كتب الكاتب الفاتح جبرا المتوفرة بمعرض الدوحة
|
|
 العزيز مانج/والمحنبك ود عزة عشان ما يلمز/تعالوا اونسكم
|
العزيز مانج
صبحك مساك الله بالخير وكل ويك اند وانت بخير
واذا ما في بلاد الخواجات كل اسبوع وانت بخير
تعرف لما كنا اصغر كدة شوية منك كنا مزبهلين بشكل غير عادي بأساطين الشعر الحديث والقصة في الوقت داك.. فينا البيحفظ دواوين او قصص او مقتطفات من القصص لبعض الادباء اللي كانوا في نظر شباب الايام ديك خطيرين جدا.. تلقى الواحد بقول القصيدة كدا كما لو كان بيتعبد ولا بصلي وحالة انفصام منقطع النظير... الفيتوري سند ود المكي صلاح احمد ابراهيم محمود درويش السياب امل دنقل بشرى الفاضل .. وعدد من اسماء ذلك الزمان اللماعة ما حاتذكرها كلها هسه ...الغريب جزء من الحاجات المفصومين بيها دي كان غامض او مرات عديم المعنى ..ولو تجرأ مسطح في المجموعة دي وقال انه المقطع او الكلام دا ما عنده معنى تلقى التانين هجموا عليه وقربوا يعلنوا خروجه عن الملة.. ولما يقول ليهم هسه المعني ده وين في الكلام ده؟ تلقاهم صوروا ليه معنى ما ليه أي صلة بالكلام المكتوب وفتفتوا الكلام الغريب كله واعادوا صياغته في معاني جميلة.. طيب المبدع منو هسه عليك الله؟ ..الكتبوا الكلام المامترابط ولا عنده معنى ولا هم الخلقوا معنى جميل من مافي؟ تلقى الشاعر والكاتب نفسه ما فكر في الفكروا هم فيه.. ومرات الكلام يكون عادي يعني ما خطير لكن هم يجتهدوا عشان يعملوه خطير وعنده معاني ما حصلت ..وبقدروا ..لكن بعد ده كله بكونوا لا زالوا مفصومين بكاتب النص الاصلي...مش بروحهم..غريب مش!؟
وتعال شوف لما القدال يكون عنده ليلة شعرية في بلاد الواق الواق ..تلقى الناس عايزة تموت عشان تحضر الليلة دي .. ولله يا محسنين يا ارباب العربات، والامر لله يا مشية بالرجلين...ولما محمد وردي حيغني في الجامعة تلقى اي مراهق جاي عشان يملا صدره بالحماس ويفش غبينته من الحكومة، وبعدين محمد وردي يقول ليهم نشيد كدا ويكب برميل موية باردة فيهم بمجموعة من الاغاني العاطفية ..يقوم العنده رفيق ينسى الحماس ويستمتل يعيش الاغنية وناس قريحتي راحت يقعدوا تاني يجيبوا سيرة البحر وهاك يا نقاشات يحسبونها فلسفية اجتماعية ويعيدوا تشكيل خارطة الوطن سياسيا واجتماعيا واثنيا ويختموا بالقصائد الجميل منها والمجمل بابداعهم.. والذ يوم يوم يكون شيخ الهداية عندو ندوة .. وفي نص الكلام يقعد يأشر لمجموعة قفشها مختلطة ويصر على انه الاولاد يقيفوا في سايد والبنات في سايد .. والقراية مش مهمة ..لما تقرب الامتحانات الكيزان والجبهجية حيتذكروا انه وقت التناحر أزف وانهم قربوا ينسوا انهم زمان بداية السنة كانوا بكرهوا بعض موت وتلقى الضبايح كيمان كيمان.. ولو الجماعة ما عندهم مزاج.. برضو مافي مشكلة.. الاساتذة حيضربوا عشان يزيدوا ليهم مرتباتهم...لأنهم رغم انه الجامعة مؤجرة ليهم بيوت لكن برضو ما بقدروا يشتروا الدوريات وزوجاتهم ما بقدروا يستعرضوا بالتياب ..وكيف يعني ما يستعرضوا ويلبسوا اي كلام ..والبرستيج؟ ... وتدور الايام ...حفاظا على البعاتــ دوث
المهم أنا كنت بنكش في الاوراق والكتب قبل أيام عشان أجمل بوست ضليل الضحى واعيد لوجهه ماء الحياة، لقيت قصيدة لمصطفى سند ...واحدة من اشهر قصايده كنت تلقى ناس الثانوي العالي وبرالمة الجامعات والمعاهد كلهم حافظنها .. ومصطفى سند دا على فكرة قريبي ..من بعيد (ما عارفة اتذكرت شتات ليه هسه ..وينك يا شتات؟) ..أنا ما بعرفه ولا بتذكر اني شفته فيس تو فيس لكن بعرف أخواته الظريفات ..أصهاره محي الدين فارس وشاعر العيون (نسيت اسمه هسه) اللي قال: ء
صدقت العيون
وكلام المحنة
اغراني بدلاله
لما علي حن
وقال لي كلمة طيبة
كانت منو حلوة
مين غيرو البيزرع
أيام عمري جنة
حاجة كدة زي دي ..قدتنا اختى الكبيرة زمان بأغاني صلاح مصطفى...طبعا الخطأ جايز لأني النوع البألف ما شاء في الاغاني
يعني يشربوا شاي المغرب واخواته الظريفات يستمتعوا باحلى جلسة شعرية
المهم يا سيدي اختم الموضوع قبل ما ينزعج أحد من عدم مناقشتي الجادة لمشاكل السودان.. بما معناه ما مدحت ومجدت قرنق وصبيت فكري ومعرفتي الشتائمية في راس البشير (مش الترابي لأنه هسه بطل مناضل في السجون) ..أنقل ليك قصيدة الاستاذ مصطفى سند اللي عترت عليها واتمنى تستمتع بيها
وطرحت قوس كمنجتي جسرا ببحر الليل
ثم هويت للقاع
متورم العينين تنبض عبر اسماعي
طبول العالم الهدار : لا تأسي لمن فاتوا
فبعض مساكن تبقى وبعض مساكن تنأى
فتدنيها المسافات
تعلم وحدك التحديق نحو الشمس والمقل النحاسية
مرايا تخطف الابصار لكن ليلنا الصاحي
وشرفتنا المسائية
على عينيك ، فوق رموشك التعبى ستارات ستارات
يضوع بنفسج الرؤيا وتخضر النجيمات
بكل أناقة الدنيا
تمدك بالظلال الزرق بالنغم الذي يهتز في الريح
بدندنة الأراجيح
بساعات يظل الشعر يلهث في مراكضها ويطويها
ويسكب روحه فيها
ويحلب قلبه المطعون فوق دروبها العطشى ليرويها
وأهتف أيها المنثال كالامطار أين زمان تلقانا
بساح الجمر نحرق في سبيلك سوسنات العمر
نضرع، ثم تأبانا
لعلك يا عذاب الليل كنت تزورنا كرها
وترحل قبل أن تأتي
ونحن نمزق الأعصاب ، نسمع دمدمات الوحي
خلف ستائر الصمت
ونرقب ساعة الميلاد ، برق خلاصنا
المرصود بين الآه والآه
تفرع أيها المنقاد وجهك في دروب الأمس
كان الآمر الناهي
أنا المحروم من دنياك لما غامت الرؤيا
ولفتني المتاهات
سقيت الناس من قلبي، حصاد العمر
ذوب عروقي الولهي... بأكواب من النور
أقبل كل من ألقى على الطرقات
من فرحي وألثم أعين الدور
كمنجاتي التي ضاعت تردد صوتها
المخمور يهدر في بحار الليل ، يهدر كالنوافير
|
|
 
|
|
|
|
|
|
|
|
Re: العزيز مانج/والمحنبك ود عزة عشان ما يلمز/تعالوا اونسكم (Re: rummana)
|
رمانة
البوست ده يدل على متابعاتك اللصيقة بالابداع والمبدعين ،بوست حى ومتحرك برغم اختلافى معاك فى كثير من الجوانب الواردة فيه ،لكن حبيت أوضح ما أحسسته بأنك متعددة المواهب وقارئة ممتازةوربما أنت مفكرة 
فمقدرتك على النقاش والدخول الى أى معترك فكرى ثقافى سياسى دينى تدل على سعة أفق واطلاع..لكنك مثلنا جميعا ولا أبرىء نفسى..سخنين شوية فى الاختلاف..ندعو للديمقراطية وفى نيتنا ممارستها ولكن طبعنا يغلب التطبع فى الكثير من الأحوال ذلك الطبع السودانى نادر المثال فى علو الصوت والسوط ومن ثم التحلق حول صينية الأكل كأن شيئالم يكن
لك التحية على هذا التخصيص
تحياتى
ودعزة
| |
|
|
|
|
|
|
|
|
 Re: العزيز مانج/والمحنبك ود عزة عشان ما يلمز/تعالوا اونسكم (Re: wadazza)
|
شكرا يا ود عزة لكن القال ليك منو أنا عايزاك تشكرني ولا تقول لي يا مبدعة؟
خذلتني والله
انا كنت عايزاك تلاحظ اللمز العملتو أنا
ووين كان؟
وعلى منو؟
وبعدين أنا انسانة ديمقراطية فعلا بس انت الما ملاحظ .. عشان بعض الناس بكونوا مشغولين بزعل روحهم من الاختلاف مع التانين فبتطشش الرؤية
الا في البيت الوضع يختلف
بس على مين؟ أولادي هسه كل ما احاول اجبرهم على شي يقولوا لي دي ما ديمقراطية..الله يسامح المدارس
مع انهم اطفال لسه يعني ليس من حقهم المطالبة بالديمقراطية في مواجهتي على الاطلاق لحد ما يصلوا سن الرشد أو يصبحوا أكثر نضجا ايهما اتي اولا
| |
|
|
|
|
|
|
|
|
|
Re: العزيز مانج/والمحنبك ود عزة عشان ما يلمز/تعالوا اونسكم (Re: rummana)
|
رمانة
العتب على اللمز من كترتو بقى مخنا تقيل فى فهمو..
انت ليه تلمزى ما تختى الأمور على بلاطة..
عموما شكرا وتانى ما تلمزى كويس اتفقنا
طبعا بالتأكيد قريت ما وراء سطورك لكن قلت نتدرب شوية على تلافى الهمز واللمز...
وعايزة تقولى الديمقراطية بتتقرى من جهتين عشان حكم السن؟
لك التقدير
تحياتى
ودعزة
| |
|
|
|
|
|
|
|
|
|
Re: العزيز مانج/والمحنبك ود عزة عشان ما يلمز/تعالوا اونسكم (Re: rummana)
|
الأخ أبو قوته
والله أنا ما عارفة قصة خالتو دي شنو كترت مش؟ مفروض أعترض...لكن ما بقدر لأني متعودة عليها مما كنت طفلة أنا من الوقت داك خالة فعلا وكمان بتهيأ لي خايل فيني صفة خالتو ولا انت رأيك شنو؟
وبعدين أنا جنيت؟ البخليني شنو اتشوبر وأكتب لي كلمة في بوست المتكلمين فيه الكتيابي ودا رين؟ وقتها نسمع بس أقصد نقرأ بس.. وما قلنا ليكم .. الصمت في حرم الجمال جمال
| |
|
|
|
|
|
|
|
|
|
Re: العزيز مانج/والمحنبك ود عزة عشان ما يلمز/تعالوا اونسكم (Re: manj)
|
اختنا رمانة
والله زكريتني مرة اخوي كان بقراء لينا في قصيده لعاطف خيري وكان خاشي فيها بكلياته ومندثر فيها والا هي المندثراه ما عارف انه ما شعر بي عمي جا داخل وقال ليه كدي وريني معنمي الكلام دا شنو
ود عمي اتحير ما عرف اقول لعمي شنو طوالي عمي قال ليه يا ولد ما تخلي الطرطشه البتعمل فيها دي
| |
|
|
|
|
|
|
|
|
|
Re: العزيز مانج/والمحنبك ود عزة عشان ما يلمز/تعالوا اونسكم (Re: 7abib_alkul)
|
الرحمابي
مانج
وحبيب الكل لكم تحياتي
الأخ الرحمابي
سعيدة باستمتاعك بقراية البوست
وشكرا لك أنت يا أخي على قراءتك ومشاركتك وقبلها بشكرك على ما تكتب في البورد وخاصة قصصك حيث اني معجبة بالقصة القصيرة واستمتع بقراءتها طبعا ما لم تكون من النوع البفصم أفراد مجموعتنا ديك من المبدعين لأنهم أصبحوا مشتتين في الارض وصعب التقاءهم جمعة بفتح الجيم وبالتالي لما اسطح لن أجد من يأخذني الى عمق في النصوص لم يلتقطته فهمي المتواضع
قريت ليك تعليق في بوست الخواض وحبيت أساهم بكلمة في شكر الخواض ثم غيرت رأي لأني لقيت اني لا فاهمة كلمات الاغنية موضوع البوست (طبعا لأنها مكتوبة باللغة العبرية) ولا سامعاها كمان... ومواصلة في حديث الذكريات اقول اني لما جيت هذا البورد وقلت ازيكم وشكرا يا بكري على حل مشكلتي في دخول البورد لقيت ناس كده ما بعرفهم برحبوا بي بحرارة غير عادية لما اتوهمت قلت يكونوا بعرفوني وأنا ما عارفة هم منو ..وبعدين لقيت القصة ما ليها صلة بي أنا بل هي حرارة موجودة في تحيتهم لكل الرواد الجدد .. ولا زلت أذكر من ضمن المرحبين الأخ عبدو والأخ شرنوبي..أما الخواض وسونا ( المريود فيما بعد) فكان عندهم مقدرة لا محدودة على نشر الفرح في هذا المكان لدرجة اني قربت أحسد اهلهم عليهم واتخيلت انه الحولهم اكيد بكونوا ملصوقين فيهم (زي القراد) لأنه من المستحيل يكون في انسان بضيع فرصة الفرح المتواصل بالتنازل عن قربهم.. يعني كنت أدخل البورد كده ألقاهم قاعدين أحس بأني ممكن اقعد بالساعات وانسى الحلة في النار لما تحرق.. اللهم زدنا من هؤلاء الذين يزرعون غربتنا بالفرح... ويا ليت ما تبخل علينا بالونسة انت برضو باقي ا لبحبوا الونسة الظريفة ما شوية في البورد ..ناس أبو جهينة والملا عمر واهل العوض وقرشو ومجموعة الوناسين ..وعلى سيرة الونسة أصابتني هسة حالة مزاج حادة لسماع أغنية قديمة وظريفة لمحمد ميرغني اسمها ..عاطفة وحنان يا ناس.. هسه الخواض ده ما بتكون عنده الأغنية دي؟
| |
|
|
|
|
|
|
|
|
|
Re: العزيز مانج/والمحنبك ود عزة عشان ما يلمز/تعالوا اونسكم (Re: rummana)
|
الخاله العزيزة
اشكر لك وقفت الشجاعة وحسن مساندتك لي
و اعتذر عن اكمال ما بدأناه هنارغم رغبتي في ذلك فالحديث معك لا يمل
ولكن لم يعد للكلام اي معني .. فقد تغير طعم كل شئ و تكشفت الحقائق
و اصبح التواجد هنا مجرد عبث لا يقدم و لا يؤخر
لذا سأترك المجال لمن يحسنون الكلام و الكتابة و التفكير
فوداعا و ابقي عشرة على الوصية
| |
|
|
|
|
|
|
|
|
|
Re: العزيز مانج/والمحنبك ود عزة عشان ما يلمز/تعالوا اونسكم (Re: manj)
|
العزيز مانج
للأسف ليست لي مقدرة النقد الأدبي ولا أفهم في متفاعلن متفاعلن متفاعلن .... وفعيل فعول فاعل ..وتلك الاشياء المضحكة (والتي هي قمة العلم طبعا لمن يفهمون مش أنا) واحكم فقط بتذوقي لما أقرأ وحسب هذا التذوق هناك ايقاع جميل ومطرب في القصيدة وعجبتني الحتة دي ( قول ليهو يا مغرور
هواك ما ليهو بصمه على الامان.... خطيرة بصمة على الأمان دي....
ومحن المشاعر ال يبعدن فى قلبى ما بتلقى السكن
تسكن تسكن قناديل المطر..تمام يا زول)... ونتمنى نشوف فياض شاعر شهير ومبدع مشهودله بالبصمة المميزة على الشعر السوداني ... ونتفصم بيه وبشعره حتى لما نسطح في فهم ما يقصد بقصايده ...تلميذ لسه يعني؟.. أنا شخصيا ما حأنتظره يشارك في البورد ويناديني حبوبة رمانة كفاية علي لحد خالتو بس ....
والغريب انه البورد مليان بعموم الأدباء ..وموجود كمان عدد معتبر من الموهوبين في مجال كتابة القصيدة والقصة القصيرة والنثر....لكن من الصعب تجد واحد من هؤلاء الأدباء يشارك بالرأي أو التعليق فيما يكتب هؤلاء الموهوبين ... يا ربي سر العزوف عن المشاركة والرأي شنو بالتحديد؟... واتذكرت اللحظة دي الاستاذ الصحفي الساخر جعفر عباس.. مشاركته كانت يتيمة لكنها جلبت ما توقعناه منها من الفرح وخلقت أثر طيب في النفس ..أصلي في أحيان كتيرة بتكيف من كتاباته ..و مرات بغيظني بدرجة ممتاز..المهم كان متوقع انهم يساهموا ولو مرة مرة بالتعليق...خاصة وانهم داخلين البورد بأسماؤهم الحقيقية مش زينا ...الأخت زقلونا والأخ نجضتونا...
ومرة تساءلت الأخت نهى جي حول هذا الموضوع وقدمت دعوة ليهم للتعليق على ما يكتبه البعض هنا لأن أي موهوب أو مبتدي بيتمنى يسمع رأي يساعده على التأكد من موطيء قدمه وتلمس طريق تجويد عمله....... كان في بوست مشع كدا في القصة القصيرة شارك فيه فيما أذكر رائعي الحضور ديك الجن ودريمز وآخرين ....كان قمة في الامتاع .....يعني نحن القارئين استمتعنا للغاية بمتابعة البوست وعبرنا عن ذلك الاعجاب...لكن أكيد انهم كانوا يفضلوا أن يشارك شخص يفهم أكثر في مجال النقد لأنه نقد الخبير هو الذي يساهم في ترقية العمل...نحن غايتو بنقرأ ونستمتع ... لكن أنا مزعلني انه الشباب الجميل يبدا يتكاسل من الكتابة ..اذ وين هسه ابداعات دريمز وديك الجن ونهى جي...وغيرهم كتير
| |
|
|
|
|
|
|
| |
rummana
wadazza
abuguta
AlRa7mabi
7abib_alkul
فيس بوك
تويتر
انستقرام
يوتيوب
بنتيريست