ازيكم من سودان الاحباطات الى الان!

الاخت انسانة

اولا حمد لله علي سلامتك

ثانيا ياستي المشاهد النقلتيها دي هي حقيقة الوضع هناك و يا له من وطن مقلق بالعودة اليه

لكن اسمعي نصيحة مجرب قبلك..لا تبحثي عن النظافة والنظام ( ولا حتي النظام العام ) لانك لن تجديها اتركي التفكير في العمارات وفي الاضاءة وفي الشوارع النظيفة وفي السيارات وفي كل هذه الاشياء فهو حلم برجوازي لن نصل اليه قريبا

ابحثي عن حضن جدتك وجدك ابحثي عن جلسه جميله مع افراد العائله والصديقات اذا كان هناك زمن ابحثي وزوري الجيران تكتحي بتراب الشارع ( وانا اعرف يمكن ان يحدث لك ذلك بدون مجهود ) اذهبي لزيارة الخالات والاعمام والخيلان عافري ودافري في المواصلات وارشي ورشي ومشي امورك ..احضري حفله وشاهدي الذين حولك كانهم من كوكب اخر من النظافة والترتيب وكانهم لا ينتمون لهذا الواقع..ابحثي في وجوه الناس التائه ابحثي عن كل المتناقضات ...وعودي من اجازتك سالمة ..اخدي دش في ونومي علي هذه الذكريات ..ورغم عنك ستفكرين بالعودة مرة اخري الي السودان لانه بكل بساطه هذا هو السودان وحتي الان ....


ولك الود وانت في حضن الوطن المقلق

تنقو

بخاف

تحياتي

ما داير اتصدر لي كلامك ولكن ياريت لو تقوم تورينا شنو الما قالتو
صاح في كلامهابالنسبة للوصف دا... علي الاقل امكن تكون في حاجات نحنا ما شفناها

ولك الود


تنقو

ياعزيزي بخاف نقل الحقائق او الانطباع بكل امانه لا يعني اننا تجردنا من الوطنية ..ولعل اكبر مشكلة تواجه السودان الان هي اننا لا نريد ان نري الحقائق ...
1/ عزيزي بخاف يا مغترب ... دي نظرية اقتصادية جديده ..( كترة المطاعم مؤشر ان هناك قوه شرائية جيدة) ...وقلت لي الناس يملكون المال للاكل في المطاعم ..كدي نسالك بالراحة كدا ..تعرف راتب الدكتور كم ؟ وراتب الاستاذ مربي الاجيال كم ؟ وراتب موظف عادي من اي درجة وظيفية كم ؟ وراتب العامل باليومية كم ؟ اتحداك ان ترتب لي المصروفات الشهريه لاي واحد من هؤلا بافتراض ان عنده طفلين فقط واثبت لي ان هناك فائض للشراء من المطاعم او حتي من سوق الخضار .

2/ قلت لي شراء عربية وايجار عربية ...كدي اعمل الحسبة في النقطه الفوق دي وكان فضلت معاك حاجة حاول تدخلها في نقطه شراء عربية او ايجار عربية ....اما لو كنت مغترب امشي خلص ضرايبك وزكاتك ..ورسومك والالزامية ..وفضائيه....ورسوم ترع ومجاري ..ودمغة شهيد ودفع كشف في عرس الشهيد زاتو ..... وأخري ( واخري دي دائما بتعمل لي نفسيات ) ورسوم مغادرة ..دي اعملها في الاول ولو عندك التزامات خلصها وبعد داك كان بتقدر تشتري عربية او تستأجر عربية وريني انت مغترب وين وشوف لي معاك طريقة اجي عندكم ...

3/ قلت لي ( الشارع الوحيد المضاء اضاءة جيدة هو شارع المطار ) هل تعتقد ان السودان هو شارع المطار فقط ؟؟ يعني كل السودانيين ديل يجو يسكنو في شارع المطار ولا شنو ؟ وبعدين كدي اتصل اسة بالسودان واسالهم عن قطوعات الكهرباء ... في الصيف النيل انحسر والاستهلاك كبير عشان كدا بتقطع ..وفي الخريف الطمي سد الطوربينات عشان كدا بتقطع وفي الشتاء ما عارف شنو .( الحمد لله ربيع زاتو ما عندنا ) السنة دي قالو عشان محطة بري ومحطة امدرمان اتحرقت ( ارجع لي بوست نايل ) ..حجوه ام ضبيبنة دي بنسمع بيها من ما قمنا . كدي وريني الجده فيها شنو اسة يعني تقلصت ساعات القطع الي ساعتين فقط ببركة المشروع الحضاري ؟ ..والله دا برضو مؤشر ..لكن مؤشر انو نحنا زي ما احنا والدنيا كلها تجاوزت التفكير في البديهيات والاساسيات دي ونحن لسة بنتكلم عن مويه قطعت وكهرباء جات .

4/ ما قلنا مافي زول يكون غنيان ولا مافي زول يكون فقير لكن علي الاقل هناك حقوق للمواطن يجب ان يتساوي فيها الجميع ..الامن ... والصحة ..والتعليم .. كدي انظر لهذه الاشياء نظرة متانية كدا وشوف ياتو واحدة متوفره فيهم والناس متساوية فيها ؟.... والطبقة المتوسطه اسة كلها بره السودان ودي طبقة المثقفين والنيرين والنقابيين المفروض يخلو البلد تمشي لي قدام لكن ناس المله عمر ديل قالو : ( يا معانا يا مع الخيانة ) وارجع لي خطابات البشير سابقا ..

5/ ( بلدنا اسمح منها مافي ) من ناحية طيبة وحنية وحنين اتفق معك ....لكن كان سماحة المنظر والشكل ..ما تشكر لي الراكوبه في عز الخريف .. انت قلت امدرماني ابدا من اي مكان ووريني وين السماحة من( الصالحة... والي.... مبروكه )
( واقصد المنظر ) اللاقاك هناك ..وبعد ما توريني وصف لي غرب الحارات معاك بالمرة . رغم انو دي ما بلدنا كلها لانها بلد تمتد من واو والي حلفا .

وبعد القلناهو دا كلو ياها بلدنا وبنحبها ..كلامنا دا من منطلق حب وليست من منطلق نقد فقط ..اول واحدة من ادوات الاصلاح ان تري الامور بمنظار حقيقي ومتجرد وتعترف ان هناك مشكلة ..اما ان تمارس نظريه النعامة والرمل ..مع نفسك و تريدنا ان نصدقها سيكون هذا هو حالنا الي يوم الدين . وكل ما واحد يقول دا غلط ودا ما جميل الناس تجي ناطة ليهو في حلقو ...........
قال البلد ماشة لي قدام قال ..والله قدام دا الا كان بقي حركة ورا ونحن ما عندنا خبر....
... .ويا بخاف خاف الله علي عقولنا .


تنقو