|
|
 من تبيت .. من تاتيت .. من شبيت ،، وعرّافـة إسماعين
|
يا عرّافة لو بتعرفي
لو بتشفِي
لو بتكشفِي
علم الغيب
وحاتك
هاكي .. هاكي .. كفِي
***
سِنين في الدنيا
دي ضايع
كمان صايع
وشايل الويل
وسهر الليل
وكل الميل
على كتفِي
حمول
بترجِف الرجّاف
إتوفيت
ما كليت
ما مليت
ما هميت
شِلت الشيلة .. واضعفي
يا عرّافة
شِن بتقولِي
في حظي
التعيس مكفي
***
شِموعي
تضوي درب الناس
وانا
واحسرتِي مطفي
أحس بالغربة
رغم الدار
رغم الجار
وحيد
يا غربتي .. منفي
***
بسافِر يا مراكب الشوق
وفي اللجّان
أصارع الليل
فوا حزني
ووا .. أسفي
***
يا عرّافة
من تبيت
من تاتيت
من شبيت
شُفت الهول
أمامي جبال
ومن خلفي
***
محل قبّلت
ألقى الصيف
سموم شربت
خدار جرفي
شِن بتقولي
يا عرّافة
كان وصفك
متل وصفِي
ــــــــــ
|
|
 
|
|
|
|
aboalkonfod
ابو جهينة
فيس بوك
تويتر
انستقرام
يوتيوب
بنتيريست