها فى مجال الحكى 00 واخذ الطب الحديث مكانها فى مجال التداوى 00 والانترنت ووسائل الاتصال الحديثة فى مجال الالفة وحميمية العلاقات 00 حبوبة با هذا الانسان الجميل لك القيام والاحترام 00 ويا بورداب حبذا لو أمديتونا ببعض المأثورات والاقوال التى استخدمتها الحبوبة فى شتى مناحى الحياة 00
|
|
 
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
الاخ العزيز ..الحنين عبد الرحمن .. تسلم كتير على بوستك الرائع وكلامك الاروع عن احن الناس واقربهم لينا كلنا .. كلامك كان جميل وحنين ومنساب منك بكل صدق .. ما حا اقدر اعقب على كلامك المابنعقب .. فقط اسمح لى اشاركك بى هذه الابيات .. عن الحبوبه الحنينه واتمنى ان اكون اوفيتها حقها ولو قليل
التحيه لى كل حبوباتنا الحنان .. وعلى قولهم هم.. الما عندو قديم ما عندو جديد ..
وانا بقول ليكم الما عندو حبوبه ما عنده حنيه ولا محنه ..
..
..التحيه لك اخى عبد الرحمن ولى كل اهلنا الحنان .......
حبوبا .. حبوبا ..
لولايا.. لولايا..
كلام يونسنا ..
قمريه قوقايه..
حجاك يدغدغنا..
حنيه وآلايه..
لهيجك السكر ..
الحان ودوبايا ..
دميعتك الجاريه ..
فى الرايحه والجايا ..
تجبر الخاطر ..
زى غيمه مطرايا ..
حضنك الدافى ..
شجيره ضلايا ...
لقيمه تسندنا ..
فى بطينه صاصايا ..
جقيمه فى جوفنا ..
تزيل عطيشتنا ..
وتروى حرايا ..
رويحتك الحلوه ..
تناجى جوايا ..
هديمك البارد ..
يغطى بردايا ..
مسيحه من ايدك ..
تزيل لمرضايا ..
بسيمتك السمحه ..
تضوى عتمايا ..
كلامك الصادق ..
يا يمه يا ضنايا ..
عطفك الزايد ..
بحسو فى حشايا ..
دخريك فى الدنيا ..
ابريق ومصلايا ..
سبيحه من سكسك ..
ودعواتك الغاليا ..
حبوبا.. حبوبا ..
لولايا.. لولايا ..
ربى يخليكى ..
وتشوفى لهنايا ..
اسماء صديق الطيب الجنيد
مسقط عمان
12/4/2002
| |
|
|
|
|
|
|
|
|
 Re: حبوبة 000يا حبوبة (Re: Abd-Elrhman sorkati)
|
شاعرتنا الرقيقة سوما لك الود وشكرا للطلة000كلماتك معبرة وصادقة000يالروعتها وهي تعبر عن احد الشخصيات الهامة في دنيا كل منا00لك الشكر00واليك أختي لمحة تعبر عن تكاتف الحبوبة مع الحفيد000فمثلا عندما يسألها الحفيد رأيها في زواجه فتقول له غايتوا أنا ما بعرف لكن 000 أخد بت الرجال وان كانت عديمة000 البتعزم الضيف علي العادة القديمة أو ان تقول له00000أم خشما خفيف وأم ساقا ضعيف 00أن ضربك المطر والزيف عن خشم بابم ما تقيف
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
عفوا شاعرتنا سومة0000
ذكرت لي احدي الصديقات أن حبوبتها تدلل حفيدها
وهو ابن شقيق الصديفة المذكورة هكذا0000000000
دة الناقة المن الجمل000000
دة الفرصة المن اللبن0000000
دة العنبة الوسط العشر0000000
هل رأيت بلاغة مثل هذه
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
لهيجك السكر000 الحان ودوبايا
دميعتك الجارية000تجبر الخاطر
زي غيمة مطراية00000000000000
حضنك الدافي0000000 شجيرة ضلايا
لقيمة تسندنا00 في بطينة صاصايا
جغيمة في جوفنا000 تزيل عطيشتنا
وتروي حرايا000000000000000000
الشاعرة أسماء صديق
| |
|
|
|
|
|
|
|
|
 Re: حبوبة 000يا حبوبة (Re: Abd-Elrhman sorkati)
|
الحنين محنة اهلى الكبار ..الاخ عبد الرحمن .. ما تقول دايره اكبرك ههههههههههه
كيف حالك واريت حالك زين
كلام الحبوبات حنين ودعواتهم احن .. اسمح لى النديك شويه من نفحات دعواتهم .ونسأل الله يتقبل باذن الله
اكثر ما يعجبنى فى كلامهم لما تكون معاهم وماشى منهم ..حتى لو كنت مسافر سفرة صغيرونه.. ولا حتى لما اكون ماشه المدرسة
تقول ليك ودعتك الله والرسول يا ود حشاى ...
ودعتك لى امين الوداعه البختا البلا والساعه ..
وداعتا تغطيك وتحفظك يا ود بطنى من كل بلا
اخى عبد الرحمن فى احلا من الدعوات والامنيات دى ؟
والله ما اظن
تحياتى ليك مره تانيه
وربنا يديك الف صحه وعافيه ويحقق كل دعوه من دعوات الحبوبه ليك ولى كل اهلنا الطيبين
قول آمين
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
الغالي سوركتي
انا كنت عارفة انك عجوز وبتريد كلام الحبوبات ، لكني استمتعت للغايه لمداخلاتك والعزيزة سومة.. بالمناسبة انا برضو قاعدين يقولوا لي حبوبة لأني دون اخواتي مكثت مع حبوباتي لمدة اكثر منهم.. وعندي حبوبة بتقول لي عشان انا لوني اغمق من اخوتي "زرقة قطيفة المرقة" .. ورغم اني ما كنت عارفة قطيفة يعني شنو الا انني كنت بريد تناديني كده.. وبعدين لما كبرت وعرفت القطيفة عرفت حبوبة كانت بتريدني قدر شنو..
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
الحبيبه رجاء سلااااااااااام يا ناعمه يا ضل الضحى با ناعسة يا نسمة عصر
وانتى المتربية مع الحبوبات لازم تكونى قطيفه وانعم وارق من الحرير
يديك الف عافية وشكرا على مداخلتك الحلوة
نزيدكم شوية من نفحات الحبوبه فى لحظات سلام ولا مطايبه على قول حبوباتنا ..
حباب ود امى حباب الدفيق .. حباب البسدو الريق .. حباب الفرج وقت الضيق ..
حباب السلام يا سيد الكلام .. المنضوم عقد ومربوط زمام ..
الله يرضى عليك دنيا وآخره
اللهم آميـــــــــــــــــــــــــــــــن
الله يرضى علينا جميعا
وحباااااااابكم
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
العزيزات الحنينات
سومة 0000رجاء0000000
لكما التحية والود000
حقيقة نحن في زمن أحوج ما نكون فيه الي شوية حنية
ودلع للخروج من المأزق التي دخلنا فيها بسبب الحكام
أو العولمة أو الزمن الزميم 000000لذا لجأت الي الماضي
لان الحاضر شكله يكسف 000000000000000000000000000000000
والله الا ندلع نفسنا00000000000
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
العزيزات سوما ورجاء
يبدو انكما الوحيدتان
اللتان أحسستما بما يدور
في هذه المساحة من لجوء الي الماضي
بغرض التبصير بالحاضر00000000000000
لذا سوف أحاول بمدكم بالمأثورات000
عادة ما يتعلق الحفيد ويصر بالذهاب
مع احدي عماته أو أحدي خالاته وفي الحالتين
لبيت أحدي الحبوبات000 ويذهب هناك ويجد ما
يجده من الدلال ويتعشي عشاء دسم 00 وينام نوما
عميقا جدا وفي أواخر اليل يصحو الحفيد ويبكي
يريد الرجوع الي أمه000 في هذه الحالة تردد
الحبوبة 000 التمساح لي بحره وجني الناس لي أهله
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
العزيز سوركتي
مش بالليل بس.. انا مرة مشيت مع امي وكان الوقت متأخر ونمت فتركتني امي وذهبت وعندما صحيت كانت الساعة الرابعة صباحا وبديت البكاء وطلب امشي لأمي لغاية ما جاءت عربة الشغل بتاعت خالي رحمه الله في الخامسة صباحا فأخذني في طريقه لأمي..
شفت الكعوبية دي.. رغم الاهتمام والدلع والاصرار على شرب الشاي بالبسكويت الذي أحبه وعمل فطور بثلاثة انواع من البيض حسب رغبتي وعسل وطحينة لكني لم أتذوق اي شئ حتى عدت لأمي..
بالمناسبة المسافة ما كانت بعيدة.ز كلها بين شارع الدومة وجامع الشيخ قريب الله.. وانا شفتها كانها ساعات وأميال
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
سلام الحبيبه رجاء .. سلام الاخ العزيز سوركتى ..
والله كلامك صاح يا اخونا سوركتى .. وبتفق معاك انت ورجاء فى انه مهما تعمل الحبوبه وتدلعاحفادها . برضو ما بتشفع انه الطفل داير يجى لى امه ..
انا بحكى ليكم وجه آخر من الحكاية دى .. حبوبه الله يرحمها كانت حنينه جدا مع كل الناس ..ودى حال كثير جدا من حبوباتنا .. مع انى ما عشت معاها زى ما عاشت رجاء ..لكن كنا فى السودان وبعيدين منها نجى زينا زى المغتربين مره فى السنه .. وبنكون متشوقين لى اللقياء بشكل ما عادى ..لكمية الحنان البنشوفو منها .. الناس كلهم كوم .. وحبوبه الله يرحمها براها كوم آخر .. لا ولن انسى دمعتها الحنينه ساعة اللقاء وايضا عند الوداع ..
لما اتضايق فى اى شىء من ناس البيت او يكون عندى رغبه فى حاجه معينه وما لاقياها او رفضوا لى لى اى سبب كان .. طواااااااااااااااالى جرى لى حبوبه .طبعا فى الخفاء ..واشرح ليها القصة .. وتبدأ التمثيليه الفى صالحى .. حتى لو كنت غلطانه انا . تجى وتتمسك بى رايها .انه سوما لازم يلبوا رغباتها كلها والان قبل ما تتحرك ولا تانى ما بجيكم كلو كلو .. وقدر ما يحاولا يفهموها بس البت دى كده بتدلع والبت والبت ..تقول ليهم خلاص دى اخر مره ..وهى عارفه انها ما آخر مره .. ولما تجى ماشه اتلصق جمبها اقول ليها لكن بعدما تمشى بشاكلونى .... والله بالحرف الواحد فى كل مره تقول ليهم .اسمعوا ما عافيه منكم لو سالتوها ...........
فى حنية اكتر من كدة ؟؟؟؟؟؟؟؟
الله يرحمها ويخلى لينا كل حبوباتنا ..
| |
|
|
|
|
|
|
|
|
 Re: حبوبة 000يا حبوبة (Re: Abd-Elrhman sorkati)
|
منذ ستة ايام و انا اقاوم الدخول فى هذا البوست ذى العنوان المثير للشجون و العبرات فقد فقدت حبوباتى الاثنين تباعا عاما91 و 92 من جهة الوالد و الوالدة و من يومها اعتبر منزلنا ناقصا و لا طعم له برغم ان حبوبتى ام الوالدة لم تكن تقيم معنا الا اننى لا زلت اذكرها و اختها ام الوالد تحت شجرة الفايكس العتيقة فى بيتنا و لن انسى الخد المفعم بالشلوخ الحنينة و العينين الفياضتين بالطيبة و الفردة البيضا ،لذلك كلما دخلت بوست للجندرية اتحاشى النظر الى صورة امنا والدتها لشدة الشبه بحبوبة و لانها تمثل كل تلك الاصالة
و
حتى لا ابكى
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
العزيزة آية الله لنا مهدي
كلامك مؤثر ورقيق فالحبوبة فعلا عماد المنزل
وجودها ينزل السكينة علي الاحفاد ويجعلهم في
مقام الامبراطور000 لذا أتمني أن تذكريها دائما
وتستلهمي منها الحنان والخبرة والحنكة000000
أحدي الحبوبات قالت لابنها الكبير 000 آبائنا
حرمونا من التعليم 000هسة والله انا لو بعرف الساعة
كنت بقيت رئيس جمهورية00000لاحظي تقيييم المعرفة
لك ودي وشكرا للطلة الحلوة000000000000000000
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
العزيزة رقية بت وراق حبابك 1000
ودايما نسعد بوجودك0000
العزيز رحمابي000حبابك 1000
رحم الله حبوبة البتول وكل الحبوبات 000
من دعوات الحبوبات :-
الله يديك الفي مرادك يا وليدي
الله يديك عافيتن قدر سبيب راسك
| |
|
|
|
|
|
|
|
|
|
Re: حبوبة 000يا حبوبة (Re: Abd-Elrhman sorkati)
|
أتصل بي صديق لايتمتع بعضوية البورد بعد أن قرأ هذا البوست قائلا000عندنا حبوبة بعد أن نخلد للنوم جميعا000 تمسك سبحتها وتتمتم بالدعاء00 وبعد مسافة أقول لها خلاص يا حبوبة نومي 00 تقول لي دقيقة انا هسي يا دوب مارقة من السعودية 000وبعد فترة00 ما خلاص يا حبوبة نومي 000 أستني شوية أنا يادوب في أبو ظبي 00وهكذا تطوف بكل البلاد التي يوجد بها أحفادها واحد واحد وتدعوا لهم في أماكنهم0000000000 يا الله
| |
|
|
|
|
|
|
| |
Abd-Elrhman sorkati
Raja
lana mahdi
AlRa7mabi
فيس بوك
تويتر
انستقرام
يوتيوب
بنتيريست